ၵူၼ်းဢႃႇယု 30 ၶႂ်ႈလၢတ်ႈၼႄ ၵူၼ်းဢႃႇယု 20

1. ယႃႇႁိပ်ႈၸႂ်ႉၸၢတ်ႈပၢၼ်ႁဝ်းၼၼ်ႉၼႃႇၽႅဝ် ႁဝ်းယင်းမီးၶၢဝ်းယၢမ်ႈထႅင်ႈတင်းၼမ်ယူႇ ၵူၺ်းၵႃႈယႃႇလူမ်လၢမ်ထိုင်တီႈဢမ်ႇမီးၽႅၼ်ၶၢဝ်းၼႃႈ။
2. ၵူၼ်းဢၼ်လီတေႃႇႁဝ်းၼၼ်ႉ မီးၵႃႈၶၼ်လိူဝ်သေငိုၼ်းတွင်း ၸႂ်ႉၶၢဝ်းယၢမ်းၸွမ်းၵေႃႉႁၵ်ႉႁဝ်းလႄႈၵေႃႉမႆႈၸႂ်ႁဝ်းၼၼ်ႉလီလီလႄႈ။
3. ယႃႇၵူဝ်တေတူၵ်းသုမ်း လွင်ႈတူၵ်းသုမ်းၼၼ်ႉႁူႉတိုၼ်းပၼ်တွၼ်ႈသွၼ်ယဝ်ႉ။
4. ၵဵပ်းႁွမ်ငိုၼ်းဝႆႉၸဵမ်ယၢမ်းလဵဝ်လႄႈ သမ်ႉဝႃႈမၼ်းမီးဢေႇၵေႃႈယဝ်ႉ မၼ်းတေပဵၼ်တၢင်းယၢမ်ႈႁဝ်းၵႂႃႇတေႃႇၸူဝ်ႈၼၼ်ႉယဝ်ႉ။
5. တူၺ်းထိုင်ပၢႆးယူႇလီတူဝ်လႄႈၸႂ် ဢွၵ်ႇပၼ်ဢဵၼ်ႁႅင်းယူႇတႃႇသေႇ ၵိၼ်တၢင်းၵိၼ်ဢၼ်ပၼ်ၽွၼ်းလီ ၼွၼ်းပၼ်ဢိမ်ႇဢိမ်ႇ။
6. ၽိုၵ်းၽွၼ်ႉၼမ်ႉၵတ်ႉႁဵၼ်းႁူႉလွင်ႈမႂ်ႇမႂ်ႇယူႇတႃႇသေႇ ၶူင်းၵၢင်ႁဝ်းၼႆႉမၼ်းလႅၵ်ႈလၢႆႈဝႆးၼႃႇ တေလႆႈၽွမ်ႉတႃႇလႅၵ်ႈလၢႆႈၸွမ်းယဝ်ႉ။
7. ယႃႇဢဝ်ၵႂႃႇတႅၵ်ႈၼိူင်းတင်းၸၢတ်ႈပၢၼ်ပိူၼ်ႈ ၽႂ်ၵေႃႈယဝ်ႉတိုၼ်းမီးသဵၼ်ႈတၢင်းတူဝ်ၵဝ်ႇ။
8. ႁႂ်ႈမေႃၸတ်းၵၢၼ်ၶၢဝ်းယၢမ်း မေႃၸတ်းၵၢၼ်ဢၼ်လႂ်လမ်ႇလွင်ႈဢမ်ႇလမ်ႇလွင်ႈႁႂ်ႈလီ။
9. မေႃႁဵၼ်းႁူႉ မေႃႁၢၼ်ႉၸႂ်ၸွမ်းလွင်ႈဢၼ်မီးယူႇလႄႈ ယႃႇၵိုတ်းလိုဝ်ႈၽိူမ်ႉထႅမ်ၼမ်ႉၵတ်ႉတူဝ်ၵဝ်ႇထႅင်ႈ။
10. ယႃႇပႅတ်ႈလွင်ႈၼွၼ်းၾၼ်ႁဝ်း ၵူၺ်းၵႃႈႁႂ်ႈမေႃယွမ်းႁပ်ႉလွင်ႈပဵၼ်တေႉ ႁႃတီႈလီႁဝ်းႁႂ်ႈထူပ်း။
11. မေႃထဵင်ပိူၼ်ႈၽွင်ႈ ဢမ်ႇလူဝ်ႇဢဝ်ၸႂ်ၽႂ်ၵူႈၵေႃႉ ယွၼ်ႉႁဝ်းဢမ်ႇၸၢင်ႈႁဵတ်းႁႂ်ႈၽႂ်မႃးႁၢၼ်ႉၸႂ်ၸွမ်းႁဝ်းလႆႈ။
12. ၸႂ်ႉသူဝ်ႇသႄႇမီႇတီႇယႃႇ ႁႂ်ႈမီးသတိ ယႃႇပၼ်ႁႂ်ႈမၼ်းၵုမ်းၵမ်ၸၢတ်ႈပၢၼ်ႁဝ်းၼႃႇပူၼ်ႉ။
13. ယႃႇလိုမ်းပၼ်ၶၢဝ်းယၢမ်းတူဝ်ၵဝ်ႇ ႁႃၶၢဝ်းယၢမ်းယူႇႁင်းၵူၺ်းၽွင်ႈ ႁဵတ်းလွင်ႈဢၼ်ၸဝ်ႈၵဝ်ႇၵျိူၵ်ႈ။
14. မေႃႁဵၼ်းႁူႉၸတ်းၵၢၼ်ၸႂ်တူဝ်ၵဝ်ႇ ၵုမ်းထိင်းလွင်ႈၸႂ်လမ် ၸတ်းၵၢၼ်လွင်ႈသုၵ်ႉၸႂ်ႁႂ်ႈလႆႈ။
15. ယႃႇၵူဝ်တႃႇယွၼ်းတၢင်းၸွႆႈထႅမ်ပိူၼ်ႈ မိူဝ်ႈႁဝ်းလူဝ်ႇ ၵွပ်ႈပိူဝ်ႈဢမ်ႇမီးၽႂ်ၶႅၼ်ႇၵႂႃႇၵူႈမဵဝ်း။
16. မေႃၶႂၢင်းပၼ်ပိူၼ်ႈလႄႈတူဝ်ၵဝ်ႇ ယႃႇၵဵပ်းဝႆႉလွင်ႈၸဵပ်းၸႂ်သႂ်ႇတူဝ်ၼႃႇၽႅဝ်။
17. လူင်းတိုၼ်းပၼ်တူဝ်ထူပ်းၸၢတ်ႈပၢၼ် ၵၢၼ်ဢွၵ်ႇၶၢဝ်းတၢင်း၊ ႁဵၼ်းႁူႉလွင်ႈမႂ်ႇမႂ်ႇ သၢင်ႈလွင်ႈမၢႆတွင်းလီလီ။
18. ယႃႇပၼ်ႁႂ်ႈတၢင်းၵူဝ်ၵိုတ်းလိုဝ်ႈလွင်ႈဢၼ်ႁဵတ်းႁႂ်ႈတူဝ်ၵဝ်ႇတေလႆႈလီၵႂႃႇထႅင်ႈ ႁတ်းဢွၵ်ႇၼွၵ်ႈၶွပ်ႇၽွင်ႈ။
19. ၼပ်ႉယၢမ်တၢင်းႁၼ်ထိုင်ဢၼ်ပႅၵ်ႇပိူင်ႈ ပိုတ်ႇၸႂ်ႁပ်ႉထွမ်ႇပိူၼ်ႈ သမ်ႉဝႃႈဢမ်ႇႁၼ်လီၸွမ်းၵေႃႈယဝ်ႉ။
20. ယႃႇလိုမ်းလုမ်းလႃးပေႃႈမႄႈ ပၼ်ၶၢဝ်းယၢမ်းယူႇၸွမ်းၼႃႈႁိူၼ်း ယွၼ်ႉၶၢဝ်းယၢမ်းၽၢၼ်ႇပူၼ်ႉဝႆးႁႅင်းၼႃႇ။
21. လဵပ်ႈႁဵၼ်းလွင်ႈၵၢၼ်ငိုၼ်း ၵၢၼ်လူင်းတိုၼ်း တႄႇၸဵမ်တီႈၼႆႈၵႂႃႇလႄႈ ယႃႇပွႆႇႁႂ်ႈမၼ်းပဵၼ်လွင်ႈလီၵူဝ်ၼႃႇၽႅဝ်
22. ႁဵတ်းႁႂ်ႈႁူႉၸၵ်းတူဝ်ၵဝ်ႇၼမ်မႃး ႁူႉတီႈၵႅၼ်ႇၶႅင် တီႈဢူၼ်ႈဢွၼ်ႇ လွင်ႈၶႂ်ႈလႆႈၶႂ်ႈပဵၼ်တူဝ်ၵဝ်ႇ။
23. ယႃႇသုမ်းၶၢဝ်းယၢမ်းၸွမ်းၵူၼ်းၼမ်ၼႃႇၽႅဝ် ႁတ်းတတ်းၶၢတ်ႇၽွင်ႈသင်ဝႃႈမၼ်းၸမ်ပဵၼ်။
24. ၽိုၵ်းသိုဝ်ႇသၢၼ်ႁႂ်ႈၸႅင်ႈလႅင်း ၵူၺ်းၵႃႈ ႁႂ်ႈမီးလွၵ်းလၢႆးၵၢၼ်ၸႂ်ႉEQ။
25. ယႃႇလိုမ်းၵဵပ်းလွင်ႈမၢႆတွင်းလီလီ ထႆႇၶႅပ်းႁၢင်ႈ မၢႆတွင်းဝႆႉ ယွၼ်ႉလွင်ႈမၢႆတွင်းၼၼ်ႉတေၸၢင်ႈၸၢင်ႁၢႆၵႂႃႇၸွမ်းၶၢဝ်းယၢမ်း။
26. ႁူႉမေႃယိၼ်းၸူမ်းလွင်ႈဢၼ်ႁဵတ်းလႆႈ ဢၼ်လဵၵ်ႉလဵၵ်ႉဢွၼ်ႇၸဝ်ႈၵဝ်ႇ ဢမ်ႇလူဝ်ႇလႆႈပႂ်ႉႁႂ်ႈထိုင်ယိူင်းမၢႆလူင်ၵေႃႈလႆႈ။
27. မေႃႁဵၼ်းႁူႉယူႇၸွမ်းတူဝ်ၵဝ်ႇႁႂ်ႈလႆႈ ဢမ်ႇလူဝ်ႇၵူဝ်ဝႃႈတေငဝ်။
28. ယႃႇပွႆႇႁႂ်ႈပိူၼ်ႈမၵ်းမၼ်ႈပၼ်တၢင်းသိူဝ်းႁဝ်း ႁဝ်းၵူၺ်းဢၼ်တေႁူႉဝႃႈတူဝ်ၵဝ်ႇၼၼ်ႉတေမီးတၢင်းသိူဝ်းလႆႈ။
29. လုမ်းလႃးပၢႆးယူႇလီၶဵဝ်ႈႁႂ်ႈလီ ယွၼ်ႉမၼ်းတေယူႇၸွမ်းႁဝ်းၵႂႃႇတေႃႇၸူဝ်ႈ။
30. လိုၼ်းသုတ်း ႁႂ်ႈယုမ်ႇယုမ်တူဝ်ၵဝ်ႇ သူၼၼ်ႉၵတ်ႉၶႅၼ်ႇလႄႈ မီးၼမ်ႉၵတ်ႉလိူဝ်သေဢၼ်သူႁူႉဝႆႉလူးၵွၼ်ႇ။

ပိၼ်ႇ-ငဝ်မွင်မိုတ်းမူဝ်း