ယွၼ်ႉၶေႃႈၵႂၢမ်းဝႃႈ “ဢမ်ႇပဵၼ်ၵႂႃႇလႆႈ” ၼၼ်ႉ မၼ်းဢမ်ႇပဵၼ်ၵႂႃႇလႆႈတေႉႁႃႉ၊ ၸဝ်ႈၵဝ်ႇသမ်ႉ လူင်းမိုဝ်းႁဵတ်းယဝ်ႉႁိုဝ်၊ ၶတ်းၸႂ်တဵမ်တီႈယဝ်ႉၼႄႇ၊ ယွၼ်ႉသင်လႄႈမၼ်းသမ်ႉပဵၼ်ၵႂႃႇဢမ်ႇလႆႈလႃႇ ၼၼ်ႉယဝ်ႉ တေပဵၼ်ယွၼ်ႉသင်ၼေႃ။
မိူဝ်ႈဝူၼ်ႉသေၸိူဝ်ႉသေလွင်ႈဢွၵ်ႇမႃးဢၼ်ပႅၵ်ႇမႂ်ႇ၊ မိူဝ်ႈၶႆႈလၢတ်ႈၼႄပိူၼ်ႈ ဢမ်ႇဝႃႈၵူၼ်းၸမ်တူဝ်ၵေႃႈယဝ်ႉ မိူဝ်ႈဝႃႈ တေႁဵတ်းၸိူင်ႉၼၼ်ၸိူင်ႉၼႆ တေၵႆႉလႆႈၶေႃႈတွပ်ႇမႃးဝႃႈ “မႂ်းႁဵတ်းဢမ်ႇလႆႈ၊ မၼ်းဢမ်ႇပဵၼ်လႆႈလေႃႇ” ၶေႃႈၵႂၢမ်းၸိူဝ်းၼႆႉ ၵႆႉငိၼ်းမိုတ်ႈႁူထိုင်တီႈ ဢမ်ႇပႆႇလႆႈႁဵတ်း သမ်ႉပေႃးယွမ်းသုမ်းၵႂႃႇယဝ်ႉ။
ၵဝ်ႁဵတ်းဢမ်ႇလႆႈ မၼ်းယၢပ်ႇၼႃႇ၊ တေႃႈၼင်ႇပိူၼ်ႈတမ်ႉဢမ်ႇႁဵတ်း ၵဝ်တေႁဵတ်းႁိုဝ်ႁဵတ်းလႆႈ၊ ၵဝ်ဢမ်ႇမီးၼမ်ႉၵတ်ႉၸိူင်ႉၼင်ႇပိူၼ်ႈ ၵဝ်ဢမ်ႇႁဵတ်းလႆႈလေႃႇ တေႃႈၼင်ႇၸဝ်ႈၵဝ်ႇၵူၺ်း ယင်းဝူၼ်ႉဝႃႈ ႁဵတ်းဢမ်ႇလႆႈယဝ်ႉ တႃႇတေႁဵတ်းၵႂႃႇလႆႈၼၼ်ႉ မၼ်းတေပဵၼ်ယူႇႁိုဝ်။
မိူဝ်ႈမီးယိူင်းဢၢၼ်း မီးလွင်ႈဢၼ်ၶႂ်ႈႁဵတ်းၶႂ်ႈပဵၼ် ၵူၺ်းၵႃႈ ဢမ်ႇမီးႁႅင်းတႃႇသိုပ်ႇသူႈတေႃႇ တႃႇတေပဵၼ်ၵႂႃႇလႆႈဝႃႈ “မၼ်းဢမ်ႇပဵၼ်ၵႂႃႇလႆႈ” ဢၼ်ဝႃႈၼၼ်ႉ ႁူႉမၼ်းတိုၼ်းပဵၼ်ၼၼ်ဝႆႉယဝ်ႉ။ တၢင်းယိူင်းဢၢၼ်း ပဝ်ႉမၢႆ မီးၼမ်သေလၢႆ၊ ဝူၼ်ႉၼမ်ၵေႃႈ လႆႈတင်းဝူၼ်ႉၵူၺ်းႁိုဝ်၊ ဝူၼ်ႉၵႂႃႇဝူၼ်ႉမႃး သမ်ႉဝူၼ်ႉၺႃးဝႃႈ ဢမ်ႇပဵၼ်လႆႈယူဝ်ႉၼႆထႅင်ႈ ဢမ်ႇပႆႇလႆႈႁဵတ်းတူၺ်း မၼ်းႁိုဝ်တေႁၼ်ၼမ်ႉႁၼ်တူဝ်လႆႈ၊ မိူဝ်ႈတၢင်းဝူၼ်ႉႁဝ်း ဢမ်ႇပိုတ်ႇပၼ်ႁႂ်ႈမၼ်းပဵၼ်လႆႈ ၵူႈလွင်ႈတိုၼ်းပဵၼ်ဢမ်ႇလႆႈ ယူႇယဝ်ႉ။
ႁဝ်းယုမ်ႇယမ်ၸိူင်ႉႁိုဝ်ၵေႃႈ တေႃႈတေပဵၼ်ၸိူင်ႉၼၼ်ယူႇတႄႉ၊ သင်ယုမ်ႇဝႃႈ မၼ်းပဵၼ်ၵႂႃႇဢမ်ႇလႆႈ ႁူႉမၼ်းတိုၼ်းပဵၼ်ၵႂႃႇဢမ်ႇလႆႈၵူၺ်း၊ ၵူၺ်းၵႃႈ သင်ဝႃႈဢၢၼ်းတေပဵၼ်ၵႂႃႇလႆႈၼႆၸိုင် လူင်းမိုဝ်းႁဵတ်းသၢင်ႈၵႂႃႇ လႄႈ ၶႂ်ႈပဵၼ်သင်ၶႂ်ႈႁႂ်ႈမၼ်းပဵၼ်ၸိူင်ႉႁိုဝ်ဢၼ်ဝႃႈၼၼ်ႉ မၼ်းတိုၼ်းပဵၼ်မႃးလႆႈယူႇ။ ႁတ်းဝူၼ်ႉႁတ်းႁဵတ်းႁတ်းသၢင်ႈ လႄႈ ပၢႆးဝူၼ်ႉႁဝ်းၼၼ်ႉ မၼ်းတေဢွၼ်ႁဝ်းၵႂႃႇၸူးသဵၼ်ႈတၢင်း ဢၼ်ႁဝ်းၶႂ်ႈပဵၼ်ၼၼ်ႉလႆႈယူႇၵူၺ်း။
လွင်ႈဢၼ်ၶႂ်ႈမီးၶႂ်ႈပဵၼ်ၼၼ်ႉ ဢမ်ႇၸႂ်ႈဝႃႈ ပႂ်ႉႁႂ်ႈပိူၼ်ႈမႃးႁဵတ်းပၼ်လႄႈ မၼ်းၸင်ႇပဵၼ်မႃး၊ မိူဝ်ႈၸဝ်ႈၵဝ်ႇႁဵတ်းၼၼ်ႉယဝ်ႉ မၼ်းၸင်ႇပဵၼ်မႃးလႆႈ ၼင်ႇဢၼ်ၸဝ်ႈၵဝ်ႇၶႂ်ႈပဵၼ်၊ မိူဝ်ႈဝူၼ်ႉဢၢၼ်းတေႁဵတ်းသင်ၵေႃႈ တႄႇႁဵတ်းၵႂႃႇယၢမ်းလဵဝ်ၼႆႉလႄႈ ၶၢဝ်းယၢမ်းမိူဝ်ႈလဵဝ်တီႈလဵဝ်ၼႆႉၵူၺ်း ဢၼ်ႁဝ်းၸၢင်ႈလႅၵ်ႈလၢႆႈမၼ်းလႆႈ ဢမ်ႇၸႂ်ႈမိူဝ်ႈၽုၵ်ႈႁိုဝ်ၸၢတ်ႈၼႃႈ။ သင်မိူဝ်ႈၽုၵ်ႈယင်းတိုၵ်ႉမိူၼ်ၵဝ်ႇယူႇ၊ ၸၢတ်ႈၼႃႈၵိူတ်ႇမႃးထႅင်ႈၵေႃႈ တိုၵ်ႉမီးပၢႆးဝူၼ်ႉ “မၼ်းဢမ်ႇပဵၼ်ၵႂႃႇလႆႈ” ယူႇၸိူင်ႉၼႆ ႁူႉမၼ်းတိုၼ်းမိူၼ်ၼႆၵူၺ်း။
ဢမ်ႇဝႃႈတေႁဵတ်းသင်ၵေႃႈ မၼ်းတိုၼ်းမီးလွင်ႈၶဵင်ႇတႃႉယူႇတႃႇသေႇယဝ်ႉ၊ လွင်ႈၶဵင်ႇတႃႉၸိူဝ်းၼၼ်ႉ မၼ်းဢွၼ်ႁႂ်ႈႁဝ်းၶႂ်ႈသုတ်ႉႁူၼ်၊ ၶႂ်ႈယွမ်းသုမ်းလႄႈ ၶေႃႈၵႂၢမ်းဢၼ်ဝႃႈ ဢမ်ႇပဵၼ်ၵႂႃႇလႆႈၼႆၼၼ်ႉၵေႃႈ တေၽုတ်းပေႃႇဢွၵ်ႇမႃးၼႂ်းႁူဝ်ဢမ်ႇယဝ်ႉဢမ်ႇဝၢႆး။ သမ်ႉဝႃႈ တေလူမ်ႉၵမ်းယဝ်ႉၵမ်း၊ ႁဵတ်းဢမ်ႇလႆႈလၢႆပွၵ်ႈလၢႆဢၼ်၊ တူၵ်းသုမ်းၵႂႃႇယဝ်ႉသေတႃႉ မိူဝ်ႈမီးၶေႃႈၸုၵ်းမၼ်ႈ ၼိူဝ်ယိူင်းဢၢၼ်းၸဝ်ႈၵဝ်ႇယူႇ၊ မိူဝ်ႈယင်းဢမ်ႇပႆႇသုတ်ႈႁူၼ် ယင်းတိုၵ်ႉၶတ်းတႃႉၸွမ်းမၼ်းယူႇၼၼ်ႉ မၼ်းတိုၼ်းတေပဵၼ်ၵႂႃႇလႆႈယူႇ။
ဢမ်ႇဝႃႈတေလူမ်ႉၸူမ်ၵႂႃႇယဝ်ႉ၊ သုမ်းၵႂႃႇယဝ်ႉ၊ ႁဵတ်းၼင်ႇၵႃႈႁဵတ်းလႆႈတဵမ်ထူၼ်ႈယဝ်ႉ ယင်းဢမ်ႇပဵၼ်မႃးၼင်ႇၵၢင်ၸႂ်၊ ဢမ်ႇပဵၼ်မႃးလႆႈၼင်ႇယိူင်းဢၢၼ်းၼႆသေတႃႉ ဢၼ်တူၵ်းသုမ်းယူႇၼႆႉၵေႃႈ တေပဵၼ်သိၵ်ႈၶူဝ်လႆ ဢၼ်ၵမ်ႉယၼ်ပၼ်ႁႂ်ႈၵႅၼ်ႇၶႅင်ၶိုၼ်ႈမႃးထႅင်ႈ ၼၼ်ႉယဝ်ႉ။
ယိူင်းဢၢၼ်းႁဝ်း ဢၼ်မီးၼၼ်ႉ မၼ်းတေပဵၼ်ၵႂႃႇဢမ်ႇလႆႈတွၼ်ႈတႃႇပိူၼ်ႈႁိုဝ်၊ ဢမ်ႇပႆႇပဵၼ်လႆႈၼႂ်းၶူင်းၵၢင်လူင်ၼႆႉၵေႃႈ မိူဝ်ႈၸဝ်ႈၵဝ်ႇလူင်းမိုဝ်းႁဵတ်းၼၼ်ႉ ၸင်ႇတေႁူႉလႆႈယဝ်ႉ၊ မၼ်းတေပဵၼ်ႁိုဝ်ဢမ်ႇပဵၼ် ယူႇတီႈၸဝ်ႈၵဝ်ႇတေဝူၼ်ႉႁဵတ်းသၢင်ႈၵူၺ်း ယူႇယဝ်ႉ။
ၼပ်ႉယမ်ၽူႈလူလိၵ်ႈႁဝ်းၶဝ်ယူႇဢေႃႈ
ပၢႆၵမ်−သႅၼ်ငဝ်း
21/08/2023
