❝ ပိူင်ပဵၼ်တေႉၼႂ်းၸူဝ်ႈပၢၼ် ❞
“ ငိုၼ်း ” ၵူၼ်းၵမ်ႈပႃႈၼမ်လၢတ်ႈဝႃႈ ဢမ်ႇသိုဝ်ႉ
လႆႈၵူႈလွင်ႈ ၊ ၵူၺ်းယွၼ်ႉငိုၼ်းသေ
သူလႆႈမႃးပဵၼ်လုၵ်ႈၸၢင်ႈၵူၼ်းႁဵတ်းၵၢၼ်ပိူၼ်ႈၵူၺ်းဢမ်ႇၸႂ်ႈႁ ?
“ ၼႃႈႁိူၼ်း ” ပေႃးထွမ်ႇတူၺ်းၸိုဝ်ႈမၼ်းတႄႉလီၵျေႃႇလီသိူဝ်းဝႆႉ ၊
ၵူၺ်းယွၼ်ႉၶေႃႈၵႂၢမ်းဢၼ်ဝႃႈၼႃႈႁိူၼ်းၼႆၼၼ်ႉသေ
သူပေႃးလႆႈၽၢတ်ႇယၢၼ်ဝၢၼ်ႈၵိူတ်ႇမိူင်းၼွၼ်းသူမႃးဢမ်ႇၸႂ်ႈႁ ?
“ ပေႃႈမႄႈ ” ႁဝ်းဝူၼ်ႉဝႃႈၶဝ်ဢမ်ႇပၼ်သင်ႁဝ်းလႆႈ ၊ ၵူၺ်းတီႈတေႉယဝ်ႉၶဝ်ၵေႃႈၸွႆႈထႅမ်ႁဝ်းၼင်ႇၶဝ်ပွင်ပဵၼ်လႆႈ
လိူဝ်သေဝႃႈႁဝ်းဢမ်ႇႁူႉဢမ်ႇမေႃပွင်ႇၸႂ်ပၼ်ၶဝ်ၵႃႈၼၢၼ်ႉၵူၺ်း ။
“ ၶၢဝ်းယၢမ်း ”ႁဝ်းဝူၼ်ႉဝႃႈႁဝ်းမီးၶၢဝ်းယၢမ်းၼမ်ၼႆသေ၊ ႁဝ်းယွၼ်းၽၢတ်ႇယၢၼ်ပေႃႈမႄႈႁဝ်းမႃးတွၼ်ႈတႃႇၼႃႈႁိူၼ်းႁဝ်းတေမိူၼ်ပိူၼ်ၼႆ၊ ၵူၺ်း
ႁဝ်းလိုမ်းဝႃႈပေႃႈမႄႈႁဝ်းၼၼ်ႉၸွင်ႇတေယူႇထိုင်လႆႈဝၼ်းႁဝ်းတေပွၵ်ႈၶိုၼ်း ၊
“ တၢင်းႁၵ်ႉ ” ယွၼ်ႉၶေႃႈၵႂၢမ်းဢၼ်ဝႃႈႁၵ်ႉၼႆၼၼ်ႉသေ ၊ ထိုင်ၵူၼ်းၵေႃႉၼိုင်ႈပေႃးလႆႈသိူဝ်း ၊ ၵူၼ်းၵေႃႉၼိုင်ႈႁႆႈ၊ ၵူၼ်းၵေႃႉၼိုင်ႈပေႃးလႆႈသုမ်းၸၢတ်ႈပၢၼ်ယွၼ်ႉမၼ်းဢမ်ႇၸႂ်ႈႁိုဝ် ။
တႅမ်ႈ – ၼေႃႇမိူင်း(မိူင်းသူႈ)
[မၢႆတွင်း – တူဝ်ထူပ်း]
