“ဢူႈ!!..မႃးလႄႈ!..”
“မႄႈ!!..မႃးလႄႈ!..”
ပဵၼ်သဵင်ႁွင်ႉဢွၼ်ႇယိင်း ဢႃႇယု မွၵ်ႈ 9 ၶူပ်ႇၼႆႉ ယူႇၼိူဝ်ႁူဝ်ၵုင်းၼၼ်ႉသေ ႁွင်ႉၸူးဢူႈမႄႈၶဝ်ဢၼ်ၵႂႃႇႁဵတ်းႁႆႈ ၵၢင်ဝၼ်းၶမ်ႈ ယဝ်ႉၵေႃႈ ပႆႇမႃးႁွတ်ႈႁႃႁိူၼ်းၼၼ်ႉယဝ်ႉ။
တွင်ႉမႆႈၶဝ်ႈယူႇၼႆၵေႃႈ ဢမ်ႇမီးၽႂ်ႁဵတ်းလဵင်ႉ မၼ်းတူဝ်ၵေႃႉလဵဝ်ၵူၺ်းဢမ်ႇၸႂ်ႈ မီးၼွင်ႉၸႆၢးမၼ်းထႅင်ႈသေလဵၼ်ႈၵေႃႉၵၼ်။
လူင်းႁူင်းႁဵၼ်းပွၵ်ႈႁိူၼ်းမႃး တွင်ႉမႆႈၶဝ်ႈ
တီႈႁိူၼ်းဢမ်ႇမီးၶဝ်ႈသုၵ်းၽၵ်းသုၵ်းၵေႃႈ ၵႃႈလႆႈႁုင်ၵိၼ်ၵူၺ်းယဝ်ႉ၊ မၢင်ပွၵ်ႈမီးဢၼ်ၶဝ်ႁုင်လိူဝ်ဝႆႉပၼ်ၵေႃႈၵိၼ်သေ၊ ဢၢပ်ႇၼမ်ႉသၵ်ႉၶူဝ်းလွႆးၶူဝ်းႁင်းၵူၺ်း ၵေႃႉပဵၼ်ပီႈၼႆၵေႃႈ လႆႈႁဵတ်းပၼ်ပႃးၼွင်ႉယဝ်ႉ။
ၵွပ်ႈၼႃႈႁိူၼ်းဢမ်ႇတဵမ်ထူၼ်ႈလႄႈ ဢူႈမႄႈလႆႈႁဵတ်းၵၢၼ်ႁႃလဵင်ႉ ၵႂႃႇၸဝ်ႉမႃးၶမ်ႈၵူႈဝၼ်း၊ ဢမ်ႇတၼ်းတူၺ်းထိုင်လုမ်းလႃးလႄႈ ဢမ်ႇႁူႉဝႃႈ ၵၢင်ၶမ်ႈလပ်းသိင်ႇၽိတ်းယဝ်ႉၼၼ်ႉ ဢမ်ႇႁၼ်ဢူႈမႄႈမီးယူႇတီႈႁိူၼ်းၼႆ မၼ်းၸႂ်ႁႆၢၵႃႈႁိုဝ် ၵူဝ်ၶဝ်တေဢမ်ႇပွၵ်ႈမႃးႁႃႁဝ်းတေႉဢိူဝ်ႈ။ ႁွင်ႉသဵင်ပေႃးႁၢပ်ႇၵေႃႈ သင်လႆႈငိၼ်းသဵင်တုမ်ႉတွပ်ႇၶိုၼ်းတင်းလီ သမ်ႉဝႃႈသဵင်ၼၼ်ႉပဵၼ်ၵႂၢမ်းလႃႇၵေႃႈယဝ်ႉလႃႈ။ ၵွပ်ႈႁိူၼ်းသမ်ႉလႆႈယူႇၵႆပိူၼ်ႈဝႆႉလူး ယူႇၸွမ်းၶၢမ်းႁႆႈၶၢမ်းသူၼ်ၵူၺ်းၼႃႇ။
ၸဵမ်မိူဝ်ႈလဵၵ်ႉ ထုၵ်ႇပွႆႇႁႂ်ႈယူႇႁင်းၵူၺ်းမႃးတႃႇသေႇ မိူဝ်ႈမၼ်းဢသၢၵ်ႈလႆႈ 13 ၼွင်ႉၸႆၢးမၼ်းၵေႃႈ ၵႂႃႇယူႇၵျွင်းပႅတ်ႈသေ ၵိုတ်းမၼ်းၵေႃႉလဵဝ်ၵူၺ်းလႄႈ မၢင်ပွၵ်ႈၵေႃႈမိူၼ်လႆႈယူႇႁင်းၵူၺ်းၼၼ်ႉယဝ်ႉ။
ဢမ်ႇၶႂ်ႈၵေႃႉယႂ်ႇၵေႃႈ ၵႃႈလႆႈပေႉတူဝ်ယဝ်ႉဢိူဝ်ႈ ၵၢင်ၼႂ်ၵႂႃႇႁူင်းႁဵၼ်းၵေႃႈ လုၵ်ႉႁုင်မိုဝ်ႉၵႅင်ႁင်းၵူၺ်း၊ ၵၢင်ၶမ်ႈလူင်းႁူင်းႁဵၼ်းမႃး ႁုင်ၶဝ်ႈႁဵတ်းၽၵ်းဝႆႉပၼ် ဝၼ်းလႂ်ဢမ်ႇႁဵတ်း ၶဝ်ၵေႃႈဢမ်ႇမိူၼ်ၸႂ်သေ မၢင်ပွၵ်ႈၵေႃႈပွင်ႉထႃႉမႃးဢိူဝ်ႈ။
ၵွပ်ႈလွင်ႈဢမ်ႇၶႂ်ႈၶၢမ်ႇ ၵွပ်ႈလွင်ႈဢမ်ႇမိူၼ်ၸႂ်ၶဝ်ၼၼ်ႉ မၢင်ပွၵ်ႈၵေႃႈထဵင်သဵင်ၶႅင်သဵင်ၸႃးဢိူဝ်ႈ၊ တေႃးသၶဝ်ၼၼ်ႉ ဢမ်ႇဢဝ်ပေႉမၼ်းလႆႈ၊ ဢမ်ႇၶဵင်ႇတႃႉမၼ်းလႆႈ လွင်ႈဢၼ်ႁဵတ်းဢမ်ႇမိူၼ်ၸႂ်ၶဝ်ၼၼ်ႉ မီးၶွၼ်ႉပဵၼ်ႁႅင်းဢီးသေ ပေႃႉႁႅမ်မၼ်းမႃးယဝ်ႉ။ ၶွၼ်ႉဢၼ်ၶဝ်ႁႅမ်ၼၼ်ႉ ၶဝ်ၵူၺ်းႁူႉဝႃႈတေၸဵပ်း ၶဝ်ဢမ်ႇဝူၼ်ႉဝႃႈႁွႆးၶွၼ်ႉဢၼ်ၸဵပ်းယူႇၼႂ်းၸႂ်ၼၼ်ႉ မၼ်းလိုၵ်ႉတၢၼ်ႇႁိုဝ်ၼႆ။
ၵွပ်ႈၵႆႉပွင်ႉၵႆႉႁႅမ်လႄႈ လွင်ႈဢုၼ်ႇၸႂ်ဢၼ်ၶဝ်မီးၼၼ်ႉႁႃဢမ်ႇႁၼ်လႆႈသေ မေႃဢိမ်ႇၸၢၼ်ႈမႃးယဝ်ႉ၊ ၵွပ်ႈပိၵ်ႇပႆႇၶႅင်လႄႈပႆႇၸၢင်ႈဢွၵ်ႇပူၼ်ႉလႆႈၵူၺ်း။
မၢင်ပွၵ်ႈလွမ်ၶွႆယူႇဢိူဝ်ႈ ၸိူဝ်းပိူၼ်ႈလႆႈယူႇၸွမ်းဢူႈမႄႈ၊ မၢင်ပွၵ်ႈလွမ်ၶွႆယူႇဢိူဝ်ႈ ဢၼ်ပိူၼ်မေႃလၢတ်ႈတေႃႇၵၼ်၊ မၢင်ပွၵ်ႈ ၶႆႈလႆႈယူႇဢိူဝ်ႈ လွင်ႈဢုၼ်ႇၸႂ်ဢူႈမႄႈ ဢၼ်ၸုင်ယိပ်းမိုဝ်းႁဝ်းမိူဝ်ႈလူမ်ႉၸူမ်ယူႇၼၼ်ႉ။
ၵူၺ်းၵႃႈ သမ်ႉဝႃႈယူႇၸွမ်းၵၼ်သေတႃႉၵေႃႈ လွင်ႈဝႆႉဝၢင်းၸႂ်တေႃႇၵၼ်ၼၼ်ႉဢမ်ႇမီးလႄႈ ၶၢဝ်းယၢမ်းတႃႇယူႇၸွမ်းၵၼ်ၵူၺ်းတင်းဢမ်ႇမီး၊ တႃႇတေပိုတ်ႇဢူၵ်းပိုတ်ႇၸႂ် လွင်ႈၶႂ်ႈလႆႈၶႂ်ႈပဵၼ်ၼႆၵူၺ်းၵေႃႈ ဝႆႉဝႃႈဢမ်ႇလွင်ႈယႂ်ႇသေ ၵဵပ်းဝႆႉႁင်းၵူၺ်း။
ၵူၼ်းၸိူဝ်းဢၼ်ဝႃႈဢမ်ႇလႆႈယူႇၸွမ်းဢူႈမႄႈၼၼ်ႉ ဢမ်ႇလႆႈႁပ်ႉတၢင်းႁၵ်ႉတီႈဢူႈမႄႈၼႆၼၼ်ႉ ယႃႇဝူၼ်ႉဝႃႈပဵၼ်ၵူၼ်းဢမ်ႇတဵမ်ထူၼ်ႈလႄႈ သင်လႆႈယူႇၸွမ်းၵူၼ်းလီလီၵူၺ်းၵေႃႈ ပဵၼ်လွင်ႈၵၢမ်ႇလီၼႃႇယဝ်ႉ။
မၢင်ပွၵ်ႈမႃး သမ်ႉဝႃႈယူႇၸွမ်းဢူႈမႄႈသေတႃႉၵေႃႈ ဢမ်ႇၸႂ်ႈလႄႈဝႃႈမၼ်းလီၵူႈၵေႃႉ မၢင်ၵေႃႉၵေႃႈ လႆႈၶၢမ်ႇတၢင်းဢူႈမႄႈႁဵတ်းႁႆၢႉ ဢမ်ႇၸႂ်ႈႁဵတ်းႁႆၢႉတူဝ်ၵူၺ်း ႁဵတ်းႁႆၢႉပႃးၸႂ်ထႅင်ႈၵွၼ်ႇယဝ်ႉ။
ၶဝ်သွၼ်ႁႂ်ႈမၼ်းပေႉတူဝ်လူၺ်ႈလွၵ်းလႆၢးဢၼ်ဢမ်ႇၸၢင်ႈပိုင်ႈၽႂ်လႆႈၼၼ်ႉယဝ်ႉ၊ ၶဝ်သွၼ်ႁႂ်ႈမၼ်းပိုင်ႈဢိင်တူဝ်ၵဝ်ႇလႆႈ လူၺ်ႈလွၵ်းလႆၢးပွႆႇမၼ်းသေ ဢမ်ႇသူၼ်ၸႂ်သင်ၼၼ်ႉယဝ်ႉ။
ၵၢၼ်ယူႇၵေႃႉလဵဝ် ပိုင်ႈဢိင်တူဝ်ၵဝ်ႇၼၼ်ႉ ဢဝ်ယၢမ်ႈၵႂႃႇသေ၊ တႃႇယွၼ်းတၢင်းၸွႆႈထႅမ်ပိူၼ်ႈၼၼ်ႉ ပဵၼ်လွင်ႈၶဵင်ႇတႃႉဢၼ်ၼိုင်ႈလႄႈ သမ်ႉပဵၼ်ၵူၼ်းႁူဝ်ၶႅင်ဝႆႉထႅင်ႈ၊ ဢမ်ႇၵူမ်ႈဢမ်ႇၵွမ်းဢမ်ႇသူၼ်ၸႂ်ၽႂ်သေ မုင်ႈၼႃႈၵႂႃႇၵူၺ်းတိၵ်းတိၵ်းၼၼ်ႉယဝ်ႉ။
ဢွၼ်ႇယိင်းၵေႃႉၼၼ်ႉ ၵေႃႉယႂ်ႇပဵၼ်သၢဝ်ယဝ်ႉသေ ၽၢတ်ႇယၢၼ်ႁိူၼ်းဢွၵ်ႇယူႇႁင်းမၼ်း ယူႇၼႂ်းတူင်ႇဝူင်းမၼ်းထႅင်ႈဢၼ်ၼိုင်ႈ ယူႇဢွင်ႈတီႈဢၼ်ပၼ်လွင်ႈလွတ်ႈလႅဝ်းမၼ်းသေ ဢမ်ႇသူၼ်ၸႂ်ဝႃႈ တၢင်းႁိူၼ်းတေပဵၼ်ၸိူင်ႉႁိုဝ်၊ ဢူႈမႄႈထဝ်ႈယဝ်ႉၼႆၵေႃႈ ဢမ်ႇမိူဝ်းၵွင်ႉမိူဝ်းၵႆၢ လူဝ်ႇငိုၼ်းၼႆၵေႃႈသူင်ႇပၼ်ၸိူင်ႉၼၼ်ၵူၺ်း။
ၸိူင်းႁူဝ်ၼႆႉတႄႉ ဢိင်မႃးတီႈတူဝ်ထူပ်းၵူၼ်းၵေႃႉၼိုင်ႈ။
ပႆၢၵမ် – သႅၼ်ငဝ်း
25/12/2025
