တွၼ်ႈႁူၵ်း
ၶမ်းႁွမ်ဝၢႆႇတူၺ်းၵႂႃႇတၢင်း လႅင်းမိူင်းၸုၵ်းဢုပ်ႇလုၵ်ႈၼွင်ႉမၼ်းယူႇၼၼ်ႉလႄႈ “ယုမ်ႇလႆႈယူႇႁႃႉၼၼ်ႉ…”
“ပီႈယုမ်ႇၶဝ်လႆႈယူႇ…မိူဝ်ႈၶႃႈမႃးၸွမ်းတၢင်း..ၶႃႈဢမ်ႇယူႇလီ…ၶဝ်ဢမ်ႇၶၢမ်ႇလပ်းဢမ်ႇၶၢမ်ႇၼွၼ်းသေ…လုမ်းလႃးတူၺ်းထိုင်ၶႃႈ…ၶႃႈသမ်ႉပေႃးယွမ်လူင်ဝႆႉ…ၶႃႈဢမ်ႇၵႂႃႇလႆႈ…ၶဝ်ၵေႃႈၸေးၶႃႈၵႂႃႇ…သမ်ႉဝႃႈႁိူဝ်ႉၼႆၵေႃႈ…ၶဝ်ဢမ်ႇတွၼ်ႉၶၢင်း…မၢင်ပွၵ်ႈၶႃႈႁဵတ်းၽိတ်းမႃး…တႅၼ်းတီႈၶဝ်တေလႃႇ…ၶဝ်ၵေႃႈသင်ႇသွၼ်ၶႃႈ…မိူဝ်ႈႁႅင်းၸႂ်တူၵ်း…ၶဝ်ၵေႃႈၸွႆႈပၼ်ႁႅင်းၸႂ်ၶႃႈ…ၵူႈဝူင်ႈဝၼ်းလိုဝ်ႈ…ၶဝ်ၵႆႉၵႂႃႇလႄႇ…ၵႂႃႇၸႂ်းၶႃႈတႃႇသေႇယဝ်ႉ…ၶဝ်မိူၼ်ပဵၼ်ပီႈၸၢႆးၶႃႈၵေႃႉၼိုင်ႈ…လႄႈ..ပဵၼ်ဢဵၼ်ႁႅင်းႁဵတ်းႁႂ်ႈမီးႁႅင်းၸႂ်…ပဵၼ်တင်းၶူးသွၼ်ၶႃႈ…ႁဵတ်းႁႂ်ႈၶႃႈဝူၼ်ႉလႆႈ…ၶဝ်ပဵၼ်ၵူၼ်းလီဢေႃႈပီႈ…သင်ၸိူဝ်ႉဝႃႈၶႃႈတွပ်ႇတႅၼ်းၵုင်ႇမုၼ်ၶဝ်လႆႈ…ၶႃႈတေဢဝ်ပီႈသၢဝ်ၶႃႈပၼ်ယဝ်ႉ… ”
“လၢတ်ႈဢေႇဢေႇဢိတ်းၼိုင်ႈလႄႈၵႂၢမ်းၼႆႉ… ”
“ပီႈဢမ်ႇၵျိူၵ်ႈၶဝ်ႁ…လိူဝ်သေႁၢင်ႈၽၢင်လဝ်းယဝ်ႉ…ၼမ်ႉၸႂ်ၵေႃႈလီ…ၼမ်ႉၵတ်ႉၵေႃႈၶႅၼ်ႇ…မေႃႁၵ်ႉမေႃသႂ်ႇၸႂ်…ပေႃးပီႈဢမ်ႇလႆႈၸႂ်ၵူၼ်းၸိူင်ႉၼင်ႇႁူဝ်ၼႃႈ…ၸၢတ်ႈၼႆႉတင်းၸၢတ်ႈ…ပီႈယႃႇမုင်ႈမွင်းတေလႆႈထူပ်းၵူၼ်းလီၸိူင်ႉၼႆထႅင်ႈ”
“ၶဝ်ပေႉမႃးဢဝ်သင်..သႂၢင်းသႂ်ႇပၼ်ၼႂ်းဢွၵ်းၼွင်ႉၸၢႆးပီႈလႃႇၼႆႉ…”
သွင်ပီႈၼွင်ႉၵေႃႈ ဢုပ်ႇၵၼ်ယူႇတင်းႁိုင် သမ်ႉပေႃးတၼ်းထိုင်ၵၢင်ဝၼ်းယဝ်ႉ။ လႅင်းမိူင်းၵေႃႈမႃးၸူးၶႃပီႈၼွင်ႉသေယဝ်ႉ ၶမ်းမိူင်းၸင်ႇပၼ်တိုဝ်ႉတၢင်းၶႃ ႁႂ်ႈလႆႈဢုပ်ႇၵၼ်ၼႆလႄႈ လုၵ်ႉၵႂႃႇပႅတ်ႈယူႇ။ လႅင်းမိူင်းမႃးၼင်ႈတေႃႇၼႃႈၶမ်းႁွမ်ယဝ်ႉ ယၵ်ႉတူၺ်းၵၼ်တင်းႁိုင် ဢမ်ႇလၢတ်ႈသင်ယဵၼ်ၸူးၵၼ်ယူႇ မိူၼ်ဝႃႈဢွင်ႈတီႈၼၼ်ႈ ၵပ်ႉၵႅပ်ႈမႃးၸိူင်ႉႁိုဝ်ဢမ်ႇႁူႉ ၶမ်းႁွမ်ၵေႃႈလႆႈပိုတ်ႇသဵင်လၢတ်ႈဢွၵ်ႇမႃးယဝ်ႉ ႁဵတ်းႁႂ်ႈသဵင်တုမ်ႉယွၼ်ႈၵၼ်တၢင်းလႅင်းမိူင်း ဢၼ်ဢၢင်ႈတေလၢတ်ႈၼၼ်ႉလႄႈ။ လႅင်းမိူင်းၵေႃႈ
“သူလၢတ်ႈဢွၼ်တၢင်းလႄႈ…”
“ဢေႃႈ…ၵွပ်ႈဝႃႈ…ႁဝ်းလႆႈထူပ်းၼွင်ႉၸၢႆးႁဝ်းဝၼ်းမိူဝ်ႈၼႆႉ…ႁဝ်းယိၼ်းၸူမ်းတေႉယဝ်ႉၶႃႈ…ယိၼ်းၸူမ်းသူဢၼ်ၸွႆႈတူၺ်းထိုင်ပၼ်ၼွင်ႉၸၢႆးႁဝ်းၼႃႈ …”
“မၼ်းၵေႃႈပဵၼ်ပုၼ်ႈၽွၼ်းႁဝ်းထုၵ်ႇလီႁဵတ်းယူႇယဝ်ႉ… ”
လႅင်းမိူင်းဝႆႉၼႃႈယုမ်ႉဢိတ်းၼိုင်ႈလႄႈ သူင်ႇသၢႆတႃၸူးၶမ်းႁွမ် ဢဝ်မၼ်းသမ်ႉပေႃးဢမ်ႇႁတ်းတေႃႇၼႃႈယဝ်ႉ။
“ပေႃးၼၼ်ႁဝ်းယွၼ်းမိူဝ်းၵွၼ်ႇယဝ်ႈ… ”
“ႁဝ်းတေမိူဝ်းသူင်ႇ… ”
“ဢမ်ႇပဵၼ်သင်…မိူဝ်ႈၼႆႉႁဝ်းၵေႃႈလႆႈသုၵ်ႉယုင်ႈၶၢဝ်းယၢမ်းသူၼမ်ၼႃႇယဝ်ႉ”
“ၶၢဝ်းယၢမ်းႁဝ်းမီးလူၼ်ႉလိူဝ်ယူႇယဝ်ႉ…တွၼ်ႈတႃႇသူ…မိူဝ်ႈလဵဝ်ၵေႃႈၵၢင်ဝၼ်းတဵင်ႈယဝ်ႉ…ၵိၼ်ၶဝ်ႈသေၸင်ႇမိူဝ်းလႄႈ… ”
လုၵ်ႈၼွင်ႉမၼ်းၵေႃႈဢဝ်ၶဝ်ႈၽၵ်းမႃးတမ်းပၼ်ၶႃသေ ဢၢႆၶဝ်ႈႁွမ်ႁွမ် ဢၢႆၽၵ်းႁွမ်ဝၢၼ် သူတ်ႇၶဝ်ႈၼႂ်းၶူႈၼင်ၵႂႃႇ ႁပ်ႉႁူႉလႆႈထိုင်ႁူင်းၶဝ်ႈ လႆႈငိၼ်းသဵင်တွင်ႉႁွင်ႉမေႃးမႃး တေထဵင်ၶိုၼ်းၵေႃႈ သဵင်မၼ်းမေႃးဢွၵ်ႇမႃးတေႃႇၼႃႈတေႃႇတႃလူး။ ၶမ်းႁွမ်ၵေႃႈမႄးၼင်ႈသေ ၵူမ်ႈၼႃႈတူၺ်းဝၢၼ်ႇၽၵ်းဢၼ်တိုၵ်ႉႁုင်မႃးၼၼ်ႉယဝ်ႉ လၢႆးႁဵတ်းသၢင်ႈၶမ်းႁွမ်ၼၼ်ႉ ဢဝ်တၢင်းယုမ်ႉလႅင်းမိူင်းတုပ်ႇပေႃးဢမ်ႇလႆႈ။ လႅင်းမိူင်းၵေႃႈ ၸေႃႉၽၵ်းတၵ်းသႂ်ႇပၼ်ၶမ်းႁွမ်သေ…
“ၵိၼ်လႄႈ…ယႃႇပေၵူဝ်ဝႃႈမၼ်းဢမ်ႇဝၢၼ်…တမ်းၸႂ်လႆႈယူႇ… ”
ၶမ်းႁွမ်ၼင်ႈမိူၼ်ႇ တူၺ်းဝၢၼ်ႇၽၵ်းဢၼ်လႅင်းမိူင်း တၵ်းပၼ်ၼၼ်ႉသေ ယူႇယူႇၵေႃႈ ဢဝ်ၼမ်ႉတႃမၼ်းၸိုမ်းဢွၵ်ႇမႃး တူၺ်းၼႃႈလႅင်းမိူင်းၵမ်းၼိုင်ႈယဝ်ႉ လုၵ်ႉဢွၵ်ႇၵႂႃႇပႅတ်ႈလူၺ်ႈတီႈ ဢမ်ႇလၢတ်ႈသင်သေၶေႃႈ လႅင်းမိူင်းၵေႃႈၼႅတ်ႈလုၵ်ႉလမ်းဢွၵ်ႇၵႂႃႇၸွမ်းယူႇ…
“သူပဵၼ်သင်လႃႇ… ႁဝ်းဢမ်ႇႁူႉဝႃႈႁဝ်းႁဵတ်းသင်ၵႂႃႇ ႁဵတ်းႁႂ်ႈသူပဵၼ်ၸိူင်ႉၼႆ”
ၶမ်းႁွမ်ၵေႃႈပႃးလူၺ်ႈသီၼႃႈဢၼ်မွင်ၸႂ်ၼၼ်ႉ “ႁဝ်းၶႂ်ႈမိူဝ်းယဝ်ႉ… ”
“ပႂ်ႉႁဝ်းဝႆႉလႄႈႁဝ်းတေမိူဝ်းသူင်ႇ…”
လႅင်းမိူင်းဢဝ်လူတ်ႉ ဢွၵ်ႇမႃးႁပ်ႉမိူဝ်းၵႂႃႇယူႇ။ မိူဝ်းၵိုတ်းယူႇတီႈပွတ်းတၢင်း
“ပဵၼ်သင်ၵႂႃႇလႃႇ…သူႁဵတ်းႁႂ်ႈႁဝ်းတူၵ်းၸႂ်တေႉယဝ်ႈ… ”
“ႁဝ်းယွမ်းၼွမ်းယူႇ…လႆႈပၼ်တၢင်းမႆႈသူ…ယွၼ်ႉဝႃႈလၢႆးႁဵတ်းသၢင်ႈသူ…ႁဵတ်းႁႂ်ႈႁဝ်းဝူၼ်ႉထိုင်ၵူၼ်းၵေႃႉၼိုင်ႈမႃး… ”
“ၽႂ်လႃႇ…ၵူၼ်းၵေႃႉဢၼ်ပွႆႇၽႃႈပႅတ်ႈသူၸိူင်ႉၼၼ်ႁ… ”
“မွၵ်ႈၼၼ်ႉယဝ်ႉ… ”
“သင်ဝႃႈ…မီးလွင်ႈၶမ်ၸႂ်ၶႂ်ႈပူတ်းပွႆႇၼႆၵေႃႈ ႁွင်ႉသႅၼ်ႇၵႂႃႇတီႈၼႆႈလႄႈ”
“ၵေႃႈယဝ်ႉမၼ်းလႄႈ..မိူဝ်းလႃႈ”
“ၸိူင်ႉၼၼ်ႁႃႉ…လူတ်ႉႁဝ်းတၼ်းၵိုတ်းၵႂႃႇမိူဝ်ႈလႂ်လႃႇၼႆႉ”
“လူတ်ႉသူၵွႆၸိူင်ႉၼၼ်ႁႃႉ..”
“ႁဝ်းဝႃႈတႄႉ…လႅပ်ႈပဵၼ်ၼၼ်ယဝ်ႉ…ပႆမိူဝ်းဢဝ်ၼႄႇ”
“မႃးသေႃးမၼ်းလႄႈ…ႁဝ်းၼူဝ်းတူၺ်း”
“ၼမ်ႉမၼ်းလႅပ်ႈမူတ်းယဝ်ႉယူဝ်ႉၼႆႉထၢင်ႇ..”
“ၵမ်ႉၼႃႉပေႃးၼၼ်..”
“သူတေႁဵတ်းသင်…”
“တေႁႂ်ႈသႅင်ၽွင်းသိုဝ်ႉၼမ်ႉမၼ်းမႃးပၼ်ဢေႃႈ”
လႅင်းမိူင်းၵေႃႈမႄးလိမ်ႇသေႃးလူတ်ႉမၼ်းသေ ၼူဝ်းလႆႈၶိုၼ်းယဝ်ႉလႄႈ “လႆႈယဝ်ႉဝႃႈ ၵႂႃႇႁဝ်းမိူဝ်း”
မိူဝ်ႈႁွတ်ႈထိုင်ယဝ်ႉၼၼ်ႉ မိူၼ်ဝႃႈလႅင်းမိူင်းတေမီး သေလွင်ႈလွင်ႈလႄႈ…
“သူ…”
“မီးလွင်ႈသင်ထႅင်ႈၶႃႈ”
“မိူၼ်ၸိူင်ႉၼင်ႇဝႃႈ…သဵၼ်ႈတၢင်းတႃႇတေၵပ်းသိုပ်ႇသူၼၼ်ႉ…ႁဝ်းယင်းဢမ်ႇပႆႇမီး…သင်ၸိူဝ်ႉဝႃႈမီးလွင်ႈၶမ်းမိူင်းၸိူဝ်းၼႆႉမႃး…ႁဝ်းၵေႃႈတေလႆႈပွင်ႇလႅင်းပၼ်သူလႆႈၼၼ်ႉၼႃႇ”
ၶမ်းႁွမ်ၵေႃႈတွၼ်ႈတႃႇၼွင်ႉ ၵႃႈလႆႈပၼ်ယဝ်ႉ။
ၶမ်ႈၶိုၼ်းယဵၼ်ယဵၼ် သဵင်လူမ်းထွင်းထွင်း ယၢမ်းမူင်းၵေႃႈဢမ်ႇပႆႇပေႃးလိုၵ်းၵႃႈႁိုဝ် ၶမ်းႁွမ်ဢဝ်တင်းၾူၼ်းမၼ်းသေ ၵပ်းသိုပ်ႇမိူဝ်းႁႃမႄႈမၼ်းယဝ်ႉ။ ပႂ်ႉႁိုင်ဢိတ်းၼိုင်ႈမႄႈၵေႃႈႁပ်ႉၾူၼ်း
“မႄႈ!…မႄႈယူႇလီယူႇႁႃႈ…”
“ၶမ်းႁွမ်ႁႃႉ…ဢိူဝ်ႈ..မႄႈယူႇလီယူႇၵူၺ်း…မီးလွင်ႈသင်လႃႇသိုပ်ႇၽူင်းမႃးယၢမ်းၵၢင်ၶိုၼ်းလိုၵ်းၸိူင်ႉၼႆ…ဢမ်ႇသဵင်ႈငိုၼ်းၽူင်းၼမ်ႁႃႉ…”
“ဢေႃႈ…လုၵ်ႈၸႂ်ထိုင်မႄႈ…ၸႂ်ထိုင်..ၸႂ်ထိုင်တေႉယဝ်ႉဝႃႈ”
“ၵေႃႉယႂ်ႇယဝ်ႉ…တိုၵ်ႉၶႂ်ႈႁဵတ်းလုၵ်ႈဢွၼ်ႇယူႇ…”
“လုၵ်ႈၵေႃႈတိုၼ်းပဵၼ်လုၵ်ႈဢွၼ်ႇတွၼ်ႈတႃႇမႄႈယူႇတႃႇသေႇဢမ်ႇၸႂ်ႈႁိုဝ်…မိူဝ်ႈၼႆႉၶႃႈလႆႈထူပ်းၶမ်းမိူင်းယဝ်ႉ…ၶဝ်ယူႇလီၵႅၼ်ႇၶႅင်ၵိုင်ႇလႅပ်ႈပဵၼ်သိုၵ်းတႄႉယဝ်ႈ…လုၵ်ႈႁူႉယူႇဝႃႈမႄႈဢမ်ႇၶႂ်ႈငိၼ်း…ၵူၺ်းၵႃႈလုၵ်ႈၵေႃႈၶႂ်ႈလၢတ်ႈၼႄမႄႈ…”
“မၼ်းၵေႃႈတေမိူၼ်ဢူႈၶဝ်ယူဝ်ႉ…”
“မႄႈ…ဢူႈႁဝ်းပဵၼ်ၵူၼ်းၸိူင်ႉႁိုဝ်လႃႇ…မႄႈလၢတ်ႈယူႇတႃႇသေႇဝႃႈဢူႈႁဝ်းပဵၼ်သိုၵ်းၼႆ…ၵူၺ်းၵႃႈၶႃႈဢမ်ႇတွၼ်ႉလႆႈႁၼ်ၼႃႈၶဝ်…ဢမ်ႇလႆႈႁၼ်ၶႅပ်းႁၢင်ႈၶဝ်သေပွၵ်ႈ…မိူဝ်ႈၵေႃႉလဵၵ်ႉၸွင်ႇၶဝ်ႁၵ်ႉယိင်းႁိုဝ်…ၸွင်ႇယိင်းလႆႈၼင်ႈသေၵိၼ်ၶဝ်ႈၸွမ်းၶဝ်ယူႇႁႃႉ…ယိင်းဢမ်ႇတွင်းလႆႈယဝ်ႉ…မႄႈၸွႆႈၶႆႈၼႄယိင်းၸွင်ႇလႆႈႁိုဝ်…သမ်ႉဝႃႈမႄႈတေဢမ်ႇလႆႈၸႂ်ၶဝ်ပဵၼ်သိုၵ်းသေ…ၽၢတ်ႇယၢၼ်ႁဝ်းမႄႈလုၵ်ႈႁႂ်ႈယူႇႁင်းၵူၺ်း…ၶဝ်ဢမ်ႇတွၼ်ႉတူၺ်းထိုင်ႁဝ်းသေတႃႉ…ၶဝ်ၵေႃႈပဵၼ်ပေႃႈယိင်းၵေႃႉၼိုင်ႈယူႇလူး…သမ်ႉဝႃႈၶဝ်ဢမ်ႇယူႇယဝ်ႉၵေႃႈ…ပၼ်ႁႂ်ႈယိင်းလႆႈႁူႉၸၵ်းၶဝ်ဢိတ်းၼိုင်ႈၸွင်ႇလႆႈႁိုဝ်…”
“ပေႃႈသူႁႃႉ…ၶဝ်ပဵၼ်ၵူၼ်းလီ…သႂ်ႇၸႂ်မႄႈသႂ်ႇၸႂ်လုၵ်ႈတေႉဢိူဝ်ႈ…ၵူၺ်းၵႃႈၶဝ်ဢမ်ႇမီးၶၢဝ်းယၢမ်းပၼ်ႁဝ်းမႄႈလုၵ်ႈသေပွၵ်ႈ…ၶဝ်ယူႇႁိူၼ်းၼိုင်ႈဝၼ်း…ယၢၼ်ၵႂႃႇၼိုင်ႈလိူၼ်…ယူႇၼိုင်ႈလိူၼ်ၵႂႃႇပဵၼ်ပီယဝ်ႉ…ၶဝ်ပၼ်ႁႂ်ႈႁဝ်းမႄးလုၵ်ႈတုၵ်ႉၶႁင်းၵူၺ်းသေတႃႉ…ဢၼ်ၶဝ်ၵႂႃႇႁဵတ်းၼႃႈၵၢၼ်သေ…တေပဵၼ်ၵႂႃႇသေလွင်ႈလွင်ႈၼၼ်ႉ…ႁဵတ်းႁႂ်ႈတုၵ်ႉၶလိူဝ်ယဝ်ႉ…ဢမ်ႇဝူၼ်ႉၸွမ်းၵေႃႈဢမ်ႇလႆႈ…ဢမ်ႇမႆႈၸႂ်ၵေႃႈၸႂ်သမ်ႉဢမ်ႇလီ…သင်တတ်းၸႂ်ၼိူဝ်ၶဝ်လႆႈ…မႄႈၵေႃႈတေတတ်းၸႂ်ပႅတ်ႈသေ…ဢမ်ႇသူၼ်ၸႂ်ၶဝ်ၵႂႃႇယဝ်ႉ…မီးၶဝ်ယူႇၵေႃႈမိူၼ်ဢမ်ႇမီး…တေႃႈၼင်ႇၶဝ်တၢႆၵႂႃႇ…ၶၢပ်ႈတူဝ်တၢႆၵူၺ်းၵေႃႈဢမ်ႇလႆႈႁၼ်…မႄႈပဵၼ်မေးၶဝ်သေတႃႉ…မႄႈယင်းဢမ်ႇမီးသုၼ်ႇလႆႈၸႂ်ႉၸၢတ်ႈပၢၼ်ႁူမ်ႈၶဝ်လႃႈ…ဝူၼ်ႉထိုင်ၸိူင်ႉၼႆယဝ်ႉ…ႁဵတ်းႁႂ်ႈမႄႈၸႂ်လမ်ယူႇတႃႇသေႇ…ႁဵတ်းႁႂ်ႈၶႂ်ႈလိုမ်းၶဝ်ၵႂႃႇပႅတ်ႈသေ…ၵူၺ်းၵႃႈမႄႈႁဵတ်းဢမ်ႇလႆႈ…ယွၼ်ႉမႄႈလိုမ်းၶဝ်ဢမ်ႇလႆႈလႄႈ…ႁဵတ်းႁႂ်ႈမႄႈဢမ်ႇၶႂ်ႈလၢတ်ႈထိုင်ၶဝ်ၼၼ်ႉယဝ်ႉ…သင်လွင်ႈဢၼ်ယိင်းလႆႈထူပ်းလႄႈၶေႃႈၵႂၢမ်းဢၼ်မႄႈလၢတ်ႈၼၼ်ႉ…မၼ်းႁဵတ်းႁႂ်ႈယိင်းၵႂင်ယူႇၵေႃႈ…သင်ယိင်းတူဝ်ထူပ်းတူၺ်း…ယိင်းၵေႃႈတေပွင်ႇၸႂ်ယူႇ…”
ၶမ်းႁွမ်တင်ႈၸႂ်သေထွမ်ႇတေႉၼၼ်ႉယဝ်ႉ တေႃႈၼင်ႇသဵင်မႄႈပေႃးယဵၼ်ၵႂႃႇယဝ်ႉၵေႃႈ ယင်းဢမ်ႇပႆႇတွပ်ႇသင်ၶိုၼ်း
“ၶမ်းႁွမ်!…မႄႈၶႂ်ႈၼွၼ်းၼႃႇယဝ်ႉ…”
“ဢေႃႈ!…ၾၼ်လီၶႃႈမႄႈ!…” မႄႈၵေႃႈဝၢင်းၾူၼ်းၵႂႃႇယူႇယဝ်ႉ။
သိုပ်ႇလူထႅင်ႈတွၼ်ႈတေမႃးၶႃႈ။
