ၶမ်းႁွမ်ၵေႃႈမႃးယူႇႁိုင်ၼႃႇယဝ်ႉ ဢမ်ႇႁၼ်ဝႃႈ ပိူၼ်ႈတေႁဵတ်းပၢင်ၽိုၵ်းၽွၼ်ႉသေပွၵ်ႈလႄႈ လႆႈႁဵတ်းၸွႆႈၵၢၼ်သႅင်ၽွင်းယူႇၵူႈဝၼ်းၵူၺ်း ထၢမ်တူၺ်းသႅင်ၽွင်းမိူဝ်ႈလႂ်ၵေႃႈ လၢတ်ႈဝႃႈ
“ႁဵတ်းတႄႉႁဵတ်းယူႇ…ဢမ်ႇပႆႇလႆႈၶေႃႈတႅပ်းတတ်းဝႃႈတေပဵၼ်မိူဝ်ႈလႂ်…” ၼႆတႃႇသေႇ။
ဝၼ်းၼိုင်ႈၶမ်းႁွမ်ၵေႃႈ လႆႈၵႂႃႇထၢမ်တူၺ်းထႅင်ႈတၢင်ႇၵေႃႉလႄႈ လႆႈႁူႉလွင်ႈတၢင်းသေ ၸင်ႇတေႁူႉဝႃႈၼႂ်းသီႇလိူၼ်ပုၼ်ႉၸင်ႇတေႁဵတ်းၼႆယူႇ ၶမ်းႁွမ်ၵေႃႈ ဢမ်ႇၶႂ်ႈယူႇသဵင်ႈၶၢဝ်းယၢမ်းပဵၼ်လိူၼ်ပဵၼ်လိူၼ် လူၺ်ႈတီႈဢမ်ႇမီးၵၢၼ်သင် ၵွမ်ႉၵႃႈလႆႈၸွႆႈသႅင်ၽွင်းဢိတ်းဢိတ်းၵူၺ်းၼၼ်ႉ ဢမ်ႇၶႂ်ႈပဵၼ်ၼႆလႄႈ လႆႈၵႂႃႇဢုပ်ႇဢူဝ်းတူၺ်းတီႈသႅင်ၽွင်းသေ ၸႂ်လမ်ၵေႃႈပႃးၽွင်ႈလႄႈ လႆႈၶိုၼ်ႈသဵင်တေႃႇဢိတ်းၼိုင်ႈယဝ်ႉ။
“သႅင်ၽွင်း!..ပဵၼ်သင်လႄႈဢမ်ႇလၢတ်ႈၵၼ်…ဢမ်ႇသပ်းလႅင်းၼႄၵၼ်တႅၵ်ႇလႅင်းလႃႇ…ႁဝ်းၵေႃႈတေပွင်ႇၸႂ်ယူႇ…ဢမ်ႇၸမ်ပဵၼ်တေလႆႈလႅၼ်ၵၼ်ၵေႃႈလႆႈ…ႁဝ်းၵေႃႈၵေႃႉယႂ်ႇယဝ်ႉလူးသူမီးလွင်ႈသင်…ၼႆၵေႃႈလၢတ်ႈၼႄႁဝ်းၵွၼ်ႇဢမ်ႇလႆႈႁႃႉ…”
“ၵေႃႈလႆႈ……ဢွၼ်တၢင်းတေလၢတ်ႈ…ႁဝ်းယွမ်းၼွမ်းယူႇ…ဢၼ်ပူၼ်ႉမႃးႁဝ်းဢမ်ႇယၢမ်ႈသပ်းလႅင်းၼႄသူ…ၵူၺ်းၵႃႈလွင်ႈတၢင်းဢၼ်ႁဝ်းဢမ်ႇၶႂ်ႈလၢတ်ႈၼႆႉ…ႁဝ်းၵူဝ်သူၶႂ်ႈမိူဝ်း…ၵူဝ်သူၸႂ်ထိုင်ႁိူၼ်း…ယွၼ်ႉမႃးယူႇတီႈၼႆႈၼႆႉမၼ်းဢမ်ႇမိူၼ်ယူႇတီႈႁိူၼ်း…ယဝ်ႉၵေႃႈႁဝ်းၶႂ်ႈႁွင်ႉသူမႃးလႄႇပွႆးလႄႈ…ၶႂ်ႈႁႂ်ႈသူလႆႈႁၼ်ပွႆး…ႁဝ်းႁူႉဝႃႈပွႆးလႄႈတၢင်းပၢင်ၽိုၵ်းၽွၼ်ႉၼႆႉမၼ်းယင်းတိုၵ်ႉၵႆၵၼ်ယူႇ…ၵူဝ်သူယွၼ်း…မိူဝ်းပႅတ်ႈဢွၼ်တၢင်းလႄႈဢမ်ႇလႆႈလၢတ်ႈ…ၵႃႈၼႆႉၵူၺ်းၼင်ႇၵဝ်ႇ”
“ သူဢမ်ႇဝူၼ်ႉဝႃႈႁဝ်းတေသုမ်းၶၢဝ်းယၢမ်းၽွင်ႈႁ…”
“ႁဝ်းၵေႃႈၶတ်းၸႂ်ႁႃပၼ်ၵၢၼ်သူယူႇ…ဢၢၼ်းတေလၢတ်ႈၼႄသူၶမ်ႈၼႆႉယဝ်ႉ…ပိူၼ်ႈတေၸတ်းႁဵတ်းပၢင်သွၼ်ၶွမ်းၼႆဢိူဝ်ႈ…ပၢင်သွၼ်ၵေႃႈတေႁိုင်ယူႇမွၵ်ႈၼိုင်ႈလိူၼ်ၼႆႉယဝ်ႉ…တေသွၼ်ၵဵဝ်ႇၵပ်းလွင်ႈၶွမ်းယူႇလၢႆၸိူဝ်ႉလၢႆလွင်ႈၼၼ်ႉယဝ်ႉ…ပေႃးသူသူၼ်ၸႂ်ၶႂ်ႈလဵပ်ႈႁဵၼ်းၼႆ…ႁဝ်းတေလႆႈသႂ်ႇပၼ်သၢႆမၢႆၼၼ်ႉၼႃႇ…”
ၶမ်းႁွမ်ဝႆႉၸႂ်ယဵၼ်လူင်းယဝ်ႉ
“ၵေႃႈလႆႈယူႇ…ႁဝ်းတေၶိုၼ်ႈၸွမ်းပိူၼ်ႈ…”
ၶမ်ႈၶိုၼ်းလပ်းသိင်ႇ လႅင်းမိူင်းၵေႃႈလႆႈၵႂႃႇႁူပ်ႉထူပ်းၵူၼ်းလူင်ၶဝ်မႃး မိူဝ်ႈႁွတ်ႈမႃးၶိုၼ်းၼၼ်ႉပႃးလူၺ်ႈသီၼႃႈဢမ်ႇလီသေဢိတ်း သင်ႇႁႂ်ႈလုၵ်ႈၼွင်ႉမၼ်းသိမ်းၶူဝ်းသေဢွၵ်ႇၵႂႃႇပႅတ်ႈယူႇ။
ၼႂ်းၶမ်ႈၶိုၼ်းလိုၵ်းယဵၼ် သဵင်လူတ်ႉမေႃးမႃးမိူဝ်ႈၽွင်းၼွၼ်းယဵၼ်ယူႇလႄႈ သဵင်ၵိုတ်းယဵၼ်ၵႂႃႇၼႃႈႁူင်းသဝ်းၶမ်းႁွမ်ၶဝ်ၼၼ်ႉယဝ်ႉ။ ယၢမ်းၼၼ်ႉသဵင်ၾူၼ်းၶမ်းႁွမ်ၵေႃႈလင်မႃးၵမ်းလဵဝ် တင်းၶႂ်ႈၼွၼ်းသေ လၢမ်းလၢမ်းႁပ်ႉၵႂႃႇယူႇ။
“ၶမ်းႁွမ်!…”
“မီးလွင်ႈသင်လႃႇ…သိုပ်ႇမႃးၵၢင်ၶိုၼ်းၸိူင်ႉၼႆ…”
“ႁဝ်းယွၼ်းၶၢဝ်းယၢမ်းထူပ်းသူၵမ်းၼိုင်ႈၸွင်ႇလႆႈ!…” တင်းသဵင်ဢၼ်မွင်ၸႂ်ၼၼ်ႉယူႇ။
“သူ…မီးယူႇတီႈလႂ်…”
“ႁဝ်းမႃးမီးယူႇတၢင်းၼႃႈ…ႁူင်းသဝ်းယဝ်ႉ…”
ၶမ်းႁွမ်ၶုၼ်ႇလုၵ်ႉမႃးၸၵ်ႉဢဝ်သိူဝ်ႈသွၼ်ႉၼုင်ႈသေ ၼႅတ်ႈလႅၼ်ႈဢွၵ်ႇၽၵ်းတူယဝ်ႉ။ လႆႈႁၼ်လႅင်းမိူင်းၼင်ႈငဝ်ယူႇတီႈလူတ်ႉမၼ်းၼၼ်ႉလႄႈ ၶမ်းႁွမ်ပႆၵႂႃႇၸူးလွႆးလွႆးသေ
“ၵတ်းပေႃးတၢၼ်ႇၼၼ်ႉ…မႃးၼင်ႈထွင်ႇလူမ်းထႅင်ႈယဝ်ႉ…”
“ႁဝ်းယွၼ်းၶၢဝ်းယၢမ်းဢိတ်းၼိုင်ႈၵူၺ်း…ၵမ်ႉၵေႃႈယဝ်ႉယဝ်ႉ…”
“သူတေယွၼ်းၶၢဝ်းယၢမ်းႁိုင်ၵႃႈႁိုဝ်ၵေႃႈဢမ်ႇပဵၼ်သင်…ယဝ်ႉသူမီးလွင်ႈသင်တေႉလႃႇ…တူၺ်းႁိပ်ႈၼႅတ်ႈတေႉယဝ်ႉ…”
“မိူဝ်ႈၽုၵ်ႈ……ႁဝ်းတေလႆႈၵႂႃႇယဝ်ႉ…”
ၼႂ်းၸႂ်ၼၼ်ႉၵေႃႈၵိုင်ႉၵၢင်ႉမိူၼ်ၾႃႉၽႃႇမႃးၵမ်းလဵဝ် တႃႇတေၸုၵ်းတမ်းၼိူဝ်လိၼ်ၼၼ်ႉၵေႃႈမိူၼ်တေဢမ်ႇမီးႁႅင်းယဝ်ႉ သဵင်ႁွင်ႉႁႆႈၼၼ်ႉၵေႃႈလင်ဢွၵ်ႇမႃးယူႇၼႂ်းႁူဝ်ၸႂ် ႁၢမ်ႈပေႃးဢမ်ႇလႆႈယဝ်ႉ။ ၵူၺ်းၵႃႈၽၢင်ႁၢင်ႈဢၼ်ႁၼ်ယူႇၼၼ်ႉတႄႉ ဢမ်ႇဢွၵ်ႇမႃးႁႂ်ႈလႅင်းမိူင်းႁၼ်လႆႈၼင်ႇၵဝ်ႇ ၶမ်းႁွမ်ပႆႇၸၢင်ႈတွပ်ႇသင်ၶိုၼ်း ယဵၼ်ၵႂႃႇၵႅပ်ႉၼိုင်ႈသေ ႁွမ်ႁႅင်းတႃႇတေလၢတ်ႈယဝ်ႉ။
“လၢတ်ႈမွၵ်ႈၼႆႉၵူၺ်း…လၢတ်ႈၼႂ်းၾူၼ်းၵေႃႈလႆႈ…တေၶၢမ်ႇယၢပ်ႇႁဵတ်းသင်…”
“ႁဝ်းၶႂ်ႈမႃးႁၼ်ၼႃႈသူ…ၸူဝ်ႈၵႃႈတေၽၢတ်ႇၵႂႃႇ…ႁဝ်းဢမ်ႇႁူႉဝႃႈတေလႆႈထူပ်းသူထႅင်ႈမိူဝ်ႈလႂ်…”
“ႁဝ်း…ဢမ်ႇထုၵ်ႇလီထူပ်းၵၼ်ထႅင်ႈယဝ်ႉ…”
ၶေႃႈၵႂၢမ်းၼၼ်ႉၸူၵ်ႉမႃးထိုင်ၼႂ်းဢူၵ်းမၢၵ်ႇႁူဝ်ၸႂ်လႅင်းမိူင်း ပေႃးၶႂ်ႈလႅဝ်ၵႂႃႇမူတ်း။
“ယွၼ်ႉႁဝ်းပဵၼ်သိုၵ်းလႄႈ…ႁူႉၵႃႈတေလႆႈႁဵတ်းၸွမ်းၼင်ႇၶေႃႈၸိသင်ႇ…သမ်ႉဝႃႈၶႂ်ႈႁဵတ်းၸွမ်းၼင်ႇၵၢင်ၸႂ်သေတႃႉၵေႃႈ…တိုၼ်းတေလႆႈႁဵတ်းၸွမ်းပုၼ်ႈၽွၼ်း..ႁဵတ်းၸွမ်းပိူင်ဢၼ်မၵ်းမၼ်ႈဝႆႉ…သမ်ႉဝႃႈႁဝ်းဢမ်ႇၶႂ်ႈၵႂႃႇ…ႁဝ်းၵေႃႈတိုၼ်းတေလႆႈၵႂႃႇယဝ်ႉ…တွၼ်ႈတႃႇၵႅတ်ႇၶႄပၼ်သုၼ်ႇလႆႈသုၼ်ႇပဵၼ်ပေႃႈမႄႈပီႈၼွင်ႉၵူၼ်းမိူင်းႁဝ်း…ၽႅၼ်ႇလိၼ်ဝၢၼ်ႈမိူင်းႁဝ်း…တႃႇႁႂ်ႈၸိူဝ်ႉၸၢတ်ႈဝၢၼ်ႈမိူင်းႁဝ်းပေႃးတေလႆႈယူႇၼိမ်သဝ်းၵတ်းယဵၼ်…မၼ်းပဵၼ်ပုၼ်ႈၽွၼ်းႁဝ်းတေလႆႈႁဵတ်းၼၼ်ႉယဝ်ႉ…”
ၶေႃႈၵႂၢမ်းဢၼ်လႅင်းမိူင်းလၢတ်ႈၼၼ်ႉ ႁဵတ်းႁႂ်ႈၶုၵ်းၸႂ်လႆႈၶိုၼ်းၶေႃႈၵႂၢမ်းဢၼ်မႄႈလၢတ်ႈၼၼ်ႉဝႃႈ “သင်ယိင်းတူဝ်ထူပ်းတူၺ်း…ယိင်းၵေႃႈတေပွင်ႇၸႂ်ယူႇ…” ႁဵတ်းႁႂ်ႈပွင်ႇၸႂ်မႃးသေ လၢတ်ႈၸူးလႅင်းမိူင်း
“ႁဝ်းယွမ်းၼွမ်းယူႇ… ”
“ႁဝ်းပွင်ႇၸႂ်ယဝ်ႉ……”
ၶမ်းႁွမ်ၵေႃႈထွတ်ႇဢဝ်သိူဝ်ႈသွၼ်ႉဢၼ်ၼုင်ႈမႃးၼၼ်ႉ ယိုၼ်ႈပၼ်လႅင်းမိူင်းၵႂႃႇ တင်ႈၸႂ်ႁိုဝ်ဢမ်ႇတင်ႈၸႂ်တႄႉဢမ်ႇႁူႉ သိူဝ်ႈၼၼ်ႉလႆႈပၼ်ၶိုၼ်းတီႈၸဝ်ႈၶွင်မၼ်းယဝ်ႉ။
ၶမ်းႁွမ်ယၢင်ႈဢွၵ်ႇယၢၼ်ၵႂႃႇပႅတ်ႈလွႆးလွႆး သၢႆတႃဢၼ်ယၵ်ႉတူၺ်းၸွမ်းၽၢႆႇလင်ဢမ်ႇၽႅပ်ႉလႆႈ ၶႂ်ႈႁွင်ႉၸူး ဝၵ်ႉတၢဝ်းဢဝ်ၶိုၼ်းၵေႃႈ ပေႃးပူၼ်ႉၵႆၵႂႃႇယဝ်ႉ။ တေၸၢင်ႈႁဵတ်းႁိုဝ် ႁူႉၵႃႈလႆႈၵွင်လင်ဝၢႆႇၶိုၼ်းတၢင်းၵဝ်ႇၼၼ်ႉၵူၺ်း ဝၢႆးသေသဵင်လူတ်ႉဢွၵ်ႇၵႂႃႇယဝ်ႉ ၶမ်းႁွမ်ၸင်ႇလႆႈပွႆႇၼမ်ႉတႃဢၼ်ၵၼ်ႈဝႆႉတၢင်းႁိုင်ၼၼ်ႉဢွၵ်ႇမႃးယဝ်ႉ။
တႃႇတေပိုတ်ႇၸႂ်ပၼ်ၽႂ်သေၵေႃႉၵေႃႉၼၼ်ႉမၼ်းဢမ်ႇငၢႆႈငၢႆႈ မၢင်မဵဝ်းမၼ်းတေဢမ်ႇပဵၼ်လႆႈၼႆၵေႃႈ ၶႂ်ႈၸၢမ်းတူၺ်းလႄႈ မုင်ႈမွင်းလွင်ႈဢၼ်တေၸၢင်ႈပဵၼ်လႆႈၼၼ်ႉယူႇ။ ၶတ်းၸႂ်ၶဝ်ႈၸႂ်၊ ၶတ်းၸႂ်ပွင်ႇၸႂ်၊ ၶတ်းၸႂ်ယွမ်းႁပ်ႉဢၼ်တေပဵၼ်ၵႂႃႇဢမ်ႇလႆႈ၊ ယွမ်းပွႆႇဝၢင်း၊ ယွမ်းၶတ်းၶႂၢင်တူၺ်း ၵူၺ်းၵႃႈ လွင်ႈဢၼ်လႆႈႁပ်ႉၶိုၼ်းၵေႃႈလွင်ႈၽၢတ်ႇယၢၼ် လွင်ႈၽၢတ်ႇယၢၼ်ဢၼ်ဢမ်ႇၶႂ်ႈထူပ်း ဢၼ်ၶတ်းၸႂ်ယႃႇႁႂ်ႈမၼ်းပဵၼ်မႃးၼႆၼၼ်ႉ ဝၼ်းမိူဝ်ႈၼႆႉၵေႃႈမႃးထိုင် တေမီးသင်ဢၼ်ႁဵတ်းႁႂ်ႈၸၼ်ၶဝ်ဝႆႉလႆႈလႃႇ မၢၵ်ႇႁိၼ်ၼၼ်ႉယႂ်ႇယူႇသေတႃႉ ႁိုဝ်တေပႄႉႁႅင်းမႄႈလဵၵ်းလႆႈ။
ၵွပ်ႈပဵၼ်သိုၵ်း
ၵွပ်ႈပီႈပဵၼ်သိုၵ်းလႄႈ ၼႂ်းၵႄႈႁႃးၼၼ်ႉပဵၼ်လႆႈဢူၺ်းၵေႃႉၵူၺ်းႁိုဝ်
ၵွပ်ႈပီႈပဵၼ်သိုၵ်းလႄႈ ႁိုဝ်ဝႄႈလႆႈလွင်ႈၽၢတ်ႇယၢၼ်
ၵွပ်ႈပီႈပဵၼ်သိုၵ်းလႄႈ ဢမ်ႇၸၢင်ႈတူၺ်းထိုင်သူလႆႈၼင်ႇဢၢင်ႈဢၢၼ်း
ၵွပ်ႈပီႈပဵၼ်သိုၵ်းလႄႈ ႁူႉလႆႈယူႇၼႂ်းၵႄႈၽေးၶဵၼ်
ၵွပ်ႈပီႈပဵၼ်သိုၵ်းလႄႈ ဢမ်ႇမီးပၼ်သူလႆႈႁႂ်ႈတဵမ်ထူၼ်ႈပဵင်းပေႃး
ၵွပ်ႈပီႈပဵၼ်သိုၵ်းလႄႈ ႁၵ်ႉယူႇၵေႃႈတေႃႈႁိုဝ်တေပၼ်လႆႈလွင်ႈဢုၼ်ႇၸႂ်
ၵွပ်ႈပီႈပဵၼ်သိုၵ်းလႄႈ ႁူႉၵႃႈတေလႆႈႁဵတ်းၸွမ်းၼႃႈၵၢၼ်ပုၼ်ႈၽွၼ်း
ၵွပ်ႈပီႈပဵၼ်သိုၵ်းလႄႈ ပီႈတေဝႄႈပၼ်တၢင်းႁႂ်ႈသူၼွင်ႉလႆႈထူပ်းၵူၼ်းလီလီသေၵမ်းၼႃႈ။
လႅင်းမိူင်း
သိုပ်ႇလူထႅင်ႈတွၼ်ႈတေမႃးၶႃႈ။
