ယႃႇၽွမ်ႈဝႃႈမၼ်းတူၵ်းလိုၼ်းယဝ်ႉ တွၼ်ႈတႃႇတေတႄႇမႂ်ႇ ယွၼ်ႉၸၢတ်ႈပၢၼ်ဢမ်ႇလႆႈမီးပိူင်တၢႆဝႃႈ တေလႆႈႁဵတ်းၸိူင်ႉႁိုဝ်၊ တေလႆႈႁဵတ်းမိူဝ်ႈလႂ်။
လွင်ႈဢွင်ႇမၢၼ်ၵေႃႉလႂ်ၵေႃႉၼိုင်ႈဢမ်ႇမိူၼ်ၵၼ် မၢင်ၵေႃႉမႃးဝႆး မၢင်ၵေႃႉမႃးထိူင်း ၽႂ်ၵေႃႈမီးၶၢဝ်းယၢမ်းႁင်းၽႂ်ႁင်းမၼ်း။
ငိုၼ်းဢမ်ႇၸႂ်ႈတူဝ်တႅၵ်ႈၵႃႈၶၼ်တူဝ်ၵဝ်ႇ ပၢႆးဝူၼ်ႉလႄႈလွင်ႈၸႂ်ႉၸၢတ်ႈပၢၼ်ဢၼ်မီးၵႃႈၶၼ်ၼၼ်ႉပဵၼ်တူဝ်တႅၵ်ႈယဝ်ႉ။
တၢင်းႁၵ်ႉဢၼ်ဝႃႈၸႂ်ႈယဝ်ႉၼႆၼၼ်ႉ ဢမ်ႇလႆႈယူႇမိူဝ်ႈဢႃႇယုပၢၼ်သၢဝ်းၼၼ်ႉၵူၺ်း မၢင်ၵေႃႉထူပ်းမိူဝ်ႈဢႃႇယုသၢမ်သိပ်းၵေႃႈယင်းပႆႇတူၵ်းလိုၼ်း။
ယႃႇၵူဝ်လွင်ႈလႅၵ်ႈလၢႆႈ သင်ထူပ်းဝႃႈၵၢၼ်ၼၼ်ႉဢမ်ႇၸႂ်ႈ လွင်ႈၸမ်ၸႂ်ၼၼ်ႉဢမ်ႇလီၼႆၵေႃႈ တႄႇမႂ်ႇလႆႈတႃႇသေႇယဝ်ႉ။
ပၢႆးယူႇလီလမ်ႇလွင်ႈလိူဝ်ပိူၼ်ႈ ယႃႇပႂ်ႉႁႂ်ႈၼႂ်းတူဝ်ႁဝ်းပၼ်ၾၢင်ႉမၼ်းသေယဝ်ႉ ၸင်ႇတေလုမ်းလႃးတူဝ်ၵဝ်ႇ။
ယိူင်းဢၢၼ်းၼၼ်ႉဢမ်ႇမီးဝၼ်းသုတ်းသဵင်ႈ ၵူၺ်းၵႃႈ တူဝ်ႁဝ်းၼၼ်ႉတႄႉမေႃသဵင်ႈသုတ်းၵႂႃႇ လႄႈ ၸင်ႇလႆႈႁဵတ်းလွင်ႈဢၼ်ၶႂ်ႈႁဵတ်းၼၼ်ႉယဝ်ႉ။
ၶၢဝ်းယၢမ်းဢူႈမႄႈႁဝ်းၼၼ်ႉဢေႇလူင်းမႃးတိၵ်းတိၵ်း ယႃႇလိုမ်းပွၵ်ႈၵႂႃႇၵွတ်ႇလႄႈလၢတ်ႈႁၵ်ႉၶဝ်ၽွင်ႈ။
ဢူၺ်းၵေႃႉဢၼ်လီလိူဝ်ပိူၼ်ႈၼၼ်ႉ ဢမ်ႇၸႂ်ႈဢူၺ်းၵေႃႉဢၼ်ယူႇၸွမ်းၵူႈဝၼ်း ၵူၺ်းၵႃႈပဵၼ်ၵူၼ်းၵေႃႉဢၼ်ယူႇႁိမ်းၶၢင်ႈမိူဝ်ႈဝၼ်းဢၼ်ႁဝ်းလူဝ်ႇလိူဝ်ပိူၼ်ႈၼၼ်ႉယဝ်ႉ။
ၵၢၼ်တေႇၼႃႈႁိူၼ်းဢၼ်ဝႃႈၼၼ်ႉၵေႃႈဢမ်ႇလႆႈမၵ်းမၼ်ႈပၼ်တၢင်းသိူဝ်း ၵၢၼ်ယူႇလွတ်ႈလႅဝ်းၼႆၵေႃႈ ဢမ်ႇၸႂ်ႈလွင်ႈတူၵ်းသုမ်း။
ၸၢတ်ႈပၢၼ်ၸဝ်ႈၵဝ်ႇၼၼ်ႉၵိုတ်းလိုဝ်ႈတႅၵ်ႈၼိူင်းတင်း ႁၢင်ႈဢၼ်ႁၼ်ယူႇၼိူဝ်သူဝ်ႇသႄႇၼၼ်ႉသေ။
ၵဵပ်းငိုၼ်းဝႆႉၸႂ်ႉမိူဝ်ႈထဝ်ႈၼႆၵေႃႈ ယႃႇလိုမ်းၸႂ်ႉမၼ်းမိူဝ်ႈယင်းတိုၵ်ႉမီးႁႅင်းယူႇလႄႈ ႁဵတ်းလွင်ႈဢၼ်ၶႂ်ႈႁဵတ်း။
လွင်ႈဢၼ်ႁတ်းထဵင်ၶိုၼ်းၼၼ်ႉၵေႃႈ ပဵၼ်လွင်ႈဢၼ်တေၸွႆႈႁႂ်ႈႁဝ်းမီးၸၢတ်ႈပၢၼ်ဢၼ်မီးတၢင်းသိူဝ်းမႃးလႆႈယဝ်ႉ။
ယႃႇပႅတ်ႈၵၢၼ်ဢၼ်ႁဝ်းၵျိူၵ်ႈလႄႈၵၢၼ်ဢၼ်ႁဵတ်းႁႂ်ႈႁဝ်းမီးတၢင်းသိူဝ်း တႃႇလႅၵ်ႈႁဵတ်းၵၢၼ်ဢၼ်လႆႈငိုၼ်းမဵဝ်းလဵဝ်ၵူၺ်း။
ၵိုတ်းလိုဝ်ႈဢဝ်ၸႂ်သႂ်ႇပိူၼ်ႈသေ ယိင်ႈၶတ်းၸႂ်ႁႂ်ႈပိူၼ်ႈႁၵ်ႉ ယိင်ႈႁဵတ်းႁႂ်ႈႁဝ်းလိုမ်းတူဝ်ၸဝ်ႈၵဝ်ႇၵႂႃႇလႆႈယဝ်ႉ။
လွင်ႈဢၼ်ႁဵတ်းၽိတ်းၵႂႃႇမိူဝ်ႈပူၼ်ႉမႃးၼၼ်ႉ ပဵၼ်တွၼ်ႈသွၼ်ဢၼ်မီးၵႃႈၶၼ် မိူဝ်ႈႁဝ်းလႆႈၸၢႆႇၵႂႃႇယဝ်ႉ ယႃႇပၼ်ႁႂ်ႈမၼ်းပႅတ်ႈလၢႆ။
ပၼ်ၶၢဝ်းယၢမ်းယူႇၸွမ်းၵူၼ်းၼႂ်းႁိူၼ်း ၼမ်လိူဝ်သေၶေႇလဵၼ်ႈၼႃႈၾူၼ်းယူႇ မၢႆတွင်းလီလီၼၼ်ႉဢမ်ႇလႆႈၵိူတ်ႇပဵၼ်မႃးတီႈသူဝ်ႇသႄႇမီႇတီႇယႃႇ။
ယႃႇပႂ်ႉႁႂ်ႈၽွမ်ႉယဝ်ႉၸင်ႇၵွႆႈတႄႇႁဵတ်း ယွၼ်ႉပိူဝ်ႈၸၢတ်ႈပၢၼ်ဢမ်ႇလႆႈတဵမ်ထူၼ်ႈ။
ႁဵၼ်းႁူႉတႃႇတေပွႆႇဝၢင်း ဢမ်ႇဝႃႈလွင်ႈၸမ်ၸႂ်၊ တၢင်းဝူၼ်ႉ၊ မၢႆတွင်း ဢၼ်ႁဵတ်းႁၢႆႉတူဝ်ၵဝ်ႇယူႇ။
လွင်ႈဢွင်ႇမၢၼ်ဢမ်ႇလႆႈတႅၵ်ႈၵၼ်တီႈ ဢွင်ႈတီႈ၊ ငိုၼ်းလိူၼ်၊ ငိုၼ်းတွင်း ၵူၺ်းၵႃႈ တႅၵ်ႈၵၼ်တီႈတၢင်းသိူဝ်း လႄႈ လွင်ႈယူႇငၢႆႈလူမ်ၸႂ်။
ၵိုတ်းလိုဝ်ႈမႆႈၸႂ်ၸွမ်းလွင်ႈမိူဝ်းၼႃႈ ထိုင်တီႈလိုမ်းမီးတၢင်းသိူဝ်းၸွမ်းၶၢဝ်းယၢမ်း ယၢမ်းလဵဝ် ယွၼ်ႉၸၢတ်ႈပၢၼ်ပဵၼ်ၵၢၼ်ဢွၵ်ႇၶၢဝ်းတၢင်း ဢမ်ႇၸႂ်ႈပၢႆတၢင်းၵမ်းလိုၼ်းသုတ်း။
လူင်းတိုၼ်းတွၼ်ႈတႃႇတူဝ်ၵဝ်ႇ ဢမ်ႇဝႃႈတၢင်းႁူႉတၢင်းႁၼ် လဵပ်ႈႁဵၼ်းလွင်ႈမႂ်ႇမႂ်ႇ ၵူႈဝၼ်းဝၼ်းၼႆႉမၼ်းလႅၵ်ႈလၢႆႈဝႆးၼႃႇ လူဝ်ႇလႆႈၽွမ်ႉတႃႇလႅၵ်ႈလၢႆႈၸွမ်းမၼ်း။
ယႃႇလိုမ်းယိၼ်းၸူမ်းတူဝ်ၵဝ်ႇ ဢၼ်ဢဝ်ၶၢမ်ႈပူၼ်ႉမၼ်းမႃး ဢမ်ႇဝႃႈလွင်ႈဢွင်ႇမၢၼ်ႁိုဝ်လွင်ႈတူၵ်းသုမ်းၵေႃႈယဝ်ႉ ဢၼ်ႁဵတ်းႁႂ်ႈႁဝ်းမီးဝၼ်းမိူဝ်ႈၼႆႉမႃး။
လွင်ႈၸမ်ၸႂ်ဢၼ်လီၼၼ်ႉၵေႃႈ တႄႇမႃးတီႈမေႃႁၵ်ႉတူဝ်ၸဝ်ႈၵဝ်ႇဢွၼ်တၢင်းၵွၼ်ႇ ၸင်ႇတေႁၵ်ႉပိူၼ်ႈလႆႈ။
ၵိုတ်းလိုဝ်ႈၵႄႈတူဝ်ဝႃႈဢမ်ႇမီးၶၢဝ်းယၢမ်း ယွၼ်ႉၶၢဝ်းယၢမ်းမၼ်းပဵင်းၵၼ်ၵူႈၵေႃႉယဝ်ႉ လိူဝ်သေဝႃႈႁဝ်းတေၸႂ်ႉမၼ်းၸိူင်ႉႁိုဝ်ၼၼ်ႉၵူၺ်း။
ႁတ်းၾၼ် လႄႈ တေလႆႈႁတ်းလူင်းမိုဝ်းႁဵတ်း လွင်ႈၼွၼ်းၾၼ်ဢၼ်ဢမ်ႇလူင်းမိုဝ်းႁဵတ်းၼၼ်ႉၵေႃႈ တေပဵၼ်ၾၼ်လၢႆလၢႆၵူၺ်း။
ယွမ်းႁပ်ႉလွင်ႈလႅၵ်ႈလၢႆႈ တူဝ်ၸဝ်ႈၵဝ်ႇလႄႈၸႂ်ၸဝ်ႈၵဝ်ႇ ယွၼ်ႉမၼ်းတေသိုပ်ႇၵႂႃႇၼႃႈလႆႈထႅင်ႈ။
ယႃႇလိုမ်းဝႃႈ တၢင်းသိူဝ်းယူႇတီႈၸႂ် ဢမ်ႇလႆႈယူႇတီႈမီးၵူႈလွင်ႈယဝ်ႉၸင်ႇလႆႈမၼ်းမႃး။
ပိၼ်ႇ – ငဝ်မွင်မိုတ်းမူဝ်း
