တွၼ်ႈသၢမ်သိပ်းၸဵတ်း
ၶမ်ႈၶိုၼ်းၵတ်းလၢင်ႈထိုင်ၸႂ် ၵူၼ်းၵေႃႉလဵဝ်မီးႁွႆးမၢတ်ႇၸဵပ်းပေႃးတဵမ်တူဝ် သမ်ႉပေႃးဢမ်ႇၸၢင်ႈတူင်ႉၼိုင်လႆႈသေဢိတ်းယဝ်ႉ၊ ၼွၼ်းၶၢင်းယူႇဢိုဝ်းဢိုဝ်းၵေႃႈ ဢမ်ႇမီးၽႂ်မႃးၸွႆႈမၼ်းလႆႈ၊ မိူဝ်ႈပိူၼ်ႈငိၼ်းသဵင်မၼ်းလင်မႃးၼၼ်ႉ ၸင်ႇသမ်ႉမီးၵူၼ်းမႃးဢဝ်မၼ်းၵႂႃႇ မတ်ႉၵိုၵ်းတူၼ်ႈမႆႉယဝ်ႉ ၸႂ်ႉမၼ်းၵပ်းသိုပ်ႇပၼ်ၵူၼ်းတီႈႁိူၼ်း ႁႂ်ႈဢဝ်ငိုၼ်းမႃးထုတ်ႇတူဝ်ၶိုၼ်းၼႆယူႇ။ လႅင်းမိူင်းသႂ်ၵေႃႈ လၢတ်ႈဝႃႈမၼ်းပဵၼ်ၵူၼ်းႁဵတ်းၵၢၼ်တေႃႉသူင်ႇၵုၼ်ႇၵႃႉၼႆလႄႈ တႅၼ်းတီႈတေႁႂ်ႈၶဝ်ဢဝ်ငိုၼ်းၵူၺ်းၼၼ်ႉ ႁႂ်ႈမၼ်းႁဵတ်းၵၢၼ်ပၼ်ၶဝ် တေႃႉသူင်ႇၶူဝ်းၶွင်ပၼ်ၶဝ် တေလီလိူဝ်သေ ဢၼ်ၶဝ်လႆႈငိုၼ်းၵႂႃႇၵူၺ်းၼႆလႄႈ ၶဝ်ၼၼ်ႉၵေႃႈႁၼ်လီၽွမ်ႉၸွမ်းသေ သူင်ႇၵူၼ်းမိူဝ်းၸွမ်း လႅင်းမိူင်းသႂ်ၵႂႃႇၵေႃႉၼိုင်ႈယဝ်ႉ။
ဝၢႆးသေလႅင်းမိူင်းသႂ်ၽၢတ်ႇဢွၵ်ႇတီႈၼၼ်ႈၵႂႃႇၵူၺ်း မီးလုၵ်ႈၼွင်ႉမၼ်းမႃးပႂ်ႉႁပ်ႉယူႇယဝ်ႉ၊ ၵူၼ်းၵေႃႉဢၼ်မႃးၸွမ်းမၼ်းၼၼ်ႉၵေႃႈ ပၼ်ႁႂ်ႈလုၵ်ႈၼွင်ႉမၼ်းၵေႃႉၸတ်းၵၢၼ်ၵႂႃႇ၊ ဢွင်ႈတီႈၵူၼ်းသိုၵ်းၸိူဝ်းၼၼ်ႉယူႇၵေႃႈ လႆႈသူင်ႇတရူၼ်းၵႂႃႇပွႆႇသႂ်ႇ ၵူၼ်းၶဝ်လႆႈတၢႆၵႂႃႇတင်းၼမ် ယူႇယဝ်ႉ။
ၼႂ်းဝဵင်းတေလွတ်ႈၽေးလိူဝ်သေဝၢၼ်ႈၼွၵ်ႈၼႃးပၢင်ႇသေတႃႉ ၵၢၼ်ဢွၵ်ႇၶၢဝ်းတၢင်းလွင်ႈၵႂႃႇမႃးၼၼ်ႉၵေႃႈ ဢမ်ႇမီးလွင်ႈႁူမ်ႇလူမ်ႈသင်သေဢိတ်း၊ ၵူၼ်းမိူင်းၵေႃႈ လႆႈထုၵ်ႇတဵၵ်းတဵင်ၵဵပ်းၶွၼ်ႇႁၢဝ်ႈႁႅင်း၊ မိူဝ်ႈပဵၼ်ၼၼ်မႃး မၼ်းမိူၼ်ပဵၼ်ၸူၼ်ၼႃႈလိူတ်ႈ ဢမ်ႇမီးၸႂ်ၵူၼ်းၵႂႃႇယဝ်ႉလူးၵွၼ်ႇ။
ၶၢဝ်းၵတ်းၵေႃႈ လႆႈၶၢမ်ႇတၢင်းၵတ်းယူႇႁဵတ်းၼၼ်ႉၵူၺ်းယဝ်ႉ ဢမ်ႇၸၢင်ႈႁဵတ်းႁိုဝ် ၵူၼ်းၼမ်ၵူၼ်းလၢႆ ဢွၼ်ၵၼ်ၼွၼ်းသွၼ်ႉယူႇတႂ်ႈသုမ်ႉၽႃႈယၢင် ႁူမ်ႈယူႇႁူမ်ႈသၢင်ႈ ၼင်ႇႁၢင်ႈဝၼ်းပူၼ်ႉၵႂႃႇၵေႃႈပေႉမႃးႁိုင်ဝႃႈႁိုင်ယဝ်ႉ။
မိူဝ်ႈယူႇဢွင်ႈတီႈၵူၼ်းပၢႆႈၽေးၸိူင်ႉၼၼ် ၶမ်းလၢဝ်ၵေႃႈ ၸွမ်းလူၺ်ႈပဵၼ်ၵူၼ်းဢမ်ႇမေႃယူႇလၢႆၵႂႃႇယဝ်ႉၼၼ်ႉ ၸင်ႇလႆႈႁဵတ်းမေႃသွၼ်ပၼ်လုၵ်ႈဢွၼ်ႇၸိူဝ်းယူႇၼႂ်းၼၼ်ႉ တေႃႇထိုင်လုၵ်ႈဢွၼ်ႇသမ်ႉပေႃးမေႃလူမေႃဢၢၼ်ႇလိၵ်ႈတႆးမႃး ႁိုင်ၼႃႇဢမ်ႇတၢၼ်ႇ ပေႃးတၼ်းထိုင်ၵႂႃႇ 6 လိူၼ်ယဝ်ႉ။
ၶၢဝ်းၽူၼ်ၵေႃႈၶဝ်ႈမႃး ၶၢဝ်းၼႃးၵေႃႈႁွတ်ႈထိုင် သဵင်ၵွင်ႈသဵင်ၵၢင်ႇၵေႃႈ ယဵၼ်ႁၢင်ႇယဝ်ႉလႄႈ ၵူၼ်းၼႂ်းဝၢၼ်ႈၶဝ်ၼၼ်ႉၵေႃႈ ဢွၼ်ၸူဝ်းၵၼ်ပွၵ်ႈမိူဝ်းၶိုၼ်း၊ ၵမ်ႈၽွင်ႈၵေႃႈ ဢမ်ႇၶႂ်ႈမိူဝ်းယဝ်ႉ မိူဝ်းၶိုၼ်းၵေႃႈဢမ်ႇမီးႁိူၼ်းမီးယေးသင်ယဝ်ႉၼႆ ဢွၼ်ၵၼ်ပၢႆႈၵႂႃႇတၢင်ႇတီႈတၢင်ႇတၢင်း ပၢႆႈၵႂႃႇႁႃတီႈဢၼ်ယူႇငၢႆႈၵိၼ်လူမ် တီႈလွတ်ႈၽေးလွတ်ႈၶဵၼ်ၵၼ်ယဝ်ႉ။
ၶမ်းလၢဝ်ၵေႃႈ သမ်ႉဝႃႈႁိူၼ်းမၼ်းတေမီးယူႇၼႂ်းဝဵင်းသေတႃႉ ဢွင်ႈတီႈဢၼ်မၼ်းမၵ်ႉမိုတ်ႈ သူင်ယူႇလိူဝ်ပိူၼ်ႈၼၼ်ႉတႄႉ ပဵၼ်ဝၢၼ်ႈဢုင်ဢွၼ်ႇၼၼ်ႉယဝ်ႉ၊ လိူဝ်သေၼၼ်ႉ လုၵ်ႈဢွၼ်ႇသၢမ်သီႇၵေႃႉ ဢမ်ႇမီးဢူႈမီးမႄႈယဝ်ႉၵေႃႈ တေႃႈတေဢမ်ႇႁူႉတေလႆႈၵႂႃႇတၢင်းလႂ် သင်တေပွႆႇၶဝ်ၵႂႃႇတၢင်ႇတီႈတၢင်ႇတၢင်း ၼင်လိၼ်မိူင်း တီႈဢူႈမႄႈၶဝ်ယၢမ်ႈၽုၵ်ႇသွမ်ႈၵိၼ်သဝ်းၼၼ်ႉ တေပဝ်ႇႁၢမ်းၵႂႃႇလႄႈ ပေႃးဝႃႈဢမ်ႇမီးၵူၼ်းမႃးထိင်းသိမ်းဝႆႉမၼ်းၼႆ မၼ်းတေႁၢႆလၢႆၵႂႃႇပဵၼ်ၶွင်ပိူၼ်ႈယဝ်ႉ။
ဢမ်ႇမီးႁိူၼ်းမၼ်းသၢင်ႈငၢႆႈယူႇ တႃႇမီးၽႅၼ်ႇလိၼ်ဝၢၼ်ႈမိူင်းၼၼ်ႉယၢပ်ႇဢိူဝ်ႈ၊ တေႃႈၼင်ႇမီးၽႅၼ်ႇလိၼ်ဝၢၼ်ႈမိူင်း မီးၸိူဝ်ႉမီးၶိူဝ်းယူႇၵေႃႈ ယင်းတိုၵ်ႉလႆႈၶၢမ်ႇတၢမ်ႇၽေးၶဵၼ် ယင်းတိုၵ်ႉလႆႈၶၢမ်ႇပၢင်တိုၵ်းသေ လႆႈလုၵ်ႉၽိုၼ်ႉဢဝ်ၶိုၼ်းယူႇဝၼ်းဝၼ်းၶိုၼ်းၶိုၼ်းၸိူင်ႉၼႆ။ သင်ၵုမ်ႇဢွၼ်ၵၼ်ပၢႆႈ ၵုမ်ႇသွၼ်ၵၼ်ဝႄႈယူႇတိၵ်းတိၵ်းၼႆ ၼင်လိၼ်ၽႅၼ်ႇလိၼ်ႁဝ်းၵေႃႈ တေမွတ်ႈႁၢႆၵႂႃႇတိၵ်းတိၵ်းၼၼ်ႉယဝ်ႉ။
ႁိူၼ်းၼိုင်ႈလင်ၶိူဝ်းပိူၼ်ႈမႃးယူႇၵေႃႈပဵၼ်ႁိူၼ်းပိူၼ်ႈယဝ်ႉ၊ ဝၢၼ်ႈၼိုင်ႈဝၢၼ်ႈ ၶိူဝ်းပိူၼ်ႈမႃးသၢင်ႈၵေႃႈ ပဵၼ်ဝၢၼ်ႈပိူၼ်ႈယဝ်ႉ၊ ယူႇလၢႆလၢႆ ပီႈၼွင်ႉၵၼ် ႁိမ်ၵၼ်သူၼ်ႁိမ်ၵၼ်ၼႃး ၶွင်ၵဝ်ၶွင်မႂ်း သမ်ႉပေႉမႃးၶႅၼ်ၵၼ်ဝႃႈၶႅၼ် ၽိူဝ်ႇထိုင်ၵမ်းလီလႆႈၵႅတ်ႇၶႄမႃးယဝ်ႉသမ်ႉ ဢမ်ႇမီးၽႂ်ၽႂ်ဢဝ်ပုၼ်ႈၽွၼ်းယဝ်ႉ။
လုၵ်ႈဢွၼ်ဢၼ်ၵိူတ်ႇၶိုၼ်ႈမႃးထႅင်ႈၼၼ်ႉ လုၵ်ႈဢွၼ်ႇဢၼ်တေပဵၼ်ၵူၼ်းလူင်မိူဝ်းၼႃႈၼၼ်ႉ လီလႆႈမီးလွင်ႈမေႃဢဝ်ပုၼ်ႈၽွၼ်းဝႆႉယူႇ ၼႂ်းတူဝ်ၽႂ်ၸႂ်မၼ်းလႄႈ ၸင်ႇတေမေႃႁၵ်ႉမေႃၵႅတ်ႇၶႄၽႅၼ်ႇလိၼ်ဝၢၼ်ႈမိူင်းမၼ်းလႆႈ၊ ၸွမ်းလူၺ်ႈပဵၼ်တႆးၵေႃႉၼိုင်ႈ ၵၢၼ်တႆးၼၼ်ႉ ပဵၼ်ပုၼ်ႈၽွၼ်းႁဝ်းၵေႃႉပဵၼ်တႆးယဝ်ႉၼႆ ႁႂ်ႈမၼ်းမေႃႁပ်ႉႁူႉထိုင်လႆႈၼၼ်ႉ ၵေႃႉပဵၼ်မေႃသွၼ်ၵေႃႈ မီးပုၼ်ႈၽွၼ်းသင်ႇပွၼ်ႈသွၼ်ပၼ်ယဝ်ႉ။
ၶမ်းလၢဝ်ၼၼ်ႉၵေႃႈ ပႃးတင်းလုၵ်ႈဢွၼ်ႇၼၼ်ႉသေ ပွၵ်ႈမိူဝ်းၵႂႃႇၸွမ်းပိူၼ်ႈတၢင်းဝၢၼ်ႈယဝ်ႉ၊ မိူဝ်းႁွတ်ႈထိုင်တီႈဝၢၼ်ႈၵေႃႈ ပဵၼ်ပၢင်ႇၵႂၢင်ႈ ႁူၵ်ႉႁၢမ်းလူင်ဝႆႉၵူၺ်း၊ ပေႃးမႃးတႅၵ်ႈၵၼ်တင်း မိူဝ်ႈမၼ်းတႄႇတႄႇမႃးႁွတ်ႈထိုင်ၼႆ မိူဝ်ႈလဵဝ်ၼႆႉ မၼ်းတိပ်ႇတၼ် ဢမ်ႇႁၼ်လႆႈတၢင်းဢွၵ်ႇသေဢိတ်းဝႃႈ တေႁဵတ်းၸိူင်ႉႁိုဝ် တေတႄႇၵႂႃႇၸိူင်ႉႁိုဝ်ယဝ်ႉလူးၵွၼ်ႇ၊ မၼ်းဢမ်ႇမီးသင် ဢမ်ႇမီးငိုၼ်းဢမ်ႇမီးၶူဝ်းၶွင်သင် ၵူၺ်းမီးတၢင်းႁူႉတၢင်းမေႃ ဢၼ်မၼ်းလႆႈႁဵၼ်းႁူႉမႃးၼၼ်ႉၵူၺ်း၊ တႃႇတေပူၵ်းတင်ႈႁၢင်ႈႁိူၼ်းမႃးၵူၺ်းၵေႃႈမၼ်းတင်းဢမ်ႇမေႃလူး။
ၵူၺ်းၵႃႈ ၼမ်ႉၸႂ်တႆးႁဝ်းၼၼ်ႉ မၼ်းၸႂ်ၵႂၢင်ႈယူႇလႄႈ မေႃႁဵတ်းမေႃၸွႆႈထႅမ်ၵၼ် ႁိူၼ်းၼိုင်ႈလင် ၵူၼ်းသိပ်းၵူၼ်းသၢဝ်းႁူမ်ႈၵၼ်ပူၵ်းတင်ႈသၢင်ႈပွင် ပေႃးၸွႆႈၵၼ် ဢမ်ႇႁိုင်ၵေႃႈယဝ်ႉယဝ်ႉ။
ၵူၼ်းၸၢႆးၽၼ်းမႆႉၽၼ်းတွၵ်ႇသၢၼ်ၽႃႁဵတ်းယူင်ႉသၢင်ႈႁိူၼ်းၵႂႃႇ ၽူႈယိင်းၵေႃႈ ဢွၼ်ၵၼ်ၾႆးၶႃးၸွႆႈၵၼ်ပဵၼ်ထႅဝ်ပဵၼ်တႅဝ်းယဝ်ႉ၊ ၶမ်းလၢဝ် ၾႆးၶႃးၵႂႃႇၸွမ်းပိူၼ်ႈ မိုဝ်းသမ်ႉပေႃးပွင်းၵေႃႈ ဢမ်ႇၶၢင်းပွင်ႉသင်၊ ၽႂ်ၵေႃႈ တေပွင်းမိူၼ်ၵၼ်ယဝ်ႉ တင်းဝၼ်းတင်းဝၼ်း ၸွႆႈၵၼ်ႁဵတ်းဢွၼ်ၵၼ်သၢင်ႈ။ ဢမ်ႇႁိုင်ဢမ်ႇၼၢၼ်း လႆႈပဵၼ်ဝၢၼ်ႈဢွၼ်ႇလဵၵ်ႉလဵၵ်ႉၵႂႃႇယဝ်ႉ။
ၶမ်းလၢဝ် လႄႈတင်း လုၵ်ႈဢွၼ်ႇၵေႃႈ ယူႇၵႂႃႇၸွမ်းၵၼ် ၼႂ်းလုၵ်ႈဢွၼ်ႇၼၼ်ႉၵေႃႈ မီးၼွင်ႉၶမ်း ၵေႃႉယႂ်ႇလိူဝ်ပိူၼ်ႈ ဢႃႇယု 10 ၶူပ်ႇ၊ ၼွင်ႉဢွင်ႇ 8 ၶူပ်ႇ၊ ၸၢႆးၶိူဝ်း 7 ၶူပ်ႇ၊ ၸၢႆးသႅင် 7 ၶူပ်ႇ ၼႆယဝ်ႉ။
ၼွင်ႉလႅင် ဢၼ်ႁဵတ်းမေႃသွၼ်ၸွႆႈၶမ်းလၢဝ်မႃးၸဵမ်မိူဝ်ႈလၢႆပီႊပူၼ်ႉၵေႃႈ ယင်းတိုၵ်ႉမႃးၶိုၼ်းယူႇ မႃးႁဵတ်းႁိူၼ်းယူႇၸွမ်းၶမ်းလၢဝ်လႄႈတင်းၽူဝ်မၼ်း ဢၼ်တေႇၼႃႈႁိူၼ်းၸွမ်းၵၼ်မိူဝ်ႈ ဢွၵ်ႇဝႃႇပီႊၵၢႆၼၼ်ႉယဝ်ႉ။
သမ်ႉဝႃႈတေၶိုၼ်းႁဵတ်းႁႆႈထႆၼႃးၵေႃႈ တႃႇထႆလိၼ်ထႆၼႃးၼၼ်ႉ ၵႂၢႆးၵေႃႈႁၢႆ ၸၢၵ်ႈထႆၵေႃႈသမ်ႉပေႃးလူႉသဵင်ႈမူတ်းယဝ်ႉ၊ တေႃႈၼင်ႇၸိူဝ်ႉၶဝ်ႈၵူၺ်းတင်းႁႃယၢပ်ႇယူႇ။ ၵူၺ်းၵႃႈ ၵၢမ်ႇႁၢႆႉၼၼ်ႉၵေႃႈ တိုၼ်းမီးလွင်ႈၵၢမ်ႇလီမႃးၸွမ်း လႅင်းမိူင်းသႂ်ၼၼ်ႉ ႁူႉတၢင်းယၢပ်ႇၵူၼ်းဝၢၼ်ႈၶဝ်လႄႈ လႆႈမႃးၸွႆႈထႅမ်ပၼ်ၵႂႃႇ တွၼ်ႈတႃႇပူၵ်းပွင်ပၼ် ၼႃႈဝၢၼ်ႈတႃသူၼ်ႁႂ်ႈလီမႃး၊ လႆႈၸွႆႈပူၵ်းပွင်ၵမ်ႉထႅမ်ပႃးႁူင်းႁဵၼ်း ႁႂ်ႈလုၵ်ႈဢွၼ်ႇၶဝ်ပေႃးႁဵၼ်းလိၵ်ႈလႆႈလီလီ ၶိူင်ႈၵမ်ႉၵႅမ်ၵၢၼ်ႁဵၼ်းၸိူဝ်းၼႆႉၵေႃႈ မၼ်းၵမ်ႉၸွႆႈထႅမ်ပၼ်မူတ်းမူတ်းယဝ်ႉ။
မိူၼ်ၼင်ႇဝၢၼ်ႈၶုမ်ႇဝၢၼ်ႈၶၢႆးမူဝ်ၼၼ်ႉတႄႉ ဢမ်ႇၺႃးၾႆးၽဝ်သေတႃႉ ႁိူၼ်းတႄႉပဝ်ႇႁၢမ်းႁူၵ်ႉတေႉႁူၵ်ႉဝႃႈယဝ်ႉ၊ ၸွမ်းၽႃၸွမ်းလင်ၶႃးၵေႃႈ ပဵၼ်ပွင်ႇပဵၼ်ႁွႆးလူင်ၵႂႃႇသဵင်ႈ ဢမ်ႇမႄးႁဵတ်းမႂ်ႇၵေႃႈဢမ်ႇယူႇလႆႈတေႉၼင်ႇဝႃႈ မိူဝ်းၶိုၼ်းၵေႃႈ မိူၼ်လႆႈမိူဝ်းႁဵတ်းဝၢၼ်ႈမႂ်ႇၵူၺ်း။
ၵူၼ်းတင်းဢိူင်ႇၼႆႉ ၶႂ်ႈဝႃႈပွၵ်ႈၶိုၼ်းၵေႃႈ မီးမွၵ်ႈၶိုင်ႈတေႃႇၶိုင်ႈၵူၺ်း ၵမ်ႈၽွင်ႈ သေလၢႆသူၼ်ႁႆႈၼႃး၊ ပေႃးယူႇလႆႈၵေႃႈ ၶႂ်ႈယူႇတီႈဢၼ်ယၢမ်ႈယူႇၼၼ်ႉၵူၺ်း ဢၼ်ပွၵ်ႈၶိုၼ်းၼၼ်ႉ ၵူၼ်းၼုမ်ႇဢမ်ႇပေႃးမီး ၵူၺ်းၵိုတ်းၵႅၼ်ႇၵူၼ်းၶၢဝ်ႉၵူၼ်းထဝ်ႈၵမ်ႈၼမ်ယဝ်ႉ။
တီႈဝၢၼ်ႈဢွၼ်ႇဢၼ်ယၢမ်ႈသိူဝ်းမူၼ်ႈ တီႈဝၢၼ်ႈဢၼ်ယၢမ်ႈလႆႈယူႇႁူမ်ႈၵူၼ်းၼမ် လႆႈယဵၼ်းပဵၼ်သဵင်တဵတ်ႇယဵၼ်ၵႂႃႇယဝ်ႉ၊ ၵူၼ်းၵေႃႉဢၼ်ယၢမ်ႈယူႇႁူမ်ႈၸွမ်းၵၼ် ၵူၼ်းၵေႃႉဢၼ်ယၢမ်ႈဢုပ်ႇလၢတ်ႈၵႂၢမ်းတၵ်ႉၵၼ်တႃႇသေႇ ၵေႃႉဢၼ်ၵႆႉလႄႇဝၢၼ်ႈတႂ်ႈမိူဝ်းၼိူဝ်ၸိူဝ်းၼၼ်ႉၵေႃႈ ႁၢႆၵႂႃႇယဝ်ႉ။
ယၢမ်းႁူဝ်ၶမ်ႈ ဝၢႆးၾူၼ်တူၵ်းႁိူတ်ႇ မွၵ်ႇၵုမ်ႈသုမ်ႇမိူင်းပႆႇပၢင်ႇၵႃႈႁိုဝ် ၶမ်းလၢဝ်ၸင်ႇပႆပၼ်ႇလဵပ်ႈမႃးတူၺ်း တီႈႁွႆးၾႆးမႆႈဢွင်ႈတီႈႁိူၼ်းၵဝ်ႇၶဝ်ယၢမ်ႈယူႇသဝ်းၼၼ်ႉ၊ လိူၵ်ႈလိူၵ်ႈလႆႈႁၼ်ၸွမ်ႇမိုဝ်းမွင်းၵူၺ်းၶမ်း ဢၼ်ၼၢႆးၵႆႉသႂ်ႇဝႆႉယူႇတႃႇသေႇ လိူင်ၸိူင်းငိူၼ်းယူႇၼႂ်းၵွင်ၽဝ်ႇတဝ်ႈၼၼ်ႉယဝ်ႉ။ မိူဝ်ႈႁၼ်ၼင်ႇၼၼ် ၼႂ်းၸႂ်ဢိုၵ်ႉၼိုၵ်ႉမႃးၵမ်းလဵဝ် ၵွင်တဝ်ႈတီႈၼၼ်ႈ ၽဝ်ႇတဝ်ႈဢၼ်ၼၼ်ႉ မၼ်းပဵၼ်ၶၢပ်ႈတူဝ်ၼၢႆးယဝ်ႉ ၼင်ႈႁေဢိုတ်ႇႁႆႈယူႇတီႈၼၼ်ႈတင်းႁိုင် တေႃႇထိုင်မၼ်းပေႃးဢိမ်ႇ မိူင်းသမ်ႉပေႃးလပ်းသိင်ႇယဝ်ႉ ၸင်ႇၵဵပ်းဢဝ်ၸွမ်ႇမိုဝ်းၼၼ်ႉသေ မိူဝ်းၵႂႃႇၸူး သၢင်ႇလူင်ၶႃၽူဝ်မေးတၢင်းဝၢၼ်ႈႁူၵ်းၼၼ်ႉယဝ်ႉ။
မိူဝ်ႈၽွင်းပႆလူင်မိူဝ်းၵႂႃႇၼၼ်ႉ သမ်ႉပဵၼ်ၽွင်းၵၢင်ဝၼ်းၸမ်လပ်းသိင်ႇယဝ်ႉလႄႈ ၵိုင်ႉၵၢင်ႉႁူပ်ႉၺႃးၵူၼ်းသိုၵ်းၸွမ်းတၢင်းသေ ၼႅတ်ႈလႅၼ်ႈပႅပ်ႉတူၼ်ႈမႆႉဝႆႉယဝ်ႉ။ ပႅပ်ႉဝႆႉယူႇသေတႃႉ သဵင်တိၼ်ဢၼ်ယဵပ်ႇၺႃးၵိင်ႇမႆႉႁႅင်ႈၼၼ်ႉၵေႃႈ ငိၼ်းၶဝ်ႈႁူပိူၼ်ႈၵႂႃႇ ပၢၵ်ႇၵွင်ႈၵူၼ်းတၢင်းၼၼ်ႉဝိၼ်ႇမႃးၸူးတၢင်းမၼ်းယူႇ ဢမ်ႇၸမ်ဢမ်ႇၵႆ။
ပေႃးမၼ်းဢွၵ်ႇၵႂႃႇ မၼ်းပဵၼ်ၽူႈယိင်းၵေႃႉလဵဝ်ၵူၺ်းလႄႈ ဢမ်ႇႁူႉဝႃႈ ၵူၼ်းၸိူဝ်းၼၼ်ႉတေႁဵတ်းသင်တီႈမၼ်း သင်ၸိူဝ်ႉဝႃႈမၼ်းမၼ်းပၢႆႈ မၼ်းၵေႃႈတေဢမ်ႇလႅပ်ႈလွတ်ႈမိူၼ်ၵၼ် ပိၵ်ႉသူပ်းပိၵ်ႉပၢၵ်ႇမၼ်းသေ ယူႇယဵၼ်ယဵၼ်ၵႂႃႇၵူၺ်းယဝ်ႉ။ ၵူၼ်းၸိူဝ်းၼၼ်ႉၵေႃႈ ဢမ်ႇလႆႈငိၼ်းသဵင်သင်ထႅင်ႈယဝ်ႉၼႆသေ ပႆၽႅတ်ႈပူၼ်ႉၵႂႃႇယူႇယဝ်ႉ။
ဝၢႆးသေၶဝ်ပူၼ်ႉၵႂႃႇဢမ်ႇႁိုင် ၶမ်းလၢဝ်ၸင်ႇတေၵၢၼ်းဢွၵ်ႇတၢင်းမႃး လႅၼ်ႈလူင်ၵႂႃႇၸွမ်းတၢင်းဝၢၼ်ႈႁူၵ်းၼၼ်ႉယဝ်ႉ။ မိူဝ်ႈတိုၵ်ႉမီးယူႇၸွမ်းတၢင်းၼၼ်ႉသမ်ႉ ငိၼ်းမႅၼ်ႈသဵင်မၢၵ်ႇတႅၵ်ႇလင်မေႃးမႃးၵမ်းၼိုင်ႈယူႇ မိူၼ်ၶဝ်တေယဵပ်ႇၺႃးမၢၵ်ႇဢၼ်ၵၢင်ဝႆႉၽွင်းပၢင်တိုၵ်းၼၼ်ႉယဝ်ႉ။ ၶမ်းလၢဝ်လႆႈငိၼ်းၼင်ႇၼၼ်ၵေႃႈ ယိုင်ႈၶႅၼ်းလႅၼ်ႈဝႆးထႅင်ႈ ၵူၺ်းၵႃႈ ဢမ်ႇထၢင်ႇဝႃႈ ၵူၼ်းၸိူဝ်းၼၼ်ႉ တေဝိၼ်ႇႁူဝ်ပွၵ်ႈမႃးၶိုၼ်း လႄႈ မုင်ႈႁၼ်မၼ်းယဝ်ႉ ယိုဝ်းၵွင်ႈသႂ်ႇသေ ၼႅတ်ႈလမ်းလူၺ်းၸွမ်းမၼ်းၵမ်းလဵဝ် တူၺ်းတၢင်းလင်တႄႉ ဝူၼ်ႉဝႃႈတေပဵၼ်ၽူႈၶဵၼ်ၶဝ်ၼႆၼၼ်ႉယဝ်ႉ၊ ၶမ်းလၢဝ်ၵေႃႈ ဢမ်ႇတၼ်းတူၺ်းတၢင်းသင် ႁူႉဝႃႈလူဝ်ႇပၢႆႈၵူၺ်း ဢဝ်ၵမ်ႈမၼ်းဝႃႈ လႅၼ်ႈၽႃႇယုမ်းလတ်းၶိူဝ်းလူင်ၵႂႃႇတိၵ်းတိၵ်းယဝ်ႉ။
တႂ်ႈငဝ်းလပ်းသိင်ႇ ၾႆးထၢတ်ႈထွင်ႇပိူင်းလႅင်း တၢင်းတႂ်ႈတၢင်းၼိူဝ် ၵူၼ်းၵေႃႉလဵဝ် လႆႈဢႅၼ်ႇလႅၼ်ႈပၢႆႈ သၢႆလႅင်းၾႆးၼၼ်ႉ ဢဝ်ၸႂ်ပေႃးဢမ်ႇၶႆႈလွတ်ႈယဝ်ႉ၊ ႁၼ်ငဝ်းလမ်တီႈလႂ် သဵင်ၵွင်ႈၶဝ်ၵေႃႈလင်ၼၼ်ႈမေႃးပၼ်း၊ ပေႃးၵိုတ်းၵေႃႈတေႃႈတေဢမ်ႇလွတ်ႈတၢင်းတၢႆ သင်ၵႂႃႇထႅင်ႈၵေႃႈ ယူဝ်ၶေးတေၸၢင်ႈလွတ်ႈလႆႈယူႇလႄႈ ယၢင်ႈတၢင်းၼႃႈ ဢမ်ႇႁၼ်ဝႃႈမၼ်းတေလႆႈထူပ်းသင်ၼၼ်ႉၵေႃႈ လႆႈသိုပ်ႇယဵပ်ႇတမ်းၵႂႃႇတိၵ်းတိၵ်း ၵူၺ်းၵႃႈ မိူၼ်ၽဝမၼ်းတေဢမ်ႇလွတ်ႈလႆႈယဝ်ႉႁိုဝ် သၢႆလႅင်းၾႆးၶဝ် ထွင်ႇသိုဝ်ႈမႃးတီႈမၼ်းလႄႈ သဵင်ၵွင်ႈလၼ်ႇလင်ယွၼ်ႈမေႃးမႃး လိူတ်ႈလႅင်ၸိုမ်ႉယမ်းဢွၵ်ႇ ဢမ်ႇထၢင်ႇဝႃႈတီႈၼၼ်ႈ တေမီးၽင်ႇႁိုၵ်းၵိုၵ်းၼမ်ႉႁွင်ႈလူင် ၶမ်းလၢဝ်ၼၼ်ႉၵေႃႈ သဵၼ်ဝူင်တူၵ်းၼမ်ႉၵႂႃႇယဝ်ႉ။
သိုပ်ႇလူထႅင်ႈတွၼ်ႈတေမႃးၶႃႈ
