လွင်ႈမုင်ႈမွင်းဢၼ်ဢမ်ႇပဵၼ်မႃး
ဢမ်ႇမီးၽႂ်ႁဵတ်းႁၢႆႉႁဝ်းလႆႈတၢၼ်ႇလွင်ႈမုင်ႈမွင်းႁဝ်း ယိင်ႈႁဝ်းမုင်ႈမွင်းၼႃႇ မိူဝ်ႈလႂ်မၼ်းဢမ်ႇပဵၼ်မႃးၼင်ႇဢၼ်ဢၢင်ႈဢၢၼ်းဝႆႉ မၼ်းၵေႃႈတေႁဵတ်းႁၢႆႁဝ်း ဢၼ်ႁဝ်းလႆႈဢဝ်ၸႂ်သႂ်ႇမၼ်းၼႃႇၼၼ်ႉယဝ်ႉ။
လွင်ႈဢမ်ႇမိူၼ်ၸႂ်ၼၼ်ႉ မၼ်းမိူၼ်ပဵၼ်မၢၼ်ႇၸမ်ႈဢၼ်ၼႄပၼ်တူဝ်တႄႉႁဝ်းလႄႈတၢင်းၵူဝ်ဢၼ်ႁဝ်းမီး မၢင်ပွၵ်ႈႁဝ်းဢမ်ႇလႆႈတိူဝ်ႉၸႂ် ယွၼ်ႉလွင်ႈဢမ်ႇမိူၼ် ၼင်ႇဢၼ်ဢၢင်ႈဢၢၼ်း ၵူၺ်းၵႃႈႁဝ်းတိူဝ်ႉၸႂ်ယွၼ်ႉမၼ်းၵႂႃႇတိူဝ်ႉယမ်မႅၼ်ႈၺႃးၶေႃႈဢၼ်ဝႃႈ “ႁဝ်းဢမ်ႇလီပဵင်းပေႃး”။
ႁဝ်းလႆႈၸဵပ်းယွၼ်ႉသႂ်ႇၸႂ်မၼ်းၼႃႇပူၼ်ႉတီႈ မၢင်ပွၵ်ႈၵေႃႈမၼ်းဢမ်ႇလႆႈသူၼ်ၸႂ်ႁဝ်းၶိုၼ်းသင်၊ ၵူၼ်းႁဝ်းၼၼ်ႉတေဢမ်ႇႁၼ်ၵႃႈၶၼ်မိူၼ်ၵၼ်လႄႈ လွင်ႈဢမ်ႇမိူၼ်ၸႂ်ၵေႃႈ သွၼ်ႁႂ်ႈႁဝ်းလႆႈႁဵၼ်းႁူႉဝႃႈ တေလႆႈႁၼ်ၵႃႈၶၼ်တူဝ်ၵဝ်ႇဢွၼ်တၢင်းၼၼ်ႉယဝ်ႉ။
ၵႆႉၵႆႉမီးလွင်ႈဢမ်ႇမိူၼ်ၸႂ်မႃးၵေႃႈ တေသွၼ်ႁႂ်ႈႁဝ်းပွင်ႇၸႂ်ၶေႃႈၵႂၢမ်းဢၼ်ဝႃႈ “ဢမ်ႇပဵၼ်သင်” ၼႆမႃးၼၼ်ႉယဝ်ႉ၊ လုၵ်ႉတီႈၶေႃႈၵႂၢမ်းဢၼ်ပၼ်ႁႅင်းၸႂ်ၼၼ်ႉတေယဵၼ်းပဵၼ်ဢၼ်ႁႄႉပၼ်ၸႂ်ႁဝ်းလႄႈ မိူဝ်ႈၶၢဝ်းယၢမ်းပူၼ်ႉၵႂႃႇ မၼ်းတေပဵၼ်လွင်ႈတဵတ်ႇယဵၼ်ဢၼ်ၵႅၼ်ႇၶႅင်မီးႁႅင်း ဢမ်ႇၸႂ်လွင်ႈယဵၼ်ႁၢႆဢမ်ႇမီးလွင်ႈမုင်ႈမွင်းသင်သေဢိတ်း။
မၢင်ပွၵ်ႈလွင်ႈဢမ်ႇမိူၼ်ၸႂ်ၼၼ်ႉဢမ်ႇလႆႈႁဵတ်းႁၢႆႉႁဝ်း ၵူၺ်းၵႃႈမၼ်းမႃးၸွႆႈႁဝ်းဢွၵ်ႇၵႂႃႇသဵၼ်ႈတၢင်းဢၼ်ဢမ်ႇပႆႇၸႂ်ႈ၊ မိူဝ်ႈတႄႇမၼ်းတေယဝ်ႉယဝ်ႉ ၵူၺ်းၵႃႈမၼ်းၵေႃႈပဵၼ်လွင်ႈတႄႇမႂ်ႇဢၼ်လီလိူဝ်သေၵဝ်ႇ လိူဝ်သေဝႃႈမိူဝ်ႈၼၼ်ႉႁဝ်းယင်းဢမ်ႇႁူႉၵူၺ်း။
ပိၼ်ႇ – ငဝ်မွင်မိုတ်းမူဝ်း
