ႁွႆးၸတ်ႉမၢတ်ႇၸဵပ်း တွၼ်ႈသွင်

တွၼ်ႈသွင်

ယွၼ်ႉၶႃႈပဵၼ်ၸိူင်ႉၼႆလႄႈ ၶႃႈၵေႃႈလႆႈႁူပ်ႉၺႃးၵူၼ်းၵေႃႉၼိုင်ႈ ဢၼ်ႁဵတ်းႁႂ်ႈႁဵတ်းႁင်ၶဝ်ဢမ်ႇလႆႈ ၶႃႈဝူၼ်ႉဝႃႈ ၽူႈယိင်းၼၼ်ႉ မၼ်းတေမိူၼ်ၵၼ်ၵူၺ်း ပေႃးဝႃႈႁဝ်းပႅတ်ႈၶဝ်ၵႂႃႇယဝ်ႉ ဢမ်ႇႁိုင်သင်ၵေႃႈ ၶဝ်တေၵႂႃႇမီးၵေႃႉမႂ်ႇထႅင်ႈႁေ ၶဝ်တေဢမ်ႇတိူဝ်ႉၸႂ်ႁိုင်ႁေၵႃႈႁိုဝ်လေႃႇ၊ ၵူၺ်းၵႃႈ ၵူၼ်းၵေႃႉၼႆႉ မၼ်းႁဵတ်းႁႂ်ႈၶႃႈဝူၼ်ႉၽိတ်း မိူဝ်ႈၶႃႈလၢတ်ႈမၼ်းဝႃႈ “ႁဝ်းၽႄတၢင်းၵၼ်ၼေႃႈ”

ၵူႈပွၵ်ႈပေႃးလၢတ်ႈဢွၵ်ႇၵႂၢမ်းၶေႃႈၼႆႉ တေၵႆႉထၢမ်လွင်ႈထၢမ်တၢင်းမၼ်းမႃးယဝ်ႉ ဢမ်ႇၼၼ်ၵေႃႈ တေႁၢႆလူင်ၵႂႃႇ ဢမ်ႇတွပ်ႇသင်ၶိုၼ်း၊ ဢွၼ်တၢင်းတေလၢတ်ႈ ၶႃႈၵေႃႈလႆႈႁႃၶေႃႈဢၢင်ႈမၼ်းဝႆႉယဝ်ႉ။

မၼ်းလၢတ်ႈတီႈၶႃႈၸိူင်ႉႁိုဝ်ၼႆ မၼ်းဝႃႈ “ဢဝ်ဝႃႈလႄႈ ၸိူင်ႉၼၼ်ၵေႃႈလီမိူၼ်ၵၼ်”

ၶႃႈဢမ်ႇထၢင်ႇဝႃႈတေလႆႈမႃးငိၼ်းၶေႃႈၵႂၢမ်းၸိူင်ႉၼႆ တၢၼ်ႇဝႃႈမၼ်းၵေႃႈပႂ်ႉမွင်းၵႂၢမ်းၶေႃႈၼႆႉယူႇယဝ်ႉ မိူၼ်ၶႃႈပဵၼ်ၵူၼ်းၵေႃႉၺႃးၶဝ်ယွၼ်းၽႄတၢင်းၼၼ်ႉယဝ်ႉ။ ဢဝ်ၶႃႈမိူၼ်ႇမိုင် ပေႃးဢမ်ႇၸၢင်ႈသိုပ်ႇၵႂၢမ်းလႆႈ ႁဵတ်းႁႂ်ႈၼႂ်းႁူဝ်ၶႃႈမီးၶေႃႈထၢမ်ဢွၵ်ႇမႃးတင်းၼမ်၊ ဢၼ်ႁဝ်းဢုပ်ႇၵၼ်မႃးၸိူဝ်းၼၼ်ႉ ဢမ်ႇလႆႈမီးၸႂ်တေႃႇၵၼ်သေဢိတ်ႉၼိုင်ႈႁႃႉ၊ ဢမ်ႇမီးတီႈပွင်ႇသင်တွၼ်ႈတႃႇသူၽွင်ႈႁႃႉ။ ပေႃးတေထၢမ် ၶႃႈၵေႃႈသမ်ႉပဵၼ်ၵူၼ်းၵေႃႉတႄႇဢွၼ်တၢင်း တေဢမ်ႇထၢမ်သမ်ႉၶမ်ၸႂ်ဝႆႉယူႇၼၼ်ႉယိုင်။

ပဵၼ်ၽွင်းဢၼ်ၶႃႈမႃးယူႇႁိူၼ်းႁေ ႁွင်ႉၼုမ်ႇလႅင်းလႄႈၸိုၼ်ႈမိူင်း မႃးႁဵတ်းၵၢၼ်ၼၼ်ႉယဝ်ႉ၊ ဝၢႆးသေၶႃႈမႃးၵေႃႈ ဢမ်ႇလႆႈၵပ်းသိုပ်ႇၶဝ်ၶိုၼ်း ၵူၺ်းၵႃႈ လွင်ႈၶမ်ၸႂ်ၼၼ်ႉၵေႃႈ ယင်းဢမ်ႇပႆႇႁၢႆလႆႈ၊ မၼ်းယင်းတိုၵ်ႉႁဵတ်းႁႂ်ႈၶႃႈၶုၵ်းၸႂ်လႆႈၶဝ်ယူႇ ယွၼ်ႉၶေႃႈတွပ်ႇ ဢၼ်ဢမ်ႇတၼ်းဝူၼ်ႉမႅၼ်ႈၼၼ်ႉ မၼ်းႁဵတ်းႁႂ်ႈၶႃႈသူၼ်ၸႂ်ၶဝ်မႃးယဝ်ႉ ဝူၼ်ႉထိုင်ၶဝ်ယူႇတိၵ်းတိၵ်း၊ ပဵၼ်ႁိုဝ်ၵေႃႈပဵၼ်လႄႈဝႆႉၸႂ်ၼင်ႇၼႆသေ ၶႃႈၸင်ႇလႆႈတူင်ႉတၵ်ႉၶဝ်ၵႂႃႇၶိုၼ်း။ မိူဝ်ႈၼၼ်ႉ ၶႃႈၵေႃႈဝူၼ်ႉယူႇဝႃႈ ၸွင်ႇတေၺႃးလႃႇဢေႉ ဢၢင်ႈတေမွတ်ႇၶိုၼ်း ၵူၺ်းၶဝ်သမ်ႉတူၺ်းသေ တွပ်ႇၸူးၶိုၼ်း။

“ၸူမ်းယဝ်ႉၼႃႈ တူင်ႉတၵ်ႉၵၼ်မႃး”

ဢဝ်ၶႃႈသမ်ႉပေႃးဝူၼ်ႉၵႂင်ၵႂႃႇထႅင်ႈယဝ်ႉ ၶႃႈဢမ်ႇႁူႉဝႃႈ ၶဝ်ဝူၼ်ႉသင်လႄႈ ၶႃႈသမ်ႉဝူၼ်ႉသင်ယူႇ ဢၼ်လႆႈတူင်ႉတၵ်ႉၶဝ်ၵႂႃႇၸိူင်ႉၼၼ် ႁဵတ်းႁႂ်ႈၶႃႈသမ်ႉပေႃးဢမ်ႇႁူႉတေသိုပ်ႇၵႂၢမ်းၸိူင်ႉႁိုဝ်ထႅင်ႈယဝ်ႉၼႃႇ။

ဢၼ်လႆႈမႃးႁူႉၸၵ်းၶဝ် မၼ်းဢမ်ႇႁဵတ်းႁႂ်ႈ ၶႃႈႁူႉၸၵ်းတၢင်းႁၵ်ႉသင်မႃး ၵူၺ်းၵႃႈ မၼ်းႁဵတ်းႁႂ်ႈၶႃႈပဵၼ်ၵူၼ်းယွင်ႇၵႂႃႇယဝ်ႉ။ မၼ်းၵေႃႈလႆႈသွၼ်ၶႃႈဝႃႈ ၵူၼ်းၵေႃႉၼိုင်ႈလႄႈၵေႃႉၼိုင်ႈၼၼ်ႉ ဢမ်ႇမိူၼ်ၵၼ် တေတႅပ်းတတ်းၵၼ်တီႈ ဢၼ်ႁဝ်းလႆႈထူပ်းမႃးၼၼ်ႉဢမ်ႇလႆႈ။

ႁဵတ်းႁႂ်ႈၶႃႈၶိုၼ်းႁူႉတူဝ်မႃးဝႃႈ ၶႃႈၵႂႃႇၼႄးပိူၼ်ႈၵူၺ်း ၶႃႈလူးသမ်ႉတူၺ်းတူဝ်ၵဝ်ႇယူႇႁိုဝ် ဢၼ်လႆႈႁဵတ်းႁၢႆႉၼမ်ႉၸႂ်ပိူၼ်ႈမႃးၸိူဝ်းၼၼ်ႉ ၶဝ်ၵေႃႈမီးႁူဝ်ၸႂ်မိူၼ်ၵၼ်လႄႈ ၶဝ်ၵေႃႈမေႃႁၵ်ႉမိူၼ်ၵၼ် ၶဝ်ၵေႃႈတေလႆႈၸဵပ်းမိူၼ်ၶႃႈယၢမ်ႈၸဵပ်း ၼၼ်ႉယဝ်ႉ။

ဝၼ်းၶႃႈႁပ်ႉၸုမ်ႈ ၶႃႈၵေႃႈဢမ်ႇထၢင်ႇဝႃႈတေလႆႈႁူပ်ႉၺႃး ၶမ်းဢိင်ႇထႅင်ႈ မၼ်းမႃးၸူမ်းၸွမ်းဢူၺ်းၵေႃႉမၼ်း ၶႃႈလႆႈႁၼ်ၶဝ်မီးတၢင်းသိူဝ်းယူႇလႄႈ တၢင်းယုမ်ႉၶဝ် ဢၼ်ၶႃႈဢမ်ႇလိုမ်းမၼ်းလႆႈႁေပွၵ်ႈၼၼ်ႉၵေႃႈ လႆႈၶိုၼ်းတွၵ်ႈတမ်ႁူဝ်ၸႂ်ၶႃႈ တိုၼ်ႇႁႅင်းမႃး၊ ဢမ်ႇဝႃႈႁၼ်ၶဝ်မိူဝ်ႈလႂ် ၸႂ်ႁၵ်ႉယင်းတိုၵ်ႉၵိုတ်းလိူဝ်ဝႆႉယူႇ။ သမ်ႉဝႃႈၶဝ်တေလႅၵ်ႈလၢႆႈၵႂႃႇတၢၼ်ႇႁိုဝ်ၵေႃႈ ၼႂ်းသၢႆတႃၶႃႈတႄႉ ၶဝ်ၼၼ်ႉ တိုၵ်ႉႁၢင်ႈလီမိူၼ်ၵဝ်ႇယူႇလႄႈ ဢမ်ႇမီးသင်လႅၵ်ႈလၢႆႈမႃး မိူဝ်ႈလႆႈႁွင်ႉၸိုဝ်ႈၶဝ် “ၶမ်းဢိင်ႇ” ၼႆၼၼ်ႉ ၸႂ်ယင်းတိုၵ်ႉတွတ်ႇတဵၼ်ႈလႆႈယူႇတႃႇသေႇ။ ၼႂ်းၶၢဝ်းတၢင်း 3 ပီႊပၢႆ လႆႈမႃးႁူပ်ႉၵၼ်ၶိုၼ်းလီလီၼၼ်ႉ ၶမ်းဢိင်ႇ လၢတ်ႈၸူးၶႃႈ မိူၼ်ၼင်ႇၵူၼ်းႁူႉၸၵ်းၼၼ်ႉဝႃႈ

“ဢမ်ႇႁူပ်ႉၵၼ်ႁိုင်ယဝ်ႉ ယူႇလီယူႇၼေႃႈ”

“ဢိုမ်ႈ..ယူႇလီယူႇၵူၺ်း”

ၶႃႈၵေႃႈသမ်ႉပေႃးဢမ်ႇႁူႉတေလႆႈႁဵတ်းႁိုဝ်လၢတ်ႈသင်ထႅင်ႈယဝ်ႉ သမ်ႉဝႃႈမီးၶေႃႈထၢမ်တင်းၼမ်တေလၢတ်ႈတီႈၶဝ်၊ ၵူၺ်းၵႃႈ မိူဝ်ႈယူႇတေႃႇၼႃႈၶဝ် တႃႇလၢတ်ႈၵႂၢမ်းဢွၵ်ႇၼိုင်ႈၶေႃႈၵူၺ်းပေႃးယၢပ်ႇယဝ်ႉၼႃႇ။

မိူဝ်ႈၼၼ်ႉ မီးၽူႈၸၢႆးၵေႃႉၼိုင်ႈ ပူၵ်းမိုဝ်းမႃးတၢင်းႁဝ်းၼၼ်ႉသေ မၼ်းၵေႃႈပူၵ်းမိုဝ်းတုမ်ႉတွပ်ႇၶိုၼ်းသေယဝ်ႉ လၢတ်ႈတီႈၶႃႈ

“ၼေႃႇၶိူဝ်း.. ႁဝ်းတေတေႇၼႃႈႁိူၼ်းယဝ်ႉၼႃႈ”

မိူၼ်ၶႃႈၺႃးၾႃႉၽႃႇလူင်ၵႂႃႇၵမ်ႉၼိုင်ႈ သမ်ႉပေႃးဢမ်ႇႁူႉၼိူဝ်ႉႁူႉတူဝ်သေဢိတ်း၊ ၼိူဝ်ႉၼင်ၼႆႉ သမ်ႉပေႃးသၢၼ်ႈၼႃလူင်ၵႂႃႇမူတ်း ထူၺ်ႈၸႂ်ၵေႃႈသမ်ႉပေႃးဢမ်ႇၶႂ်ႈၶိုတ်းၵၼ်ယဝ်ႉၵွၼ်ႇ၊ ၵတ်ႉၵႃႈ မိူဝ်ႈၼၼ်ႉ မီးသဵင်ၾူၼ်းဢေးၼွင်ႉသိုပ်ႇမႃးလႃႈ ၶႃႈၸင်ႇတေႁူႉတူဝ်၊ ၶႃႈၵေႃႈ ဢမ်ႇႁူႉတေလႆႈႁဵတ်းၸိူင်ႉႁိုဝ် တေလၢတ်ႈၸိူင်ႉႁိုဝ် ၵမ်ႈၼမ်ၵေႃႈ ပေႃးဢူၺ်းၵေႃႉတေႇၼႃႈႁိူၼ်း ၶႃႈၵေႃႈ တေလၢတ်ႈတီႈၶဝ်ဝႃႈ “ယိၼ်းၸူမ်းၸွမ်းၼႃႈ” ၵူၺ်းၵႃႈ ၼႆႉသမ်ႉပဵၼ်ၵေႃႉႁၵ်ႉၵဝ်ႇတေႇၼႃႈႁိူၼ်းပႅတ်ႈ တိူၵ်ႈတီႈႁဝ်းယင်းတိုၵ်ႉႁၵ်ႉၶဝ်ယူႇတဵမ်ဢူၵ်း တေလႆႈလၢတ်ႈၸိူင်ႉႁိုဝ်လီ မိူဝ်ႈၶႃႈယင်းပႆႇတွပ်ႇသင်လႆႈ။

“ႁဝ်းၵႂႃႇၵွၼ်ႇယဝ်ႉ..”

“ႁႂ်ႈမီးတၢင်းသိူဝ်းၼႃႈ!..” ၶႃႈၼႅတ်ႈႁွင်ႉလၢတ်ႈၸူးၶဝ်။

“ဢိုမ်ႈ..ၸူမ်းယဝ်ႉၼႃ”

တၢင်းယုမ်ႉၶဝ်ပွၵ်ႈၼၼ်ႉ ႁဵတ်းႁႂ်ႈပဵၼ်တၢင်းမွင်ပုၼ်ႈတႃႇၶႃႈယဝ်ႉ။ ၶႃႈၵေႃႈၵႃႈလႆႈမိူၼ်ႇမိုင်ၸုၵ်းတူၺ်း မၼ်းၽၢတ်ႇယၢၼ်ၶႃႈ ၵႂႃႇၸူးၵူၼ်းၵေႃႉဢၼ်မၼ်းပူၵ်းမိုဝ်းၼႄမိူဝ်ႈၵႆႈၼၼ်ႉၵူၺ်း။

မၼ်းႁဵတ်းႁႂ်ႈၶႃႈႁူႉဝႃႈ သမ်ႉဝႃႈတေႁၵ်ႉတၢၼ်ႇႁိုဝ်ၵေႃႈ မိူဝ်ႈၶဝ်ဢွၵ်ႇၵႂႃႇယဝ်ႉၼၼ်ႉ ပွင်ႇဝႃႈၶဝ်ဢမ်ႇၶႂ်ႈယူႇယဝ်ႉ တၢင်းႁၵ်ႉႁဝ်းၼၼ်ႉ မီးတႃႇၶဝ်ၼမ်တၢၼ်ႇႁိုဝ်ၵေႃႈ မၼ်းပဵၼ်လႆႈႁၵ်ႉယူႇၽၢႆႇလဵဝ်ၵူၺ်း၊ မိူဝ်ႈၶဝ်ဢမ်ႇမီးၸႂ်ယဝ်ႉ ႁဝ်းၵေႃႈထုၵ်ႇလီပွႆႇၶဝ်ၵႂႃႇမိူၼ်ၵၼ်။

လွင်ႈဢၼ်ၶႃႈၶႂ်ႈႁူႉမႃးတႃႇသေႇ ၶႃႈလႆႈၶေႃႈတွပ်ႇယဝ်ႉ မိူဝ်ႈလႆႈႁၼ်တၢင်းယုမ်ႉၶဝ် မိူဝ်ႈၶဝ်ၸုင်ယိပ်းမိုဝ်းၽူႈၸၢႆးၵေႃႉၼၼ်ႉ ၶေႃႈၵႂၢမ်းၶဝ် ဢၼ်ဝႃႈတေတေႇၼႃႈႁိူၼ်းယဝ်ႉၼႆၼၼ်ႉ ၶဝ်ဢမ်ႇလႆႈမီးၸႂ်ၼိူဝ်ႁဝ်းယဝ်ႉလႄႈ လွင်ႈႁဝ်းၼၼ်ႉၵေႃႈ ပဵၼ်လွင်ႈဝၼ်းလင်ၵႂႃႇယဝ်ႉလူး။

မၼ်းႁဵတ်းႁႂ်ႈၶႃႈလႆႈတႅပ်းတတ်းၵွင်လင်ပႅတ်ႈၶဝ်ၵႂႃႇ လူၺ်ႈတီႈဢမ်ႇၶိုၼ်းဝၢႆႇၼႃႈတူၺ်းၶဝ်ယဝ်ႉ၊ တေပဵၼ်ၵွပ်ႈၶႃႈ ၵၼ်ႈဝႆႉတၢင်းတုၵ်ႉဢၼ်မီးယူႇၼႂ်းၸႂ်ၼၼ်ႉဢမ်ႇလႆႈႁိုဝ် ၼမ်ႉတႃၶႃႈၵေႃႈလႆႈၸိုမ်ႉယမ်းမႃး ထိုင်တီႈႁၢမ်ႈပေႃးဢမ်ႇလႆႈ သမ်ႉပေႃးလႆႈပၢႆႈၵႂႃႇတၢင်းလင်ႁူင်းႁဵၼ်းၼၼ်ႉယဝ်ႉ။

ထိုင်မိူဝ်ႈလဵဝ် ႁႂ်ႈၶႃႈလိုမ်းၶဝ်ႁႃႉ ၶႃႈၵေႃႈဢမ်ႇလိုမ်းလႆႈ၊ ထၢမ်ဝႃႈ ၶႃႈႁၵ်ႉၶဝ်ယူႇႁႃႉ ၶႃႈၵေႃႈတေလၢတ်ႈဝႃႈ ၶဝ်ပဵၼ်ၵူၼ်းၵေႃႉဢၼ်ၶႃႈယၢမ်ႈႁၵ်ႉသုတ်းႁူဝ်ၸႂ်ယဝ်ႉ ၵူၺ်းၵႃႈ ၶၢဝ်းယၢမ်းႁဝ်းလႄႈၶဝ်ၼၼ်ႉ မၼ်းလႆႈသုတ်းသဵင်ႈၵႂႃႇႁိုင်ယဝ်ႉ။

သမ်ႉဝႃႈၸၢတ်ႈၼႆႉ ၶႃႈတေဢမ်ႇထူပ်းၵူၼ်းၸိူင်ႉၼင်ႇၶမ်းဢိင်ႇယဝ်ႉသေတႃႉ ၶႃႈဝူၼ်ႉဝႃႈ တေမီးၵူၼ်းၵေႃႉဢၼ် ၽွမ်ႉတႃႇယၢင်ႈၸွမ်းၸၢတ်ႈပၢၼ်ၶႃႈလူၺ်ႈ လွင်ႈပွင်ႇၸႂ်ၶဝ်ႈၸႂ် လွင်ႈယုမ်ႇၸႂ်ၵၼ်ၵႂႃႇယူႇလႄႈ ၶႃႈၵေႃႈမုင်ႈမွင်းဝႃႈ တေလႆႈထူပ်းၵူၼ်းၵေႃႉဢၼ် ၶႃႈၽွမ်ႉတႃႇပွင်သၢင်ႈၼႃႈႁိူၼ်းၸွမ်းလႆႈလႄႈ ၽွမ်ႉတႃႇလႅၵ်ႈလၢႆႈ ၸႂ်ႉၸၢတ်ႈပၢၼ်ႁူမ်ႈၵၼ်ၵႂႃႇယူႇ။

မိူဝ်ႈၽွင်းၼေႃႇၶိူဝ်း တိုၵ်ႉလၢတ်ႈၼႄၽူႈတႅမ်ႈလိၵ်ႈယူႇၼၼ်ႉ ဢေးၼွင်ႉၵေႃႈ မႃးၸိမ်ၸွမ်း

“ဢမ်ႇမီးဝၼ်းမၼ်းလေႃႇ ၸႂ်ၼမ်ၸိူင်ႉၼင်ႇပီႈၼႆႉ ၶႃႈယုမ်ႇဝႃႈတိုၼ်းတေႁႃဢမ်ႇထူပ်း၊ သမ်ႉဝႃႈၺႃးၵူၼ်းလီတၢၼ်ႇႁိုဝ်ၵေႃႈ ပီႈယင်းဢမ်ႇမေႃထိင်းသိမ်းမၼ်းဝႆႉလူး၊ ပိူၼ်ႈၸင်ႇဝႃႈ ၵေႃႉႁၵ်ႉၼႆႉႁႃငၢႆႈၼႃႇ တႃႇထိင်းသိမ်းႁႂ်ႈမၼ်းယူႇယိုၼ်းယၢဝ်းၼၼ်ႉ ယၢပ်ႇလိူဝ်ပိူၼ်ႈယဝ်ႉ”

“မႃးႁႃဝႃႈႁင်းၵဝ်ယူႇ မႂ်းလူး မေႃထိင်းသိမ်းမၼ်းၼႃႇယဝ်ႉဢိူဝ်ႈၼေႃႈ ပေႃးၸႂ်ၶဝ်ဢမ်ႇယူႇ သမ်ႉဝႃႈၸၼ်ဝႆႉ လုမ်းလႃးလီလီၵေႃႈ ၶဝ်ၵေႃႈတိုၼ်းတေၵႂႃႇၵူၺ်း ”

“ၸႂ်ၵူၼ်းၼၼ်ႉ မၼ်းဢမ်ႇၼိမ်လႆႈလူး သင်ဝႃႈႁဝ်းလုမ်းလႃးလီ မၢင်ၽဝ်ႇၶဝ်တေပွၵ်ႈမႃးႁႃႁဝ်းၶိုၼ်းၵေႃႈပဵၼ်လႆႈ”

“ယႃႇလႅၼ်တူဝ်ၵဝ်ႇယူႇယဝ်ႉ ပေႃးထၢၼ်ႈဝႃႈ ၶဝ်ၶႂ်ႈယူႇ ၶဝ်တေဢမ်ႇဢွၵ်ႇၵႂႃႇလေႃႇ”

“တၢင်းႁၵ်ႉမၼ်းဢမ်ႇမီးပိူင်တၢႆလေႃႇၼႃႈ မၼ်းမီးၵူႈလၢႆးယဝ်ႉ မၢင်ပွၵ်ႈလွင်ႈဢမ်ႇထၢင်ႇၼၼ်ႉၵေႃႈ ယင်းၸၢင်ႈၵိူတ်ႇပဵၼ်မႃးလႆႈယူႇ”

“ဢိူဝ်ႈဢိူဝ်ႈ မွင်းလူမ်းမွင်းလႅင်ႉယူႇႁဵတ်းၼၼ်ၵူၺ်းလႄႈၼႃႈၼွင်ႉပီႈ ပေႃးလႆႈလိၵ်ႈၽိတ်ႈမွၵ်ႇမႃး တေပၼ်မႂ်းတူၺ်းယူႇ ၵဝ်ႁူႉယူႇၵူၺ်းမႂ်းတေဢမ်ႇလႆႈ”

ယိင်းၼွင်ႉၵေႃႈ ႁဵတ်းတႃၸင်းသႂ်ႇမၼ်းသေ ဢွၵ်ႇႁိူၼ်းၵႂႃႇယဝ်ႉ။

ၽူႈတႅမ်ႈလိၵ်ႈၸင်ႇၶိုၼ်းထၢမ်ၼေႃႇၶိူဝ်း “လိူဝ်သေၶမ်းဢိင်ႇယဝ်ႉ ၵူၼ်းၵေႃႉဢၼ်သူၽွမ်ႉပိုတ်ႇၸႂ်ပၼ်ၶဝ်လႆႈ တဵမ်ဢူၵ်းႁူဝ်ၸႂ်ၶိုၼ်းထႅင်ႈၼၼ်ႉ ၸွင်ႇမီးယူႇႁႃႉ”

သဵင်ယဵၼ်ၵႂႃႇၵႅပ်ႉၼိုင်ႈ ၼႂ်းသၢႆတႃတႄႉ ၼႄႁႂ်ႈႁၼ်လႆႈဝႃႈ ဝူၼ်ႉလႆႈယဝ်ႉ၊ “မိူၼ်တေမီးယူႇ ၵေႃႉၼိုင်ႈ..”

တၢင်းႁၵ်ႉဢၼ်ယၢမ်ႈႁၵ်ႉလူၼ်ႉဢူၵ်းႁူဝ်ၸႂ်ၼၼ်ႉ ဢမ်ႇယၢမ်ႈလိုမ်းမၼ်းလႆႈသေပွၵ်ႈၵေႃႈယဝ်ႉ၊ ၵူၺ်းၵႃႈ တၢင်းႁၵ်ႉၼၼ်ႉ မၼ်းလႆႈသုတ်းသဵင်ႈၵႂႃႇယဝ်ႉလႄႈ ပဵၼ်လွင်ႈဝၼ်းလင် ဢၼ်ဢမ်ႇၸၢင်ႈၶိုၼ်ၶိုၼ်းလႆႈယဝ်ႉ မၼ်းၵေႃႈတေပဵၼ်တၢင်းႁၵ်ႉလီလီ မၢႆတွင်းလီလီဢၼ်မီးယူႇၼႂ်းၶၢဝ်းယၢမ်းပူၼ်ႉမႃးၵူၺ်း၊ ယွမ်းႁပ်ႉမၼ်းသေ ၸႂ်ႉၶၢဝ်းယၢမ်းဢၼ်မီးယူႇမိူဝ်ႈလဵဝ်ၼႆႉ ႁႂ်ႈလီလိူဝ်ပိူၼ်ႈၵေႃႈပဵင်းပေႃးယဝ်ႉ။

မီးပပ်ႉလိၵ်ႈဢၼ်ၼိုင်ႈ မၼ်းလၢတ်ႈၼႄဝႃႈ သူထုၵ်ႇလီမီးတၢင်းႁၵ်ႉဢၼ်မိူၼ်ဢမ်ႇမီးဝၼ်းမိူဝ်ႈၽုၵ်ႈ ၵူၺ်းၵႃႈ သူဢမ်ႇထုၵ်ႇလီႁၵ်ႉထိုင်တီႈပေႃးလိုမ်းတူဝ်ၸဝ်ႈၵဝ်ႇ ၼႆဝႃႇ၊ ၵူၼ်းၵေႃႉဢၼ်ႁဝ်းႁၵ်ႉလူၺ်ႈလွင်ႈတဵမ်ၸႂ် ဢမ်ႇၵူဝ်ဝႃႈမိူဝ်ႈၽုၵ်ႈတေပဵၼ်သင်မႃး ၵူၼ်းၵေႃႉ ဢၼ်ႁၵ်ႉယဝ်ႉႁဵတ်းႁႂ်ႈႁဝ်းလႆႈပဵၼ်တူဝ်ၸဝ်ႈၵဝ်ႇ ယုမ်ႇဝႃႈ ၵူၼ်းၵေႃႉၼၼ်ႉ မၼ်းမီးတေႉယူႇ။

ဢမ်ႇမီးသင်မၼ်ႈၵိုမ်းလႆႈတႃႇသေႇ ဢမ်ႇမီးသင်ဢၼ်လၢမ်းႁူႉလႆႈဝႃႈ တေဢမ်ႇပဵၼ်သင်မႃး တူဝ်ႁဝ်း ၸႂ်ႁဝ်းၵေႃႈ တေႃႈယင်းမေႃပိူင်ႈယဝ်ႉ၊ ၼေႃႇၶိူဝ်း ၵေႃႈ သမ်ႉဝႃႈၵဝ်းၽူႈယိင်းၼမ်သေတႃႉ ၼႂ်းၸႂ်မၼ်းၼၼ်ႉ ႁၵ်ႉလဵဝ်ၸႂ်လဵဝ်မႃးတႃႇသေႇ လႄႈ ယင်းတေပိုတ်ႇၸႂ်ႁၵ်ႉၽႂ်လႆႈတဵမ်ၸႂ်ၵႂႃႇထႅင်ႈမိူၼ်ၵၼ်။ ယိင်းၼွင်ႉ ၵေႃႈတေႃႈၼင်ႇၼၼ် မိူဝ်ႈတႅပ်းတတ်းဢမ်ႇလႆႈ ပၼ်ႁႂ်ႈၶၢဝ်းယၢမ်းတႅပ်းတတ်းပၼ်လႄႈ ၶေႃႈတွပ်ႇမၢင်ဢၼ်ၼၼ်ႉ ႁူႉၵႃႈတေလႆႈပႂ်ႉယဝ်ႉ။

ၽူႈတႅမ်ႈလိၵ်ႈ သူင်ႇသင်ႇၶႃသေယဝ်ႉၵေႃႈ ယၢၼ်ၽၢတ်ႇႁိူၼ်းၶဝ်မိူဝ်းယဝ်ႉ။

သုတ်းယဝ်ႉ။

သင်ဝႃႈမီးတီႈၽိတ်းတီႈပိူင်ႈ တီႈဢမ်ႇထုၵ်ႇဢမ်ႇမႅၼ်ႈၼႆၵေႃႈ ယွမ်းၼွမ်းယႂ်ႇၼမ်ယူႇၶႃႈ။

ၼပ်ႉယမ်ၽူႈလူလိၵ်ႈႁဝ်းၶဝ်တင်းသဵင်ႈယူႇဢေႃႈ

တႅမ်ႈ − သႅၼ်ငဝ်း

18/11/2024