တွၼ်ႈၼိုင်ႈ
ႁဝ်းႁၵ်ႉၶဝ်တေႉယဝ်ႉ ၸၢတ်ႈပၼ်ႁဝ်းဢမ်ႇယၢမ်ႈလႆႈႁၵ်ႉၽႂ်ထိုင်ဢူၵ်းထိုင်ၸႂ်ႁေပွၵ်ႈ၊ သမ်ႉဝႃႈႁဝ်းဢမ်ႇလႆႈႁူပ်ႉ ဢမ်ႇလႆႈႁၼ်ၵၼ်ယဝ်ႉသေတႃႉၵေႃႈ လိုၵ်ႉလိုၵ်ႉၼႂ်းႁူဝ်ၸႂ်ၼႆႉ မီးၶဝ်ဝႆႉယူႇတႃႇသေႇ၊ မိူဝ်ႈလႂ်ႁဝ်းလႆႈႁူပ်ႉၶဝ်မႃးၼႆ ႁူဝ်ၸႂ်ႁဝ်း တေၸၢင်ႈပိုတ်ႇၵီႈသေႁပ်ႉတွၼ်ႈၶဝ်ၶိုၼ်းလႆႈယူႇ။
ၶဝ်သွၼ်ႁႂ်ႈႁဝ်းမေႃႁူႉၸၵ်းတၢင်းႁၵ်ႉလႄႈ သွၼ်ႁႂ်ႈႁဝ်း ဢမ်ႇမေႃႁၵ်ႉၽႂ်လႆႈထႅင်ႈၼၼ်ႉၵေႃႈပဵၼ်ၶဝ်ၵူၺ်း။
လွင်ႈမၼ်းမီးယူႇဝႃႈ သဵင်တဵတ်ႇယဵၼ်ဢၼ်လႆႈႁူပ်ႉတေႃႇၼႃႈၵၼ်ဝၼ်းဢွၼ်တၢင်းသုတ်း ၼႂ်းႁူင်းႁဵၼ်းဢၼ်ႁဝ်းလႆႈယူႇသဝ်းႁူမ်ႈလင်လဵဝ်၊ မီးၸဵမ်လုၵ်ႈႁဵၼ်းယိင်းလႄႈၸၢႆး ယူႇသဝ်းၶိုၼ်ႈႁွတ်ႈ မိူဝ်ႈလႆႈႁွတ်ႈထိုင် ၵူၼ်းၼမ်လၢႆ ႁဝ်းဢမ်ႇႁူႉတေလႆႈၵႂႃႇတူင်ႉတၵ်ႉႁႃၽႂ် ၸင်ႇမီးၼွင်ႉယိင်းဢွၼ်ႇ ၵႅမ်ႈတွင်ႇတွင်ႇၼႃႈၶၢဝ်ၶၢဝ် ၶူၼ်ႁူဝ်လမ်ယၢဝ်း ႁူၺ်ႇတႃလိူမ်ႈမူၼ်းလီ သီႇသူပ်းၶွင်ႇသွင်ႁွင်ယွမ်ႉဝႆႉ ၵႆႉလၢတ်ႈၵႆႉဢုပ်ႇထူၼ်ႈယဝ်ႉ သၢႆတႃဝၢႆႇယၵ်ႉၸူးႁႃး ၼႃႈယုမ်ႉၶဝ်ၼၼ်ႉ မႃးတုမ်ႉယွၼ်ႈႁူဝ်ၸႂ် ဢဝ်ႁႃးပေႃးမိုင်ပၢႆႈၵႂႃႇၵႅပ်ႉၼိုင်ႈယဝ်ႉ။
ၵွပ်ႈပဵၼ်ၵူၼ်းၶီႈဢၢႆလႄႈ ႁၼ်ယူႇၵေႃႈဢမ်ႇႁတ်းတၵ်ႉ လႆႈလၵ်ႉလွမ်ယၵ်ႉတူၺ်းၵူၺ်း။ ၶႂ်ႈဢုပ်ႇၸူးယူႇၵေႃႈ ဢမ်ႇႁူႉတေလၢတ်ႈသင်လႆႈ ၵႂၢမ်းဝၢၼ်ၶၢၼ်ဢွၵ်ႇယၢပ်ႇ ၵႂၢမ်းယဝ်ႉယွၵ်ႇတႃႇမွၵ်ႈလၢတ်ႈၼႄၵူၼ်းၵေႃႉဢၼ်ႁဝ်းၵျိူၵ်ႈၼၼ်ႉ ၵူဝ်ပိူၼ်ႈတေဝႃႈႁဝ်းလႅၼ်ၼၼ်ႉၼႃႇ။
လႆႈႁူပ်ႉထူပ်းၵၼ် လႆႈႁၼ်ၵၼ်ၵူႈဝၼ်း ၶႃႈဝူၼ်ႉဝႃႈမွၵ်ႈၼႆႉၵူၺ်းၵေႃႈ ႁၢၼ်ႉၸႂ်ယဝ်ႉၼႆ၊ ၵူၺ်းၵႃႈ ဢမ်ႇသၢင်ႇထုၵ်ႇ ၶဝ်ၵေႃႈၶဝ်ႈမႃးတူင်ႉတၵ်ႉထၢမ်ၶႃႈဝႃႈ
“ပီႈၸိုဝ်ႈသင်ၶႃႈ..”
သဵင်ဝၢၼ်ဢူၼ်ႈဢွၼ်ႇၶဝ်ၼၼ်ႉ မႃးယွၼ်ႈမေႃးၼႂ်းႁူ ၼႃႈယုမ်ႉၶဝ်ၼၼ်ႉ ယၵ်ႉတူၺ်းၵူၺ်းၵေႃႈ တႃပေႃးၵႅၼ်းယဝ်ႉ၊ ၶႃႈႁိုဝ်ႁတ်းတေႃႇၼႃႈၶဝ်ႁေလၢတ်ႈၸူး ၵူမ်ႈၼႃႈသေယဝ်ႉတွပ်ႇၵႂႃႇ “ၼေႃႇၶိူဝ်း ၼႆၶႃႈ”
“ၼေႃႇၶိူဝ်းၼႆႁႃႉ..ၼွင်ႉၸိုဝ်ႈၶမ်းဢိင်ႇၼႃ”
“ဢေႃ.. ၼွင်ႉၶမ်းဢိင်ႇ”
“ႁူႉၸၵ်းၸိုဝ်ႈၼွင်ႉယဝ်ႉၵေႃႈ ယႃႇလိုမ်းတွင်းၼႃႈ”
ၶႂ်ႈလၢတ်ႈဝႃႈ “တေတွင်းတေႃႇတၢႆၵွၼ်ႇဢေႃႈ” ၵူၺ်းၵႃႈလၢတ်ႈဢွၵ်ႇသူပ်းဢမ်ႇလႆႈ။
ၶႃႈၵေႃႈဢမ်ႇႁူႉတေႁဵတ်းႁိုဝ်တွပ်ႇ လႆႈယုမ်ႉၸူးၵႂႃႇႁဵတ်းၼၼ်ၵူၺ်း၊ တီႈတေႉၼႂ်းၸႂ်ၶႃႈၼၼ်ႉ ၸူမ်းဝႃႈၸူမ်းယဝ်ႉ ၸူမ်းၸူမ်းပေႃးဢဝ်မိူဝ်းၼွၼ်းၾၼ်ႁၼ် ၸၢတ်ႈပၢၼ်တၢင်းၼႃႈ ဢၼ်မီးၶဝ်ယူႇၼၼ်ႉယဝ်ႉ။
လႆႈႁၼ်ၶဝ် လႆႈဢုပ်ႇၶဝ် ဝၼ်းဢိတ်းဝၼ်းဢွတ်း လႆႈၸမ်ၸႂ်ၵၼ် မိုတ်ႈၵိုဝ်းၵၼ်မႃးတိၵ်းတိၵ်း လွင်ႈၸိူဝ်းၼၼ်ႉ မၼ်းၵဵပ်းသိူင်ႇသိမ်းဢမ်ႇလႆႈယဝ်ႉ၊ ႁဝ်းႁဵၼ်းႁွင်ႈလဵဝ်ၵၼ် လႄႈ ၶႃႈၵေႃႈသမ်ႉယူႇၽၢႆႇလင်မၼ်း မိူဝ်ႈႁဵၼ်းၼၼ်ႉ ၵႆႉၵႆႉလၵ်ႉတူၺ်းမၼ်း လိူဝ်သေတူၺ်းလိၵ်ႈၵွၼ်ႇယဝ်ႉ။ ၽွင်းၼၼ်ႉ ၶႃႈၵေႃႈဢမ်ႇမီးတီႈၵပ်းသိုပ်ႇၶဝ် ၼင်ႇႁိုဝ် လွင်ႈဢၼ်မီးယူႇၼႂ်းၵၢင်ၸႂ်ၶႃႈ ပေႃးတေမွၵ်ႇလၢတ်ႈၼႄၶဝ် တေႃႇၼႃႈၼၼ်ႉ ၶႃႈသမ်ႉလၵ်ႉၵူဝ်ယူႇလႄႈ ၶႃႈၵေႃႈဢမ်ႇၸၢင်ႈႁဵတ်းႁိုဝ် တင်းႁတ်းႁေဢမ်ႇႁတ်းႁေ လႆႈတႅမ်ႈလိၵ်ႈပွတ်းဢွၼ်ႇၽိုၼ်ၼိုင်ႈ သႂ်ႇဝႆႉၼႂ်းပပ်ႉလိၵ်ႈၶဝ် မိူဝ်ႈၶဝ်ဢမ်ႇလႆႈယူႇၼႂ်းႁွင်ႈႁဵၼ်းၼၼ်ႉယဝ်ႉ။
မိူဝ်ႈၼၼ်ႉ ၶႃႈၵေႃႈလၵ်ႉလွမ်ၵူဝ်ယူႇ ၵူဝ်ၶဝ်တေႁၼ်လိၵ်ႈၼၼ်ႉၵွၼ်ႇဢေႃႈ၊ သင်ၶဝ်ႁၼ်ႁေဢမ်ႇတွပ်ႇၸူးၶိုၼ်း ၵူဝ်ဝႃႈတေတူၺ်းၼႃႈၵၼ်ဢမ်ႇလႆႈ ၶႃႈၵေႃႈလႆႈလၵ်ႉၵႂႃႇဢဝ်ၶိုၼ်း။ ၵူၺ်းၵႃႈ ၽိုၼ်လိၵ်ႈၶႃႈ လႆႈထုၵ်ႇလႅၵ်ႈပဵၼ် တူဝ်လိၵ်ႈၶဝ်ၵႂႃႇ ႁႃးၵေႃႈလုၵ်ႉတီႈၼၼ်ႈသေ တႄႇပဵၼ်ၵေႃႉႁၵ်ႉၵၼ်မႃးယဝ်ႉ။ ၽိုၼ်လိၵ်ႈဢၼ်ၶဝ်တႅမ်ႈတွပ်ႇမႃးၼၼ်ႉ သမ်ႉဝႃႈမီးထႅဝ်လိၵ်ႈ “ဢေႃႈၶႃႈ” ၼႆၶေႃႈလဵဝ်ၵူၺ်းၵေႃႈ ႁဵတ်းႁႂ်ႈၶႃႈၼွၼ်းတူၺ်းမၼ်းလႆႈတင်းၶိုၼ်းယဝ်ႉ။
ၶဝ်ႁဵတ်းႁႂ်ႈၶႃႈ မီးၸႂ်ႁတ်းမႃးဢေႃႈ ၵွပ်ႈႁၵ်ႉၶဝ်ၼႃႇဢႃးလႃးလႄႈ ၸင်ႇလႆႈႁတ်းဢဝ်ၶေႃႈၵႂၢမ်းၼႂ်းဢူၵ်းၼႂ်းၸႂ်ၼၼ်ႉဢွၵ်ႇမႃးလၢတ်ႈၼႄၶဝ် ထိုင်တီႈပေႃးလိုမ်းလွင်ႈၵူဝ်မႃးယဝ်ႉ။ ၶဝ်ႁဵတ်းႁႂ်ႈၶႃႈလႆႈႁူႉဝႃႈ ၵူႈလွင်ႈဢၼ်ႁဝ်းဢမ်ႇႁၼ်ၼၼ်ႉ ဢမ်ႇၸႂ်ႈလွင်ႈလီၵူဝ်လႄႈ ႁတ်းလူင်းမိုဝ်းႁဵတ်း မၼ်းတေဢွၵ်ႇမႃးလႆႈလီယူႇၵူၺ်း။ ၶဝ်ပဵၼ်ၶူးသွၼ် တွၼ်ႈတႃႇၽဝၸၢတ်ႈပၢၼ်ၶႃႈၵေႃႉၼိုင်ႈ လုၵ်ႉတီႈပဵၼ်ၵူၼ်းၶီႈၵူဝ်သေ သွၼ်ႁႂ်ႈၶႃႈႁတ်းႁဵတ်းႁတ်းပိုတ်ႇၸႂ်မႃးဢေႃႈ။
ၶဝ်ပဵၼ်ၽူႈယိင်းဢၼ် မီးၼမ်ႉၸႂ်လီတေႉယဝ်ႉ မေႃၸွႆႈထႅမ်ပိူၼ်ႈ၊ ၶဝ်မေႃတူၺ်းထိုင်မေႃသႂ်ႇၸႂ်လီတေႉယဝ်ႉ ၶႃႈဢမ်ႇၶႂ်ႈသုမ်းၶဝ်ၵႂႃႇလႄႈ တေဢမ်ႇမီးဝၼ်းသုမ်းၶဝ်ပၼ်ၽႂ်လႆႈ ၶႃႈၵေႃႈလႆႈသႂ်ႇၸႂ်ၶဝ်မႃး ဢၼ်လႂ်ၶႃႈဢမ်ႇႁူႉဢမ်ႇမေႃၵေႃႈ လဵပ်ႈႁဵၼ်းႁဵတ်းပၼ်ၶဝ်၊ ၶဝ်ၶႂ်ႈလႆႈသင်ၶႂ်ႈႁဵတ်းသင် ၶႃႈၵေႃႈၸွမ်းၸႂ်ႁဵတ်းပၼ်ၶဝ်ႁႂ်ႈလႆႈၵူႈလွင်ႈ ၼင်ႇၵၢင်ၸႂ်ၶဝ်ဢၢင်ႈဢၢၼ်း။ သမ်ႉဝႃႈၶႃႈၶတ်းၸႂ်ႁဵတ်းပၼ်ယူႇၵေႃႈ တေဢမ်ႇႁဵတ်းလႆႈတဵမ်ထူၼ်ႈၼင်ႇၵၢင်ၸႂ်ၶဝ်ၼၼ်ႉလႆႈၼႆ ၶႃႈႁူႉပွင်ႇၸႂ်လီယူႇ ၵူၺ်းၵႃႈ ၶႃႈတေဢမ်ႇမီးဝၼ်းႁဵတ်းႁႂ်ႈၶဝ်လႆႈတိူဝ်ႉၸႂ်။
ယွၼ်ႉဝႆႉၸႂ်ၸိူင်ႉၼႆႁိုဝ်ဢမ်ႇႁူႉယဝ်ႉ မိူၼ်လႆႈၶၢမ်ႇၵိၼ်ႇတူဝ်ၵဝ်ႇဝႆႉလႄႈ ၶႃႈၵေႃႉပဵၼ်ၵူၼ်းဢၼ်လႆႈတိူဝ်ႉၸႂ်ၵႂႃႇၼၼ်ႉၼႃႇ၊ ဝၢႆးဢိုတ်းႁဵၼ်းၵႂႃႇ သမ်ႉဝႃႈလွင်ႈၵပ်းသိုပ်ႇႁဝ်းယင်းတိုၵ်ႉမီးယူႇသေတႃႉၵေႃႈ လွင်ႈႁၢင်ႇၵႆၼၼ်ႉ မၼ်းလႆႈလႅၵ်ႈလၢႆႈၵႂႃႇတင်းၼမ်ၼၼ်ႉယဝ်ႉ။
မိူဝ်ႈတႄႇတႄႉၵေႃႈၵပ်းသိုပ်ႇၵၼ်ဢမ်ႇၶၢတ်ႇ ၵူၺ်းၵႃႈ မၼ်းၵေႃႈႁဵတ်းႁႂ်ႈၶႃႈၵူဝ်မႃးဢေႃႈ ၼိုင်ႈဝၼ်းၶဝ်ႁၢႆၵႂႃႇ ၵူဝ်ဝႃႈၶဝ်တေႁၢႆၵႂႃႇတေႃႇၸူဝ်ႈ၊ ၶႃႈၵမ်းၵမ်းၵပ်းသိုပ်ႇၶဝ်ဢမ်ႇထၢတ်ႇ ၵူၺ်းၵႃႈ ၶဝ်ၵေႃႈဢမ်ႇၵႆႉတူၺ်းၶေႃႈၵႂၢမ်းၶႃႈသေဢမ်ႇၵႃး ဢမ်ႇပေႃးသူႈလၢတ်ႈဢုပ်ႇသင်ၵႃႈႁိုဝ် ၶေႃႈၵႂၢမ်းသုတ်းႁၢႆ သၢႆၵႂၢမ်းၵေႃႈၶၢတ်ႇ တႃႇတေလႆႈလၢတ်ႈတေႃႇၵၼ်ၼၼ်ႉ ၶႃႈၶတ်းၸႂ်ႁဵတ်းၵူႈလၢႆးယဝ်ႉ ၵူၺ်းၵႃႈ ၶႃႈၵေႃႈလႆႈၶေႃႈတွပ်ႇမိူၼ်ၵၼ်မႃးတႃႇသေႇဝႃႈ “ဢေႃႈ” “ဢေႃႈၶႃႈ” ၼႆသေတႃႉၵေႃႈ တွၼ်ႈတႃႇၶႃႈတႄႉႁၢၼ်ႉၸႂ်ယူႇ ဢၼ်လႆႈငိၼ်းၶေႃႈတွပ်ႇၶဝ်တွပ်ႇပၼ်မႃး လီလိူဝ်သေ ဢမ်ႇလႆႈငိၼ်းၶေႃႈတွပ်ႇသင်သေဢိတ်းၼၼ်ႉယဝ်ႉ။
ၶၢဝ်းယၢမ်းမၼ်းႁိုင်မႃး သၢႆၵပ်းသိုပ်ႇႁဝ်းလႆႈၶၢတ်ႇၵႂႃႇ ႁိုင်ႁိုင်ၼိုင်ႈဝူင်ႈ တွပ်ႇၼိုင်ႈပွၵ်ႈ၊ ႁိုင်ႁိုင်ပေႃးထိုင်ပဵၼ်လိူၼ်ၵေႃႈ ဢမ်ႇႁၼ်သင်တုမ်ႉတွပ်ႇၶိုၼ်း သမ်ႉဝႃႈလၢတ်ႈတေႃႇၵႂႃႇၵူႈဝၼ်းၵူႈဝၼ်းၵေႃႈ ပဵၼ်ၶႃႈၽၢႆႇလဵဝ်ၵူၺ်းဢၼ်သူင်ႇၵႂႃႇၸူး၊ ၶႃႈၶတ်းၸႂ်ယွမ်းႁပ်ႉဝႃႈၶဝ်ဢမ်ႇတၼ်း ၶဝ်မီးၵၢၼ်ၼမ်ၼႆသေ မွင်းပႂ်ႉၶဝ်ၵပ်းသိုပ်ႇမႃးယူႇဢေႃႈ။
ၽိူဝ်ႇၶိုၼ်ႈႁဵၼ်းၶိုၼ်း လိူဝ်သေၶဝ်ဢမ်ႇၵပ်းသိုပ်ႇၶႃႈယဝ်ႉ ၶဝ်ၵေႃႈဢမ်ႇၶိုၼ်းမႃးၶိုၼ်ႈႁူင်းႁဵၼ်းယဝ်ႉ၊ ဢဝ်ၶႃႈသမ်ႉပေႃးငဝ်မိူၼ်ၵႆႇတူၵ်းၼမ်ႉၼၼ်ႉယိုင်။ ႁိုင်ယူႇမွၵ်ႈ သွင်လိူၼ်ၼႆႉ ၶႃႈလႆႈႁၼ်ၶေႃႈၵႂၢမ်းၶဝ်ၶဝ်ႈမႃး ပႆႇလႆႈၽုၺ်ႇတူၺ်း မိုဝ်းၶႃႈပေႃးသၼ်ႇသၼ်ႇသၢႆသၢႆ ၸႂ်ၶႃႈသမ်ႉပေႃးၶိုၼ်ႈဝႆႉယဝ်ႉ ၵူၺ်းၵႃႈ ၶႃႈၵေႃႈ လႆႈႁပ်ႉၶေႃႈၵႂၢမ်းဢၼ်ဢမ်ႇထၢင်ႇၼၼ်ႉဝႃႈ “ပီႈ ႁဝ်းၶၢတ်ႇၵၼ်လႃႈ..”
ၼႂ်းဢူၵ်းႁူဝ်ၸႂ် တိပ်ႇၵပ်ႉၵိၼ်းမိပ်ႇငႅၼ်းၵႅၼ်းဢဝ်ၼမ်ႉတႃယိုင်ႈႁူၺ်ႇ ယဵၼ်ႉဢမ်ႇလႆႈသမ်ႉပေႃးႁႆႈဢွၵ်ႇမႃးယဝ်ႉ၊ မၼ်းၸဵပ်းတေႉဢေႃႈ ၸဵပ်းတေႉၶႃႈယဝ်ႉ ၶႆႈၶိုၼ်းမိူဝ်ႈလႂ် ၸႂ်ၼႆႉၵေႃႈ ၼင်ႇႁၢင်ႈၵႅၼ်းမႃးၶိုၼ်းမိူၼ်ဝၼ်းၼၼ်ႉယဝ်ႉ။
ၶႃႈဢမ်ႇႁူႉဝႃႈတေလႆႈႁဵတ်းႁိုဝ် သမ်ႉဝႃႈၵိၼ်လဝ်ႈႁႂ်ႈပေႃးလိုမ်းၶဝ်ၼႆၵေႃႈ ငဝ်းႁၢင်ႈၶဝ် ဢၼ်မီးယူႇၼႂ်းတႃၼၼ်ႉယိုင်ႈၶႅၼ်းႁၼ်ၸႅင်ႈမႃး၊ ၼမ်ႉလဝ်ႈၵေႃႈ ဢမ်ႇႁဵတ်းႁႂ်ႈလိုမ်းၶဝ်လႆႈ ၼမ်ႉတႃၵေႃႈဢမ်ႇၸွႆႈယႃၸႂ်လႆႈ၊ သမ်ႉဝႃႈတေမီးၵူၼ်းပဵၼ်လၢႆၵေႃႉၶဝ်ႈမႃးၵေႃႈ ဢမ်ႇမီးၽႂ်တႅၼ်းတၢင်ၶဝ်လႆႈ၊ သမ်ႉဝႃႈတေလႆႈႁပ်ႉတၢင်းႁၵ်ႉဢၼ်လီလိူဝ်သေၶဝ်ယူႇၵေႃႈ ၼႂ်းဢူၵ်းႁူဝ်ၸႂ်ၼၼ်ႉ ဢမ်ႇတွၼ်ႉမွတ်ႇၶဝ်ႁၢႆၵႂႃႇလႆႈ တၢင်းႁၵ်ႉၸိူင်ႉႁိုဝ်ၵေႃႈ ဢမ်ႇမိူၼ်ၼင်ႇၵၢင်ၸႂ်လႆႈ။
တၢင်းႁၵ်ႉဢၼ်မီးတေႃႇၶဝ်ၼၼ်ႉ ဢမ်ႇတွၼ်ႉလိုမ်းမၼ်းလႆႈလႄႈ ဢမ်ႇၶိုၼ်းပိုတ်ႇၸႂ်ႁၵ်ႉၽႂ်လႆႈ မိူၼ်ၼင်ႇၶဝ်ထႅင်ႈယဝ်ႉ။ သမ်ႉဝႃႈၶဝ်တေပဵၼ်ၵူၼ်းၸႂ်ႁၢႆႉ ၸႂ်မိူၵ်ႈၼႃႇတၢၼ်ႇႁိုဝ် ႁဝ်းၵေႃႈ ယင်းတိုၵ်ႉႁၵ်ႉယူႇၼႂ်းႁူဝ်ၸႂ်ၼႆႉယူႇလႄႈ ၵႆႉၵႆႉႁဵတ်းၽိတ်းတေႃႇ ၵေႃႉႁၵ်ႉၶႃႈ ၸိူဝ်းၶဝ်ႈမႃးၼႂ်းၸၢတ်ႈပၢၼ်ၶႃႈ ဢၼ်ႁဵတ်းလီတေႃႇၶႃႈၼၼ်ႉတႃႇသေႇယဝ်ႉ။
ၶႃႈၵေႃႈ ဢမ်ႇယုမ်ႇယမ်တၢင်းႁၵ်ႉၼိူဝ်ၽႂ်ထႅင်ႈလႄႈ ဢမ်ႇလႆႈမုင်ႈမွင်းတၢင်းႁၵ်ႉတီႈၽႂ်ထႅင်ႈယဝ်ႉ ၵူၼ်းၵေႃႉလႂ်ၶဝ်ႈမႃးၵေႃႈဢုပ်ႇၵဝ်းၵႂႃႇ၊ ၵူၼ်းၵေႃႉလႂ်လီသူၼ်ၸႂ်ၵေႃႈတၵ်ႉၵဝ်းႁႃ ပေႃးထုၵ်ႇၸႂ်ၵေႃႈ ပဵၼ်ၵေႃႉႁၵ်ႉႁေ၊ ပေႃးၶႂ်ႈဢိမ်ႇမႃးၵေႃႈ ပႅတ်ႈၵႂႃႇႁေ တၢင်းႁၵ်ႉဢၼ်ၶႃႈလႆႈႁဵၼ်းႁူႉမႃးပဵၼ်ၸိူင်ႉၼႆဝႆႉလႄႈ လႆႈႁဵတ်းႁၢႆႉပိူၼ်ႈမႃးၼမ်ၼႃႇယဝ်ႉ ၵူၼ်းၸင်းၶႃႈၵေႃႈတေမီးၼမ်၊ ၵူၼ်းဢိမ်ႇၸၢၼ်ႈၶႃႈၵေႃႈ တေႃႈၼပ်ႉဢမ်ႇလႆႈမိူၼ်ၵၼ်ယဝ်ႉ။
သိုပ်ႇလူထႅင်ႈတွၼ်ႈတေမႃးၶႃႈ
