ၼၢင်းၸၢမ်ၶမ်းၵေႃႈ တင်းၼႃႈငဝ်ငဝ်ဢွၼ်ႇသေ “ပီႈသၢႆၶိူဝ်း ၶႃႈ ၸွင်ႇတေလႆႈဝႃႈ ပဵၼ်ၵွပ်ႈၼွင်ႉၶႃႈႁႃႉၼႆႉ”
“ဢမ်ႇၸႂ်ႈလေႃႇၼွင်ႉ ၸွင်ႇၼွင်ႉၵေႃႉၸႂ်ႉ မၼ်းႁဵတ်းၵေႃႈဢမ်ႇၸႂ်ႈ ၵူၺ်းၵႃႈ ပဵၼ်ၵွပ်ႈသင် ပဵၼ်သင်လႄႈၼွင်ႉပေႃးလႆႈၽေတၢင်းပႅတ်ႈ မၼ်းလႃႇ”
“ပေႃႈယၢမ်ႈလၢတ်ႈလၢတ်ႈၼေၼွင်ႉဝႃႈ ၵူၼ်းပဵၼ်ၸူႉၵၼ် ဢၢၼ်း ဢဝ်ၵၼ် ပဵၼ်ၽူဝ်ပဵၼ်မေးတေႉတေႉၼႆႉ ၵေႃႉၼိုင်ႈလႄႈၵေႃႉၼိုင်ႈ ပိူၼ်ႈၼပ်ႉထိုဝ်ၵၼ်မေႃပွင်ႇၸႂ်ၵၼ်သေဝၢင်းၶႂၢင်ႉပၼ်ၵၼ်ဢိူဝ်ႈၼႃႉလုၵ်ႈယိင်း။ ၵူၼ်းၸၢႆးၵေႃႉဢၼ် ၶႂ်ႈဢဝ်လိူဝ်ၼိူဝ်ၼၢင်းယိင်းၼၼ်ႉ ၵႆႉၵႆႉႁဵတ်းမိူင်းဢသၢင်ႇႁၢင်ႈႁၵ်ႉတေႉသေ ပေႃးသူပ်းလၢတ်ႈၵေႃႈမိုဝ်း ထိုင်ၼၼ်ႉ ပိူၼ်ႈဢမ်ႇဢၢၼ်းဢဝ်ႁဝ်းတေႉၵူၺ်ႉၼႃ။ သင်ဝႃႈၼၢင်း ယိင်းၼၼ်ႉသမ်ႉ ၸႂ်မဝ်ယုမ်ႇငၢႆႈသေပၼ်သုမ်းၵၢၼ်ႉၵႂႃႇၼႆတႄႉ ၵူၼ်း ၸၢႆးၵေႃႉဢၼ်လႆႈလိူဝ်ဝႆႉၼၼ်ႉ တိုၼ်းထၢင်ႇလဵၵ်ႉၼိူဝ် ၼၢင်းယိင်း ၵေႃႉၼၼ်ႉၵႂႃႇၵမ်းလဵဝ်ယဝ်ႉၼေႈၼႃႉ ၼႆဝႃႈ”
“ပေႃးၼၼ် ၵေႃႉဢၼ်တေဢၢၼ်းဢဝ် ပဵၼ်ၽူဝ်ပဵၼ်မေးတေႉꧦ ၼၼ်ႉသမ်ႉ တေလႆႈတူၺ်းၸိူင်ႉႁိုဝ်လႃႇၸၢမ်ၶမ်း”
“ၵူၼ်းၸၢႆးၼၼ်ႉ တေလႆႈဝႆႉတူဝ်ၵဝ်ႇမိူၼ်ၼင်ႇပီႈသေ ပႂ်ႉသင်ႇသွၼ် ဢွၼ်လီ မေႃၸီႉၼေသဵၼ်ႈတၢင်းဢၼ်လီဢၼ်ၸႃႉ သင်ဝႃႈၵေႃႉ ၼွင်ႉၼၼ်ႉ ႁဵတ်းဢမ်ႇထုၵ်ႇ လၢတ်ႈဢမ်ႇမႅၼ်ႈၼႆၵေႃႈ ၵေႃႉပဵၼ်ပီႈ ၼၼ်ႉ ဝႆႉၸႂ်လီၸႂ်ယၢဝ်းသေ သပ်းလႅင်းတီႈၽိတ်းတီႈထုၵ်ႇယဝ်ႉ ဝၢင်း ၶႂၢင်ႉပၼ်ၵၼ်ၼႆၶႃႈဝႃႈ။ ယဝ်ႉၵေႃႈမေႃၸွႆႈထႅမ် ႁႂ်ႈၵေႃႉၼွင်ႉလႆႈပိုင်ႈ ဢိင်ၸႂ်ယႂ်ႇလႆႈတႃႇသေႇၼႆၸိူဝ်းၼႆႉၼေႈ။ ၼွင်ႉၵေႃႈဢမ်ႇတွင်းလႆႈ သဵင်ႈၼင်ႇၵဝ်ႇ မီးထႅင်ႈၼမ်ၼႃႇ ဢၢႆႈထူးဢွင်ႇၼႆႉ ၵွပ်ႈမၼ်းမၵ်ႉၸေး ၵိၼ်ၸေးၼႃႇလႄႈ ပေႃႈဢမ်ႇပၼ်ၼွင်ႉ ၵပ်းသိုပ်ႇ ဢမ်ႇပၼ်ၼွင်ႉ လၢတ်ႈတေႃႇလႄႈ ၶၢတ်ႇၵၼ်ၵႂႃႇၸိူင်ႉၼၼ်ၵူၺ်းၶႃႈ ပေႃႈၼွင်ႉဝႃႈ ပေႃးပဵၼ်ၵူၼ်းလီၵူၼ်းငၢမ်းတႄႉ ယႃႇပေဢဝ်ၵေႃႉၼၼ်ႉၵေႃႉၼႆၼႆ ပေႃႈဢမ်ႇၸၢင်ႈႁၢမ်ႈ။ ဢဝ်ၵေႃႉၼၼ်ႉၵေႃႉၼႆႉလႄႈၼႆၵေႃႈ ပေႃႈဢမ်ႇ ၸၢင်ႈပၼ်ႁႅင်း။ လုၵ်ႈၵေႃႈမီးတၢင်းႁူႉယဝ်ႉ လုၵ်ႈလူဝ်ႇလႆႈမေႃတႅပ်း တတ်း လိူၵ်ႈဢဝ်ႁင်းၵူၺ်းဢိူဝ်ႈၼႆဝႃႈ။ ပေႃႈၼႆႉ ပေႃးဝႃႈဢမ်ႇၸႂ်ႈ လွင်ႈဢၼ်တေတုမ်ႉတိူဝ်ႉ ၸၢတ်ႈပၢၼ်ၼွင်ႉတေႉꧦဝႃႈꧦၼႆႉ ပေႃႈဢမ်ႇ တွၼ်ႉႁၢမ်ႈၼွင်ႉသေမဵဝ်း”
“ဢၼ်ၸၢမ်ၶမ်းၵႂႃႇၵႂႃႇပႆပႆၸွမ်းပီႈၼႆႉလူး ပေႃႈဢမ်ႇဝႃႈသင်ၼွင်ႉႁႃႉ”
“ဢူး ဢမ်ႇဝႃႈၶႃႈလေႃႇ ပေႃးၼွင်ႉတေၵႂႃႇလႂ်ၼႆ ပေႃႈယင်းႁႂ်ႈၼွင်ႉ ႁွင်ႉပီႈသၢႆၶိူဝ်းၵွၼ်ႇဢေႃႈ”
မၼ်းၸၢႆးၵေႃႈဢမ်ႇတၵ်းသဵင် မိူဝ်းဢဝ်ဢဝ်မႅၵ်ႉၶူဝ်းမႃးၶုတ်းၽင်ပႅတ်ႈ မူမၼ်းသေ ၶိုၼ်းမိူဝ်းသူင်ႇယဝ်ႉ မႃးၼင်ႈငဝ်မိူၼ်ႇယၵ်ႉတူၺ်းၶွၵ်ႈမူ မၼ်းသေ
“ပီႈတေႁဵတ်းႁိုဝ်လၢတ်ႈ တေလၢတ်ႈၼႄမႄႈဝႃႈႁိုဝ်ၼႆႉ ပေႃးမႄႈႁူႉ သမ်ႉတေပဵၼ်ၸႂ်ဢမ်ႇလီႁိုဝ်”
“မႃးႁဝ်းမိူဝ်းၼေႃႈၸၢမ်ၶမ်း ၼွင်ႉမိူဝ်းဢွၼ်တၢင်းလႄႈ”
ၶဝ်သွင်ၵေႃႉႁေႃႈၵႃး ၶဝ်ႈႁိူၼ်းၽႂ်ႁိူၼ်းမၼ်းမႃးယဝ်ႉ
“ၸၢမ်ၶမ်းၼွင်ႉႁႆႈႁဵတ်းသင် ႁဵတ်းႁၢႆႉႁင်းပီႈသၢႆၶိူဝ်းၵႂႃႈၼေႃႈဝႃႈဢမ်ႇ ဝႃႈၵေႃႈ” ၼၢင်းၶမ်းလိုၼ်း ႁၼ်ၸၢမ်ၶမ်းႁႆႈလူင်ၶိုၼ်ႈႁိူၼ်းမိူဝ်းလႄႈ တၢင်းယုမ်ႉတၢင်းဝႃႈၼၼ်သေ ပႆၶိုၼ်ႈမိူဝ်းၸွမ်းမၼ်းယူႇ။ လုင်းသၢင်ႇ မွင်ႇၼင်ႈတႅမ်ႈလိၵ်ႈယူႇလႄႈဝၢႆႇတူၺ်းသေ
“လုၵ်ႈယိင်းႁႆႈႁဵတ်းသင်လႃႇၼၼ်ႉ” ၼၢင်းၸၢမ်ၶမ်းဢမ်ႇတၵ်းသဵင်သင် ပူၼ်ႉၶဝ်ႈမိူဝ်းၼႂ်းၶွင်ႉၼွၼ်းမၼ်း သေႁႆႈယူႇ။
“ၸၢမ်ၶမ်းႁႆႈႁဵတ်းသင်ၶႃႈလႃႇဢႃသၢင်ႇ”
လုင်းသၢင်ႇမွင်ႇၶိုၼ်းမႃးတႅမ်ႈလိၵ်ႈမၼ်းသေ “ဢမ်ႇႁူႉ ယူဝ်ၵႂႃႇႁဵတ်း ႁၢႆႉႁင်းသၢႆၶိူဝ်းမႃးယူဝ်ႉ”ၼၢင်းၶမ်းလိုၼ်းမႃးၸူးမၼ်းသေ “ၼွင်ႉႁႆႈႁဵတ်းသင်ၼႆႉႁႃ လၢတ်ႈၼေပီႈၶမ်းလိုၼ်းလူး”
“ၼွင်ႉဢီးလူပီႈသၢႆၶိူဝ်းဢေႃႈ ပီႈၶမ်းလိုၼ်း”
“ပီႈသၢႆၶိူဝ်းပဵၼ်သင်လႃႇ ၼွင်ႉလၢတ်ႈမႃးလူး”
“မိူဝ်ႈၶမ်ႈဝႃး ၽွင်းပီႈၶၢႆၶိူဝ်းပွၵ်ႈမႃးၵိၼ်ၶဝ်ႈၼၼ်ႉ မီးၵူၼ်းၵႂႃႇလၵ်ႉ ႁႅမ်တၢႆပႅတ်ႈမူမၼ်းဢေႃႈ”
“ႁႅမ်တၢႆပႅတ်ႈတင်းမူတ်းႁႃႉလုၵ်ႈယိင်း လုၵ်ႈယိင်းဢွၵ်ႇမႃးတီႈပေႃႈၼႆႉ လူး” ၶဝ်သွင်ၵေႃႉဢွၵ်ႇမႃးယဝ်ႉ
“ႁႅမ်ပႅတ်ႈမူတ်းၶႃႈဢေႃႈပေႃႈ”
“ပဵၼ်ၽႂ်ၵေႃႉႁဵတ်းၸွင်ႇႁူႉၵေႃႉမၼ်းႁႃႉ”
“ပဵၼ်ဢၢႆႈထူးဢွင်ႇၶႃႈဢေႃႈ”
“သၢႆၶိူဝ်းတၼ်းႁၼ်ယူႇႁႃႉ”
“ဢမ်ႇတၼ်းႁၼ်ၶႃႈ ဢၢႆႈထူးဢွင်ႇတႅမ်ႈလိၵ်ႈဝႆႉဢေႃႈ”
“မၼ်းတႅမ်ႈဝႆႉဝႃႈႁိုဝ်လႃႇ”
တႅမ်ႈဝႃႈ “(ပေႃးမႂ်းယင်းတိုၵ်ႉယုင်ႈၵဵဝ်ႇၸွမ်းၸၢမ်ၶမ်းယူႇၼႆတႄႉ ၵမ်း လိုၼ်းမႃးတေၼႃႇလိူဝ်ၼႆႉၼႃ။ ပွၵ်ႈၼႆႉတႄႉ တိုၵ်ႉပဵၼ်ၸႅၵ်ႈမၼ်း ၵူၺ်း) ၼႆၶႃႈဢေႃႈ လုၵ်ႈယိင်းတွင်းလႆႈတူဝ်လိၵ်ႈမၼ်းယူႇၶႃႈပေႃႈ”
လုင်းသၢင်ႇမွင်ႇၵေႃႈ ဢမ်ႇပဵၼ်တႅမ်ႈလိၵ်ႈမၼ်းယဝ်ႉ ၵုမ်ႇဝူၼ်ႉယူႇဝႃႈ “ပေႃးၼၼ်တႄႉ ဢၢႆႈၼႆႉပွႆႇဝႆႉၸိူင်ႉၼႆဢမ်ႇလႆႈယဝ်ႉႁေး ဝၢႆးမႃးၸၢင်ႈ ပဵၼ်ၶဵၼ်လူင်ဢိူဝ်ႈၼႆႉ”ၼႆယူႇ။
“ပီႈသၢႆၶိူဝ်းသူသမ်ႉ ႁဵတ်းႁိုဝ်ယဝ်ႉလႃႇလုၵ်ႈယိင်း မၼ်းၵႂႃႇတိူင်ႇႁၢၼ် ယဝ်ႉႁႃႉ”
“တိူင်ႇယဝ်ႉၶႃႈ ႁၢၼ်ၶဝ်ၵႂႃႇထတ်းတူၺ်းသေ လိၵ်ႈၼၼ်ႉၵေႃႈႁၢၼ် ၶဝ်ဢဝ်ၵႂႃႇယဝ်ႉဢေႃႈ”
“ပီႈသၢႆၶိူဝ်းသူသမ်ႉၵႂႃႇလႂ်ယဝ်ႉလႃႇ”
“မႃးမီးတီႈႁိူၼ်းၼႆႉယဝ်ႉၶႃႈ ပေႃႈလုၵ်ႈယိင်းဢီးလူပီႈသၢႆၶိူဝ်း လုၵ်ႈ ယိင်းတေႁဵတ်းႁိုဝ်ၶႃႈပေႃႈ” မၼ်းၼၢင်းမႃးၵွတ်ႇပေႃႈသေႁႆႈယူႇ။ “ပီႈ သၢႆၶိူဝ်းဢၼ်ၶတ်းၸႂ် ပေႃးဢမ်ႇလႆႈယူႇလႆႈသဝ်း ဢၢႆႈၵႅၵ်းလူင်ၼၼ်ႉ လိူၵ်ႈလိူၵ်ႈမႃးႁဵတ်းႁင်းပိူၼ်ႈဝႃႇ”
တီႈႁိူၼ်းၸၢႆးသၢႆၶိူဝ်းၶဝ်ၼႆႉသမ်ႉ မၼ်းၸၢႆးၶဝ်ႈမႃး ၼႂ်းႁွင်ႉမိုဝ်ႉၼႆႉ သေ “ၼၢင်းၸေႃးယဵၼ်ႇ” မၼ်းတၢင်းဝၢႆႇမႃးသေ “ဝႃႈႁိုဝ်ၶႃႈ”
“ဢိူဝ်ႈ ၼၢင်းၸေႃးယဵၼ်ႇ” ဝႃႈၼႆသေ ပႆႇတၵ်းသဵင် ၼၢင်းၸေႃးယဵၼ်ႇ ယၵ်ႉတူၺ်းမၼ်းယူႇ “မူၶႃႈတၢႆမူတ်းယဝ်ႉဢေႃႈ”
“ပီႈသၢႆၶိူဝ်းၼႆႉ ဝႃႈဝီႈလူင်ၵႂႃႇ ထၢင်ႇပိူၼ်ႈလီဝႃႈယူဝ်ႉၼၼ်ႉ”
“တေႉဢိူဝ်ႈ ၶႃႈဢမ်ႇလႆႈလၢတ်ႈယွၵ်ႇၵူၺ်ႉၼႆႉ မိူဝ်ႈၶမ်ႈဝႃး ၽိူဝ်ႇၶႃႈ လုၵ်ႉတီႈႁိူၼ်းၼႆႉၵႂႃႇၵေႃႈ တၢႆမူတ်းယဝ်ႉဢိူဝ်ႈ”
“ႁိူဝ်ႇ တေႉႁႃႉဢီႉ မူပဵၼ်သီႇႁႃႈသိပ်းၼႆႉ လီသေလၢႆတေႉယဝ်ႉဝႃႈ ပဵၼ်သင်လႄႈတၢႆၶႃႈလႃႇ”
“မီးၵူၼ်းလၵ်ႉၵႂႃႇႁႅမ်တၢႆဢေႃႈ လၢတ်ႈၼႄမႄႈၸွင်ႇတေလီႁႃႉ ၼၢင်း ၸေႃးယဵၼ်ႇဝႃႈ လၢတ်ႈလီႁႃႉ ဢမ်ႇလၢတ်ႈလီႁႃႉၼႆႉမႃႈ”
“ဢမ်ႇလၢတ်ႈၵေႃႈ သမ်ႉဢမ်ႇလွတ်ႈႁူႉၼင်ႇၵဝ်ႇ လၢတ်ႈၼႆႉလီဢေႃႈ ၶႃႈဝႃႈတႄႉ”
ၸၢႆးသၢႆၶိူဝ်းငွၵ်းႁူဝ်ၼေသေ ပႆၶဝ်ႈမႃးၼႂ်းႁိူၼ်းၼႆႉယဝ်ႉ “မႄႈၶႃႈ”
“ဝႃႈႁိုဝ်လႃႇလုၵ်ႈ ႁႄဝႃႈပဵၼ်ပေႃႈလဵင်ႉၸဝ်ႈမူဝႃႇ ၵမ်းၵမ်းပေႃႇမႃးၼႂ်း ဝၢၼ်ႈလႃႇၼႆႉ ၸင်ႇႁႃၵႂႃႇၼွၼ်းလၢႆၶိုၼ်းၵူၺ်း ၸႂ်ထိုင်မႄႈယဝ်ႉႁႃႉ တေႃႈ”
“ၸႂ်ထိုင်ယူႇၵူၺ်းဢေႃႈ မႄႈ။ ၵူၺ်းၼႃႇ လုၵ်ႈၶႂ်ႈလၢတ်ႈၼေမႄႈမဵဝ်း ၼိုင်ႈမႄႈတေဢမ်ႇလႆႈတူၵ်းၸႂ်ၶႃႈၼႃ”
“ဝႃႈႁိုဝ်လႃႇ ၶႂ်ႈလႆႈမေးယဝ်ႉႁႃႉ ဢမ်ႇတူၵ်းၸႂ်မႄႈပေႃးႁူႉၸဵမ်လႂ်ယဝ်ႉ ဝႃႈ”
“ဢမ်ႇၸႂ်ႈၸိူင်ႉၼၼ်ၶႃႈ လုၵ်ႈၶႂ်ႈဝႃႈဢၼ်လုၵ်ႈလဵင်ႉမူၼႆႉ သင်ဝႃႈ မၼ်းတၢႆၼႆ ၸွင်ႇမႄႈတေပဵၼ်ၸႂ်ဢမ်ႇလီ ၸွင်ႇမႄႈတေတူၵ်းၸႂ်ၼႆ ဢေႃႈ လုၵ်ႈၶႆႈဝႃႈၼႆ”
“လွင်ႈၵိူတ်ႇလွင်ႈတၢႆၼႆႉ ၵႃႈလႆႈဢဝ် ၵၢမ်ႇတြႃးမၼ်းဝႃႈၵူၺ်းဢိူဝ်ႈ လုၵ်ႈဢူၺ်။ တၢႆၵေႃႈသိုဝ်ႉထႅင်ႈဢိူဝ်ႈမႄႈ ယႃႇၸႂ်တူၵ်းသေယွမ်းသုမ်း ၵၢၼ်ႉၵူၺ်းလႃႈ။ ၵေႃႉၸၢႆးၼႆၼႃႇ လူမ်ႉယဝ်ႉၵေႃႈလူဝ်ႇၶတ်းၸႂ်ၸိုၼ်ႇ လုၵ်ႉဢိူဝ်ႈ”
ၸၢႆးသၢႆၶိူဝ်းၶႂ်ႈဝႃႈႁိုဝ်ၼႆၵေႃႈ မႄႈၶဝ်ပေႃးဝူၼ်ႉပွင်ႇယဝ်ႉ မၼ်းၸၢႆး ၵေႃႈပေႃးတေလၢတ်ႈသဵင်ႈသမ်ႉ မႄႈၶဝ်ဢမ်ႇတူၵ်းၸႂ်ၼႆၵေႃႈ ၵူဝ်မႄႈ ၶဝ်မႆႈၸႂ်ၸွမ်းၼႆလႄႈ ၸင်ႇဢမ်ႇလၢတ်ႈသဵင်ႈၼၼ်ႉယဝ်ႉ။
တီႈႁိူၼ်းၸၢမ်ၶမ်းၶဝ်ၼႆႉသမ်ႉ
“ၸၢမ်ၶမ်း ၸၢမ်ၶမ်း လုၵ်ႈယိင်းလုၵ်ႈယိင်း”
ၸၢႆးသၢႆၶိူဝ်းလႆႈငိၼ်း ၼၢင်းၶမ်းလိုၼ်းလႄႈလုင်းသၢင်ႇမွင်ႇ ဢွၼ်ၵၼ် ႁွင်ႉၸၢမ်ၶမ်းၸိူင်ႉၼၼ် မၼ်းၸၢႆးဝူၼ်ႉလႆႈၵမ်းလဵဝ်ယဝ်ႉဝႃႈ ၸၢမ် ၶမ်းႁႆႈႁႆႈသေ ဢဝ်လိုမ်းတူဝ်ၵႂႃႇယဝ်ႉၼႆလႄႈ ၸင်ႇလႅၼ်ႈမႃးၵမ်းလဵဝ် ယဝ်ႉ။ ဢမ်ႇထၢမ်သင်ဢမ်ႇတၼ်းလၢတ်ႈၵႂၢမ်းသင် မႃးဢုမ်ႈဢဝ်တူဝ် ၸၢမ်ၶမ်းသေ
“ဢဝ်မႃးသေႃးၵႃးလူး ပီႈၶမ်းလိုၼ်း ပီႈၶမ်းလိုၼ်းၵေႃႈ ၶိုၼ်ႈၵႃးလႄႈ ဢုမ်ႈဝႆႉၸၢမ်ၶမ်းလီလီၶႃႈၼႃႉ” ၼႆသေ ႁေႃႈၵႃးဢွၵ်ႇၵႂႃႇယဝ်ႉ။
လုင်းသၢင်ႇမွင်ႇတႄႉတိုၵ်ႉၵႂင်ၵႂင်ၵႃးၵႃးယူႇႁင်းမၼ်း ၸၢႆးသၢႆၶိူဝ်းတႄႉ တၢင်းၸႂ်ဢမ်ႇလီ ၸွမ်းလူၺ်ႈမူမၼ်းသေ ၸၢမ်ၶမ်းသမ်ႉမႃးပဵၼ်ၼႆ ထႅင်ႈလႄႈ “ဢၢႆႈသတ်းလူင်တူဝ်ၼႆႉ မႄႈမႂ်းလႃႈ ပေႃးၸၢမ်ၶမ်းပဵၼ်ၵႂႃႇ သေလွင်ႈလွင်ႈတႄႉ ထၢင်ႇဝႃႈၵဝ်တေဝၢင်းၶႂၢင်ႉပၼ်မႂ်းလႆႈၼႆႁႃႉ ဢၢႆႈ ယွၵ်းၼႆသေ” ဢဝ်တႃမိုဝ်းမၼ်းထုပ်ႉသႂ်ႇ(ၵူင်း)မႃးလႆးၵႃးၼၼ်ႉယူႇ။
ၼၢင်းၶမ်းလိုၼ်း လႆႈငိၼ်းၸၢႆးသၢႆၶိူဝ်း မႆႈၸႂ်တႃႇၸၢမ်ၶမ်းသေဢွၵ်ႇ တေႃးသႃႉ ၼႃႈပေႃးၵမ်ႇပင်ႈပင်ႈလႄႈ လၵ်ႉလွမ်ဢၢမ်းယူႇၼႂ်းၸႂ်ဝႃႈ “ပီႈသၢႆၶိူဝ်းႁၵ်ႉၸၢမ်ၶမ်းတေႉလူးၼႆႉ လီယဝ်ႉၸၢမ်ၶမ်းဢိူၺ်ႉ ၼွင်ႉ ၵၢမ်ႇလီတေႉယဝ်ႉ”
ထိုင်ႁူင်းယႃယဝ်ႉ ၸၢႆးသၢႆၶိူဝ်းမႃးဢုမ်ႈဢဝ်တူဝ်ၸၢမ်ၶမ်း ၶဝ်ႈမႃးၼႂ်း ႁူင်းယႃၼႆႉယဝ်ႉၵေႃႈ မေႃယႃၶဝ်ဢဝ်လေႃႉထူဝ်းမႃးႁပ်ႉဢဝ်ၶဝ်ႈႁွင်ႈ ယႃၵႂႃႇယဝ်ႉ။ မၼ်းၸၢႆးမႃးၼင်ႈႁိမ်းၼၢင်းၶမ်းလိုၼ်းသေ “ၸၢမ်ၶမ်း ၼႆႉပေႃးမၼ်းႁႆႈၼႆ လိုမ်းတူဝ်ၸိူင်ႉၼႆတႃႇသေႇၶႃႈႁႃႉ ပီႈၶမ်းလိုၼ်း”
“ပေႃးမၼ်းႁႆႈႁိုင်ႁိုင်တႄႉၵႆႉပဵၼ်ဢေႃႈ ၵွပ်ႈမၼ်းၵႆႉလိုမ်းတူဝ်ၸိူင်ႉၼႆ ဢေႃႈ မၼ်းၶႂ်ႈႁဵတ်းသင်ၵေႃႈ ၵႃႈလႆႈၸွမ်းၸႂ်မၼ်းတႃႇသေႇဢေႃႈ ၼၼ်ႉ”
“ပွႆႇၸၢမ်ၶမ်းပဵၼ်ၵႂႃႇသေလွင်ႈလွင်ႈၵွၼ်ႇဢၢႆႈၼႆႉ မၼ်းၵႂႃႇမီးတီႈလႂ် ၵေႃႈၶႃႈတိုၼ်းၵႂႃႇၸွမ်းယဝ်ႉ။ မၼ်းၵႂႃႇမီးၼႂ်းၶွၵ်ႈၵေႃႈ ၶႃႈတိုၼ်းတေ ႁဵတ်းႁႃတၢင်းၽိတ်းႁႂ်ႈတူၵ်းၶွၵ်ႈ ၵႂႃႇမင်မၼ်းထိုင်ၼႂ်းၶွၵ်ႈၼၼ်ႉယဝ်ႉ ၵႃႈဢမ်ႇလႆႈတွပ်ႇတႅၼ်းၶိုၼ်း မၼ်းၼႆႉ ၶႃႈတိုၼ်းတေဢမ်ႇလႆႈပွႆႇမၼ်း ဝႆႉ ယဝ်ႈမႄႈမႂ်းလႃႈ”
တီႈႁိူၼ်းၼႆႉသမ်ႉ လုင်းသၢင်ႇမွင်ႇၵေႃႉၼိုင်ႈတႄႉ ၵမ်ႉလုၵ်ႉၵမ်ႉၼင်ႈ ယူႇႁင်းမၼ်း သေယၵ်ႉတူၺ်းၵႂႃႇတီႈၽႃ တူၼ်ႈလူမ်းၼၼ်ႉယဝ်ႉ လၢတ်ႈဢွၵ်ႇသူပ်းလွႆးလွႆးဝႃႈ “မူၺ်လႅင်းဢူၺ်ႉ ယၢမ်းလဵဝ်ၼႆႉလုၵ်ႈ ယိင်းႁဝ်းလိုမ်းတူဝ်သေ ၵႂႃႇမီးယူႇတီႈႁူင်းယႃဢိူဝ်ႈမူၺ်လႅင်း သူမီးယူႇ လႂ်ၼႆၵေႃႈ ယွၼ်းႁႂ်ႈဝိၺၢၼ်ႇၶႂၼ်ငဝ်းသူၵႃႉပဵၼ်မႄႈၼၼ်ႉ မႃးၸွႆႈ တူၺ်းပၼ်လုၵ်ႈယိင်းႁဝ်း ႁႂ်ႈလွတ်ႈၽေးသေၵမ်းၼႃႉ။ မိူဝ်ႈလဵဝ်သူ ၵႂႃႇမီးယူႇတီႈလႂ် ပဵၼ်သင် သူဢမ်ႇမႃးလၢတ်ႈတေႃႇႁဝ်းႁိုင်ၼႃႇယဝ်ႉ လူး”
လုင်းသၢင်ႇမွင်ႇလႄႈ ပႃႈယိင်းမူၺ်လႅင်းၼႆႉ ပဵၼ်ၽူဝ်မၢဝ်ႇမေးသၢဝ် ၵၼ် ယူႇလူၺ်ႈၵၼ်မႃး တေႃႇပႃႈယိင်းမူၺ်လႅင်းတၢႆၽၢတ်ႇမၼ်းၵႂႃႇ ၼၼ်ႉ ဢမ်ႇတွၼ်ႉၽိတ်းမေႃးၵၼ် ဢမ်ႇတွၼ်ႉလၢတ်ႈၵႂၢမ်းလိူင်းၸိူင်း ၵႂၢမ်းတႂ်ႈသိၼ်ႈတႂ်ႈသိူဝ်ႈ ဢီႇငိူဝ်ႈဢၢႆႈၵႅၵ်း ၽိူဝ်ႉလၢၵ်ႈၽိူဝ်ႉၸၼ် ဢမ်ႇ တွၼ်ႉဝႃႈႁင်းၵၼ်သေပွၵ်ႈ။ တေႃႇမိူဝ်ႈလဵဝ် ယင်းတိုၵ်ႉႁၵ်ႉလႄႈႁဵတ်း ၸွမ်းၼင်ႇၶေႃႈတုၵ်းယွၼ်း မေးမၼ်းၸိူဝ်းၼၼ်ႉယူႇၵူႈမဵဝ်းယဝ်ႉ။ ပႃႈ မူၺ်လႅင်းသင်ႇလၢတ်ႈဝႆႉ မိူဝ်ႈၸႂ်မၼ်းၸမ်သဵင်ႈၼၼ်ႉ တၢင်းလၢတ်ႈ သဵင်လွႆးလွႆးဢွၼ်ႇၼႂ်းၶေႃးပဵၼ်ၵမ်းပဵၼ်ၵမ်း လၢတ်ႈၵမ်းၼိုင်ႈထူၺ်ႈ ၸႂ်ၵမ်းၼိုင်ႈ ႁိူဝ်ႉဢူၼ်ႈတၢၼ်ႇလႂ်ၵေႃႈ ၶတ်းၸႂ်ၸိုၼ်ႇလၢတ်ႈတေႃႇ ၽူဝ်မၼ်း သင်ႇၵႂၢမ်းၶေႃႈလိုၼ်းသုတ်းၼၼ်ႉဝႃႈ
“သူၸွင်ႇသူၵူဝ်ႁဝ်း”
“ႁဝ်းဢမ်ႇၵူဝ်လေႃႇသူ”
“ၸွင်ႇသူႁၵ်ႉႁဝ်းႁိုဝ်”
“ႁၵ်ႉဢိူဝ်ႈ ၵွပ်ႈသင်လႄႈ သူထၢမ်ႁဝ်းၸိူင်ႉၼႆလႃႇမူၺ်လႅင်း သူလူး ၸွင်ႇတိုၵ်ႉႁၵ်ႉႁဝ်းယူႇႁိုဝ်”
“ႁၵ်ႉဢေႃႈ သုတ်ႉမႃးၸမ်ၸမ်ႁဝ်း ႁႂ်ႈႁဝ်းလႆႈၼွၼ်း ၼိူဝ်တၵ်းသူ ဢိတ်ႉၼိုင်ႈလူး”
“လႆႈဢိူဝ်ႈ မူၺ်လႅင်းဢိူဝ် ယုၵ်ႉဢဝ်တူဝ်မေးမၼ်းမႃးဝႆႉၼႂ်းတၵ်းမၼ်း သေ ဢုမ်ႈၵွတ်ႇဝႆႉယူႇ။ ၸိုင်တူဝ်သူပေႉၵတ်းလႃႇမူၺ်လႅင်း ၸွင်ႇၸႂ်သူ လီယူႇႁႃႉၼႆႉ”
“လီယူႇသူဢိူၺ်ႉ ဢမ်ႇပဵၼ်သင် ပေႃးႁဝ်းတၢႆၼႆယႃႇပေႁႆႈၼႃႉသူၼႃႉ ယဝ်ႉၵေႃႈယႃႇပေပၼ် ႁႂ်ႈလုၵ်ႈယိင်းႁဝ်းမီးမေႈသိုပ်ႇၼႃႉ ၵူဝ်ပိူၼ်ႈမႃး ပေႉၵိၼ်လုၵ်ႈႁဝ်းဢေႃႈ”
ဢဝ်သၢႆတႃဢွၼ်ႇဢၼ်မူဝ်းမွင် ၼမ်လိူဝ်ဢၼ်ၸိုၼ်ႈသႂ် ဢၼ်ယင်း တိုၵ်ႉၵိုတ်းလိူဝ်ယူႇ ဢိတ်းဢွၼ်ႇၼိုင်ႈၼၼ်ႉ ယၵ်ႉတူၺ်းၼႃႈလုၵ်ႈ ယိင်းဢၼ်ႇမၼ်း ပဵၼ်ပွၵ်ႈလိုၼ်းသုတ်းသေလပ်းတႃႇဝႆႉယူႇသေ
“လုၵ်ႈယိင်းႁဝ်းၼႆႉလုမ်းလႃးလီလီ ယႃႇပေႃႉယႃႇႁႅမ်ၼႃႉသူၼႃႉ လုၵ်ႈ ယိင်းၵေႃႈႁႂ်ႈလႆႈၽူဝ်လီ မိူၼ်မႄႈၼႆႉၼႃႉလုၵ်ႈယိင်းၼႃႉ”
“ဢေႃႈၶႃႈမႄႈ”
“သူၵေႃႈ သင်ဝႃႈ ႁဝ်းလႆႈၽိတ်းပိူင်ႈ ပူၼ်ႉပႅၼ်ၵႂႃႇၼိူဝ်သူသေလွင်ႈ လွင်ႈၼႆၵေႃႈ ဝၢင်းၶႂၢင်းပၼ်ႁဝ်းသေၵမ်းၼႃႉ” လပ်းတႃဢွၼ်ႇမၼ်း ၵႂႃႇလွႆးလွႆးသေ ၸႂ်မၼ်းၶၢတ်ႇၵႂႃႇၼိူဝ်တၵ်းၽူဝ်မၼ်းၼၼ်ႉယဝ်ႉ။
“မူၺ်လႅင်း မူၺ်လႅင်း” ၼႆယူႇၵေႃႈ ပႃႈမူၺ်လႅင်းဢမ်ႇတၵ်းသဵင်ယဝ်ႉ လႄႈ “ႁႂ်ႈလႆႈၵႂႃႇၵျေႃႇၵႂႃႇသိူဝ်းၽႅဝ်ၵႂႃႇတီႈၵတ်းတီႈယဵၼ် ၵႂႃႇၺႃးတီႈ လီတီႈမျၢတ်ႈလႃႈၼႃႉ။ သင်ဝႃႈလႆႈမႃးၵိူတ်ႇပဵၼ် ၵူၼ်းၶိုၼ်းၵေႃႈ ၸၢတ်ႈၼႃႈႁႂ်ႈလႆႈမႃးၵိူတ်ႇပဵၼ်ၵူၼ်းၸၢႆးသေၵမ်းလႃႈမူၺ်လႅင်းဢိူၺ်ႉ” ၼႆသေ လုင်းသၢင်ႇမွင်ႇၼႆႉ ပႅၵ်ႉသမ်ႉဝႃႈ မေးမၼ်းတၢႆၵႂႃႇႁိုင်ၼႃႇ ယဝ်ႉ သေတႃႉၵေႃႈ တေႃႇမိူဝ်ႈလဵဝ် ယင်းတိုၵ်ႉႁၵ်ႉလႄႈတွင်းဢဝ်သေ ႁဵတ်းၸွမ်းၼင်ႇ ၵႂၢမ်းတုၵ်းယွၼ်းမေးမၼ်းၼၼ်ႉယဝ်ႉ။
တီႈႁူင်းယႃၼႆႉၵေႃႈ မေႃယႃၶဝ်ၸွႆႈႁႂ်ႈၸၢမ်ၶမ်း ႁူႉတူဝ်မႃးၶိုၼ်းယဝ်ႉ မႄႈမႄႈၼႆသေ ၶိုၼ်းလပ်းၵႂႃႇယဝ်ႉ။ ၸၢႆးသၢႆၶိူဝ်းလီၸႂ်သေ
“ၸၢမ်ၶမ်း ၸၢမ်ၶမ်း ႁူႉတူဝ်မႃးၶိုၼ်းယဝ်ႉ ပီႈၶမ်းလိုၼ်း”
ၸၢမ်ၶမ်း မိုၼ်းတႃလွႆးလွႆးသေ “ၼႆႉပဵၼ်တီႈလႂ်ၶႃႈၼႆႉ”
“ပဵၼ်ႁူင်းယႃဢိူဝ်ႈၼွင်ႉ ၼွင်ႉႁူႉတူဝ်လီယဝ်ႉႁႃႉ ၸွင်ႇၸႂ်ႈၼွင်ႉလီႁိုဝ် လႃႇ”
“လီဢေႃႈၵူၺ်းၵႃႈ ပေႃးမိုၼ်းတႃၼႆ ႁူဝ်တိုၵ်ႉမဝ်းယူႇဢေႃႈ”
“ပေႃးၼၼ် ၼွင်ႉလိုဝ်ႈဝႆႉၵွၼ်ႇလႄႈ ယႃႇၽူမ်ႈလၢတ်ႈၵႂၢမ်းယႃႇၽူမ်ႈ မိုၼ်းတႃၼႃႉ”
မၼ်းၼၢင်းငွၵ်းႁူဝ်လွႆးလွႆးသေၶိုၼ်းလပ်းၵႂႃႇယဝ်ႉ။ ယူႇၸူဝ်ႈၼိုင်ႈမၼ်းၼၢင်းႁူႉတူဝ်မႃးလီလီယဝ်ႉ။
“ပီႈၶမ်းလိုၼ်း ၼွင်ႉပဵၼ်သင်လႄႈမႃးႁူင်းယႃၶႃႈၼႆႉ ပီႈသၢႆၶိူဝ်းတၼ်း မႃးမိူဝ်ႈလႂ်ၶႃႈလႃႇ”
“ၸၢမ်ၶမ်းလိုမ်းတူဝ်လႄႈ ပီႈမႃးသူင်ႇဢိူဝ်ႈ”
ၸၢမ်ၶမ်းလီမႃးၶိုၼ်းယဝ်ႉလီလီယဝ်ႉၵေႃႈ ပႃးၵၼ်မႃးၶိုၼ်းယဝ်ႉ။
သိုပ်ႇလူထႅင်ႈတွၼ်ႈတေမႃးၶႃႈ။
