ယၢမ်းၵၢင်ၼႂ် လႅတ်ႇႁိူဝ်ႈထွင်ႇမႃး လုၵ်ႈႁဵၼ်းၶဝ် ဢွၼ်ပႃးထူင်သေ ၵႂႃႇႁူင်းႁဵၼ်းၵၼ်ယူႇ လိုၼ်းၼုမ်ႇၵေႃႈ ႁိပ်ႈႁိပ်ႈၼႅတ်ႈၼႅတ်ႈဢွၵ်ႇႁိူၼ်းမႃးသေ ဢူႈၶဝ်သမ်ႉပေႃးလႆႈ ၸွမ်းႁွင်ႉတၢင်းလင်မၼ်းၵႂႃႇ။
“ဢေးလုၵ်ႈ! လိုမ်းၵွၵ်းၶဝ်ႈဝၼ်းမႂ်းၼေႈ”
ၸင်ႇလႅၼ်ႈမႃးဢဝ်ၶိုၼ်းသေ
“ၸူမ်းယဝ်ႉဢူႈ”
ႁိပ်ႈၼႅတ်ႈလႅၼ်ႈလူင်ၵႂႃႇသေ မိူဝ်ႈၵႂႃႇႁွတ်ႈႁူင်းႁဵၼ်းၵေႃႈ ပိူၼ်ႈသမ်ႉပေႃးတေၶဝ်ႈထႅဝ်ၵၼ်မူတ်းယဝ်ႉ ဢူၺ်းၵေႃႉမၼ်း မူၺ်ႁွမ်ၼၼ်ႉ ယူႇႁိမ်းမၼ်းသေယဝ်ႉ လၢတ်ႈဝႃႈ
“မိူဝ်ႈၼႆႉပေႉၼၢၼ်းမႃးလႃႇ လုၵ်ႉလႃႈႁႃႉ”
“ႁဵတ်းပေႃးတၢၼ်ႇဝႃႈႁူႉၸွမ်းၵူႈလွင်ႈၼၼ်ႉယဝ်ႉ”
တီႈၼႂ်းႁွင်ႈႁဵၼ်း လုၵ်ႈႁဵၼ်းၼင်ႈဢဝ်တီႈယူႇပေႃးတဵမ်ၵႂႃႇမူတ်းၼၼ်ႉ ၶူးၵုမ်းၸၼ်ႉ လိုၼ်းၼုမ်ႇၶဝ် လႆႈၶဝ်ႈမႃးၼႂ်းႁွင်ႈ ပႃးတၢင်းၽူႈၸၢႆးၵေႃႉၼိုင်ႈ ဢၼ်မီးၼႃႈတႃႁၢင်ႈလဝ်း တူဝ်သုင်ၶႃယၢဝ်းယၢဝ်း ၼႃႈသဵမ်ႈၶၢဝ်ပွတ်ႇ ပေႃးတၢၼ်ႇၸၢႆးၸိူင်းၵူဝ်းရီးယႃးၼၼ်ႉယဝ်ႉ ဢဝ်တၢင်းယုမ်ႉမၼ်းၼၼ်ႉ တုမ်ႉၸူးလုၵ်ႈႁဵၼ်းယိင်းပေႃးၶႂ်ႈယွင်ႇၵႂႃႇမူတ်း။ မိူဝ်ႈၶူးၵုမ်းၸၼ်ႉၶဝ် ႁၼ်လုၵ်ႈႁဵၼ်းမၼ်းပၵ်းတႃတူၺ်းတီႈၵူၼ်းၵေႃႉၼၼ်ႉယူႇၼၼ်ႉ။
“ယင်းတိုၵ်ႉႁၼ်ၶူးမီးယူႇၼႂ်းသၢႆတႃယူႇႁႃႉၼႆႉ”
လုၵ်ႈႁဵၼ်းၶဝ်ၸင်ႇဢွၼ်ၵၼ်တင်ႈတူဝ်မႃးသေ မႄးၼင်ႈဢဝ်တီႈယူႇၵၼ်ၵႂႃႇယူႇ။
“ၼႆႉပဵၼ်မေႃသွၼ်မႂ်ႇ တေမႃးသွၼ်တၢင် မေႃသွၼ်ပၢႆးၼပ်ႉၸူဝ်ႈၶၢဝ်း ”
“ၸူဝ်ႈၶၢဝ်းၵူၺ်းၶႃႈႁႃႉၶူး ” လုၵ်ႈႁဵၼ်းယိင်းၼႂ်းႁွင်ႈဢွၼ်ၵၼ်ထၢမ်
“ႁၢင်ႈႁူႉၼႃႇ သူၸိူဝ်းၼႆႉ ၽၢၵ်ႇဝႆႉပၼ်မေႃသွၼ်ယဝ်ႉၼႃႈ” ၶူးၵုမ်းၸၼ်ႉၵေႃႈဢွၵ်ႇၵႂႃႇယဝ်ႉ။
လုၵ်ႈႁဵၼ်းယိင်းၼႂ်းႁွင်ႈ ဢၼ်ၵႆႉလၢတ်ႈၵႆႉၸႃၸိူဝ်းၼၼ်ႉ ဢွၼ်ၵၼ်တွင်ႉထၢမ်ၵမ်းလဵဝ်ယဝ်ႉ ဝၢႆးသေၶူးဢွၵ်ႇၵႂႃႇၵေႃႈ။
“မေႃသွၼ်ၸိုဝ်ႈသင်ၶႃႈ!”
“ၶႃႈၸိုဝ်ႈပိုၼ်းမိူင်း” ယၢမ်းၼၼ်ႉ ၽူႈယိင်းၵေႃႉၼိုင်ႈ လႆႈထၢမ်ဢွၵ်ႇမႃးထႅင်ႈဝႃႈ
“မီးၵေႃႉႁၵ်ႉယဝ်ႉၶႃႈႁႃႉ” လုၵ်ႈႁဵၼ်းၼႂ်းႁွင်ႈၵေႃႈ ဢွၼ်ၵၼ်ယဵၼ်လူင်ၵႂႃႇ တူၺ်းၼႃႈၵူၼ်းၵေႃႉထၢမ်တႄႉဢမ်ႇၸႂ်ႈ ၵူၺ်းမွင်းပႂ်ႉၶေႃႈတွပ်ႇတီႈၶူးၼၼ်ႉၵူၺ်း။ သၢႆတႃလုၵ်ႈႁဵၼ်း ၸိူဝ်းၼၼ်ႉ သမ်ႉပေႃးဢဝ်ၼႃႈမေႃသွၼ်လႅင်လူင်ၵႂႃႇယဝ်ႉ။ မေႃသွၼ်ၵေႃႈယုမ်ႉဢိတ်းၼိုင်ႈသေ
“မေႃသွၼ်လႆႈသွၼ်သင်ဝႆႉၶႃႈ” လၢႆႈၶေႃႈၵႂၢမ်းမၼ်းၵႂႃႇပႅတ်ႈ။
လုၵ်ႈႁဵၼ်းၶဝ်ၵေႃႈယဵၼ်လူင်ၵႂႃႇ ၸွမ်းလူၺ်ႈ လိုၼ်းၼုမ်ႇၼၼ်ႉၼင်ႈတၢင်းၼႃႈလႄႈ ထၢမ်လိုၼ်းၼုမ်ႇၵႂႃႇယဝ်ႉ။ မိူဝ်ႈတိုၵ်ႉထူၵ်းပပ်ႉယူႇၼၼ်ႉ လိူၵ်ႈလိူၵ်ႈသမ်ႉလိုမ်းပပ်ႉမၼ်းမႃးဢဝ်လီလီ ဢမ်ႇႁူႉဝႃႈတေလႆႈႁဵတ်းၸိူင်ႉႁိုဝ် တေဢမ်ႇလၢတ်ႈၵေႃႈသမ်ႉလိုမ်းတေႉ တေလၢတ်ႈၵေႃႈသမ်ႉမီးၶိင်ႇဢၼ်တေလႆႈႁဵၼ်းလူး။
“ထိုင်တီႈလႂ်ၶႃႈ”
“ထိုင်… ထိုင်တီႈ…တီႈ…ထိုင်တီႈလႂ်ၶႃႈဢမ်ႇတွင်းယဝ်ႉ…ၵွပ်ႈဝႃႈ ၶႃႈလိုမ်းလိုမ်းဢဝ်ပပ်ႉမၼ်းမႃး…” လၢတ်ႈၵႂႃႇၼင်ႇႁတ်းႁတ်း ၵူၺ်းၵႃႈလွမ်ၵူဝ်ဝႆႉယူႇၼႂ်းၸႂ်ၼၼ်ႉယဝ်ႉ။
“ၶိုၼ်ႈႁူင်းႁဵၼ်းလိုမ်းပပ်ႉ လီယူႇလူး” ယုမ်ႉၸူးမိူၼ်ယုမ်ႉၶိတ်ႈယုမ်ႉပၢႆႇၼၼ်ႉယဝ်ႉ ၵမ်းၼၼ်ႉ မူၺ်ႁွမ် ၸင်ႇတေလၢတ်ႈတၢင်ၵႂႃႇ ၶဝ်ၸင်ႇလႆႈဢွၼ်ၵၼ်သိုပ်ႇသွၼ်ႁဵၼ်းၵႂႃႇယဝ်ႉ။
ဝၢႆးလူင်းႁူင်းႁဵၼ်း ၼုမ်ႇလိုၼ်းတင်းမူၺ်ႁွမ်ၵေႃႈ ဢုပ်ႇၵၼ်လူင်မိူဝ်းၵႂႃႇလွႆးလွႆး ၸွမ်းသၢႆသဵၼ်ႈတၢင်းမိူဝ်းႁိူၼ်းၶႃၼၼ်ႉသေ
“လိုၼ်း…မေႃသွၼ်ပၢႆးၼပ်ႉႁဝ်းၼၼ်ႉ သူဢမ်ႇဝႃႈမၼ်းလဝ်းႁႃႉ”
“ဢိုမ်ႈ! လဝ်းၵေႃႈၵၼၼ်ႉၵူၺ်းၵဝ်ႇ”
“ပဵၼ်သင်လႄႈလၢတ်ႈၸိူင်ႉၼႆလႃႇ ၵိုင်ႇတၢင်းယူႇႁူင်းႁဵၼ်းမႃးပေႃးတေသုတ်းယဝ်ႉ ဢမ်ႇမီးၵူၼ်းၵဝ်းယူႇၵူၺ်း”
“ၸႂ်ႈဢိူဝ်ႈ!… ႁဝ်းဢမ်ႇသူၼ်ၸႂ်ၵူၺ်းလေႃႇ ”
“ၸႂ်ႈႁႃႉ!…သုတ်းႁူင်းႁဵၼ်းယဝ်ႉသူတေသိုပ်ႇႁဵၼ်းတီႈလႂ်ထႅင်ႈ မိူဝ်းၼႃႈမႃးသူၶႂ်ႈပဵၼ်သင်လႃႇ ၶႂ်ႈႁဵတ်းသင်လႃႇ ဝူၼ်ႉဝႆႉယဝ်ႉႁႃႉ”
“ဝူၼ်ႉဝႆႉယဝ်ႉ”
“လၢတ်ႈၼႄတူၺ်းဢိတ်းၼိုင်ႈလူႉ”
မူၺ်ႁွမ်ၵွတ်ႇဢဝ်ၶႅၼ်လိုၼ်းၼုမ်ႇၼၼ်ႉယဝ်ႉ တုၵ်းယွၼ်းႁႂ်ႈလၢတ်ႈၼႄ လွင်ႈဢၼ်လိုၼ်းၼုမ်ႇၶႂ်ႈပဵၼ်ၼၼ်ႉၼႆယူႇ လွင်ႈဢွၼ်ႈဝွၼ်းမူၺ်ႁွမ်ၼၼ်ႉ ႁဵတ်းႁႂ်ႈထဵင်ၶိုၼ်းဢမ်ႇလႆႈသေဢိတ်း။
“မၼ်းဢမ်ႇလႆႈယိုင်ႈယႂ်ႇသင်လေႃႇ ၸွင်ႇသူလႆႈၸႂ်ၵိၼ်ၶဝ်ႈသွႆးႁႃႉ”
“ဢိုမ်ႈလႆႈၸႂ်လိူဝ်ပိူၼ်ႈၼၼ်ႉယဝ်ႉ ဢၼ်လွင်ႈယႂ်ႇၼႆႉၶဝ်ႈသွႆးတီႈလၢၼ်ႉဢူႈသူၼၼ်ႉ ႁဝ်းလႆႈၸႂ်လိူဝ်ပိူၼ်ႈယဝ်ႉ”
လိုၼ်းၼုမ်ႇယုမ်ႉဢိတ်ႉၼိုင်ႈသေ တူၺ်းၼႃႈမူၺ်ႁွမ်ယဝ်ႉ
“ႁဝ်းဝူၼ်ႉဝႃႈ ႁဝ်းတေသိုပ်ႇပုတ်ႈဢမူၺ်ႇပေႃႈႁဝ်း၊ လၢၼ်ႉၶဝ်ႈသွႆးဢူႈႁဝ်းၼၼ်ႉမၼ်းဝၢၼ်တၢၼ်ႇႁိုဝ်သူတေႁူႉယူႇ ယွၼ်ႉၼၼ် ၼင်ႇႁိုဝ်ၵူၼ်းတၢင်းၼမ်ပေႃးတေလႆႈၵိၼ်တၢင်းၵိၼ်ဝၢၼ်ဝၢၼ် ၵူၼ်းပေႃးတေႁူႉၸၵ်းၼမ်ၼၼ်ႉ ႁဝ်းတေၶႂၢၵ်ႈလၢၼ်ႉဢူႈႁဝ်း ႁႂ်ႈမၼ်းပေႃးၵႂႃႇလႆႈၵႆလိူဝ်သေ တီႈၼႂ်းၶႅပ်ႇဝဵင်းၼႆႉၵူၺ်းၼၼ်ႉယဝ်ႉ သူဝူၼ်ႉဝႃႈ မၼ်းတေၵႂႃႇလႆႈၵႆၵႃႈႁိုဝ်လႃႇ”
“ႁဝ်းယုမ်ႇဝႃႈတေၵႂႃႇလႆႈၵႆ ၸွမ်းၼင်ႇဢၼ်သူဝူၼ်ႉၼၼ်ႉယူႇ”
“ယဝ်ႉသူလူး”
“ႁဝ်းႁႃႉ…မႄႈႁဝ်းႁႂ်ႈႁဝ်းႁဵၼ်းမေႃယႃဝႃႇ…”
“ပဵၼ်သင်လႄႈတေလႆႈဢဝ်မႄႈဝႃႈလႃႇ တၢင်းဝူၼ်ႉသူလူးသမ်ႉၶႂ်ႈႁဵတ်းသင်”
“ဢၼ်ႁဝ်းၶႂ်ႈပဵၼ်ၵေႃႈ ႁဵတ်းၸွမ်းၼင်ႇယိူင်းဢၢၼ်းမႄႈႁဝ်း ႁႂ်ႈတဵမ်ထူၼ်ႈၼၼ်ႉၼႃႇ… ”
“ဢွၵ်းဢေႃသူၼၼ်ႉ ဢဝ်ဢွၵ်းဢေႃမႄႈသူမႃးသႂ်ႇမူတ်းယဝ်ႉယူဝ်ႉၼႆႉ သူၼႆႉပဵၼ်လုၵ်ႈလီတွၼ်ႈတႃႇပေႃႈမႄႈတႄႉတႄႉၼၼ်ႉယဝ်ႉ”
“ထၢမ်တေႉ… ၸၢတ်ႈၼႆႉသူတေတႄႇၼႃႈႁိူၼ်းယူႇႁႃႉ ဢမ်ႇႁၼ်လၢတ်ႈထိုင်ၽူႈၸၢႆးသေပွၵ်ႈ”
“ႁဝ်းတိုၵ်ႉလႆႈဢႃႇယုယင်းပႆႇထိုင် 18 ႁဝ်းယင်းတိုၵ်ႉဝူၼ်ႉဝႃႈႁဝ်းပဵၼ်လုၵ်ႈဢွၼ်ႇယူႇ လွင်ႈၸိူဝ်းၼႆႉတေဢမ်ႇပႆႇဝူၼ်ႉငၢႆႈငၢႆႈလေႃႇၼႃႈ”
“မိူဝ်ႈလႂ်လႃႇ ထုၵ်ႇလီဝူၼ်ႉယဝ်ႉၼႃႈ သင်ဢမ်ႇသင်ၵေႃႈထုၵ်ႇလီႁူႉဝႃႈ ၸဝ်ႈၵဝ်ႇလႆႈၸႂ်ၵူၼ်းၸိူင်ႉႁိုဝ်ၽွင်ႈ ႁၼ်ႁူဝ်ၸႂ်သူၼႆႉၶႂ်ႈၼႃႇလိူဝ်ၵူၼ်းတၢႆယဝ်ႉယိုင် ပိုတ်ႇၸႂ်ပၼ်ပိူၼ်ႈၽွင်ႈလႄႈ ႁဵၼ်းႁူႉလွင်ႈတၢင်းႁၵ်ႉၽွင်ႈလေႃႇ သူတေယူႇၵေႃႉလဵဝ်တေႃႇၸူဝ်ႈၵေႃႈဢမ်ႇၸႂ်ႈ”
“ၽႂ်ဝႃႈႁဝ်းတေယူႇၵေႃႉလဵဝ် ႁဝ်းၵေႃႈဝူၼ်ႉဝႆႉယဝ်ႉ ႁဝ်းတေတေႇၼႃႈႁိူၼ်းၸွမ်းၵူၼ်းၵေႃႉဢၼ် ႁၵ်ႉႁဝ်းလူၺ်ႈႁူဝ်ၸႂ် လႄႈ ပဵၼ်ၵူၼ်းၵေႃႉဢၼ်ႁဵတ်းႁႂ်ႈႁဝ်းႁၵ်ႉၶဝ်ထိုင်တီႈလိုမ်းဢမ်ႇလႆႈ ႁဝ်းတေတေႇၼႃႈႁိူၼ်းသေမီးလုၵ်ႈႁူမ်ႈၵၼ်မွၵ်ႈသွင်ၵေႃႉၼႆႉၵႂႃႈ…”
“သူတေထူပ်းလႆႈယူႇႁႃႉ”
“တေဝႃႈႁဝ်းၾၼ်ၵၢင်ဝၼ်းယူႇၵေႃႈလႆႈ တေပဵၼ်ႁိုဝ်ဢမ်ႇပဵၼ်မႃးၼၼ်ႉ ဢမ်ႇလႆႈၸမ်ပဵၼ်တွၼ်ႈတႃႇႁဝ်းၼင်ႇၵဝ်ႇ”
“လၢတ်ႈၸိူင်ႉၼႆ တေမီးဝၼ်းထူပ်းလႆႈယူႇႁႃႉ ႁႃၸူႉၵူၺ်းယင်းႁႃဢမ်ႇလႆႈ သမ်ႉပၢႆၵႅတ်ႇဝႆႉထႃႈထႅင်ႈႁေ ဢမ်ႇပိုတ်ႇၸႂ်တေႃႇပိူၼ်ႈၸိူင်ႉၼႆ ပေႃးဢမ်ႇလဵပ်ႈႁဵၼ်းတူၺ်း သူၵေႃႈတေဢမ်ႇႁူႉလႆႈလေႃႇ သမ်ႉဝႃႈပိူၼ်ႈႁၵ်ႉသူယူႇၵေႃႈ မၼ်းၵေႃႈမေႃသဵင်ႈၸႂ်သေလႅၵ်ႈလၢႆႈလႆႈယူႇၼႃ”
“ပေႃးဝႃႈၶဝ်လႅၵ်ႈလၢႆႈၸႂ် ႁဝ်းၵေႃႈယိၼ်းၸူမ်းၸွမ်းၶဝ် ဢၼ်ၵေႃႉၵူႈၶဝ်ၼၼ်ႉဢမ်ႇၸႂ်ႈႁဝ်း ႁဝ်းဢမ်ႇၶႂ်ႈႁႂ်ႈၽႂ်မႃးယၢပ်ႇၽိုတ်ႇယွၼ်ႉႁဝ်းလေႃႇၼႃႈ ႁူဝ်ၸႂ်ၸိူင်ႉၼင်ႇႁဝ်းၼၼ်ႉ မၼ်းမိူၼ်မၢၵ်ႇႁိၼ်ၵႂႃႇယဝ်ႉ ၵူၺ်းၵႃႈႁဝ်းၵေႃႈမီးသူယူႇလူး သူပဵၼ်ဢူၺ်းၵေႃႉႁဝ်းဢမ်ႇၸႂ်ႈႁိုဝ်”
“ပေႃးႁဝ်းတေႇၼႃႈႁိူၼ်းပႅတ်ႈသူလူး…”
“ႁဝ်းၵေႃႈ တေၵဵပ်းလဵင်ႉလုၵ်ႈဢွၼ်ႇသေၵေႃႉၼိုင်ႈ ဝႆႉပဵၼ်ဢူၺ်းၵေႃႉႁဝ်းၼၼ်ႉၼႃႇ ဢမ်ႇၼၼ်ၵေႃႈ လဵင်ႉၸွႆႈလုၵ်ႈသူသေၵေႃႉၼိုင်ႈ ဢမ်ႇလီႁိုဝ်”
“လုၵ်ႈႁဝ်း ၽႂ်တေပၼ်သူလႆႈလႃႇ”
“ထၢမ်လဵင်ႉၸွႆႈၵူၺ်း ဢမ်ႇလႆႈဢဝ်တေႉလူင် သူၵေႃႈယင်းႁႃပေႃႈမၼ်းပႆႇလႆႈၼင်ႇၵဝ်ႇ”
သွင်ၶႃဢုပ်ႇၶူဝ်ႁုၼ်ႉၼူဝ်လူင်မိူဝ်းၵႂႃႇၸွမ်းၵၼ် တူၺ်းႁၼ်မီးတၢင်းသိူဝ်းတေႉၼၼ်ႉယဝ်ႉ။ မိူဝ်ႈပႆမိူဝ်းႁိမ်း တီႈပႅတ်ႈယုၵ်းယၵ်း ၼိူဝ်သဵၼ်ႈတၢင်းလုၵ်ႉဝဵင်းမႃးတၢင်းဝၢၼ်ႈဢၼ်ၶဝ်ယူႇၼၼ်ႉ လႆႈငိၼ်းသဵင်ႁႆႈလုၵ်ႈဢွၼ်ႇႁွင်ႉမေႃးလႄႈ သွင်ၶႃၵေႃႈ ဝၢႆႇသၢႆႉဝၢႆႇၶႂႃႇႁႃတူၺ်းယူႇ ၸင်ႇၵႂႃႇႁၼ်မႅၼ်ႈ တီႈၼိူဝ်ၵွင်ယုၵ်းယၵ်းၼၼ်ႉ မီးပူၵ်ႉလုၵ်ႈဢွၼ်ႇလႅင်တမ်းဝႆႉသေ လိုၼ်းၼုမ်ႇၵေႃႈ ၼႅတ်ႈလႅၼ်ႈၵႂႃႇႁွပ်ႇဢဝ်မႃးၵမ်းလဵဝ်ယဝ်ႉ။
“ပဵၼ်ၽႂ်ပေႉႁဵတ်းလႆႈဢဝ်မႃးပႅတ်ႈဝႆႉတီႈၼႆႈလႃႇ” မူၺ်ႁွမ်လၢတ်ႈၵႂႃႇၸွမ်းလွင်ႈထၢင်ႇပိူင်ႈ။
“ၼၼ်ႉယဝ်ႉ ပေႃႈမႄႈၶဝ်ၸႂ်ႁၢႆႉတေယဝ်ႉ လုၵ်ႈဢွၼ်ႇလီႁၵ်ႉပေႃးတၢၼ်ႇၼႆႉ ဢဝ်မႃးပႅတ်ႈဝႆႉလႆႈၸိူင်ႉႁိုဝ်”
“ႁႃးတေႁဵတ်းႁိုဝ်လႃႇ…”
“ဢဝ်မိူဝ်းၼၼ်ႉၼႃႇ ”
“ဢဝ်မိူဝ်းယဝ်ႉ သူၵေႃႈတေလႆႈလဵင်ႉမၼ်းၼၼ်ႉၼႃႇ သူတေမေႃလဵင်ႉယူႇႁႃႉ ဢဝ်ဝႆႉတီႈၼႆႈသေ ပၼ်ႁႂ်ႈပိူၼ်ႈမႃးဢဝ်လဵင်ႉမၼ်းလႃႈ”
လိုၼ်းၼုမ်ႇတူၺ်းၼႃႈလုၵ်ႈဢွၼ်ႇၵေႃႉၼၼ်ႉယဝ်ႉ မၼ်းတင်းလီဢီးလူ တင်းလီႁၵ်ႉၼႃႇ တေပွႆႇမၼ်းပႅတ်ႈလႄႈ ထွမ်ႇသဵင်ႁႆႈမၼ်းသေ ၵွင်လင်ပႅတ်ႈမၼ်းၵႂႃႇၸိူင်ႉၼႆၼၼ်ႉ ၽႂ်တေႁဵတ်းႁိုဝ်ယဵၼ်ႉၸႂ်လႆႈ ဢမ်ႇၸၢင်ႈဝႃႈ ပေႃးပိူၼ်ႈဢမ်ႇမႃးႁၼ်မၼ်း ယူဝ်မၼ်းတေတၢႆၵႂႃႇၵေႃႈယင်းဢမ်ႇႁူႉ မၼ်းၵေႃႈယုမ်ႉသေ
“ႁဝ်းတေဢဝ်မိူဝ်းလဵင်ႉ လွင်ႈၼွၼ်းၾၼ်ႁဝ်း ဢၼ်လၢတ်ႈမိူဝ်ႈၵႆႈၼၼ်ႉ ပဵၼ်တေႉယဝ်ႉၼႃႇၵမ်းၼႆႉ”
“သူတေမေႃလဵင်ႉမၼ်းလႆႈယူႇႁႃႉ ယင်းဢမ်ႇမီးတူဝ်ထူပ်းလူး ၼွင်ႉၵူၺ်းၵေႃႈသူယင်းဢမ်ႇယၢမ်ႈလုမ်းလႃး တေႁဵတ်းႁိုဝ်လဵင်ႉမၼ်းလႃႇ လဵင်ႉလုၵ်ႈဢွၼ်ႇၼႆႉဢမ်ႇငၢႆႈငၢႆႈၵူၺ်ႉၼႃႈ ႁဝ်းဝႃႈတႄႉ ဢဝ်ဝႆႉသေလႃႈ”
“ႁဝ်းဢမ်ႇႁူႉဝႃႈပေႃႈမႄႈၶဝ်တေဝူၼ်ႉၸိူင်ႉႁိုဝ်သေဢဝ်မႃးပႅတ်ႈၸိူင်ႉၼႆၼႃ ၵူၺ်းၵႃႈ ၶဝ်ၵေႃႈတေယၢပ်ႇၽိုတ်ႇယူႇမိူၼ်ၵၼ် တႃႇတေၵိူတ်ႇလုၵ်ႈဢွၼ်ႇဢွၵ်ႇမႃးၼၼ်ႉ မႄႈၶဝ်တေလႆႈပႃးတွင်ႉပဵၼ်ထိုင်ၵဝ်ႈလိူၼ် တႃႇၵိူတ်ႇဢွၵ်ႇမႃးၵေႃႈ ၸုၼ်ႉပဵၼ်ၸုၼ်ႉတၢႆသေဢွၵ်ႇမႃး ႁဝ်းၼၼ်ႉ ၵဵပ်းလဵင်ႉၵူၺ်း မၼ်းယင်းဢမ်ႇယၢပ်ႇတၢၼ်ႇဢၼ်ၵိူတ်ႇဢွၵ်ႇမႃးၵွၼ်ႇလႃႈ ႁဝ်းလဵင်ႉၶဝ်လႆႈယူႇယဝ်ႉ”
လိုၼ်းၼုမ်ႇၵေႃႈ ၶျႃးဝွၼ်း လုၵ်ႈဢွၼ်ႇၵေႃႉၼၼ်ႉလူင်မိူဝ်းၵႂႃႇယဝ်ႉ။ သမ်ႉဝႃႈၶျႃးဝွၼ်းၵႃႈႁိုဝ်ၵေႃႈ လုၵ်ႈဢွၼ်ႇၵေႃႉၼၼ်ႉႁိုဝ်တေယဵၼ်လႆႈလႃႇ ႁွင်ႉႁႆႈယူႇတိၵ်း မၼ်းၵေႃႈဢမ်ႇႁူႉဝႃႈတေလႆႈႁဵတ်းႁိုဝ် မိူဝ်းႁွတ်ႈႁိူၼ်းယဝ်ႉထၢမ်ပႃႈတၢင်းႁွင်ႇတၢင်းၸၢၼ်း သမ်ႉပေႃးၸွတ်ႇၵႂႃႇသဵင်ႈယဝ်ႉ ယၢမ်းၼၼ်ႉမၼ်းၵေႃႈ ဢဝ်ငိုၼ်းၵႃႈၶဝ်ႈမုၼ်းဢၼ်ဢူႈၶဝ်ပၼ်မၼ်းမႃးၼၼ်ႉ သိုဝ်ႉၼမ်ႉၼူမ်းမႃးလဵင်ႉလုၵ်ႈဢွၼ်ႇၵေႃႉၼၼ်ႉလႄႈ လုၵ်ႈဢွၼ်ႇၼၼ်ႉၵေႃႈ တဵတ်ႇယဵၼ်ၵႂႃႇယဝ်ႉ။
ယၢမ်းႁူဝ်ၶမ်ႈ လပ်းသိင်ႇၸွမ်ႉႁွမ်ႉ ပေႃႈလိုၼ်းၼုမ်ႇၵေႃႈ ၵႂႃႇႁဵတ်းၵၢၼ်ႁွတ်ႈၶိုၼ်းႁိူၼ်းမႃး
“ဢူႈမႃးယဝ်ႉႁႃႉ…”
“ဝၼ်းမိူဝ်ႈၼႆႉ လုၵ်ႈ… လုၵ်ႈၵဵပ်းလုၵ်ႈဢွၼ်ႇမႃးၵေႃႉၼိုင်ႈ မၼ်းလီႁၵ်ႉၼႃႇၵူၺ်ႉဢူႈ”
“ဝႃႈႁိုဝ်ၵေႃ!”
“ၶႃႈၵဵပ်းလုၵ်ႈဢွၼ်ႇမႃးလဵင်ႉ!…”
“ၵဵပ်းလုၵ်ႈၽႂ်မႃးလႃႇ ယူဝ်ပိူၼ်ႈမီးဢူႈမီးမႄႈယင်းဢမ်ႇႁူႉ ပေႃးပိူၼ်ႈၸွမ်းႁႃမႃးမႂ်းတေႁဵတ်းႁိုဝ်”
“ပေႃးမီးဢူႈမီးမႄႈ ၽႂ်သမ်ႉတေဢဝ်မၼ်းမႃးပႅတ်ႈဝႆႉတီႈၵွင်ယုၵ်းယၵ်းၶႃႈလႃႇ ဢူႈမႄႈၶဝ်ဢမ်ႇလူဝ်ႇယဝ်ႉလႄႈ မႃးပႅတ်ႈဝႆႉၵူၺ်းဢေႃႈ”
“ၵဵပ်းလုၵ်ႈပိူၼ်ႈမႃးလဵင်ႉ တေမိူၼ်လုၵ်ႈႁဝ်းၵူၺ်းၵေႃႈဢမ်ႇၸႂ်ႈ”
“ႁဵတ်းႁိုဝ်ဝႃႈဢမ်ႇမိူၼ်လႃႇ လုၵ်ႈဢွၼ်ႇတေၵေႃႉယႂ်ႇမႃးၸိူင်ႉႁိုဝ် ဢမ်ႇလႆႈယူႇတီႈသၢႆလိူတ်ႈမၼ်းၵူၺ်း ယူႇတီႈၵၢၼ်လဵင်ႉလူမၼ်းပႃးယဝ်ႉ ”
“မႂ်းတေဢဝ်သင်လဵင်ႉမၼ်းလႃႇ ၼူမ်းၵေႃႈဢမ်ႇမီး မႄႈၵူၼ်းၵေႃႈဢမ်ႇယၢမ်ႈပဵၼ် ပေႃးတေလဵင်ႉလုၵ်ႈဢွၼ်ႇယဝ်ႉ ၵူႈဝၼ်းၵႂႃႇႁူင်းႁဵၼ်းၼႆႉ ယင်းတိုၵ်ႉယွၼ်းငိုၼ်းၵဝ်ယူႇ မႂ်းဢမ်ႇလူဝ်ႇၵႂႃႇယဝ်ႉႁႃႉႁူင်းႁဵၼ်း ယႃႇပေဝႃႈ ႁႂ်ႈၵဝ်တူၺ်းလုၵ်ႈဢွၼ်ႇတၢင်းႁဵတ်းၵၢၼ်ပႃးၼႃႈ တေႃႈၼင်ႇလဵင်ႉလူမႂ်းၵေႃႉလဵဝ်ၵူၺ်း ၵဝ်ပေႃးဢမ်ႇလႆႈလိုဝ်ႈယူႇယဝ်ႉၼႆႉ”
“ၵူၼ်းၸႂ်လီၸိူင်ႉၼင်ႇဢူႈႁဝ်းၼႆႉ တေႁဵတ်းလႆႈၼိူဝ်လုၵ်ႈဢွၼ်ႇၸိူင်ႉၼႆလႆႈယူႇႁႃႉ ပေႃးၶႃႈႁဵၼ်းသုတ်းယဝ်ႉ ၶႃႈၵေႃႉတေလဵင်ႉမၼ်း တေဢဝ်ပုၼ်ႈၽွၼ်းမၼ်းၵူၺ်း”
လိုၼ်းၼုမ်ႇၵေႃႈ ႁွပ်ႇဢဝ်တင်းလုၵ်ႈဢွၼ်ႇၼၼ်ႉ မႃးၼႄဢူႈၶဝ်ယူႇ ႁၼ်ယဝ်ႉလီႁၵ်ႉၼႃႇၼႆသေ ႁွပ်ႇတူၺ်းၵူၺ်းသမ်ႉပေႃးဢမ်ႇၶႂ်ႈၽႃႈမၼ်းၼၼ်ႉယဝ်ႉ။
“လီႁၵ်ႉဝႆႉၵဝ်ႇလႃႇမႂ်းဝႃႈ ”
“ၼၼ်ႉၼႃႇ လီႁၵ်ႉပေႃးတၢၼ်ႇၼၼ်ႉ ၽႂ်တေပႅတ်ႈလႆႈ”
“ပေႃးမီးပၼ်ႁႃလွင်ႈလုၵ်ႈဢွၼ်ႇၵေႃႉၼႆႉမႃး မႂ်းတေလႆႈဢဝ်ပုၼ်ႈၽွၼ်းၼၼ်ႉၼႃႇ”
“တေမီးပၼ်ႁႃသင်လႃႇ ပိူၼ်ႈပေႃးပႅတ်ႈယဝ်ႉ”
“မႂ်းဝႃႈ ဢူႈမႄႈၶဝ်တေပႅတ်ႈလႆႈယူႇႁႃႉ လုၵ်ႈဢွၼ်ႇလီႁၵ်ႉပေႃးတၢၼ်ႇၼႆႉ သမ်ႉပၢႆမီးပႃး သၢႆၶေႃးထႅင်ႈသေ”
လိုၼ်းၼုမ်ႇၸင်ႇတေၾၢင်ႉႁၼ်မႅၼ်ႈ တီႈၶေႃးလုၵ်ႈဢွၼ်ႇၼၼ်ႉမီးသၢႆၶေႃးတႄႉလႄႈ
“ဢူႈႁဝ်း..တေႁႂ်ႈမၼ်းႁွင်ႉႁႆႈယူႇၼိူဝ်ၵွင်ယုၵ်းယၵ်းၼၼ်ႉလႆႈၸိူင်ႉႁိုဝ်လႃႇ တၢၵ်ႇလႅတ်ႇတၢၵ်ႇၼၢႆးတၢၵ်ႇလူမ်း ၼူမ်းဢမ်ႇလႆႈၵိၼ် ယူဝ်မၼ်းတေတၢႆၵႂႃႇယဝ်ႉၵေႃႈပဵၼ်လႆႈ ဢမ်ႇပဵၼ်သင် ၶႃႈတေဢဝ်ပုၼ်ႈၽွၼ်းၵူၺ်း သင်ၸိူဝ်ႉဝႃႈ ဢူႈမႄႈၶဝ်ထူပ်းႁၼ်တႄႉတႄႉ ၶႃႈၵေႃႈတေပၼ်ၶိုၼ်းၵူၺ်း”
“မႂ်းတေၶၢမ်ႇတုၵ်ႉၶၢမ်ႇယၢပ်ႇလဵင်ႉလူလုၵ်ႈပိူၼ်ႈသေ ပၼ်ပိူၼ်ႈၶိုၼ်းလႆႈယူႇႁႃႉ ပေႃးမႂ်းႁဵတ်းလႆႈ ၵဝ်ၵေႃႈဢမ်ႇဝႃႈသင်”
“လႆႈယူႇယဝ်ႉ ပဵၼ်သင်လႄႈဢမ်ႇလႆႈ လႆႈၸွႆႈသၢႆၸႂ်ၶဝ်ဝႆႉ ၵၼႆႉၵူၺ်းၵေႃႈၶႃႈႁၢၼ်ႉၸႂ်ယဝ်ႉ ”
“ဢဝ်မႂ်းဝႃႈ မႂ်းၶႂ်ႈႁဵတ်းသင်ၵေႃႈႁဵတ်းလႃႈ”
“ဢူႈ!…ၶဝ်ၵေႃႉလဵၵ်ႉၼႃႇ ၶႃႈဢမ်ႇမေႃႁွပ်ႇဢၢပ်ႇၼမ်ႉ ဢူႈႁဝ်းၸွႆႈဢၢပ်ႇၼမ်ႉပၼ်ၶဝ်ဢိတ်းၼိုင်ႈလူႉ”
“မႃးၺႃးၵဝ်ၵူၺ်းၼင်ႇၵဝ်ႇ”
“မၼ်းပဵၼ်လၢၼ်ဢူႈႁဝ်းလူး…”
“ၽူႈယိင်းႁႃႉၽူႈၸၢႆး”
“ၽူႈၸၢႆး! ပဵၼ်လုၵ်ႈဢွၼ်ႇဢၼ်ဢူႈၶႂ်ႈမီးယူႇတႃႇသေႇဢမ်ႇၸႂ်ႈႁိုဝ် ႁၼ်ဢူႈပွင်ႉၶႃႈႁႂ်ႈၶႃႈၼၼ်ႉပဵၼ်ၽူႈၸၢႆးယူႇတႃႇသေႇလူး”
ၶႃပေႃႈလုၵ်ႈၵေႃႈ ဢွၼ်ၵၼ်တူၺ်းထိုင်လုၵ်ႈဢွၼ်ႇၵေႃႉၼၼ်ႉၵႂႃႇယူႇယဝ်ႉ ၸွမ်းလူၺ်ႈဢူႈၶဝ်ယၢမ်ႈလုမ်းလႃးတူၺ်းထိုင် လိုၼ်းၼုမ်ႇၸဵမ်မိူဝ်ႈၵေႃႉလဵၵ်ႉလႄႈ လွင်ႈလုမ်းလႃးလုၵ်ႈဢွၼ်ႇၼၼ်ႉ ဢမ်ႇလႆႈမီးလွင်ႈၶွင်ႉၶမ်သင်။ ၵၢင်ဝၼ်း ပၼ်ဢူႈၶဝ်လုမ်းလႃး ၵၢင်ၶမ်ႈ လိုၼ်းၼုမ်ႇၵေႃႉတူၺ်းထိုင် ဝၼ်းလိုဝ်ႈ မႃး မူၺ်ႁွမ်ၵေႃႈ မႃးလဵၼ်ႈၵေႃႉ။ ယူႇၸွမ်းၵူႈဝၼ်းၵူႈဝၼ်း မၼ်းၵေႃႈယၢမ်ႈၵႂႃႇႁင်းၵူၺ်းယူႇ။ ယိုင်ႈဝၼ်းႁိုင် လုၵ်ႈဢွၼ်ႇၵေႃႉၼႆႉၵေႃႈယိုင်ႈလီႁၵ်ႉမႃးတိၵ်းတိၵ်းၼၼ်ႉယဝ်ႉ။
ၼင်ႇႁိုဝ် ပေႃးတေလဵင်ႉလုၵ်ႈဢွၼ်ႇၵႂႃႇလႆႈလီ တႃႇတေလုမ်းလႃးပၢႆးၸႂ်လုၵ်ႈဢွၼ်ႇ ႁႂ်ႈပေႃးၵေႃႉယႂ်ႇမႃးတဵမ်ထူၼ်ႈၸိူဝ်းၼႆႉ လိုၼ်းၼုမ်ႇၵေႃႈလႆႈလဵပ်ႈႁဵၼ်းတေႉတေႉဝႃႈဝႃႈယူႇ တႄႇၸဵမ်ၼႂ်းလိၵ်ႈၼႂ်းလၢႆး ၵူၼ်းႁိမ်းႁွမ်း ၵေႃႉလႂ်ဢၼ်မီးလုၵ်ႈဢွၼ်ႇ၊ ၵူၼ်းထဝ်ႈၵူၼ်းၵႄႇၸိူဝ်းၼႆႉ ႁၼ်ၽႂ်ၵေႃႉဢၼ်ပဵၼ်ပေႃႈလုၵ်ႈဢွၼ်ႇမႄႈလုၵ်ႈဢွၼ်ႇၸိူဝ်းၼႆႉၵေႃႈ တေဢဝ်တင်းပပ်ႉသေ ၵႂႃႇတွင်ႈထၢမ်မိူၼ်ပဵၼ်ၵူၼ်းယွင်ႇၵေႃႉၼိုင်ႈယဝ်ႉ၊ မၢင်ၵေႃႉၵေႃႈ ပိူၼ်ႈတေလၢတ်ႈၼႄလီလီယူႇ၊ မၢင်ၵေႃႉၵေႃႈ ဢမ်ႇတၼ်းသေဢမ်ႇလႆႈလၢတ်ႈၼႄ၊ မၢင်ၵေႃႉၵေႃႈ ၸွမ်းၼင်ႇလွင်ႈၶမ်ၸႂ် လွင်ႈမႆႈၸႂ်ၼိူဝ်လုၵ်ႈလၢင်းဢၼ်မီးၸိူဝ်းၼၼ်ႉၵေႃႈ ပွင်ႉၶၢင်းၼႄမၼ်းမႃး မၢင်ၵေႃႉၵေႃႈ ႁႂ်ႈမၼ်းဢဝ်လုၵ်ႈဢွၼ်ႇၵႂႃႇပၼ်ပိူၼ်ႈလဵင်ႉၵေႃႈမီးယဝ်ႉ။
မီးယူႇမၼ်းလၢႆလၢႆၵေႃႉလၢတ်ႈၸူးမၼ်း တၢင်းဢၼ်ဝူၼ်ႉလီ၊ ဢၼ်ဢမ်ႇလီၵေႃႈမီးတၢင်းၼမ်ၼၼ်ႉယဝ်ႉ။
“သမ်ႉဝႃႈႁဝ်းတေလဵင်ႉလုၵ်ႈပိူၼ်ႈၵေႃႈ ဢမ်ႇမိူၼ်လုၵ်ႈႁဝ်းၵိူတ်ႇႁင်းၵူၺ်းလေႃႇ”
“လုၵ်ႈဢွၼ်ႇၼမ်ႉၼူမ်းယင်းပႆႇႁၢႆ တေမႃးလဵင်ႉလုၵ်ႈဢွၼ်ႇၸိူင်ႉၼႆ တေလဵင်ႉလူလႆႈယူႇႁႃႉ ဢဝ်ၵႂႃႇပၼ်ပိူၼ်ႈလဵင်ႉႁေလႃႈၵဝ်ဝႃႈ မီးၵူၼ်းၶႂ်ႈလဵင်ႉလုၵ်ႈဢွၼ်ႇယူႇၵူၺ်းယူဝ်ႉ”
“တူဝ်ၸဝ်ႈၵဝ်ႇၵူၺ်းယင်းလဵင်ႉလူဢမ်ႇပႆႇလႆႈ တေသမ်ႉတေလဵင်ႉလုၵ်ႈဢွၼ်ႇပိူၼ်ႈထႅင်ႈ ဢူႈသူၵူၺ်းယဝ်ႉတေတုၵ်ႉၶ”
“သမ်ႉဝႃႈတေလဵင်ႉလူၶဝ်လႆႈလီၵႃႈႁိုဝ်ၵေႃႈ ဝၼ်းၼိုင်ႈမႃးသူၵေႃႈ တေလႆႈၶိုၼ်းတိူဝ်ႉၸႂ်ဢၼ်လႆႈလဵင်ႉလူၶဝ်မႃးၼၼ်ႉယဝ်ႉ”
“တႃႇလုၵ်ႈဢွၼ်ႇတေၵေႃႉယႂ်ႇတဵမ်ထူၼ်ႈလႆႈၼၼ်ႉ သမ်ႉဝႃႈသူတေပဵၼ်မႄႈၶဝ်လႆႈတဵမ်ထူၼ်ႈၵေႃႈ ပေႃႈၼႆၼၼ်ႉ ပဵၼ်ဢၼ်လမ်ႇလွင်ႈတွၼ်ႈတႃႇလုၵ်ႈဢွၼ်ႇၵေႃႈဝႃႈလႆႈယဝ်ႉ သင်ဝႃႈပဵၼ်လုၵ်ႈဢမ်ႇမီးပေႃႈၼႆ တႃႇႁႂ်ႈဝႃႈလဵင်ႉလုၵ်ႈလႆႈတဵမ်ထူၼ်ႈဢၼ်ဝႃႈၼၼ်ႉ တွၼ်ႈတႃႇလုၵ်ႈဢွၼ်ႇ ၶဝ်တေဢမ်ႇႁပ်ႉႁူႉလႆႈၸိူင်ႉၼၼ် မၼ်းယင်းတိုၵ်ႉပဵၼ်ဢၼ်ၶၢတ်ႇတွၼ်ႈတႃႇၶဝ်ယူႇ လိူဝ်သေၼၼ်ႉသမ်ႉ ပၢႆဢမ်ႇၸႂ်ႈလုၵ်ႈသူၵိူတ်ႇဢွၵ်ႇမႃးႁင်းၵူၺ်းထႅင်ႈသေ သူတေပွင်ႇၸႂ်ယူႇႁႃႉ ပုၼ်ႈၽွၼ်းၵေႃႉပဵၼ်မႄႈၼၼ်ႉမီးၸိူင်ႉႁိုဝ်ၽွင်ႈ တေလႆႈဢဝ်ပုၼ်ႈၽွၼ်းၸိူင်ႉႁိုဝ်”
ဢမ်ႇဝႃႈတေပဵၼ်ၵူၼ်းႁူႉၸၵ်းႁိုဝ် ၵူၼ်းၸမ်တူဝ်မၼ်းၸိူဝ်းၼၼ်ႉ ဢမ်ႇလႆႈပၼ်ႁႅင်းႁႂ်ႈမၼ်းသိုပ်ႇလဵင်ႉလုၵ်ႈဢွၼ်ႇၼၼ်ႉသေဢိတ်း၊ ၵူၺ်းၵႃႈ ၼမ်ႉၸႂ် လႄႈ သၢႆတႃလုၵ်ႈဢွၼ်ႇ ဢၼ်ယၵ်ႉတူၺ်းၸူးမၼ်းယူႇၼႂ်းဢွင်ႈၶႅၼ်ၼၼ်ႉ မၼ်းႁိုဝ်တေပွႆႇလူင်းလႆႈ ဢမ်ႇဝႃႈၽႂ်တေလၢတ်ႈၸိူင်ႉႁိုဝ်ၵေႃႈယဝ်ႉ တေထူပ်းလွင်ႈသင်မႃးၵေႃႈယဝ်ႉ မၼ်းတိုၼ်းတေသိုပ်ႇလဵင်ႉလုၵ်ႈဢွၼ်ႇၼၼ်ႉၵႂႃႇ ယူႇယဝ်ႉ။
ၸၢတ်ႈပၢၼ်လိုၼ်းၼုမ်ႇတေပဵၼ်ၸိူင်ႉႁိုဝ်မႃးၼၼ်ႉ ပႂ်ႉသိုပ်ႇတူၺ်းထႅင်ႈ တွၼ်ႈတေမႃးၶႃႈ။
ႁပ်ႉထွမ်ႇပၼ်ႁႅင်းတၢင်းသဵင်ဢၢၼ်ႇလႆႈတီႈ YouTube ပႃႈတႂ်ႈၼႆႉလႆႈယူႇၶႃႈ။
