တွၼ်ႈႁူၵ်း
မိူဝ်ႈဢမ်ႇၸႂ်ႈၵေႃႉမၼ်းၼႆ ပႃႈၼၼ်ႉၵေႃႈ ၵိုင်ႉၵၢင်ႉတူၵ်းၸႂ်မႃးယဝ်ႉ ဢဝ်မိုင်လူင်ၵႂႃႇသေ ၽွင်းၼၼ်ႉ ၼႂ်းလၢၼ်ႉၵေႃႈ မိူၼ်ယဵၼ်လူင်ၵႂႃႇၵႅပ်ႉၼိုင်ႈ လႄႈ လိုၼ်းၼုမ်ႇဝႆႉၸႂ်ယဵၼ်သေယဝ်ႉ လၢတ်ႈဢွၵ်ႇၶေႃႈၵႂၢမ်း ယွမ်းၼွမ်းတေႃႇပႃႈၼၼ်ႉၵႂႃႇ
“ၽၢႆႇတၢင်းႁဝ်းၶႃႈယွမ်းၼွမ်းယူႇ ဢၼ်ဢမ်ႇတၼ်းၾၢင်ႉသေလႆႈႁဵတ်းၺႃး ပဵၼ်တၢင်းယူပ်ႈယွမ်းလၢၼ်ႉႁဝ်းတႄႉတႄႉၶႃႈယဝ်ႉ.. ယွမ်းၼွမ်းတၢင်ၵူၼ်းႁဵတ်းၵၢၼ်ႁဝ်းၶႃႈယူႇ ဝူၼ်ႉဝႃႈသူၵေႃႈ.. တေဢမ်ႇဢဝ်မႃးသႂ်ႇၸႂ်သင်ၸွမ်းလွင်ႈၸိူင်ႉၼႆၶႃႈၼႃ”
လိုၼ်းၼုမ်ႇၵေႃႈ တင်ႈၸႂ်ဢဝ်ၼႃႈဢၼ်ၽၢႆႇပႃႈၼၼ်ႉပၢပ်းသႂ်ႇၼၼ်ႉ ၼႄႁႂ်ႈမၼ်းႁၼ်လီလီယဝ်ႉ ပႃႈၼၼ်ႉၵေႃႈ မိူၼ်ပွင်ႇၸႂ်မႃးယူႇ ႁဵတ်းမိူၼ်ဢမ်ႇလႆႈဝႆႉၸႂ်သင်ယဝ်ႉၵေႃႈ
“ၵေႃႈလႆႈ ႁဝ်းတေဢမ်ႇဢဝ်ၵႂၢမ်း ၵူၺ်းၵႃႈ တေလၢတ်ႈသူလွင်ႈၼိုင်ႈ ၵူၼ်းၸိူင်ႉၼင်ႇမၼ်းၼႆႉ ဢမ်ႇထုၵ်ႇလီႁပ်ႉမႃးႁဵတ်းၵၢၼ်လေႃႇၼႃႈ တေၸွႆႈသၢင်ႈပၼ်လွင်ႈလူႉသုမ်းၵူၺ်း..” ဢွၵ်ႇလၢၼ်ႉၵႂႃႇယူႇယဝ်ႉ။
ၼႂ်းလၢၼ်ႉၼၼ်ႉၵေႃႈ မိူၼ်ၵဝ်ႇမႃးၶိုၼ်းယဝ်ႉလႄႈ လိုၼ်းၼုမ်ႇၸင်ႇႁွင်ႉဢဝ် ယိင်းၵေႃႉၼၼ်ႉ ၶဝ်ႈၵႂႃႇၼႂ်းႁွင်ႈႁဵတ်းၵၢၼ်မၼ်း ဢၼ်ပိူၼ်ႈတိုၵ်ႉႁၢင်ႈႁႅၼ်းဝႆႉပၼ်ယဝ်ႉၵူၺ်းၼၼ်ႉလႄႈ ၸင်ႇႁႂ်ႈယိင်းၵေႃႉၼၼ်ႉၼင်ႈယဝ်ႉ ဢဝ်ၼမ်ႉၵတ်းမႃးတမ်းပၼ်ၵႂႃႇ ယုမ်ႉလၢတ်ႈသဵင်ဝၢၼ်တေႃႇယိင်းၵေႃႉၼၼ်ႉယူႇ။
“သူၸိုဝ်ႈၼွင်ႉဢွမ်ၸွင်ႇၸႂ်ႈ..”
မိူဝ်ႈလႆႈငိၼ်းၸိုဝ်ႈမႃးယဝ်ႉၵေႃႈ ဢဝ်ၼွင်ႉဢွမ်ၼၼ်ႉပေႃးဢမ်ႇႁတ်းငွၵ်ႈႁူဝ် ဢမ်ႇႁတ်းတူၺ်းၼႃႈလိုၼ်းၼုမ်ႇသေဢိတ်း မၼ်းၵေႃႈတွပ်ႇၵႂႃႇလွႆးလွႆးဝႃႈ
“ၸႂ်ႈဢေႃႈ..”
လိုၼ်းၼုမ်ႇႁၼ်မၼ်းလႅပ်ႈယူႇယၢပ်ႇၼႃႇလႄႈ
“ဢမ်ႇတူၺ်းႁဝ်းႁႂ်ႈလီၵူဝ်ထိုင်တၢၼ်ႇၼၼ်ႉၵေႃႈလႆႈ.. ႁဝ်းၵေႃႈၶႂ်ႈႁူႉၸၵ်းသူၵူၺ်း..”
ၸင်ႇဢဝ်ယႃမႃးတႃးပၼ်တီႈမိုဝ်းမၼ်းၵႂႃႇလွႆးလွႆးသေ မိုဝ်းဢူၼ်ႈဢူၼ်ႈဢွၼ်ႇလိုၼ်းၼုမ်ႇ ဢၼ်လုပ်ႈသႂ်ႇတီႈမိုဝ်းမၼ်းၼၼ်ႉ လွင်ႈၵူဝ်မၼ်းတၼ်းႁၢႆၵႂႃႇတၢင်းလႂ်မူတ်းၵေႃႈဢမ်ႇႁူႉယဝ်ႉ၊ မိူဝ်ႈဢၼ်ႁၼ်ၼႃႈလႅင်လႅင်လိုၼ်းၼုမ်ႇၼၼ်ႉၵေႃႈ
“ႁႂ်ႈႁဝ်းၸွႆႈတႃးပၼ်သူၶႃႈလႄႈ”
လိုၼ်းၼုမ်ႇယုမ်ႉၼႄမၼ်းယဝ်ႉ “ဢိုမ်ႉ..”
သွင်ၶႃၵေႃႈ တႃးပၼ်ၵၼ်ၵႂႃႇသေယဝ်ႉ ၼွင်ႉဢွမ်ၼၼ်ႉ မိူၼ်တေၸႂ်ဢမ်ႇလီမႃး ဢၼ်လႆႈႁဵတ်းႁႂ်ႈလိုၼ်းၼုမ်ႇမႃးၺႃးၸိူင်ႉၼၼ်ၼႆလႄႈ
“ယွမ်းၼွမ်းယူႇၶႃႈ ယွၼ်ႉႁဝ်းသေလႆႈႁဵတ်းႁႂ်ႈသူၺႃးပၢပ်းၸိူင်ႉၼၼ်”
“ပေႃးလၢတ်ႈမႃးၵေႃႈ.. ၼင်ႇႁၢင်ႈမၼ်းသမ်ႉပေႃးၸဵပ်းမႃးၵမ်းလဵဝ်ယဝ်ႉ တႃးပၼ်လွႆးလွႆးလႄႈၼႃႈ”
“ၶဝ်ႁႅမ်သူယဝ်ႉ.. ပဵၼ်သင်လႄႈပွႆႇၶဝ်ၵႂႃႇၸိူင်ႉၼၼ်လႃႇ ထုၵ်ႇလီဢဝ်ၶဝ်ၶိုၼ်းဢမ်ႇၸႂ်ႈၶႃႈႁႃႉ.. လႃႇၶဝ်ၶိုၼ်းဢမ်ႇၼၼ်ႉၵေႃႈ ပၢပ်းပၼ်ၶဝ်ၶိုၼ်းသေၵမ်းၼိုင်ႈၼၼ်ႉယဝ်ႉ.. ဝူၼ်ႉယဝ်ႉၵေႃႈ ၶႂ်ႈပၢပ်းပၼ်သူပ်းၶဝ်ၼၼ်ႉ ႁႂ်ႈပေႃးသိၵ်ႇၵႂႃႇၵမ်းလဵဝ်ယဝ်ႉ”
“သင်မိူဝ်ႈၵႆႈသူလႆႈႁႅမ်ၶဝ်.. ပၢပ်းပၼ်သီႇသူပ်းၶဝ်လိူတ်ႈပေႃးဢွၵ်ႇ.. ၶဵဝ်ႈပေႃးႁူင်ႈ.. လႃႇၶဝ်ႁႂ်ႈပေႃးၼင်ႈႁူတ်းလူင်ၵႂႃႇ.. ႁဵတ်းၸိူင်ႉၼၼ်ယဝ်ႉ.. ၸွင်ႇတေသူလႅပ်ႈလႆႈငိၼ်းသဵင်တူပ်းမိုဝ်းယူႇႁႃႉ.. ဢမ်ႇၼၼ်ၵေႃႈ သဵင်ယုၵ်ႉယွင်ႈသူဝႃႈသူၼၼ်ႉၵတ်ႉၶႅၼ်ႇၼႃႇၼႆႁိုဝ်”
ထွမ်ႇယဝ်ႉၵေႃႈ မိုင်ယၵ်ႉတူၺ်းလိုၼ်းၼုမ်ႇလူင်ၵႂႃႇ မိူၼ်တေဝူၼ်ႉလႆႈမႃးယဝ်ႉလႄႈ
“ဢမ်ႇၶႃႈ!”
လိုၼ်းၼုမ်ႇယုမ်ႉၸူးၼင်ႇဢုၼ်ႇၸႂ်ယဝ်ႉ
“ႁၼ်ႁိုဝ်သူဢမ်ႇလႆႈႁင်မႃး လိူဝ်ၼၼ်ႉတေပဵၼ်သူၵူၺ်း.. ဢၼ်လႆႈႁပ်ႉလွင်ႈလိူတ်ႇမႆႈၸွမ်းဝၢႆးလင်..”
ၼွင်ႉဢွမ် မိူၼ်ဝူၼ်ႉလႆႈမႃးယဝ်ႉလႄႈ
“ၸႂ်ႈယဝ်ႉၶႃႈ.. ၶႃႈပွင်ႇၸႂ်ယဝ်ႉ.. ယိၼ်းၸူမ်းယဝ်ႉၶႃႈၼႃ ဢၼ်ၶဝ်ႈၸွႆႈၶႃႈမိူဝ်ႈၵႆႈၼႆႉ”
“ႁၼ်သူပွင်ႇၸႂ်ၸိူင်ႉၼႆၵေႃႈလီယဝ်ႉ.. ပေႃးၸႂ်ယဵၼ်မႃးယဝ်ႉၵေႃႈ ၵႂႃႇႁဵတ်းၵၢၼ်လႆႈယဝ်ႉၼႃႈ..”
ဝၼ်းဢွၼ်တၢင်းသုတ်းလႆႈပဵၼ်ႁူဝ်ၼႃႈၼႆၵေႃႈ ၼင်ႇႁၢင်ႈႁူဝ်ၵေႃႈၶႆႈမႃးယဝ်ႉ။
ၼွင်ႉလႅင်းဢၼ်တူၺ်းႁၼ်ၸွမ်းၵူႈလွင်ႈၼၼ်ႉ မိူၼ်တေမီးၽႅၼ်ၵၢၼ်သေလွင်ႈလွင်ႈမႃးယူႇယဝ်ႉ။
ထိုင်ၶၢဝ်းလိုဝ်ႈၵၢၼ်ယဝ်ႉသေတႃႉ လိုၼ်းၼုမ်ႇတႄႉ ဢမ်ႇလႆႈလူင်းၵၢၼ် မိူၼ်မိူဝ်ႈဢွၼ်တၢင်းယဝ်ႉလႄႈ ၵႃႈလႆႈလၢတ်ႈတီႈသႅင်ႁိူၼ်းၼုမ်ႇဝႆႉယူႇ။ ဝၢႆးၵူၼ်းႁဵတ်းၵၢၼ်ၶဝ်လိုဝ်ႈၵၢၼ်ၵၼ်ယဝ်ႉၼႆ မၼ်းတေလႆႈႁဵတ်းလၢႆးငၢၼ်းပႃးၼႆလႄႈ လၢႆးငၢၼ်းၼၼ်ႉသမ်ႉ တႅမ်ႈတၢင်းမိုဝ်းဢဝ်ၵူၺ်းဢမ်ႇလႆႈ တေလႆႈတႅမ်ႈသႂ်ႇၼႂ်းၶွမ်းယဝ်ႉ သူင်ႇပၼ်တီႈ ၽူႈမၢႆလုင်းဢွင်ႇ ၼႆယူႇ။ ၵူၺ်းၵႃႈ ဝၢႆးသေဢွၵ်ႇႁူင်းႁဵၼ်းမႃး ၶွမ်းဢၼ်ဝႃႈၼၼ်ႉၵေႃႈ မၼ်းယင်းဢမ်ႇလႆႈယိပ်းတိုဝ်းၶိုၼ်းသေပွၵ်ႈ၊ ၵၢၼ်ၸိူဝ်းဢၼ်ယၢမ်ႈႁဵတ်းမႃးၼၼ်ႉၵေႃႈ ဢမ်ႇလႆႈၸႂ်ႉတိုဝ်းၶွမ်းလူး၊ မိူၼ်ဝႃႈၵူႈလွင်ႈလႆႈတႄႇမႂ်ႇမူတ်း ၼၼ်ႉယဝ်ႉ။ မိူဝ်ႈဝႃႈမၼ်းဢမ်ႇမေႃၼႆ ၽူႈမၢႆၵေႃႈ လႆႈၸွႆႈတူၺ်းသေ ၽိုၵ်းသွၼ်ပၼ်ၵႂႃႇ။ ပေႃးလမ်ႇလွင်ႈၼႃႇႁႅင်းတႄႉ တႅမ်ႈၼႂ်းၽူင်းဢဝ်ၵေႃႈလႆႈ ၵူၺ်းၵႃႈ ၽူင်းဢၼ်ဝႃႈၼၼ်ႉၵေႃႈ ပေႃးဢမ်ႇလူဝ်ႇတေႉတေႉ မၼ်းယင်းဢမ်ႇၸႂ်ႉတိုဝ်းလူးၵွၼ်ႇ။ မိူဝ်ႈဝႃႈ တေလႆႈႁဵတ်းၵၢၼ်ၸွမ်းမၼ်းတႃႇသေႇယူႇယဝ်ႉၼႆ တင်ႈၸႂ်သေၽိုၵ်းၵႂႃႇလွႆးလွႆးယဝ်ႉ။
ၽူႈမၢႆၵေႃႈ မိူဝ်ႈလၢတ်ႈသပ်းလႅင်းၼႄမၼ်းပွင်ႇၸႂ်လီယဝ်ႉ ပွၵ်ႈမိူဝ်းထႃႈမၼ်းယူႇ၊ မၼ်းတႄႉၵႃႈဢမ်ႇယဝ်ႉဢမ်ႇပႆႇၶၢႆႉတီႈလႆႈ သမ်ႉဝႃႈဢမ်ႇမီးၼမ်သေတႃႉ ၸွမ်းလူၺ်ႈၵူၼ်းဢၼ်ဢမ်ႇမေႃၼၼ်ႉ လႆႈဝႃႈမၼ်းၵေႃႈၼၢၼ်းယဝ်ႉဝႆႉယူႇ ၽိူဝ်ႇထိုင်ႁဵတ်းယဝ်ႉသေ ဢွၵ်ႇလၢၼ်ႉမႃးၼၼ်ႉ ၵၢင်ဝၼ်းသမ်ႉပေႃးၸၢႆႉၸိူၼ်းလပ်ႉလွႆၵႂႃႇယဝ်ႉ သီတွင်ႉၾႃႉဢွၼ်ႇလိူင်ၸိူင်းငိူၼ်း မွၵ်ႇၵုမ်ႈပဵၼ်ၸုမ်ႈပဵၼ်ၸုမ်ႈၶပ်ႉယႆၸႅၼ်ႇ ၼင်ႇႁၢင်ႈပေႉလီတူၺ်းၼႃႇၵေႃႈဢမ်ႇႁူႉ ႁၼ်ယဝ်ႉၵေႃႈ လူမ်းႁိူဝ်ႉပေႃးႁၢႆလူင်ၵႂႃႇမူတ်းယဝ်ႉ။
မိူဝ်ႈယင်းတိုၵ်ႉႁႅၼ်မုင်ႈတူၺ်းတွင်ႉၾႃႉယူႇၼၼ်ႉ ၸင်ႇမီးၵူၼ်းၵေႃႉၼိုင်ႈပႆၶဝ်ႈမႃးၸူးမၼ်းလွႆးလွႆးသေ လၢတ်ႈသဵင်ဢွၵ်ႇမႃးႁိမ်းမၼ်းၼၼ်ႉဝႃႈ
“ၶၢဝ်းၼႆႉ!..ဢမ်ႇပႆႇပွၵ်ႈမိူဝ်းႁိူၼ်းၵွၼ်ႇႁႃႉ”
လိုၼ်းၼုမ်ႇဢၼ်တိုၵ်ႉမိူၼ်ႇမိုင် တူၺ်းတၢင်းႁၢင်ႈလီတွင်ႉၾႃႉယူႇၼၼ်ႉ မၼ်းယင်းဢမ်ႇလႆႈငိၼ်းသဵင်ၼၼ်ႉလႃႈ ၵူၺ်းၵႃႈ မိူဝ်ႈဝၢႆႇၼႃႈႁၼ်ပဵၼ်ၽူႈၸၢႆးၼႆၵေႃႈ ၶုၼ်ႇတူၵ်းၸႂ်လူင်ၵႂႃႇ ဢီးသႂ်ႇၵူၼ်းၵေႃႉၼၼ်ႉယဝ်ႉ ဢၢင်ႈဝိၼ်ႇတူဝ်ဢွၵ်ႇပၢႆႈ သမ်ႉဢဝ်တိၼ်ပိၼ်ႈသေ လူမ်ႉလူင်းၼိူဝ်ပိုၼ်ႉလိၼ်ၼၼ်ႉယူႇ ဝၢႆႇတူၺ်းၶိုၼ်းလီလီ ၸင်ႇတေႁူႉဝႃႈပဵၼ်ၸိုၼ်ႈၶိူဝ်းယဝ်ႉ။ ၸိုၼ်ႈၶိူဝ်းၵေႃႈ ဢမ်ႇတုမ်ႉတွပ်ႇသင်ၸူးၶိုၼ်း ၸွမ်းၼင်ႇလွင်ႈႁဵတ်းသၢင်ႈလိုၼ်းၼုမ်ႇ ဢၼ်ဢမ်ႇႁူႉဝႃႈပဵၼ်ယွၼ်ႉသင်ၼၼ်ႉ မၼ်းၵေႃႈမိူၼ်ႇတူၺ်းလိုၼ်းၼုမ်ႇ လူမ်ႉလူင်းၵႂႃႇႁဵတ်းၼၼ်ၵူၺ်း။
“ပဵၼ်သူၶႃႈႁႃႉ! မႃးႁဵတ်းသင်တီႈၼႆႈၶၢဝ်းၼႆႉလႃႇ.. ပႆမႃးပေႃးဢမ်ႇသူပ်းဢမ်ႇသဵင်”
ၸိုၼ်ႈၶိူဝ်းၵေႃႈၸုၵ်းတူၺ်းၼႃႈလိုၼ်းၼုမ်ႇသေ
“လၢတ်ႈယဝ်ႉဢမ်ႇသူၼ်ၸႂ်ၵူၺ်း..”
ပႆပူၼ်ႉလိုၼ်းၼုမ်ႇၵႂႃႇ လူၺ်ႈဢမ်ႇသႂ်ႇၸႂ်သင်ၼၼ်ႉယဝ်ႉ။ လိုၼ်းၼုမ်ႇဢၼ်ႁၼ်မၼ်း ပႆပူၼ်ႉၵႂႃႇႁဵတ်းၼၼ်ယဝ်ႉၵေႃႈ သမ်ႉပေႃးၶႂ်ႈလုၵ်ႉလႅၼ်ႈလမ်းပိတ်ႉၸွမ်းလင်မၼ်းၵႂႃႇယူႇ ၵူၺ်းၵႃႈ တႃႇတေလုၵ်ႉၶိုၼ်ႈၵူၺ်းၼၼ်ႉတႄႉ မိူၼ်တေဢမ်ႇမီးႁႅင်းလုၵ်ႉလႆႈယဝ်ႉ တိၼ်ၸဵပ်းႁႅင်းၼႃႇ ၶတ်းၸႂ်လုၵ်ႉၶိုၼ်ႈမႃးသေတႃႉ လူမ်ႉလူင်းၵႂႃႇၶိုၼ်းသေ သဵင်ၶၢင်းလင်ဢွၵ်ႇမႃး ၸိုၼ်ႈၶိူဝ်းၸင်ႇလႆႈဝၢႆႇလင်ယၵ်ႉတူၺ်းၸူးမၼ်းၵႂႃႇ လိုၼ်းၼုမ်ႇ ဢမ်ႇလႆႈသူၼ်ၸႂ်သင် ဢၢၼ်းၶတ်းၸႂ်လုၵ်ႉၶိုၼ်ႈႁႂ်ႈပေႃးလႆႈၼႆယူႇ၊ မိူဝ်ႈယူႇတေႃႇၼႃႈၶဝ် မၼ်းၵေႃႈ ၶတ်းၸႂ်ဢမ်ႇႁႂ်ႈၶဝ်ႁၼ်ဝႃႈ မၼ်းပဵၼ်ၵူၼ်းဢူၼ်ႈဢွၼ်ႇ ၼႆၼၼ်ႉယဝ်ႉ။
ဢဝ်မိုဝ်းသွင်ၶွၼ်မၼ်း တဝ်ႉလုၵ်ႉၶိုၼ်ႈမႃးသေ ၸုၵ်းမႃးလႆႈယဝ်ႉၵေႃႈ တႃႇတေပႆၵႂႃႇၼၼ်ႉတႄႉယင်းတိုၵ်ႉယၢပ်ႇယူႇ၊ ၸိုၼ်ႈၶိူဝ်း ဢၼ်မိူၼ်ၵူၼ်းၸႂ်ႁၢႆႉၼၼ်ႉ ၸင်ႇႁူၼ်လင်ၶိုၼ်းမႃး ယိပ်းဢဝ်ၶႅၼ်သွင်ၶႅၼ်လိုၼ်းၼုမ်ႇ ၸွႆႈႁွင်းႁပ်ႉတူဝ်ဝႆႉယဝ်ႉ ဢဝ်တူဝ်လိုၼ်းၼုမ်ႇၼၼ်ႉ သမ်ႉပေႃးၶႅင်လူင်မႃးၵမ်းလဵဝ်ယဝ်ႉ။
“တေႁဵတ်းသင်ၶႃႈ..”
“ၸွင်ႇပႆလႆႈယူႇႁႃႉ..ပေႃးပႆဢမ်ႇလႆႈၵေႃႈ ဢုမ်ႈၵႂႃႇလႆႈယူႇၼႃ..”
ယူႇယူႇမႃးလၢတ်ႈၸိူင်ႉၼႆ လိုၼ်းၼုမ်ႇၵေႃႈ သမ်ႉပေႃးၶႂ်ႈယူႇယၢပ်ႇမႃးယဝ်ႉ ၼႅတ်ႈထဵင်ၵႂႃႇၶိုၼ်းၵမ်းလဵဝ်
“ဢေႃႈပႆလႆႈယူႇၶႃႈ..”
ၸိုၼ်ႈၶိူဝ်းၵေႃႈ ဢွၼ်ဢဝ်လိုၼ်းၼုမ်ႇၼၼ်ႉပႆၵႂႃႇလွႆးလွႆးယူႇ၊ လိုၼ်းၼုမ်ႇၵေႃႈ ႁဵတ်းတူဝ်ပေႃးဢမ်ႇထုၵ်ႇယဝ်ႉ ဢမ်ႇတွၼ်ႉယၢမ်ႈမီးၽူႈၸၢႆးၵေႃႉလႂ် ၶဝ်ႈၸမ်တူဝ်မၼ်းထိုင်တၢၼ်ႇၼႆႉသေပွၵ်ႈလူး ဢၢႆႁွမ်ၸၢင်ၸၢင်တီႈတူဝ်ၶဝ်ၼၼ်ႉ ဢမ်ႇလႆႈသုတ်ႇၼူမ်ၵေႃႈ သမ်ႉပေႃးၺိၼ်းထိုင်ၼႂ်းၶူႈၼင်ယဝ်ႉ၊ သဵင်ထူၺ်ႈၸႂ်ၶဝ်ၼၼ်ႉၵေႃႈ လႆႈငိၼ်းလင်မေႃးယူႇၼႂ်းႁူ လႄႈ သဵင်တွတ်ႇႁူဝ်ၸႂ်မၼ်းၼၼ်ႉၵေႃႈ တွတ်ႇလင်လိူဝ်ႁႅင်း ၼင်ႇဢမ်ႇယၢမ်ႈပဵၼ်မႃးသေပွၵ်ႈၼၼ်ႉယဝ်ႉ။ ဢမ်ႇတၼ်းႁူႉသင် ၸိုၼ်ႈၶိူဝ်းပေႃးဢွၼ်ဢဝ်မၼ်းပႆၵႂႃႇ ႁွတ်ႈထိုင်တင်ႇၼင်ႈဢၼ်မီးၽၢႆႇၼႃႈၶႃၼၼ်ႉယဝ်ႉ။
“ၼင်ႈပႂ်ႉႁဝ်းဝႆႉတီႈၼႆႈၵမ်ႉလႄႈၼႃႈ”
မၼ်းၸင်ႇၼႅတ်ႈလႅၼ်ႈၶဝ်ႈၵႂႃႇတီႈၼႂ်းလၢၼ်ႉၶဝ်သေ လိုၼ်းၼုမ်ႇၵေႃႈ ဢမ်ႇၸၢင်ႈၵႂႃႇလႆႈလႄႈ ၵႃႈလႆႈၼင်ႈပႂ်ႉၵႂႃႇႁဵတ်းၼၼ်ၵူၺ်း။ ႁိုင်ယူႇဢိတ်းၼိုင်ႈ ၸိုၼ်ႈၶိူဝ်းလႅၼ်ႈလူင်ဢွၵ်ႇမႃး ပႃးတင်းထူင်ယႃ လႄႈ ၸွၵ်းၼမ်ႉၶႅင်ဢၼ်ၼိုင်ႈယဝ်ႉ တမ်းဝႆႉယဝ်ႉ ၵူမ်ႈထွတ်ႇသွၵ်းတိၼ်လိုၼ်းၼုမ်ႇဢွၵ်ႇပၼ်ယူႇ ဢဝ်လိုၼ်းၼုမ်ႇတူၵ်းၸႂ်သေ
“ႁဝ်းထွတ်ႇႁင်းၵူၺ်းလႆႈယူႇၶႃႈ!..”
“ယူႇၼိမ်ၼိမ်လႄႈ…”
ထွတ်ႇဢွၵ်ႇသွၵ်းတိၼ်လိုၼ်းၼုမ်ႇယဝ်ႉၵေႃႈ ဢဝ်ၸွၵ်းၼမ်ႉၶႅင်ၼၼ်ႉ တမ်းသႂ်ၼိူဝ်ၶေႃႈတိၼ်လိုၼ်းၼုမ်ႇလွႆးလွႆး ၼင်ႇၸႂ်ယဵၼ်။ လွင်ႈႁဵတ်းသၢင်ႈၶဝ်ၼၼ်ႉ ႁၼ်လႆႈဝႃႈၶဝ်ပဵၼ်ၵူၼ်းသႂ်ႇၸႂ်တႄႉတႄႉလႄႈ ႁၼ်ယဝ်ႉၵေႃႈၼင်ႇႁၢင်ႈပေႃးဢုၼ်ႇၸႂ်လူင်မႃးၵမ်းလဵဝ်ယဝ်ႉ မိူၼ်ဝႃႈ ဢမ်ႇၸႂ်ႈၸိုၼ်ႈၶိူဝ်းၵေႃႉလဵဝ်ၵၼ်တင်း ဢၼ်ႁၼ်ၵူႈဝၼ်းၼၼ်ႉသေဢိတ်း သၢႆတႃလိုၼ်းၼုမ်ႇၵေႃႈ တူၺ်းၸွမ်းလွင်ႈႁဵတ်းသၢင်ႈၶဝ် ၵူႈၶၵ်ႉၵူႈတွၼ်ႈယူႇ။
တႄႇၸဵမ်မိူဝ်ႈႁူႉၸၵ်းၶဝ်မႃး လိုၼ်းၼုမ်ႇ ယင်းဢမ်ႇတွၼ်ႉတူၺ်းၼႃႈၶဝ်လီလီသေပွၵ်ႈ ပွၵ်ႈၼႆႉပဵၼ်ပွၵ်ႈဢွၼ်တၢင်းသုတ်း ဢၼ်လႆႈတူၺ်းၼႃႈၶဝ်ၸိူင်ႉၼႆ သမ်ႉဝႃႈ မိူင်းၶမ်ႈယဝ်ႉသေတႃႉ မၼ်းႁၼ်လႆႈၸႅင်ႈလီၼႃႇ ၶူၼ်တႃလမ်ၼႃ ၶဝ်ႈႁႃၸူႉၵၼ် မွႆတႃလမ်ယၢဝ်း ၵွင်းၶူႈၼင်ၵူင်း ပိၵ်ႇသူပ်းမၢင်ဢိတ်းဢီႈ ၼႃႈလုပ်ႇ မိူဝ်ႈၶဝ်ဝၢႆႇၶၢင်ႈၸူးၼၼ်ႉ ႁၼ်လႆႈၵၢင်းသဵမ်ႈသဵမ်ႈ တူၺ်းလူင်းထိုင်ၶေႃး မီးၶေႃးႁွႆပႅၼ်ဢွၵ်ႇမႃးဢိတ်းၼိုင်ႈ ယိုင်ႈတူၺ်းယိုင်ႈၸၼ်ၸႂ် ႁၢမ်ႈၸႂ်တေဢၢမ်းဢမ်ႇလႆႈဝႃႈ ၵူၼ်းဢႃႇယုၶဝ်ႈၼႂ်းသၢမ်သိပ်းယဝ်ႉသေတႃႉ မၼ်းမီးမွၵ်ႇၼႃႈၼႃႇ ၸၼ်ဢဝ်ႁူဝ်ၸႂ်လိုၼ်းၼုမ်ႇပေႃးဢမ်ႇၼိမ်လႆႈ မၼ်းတွတ်ႇလင်ႁႅင်းလိူဝ် ထိုင်တီႈပေႃးလႆႈဢဝ်မိုဝ်းမႃးထိင်းဝႆႉ တီႈဢူၵ်းႁူဝ်ၸႂ်ၽၢႆႇသၢႆႉ ၼၼ်ႉယဝ်ႉ။
လိုၼ်းၼုမ်ႇၵုမ်ႇမိုင်ႉတူၺ်းၸွမ်းတၢင်းလဝ်း ၸိုၼ်ႈၶိူဝ်းယူႇၼၼ်ႉၵူၺ်း ဢမ်ႇတၼ်းတူၺ်းဝႃႈ ၸိုၼ်ႈၶိူဝ်းႁဵတ်းသင်ပၼ်တီႈတိၼ်မၼ်း ယူႇယူႇၵေႃႈ ႁႂ်ႈမၼ်းၸုၵ်းတူၺ်းသေ မိူဝ်ႈဢၼ်မၼ်းလုၵ်ႉၸုၵ်းတူၺ်းၼၼ်ႉ လႆႈႁၼ်မီးၽႅၼ်ႇယိုတ်ႈၶဵၼ်းဝႆႉလႄႈ တိၼ်ဢၼ်တမ်းယူႇၼိူဝ်ပိုၼ်ႉၼၼ်ႉၵေႃႈ ဢမ်ႇလႆႈၸဵပ်းသင်ယဝ်ႉသေ ဢဝ်မၼ်းပေႃးတူၵ်းၸႂ်မႃးယူႇ။
“ဢမ်ႇၸဵပ်းယဝ်ႉၶႃႈ!” ၸူမ်းသိူဝ်းၼႃႇထိုင်တီႈ သမ်ႉပေႃးယုမ်ႉၵႂၢင်ႈဢွၵ်ႇမႃး ၸၼ်ဢဝ်သၢႆတႃ ၸိုၼ်ႈၶိူဝ်းၼၼ်ႉ ပေႃးမိူၼ်မိုင်တူၺ်းယူႇၵႅပ်ႉၼိုင်ႈယဝ်ႉ။
လိုၼ်းၼုမ်ႇၵေႃႈ မႄးသႂ်ႇသွၵ်းတိၼ်မၼ်းလီလီယဝ်ႉသေ လုၵ်ႉၸုၵ်းတေႃႇၼႃႈၸိုၼ်ႈၶိူဝ်းယဝ်ႉၵေႃႈ “ယိၼ်းၸူမ်းတႄႉယဝ်ႉၶႃႈ.. ”
“ဢေႃႈ.. ဢိုမ်ႈ!”
သဵင်သွင်ၶႃယဵၼ်ၵႂႃႇၵႅပ်ႉၼိုင်ႈ မိူၼ်ဢမ်ႇၸၢင်ႈလၢတ်ႈသင်တေႃႇၵၼ်ယဝ်ႉလႄႈ လိုၼ်းၼုမ်ႇၵေႃႈ
“ပေႃးၼၼ်.. တေယွၼ်းမိူဝ်းၵွၼ်ႇယဝ်ႉၶႃႈ”
“ၶမ်ႈယဝ်ႉ!.. ႁဝ်းတေမိူဝ်းသူင်ႇ..”
လိုၼ်းၼုမ်ႇယင်းဢမ်ႇပႆႇတၼ်းတွပ်ႇၶိုၼ်း မၼ်းသမ်ႉပေႃးၵႂႃႇဢဝ်လူတ်ႉမၼ်းမႃးယဝ်ႉ။ တီႈၼႂ်းလူတ်ႉဢၼ်တဵတ်ႇယဵၼ်ႁႅင်းၼႃႇၼၼ်ႉ လိုၼ်းၼုမ်ႇၵေႃႈ ယိုင်ႈယူႇယိုင်ႈၸႂ်ဢမ်ႇပေႃးၶႂ်ႈလီမႃးယဝ်ႉ ပေႃးမႃးဝူၼ်ႉတူၺ်း လွင်ႈႁဵတ်းသၢင်ႈၸိုၼ်ႈၶိူဝ်းၸိူဝ်းၼၼ်ႉ မၼ်းလၢၵ်ႇလၢႆးၼႃႇသေ ႁဵတ်းႁႂ်ႈမၼ်းပႅၵ်ႇပိူင်ႈၸႂ်မႃးမိူၼ်ၵၼ် ယူႇယူႇၵေႃႈ ဝူၼ်ႉထိုင်လွင်ႈဢၼ်ၸိုၼ်ႈၶိူဝ်း တေႁဵတ်းလွင်ႈဢမ်ႇလီတင်းၼမ်တင်းလၢႆ ဢွၵ်ႇမႃးၼႂ်းပၢႆးဝူၼ်ႉမၼ်းယဝ်ႉ။
“တေလႆႈမိူဝ်းသူင်ႇတီႈလႂ် သူယင်းဢမ်ႇပႆႇလၢတ်ႈၼႄသဵၼ်ႈတၢင်းႁဝ်း”
လိုၼ်းၼုမ်ႇၸင်ႇတေမီးသတိမႃးၶိုၼ်းသေ လၢတ်ႈၼႄသဵၼ်ႈတၢင်းၸိုၼ်ႈၶိူဝ်းၵႂႃႇယူႇ။
ၶၢဝ်းတၢင်းၼင်ႈလူတ်ႉၸွမ်းၵၼ်မိူဝ်း လိုၼ်းၼုမ်ႇၵေႃႈႁိုဝ်ႁတ်းတၵ်းသဵင်သင် သဵင်မၼ်းယဵၼ်ၼႃႇ ဢဝ်မၼ်းသမ်ႉပေႃးၼွၼ်းလပ်းၵႂႃႇပႅတ်ႈယဝ်ႉ၊ မိူၼ်ဝႃႈ တေႁွတ်ႈထိုင်တီႈဢၼ်လိုၼ်းၼုမ်ႇလၢတ်ႈၼႄယဝ်ႉၼႆၵေႃႈ ၸိုၼ်ႈၶိူဝ်းၵိုတ်းလူတ်ႉမၼ်းသေ ဢၢၼ်းထၢမ်ႁႂ်ႈယုမ်ႇၸႂ်ၼႆယူႇ ၵူၺ်းၵႃႈ ႁၼ်လိုၼ်းၼုမ်ႇၼွၼ်းလပ်းၸိူင်ႉၼၼ် တေဢၢၼ်းႁွင်ႉၼႆသေတႃႉ ၵူၺ်းသမ်ႉမိူၼ်မၼ်းလႅပ်ႈၶႂ်ႈၼွၼ်းၼႃႇၼႆလႄႈ ပွႆႇဝႆႉႁဵတ်းၼၼ်ၵႂႃႇယူႇ။ မိူဝ်ႈႁၼ်လိုၼ်းၼုမ်ႇ ဢၼ်ၼွၼ်းလပ်းယူႇၼၼ်ႉ တေတူၺ်းၶၢမ်ႈဢမ်ႇလႆႈ ၼႃႈမူၼ်းမူၼ်းဢွၼ်ႇမိူၼ်ႁူၺ်ႇၶႆႇ ၶူၼ်တႃလမ်မွင်ႉ မွႆတႃယၢဝ်းယၢဝ်း ၶူႈၼင်ပဵၼ်သၼ်ပဵၼ်ၵွင်းလီ သီႇသူပ်းၶွင်ႇမၢင်မၢင် ၽိဝ်ၼိူဝ်ႉၼင်ဢူၼ်ႈၼူၼ်းၶၢဝ်ပွတ်ႇ ဢမ်ႇလႆႈတႃးမုၼ်ႈတႃးၽွင်းသင် တၢင်းႁၢင်ႈလီဢၼ်ပဵၼ်သၽႃႇဝၼၼ်ႉ ၸၼ်ႁႂ်ႈႁူဝ်ၸႂ်ၵူၼ်းဢမ်ႇသူၼ်ၸႂ်ၽူႈယိင်း ၸိူင်ႉၼင်ႇၸိုၼ်ႈၶိူဝ်း ပေႃးသၼ်ႇဝႆၶွၼ်းၸွမ်းယဝ်ႉ။
မိူဝ်ႈဢၼ်လိုၼ်းၼုမ်ႇတူင်ႉတူဝ်မႃးၼႆၵေႃႈ လႆႈသတိမႃးသေ ဝိၼ်ႇၼႃႈမၼ်းပႅတ်ႈယဝ်ႉ လၢတ်ႈယူႇႁင်းၵူၺ်းမၼ်း “တၼ်းပဵၼ်သင်ၵႂႃႇယဝ်ႉလႃႇၼႆႉ”
လိုၼ်းၼုမ်ႇငိၼ်းသဵင်မၼ်းယဝ်ႉၵေႃႈ သီႁူသီတႃ တူၺ်းၸူးမၼ်းသေ
“မီးလွင်ႈသင်ၶႃႈ!..”
မၼ်းၵေႃႈဝၢႆႇၼႃႈတူၺ်းလိုၼ်းၼုမ်ႇၶိုၼ်းယဝ်ႉ
“တိုၼ်ႇယဝ်ႉႁႃႉ!.. ၸွင်ႇၸႂ်ႈတီႈၼႆႈႁိုဝ်”
လိုၼ်းၼုမ်ႇငွၵ်ႈတူၺ်းတၢင်းၼွၵ်ႈလူတ်ႉၼၼ်ႉ ၵိုတ်းဝႆႉယူႇၼႃႈႁူင်းႁဵၼ်းဢဝ်လီလီယဝ်ႉၵေႃႈ
“ၸႂ်ႈယဝ်ႉၶႃႈ…” လိုၼ်းၼုမ်ႇလူင်းလူတ်ႉလူင်းၵႂႃႇ ငွၵ်ႈတူၺ်းမၼ်းတီႈၽၵ်းတူလူတ်ႉၼၼ်ႉယဝ်ႉ
“ယိၼ်းၸူမ်းယဝ်ႉၶႃႈ တွၼ်ႈတႃႇဝၼ်းမိူဝ်ႈၼႆႉ”
ၸိုၼ်ႈၶိူဝ်းၵေႃႈ ပိၵ်ႉမၢၼ်ႇလူတ်ႉမၼ်း မိူၼ်ဢမ်ႇလႆႈသႂ်ႇၸႂ်သင်ယဝ်ႉ ၶပ်းလူတ်ႉဢွၵ်ႇၵႂႃႇပႅတ်ႈယူႇ။
လႅင်းဢွၼ်ႇဢၼ်ပႂ်ႉတူၺ်းလိုၼ်းၼုမ်ႇယူႇၼၼ်ႉ မိူဝ်ႈငိၼ်းသဵင်လူတ်ႉမေႃးမႃးၼႆၵေႃႈ လႅၼ်ႈဢွၵ်ႇႁိူၼ်းမႃးတူၺ်းယဝ်ႉ သႅင်ႁိူၼ်းၼုမ်ႇၵေႃႈဢွၵ်ႇမႃးတူၺ်းၸွမ်းမိူၼ်ၵၼ် ၵူၺ်းသမ်ႉႁၼ်လူတ်ႉၵိုတ်းယူႇတၢင်းႁိုင် ဢမ်ႇဢွၵ်ႇမႃးၼႆၵေႃႈ လႅပ်ႈဢမ်ႇၸႂ်ႈၼႆလႄႈ ၶဝ်ႈႁိူၼ်းမိူဝ်းၵႂႃႇ။ ယူႇယူႇၵေႃႈ သႅင်ႁိူၼ်းၼုမ်ႇသမ်ႉ လႆႈႁၼ် ၺႃးလိုၼ်းၼုမ်ႇဢွၵ်ႇၼႂ်းလူတ်ႉလမ်းၼၼ်ႉမႃးၵူၺ်းလႄႈ ၼႅတ်ႈဢွၵ်ႇမႃးပႂ်ႉႁပ်ႉၼႃႈႁိူၼ်းၵမ်းလဵဝ် မွင်းလိုၼ်းၼုမ်ႇၶဝ်ႈၼႂ်းဝၢင်းႁိူၼ်းၵူၺ်း သၢႆတႃလီၵူဝ်တူၺ်းၸူးလိုၼ်းၼုမ်ႇ
“ၽႂ်မႃးသူင်ႇလႃႇ! ”
“ၸဝ်ႈၶွင်လၢၼ်ႉႁဝ်းၼၼ်ႉၼႃႇ!..”
“ၸဝ်ႈၶွင်လၢၼ်ႉၵေႃႉလႂ်!”
“ၸိုၼ်ႈၶိူဝ်းၼၼ်ႉၼႃႇ”
ယွၼ်ႉၸိုၼ်ႈၶိူဝ်းၵႆႉမႃးတီႈလၢၼ်ႉၼႃႇလႄႈ လိုၼ်းၼုမ်ႇၵေႃႈဢမ်ႇႁူႉဝႃႈတေလႆႈႁွင်ႉၶဝ်ၸိူင်ႉႁိုဝ် ႁွင်ႉၸွမ်းတိုၼ်းႁၢၼ်ၵႂႃႇဝႃႈပဵၼ်ၸဝ်ႈၶွင်လၢၼ်ႉၼႆယဝ်ႉ။
“ပဵၼ်ထိုင်ၸဝ်ႈၶွင်လၢၼ်ႉ.. ဢွၵ်ႇၼႃႈသေ မႃးသူင်ႇလုၵ်ႈၼွင်ႉထိုင်ၼႃႈႁိူၼ်းၸိူင်ႉၼႆ မၼ်းဢမ်ႇပႅၵ်ႇႁႃႉ ဢမ်ႇၸႂ်ႈဝႃႈ သူမီးသင်တေလၢတ်ႈၼႄႁဝ်းၽွင်ႈႁိုဝ်”
လိုၼ်းၼုမ်ႇဢၼ်ဢမ်ႇပေႃးပွင်ႇၸႂ်ၵႃႈႁိုဝ်ၼၼ်ႉၵေႃႈ ထၢမ်ၸူးယူႇ
“လွင်ႈသင်လႃႇ ႁၼ်ၼႃႈႁဝ်းယဝ်ႉၵေႃႈ မႃးထၢမ်ႁဝ်း ပေႃးတၢၼ်ႇႁဝ်းႁဵတ်းၽိတ်းသေလွင်ႈလွင်ႈမႃးယဝ်ႉ”
“သူႁဵတ်းႁႂ်ႈလႅင်းဢွၼ်ႇၽိတ်းပိူင်ႈၼၼ်ႉၼႃႇ မႃးႁွတ်ႈၸဵမ်မိူဝ်ႈၵႆႈ ၶဝ်ထၢင်ႇဝႃႈပဵၼ်သူ.. ၵၢၼ်ႉၼင်ႈသေပႂ်ႉတူၺ်းဝႃႈ ၸွင်ႇသူတေဢွၵ်ႇလူတ်ႉမႃး မၼ်းထၢင်ႇဢမ်ႇၸႂ်ႈသူလႄႈ မိူဝ်ႈလဵဝ်ၵေႃႈၶဝ်ႈမိူဝ်းၼွၼ်းလပ်းၵႂႃႇယဝ်ႉ”
“ႁႃ!! မႃးႁွတ်ႈၸဵမ်မိူဝ်ႈၵႆႈႁႃႉ! ပဵၼ်သင်ၶဝ်ဢမ်ႇႁွင်ႉႁဝ်းလႃႇ ပႅၵ်ႇပိူင်ႈတေႉယဝ်ႉ”
မိူဝ်ႈႁူႉၸိူင်ႉၼၼ်ယဝ်ႉ ယိုင်ႈၶႅၼ်းႁဵတ်းႁႂ်ႈမၼ်းပႅၵ်ႇပိူင်ႈၸႂ်မႃးထႅင်ႈ။
“ၶႂ်ႈဝႃႈသူသွင်ၵေႃႉပဵၼ်သင်ၵၼ်တေႉလႃႇ”
လိုၼ်းၼုမ်ႇၵေႃႈ ဢမ်ႇတၼ်းထွမ်ႇဢၼ်သႅင်ႁိူၼ်းၼုမ်ႇလၢတ်ႈ ၵူၺ်းၵုမ်ႇလၢတ်ႈဢွၵ်ႇမႃးဢၼ်မၼ်းဝူၼ်ႉၼၼ်ႉၵူၺ်းလႄႈ
“ႁဝ်းဝႃႈ ၶဝ်ႁဵတ်းသၢင်ႈပႅၵ်ႇပိူင်ႈတေႉယဝ်ႉ ၵူႈဝၼ်းႁဝ်းလႄႈတင်းၶဝ် တူၺ်းၼႃႈၵၼ်ဢမ်ႇလႆႈသေဢိတ်းလူးၵွၼ်ႇ ၶဝ်တင်းၸႂ်ႁၢႆႉၸႂ်လမ် ဢမ်ႇသူၼ်ၸႂ်ၽႂ် လၢတ်ႈၵႂၢမ်းၵေႃႈယႃႉၼမ်ႉၸႂ်ပိူၼ်ႈတေႉတေႉယဝ်ႉ လႅပ်ႈဢမ်ႇၸႂ်ႈၵူၼ်းဢူၼ်ႈဢွၼ်ႇသေဢိတ်း.. ၵူၺ်းၵႃႈမိူဝ်ႈၼႆႉသမ်ႉ မႃးႁဵတ်းလီတေႃႇႁဝ်းႁေ.. ဝူၼ်ႉယဝ်ႉၵေႃႈပႅၵ်ႇပိူင်ႈတေႉယဝ်ႉ.. သမ်ႉပၢႆထၢမ်မႃးသူင်ႇထႅင်ႈ.. ၼွၼ်းလပ်းၼိူဝ်ၵႃးမႃးၵေႃႈ ဢမ်ႇပူၵ်းၵၼ်ထႅင်ႈႁေ သူဝႃႈမၼ်းဢမ်ႇပိူင်ႈႁႃႉ…”
“ၸႂ်ႈၵေႃႉလဵဝ်ၵၼ်တင်းဢၼ်သူၵႆႉပွင်ႉၼႄၼၼ်ႉယူႇႁႃႉ”
“ဢိုမ်ႈ! ”
“ထွမ်ႇသူလၢတ်ႈယဝ်ႉၵေႃႈ ပႅၵ်ႇယူႇမိူၼ်ၵၼ် ပေႃးမႃးႁုပ်ႈတူၺ်းယဝ်ႉ မိူၼ်ၶဝ်တေၶဝ်ႈၸႂ်ၼိူဝ်သူယူႇၼၼ်ႉယဝ်ႉ”
“ၵူၼ်းၸင်းၽူႈယိင်းၸိူင်ႉၼင်ႇၶဝ်ၼၼ်ႉ မၼ်းပဵၼ်ၵႂႃႇဢမ်ႇလႆႈလေႃႇၼႃႈ..”
လိုၼ်းၼုမ်ႇၵေႃႈ ၸေးဢဝ်လႅင်းဢွၼ်ႇမိူဝ်းၵႂႃႇသေ မိူဝ်ႈဢၼ်ဝၢင်းတူဝ်ၶဝ်လူင်းတီႈၼွၼ်းၵႂႃႇၼၼ်ႉ ယၵ်ႉတူၺ်းၼႃႈလီႁၵ်ႉဢွၼ်ႇ လုၵ်ႈၸၢႆးမၼ်းသေယဝ်ႉ ၵိုင်ႉၵၢင်ႉဝူၼ်ႉႁၼ်ၼႃႈၸိုၼ်ႈၶိူဝ်းမႃးမီးယူႇၼႂ်းတႃၼၼ်ႉၵမ်းလဵဝ်၊ ပေႃးဢမ်ႇတင်ႈၸႂ်တူၺ်း မိူၼ်ဝႃႈလႅင်းဢွၼ်ႇလႄႈၸိုၼ်ႈၶိူဝ်းၼၼ်ႉ ၼႃႈငၢႆးငၢႆးၵၼ်မႃးယဝ်ႉလႄႈ
“ဝူၼ်ႉၼမ်ထိုင်တီႈတႃလၢႆးၵႂႃႇယဝ်ႉႁႃႉၼႆႉ” လၢတ်ႈဢွၵ်ႇမႃး ယႃႉတၢင်းဝူၼ်ႉမၼ်းၼၼ်ႉၵႂႃႇၶိုၼ်းယူႇ။
ၽွင်းၶၢဝ်းႁဵတ်းၵၢၼ်ယူႇၼၼ်ႉ ၵူၼ်းႁဵတ်းၵၢၼ်ၶဝ်ၵေႃႈ ဢွၼ်ၵၼ်လၢတ်ႈထိုင်လိုၼ်းၼုမ်ႇဝႃႈ လိုၼ်းၼုမ်ႇၼၼ်ႉ ပဵၼ်ၸူႉၵၼ်တင်း လုင်းဢွင်ႇသေ ၸင်ႇလႆႈၶိုၼ်ႈၸၼ်ႉဝႆးၼႆယူႇ ယွၼ်ႉလွင်ႈၼႆႉၵေႃႈ မီးလွင်ႈၶၢတ်ႈလၢမ်းလၢႆလွင်ႈလၢႆဢၼ်ဢွၵ်ႇမႃးယဝ်ႉ။
“ၵူၼ်းၼုမ်ႇၵူၼ်းႁၢင်ႈလီၸိူင်ႉၼင်ႇလိုၼ်းၼုမ်ႇၼၼ်ႉ တေမီးၽႂ်လႃႇဢမ်ႇလႆႈၸႂ်”
“ႁဝ်းငိၼ်းဝႃႈ ၶဝ်မီးလုၵ်ႈၸၢႆးၵေႃႉၼိုင်ႈၼႆ လႅပ်ႈတေၸႂ်ႈတေႉယူႇယူဝ်ႉပေႃးၼႆ”
“ဢမ်ႇႁူႉဝႃႈၶဝ်တေလႆႈၸႂ်ၵူၼ်းဢႃႇယုယႂ်ႇယဝ်ႉၼေႃ ”
“ဢႃႇယုမၼ်းလမ်ႇလွင်ႈတီႈလႂ် ပိူၼ်ႈတူၺ်းၵၼ်တီႈငိုၼ်းၶမ်းၵူၺ်းဢိူဝ်ႈ.. ဢမ်ႇႁၼ်ႁႃႉၶဝ်လႆႈၶိုၼ်ႈၸၼ်ႉဝႆးပေႃးတၢၼ်ႇၼၼ်ႉ”
“ၸႂ်ႈတေႉဢိူဝ်ႈၼေႃႈ”
လွင်ႈလိုၼ်းၼုမ်ႇလႄႈတၢင်း လုင်းဢွင်ႇၼၼ်ႉၵေႃႈ ပဵၼ်ၶၢဝ်ႇလိုဝ်းၵႂႃႇၼႂ်းဝူင်းၵႂၢင်ႈ ၵူၼ်းႁဵတ်းၵၢၼ်ၼၼ်ႉမႃးယဝ်ႉ။
“ႁဝ်းဢမ်ႇႁၼ်လီၼႃ.. ၸႂ်ႉၵူၼ်းတိုၵ်ႉႁႃမႃးႁဵတ်းၵၢၼ်ၵူၺ်း ၶိုၼ်ႈပဵၼ်ႁူဝ်ၼႃႈၼၼ်ႉ.. သမ်ႉဝႃႈတေပဵၼ်ၽႂ်ၵေႃႈယဝ်ႉ.. ပေႃးဝႃႈတေႉ ၶဝ်ၵေႃႈယင်းဢမ်ႇပႆႇႁူႉလွင်ႈၵၢၼ် တၢၼ်ႇႁဝ်းၸိူဝ်းၼႆႉၵွၼ်ႇယဝ်ႉ”
“ဢိူဝ်ႈ!.. ၼၼ်ႉယဝ်ႉ.. ႁူႉၵေႃႈဢမ်ႇပႆႇႁူႉလွင်ႈသင်တေႉတေႉ ၸႂ်ႉတၢင်းလတ်းသေၶိုၼ်ႈမႃးပဵၼ်ႁူဝ်ၼႃႈၼၼ်ႉ ႁဝ်းၵေႃႈဢမ်ႇယွမ်းႁပ်ႉလႆႈမိူၼ်ၵၼ်”
“ပေႃးဢဝ်ႁဝ်းတူၺ်းတႄႉ ၶဝ်ပဵၼ်ၵူၼ်းႁဵတ်းၵၢၼ်ၶႅၼ်ႇယူႇၼႃ မိူဝ်ႈပူၼ်ႉမႃးၸိူဝ်းၼၼ်ႉ ၶဝ်ၵေႃႈၸွႆႈၵႄႈၶႆပၼ်ႁႃလၢႆလၢႆလွင်ႈ ႁႂ်ႈပေႃးလီမႃးလႆႈ ဝၢႆးသေၼၼ်ႉ လၢၼ်ႉႁဝ်းၵေႃႈလႆႈဝႃႈပဵၼ်တီႈသူၼ်ၸႂ်တင်းၼမ်ၼၼ်ႉယဝ်ႉ ယူဝ်ပဵၼ်လွင်ႈၼႆႉသေ ၶဝ်ၸင်ႇလႆႈၶိုၼ်ႈၸၼ်ႉၵေႃႈပဵၼ်လႆႈ”
“မၼ်းၵေႃႈတေပဵၼ်လႆႈယူႇ”
“ပေႃးဝႃႈလွင်ႈၸိူင်ႉၼႆၵူၺ်းတႄႉ ၽႂ်ၽႂ်ၵေႃႈႁဵတ်းလႆႈယဝ်ႉ”
“ၵူၺ်းၵႃႈမၼ်းၵေႃႈဢမ်ႇမီးၽႂ်ႁဵတ်းလူး”
“ႁဵတ်းႁိုဝ်လႄႈဝႃႈဢမ်ႇမီး.. မိူဝ်ႈဢမ်ႇမီးၶဝ်ၵေႃႈ.. မိူၼ်ၼင်ႇၼွင်ႉလႅင်းၼၼ်ႉ.. ၸွႆႈၵႄႈၶႆပၼ်ႁႃမႃးယူႇတႃႇသေႇလူး သူဢမ်ႇႁၼ်ႁႃႉ သမ်ႉဝႃႈၶႅၵ်ႇတေၸႂ်လမ်ႁိုတ်းလႃႇၵေႃႈယဝ်ႉ မၼ်းၵေႃႈယင်းႁဵတ်းႁႂ်ႈၶႅၵ်ႇၶဝ်ၸႂ်လီမႃးလႆႈ.. ၶဝ်ၵေႃႈ.. ႁဵတ်းႁႂ်ႈမီးၶႅၵ်ႇမႃးၼႂ်းလၢၼ်ႉႁဝ်းလႆႈတင်းၼမ်ၼၼ်ႉယဝ်ႉ ဢမ်ႇႁၼ်ဝႃႈ ၽူႈၸတ်းၵၢၼ်ၶဝ်တေသူၼ်ၸႂ်မၼ်းသေဢိတ်း..”
“ပေႃးႁႂ်ႈႁဝ်းလိူၵ်ႈ ႁဝ်းလိူၵ်ႈၼွင်ႉလႅင်းဢဝ် ၶဝ်ၵေႃႈမႃးႁဵတ်းၵၢၼ်ႁိုင် ႁူႉလွင်ႈၵၢၼ်လီလိူဝ်သေၽႂ်ၼႂ်းၼႆႉလူးၵွၼ်ႇ..”
“ႁဝ်းၵေႃႈဝႃႈၼၼ်.. ”
ၵူၼ်းႁဵတ်းၵၢၼ်ၼႂ်းလၢၼ်ႉၼၼ်ႉၵေႃႈ တႄႇမီးလွင်ႈထဵင်ၵၼ်မႃး လႄႈ မီးလွင်ႈၸႅၵ်ႇၸတ်ႉၵၼ်မႃး ၼႂ်းၵႄႈၵၢင် ၵူၼ်းဢၼ်ႁၼ်လီလိုၼ်းၼုမ်ႇလႄႈ ဢၼ်ႁၼ်လီၼွင်ႉလႅင်း ၼႆယူႇယဝ်ႉ။
လိုၼ်းၼုမ်ႇၵေႃႈ မိူဝ်ႈၼႆႉ ဢမ်ႇလႆႈႁၼ်ၼွင်ႉဢွမ်မႃးႁဵတ်းၵၢၼ်ၼႆသေ လႆႈၵပ်းသိုပ်ႇၸူးၼွင်ႉဢွမ်ၵႂႃႇလႄႈ ၸင်ႇတေႁူႉဝႃႈ မၼ်းထုၵ်ႇလိုပ်ႈဢွၵ်ႇၵၢၼ်ၵႂႃႇယဝ်ႉ ၼႆယူႇ။ လွင်ႈဢၼ်ၼွင်ႉဢွမ်ထုၵ်ႇလိုပ်ႈဢွၵ်ႇၵၢၼ်ၼႆႉ မၼ်းဢမ်ႇလႆႈႁူႉလွင်ႈႁူႉတၢင်းသင်လႄႈ ႁဵတ်းႁႂ်ႈမၼ်းဢမ်ႇႁၢၼ်ႉၸႂ်မႃးတႄႉတႄႉယူႇ ၸင်ႇႁိပ်ႈၼႅတ်ႈၶဝ်ႈၵႂႃႇၼႂ်းႁွင်ႈၽူႈၸတ်းၵၢၼ် ဢၼ်မီး ၸိုၼ်ႈၶိူဝ်း လႄႈတင်း တိုၼ်းႁၢၼ်တိုၵ်ႉၼင်ႈဢုပ်ႇၵၼ်ယူႇသွင်ၵေႃႉၼၼ်ႉလႄႈ ဢဝ်မၼ်းၵိုတ်းမိုင်လူင်ၵႂႃႇယဝ်ႉ။
တွၼ်ႈႁူၵ်းသုတ်းၵႂႃႇယဝ်ႉလႄႈ သိုပ်ႇတူၺ်းထႅင်ႈတွၼ်ႈၸဵတ်းၶႃႈ။
ႁပ်ႉထွမ်ႇပၼ်ႁႅင်းလူၺ်ႈသဵင် တၢင်း YouTube ၵေႃႈလႆႈၶႃႈ။
