တွၼ်ႈၼိုင်ႈ
ၼႂ်းဝဵင်းလူင်ဢၼ်ၶိုၼ်ႈယႂ်ႇ၊ ႁိူၼ်းတိူၵ်ႈဢုတ်ႇၶပ်ႉယႆၸႅၼ်ႇ၊ သၢႆသဵၼ်ႈတၢင်းလူင် ဢၼ်ၵႂၢင်ႈယၢဝ်းၵႆ၊ လူတ်ႉဢွၼ်ႇလူတ်ႉလူင် လႅၼ်ႈၸွမ်းၼိူဝ်သဵၼ်ႈတၢင်းၼၼ်ႉ ပေႃးဢမ်ႇၶၢတ်ႇ ၸွမ်းၵၢတ်ႇၵေႃႈၵူၼ်းၵိုၼ်း ၸွမ်းႁၢၼ်ႉၶၢႆၶူဝ်းၶွင်ၵေႃႈၵူၼ်းၶွၼ်ႈ လူင်ဝႆႉယဝ်ႉ။
တီႈၼႂ်းလၢၼ်ႉၶဝ်ႈၽၵ်းဢၼ်ၵႂၢင်ႈယႂ်ႇ တီႈၵိၼ်ၶဝ်ႈ ၼႂ်းလၢၼ်ႉၼၼ်ႉ ၵူၼ်းၼမ်သမ်ႉပေႃးသုၵ်ႉသၵ်ႉလူင်ဝႆႉ လိူဝ်ၼၼ်ႉ ႁွင်ႈၵိၼ်ၶဝ်ႈ ဢၼ်မီးလၢၼ်ႉၼၼ်ႉၵေႃႈ မီးၵူၼ်းမၢႆဝႆႉ ႁွင်ႈမၼ်းသမ်ႉပေႃးဢမ်ႇၶႂ်ႈပေႃး တႃႇၵူၼ်းမႃးမၢႆဝႆႉၼၼ်ႉယဝ်ႉ၊ ႁွင်ႈၵိၼ်ၶဝ်ႈၼႂ်းလၢၼ်ႉၼႆႉ ၵမ်ႈၼမ်ၵေႃႈ တေပဵၼ်ၵူၼ်းႁဵတ်းၵၢၼ်ပဵၼ်ၸုမ်း၊ ၵူၼ်းႁဵတ်းၵၢၼ်ယႂ်ႇ၊ ၵူၼ်းၵိၼ်လဵင်ႉၵၼ် ၸိူဝ်းၼႆႉ ၸႂ်ႉတိုဝ်းယဝ်ႉ။
လိုၼ်းၼုမ်ႇၵေႃႈ ၸွမ်းလူၺ်ႈပဵၼ်ၵူၼ်းႁဵတ်းၵၢၼ်ၼႂ်းလၢၼ်ႉၼႆႉလႄႈ လႆႈဝႃႈၵၢၼ်မၼ်းၼၼ်ႉ သုၵ်ႉသၵ်ႉဝႆႉမိူၼ်ၵၼ်။ မၼ်းၸင်ႇလႆႈဢဝ်ၶဝ်ႈၽၵ်း ၶဝ်ႈၵႂႃႇတမ်းပၼ်ၼႂ်းႁွင်ႈ ၵူၼ်းလမ်ႇလွင်ႈၼၼ်ႉႁွင်ႈၼိုင်ႈသေ မိူဝ်ႈၽုၺ်ႇၽၵ်းတူၶဝ်ႈၵႂႃႇ မီးၽူႈၸၢႆးလၢႆလၢႆ ၼင်ႈသမ်ႉပေႃးတဵမ်ၽိူၼ်လူင်ဝႆႉ၊ ၸွမ်းၼင်ႇပုၼ်ႈၽွၼ်းမီးၼၼ်ႉ လႆႈဢဝ်ဝၢၼ်ႇၽၵ်းၸိူဝ်းၼၼ်ႉ တမ်းပၼ်ယဝ်ႉ၊ မိူဝ်ႈတမ်းယဝ်ႉဢၢင်ႈတေဢွၵ်ႇၵႂႃႇၼၼ်ႉ ၸင်ႇသမ်ႉမီးၽူႈၸၢႆး ဢၼ်ၶႂ်ႈႁၢမ်ႉၶၢဝ်ႉဝႆႉဢိတ်းၼိုင်ႈ ၶုၼ်ႇၸၼ်ႁၢဝ်ႉဢဝ်ၶေႃႈမိုဝ်းမၼ်းဝႆႉယူႇ။
“ယူႇၸွမ်းပီႈၶဝ်ၵွၼ်ႇလႄႈၼွင်ႉသၢဝ်” ၵေႃႉၼႆႉၸိုဝ်ႈႁွင်ႉလုင်းသၢင်ႇလႃႉ။
လိုၼ်းၼုမ်ႇ ၶတ်းၸႂ်ဢဝ်မိုဝ်းၼၼ်ႉဢွၵ်ႇပႅတ်ႈ လူၺ်ႈဢမ်ႇႁတ်းပၼ်ဢွၵ်ႇသဵင် ၵူၺ်းၵႃႈ ၵမ်ဝႆႉၼႅၼ်ႈၼႃႇ မိုဝ်းၶွၼ်လဵဝ်ဢၼ်ၶတ်းၸႂ်ၽိုတ်ႉယူႇၼၼ်ႉ ဢမ်ႇပေႉႁႅင်းလႆႈ၊ ပေႃးတေလၢတ်ႈသိုဝ်ႈသိုဝ်ႈ သမ်ႉပဵၼ်ၶႅၵ်ႇဢၼ်လမ်ႇလွင်ႈ လႄႈ ၵူဝ်တေၸၢင်ႈတုမ်ႉတိူဝ်ႉထိုင်ပႃး ၼႃႈၵၢၼ်မၼ်းလႆႈၼႆသေ သမ်ႉဝႃႈၸႂ်လမ် ၶႂ်ႈထိပ်ႇပိတ်ႉပၼ်ၵူၼ်းၵေႃႉၼၼ်ႉ ၵမ်းၼိုင်ႈၼႆၵေႃႈ လႆႈတၢင်းဝူၼ်ႉဢဝ်ၵူၺ်း။
လိုၼ်းၼုမ်ႇဢၼ်မီးတူဝ်ၶိင်းလဵၵ်ႉသေး သီၼိူဝ်ႉၶၢဝ်ပွတ်ႇ ၼႃႈဢွၼ်ႇသဵမ်ႈသဵမ်ႈ သီႇသူပ်းၶွင်ႇသွင်ႁွင် ႁူၺ်ႇတႃလမ်လိူမ်ႈမူၼ်းလီ မွႆတႃဢွၼ်ႇၵေႃႈလမ်ယၢဝ်း ပဵၼ်သၢဝ်မွၵ်ႈသၢဝ်းပၢႆပၢႆၵူၺ်းၼၼ်ႉ ၽႂ်ႁၼ်ၵေႃႈၶႂ်ႈယၵ်ႉ ၶႂ်ႈတူင်ႉတၵ်ႉၶဝ်ႈၸမ် ယူႇယဝ်ႉလေႃႇ။
တီႈၽိူၼ်ၼၼ်ႉၵေႃႈ ဢမ်ႇၸႂ်ႈဝႃႈမီးၵူၼ်းၶၢဝ်ႉၵူၼ်းၵႄႇၵူၺ်းၼင်ႇၵဝ်ႇ ၵူၼ်းၼုမ်ႇႁၢင်ႈလဝ်းၵေႃႈမီးယူႇ မီးၽူႈၸၢႆးၵေႃႉၼိုင်ႈ ၼင်ႈၼိမ်ယဵၼ် လူၺ်ႈဢမ်ႇလႆႈသူၼ်ၸႂ်သင် သမ်ႉဝႃႈ ၵူၼ်းၸိူဝ်းၼၼ်ႉတေႁဵတ်းသင်ၵေႃႈ မၼ်းၵေႃႈဢမ်ႇလႆႈသူၼ်ၸႂ်သေ တူၺ်းၸွမ်းသေဢိတ်း မိူၼ်ဝႃႈ ၼႂ်းႁွင်ႈၼႆႉ ဢမ်ႇမီးမၼ်း ၼၼ်ႉယဝ်ႉ။
လိူဝ်သေၸၢႆးၵေႃႉၼၼ်ႉယဝ်ႉ ၵူၼ်းၼႂ်းႁွင်ႈၸိူဝ်းၼၼ်ႉတႄႉ ဢွၼ်ၵၼ်ယၵ်ႉတူၺ်းၸူး တီႈလိုၼ်းၼုမ်ႇၼၼ်ႉၵေႃႉလဵဝ် မိူၼ်ဝႃႈ တေၵိၼ်ၼိူဝ်ႉၵိၼ်လိူတ်ႈ လိုၼ်းၼုမ်ႇၵႂႃႇတၢင်းမူတ်း သမ်ႉပႃးတၢင်းသၢႆတႃမုင်ႈမွင်း ၶႂ်ႈႁႂ်ႈလိုၼ်းၼုမ်ႇၼင်ႈၸွမ်းၶဝ်ၼၼ်ႉယူႇ။
လုင်းထႅင်ႈၵေႃႉၼိုင်ႈၵေႃႈ လၢတ်ႈဝႃႈ
“ၼင်ႈၸွမ်းႁဝ်းၵွၼ်ႇလႄႈၼွင်ႉ တေၵႂႃႇငၢႆႈငၢႆႈၸိူင်ႉၼႆႉဢမ်ႇလီၼႃ သင်ႁဝ်းလၢတ်ႈတီႈ ၽူႈၸတ်းၵၢၼ်သူၼၼ်ႉၵူၺ်းၵေႃႈ သူထုၵ်ႇလိုပ်ႈဢွၵ်ႇၵၢၼ် ၵႂႃႇယဝ်ႉ”
ၵၢၼ်ငၢၼ်းဢၼ်ၼႆႉ လၢတ်ႈလႆႈဝႃႈပဵၼ်ၵၢၼ်ငၢၼ်းဢၼ်လီ လိူဝ်သေၵူႈတီႈ ၸိူဝ်းယၢမ်ႈႁဵတ်းမႃး တွၼ်ႈတႃႇလိုၼ်းၼုမ်ႇ ၼၼ်ႉၵေႃႈဝႃႈလႆႈယဝ်ႉ။ သမ်ႉဝႃႈတေပဵၼ်ၵူၼ်းတမ်းၶႅၵ်ႇၵူၺ်းသေတႃႉ မၢင်ပွၵ်ႈၵေႃႈ ယင်းလႆႈလဵပ်ႈႁဵၼ်းပႃး လၢႆးႁဵတ်းၶဝ်ႈၽၵ်းထႅင်ႈလူးၵွၼ်ႇ။ လိူဝ်ၼၼ်ႉ လႆႈၶဝ်ႈမႃးႁဵတ်းၵၢၼ် ဢမ်ႇပႆႇႁိုင် ပေႃးတေထုၵ်ႇလိုပ်ႈဢွၵ်ႇထႅင်ႈတႄႉ ၼႃႈၵၢၼ်တႃႇတေႁႃမႃးလႆႈ မိူၼ်ၼႆၼႆႉဢမ်ႇငၢႆႈငၢႆႈ၊ မၼ်းၵေႃႈ ဢမ်ႇၸၢင်ႈႁဵတ်းႁိုဝ် ၼင်ႇႁိုဝ် တေဢမ်ႇတုမ်ႉတိူဝ်ႉထိုင် သုၼ်ႇလႆႈတူဝ်ၵဝ်ႇလႄႈ ၵၢၼ်ငၢၼ်းၼၼ်ႉ ၶတ်းၸႂ် ယုမ်ႉၸူးၵူၼ်းၸိူဝ်းၼၼ်ႉသေ လၢတ်ႈၶေႃႈၵႂၢမ်းဢူၼ်ႈဢွၼ်ႇဝၢၼ်ႁူၵႂႃႇ။
“ယိၼ်းၸူမ်းယဝ်ႉၶႃႈ ဢၼ်ႁၼ်ထိုင်ဝႃႈၶႃႈမီးပုၼ်ႈၽွၼ်း ႁဵတ်းၵၢၼ်တီႈၼႂ်းလၢၼ်ႉၼႆႉယူႇ ၸွမ်းၼင်ႇပုၼ်ႈၽွၼ်းမီးၼၼ်ႉ ၶႃႈယင်းတိုၵ်ႉမီးၵၢၼ် တေလႆႈၵႂႃႇႁဵတ်းထႅင်ႈဢေႃႈ”
မၼ်းၵေႃႈၶတ်းၸႂ်ဢီးမိုဝ်း လုင်းသၢင်ႇလႃႉ ဢၼ်ဢၢၼ်းတၢဝ်းၶႅၼ်မၼ်း ၶိုၼ်ႈတိၵ်းတိၵ်းၼၼ်ႉဢွၵ်ႇၵႂႃႇပႅတ်ႈလႄႈ လုင်းသၢင်ႇလၼၼ်ႉၵေႃႈ မိူဝ်ႈထုၵ်ႇမိုဝ်းလိုၼ်းၼုမ်ႇ ဢီးဢွၵ်ႇပႅတ်ႈၼၼ်ႉ ၼႅတ်ႈၶိုၼ်ႈသဵင်ႁိုတ်းသႂ်ႇ လိုၼ်းၼုမ်ႇၵမ်းလဵဝ်။
“ပဵၼ်ၵူၼ်းႁဵတ်းၵၢၼ်ၸၼ်ႉတႅမ်ႇဢွၼ်ႇၵူၺ်း ႁတ်းထဵင်ၶိုၼ်း ၶႅၵ်ႇလမ်ႇလွင်ႈၸိူင်ႉၼႆႁႃႉ ၸွင်ႇႁူႉႁိုဝ် ၵဝ်ပဵၼ်ၽႂ် မိူဝ်ႈမႂ်းဢွၵ်ႇႁွင်ႈၵႂႃႇၼၼ်ႉ ၵဝ်ဢဝ်မႂ်းဢွၵ်ႇၵၢၼ်ၵေႃႈလႆႈၵွၼ်ႇဢိူဝ်ႈ”
သဵင်ၼၼ်ႉ လင်ၸီးထိုင်တီႈ လိုၼ်းၼုမ်ႇတေသိုပ်ႇၸႂ်ယဵၼ်ႉၵႂႃႇဢမ်ႇလႆႈယဝ်ႉ။ သၢႆတႃပၵ်းတူၺ်းၸူးတီႈၵူၼ်းၵေႃႉၼၼ်ႉသေ ဝူၼ်ႉၶႆႈၸႂ်ၵႂႃႇ “သမ်ႉဝႃႈတိုၵ်ႉၶဝ်ႈမႃးမႂ်ႇ ဢမ်ႇပႆႇႁူႉပိူင်ၵၢၼ်လီသေတႃႉၵေႃႈယဝ်ႉ သင်ၵူၼ်းၵေႃႉၼႆႉ မီးဢႃႇၼႃႇ ႁႂ်ႈထုၵ်ႇလိုပ်ႈဢွၵ်ႇၵၢၼ်လႆႈ လႄႈ ပေႃးဝႃႈၼႂ်းလၢၼ်ႉၼႆႉ ႁၼ်ထိုင်ၵူၼ်းၸိူင်ႉၼႆ ပဵၼ်ၶႅၵ်ႇလမ်ႇလွင်ႈသေ ႁဵတ်းၵၢၼ်ၸိူင်ႉၼႆပႃးၸိုင် ထုၵ်ႇလိုပ်ႈဢွၵ်ႇၵၢၼ်ၼၼ်ႉလီလိူဝ်ယဝ်ႉ”
ပိုတ်ႇလၢတ်ႈၶေႃႈၵႂၢမ်းဢွၵ်ႇၵႂႃႇၸူးၵူၼ်းၵေႃႉၼၼ်ႉ ၼင်ႇဢမ်ႇသူၼ်ၸႂ်သင်ၼၼ်ႉဝႃႈ−
“ပႅတ်ႈလၢႆ!” သၢႆတႃၶဝ်ၸိူဝ်းၼၼ်ႉ ဢွၼ်ယၵ်ႉတူၺ်းၸူးတီႈမၼ်း ႁူမ်ႈပႃးတၢင်းၵူၼ်းလဝ်းၵေႃႉၼၼ်ႉ မိူၼ်တေတူၵ်းၸႂ်သေတူၺ်းၼၼ်ႉယဝ်ႉ။ မိူဝ်ႈမၼ်းၶိုၼ်းႁူႉတူဝ်မႃးၵေႃႈ ယုမ်ႉၼင်ႇဢမ်ႇပေႃးတဵမ်ၸႂ်ၵႃႈႁိုဝ်သေ
“ဢေႃႈ ၶႃႈၶႂ်ႈဝႃႈ ၶဝ်ႈၽၵ်းၸိူဝ်းၼႆႉ ပေႃးဢမ်ႇၵိၼ်ၸွမ်းၵမ်းလဵဝ်သေ သင်မၼ်းၵတ်းၵႂႃႇ တေပႅတ်ႈလၢႆဢေႃႈ သင်ၵိၼ်မိူဝ်ႈမၼ်းဢုၼ်ႇဢုၼ်ႇၼႆ ဢႃႇရသႃႇမၼ်းတေပႅၵ်ႇပိူင်ႈၵၼ်တင်း ဢၼ်ၵတ်းၼၼ်ႉတႄႉတႄႉၶႃႈယဝ်ႉ ၶဝ်ႈၽၵ်းဢၼ်ႁဵတ်းမႃးတမ်းပၼ်ၼႂ်းဝၼ်းမိူဝ်ႈၼႆႉ ပဵၼ်ၶဝ်ႈၽၵ်းဢၼ် ဢၼ်ႁႃၵိၼ်လႆႈယၢပ်ႇတႄႉ ဢမ်ႇဝႃႈ ၶဝ်ႈၽၵ်းဢၼ်လႂ်ၵေႃႈ တိုၼ်းမီးဢရသႃႇ ပႅၵ်ႇပိူင်ႈလႄႈ မီးၼမ်ႉလႅမ်ႉဢၼ်ႁွမ်ဝၢၼ်တႄႉဢေႃႈ သင်ပဵၼ်ဢရသႃႇ ၶဝ်ႈၽၵ်းတႄႉတိုၼ်းဢမ်ႇယွမ်းၽႂ်ၶႃႈ မေႃႁုင်မိုဝ်ႉၵေႃႈ တိုၼ်းပဵၼ် ၵူၼ်းလူင်ႉလႅၼ်ႇ လၢႆလၢႆၼၼ်ႉၶႃႈယဝ်ႉ သင်ပဵၼ်ၵၢၼ်ႁပ်ႉတွၼ်ႈၵေႃႈ တေႁပ်ႉတွၼ်ႈၵႂႃႇၸွမ်းၼင်ႇ ပိူင်ၵၢၼ်လၢၼ်ႉမီးဝႆႉၼၼ်ႉ ၼင်ႇၵႃႈႁဵတ်းလႆႈၶႃႈ သင်လႆႈၸႂ်သၢဝ်မႃးၼင်ႈယူႇႁိမ်းၶၢင်ႈၼႆတႄႉ တေဢမ်ႇၸႂ်ႈ လၢၼ်ႉၶဝ်ႈၽၵ်းၼႆႉယဝ်ႉ ယုမ်ႇဝႃႈ ဝၼ်းမိူဝ်ႈၼႆႉ သူၸဝ်ႈတေလႆႈၵိၼ် ၶဝ်ႈၽၵ်းဢၼ် ဢရသႃႇဢမ်ႇမိူၼ်လၢၼ်ႉလႂ်ၼၼ်ႉၶႃႈယဝ်ႉ”
သၢႆတႃပၵ်းတူၺ်းၸူး လုင်းသၢင်ႇလႃႉၼၼ်ႉသေ ၸုၵ်းၼင်ႇမီးလွင်ႈယဵၼ်ႇငႄႈယဝ်ႉ
“ဝၼ်းမိူဝ်ႈၼႆႉ သင်ၶႃႈလႆႈႁဵတ်းလွင်ႈဢမ်ႇထုၵ်ႇမႅၼ်ႈ ဢမ်ႇမီးလွင်ႈယဵၼ်ႇငႄႈ ႁဵတ်းပူၼ်ႉလိူဝ်ၼိူဝ် ၵူၼ်းၵေႃႉဢၼ်ပဵၼ်ၽူႈယႂ်ႇၼႆၵေႃႈ ယွမ်းၼွမ်းယူႇၶႃႈ ”
ၵူမ်ႈတူဝ်ယွမ်းၼွမ်းၵႂႃႇၼင်ႇတဵမ်ၸႂ်ယဝ်ႉ သိုပ်ႇလၢတ်ႈထႅင်ႈ “ၼင်ႇႁိုဝ်တေလႆႈၵိၼ်ၶဝ်ႈ ၼင်ႇၵတ်းၵတ်းယဵၼ်ယဵၼ်ၵၼ်လႄႈ ႁႂ်ႈပေႃးပဵၼ်မူႇၶဝ်ႈ ဢၼ်ဢုပ်ႇဢူဝ်းၼႃႈၵၢၼ်ၵၼ် ၵႂႃႇလႆႈလီၼၼ်ႉ ၸင်ႇလႆႈလိူၵ်ႈမႃး ၸႂ်ႉတိုဝ်းႁွင်ႈၵိၼ်ၶဝ်ႈႁဝ်းၼႆႉလႄႈ ယုမ်ႇဝႃႈ ၼႃႈၵၢၼ်တႃငၢၼ်းၼႂ်းဝၼ်းမိူဝ်ႈၼႆႉ တေၵႂႃႇလႆႈလီယူႇၶႃႈ”
လႆႈဝႃႈ လိုၼ်းၼုမ်ႇၵေႃႈ ၵႄႈၵႂၢမ်းမၼ်းလႆႈဝႆးသေ ဢမ်ႇႁဵတ်းႁႂ်ႈပဵၼ်ပၼ်ႁႃမႃး ဢမ်ႇၵႃး ဝၢႆးသေလၢတ်ႈယဝ်ႉၵႂႃႇ မိူၼ်ဝႃႈ လုင်းသၢင်ႇလႃႉၼၼ်ႉ ဢၢႆတူဝ်ၵဝ်ႇမၼ်းမႃးၶိုၼ်းယူႇ ဢိတ်းၼိုင်ႈ သမ်ႉပေႃးဢမ်ႇႁတ်းယၵ်ႉတူၺ်း ၼႃႈလိုၼ်းၼုမ်ႇယဝ်ႉ ၵူၼ်းၸိူဝ်းၼၼ်ႉၵေႃႈ ဢွၼ်ၵၼ်ပၢႆႈသၢႆတႃလိုၼ်းၼုမ်ႇ ဢၼ်ယၵ်ႉတူၺ်းၸူးၶဝ်ၵႂႃႇၼၼ်ႉ ႁင်းၽႂ်ႁင်းမၼ်းယူႇ။
“ယုမ်ႇဝႃႈၶဝ်ႈၽၵ်းၼႂ်းဝၼ်းမိူဝ်ႈၼႆႉ တေထုၵ်ႇသူပ်းယူႇလႄႈ ပေႃးဝႃႈၶႂ်ႈသင်ႇထႅင်ႈၵေႃႈလၢတ်ႈလႆႈယူႇၶႃႈ”
“ပေႃးၵၼႆႉၵွၼ်ႇယဝ်ႉ” ၵူၼ်းၶၢဝ်ႉထႅင်ႈၵေႃႉၼိုင်ႈလၢတ်ႈၸူး။
လိုၼ်းၼုမ်ႇၵေႃႈ ဢွၵ်ႇႁွင်ႈၵိၼ်ၶဝ်ႈၶဝ်ၵႂႃႇယူႇ။
လွင်ႈႁဵတ်းသၢင်ႈလိုၼ်းၼုမ်ႇ ၼႂ်းဝၼ်းမိူဝ်ႈၼႆႉ ႁဵတ်းႁႂ်ႈၽူႈၸၢႆးၵေႃႉဢၼ် ဢမ်ႇလႆႈသူၼ်ၸႂ်သင်ၼၼ်ႉ သမ်ႉပေႃးလႆႈဢဝ်သၢႆတႃမၼ်း ပၵ်းတႃတူၺ်းၸွမ်း လိုၼ်းၼုမ်ႇဢၼ်ပႆဢွၵ်ႇၵႂႃႇၼၼ်ႉယူႇ၊ ယုမ်ႉဢွၵ်ႇမႃးသေ လၢတ်ႈ “ၵိၼ်ၶဝ်ႈၵၼ်လႆႈယဝ်ႉၶႃႈ ၵူဝ်ၶဝ်ႈၽၵ်းတေပႅတ်ႈလၢႆမူတ်း” မိူၼ်လၢတ်ႈၵိူဝ်ႉၵူၼ်းၸိူဝ်းၼၼ်ႉယဝ်ႉ။
လိုၼ်းၼုမ်ႇ ဢွၵ်ႇႁွင်ႈမႃးယဝ်ႉ သီၼႃႈမၼ်း ႁိုဝ်တေလီလႆႈ ဝူၼ်ႉထိုင်ၶိုၼ်း ၶေႃႈၵႂၢမ်းဢၼ်လႆႈလၢတ်ႈၼၼ်ႉ ၸႂ်သမ်ႉပေႃးဢမ်ႇလီမႃးၵမ်းလဵဝ်။ လိုၼ်းၼုမ်ႇၵေႃႈ မိူဝ်ႈတိုၵ်ႉၸုၵ်းတီႈႁပ်ႉတွၼ်ႈၶႅၵ်ႇ တင်းၵူၼ်းႁူမ်ႈၼႃႈၵၢၼ်မၼ်းယူႇၼၼ်ႉ လႆႈႁၼ်ၵူၼ်းၵေႃႉၼၼ်ႉ ပႆၽၢၼ်ႇပူၼ်ႉၶဝ်ယဝ်ႉ ဢွၵ်ႇၵႂႃႇယူႇ။
ၽူႈယိင်းၸိူဝ်းဢၼ်မီးၼႂ်းလၢၼ်ႉၼၼ်ႉၵေႃႈ ဢွၼ်ၵၼ်ဝၢႆႇ ယၵ်ႉမုင်ႈတူၺ်းၸွမ်းၶဝ် သမ်ႉပေႃးဢမ်ႇပၼ်ၽၢတ်ႇသၢႆတႃလႆႈယဝ်ႉ။ ယၢမ်းၼၼ်ႉ ၵူၼ်းႁူမ်ႈၼႃႈၵၢၼ်လိုၼ်းၼုမ်ႇၵေႃႉၼိုင်ႈ ၸိုဝ်ႈႁွင်ႉ လိူၼ်သႂ် ယၵ်ႉတူၺ်းၵႂႃႇၸွမ်း ၵူၼ်းၵေႃႉၼၼ်ႉသေ ယုမ်ႉယဝ်ႉလၢတ်ႈယူႇ
“သင်မႃးၵူႈဝၼ်းတႄႉ ႁဝ်းတေဢမ်ႇၶၢၼ်ႉႁဵတ်းၵၢၼ်ယဝ်ႉ ႁဵတ်းၵၢၼ်ၵေႃႈတေဢမ်ႇၵူၼ်ႉယဝ်ႉ ၸိူင်ႉၼႆတႄႉ”
“ယွင်ႇၽူႈၸၢႆးတေႉယဝ်ႉ ” ၽူႈယိင်းထႅင်ႈၵေႃႉၼိုင်ႈၶဝ်ႈမႃးၸူး ၼၼ်ႉတႄႉ ပဵၼ်ပီႈၸိင်ႇၼႆယဝ်ႉ။
“ဢိူဝ်ႈ လိုၼ်းၼုမ်ႇ မိူဝ်ႈၵႆႈ သူလႆႈၶဝ်ႈၵႂႃႇႁပ်ႉတမ်းပၼ် ၼႂ်းႁွင်ႈဢၼ်ၶဝ်ယူႇၼၼ်ႉဢမ်ႇၸႂ်ႈႁိုဝ်” လိူၼ်သႂ်ထၢမ်။
“ဢိုမ်ႈ!” မိူဝ်ႈလၢတ်ႈထိုင် လွင်ႈၼႂ်းႁွင်ႈၼၼ်ႉမႃးၵေႃႈ ၸႂ်မၼ်းပေႃးသၼ်ႇၵူဝ်လူင်မႃးၵမ်းလဵဝ်။
“ပဵၼ်ၸိူင်ႉႁိုဝ်လႃႇ လႆႈႁၼ်ၶဝ်ၸမ်ၸမ်ယဝ်ႉမိူၼ်ႁိုဝ်” လိူၼ်သႂ်ထၢမ်ၼင်ႇၶႂ်ႈႁူႉတေႉႁူႉဝႃႈၼၼ်ႉယဝ်ႉ။
ယၢမ်းၼၼ်ႉ ပီႈၸိင်ႇ ဢၼ်မီးတူဝ်ထူပ်းၼမ် ၵၢၼ်ၸွမ်းႁူႉၸွမ်းႁၼ်လွင်ႈပိူၼ်ႈၼၼ်ႉ ၶႂ်ႈမီးၼမ်ဝႆႉလႄႈ ဢဝ်ၶႃၵႂႃႇဢုပ်ႇတီႈဢၼ် ႁၢင်ႇၵႆၵူၼ်းဝႆႉသေ လၢတ်ႈၼႄၶႃၵႂႃႇ။
“ၵူၼ်းၵေႃႉၼႆႉ ပေႃးဝႄႈလႆႈၵေႃႈ ႁႂ်ႈဝႄႈလႃႈၼႃႈ ”
“ပဵၼ်သင်လႃႇ လဝ်းပေႃးတၢၼ်ႇၼႆႉ ယႃႇဝႃႈတေၶႂ်ႈဝႄႈလႃႈ ယင်းၶႅၼ်းၶႂ်ႈၶဝ်ႈၸမ်လူးၵွၼ်ႇယဝ်ႉ” လိူၼ်သႂ်လၢတ်ႈ။
“ၸွင်ႇယၢမ်ႈငိၼ်းၵူၼ်း ၸိုဝ်ႈႁွင်ႉၸိုၼ်ႈၶိူဝ်း ၼၼ်ႉႁႃႉ”
ႁဵတ်းမိူၼ်ဝူၼ်ႉတူၺ်းၵမ်ႉၼိုင်ႈယဝ်ႉ လိူၼ်သႂ်ၵေႃႈ မႄးလၢတ်ႈ
“ၵႆႉယၢမ်ႈငိၼ်းယူႇ ၵူၼ်းႁဵတ်းၵၢၼ်ၸိူဝ်းၼၼ်ႉ ၵႆႉလၢတ်ႈထိုင်ၶဝ်တႃႇသေႇယဝ်ႉ ၶဝ်ပဵၼ်ၵူၼ်းႁဵတ်းၵၢၼ်ၼႂ်းတူင်ႇဝူင်းပၢႆးမၢၵ်ႈမီး ဢၼ်ၵတ်ႉၶႅၼ်ႇလႅတ်းသႅဝ်းလႄႈ လႆႈဝႃႈပဵၼ်ၽူႈမၢၵ်ႈမီး ဢၼ်မၢၵ်ႈမီးယဝ်ႉမၢၵ်ႈမီး ၵေႃႉၼိုင်ႈ လိူဝ်သေၼၼ်ႉ ယင်းပဵၼ်ၽူႈၸၢႆးဢၼ်မီးၽၢင်ႁၢင်ႈလဝ်း ဢမ်ႇဝႃႈၽူႈယိင်းၵေႃႉလႂ် ၽႂ်ႁၼ်ၵေႃႈသမ်ႉပေႃးမဝ်းၸွမ်းႁၢင်ႈၽၢင်မၼ်းၼၼ်ႉယဝ်ႉ”
ပီႈၸိင်ႇၵေႃႈ ၼႅတ်ႈလၢတ်ႈၸိမ်ၵမ်းလဵဝ် “သမ်ႉဝႃႈႁၢင်ႈၽၢင်တေလဝ်းတၢၼ်ႇႁိုဝ်ၵေႃႈ လွင်ႈတဵတ်ႇယဵၼ်ၶဝ်ၼၼ်ႉ ႁဵတ်းႁႂ်ႈဢမ်ႇမီးၽႂ်ႁတ်းၶဝ်ႈၸမ် ၼႃႈတႃဢၼ်ဢမ်ႇယုမ်ႉဢမ်ႇၵီႈၶဝ်ၼၼ်ႉ ဢမ်ႇမီးၽူႈယိင်းၵေႃႉလႂ် ၶဝ်ႈၸမ်ၶဝ်လႆႈ၊ မိူဝ်ႈလႂ်ၶဝ်တူၺ်းၵူၼ်းၵေႃႉၼၼ်ႉၼႆ သၢႆတႃၶဝ်ၼၼ်ႉ ႁဵတ်းႁႂ်ႈပိူၼ်ႈၵူဝ်မႃးလႆႈၵမ်းလဵဝ်ၼၼ်ႉယဝ်ႉ”
“ပီႈႁဵတ်းႁိုဝ်ႁူႉလႃႇ”
“ၵေႃႈယၢမ်ႈငိၼ်းပိူၼ်ႈလၢတ်ႈ”
“ငိၼ်းပိူၼ်ႈလၢတ်ႈပေႃးတၢၼ်ႇဝႃႈပဵၼ်လွင်ႈတေႉယဝ်ႉ”
လိုၼ်းၼုမ်ႇတႄႉ ဢမ်ႇလၢတ်ႈသင်ၸွမ်း မိူၼ်ဢမ်ႇလႆႈငိၼ်းလူးၵွၼ်ႇယဝ်ႉ။
“ပဵၼ်တေႉဢိူဝ်ႈပေႃးဢမ်ႇယုမ်ႇၵေႃႈၸၢမ်းတူၺ်းလႆႈယူႇၼႃႈ ပေႃးဢမ်ႇမီးတူဝ်ထူပ်းတေဢမ်ႇပွင်ႇၸႂ်”
“ၶႂ်ႈဝႃႈပီႈမီးတူဝ်ထူပ်းယဝ်ႉၸွင်ႇၸႂ်ႈ”
ပီႈၸိင်ႇမိူၼ်ၶႂ်ႈလၢတ်ႈဢမ်ႇၶႂ်ႈလၢတ်ႈယဝ်ႉ
“ ဢိုမ်ႈ! ၵေႃႈ ယွၼ်ႉမီးတူဝ်ထူပ်းၼၼ်ႉယဝ်ႉ ၸင်ႇလႆႈပၼ်ၾၢင်ႉ မိူဝ်ႈဢွၼ်တၢင်းၵေႃႈ ပီႈသူၼၼ်ႉယၢမ်ႈယွင်ႇမိူၼ်လိူၼ်သႂ်ၼႆႉယဝ်ႉ ၵူၺ်းၵႃႈ ဝၼ်းၼိုင်ႈ ပီႈလႆႈႁူပ်ႉၶဝ်ၼႃႈလၢၼ်ႉၼႆႉသေ ဢၢင်ႈတေၶဝ်ႈတူင်ႉတၵ်ႉၶဝ် လႄႈ လႆႈၶဝ်ႈၵႂႃႇၸမ်ၸမ်ၶဝ်ယဝ်ႉ ဢၢင်ႈတေလၢတ်ႈၵႂၢမ်းၵူၺ်း သၢႆတႃလႄႈၼႃႈၶဝ်ၼၼ်ႉ ၼႄႁႂ်ႈပီႈပေႃးလၢတ်ႈဢမ်ႇဢွၵ်ႇလႆႈၼၼ်ႉ ယဝ်ႉ မိူၼ်ၶဝ်တေၸႂ်လမ်ပီႈဝႆႉလႄႈ ပီႈၵေႃႈၼႅတ်ႈလႅၼ်ႈပၢႆႈၵမ်းလဵဝ်ၼၼ်ႉယဝ်ႉ”
“ႁၼ်ၼႃႈၶဝ်ၵူၺ်းလၢတ်ႈၵႂၢမ်းပေႃးဢမ်ႇဢွၵ်ႇတေႉၵႃႈ”
“ၽႂ်ႁိုဝ်တေႁတ်းလၢတ်ႈ ၼႃႈတႃမိူၼ်ၵူၼ်းၸႂ်လမ်ၸိူင်ႉၼၼ် မိူဝ်ႈတႄႇ ပီႈထၢင်ႇဝႃႈၶဝ်တေၸႂ်လမ်သေလွင်ႈလွင်ႈလႄႈ ႁဵတ်းၸိူင်ႉၼၼ်ၵႂႃႇၼႆၵူၺ်း ၵူၺ်းၵႃႈ လိူဝ်သေပီႈယဝ်ႉ ၽူႈယိင်းၵမ်ႈၼမ် ဢၼ်ၶဝ်ႈမႃးႁဵတ်းၵၢၼ်တီႈၼႆႈၵေႃႈ ၺႃးမႃးမိူၼ်မိူၼ်ၵၼ်ယဝ်ႉ ပဵၼ်ၽူႈၸၢႆးဢၼ် ႁၼ်လႆႈယၵ်ႉလႆႈ လၢတ်ႈဢမ်ႇလႆႈၼၼ်ႉယဝ်ႉ”
“လၢတ်ႈပေႃးတၢၼ်ႇၶဝ်ပဵၼ်ၸၢႆးၸိူင်းၵူဝ်းရီးယႃးယဝ်ႉၼႃႇ”
“ၼႃႇလိူဝ်ၼၼ်ႉၵွၼ်ႇ”
“ပေႃးထွမ်ႇပီႈလၢတ်ႈမႃးတႄႉ ၶဝ်လႅပ်ႈၵႆႉမႃးလၢၼ်ႉၼႆႉဝႆႉၵဝ်ႇလႃႇ”
“တေဝႃႈႁိုဝ်လႃႇ ၶဝ်လႄႈတင်းၸဝ်ႈၶွင်လၢၼ်ႉ ပဵၼ်ဢူၺ်းလီၵၼ် ပဵၼ်ၽူႈႁူမ်ႈၼႃႈၵၢၼ် လူင်းတိုၼ်းႁူမ်ႈၵၼ်သေ ပဵၼ်မႃးလၢၼ်ႉၶဝ်ႈၽၵ်းၼႆႉယဝ်ႉ၊ မၢင်ပွၵ်ႈ ၶဝ်လႄႈတင်းၸဝ်ႈၶွင်လၢၼ်ႉ တေၵႆႉဢွၼ်ၵၼ်မႃးၵိၼ်ၶဝ်ႈ ၸွမ်းၵၼ်ယူႇတႃႇသေႇ သင်ၶႂ်ႈႁူပ်ႉၶဝ်ၵေႃႈ တေလႆႈႁူပ်ႉယူႇၼႃႈ ႁႂ်ႈၵၢမ်ႇလီ”
ၸွမ်းလူၺ်ႈလိူၼ်သႂ်ၼၼ်ႉ ဢမ်ႇၶႂ်ႈယုမ်ႇၵႃႈႁိုဝ်လႄႈ
“ပီႈလၢတ်ႈလဵၼ်ႈယူႇၸွင်ႇၸႂ်ႈႁိုဝ် ”
“ယူႇတီႈသူဝူၼ်ႉၵူၺ်း ”
“လိုၼ်းၼုမ်ႇ ပဵၼ်သင်လႄႈဢမ်ႇလၢတ်ႈသင်လႃႇ သူလႆႈႁၼ်ၶဝ်ၸမ်ၸမ်ယဝ်ႉ ၸွင်ႇမိူၼ်ၼင်ႇပီႈၸိင်ႇဝႃႈႁႃႉ”
“ဢမ်ႇတွင်းယဝ်ႉ ႁဝ်းဢမ်ႇလႆႈသူၼ်ၸႂ် ႁဝ်းယွၼ်းၵႂႃႇၵွၼ်ႇယဝ်ႉ”
လိူၼ်သႂ်ၸၼ်ဝႆႉသေ
“ၵူၼ်းလဝ်းၸိူင်ႉၼၼ် တူၺ်းၶၢမ်ႈလႆႈၸိူင်ႉႁိုဝ်”
“ဢမ်ႇႁူႉယဝ်ႉ သၢႆတႃႁဝ်းတေဢမ်ႇထိုင်ယူဝ်ႉ!”
ယၢမ်းၼၼ်ႉမီးၵူၼ်းႁွင်ႉမၼ်း ၵႂႃႇထူပ်းၽူႈၸတ်းၵၢၼ်ၼႆလႄႈ မိူဝ်ႈငိၼ်းၸိူင်ႉၼၼ်ယဝ်ႉ ၸႂ်ဢမ်ႇလီၼၼ်ႉၵေႃႈ တိူဝ်းႁႅင်းၶိုၼ်ႈမႃးထႅင်ႈယူႇ။
“ႁွင်ႉထူပ်းလွင်ႈသင်ၶႃႈ”
“ႁဝ်းၵေႃႈဢမ်ႇႁူႉယဝ်ႉ ႁၼ်ၽူႈပွင်ၵၢၼ်ၵေႃႈမႃး”
“ႁႃ!!”
ယိုင်ႈယၢင်ႈၵႂႃႇယိုင်ႈမိူၼ်ၶႂ်ႈႁူၼ်လင်ၵႂႃႇတိၵ်းတိၵ်းၼၼ်ႉယဝ်ႉ။
တွၼ်ႈၼိုင်ႈ သုတ်းၵႂႃႇယဝ်ႉ သိုပ်ႇတူၺ်းၵႂႃႇထႅင်ႈတွၼ်ႈသွင်ၶႃႈ။
ႁပ်ႉထွမ်ႇပၼ်ႁႅင်းတၢင်းသဵင်ဢၢၼ်ႇလႆႈတီႈ YouTube ၼႆႉလႆႈၶႃႈ။
