တွၼ်ႈၵဝ်ႈ
တီႈၼႂ်းႁွင်ႈဢၼ်တဵတ်ႇယဵၼ်လူင်ၼၼ်ႉ လိုၼ်းၼုမ်ႇၵေႃႈ လႆႈပိုတ်ႇလၢတ်ႈၵႂႃႇ
“မိူၼ်ႁၢင်ႈႁဝ်းဢမ်ႇလႆႈၼင်ႈဢုပ်ႇၵၼ်ႁိုင်ၼႃႇယဝ်ႉ..”
“ၸႂ်ႈဢိူဝ်ႈ..ယွၼ်ႉၵၢၼ်ႁဝ်းမၼ်းပိူင်ႈၵၼ်ၼႃႇလူး” လၢတ်ႈဢွၵ်ႇမႃးလူၺ်ႈသီၼႃႈဢၼ်ဢမ်ႇႁၢၼ်ႉၸႂ်ၵႃႈႁိုဝ် တင်းသဵင်ၶႅင်သေ သိုပ်ႇလၢတ်ႈထႅင်ႈဝႃႈ
“သူႁွင်ႉႁဝ်းမႃးမီးလွင်ႈသင်လႃႇ ဢမ်ႇၸႂ်ႈဝႃႈတေလိုပ်ႈႁဝ်းဢွၵ်ႇၵၢၼ်..မိူၼ်ၼွင်ႉဢွမ်ၼင်ႇၵဝ်ႇယူဝ်ႉ ႁဝ်းၵေႃႈႁၢင်ႈႁႅၼ်းမႃးဝႆႉယူႇမိူၼ်ၵၼ်”
လၢတ်ႈဢဝ်လိုၼ်းၼုမ်ႇပေႃးမိုင်လူင်ၵႂႃႇ
“ပီႈလၢတ်ႈလွင်ႈသင်လႃႇ!.. ၶႃႈဢမ်ႇပွင်ႇၸႂ်”
“မိူဝ်ႈလႂ်မိူဝ်ႈတေလႆႈဢွၵ်ႇယူႇယဝ်ႉ ႁဝ်းတေယွၼ်းလၢတ်ႈသိုဝ်ႈသိုဝ်ႈႁေ.. မိူဝ်ႈဢွၼ်တၢင်း..ႁဝ်းယိၼ်းၸူမ်းယူႇၼႃ ဢၼ်သူပဵၼ်ႁူဝ်ၼႃႈ မုင်ႈမွင်းဝႃႈ..တေပဵၼ်ႁူဝ်ၼႃႈလီ ၵူၺ်းၵႃႈ ဢမ်ႇထၢင်ႇဝႃႈ သူတေပဵၼ်ၵူၼ်းဢၼ်မေႃၸႂ်ႉဢႃႇၼႃႇ လွင်ႈၼွင်ႉဢွမ်ၼၼ်ႉ..ၶဝ်ဢမ်ႇလႆႈႁဵတ်းၽိတ်းသင် ႁၼ်ယူႇဝႃႈ..ပႃႈၼၼ်ႉပဵၼ်ၵူၼ်းၽိတ်း လွင်ႈၸိူင်ႉၼႆမၼ်းၵေႃႈဢမ်ႇၸႂ်ႈဝႃႈ..ဢမ်ႇယၢမ်ႈမီးလူး ပေႃးဝႃႈၼၼ် သင်ၶႅၵ်ႇၸႂ်လမ်သေ ၽိတ်းၵူၼ်းႁဵတ်းၵၢၼ်ၸိူင်ႉၼင်ႇႁဝ်းမႃး ႁဝ်းၸိူဝ်းႁဵတ်းၵၢၼ်ယူႇၼႆႉ.. တေဢမ်ႇထုၵ်ႇလိုပ်ႈဢွၵ်ႇၵၢၼ်မူတ်းႁႃႉ ႁဝ်းဢမ်ႇဝူၼ်ႉဝႃႈ..သူတေပဵၼ်ၵူၼ်းၸႂ်ၵႅပ်ႈထိုင်တၢၼ်ႇၼႆႉ”
ၼွင်ႉလႅင်းဢၼ်လၵ်ႉထွမ်ႇယူႇၼၼ်ႉၵေႃႈ လႆႈငိၼ်းၸိူင်ႉၼၼ်ယဝ်ႉ ပဵၼ်ဢၼ်ႁၢၼ်ၸႂ်တေႉတေႉလႄႈ ယုမ်ႉၼင်ႇမီးတၢင်းသိူဝ်းသေ ပႆဢွၵ်ႇၵႂႃႇပႅတ်ႈယူႇ။
လိုၼ်းၼုမ်ႇၼၼ်ႉ ႁိုဝ်တေလၢတ်ႈသင်လႆႈ မၼ်းဢမ်ႇၸွႆႈၶဝ်လႆႈတေႉလူး ၸွမ်းလူၺ်ႈပဵၼ်ႁူဝ်ၼႃႈသေ ႁဵတ်းၸွမ်းပုၼ်ႈၽွၼ်းဢမ်ႇတဵမ်ထူၼ်ႈၵူၺ်းၵေႃႈ ပေႃးဝူၼ်ႉၽိတ်းၼႃႇယဝ်ႉ မိူဝ်ႈငိၼ်းပီႈၸိင်ႇလၢတ်ႈမႃးၸိူင်ႉၼႆ ယိုင်ႈၶႅၼ်းမိပ်ႇငႅၼ်းဢီးႁႂ်ႈမၼ်း ၵပ်ႉၵိၼ်းၸႂ်မႃးထႅင်ႈယူႇ ဢမ်ႇထၢင်ႇဝႃႈ လွင်ႈၼွင်ႉဢွမ်ၼၼ်ႉ တေမႃးပၼ်လွင်ႈမႆႈၸႂ်လႆႈထိုင်တၢၼ်ႇၼႆႉ
“ႁဝ်းယွမ်းၼွမ်းယူႇ ႁဝ်းႁဵတ်းသင်ဢမ်ႇလႆႈ..”
“ယႃႇမႃးႁႃၶေႃႈၵႄႈတူဝ်ယူႇယဝ်ႉ ႁဝ်းဢမ်ႇၶႂၢင်းပၼ်သူလႆႈလေႃႇ ယဝ်ႉၵေႃႈ..တေသိုပ်ႇႁဵတ်းၵၢၼ်ၵႂႃႇၸွမ်းၵူၼ်းၸိူင်ႉၼင်ႇသူ..ဢမ်ႇလႆႈမိူၼ်ၵၼ်”
ဢဝ်ၽိုၼ်လိၵ်ႈယွၼ်းဢွၵ်ႇၵၢၼ် ယိုၼ်ႈပၼ်လိုၼ်းၼုမ်ႇယဝ်ႉ ပႆဢွၵ်ႇႁွင်ႈၵႂႃႇပႅတ်ႈယူႇ။ လိုၼ်းၼုမ်ႇဢၼ်ၼင်ႈယူႇၼၼ်ႉ ၼႅတ်ႈလုၵ်ႉလႅၼ်ႈလမ်းၸွမ်းသေ ဢဝ်ၽိုၼ်လိၵ်ႈၼၼ်ႉယိုၼ်ႈပၼ်ၵႂႃႇၶိုၼ်း
“ပီႈဝူၼ်ႉၸိူင်ႉႁိုဝ်လႃႇ.. ဝူၼ်ႉဝႃႈၵၢၼ်မၼ်းႁႃလႆႈငၢႆႈငၢႆႈၵူၺ်းႁႃႉ သိုပ်ႇႁဵတ်းၵႂႃႇလႄႈ.. ၶႃႈဢမ်ႇပၼ်ပီႈဢွၵ်ႇၼႃ”
ပီႈၸိင်ႇၵေႃႈ ယၵ်ႉတူၺ်းၸူးမၼ်းၵႂႃႇၼင်ႇၸႂ်လမ်ၼႃႇၼႃႇလႄႈ
“သူဝူၼ်ႉဝႃႈ..ပဵၼ်ႁူဝ်ၼႃႈယဝ်ႉ တေႁႂ်ႈႁဝ်းႁဵတ်းၵေႃႈ..ႁဝ်းတေႁဵတ်းၸွမ်းႁႃႉ တႄႇဢဝ်ၼႆႉၵႂႃႇ.. ႁဝ်းဢမ်ႇႁဵတ်းၵၢၼ်တီႈၼႆႈယဝ်ႉ..”
လိုၼ်းၼုမ်ႇၼႅတ်ႈၸၼ်ဢဝ်ၶႅၼ်ပီႈၸိင်ႇဝႆႉသေ
“ယႃႇႁဵတ်းၸိူင်ႉၼႆလႄႈပီႈ.. ပီႈလၢတ်ႈဝႃႈ.. ပီႈလႆႈၸႂ်ႁဵတ်းၵၢၼ်တီႈၼႆႈဢမ်ႇၸႂ်ႈႁိုဝ် တီႈၼႆႈၼႆႉ..ပဵၼ်ၵၢၼ်ဢၼ်ပီႈဝႃႈ..မၼ်းၵျေႃႇလိူဝ်သေၵၢၼ်ဢၼ်ပီႈယၢမ်ႈႁဵတ်းမႃးၼႆဢမ်ႇၸႂ်ႈႁႃႉ..”
“မၼ်းဢမ်ႇမိူၼ်ၵဝ်ႇယဝ်ႉ.. ၵူၼ်းႁဝ်းမၼ်းၵေႃႈမေႃလႅၵ်ႈလၢႆႈလႆႈယူႇၼႃႈ.. သမ်ႉဝႃႈႁဝ်းတေသိုပ်ႇယူႇၵႂႃႇၵေႃႈ..ႁဝ်းဢမ်ႇမီးတၢင်းသိူဝ်းလေႃႇ”
ပီႈၸိင်ႇ ထူၺ်ႈၸႂ်လူင်သေ ယၵ်ႉတူၺ်းၸူးလိုၼ်းၼုမ်ႇလီလီယဝ်ႉ သိုပ်ႇလၢတ်ႈထႅင်ႈ
“မိူဝ်ႈၵႆႈ..တီႈၵူၼ်းပဵၼ်မူႇၼၼ်ႉၸွင်ႇႁူႉႁႃႉ..ပဵၼ်ယွၼ်ႉသင် ယွၼ်ႉႁဝ်းပဵၼ်ၵူၼ်းႁူႉၸၵ်းသူၼၼ်ႉၼႃႇ ႁဝ်းၶၢမ်ႇပိူၼ်ႈလၢတ်ႈၼိူဝ်ႁဝ်း..ယွၼ်ႉသူဢမ်ႇလႆႈထႅင်ႈယဝ်ႉ ႁဝ်းၵေႃႈဢမ်ႇလႆႈႁဵတ်းသင် ပဵၼ်သင်လႄႈႁဝ်းတေလႆႈမႃးၶၢမ်ႇလႃႇ.. ႁႂ်ႈႁဝ်းၵႂႃႇလႄႈ ႁဝ်းႁၼ်ၼႃႈသူယဝ်ႉ..ႁဵတ်းႁႂ်ႈႁဝ်းယၢပ်ႇၸႂ်တေႉဢိူဝ်ႈ”
ၵီႈမိုဝ်းလိုၼ်းၼုမ်ႇဢွၵ်ႇၶႅၼ်မၼ်းသေ ဢဝ်ၽိုၼ်လိၵ်ႈဢွၵ်ႇၵၢၼ်ၼၼ်ႉ ယဵတ်ႈသႂ်ႇၼႂ်းမိုဝ်းလိုၼ်းၼုမ်ႇၵႂႃႇယဝ်ႉ။ လိူၼ်သႂ် ဢၼ်ဢၢင်ႈမႃးႁႃလိုၼ်းၼုမ်ႇၼၼ်ႉ သမ်ႉလႆႈမႃးႁၼ်မႅၼ်ႈဢဝ်လီလီ၊ လႅၼ်ႈမႃးလၢတ်ႈတီႈလိုၼ်းၼုမ်ႇၵႂႃႇ
“ၽူႈၸတ်းၵၢၼ်ႁွင်ႉပီႈႁႂ်ႈၵႂႃႇထူပ်းဝႃႇ”
ဢမ်ႇတၼ်းတူၺ်းၼႃႈလိုၼ်းၼုမ်ႇသင် ၼႅတ်ႈလႅၼ်ႈၵႂႃႇၸွမ်းပီႈၸိင်ႇၵမ်းလဵဝ်ယဝ်ႉ။
“ပီႈတေဢွၵ်ႇၵၢၼ်ၵႂႃႇတေႉတေႉႁႃႉ!..”
“ဢမ်ႇလႆႈတေဢွၵ်ႇ..ဢွၵ်ႇၵႂႃႇယဝ်ႉ” ပီႈၸိင်ႇၵေႃႈ ႁၢင်ႈႁႅၼ်းဢဝ်ၶူဝ်းမၼ်းဢွၵ်ႇၵႂႃႇယူႇ။
“ဢမ်ႇႁဵတ်းလႆႈတေႃႇလိုၼ်းၼုမ်ႇၼႃႇႁႃႉ..”
“ပေႃးဢီးလူၶဝ်ၵေႃႈ..ယူႇၸွမ်းၶဝ်ၵႂႃႇၵူၺ်းလႄႈ.. ႁဝ်းယဵၼ်ႉၸႂ်ယူႇၵႂႃႇဢမ်ႇလႆႈယဝ်ႉ.. ”
ဢွၵ်ႇၵႂႃႇပႅတ်ႈလိူၼ်သႂ်ယဝ်ႉ။
လုင်းဢွင်ႇၵေႃႈ လၢတ်ႈထိုင် ၽႅၼ်ၵၢၼ်ၶၢဝ်းယၢမ်းႁဵတ်းၵၢၼ် ၼႄလိုၼ်းၼုမ်ႇၵႂႃႇယူႇ။ ၵူၺ်းလိုၼ်းၼုမ်ႇၼၼ်ႉတႄႉ ဢမ်ႇလႆႈသူၼ်ၸႂ်တီႈလုင်းဢွင်ႇလၢတ်ႈၼၼ်ႉၵႃႈႁိုဝ် လၢတ်ႈသင်မႃးၵေႃႈဢေႃႈၸွမ်းၵႂႃႇၵူၺ်း။ လုင်းဢွင်ႇမိူၼ်တူၺ်းဢွၵ်ႇဝႃႈ လိုၼ်းၼုမ်ႇၼၼ်ႉ ၸႂ်ဢမ်ႇၼိမ်လႄႈ
“ မီးလွင်ႈသင်လႃႇ”
“ဢေႃႈ! ” လႆႈသတိမႃးသေ ဢဝ်ၽိုၼ်လိၵ်ႈပီႈၸိင်ႇၼၼ်ႉယိုၼ်ႈပၼ်ၵႂႃႇယဝ်ႉ ယွၼ်းဢွၵ်ႇႁွင်ႈၵႂႃႇယူႇ။
တိုၼ်းႁၢၼ်ၼၼ်ႉၵေႃႈ မိူဝ်ႈႁူႉဝႃႈ လိုၼ်းၼုမ်ႇမႃးႁဵတ်းၵၢၼ်ၶိုၼ်းယဝ်ႉၼႆ ၼႅတ်ႈမႃးႁႃၸိုၼ်ႈၶိူဝ်း တီႈႁဵတ်းၵၢၼ်ၼၼ်ႉၵမ်းလဵဝ်။
“မႃးႁဵတ်းသင်လႃႇ.. ဢမ်ႇမီးၵၢၼ်လူဝ်ႇႁဵတ်းယဝ်ႉႁႃႉ..”
“ဢမ်ႇႁၼ်ၵေႃႉႁႃးၵႂႃႇတီႈလၢၼ်ႉလၢႆဝၼ်း..ႁႃးၵေႃႈၸႂ်ထိုင်ၼင်ႇၵဝ်ႇဢိူဝ်ႈ ပေႃးမႃးၼပ်ႉတူၺ်းယဝ်ႉ တႄႇဢဝ်လိုၼ်းၼုမ်ႇလိုဝ်ႈၵၢၼ် ၵေႃႉႁႃးၵေႃႈ..ဢမ်ႇၶိုၼ်းၵႂႃႇႁေပွၵ်ႈ.. ဢမ်ႇမီးလိုၼ်းၼုမ်ႇယဝ်ႉဢမ်ႇၶႂ်ႈၵႂႃႇႁႃႉတေႃႈ..”
“ပေႃးမီးၶၢဝ်းယၢမ်းၼမ်တၢၼ်ႇၼႆႉ ပဵၼ်သင်ဢမ်ႇၵႂႃႇတူၺ်းလၢၼ်ႉလႃႇ ဢမ်ႇၸႂ်ႈဝႃႈ..မႃးတုၵ်းယွၼ်းႁႂ်ႈႁႃးထွၼ်ဢွၵ်ႇ ၼႂ်းၸၼ်ႉၽူႈပွင်ၵၢၼ်လၢၼ်ႉၵႂႃႇႁႃႉ”
“လၢတ်ႈတိူဝ်ႉၺႃးတီႈလႂ်မၼ်းထႅင်ႈယဝ်ႉလႃႇ..ဢမ်ႇပေႃးၶႂ်ႈလီယူႇယဝ်ႉ” လၢတ်ႈလွႆးလွႆးယူႇႁင်းၵူၺ်းမၼ်း ၸင်ႇၶိုၼ်းၶိုၼ်ႈသဵင်လၢတ်ႈၸူးၸိုၼ်ႈၶိူဝ်းၵႂႃႇ
“ မိူဝ်ႈၵႆႈ လုင်းဢွင်ႇလၢတ်ႈမႃးဝႃႈလိုၼ်းၼုမ်ႇမႃးႁဵတ်းၵၢၼ်ၶိုၼ်းယဝ်ႉ”
“ၼၼ်ႉမၼ်းပဵၼ်ၵၢၼ်သူဢမ်ႇၸႂ်ႈႁႃႉ မႃးလၢတ်ႈၼႄႁႃးႁဵတ်းသင်”
“ဢၼ်မႃးမိူဝ်ႈၼႆႉၵေႃႈ ၶႂ်ႈမႃးယိၼ်းၸူမ်းၵူၺ်းၼင်ႇၵဝ်ႇ ၸွႆႈႁႃတီႈယူႇလိုၼ်းၼုမ်ႇမႃးပၼ်” တိုၼ်းႁၢၼ်မိူၼ်ဝူၼ်ႉလႆႈသေလွင်ႈလွင်ႈမႃး လႄႈ
“ႁူႉတီႈယူႇၶဝ်လႆႈၸိူင်ႉႁိုဝ်လႃႇ ဢမ်ႇၼၼ်ၵေႃႈ..ႁႂ်ႈသၢႆလႅင်းၸွမ်းႁႃမႃးပၼ်ႁႃႉတေႃႈ..”
“ဢမ်ႇမီးသင်ယဝ်ႉၵေႃႈ ပွၵ်ႈမိူဝ်းၶိုၼ်းလႄႈ..”
“ၵူၼ်းသင်ၸႂ်ႁၢႆႉတေႉယဝ်ႉ”
သင်တိုၼ်းႁၢၼ်ႁူႉဝႃႈ မၼ်းပဵၼ်ၵူၼ်းၵေႃႉဢၼ် ၸွမ်းႁႃႁင်းၵူၺ်းၼႆ ယိုင်ႈၶႅၼ်းတေဝႃႈႁင်းမၼ်းထႅင်ႈၼၼ်ႉယဝ်ႉ။ တိုၼ်းႁၢၼ် ပဵၼ်ၵူၼ်းၵေႃႉဢၼ် ယူႇၸွမ်းၸိုၼ်ႈၶိူဝ်းယူႇတႃႇသေႇ ႁူႉလွင်ႈၸိုၼ်ႈၶိူဝ်းလီလိူဝ်ပိူၼ်ႈ၊ သမ်ႉဝႃႈၸဝ်ႈတူဝ်မၼ်း တေဢမ်ႇႁူႉႁိုဝ် ဢမ်ႇၶႂ်ႈယွမ်းႁပ်ႉသေတႃႉ မၼ်းတႄႉၵေႃႈ လၢမ်းၶၢတ်ႈလႆႈယူႇယဝ်ႉဝႃႈ ၸိုၼ်ႈၶိူဝ်းၼၼ်ႉ သူၼ်ၸႂ်လိုၼ်းၼုမ်ႇၼႆ။
“ႁူႉတီႈယူႇၶဝ်မႃးၸိူင်ႉၼႆ ၵေႃႉႁႃးၵေႃႈ..တေႁူႉယဝ်ႉဝႃႈ ၶဝ်တေႇၼႃႈႁိူၼ်းယဝ်ႉ.. မီးလုၵ်ႈၵေႃႉၼိုင်ႈလႄႈ ၶဝ်ပဵၼ်ၵူၼ်းႁႃလဵင်ႉလုၵ်ႈႁင်းၵူၺ်း ယွၼ်ႉၼၼ်…သမ်ႉဝႃႈၵေႃႉႁႃးၼၼ်ႉပဵၼ်ၵူၼ်းၸႂ်ႁၢႆႉၼႃႇၵေႃႈ ၸွႆႈႁၼ်ထိုင်ၵၢင်ၸႂ်ၶဝ်ဢိတ်းၼိုင်ႈလႄႈ”
မိူဝ်ႈငိၼ်းဝႃႈ လိုၼ်းၼုမ်ႇၼၼ်ႉ လဵင်ႉလုၵ်ႈႁင်းၵူၺ်းၼႆၵေႃႈ မိူၼ်တေတင်ႈၸႂ် ပၵ်းတႃတူၺ်းၸူးတိုၼ်းႁၢၼ် ဢၼ်တိုၵ်ႉလၢတ်ႈယူႇၼၼ်ႉၵမ်းလဵဝ်
“သူထုၵ်ႇၶဝ်လႅၼ်ယဝ်ႉ”
“ယုမ်ႇဢမ်ႇယုမ်ႇၵေႃႈ..ယူႇတီႈၵေႃႉႁႃးၵူၺ်း”
ၶွၼ်းႁူဝ်မၼ်းမိူၼ်ဢမ်ႇပွင်ႇၸႂ်ၸွမ်းၸိုၼ်ႈၶိူဝ်းယဝ်ႉ။
လိုၼ်းၼုမ်ႇ ၵုမ်ႇဝူၼ်ႉၸွမ်းလွင်ႈပီႈၸိင်ႇၵူၺ်း ၸႂ်ပေႃးဢမ်ႇၸပ်းတူဝ်ယဝ်ႉ။ မိူဝ်ႈဢွၵ်ႇႁွင်ႈမႃး တူၺ်းၸွမ်းလၢၼ်ႉယူႇၼၼ်ႉ လႆႈႁၼ်ၶႅၵ်ႇသွင်ၵေႃႉ ၸုၵ်းသေထဵင်ၵၼ်ယူႇၼႂ်းၵၢင်လၢၼ်ႉ သဵင်ပေႃးပၼ်းလူင်ဝႆႉ မၼ်းၵေႃႈ မိူၼ်ဢမ်ႇလႆႈငိၼ်းသင်သေ မိုင်တူၺ်းၵႂႃႇႁဵတ်းၼၼ်ၵူၺ်း၊ ယၢမ်းၼၼ်ႉသမ်ႉ မႅၼ်ႈမိူဝ်ႈၸိုၼ်ႈၶိူဝ်းလႄႈတိုၼ်းႁၢၼ် ၶဝ်ႈလၢၼ်ႉမႃးဢဝ်လီလီ ၼွင်ႉလႅင်းၵေႃႈ ၼႅတ်ႈၸွႆႈၵႄႈၶႆၵႂႃႇသေ ငဝ်းလၢႆးမၼ်းၸင်ႇတေလီမႃးယဝ်ႉ။
ၸိုၼ်ႈၶိူဝ်းဢၼ်ႁၼ်လိုၼ်းၼုမ်ႇမိူၼ်ႇမိုင် ဢမ်ႇတူင်ႉဢမ်ႇၼိုင်ယူႇၸိူင်ႉၼၼ်ၼၼ်ႉ ႁွင်ႉမၼ်းၵႂႃႇထူပ်းၵမ်းလဵဝ်ယူႇ။
ၼွင်ႉလႅင်းဢၼ်ႁၼ်ၸိုၼ်ႈၶိူဝ်း ၵေႃႉႁွင်ႉလိုၼ်းၼုမ်ႇၵႂႃႇၼၼ်ႉၵေႃႈ ပဵၼ်ဢၼ်ဢမ်ႇႁၢၼ်ႉၸႂ်မႃးတႄႉတႄႉယဝ်ႉ။ ယၢမ်းၼၼ်ႉ မၼ်းၸင်ႇဝူၼ်ႉႁႃလွၵ်းလၢႆးၸတ်းၵၢၼ်လိုၼ်းၼုမ်ႇမႃးသေ ပွႆႇၶၢဝ်ႇလိုဝ်းၵႂႃႇထႅင်ႈယူႇ။
ယွၼ်ႉလိုၼ်းၼုမ်ႇလႄႈ ႁဵတ်းႁႂ်ႈပီႈၸိင်ႇထုၵ်ႇလိုပ်ႈဢွၵ်ႇၵၢၼ်ၵႂႃႇၸိူင်ႉၼၼ် ႁၼ်လႆႈဝႃႈ ဢူၺ်းၵေႃႉၸမ်ၸႂ်ၵၼ်ၵေႃႈဢမ်ႇဝူၼ်ႉထိုင် ဢမ်ႇႁၼ်ထိုင်ၵၢင်ၸႂ်ပိူၼ်ႈၸိူင်ႉၼႆ ဢမ်ႇထုၵ်ႇလီဢဝ်မႃးႁဵတ်းႁူဝ်ၼႃႈၼႆသေ တိုၵ်းသူၼ်ႁႂ်ႈမီးၵူၼ်းႁၼ်လီၵမ်ႉထႅမ် တႃႇတေလိုပ်ႈလိုၼ်းၼုမ်ႇဢွၵ်ႇၵၢၼ်မႃး ယဝ်ႉ။
ၼႂ်းႁွင်ႈၽူႈၸတ်းၵၢၼ် ဢၼ်မီးလိုၼ်းၼုမ်ႇ တိုၼ်းႁၢၼ်ၸိုၼ်ႈၶိူဝ်းၵူၺ်းၼၼ်ႉ ၸိုၼ်ႈၶိူဝ်းမိူၼ်တေဢမ်ႇပေႃးၸႂ်မႃးသေ
“ႁဝ်းၸၢင်ႈသူမႃးႁဵတ်းၵၢၼ်ၼႆႉ တႃႇမႃးၸုၵ်းတူၺ်းပိူၼ်ႈၽိတ်းမေႃးၵၼ်ၵူၺ်းႁႃႉ ဢမ်ႇဝူၼ်ႉမႅၼ်ႈဝႃႈ..ႁဝ်းတေလႆႈမႃးႁၼ်ၸိူင်ႉၼႆ”
လိုၼ်းၼုမ်ႇဢၼ်ၼင်ႈထွမ်ႇယူႇၼၼ်ႉၵေႃႈ ႁိုဝ်တေမီးႁႅင်းတႃႇထဵင်ၶိုၼ်းလႆႈ ၵူမ်ႈႁူဝ်လၢတ်ႈၵႂၢမ်းယွမ်းၼွမ်းၸူးၶိုၼ်းၵူၺ်း။ ၸိုၼ်ႈၶိူဝ်းလႄႈတိုၼ်းႁၢၼ် ဢၼ်ႁၼ်လိုၼ်းၼုမ်ႇ ဢမ်ႇသူပ်းဢမ်ႇသဵင်ၵႃႈႁိုဝ်ၼၼ်ႉ ပဵၼ်ဢၼ်လၢၵ်ႇလၢႆးမႃးဝႆႉလႄႈ
“သူ..ဢမ်ႇမီးသင်တေလၢတ်ႈၽွင်ႈႁႃႉ.. မီးပၼ်ႁႃသင်ၵေႃႈလၢတ်ႈမႃးလႄႈ.. သင်လူဝ်ႇတၢင်းၸွႆႈထႅမ်ၵေႃႈလၢတ်ႈလႆႈယူႇ.. ပေႃးတေၵဵပ်းဝႆႉၵေႃႉလဵဝ်သေ..ဢမ်ႇႁႃတၢင်းၵႄႈၶႆမၼ်းၼႆ မၼ်းၵေႃႈ..တေဢမ်ႇႁၢႆၵႂႃႇလႆႈ သင်ဢမ်ႇသင်..ပၼ်ႁႃမၼ်းယိုင်ႈၶႅၼ်းသုၵ်ႉယုင်ႈမႃးထႅင်ႈလူးၵွၼ်ႇ.. ယႃႇပေဝူၼ်ႉဝႃႈ..ၵၢၼ်သုၼ်ႇတူဝ်ၼၼ်ႉ တေဢမ်ႇမႃးတုမ်ႉတိူဝ်ႉသင်တင်းၼႃႈၵၢၼ်ၼႃ ပေႃးၸႂ်ဢမ်ႇသိူဝ်းၵေႃႈ ၽွၼ်းၵၢၼ်ဢၼ်ဢွၵ်ႇမႃးၼၼ်ႉ တိုၼ်းဢွၵ်ႇမႃးဢမ်ႇၶႅမ်ႉၼၼ်ႉယဝ်ႉ..”
မိူဝ်ႈဢၼ်တိုၼ်းႁၢၼ်လၢတ်ႈၸိူင်ႉၼႆမႃးၵေႃႈ ႁဵတ်းႁႂ်ႈမၼ်းပွင်ႇၸႂ် လွင်ႈႁဵတ်းသၢင်ႈပီႈၸိင်ႇၼၼ်ႉမႃးယဝ်ႉ။ ယွၼ်ႉပိူဝ်ႈမၼ်းဢမ်ႇတွၼ်ႉသူၼ်ၸႂ် လွင်ႈပဵၼ်ယူႇၵူၼ်းႁဵတ်းၵၢၼ်မၼ်းၵႃႈႁိုဝ် မၼ်းၵူၺ်းတူၺ်းၵၢၼ် ဢၼ်မၼ်းထုၵ်ႇလီႁဵတ်းလႄႈ ဢၼ်ၵူၼ်းႁဵတ်းၵၢၼ်ၶဝ် ထုၵ်ႇလီႁဵတ်းၵူၺ်း၊ ပေႃးၵူႈလွင်ႈၶႅမ်ႉလႅပ်ႈလီယူႇၵေႃႈ လႆႈယဝ်ႉ မွၵ်ႈၼႆႉၵူၺ်း။
သင်ၸိူဝ်ႉဝႃႈ ၶဝ်ႈဢုပ်ႇၵုမ်ႁပ်ႉထွမ်ႇပၼ်ႁႃၵၼ် မိူၼ်မိူဝ်ႈတိုၵ်ႉႁဵတ်းၵၢၼ်ၸွမ်းၵၼ်ယူႇၼၼ်ႉ လွင်ႈၸိူဝ်းၼႆႉၵေႃႈ တေဢမ်ႇပဵၼ်မႃးလႄႈ လွင်ႈၸမ်ၸႂ်ၵၼ်ၼၼ်ႉ ယင်းတေၼမ်ၶိုၼ်ႈမႃးထႅင်ႈလူးၵွၼ်ႇ၊ လွင်ႈၶွင်ႈၶမ် ဢၼ်ပဵၼ်ဢၼ်မီးၸိူဝ်းၼၼ်ႉၵေႃႈ တေလႆႈၸွႆႈၵၼ်ၵႄႈၶႆၵႂႃႇ၊ လွင်ႈဢၼ်ပီႈၸိင်ႇဢွၵ်ႇၵၢၼ်ၵႂႃႇၼၼ်ႉ မိူၼ်ဝႃႈ မၼ်းၵေႃႈဢမ်ႇလႆႈတဵမ်ၸႂ်ၵႃႈႁိုဝ်လႄႈ တၢင်းသွင်ၵေႃႉသမ်ႉ ဢမ်ႇမီးလွင်ႈပွင်ႇၸႂ်ၵၼ်ထႅင်ႈႁေ၊ လိုၼ်းၼုမ်ႇၵေႃႈ ဢမ်ႇၵတ်းယဵၼ်ၸႂ် ယွၼ်ႉလွင်ႈၼႆႉမႃးမိူၼ်ၵၼ်ယဝ်ႉ။
မိူဝ်ႈဝူၼ်ႉလႆႈမႃးယဝ်ႉ ၸိုၼ်ႇတူဝ်လုၵ်ႉၶိုၼ်ႈမႃးၼင်ႇမၼ်ႈၸႂ်
“ဢမ်ႇမီးယဝ်ႉၶႃႈ!”
သၢႆတႃလွမ်ႁႃၼိူဝ်ၽိူၼ်လုင်းဢွင်ႇၼၼ်ႉမႃးသေ ႁၼ်ၽိုၼ်လိၵ်ႈ ဢၼ်မၼ်းယိုၼ်ႈပၼ်မိူဝ်ႈၵႆႈၼၼ်ႉယဝ်ႉၵေႃႈ မိူၼ်ၶႂ်ႈလုၵ်ႉၵႂႃႇဢဝ်သိၵ်ႇပႅတ်ႈယူႇ ၵူၺ်းၵႃႈ မီးၸိုၼ်ႈၶိူဝ်းၶႃလႄႈ ၵႃႈလႆႈတူၺ်းဢဝ်ၵူၺ်း။
မိူဝ်ႈႁၼ်လိုၼ်းၼုမ်ႇတူင်ႉတိုၼ်ႇမႃးၶိုၼ်းၼၼ်ႉ ၸိုၼ်ႈၶိူဝ်းၵေႃႈ ႁႂ်ႈမၼ်းၵႂႃႇႁဵတ်းၵၢၼ်ၶိုၼ်းယူႇ။ ဝၢႆးသေလိုၼ်းၼုမ်ႇဢွၵ်ႇၵႂႃႇၵူၺ်း တိုၼ်းႁၢၼ် ယၵ်ႉတူၺ်းၼႃႈၸိုၼ်ႈၶိူဝ်းဢၼ်မိူၼ်ၵီႈမႃးၼၼ်ႉသေ လၢတ်ႈဝႃႈ
“ယူႇယူႇ..ဢွၵ်ႇၸႂ်သင်သေ မႃးတီႈလၢၼ်ႉၼႆႉၸွမ်းႁႃးလႃႇ မိူဝ်ႈၸဝ်ႉတႄႉ..ႁဵတ်းမိူၼ်ဢမ်ႇသူၼ်ၸႂ်ႁေ”
“ၵၢင်ဝၼ်းယဝ်ႉ ဢမ်ႇတွင်ႉမႆႈၶဝ်ႈႁႃႉ”
ၸိုၼ်ႈၶိူဝ်းဢွၼ်ဢဝ်တိုၼ်းႁၢၼ် ၵႂႃႇၼင်ႈၵိၼ်ၶဝ်ႈတီႈၼႂ်းလၢၼ်ႉ ႁဵတ်းမိူၼ်ပဵၼ်ၶႅၵ်ႇၶဝ်ႈမႃးၵိၼ်ၼၼ်ႉယဝ်ႉ။ ၼွင်ႉလႅင်းၵေႃႈ ႁပ်ႉဢဝ်ပုၼ်ႈၽွၼ်း လုမ်းလႃးၶႃၵႂႃႇ မိူၼ်ပဵၼ်ၶႅၵ်ႇလမ်ႇလွင်ႈ ဢၼ်ဢမ်ႇမိူၼ်ၽႂ်ၼၼ်ႉယူႇ။ မိူဝ်ႈၵိၼ်ယဝ်ႉၵေႃႈ ပူၵ်းမိုဝ်းႁွင်ႉၵူၼ်းႁဵတ်းၵၢၼ်သေ ၼွင်ႉလႅင်းၼၼ်ႉၼႅတ်ႈၵႂႃႇၵမ်းလဵဝ်ယဝ်ႉ။ ယၢမ်းၼၼ်ႉ ၸိုၼ်ႈၶိူဝ်းၸင်ႇႁႂ်ႈ ၼွင်ႉလႅင်းၼပ်ႉသွၼ်ႇၵႃႈၶဝ်ႈၽၵ်း ဢၼ်ၵိၼ်ၵႂႃႇယဝ်ႉၼႆယူႇ ၵူၺ်းၵႃႈ မၼ်းၵေႃႈၼႅတ်ႈထဵင်ၶိုၼ်းၵမ်းလဵဝ်။
“ဢမ်ႇၸမ်ပဵၼ်ၶႃႈ.. ယွၼ်ႉပဵၼ်ၸဝ်ႈၶွင်လၢၼ်ႉယူႇယဝ်ႉ ႁဝ်းၶႃႈၵေႃႈႁူႉလီယူႇ”
“ၵေႃႈၼၼ်ႉယဝ်ႉ ပဵၼ်ၸဝ်ႈၶွင်လၢၼ်ႉယဝ်ႉ မႃးၼင်ႈၵိၼ်လၢၼ်ႉၸဝ်ႈၵဝ်ႇသေ သမ်ႉလႆႈၸၢႆႇၵႃႈမၼ်းၼႆႉ မီးယူႇႁႃႉ” တိုၼ်းႁၢၼ် ယၵ်ႉတူၺ်းၸိုၼ်ႈၶိူဝ်းသေလၢတ်ႈယူႇ။
“မိူဝ်ႈၼႆႉႁဝ်းမႃးၼင်ႈၵိၼ် ၸွမ်းလူၺ်ႈပဵၼ်ၶႅၵ်ႇၵေႃႉၼိုင်ႈ သွၼ်ႇၵႃႈမၼ်းလႆႈယူႇ”
ၼွင်ႉလႅင်းမိူၼ်တေဢၢၼ်းၼႃႇမႃးသေ “ဢမ်ႇပဵၼ်သင်ၶႃႈ..”
“ၵေႃႈၼၼ်ႉယဝ်ႉ.. ဢမ်ႇလူဝ်ႇၸၢႆႇၵေႃႈလႆႈ..ႁႃးၵေႃႉတေၸတ်းၵၢၼ်ၵူၺ်း..”
ၼွင်ႉလႅင်းၵေႃႈဢွၵ်ႇၵႂႃႇသေ၊ လိုၼ်းၼုမ်ႇဢၼ်ႁၼ်ၼွင်ႉလႅင်း ဢွၵ်ႇမႃးတီႈတိုၼ်းႁၢၼ်ၶႃၼၼ်ႉ လႅပ်ႈၶႃတေပႆႇၸၢႆႇၵႃႈမၼ်းၼႆလႄႈ ထၢမ်ႁႂ်ႈယုမ်ႇၸႂ်ယူႇ
“ၽိူၼ်ၼၼ်ႉ.. ၸွင်ႇၶဝ်လႆႈပၼ်ၵႃႈမၼ်းၶႃႈ..”
“ၶဝ်ပဵၼ်ၸဝ်ႈၶွင်လၢၼ်ႉယဝ်ႉ ဢမ်ႇလူဝ်ႇၵဵပ်းၵႃႈမၼ်းၼႃ”
မိူဝ်ႈငိၼ်းၸိူင်ႉၼၼ် လိုၼ်းၼုမ်ႇၸင်ႇဝူၼ်ႉထိုင်ၶိုၼ်း ၼႂ်းပၢင်ၵုမ်ဢၼ်ၸိုၼ်ႈၶိူဝ်း သင်ႇလၢတ်ႈမၼ်းၼၼ်ႉယဝ်ႉၵေႃႈ ယဵၼ်ႉၸႂ်ဢမ်ႇလႆႈ တႃႇတေၶဝ်ႈၵႂႃႇၸူးၶႃသွင်ၵေႃႉသေ
“ဝၼ်းမိူဝ်ႈၼႆႉ..ၶဝ်ႈၽၵ်းတီႈလၢၼ်ႉ..ၸွင်ႇဝၢၼ်ထုၵ်ႇသူပ်းယူႇၶႃႈ”
“ဢိုမ်ႈ!.. ဝၢၼ်တေႉယဝ်ႉ” တိုၼ်းႁၢၼ်တွပ်ႇၵႂႃႇၼင်ႇပေႃးၸႂ်။
လိုၼ်းၼုမ်ႇၵေႃႈ တူၺ်းသဵၼ်ႈမၢႆၶဝ်ႈၽၵ်းဢၼ်ၶႃၵိၼ်ၼၼ်ႉလႄႈ လၢတ်ႈၵႃႈၶၼ်ၵႂႃႇတီႈၶႃသေ ဢဝ်တိုၼ်းႁၢၼ်သမ်ႉပေႃးမိုင်လူင်ၵႂႃႇၵမ်းၼိုင်ႈယဝ်ႉ။
“ႁဝ်းပဵၼ်ၸဝ်ႈၶွင်လၢၼ်ႉၼႆႉယဝ်ႉ.. ၸမ်ပဵၼ်တေလႆႈၸၢႆႇၵႃႈမၼ်းယူႇၶႃႈႁႃႉ”
“ယွမ်းၼွမ်းယူႇၶႃႈ.. ၸွမ်းလူၺ်ႈပိုၼ်ႉတီႈၼႆႈ.. ပဵၼ်တီႈၶႅၵ်ႇမႃးၵိၼ်ၵူၺ်းလႄႈ ၶဝ်ႈၽၵ်းဢၼ်တမ်းၼိူဝ်ၽိူၼ်ၼႆႉၵေႃႈ..ထုၵ်ႇမၢႆဝႆႉတင်းမူတ်းယဝ်ႉ သင်ၸိူဝ်ႉဝႃႈ..မီးသၢႆမၢႆမၼ်းယူႇ..ငိုၼ်းသမ်ႉယွမ်းၵႂႃႇၼႆ တေယၢပ်ႇၸႂ်ၽၢႆႇၵၢၼ်ငိုၼ်းၶဝ်ၶႃႈဢေႃႈ ပဵၼ်ၸဝ်ႈၶွင်လၢၼ်ႉ… ယိုင်ႈၶႅၼ်းတေပွင်ႇၸႂ်ၼိူဝ်လွင်ႈၼႆႉလီယူႇဢမ်ႇၸႂ်ႈၶႃႈႁႃႉ..”
“ဢမ်ႇပဵၼ်ႁင်ၸဝ်ႈၶွင်လၢၼ်ႉ..မိူဝ်ႈၼႆႉႁႃးလဵင်ႉၵူၺ်း” ၸိုၼ်ႈၶိူဝ်းၵေႃႈ ၸၢႆႇၵႃႈမၼ်းပၼ်တီႈလိုၼ်းၼုမ်ႇၵႂႃႇယဝ်ႉ။
တိုၼ်းႁၢၼ်ၼၼ်ႉ ဢွၵ်ႇလၢၼ်ႉမႃးၸွမ်းၸိုၼ်ႈၶိူဝ်း တင်းၼႃႈတူႇတူႇလူင်သေ
“ပဵၼ်သင်လႄႈ ဢွၼ်ၵၼ်ၵႂႃႇၵိၼ်တီႈၶႅၵ်ႇၶဝ်ၵိၼ်ၼၼ်ႉလႃႇ”
“ႁႃးပဵၼ်ၶႅၵ်ႇၵူၺ်းလူး.. ပဵၼ်သင်တေၵိၼ်ဢမ်ႇလႆႈ..”
“ယဝ်ႉ..ပဵၼ်သင်ႁႃးသမ်ႉတေလႆႈၸၢႆႇငိုၼ်း တီႈလၢၼ်ႉၸဝ်ႈၵဝ်ႇလႃႇ ဢမ်ႇမီးၸဝ်ႈၶွင်လၢၼ်ႉၵေႃႉလႂ် ထုၵ်ႇလုၵ်ႈၼွင်ႉၵဵပ်းငိုၼ်းလေႃႇၼႃႈ ႁဵတ်းႁႂ်ႈၵၼ်ၼႃႈလူႉၵူၺ်းလူင်”
“ၵေႃႉႁႃးၵူၺ်းလူးပဵၼ်ၸဝ်ႈၶွင်လၢၼ်ႉ..ႁႃးပဵၼ်ၶႅၵ်ႇၵူၺ်းၼႃႇ”
တိုၼ်းႁၢၼ်ၵေႃႈလၢႆႈၵႂၢမ်းၵႂႃႇသေ
“မႃးႁွတ်ႈထိုင်တီႈလၢၼ်ႉၸိူင်ႉၼႆ..ၵိၼ်ၶဝ်ႈလွင်ႈလဵဝ်ၵူၺ်းတႄႉဢမ်ႇၸႂ်ႈယူဝ်ႉ”
ၸိုၼ်ႈၶိူဝ်းမိုင်ဝူၼ်ႉၵႅပ်ႉၼိုင်ႈသေ ယုမ်ႉဝၢႆႈလႅင်ႈဢွၵ်ႇၵႂႃႇၼင်ႇမီးၽႅၼ်ယဝ်ႉ
“ဢိုမ်ႈ! မႃးၵိၼ်ၶဝ်ႈၵူၺ်း”
ၸိုၼ်ႈၶိူဝ်းၼၼ်ႉ သမ်ႉဝႃႈတေပဵၼ်လၢၼ်ႉမၼ်းသေတႃႉ ပေႃးမႃးၵိၼ်ၶဝ်ႈတီႈလၢၼ်ႉ မိူဝ်ႈလႂ်ၵေႃႈယဝ်ႉ တိုၼ်းၸၢႆႇၵႃႈမၼ်းတႃႇသေႇ မိူၼ်ဝႃႈတေယၢမ်ႈၵႂႃႇပႅတ်ႈ ၼၼ်ႉယဝ်ႉ။
လိုၼ်းၼုမ်ႇၼၼ်ႉၵေႃႈ လႆႈယွၼ်းၶိုၼ်းဝႂ်ဢွၵ်ႇၵၢၼ်ပီႈၸိင်ႇ တီႈလုင်းဢွင်ႇၼႆယူႇ ၵူၺ်းၵႃႈ လုင်းဢွင်ႇဢမ်ႇယူႇလႄႈ ႁႂ်ႈမၼ်းပႂ်ႉဢဝ်မိူဝ်ႈၽုၵ်ႈၼႆယဝ်ႉ။
တွၼ်ႈၵဝ်ႈသုတ်းၵႂႃႇယဝ်ႉ သိုပ်ႇတူၺ်းထႅင်ႈတွၼ်ႈသိပ်းၶႃႈ။
ႁပ်ႉထွမ်ႇပၼ်ႁႅင်းလူၺ်ႈသဵင် တၢင်း YouTube လႆႈယူႇၶႃႈ။
