တွၼ်ႈသၢမ်
တိုၼ်းႁၢၼ်ၵေႃႈ မိူဝ်ႈႁၼ်ၸိုၼ်ႈၶိူဝ်း တူၺ်းလိုၼ်းၼုမ်ႇယဝ်ႉ ယုမ်ႉဢွၵ်ႇမႃးၼၼ်ႉ ပဵၼ်ဢၼ်ပႅၵ်ႇႁူပႅၵ်ႇတႃ တႃႇမၼ်းတႄႉတႄႉလႄႈ ၸင်ႇထၢမ်ၸိုၼ်ႈၶိူဝ်းၵႂႃႇဝႃႈ
“သူၼ်ၸႂ်ၶဝ်ယူႇႁႃႉ”
“ဢိုမ်ႈ!”
“လၢတ်ႈသိုဝ်ႈသိုဝ်ႈၸိူင်ႉၼႆ ႁႃးလမ်းၸွမ်းပၢႆးဝူၼ်ႉၵေႃႉႁဝ်းဢမ်ႇၶိုတ်းလႆႈယဝ်ႉ ႁူဝ်ၸႂ်ဢၼ်ၵႅၼ်ႇၶႅင်မိူၼ်လဵၵ်းၼၼ်ႉ တၼ်းလူႉလႅဝ်ၵႂႃႇမိူဝ်ႈလႂ်ယဝ်ႉလႃႇ”
ၸိုၼ်ႈၶိူဝ်းတူၺ်းၼႃႈ တိုၼ်းႁၢၼ်သေ
“ႁႃ! ” ၸိုၼ်ႈၶိူဝ်းမိူၼ်ဢမ်ႇပွင်ႇၸႂ် တိုၼ်းႁၢၼ်ၵေႃႈမႄးသပ်းလႅင်းၼႄ
“ဢမ်ႇၸႂ်ႈဝႃႈၵေႃႉႁႃးၼၼ်ႉသူၼ်ၸႂ်ၶဝ်ယူႇႁႃႉ မိူဝ်ႈလၢႆဝၼ်းၼၼ်ႉၵေႃႈ ယုၵ်ႉယွင်ႈၶဝ်ႁေ မိူဝ်ႈၼႆႉၵေႃႈ ၵိုတ်းတူၺ်းၶဝ်ယဝ်ႉ သမ်ႉပၢႆႁၢမ်ႈႁႃးဢမ်ႇပၼ်ၶဝ်ႈၵႂႃႇၸွႆႈထႅင်ႈၵွၼ်ႇ”
“မိူဝ်ႈမီးပၼ်ႁႃမႃးၼၼ်ႉ ၽူႈပွင်ၵၢၼ် တေလႆႈပဵၼ်ၵူၼ်းၵႄႈလိတ်ႈပၼ်တႃႇသေႇႁႃႉ ပေႃးၼၼ် တေၸၢင်ႈမႃးႁဵတ်းသင်လႃႇ ၵူၼ်းႁဵတ်းၵၢၼ် ၽူႈပွင်ၵၢၼ်မၼ်း ႁဵတ်းႁင်းၵူၺ်းၵေႃႉလဵဝ်ဢမ်ႇလီႁိုဝ်…”
“ႁဵတ်းၵႂႃႇႁဵတ်းမႃး ႁႃးၽိတ်းႁေယဝ်ႉၼႆႉၼေႃႈ…”
“ႁဝ်းဝႃႈ ၶဝ်ပဵၼ်ၵူၼ်းႁဵတ်းၵၢၼ်ဢၼ်ႁဝ်းလူဝ်ႇ… ၵေႃႉႁႃးၵေႃႈ ၸၢမ်းပၵ်းၸႂ်သႂ်ႇၸႂ်တူၺ်းလႄႈ တေလႆႈမေႃတူၺ်းၵူၼ်းမႃးဢိတ်းၼိုင်ႈ မိူဝ်ႈလိူၵ်ႈၵူၼ်းၶဝ်ႈမႃးႁဵတ်းၵၢၼ်ၸိူဝ်းၼႆႉ ပေႃးၵူၼ်းႁဵတ်းၵၢၼ်လီၵေႃႈ ၼႃႈၵၢၼ်ၵေႃႈတေၵႂႃႇလႆႈလီၼၼ်ႉယဝ်ႉ”
တိုၼ်းႁၢၼ် တူၺ်းၼႃႈၸိုၼ်ႈၶိူဝ်းၸမ်ၸမ်ယဝ်ႉ
“ပဵၼ်သင်လႄႈမိူဝ်ႈၵႆႈၵေႃႉႁႃးယုမ်ႉဢွၵ်ႇမႃးလႃႇ ပၢၵ်ႇဝၼ်းႁဵင်ပီႊ တႃႇယုမ်ႉတေႃႇပိူၼ်ႈၼၼ်ႉႁႃယၢပ်ႇပေႃးတၢၼ်ႇႁင် မိူဝ်ႈၼႆႉသမ်ႉယုမ်ႉဢွၵ်ႇမႃးငၢႆႈငၢႆႈၸိူင်ႉၼၼ် ႁႃးထၢင်ႇပိူင်ႈဝႃႈ ႁူဝ်ၸႂ်ၵေႃႉႁႃးၼၼ်ႉ ဢမ်ႇၸႂ်ႈလဵၵ်းယဝ်ႉ..”
တူၺ်းမိူၼ်ဝႃႈ ၸိုၼ်ႈၶိူဝ်းလႅပ်ႈတိုၵ်ႉႁူႉတူဝ်မိူၼ်ၵၼ်ၵူၺ်း ဝႃႈမၼ်းယုမ်ႉဢွၵ်ႇမႃး
“ၸိူင်ႉၼၼ်ႁႃႉ”
ဝၢႆးသေၸိုၼ်ႈၶိူဝ်းၶဝ်ပူၼ်ႉၵႂႃႇယဝ်ႉ တီႈၼႂ်းလၢၼ်ႉဢၼ်မိူၼ်တေလီမႃးၼၼ်ႉၵေႃႈ ယိုင်ႈၶႅၼ်းတိူဝ်းလွင်ႈသုၵ်ႉယုင်ႈမႃးထႅင်ႈ မီးၽူႈၸၢႆးလူင်မွၵ်ႈ ႁႃႈၵေႃႉၼႆႉ ၽႃၽိူဝ်းၵၼ်လူင်ၶဝ်ႈမႃးၼႂ်းလၢၼ်ႉ ဢၼ်မီးၽၢင်ႁၢင်ႈဢမ်ႇလီတူၺ်းသေဢိတ်းၼၼ်ႉယဝ်ႉ။
ၶဝ်ၵေႃႈ ဢွၼ်ၵၼ်ႁွင်ႉသေႃႇလူင်ၶဝ်ႈမႃးၼႂ်းလၢၼ်ႉၼၼ်ႉဝႃႈ−
“လၢၼ်ႉၶဝ်ႈၽၵ်းလၢၼ်ႉၼႆႉ ႁုင်မိုဝ်ႉဢမ်ႇမူတ်းသႂ် ႁဵတ်းႁႂ်ႈတွင်ႉႁဝ်းၵႂႃႇပဵၼ်လၢႆဝၼ်း…. တေႃႇထိုင်ယၢမ်းလဵဝ်ၵေႃႈဢမ်ႇပႆႇၶႅၼ်းလူးၵွၼ်ႇ.. ၸူးႁေဝႃႈမၼ်းဢမ်ႇမီးႁင်သေ ဢမ်ႇၸၢင်ႈဢွၵ်ႇၵူၺ်းယဝ်ႉ..”
“လႆႈတင်းၵႃႈၶၼ်သုင်လၢႆလၢႆၵူၺ်း ဢမ်ႇႁဵတ်းပၼ်လီလီ”
“ၸႂ်ႈယဝ်ႉ!” ထႅင်ႈၵေႃႉၼိုင်ႈလၢတ်ႈၸွမ်း ႁၢင်ႈၽၢင်သမ်ႉပေႃးဢမ်ႇတူၺ်းလႆႈသေဢိတ်းၼၼ်ႉယဝ်ႉ။
မိူဝ်ႈပဵၼ်ၸိူင်ႉၼၼ် သၢႆတႃၵူၼ်းၼႂ်းလၢၼ်ႉၵေႃႈ ဢွၼ်ပၵ်းတႃမႃးၸူးတီႈၶဝ်မူတ်း။ မိူဝ်ႈဢၼ်လႆႈႁၼ် ၽၢင်ႁၢင်ႈၶဝ်ၼၼ်ႉမႃးၵေႃႈ ႁဵတ်းႁႂ်ႈၵူၼ်းၼႂ်းလၢၼ်ႉၵိၼ်ၶဝ်ႈပေႃးဢမ်ႇၶႂ်ႈလူင်းယဝ်ႉ တင်းဢၢႆတူဝ်ၶဝ်ၼၼ်ႉသေ တွင်ႉလႅပ်ႈတေၵႂႃႇလၢႆဝၼ်းလၢႆၶိုၼ်းယူႇမိူၼ်ၵၼ်။
ၶႅၵ်ႇဢၼ်တိုၵ်ႉၼင်ႈၵိၼ်ယူႇၼၼ်ႉၵေႃႈ ႁိုဝ်တေၵိၼ်လႆႈထႅင်ႈယဝ်ႉ ၵူဝ်တေမိူၼ်ၼင်ႇဢၼ်ၶဝ်လၢတ်ႈမႃးၼၼ်ႉလႄႈ ဢွၼ်ၵၼ်လုၵ်ႉၶိုၼ်ႈသေ ႁွင်ႉပၢဝ်ႇႁႃ ၽူႈၸတ်းၵၢၼ်ႁႂ်ႈမႃးၵႄႈၶႆ လၢတ်ႈၼႄပၼ်ၵႂႃႇၼႆယူႇ။
“လၢၼ်ႉယႂ်ႇၸိူင်ႉၼႆၵေႃႈ မီးလွင်ႈၸိူင်ႉၼႆသေႁႃႉၼႆႉ ၵိၼ်ဢမ်ႇလူင်းယဝ်ႉ”
“ၵဵပ်းငိုၼ်းၵႃႈၶၼ်ယႂ်ႇၵေႃႈ ထုၵ်ႇလီႁဵတ်းပၼ်လီလီလေႃႇ”
“မၼ်းပဵၼ်တေႉယူႇႁႃႉ”
“လၢၼ်ႉၸိုဝ်ႈသဵင်လီ ၵႃႈၶၼ်ယႂ်ႇၸိူင်ႉၼႆ ႁဵတ်းတၢင်းၵိၼ်ဢၼ်ဢမ်ႇမူတ်းသႂ် မီးတေႉတေႉႁႃႉ”
သဵင်ၶဝ်ပေႃးဢူၼ်ပၼ်းလူင်ၵႂႃႇမူတ်း ၊ ပီႈၸိင်ႇၵေႃႈ မိူဝ်ႈႁၼ်ပဵၼ်ၸိူင်ႉၼၼ် ႁႂ်ႈလိူၼ်သႂ်ၵႂႃႇႁွင်ႉၽူႈၸတ်းၵၢၼ်ယူႇ၊ မိူဝ်ႈၶဝ်ႈၵႂႃႇၼႂ်းႁွင်ႈၽူႈၸတ်းၵၢၼ်ၼၼ်ႉ သမ်ႉႁၼ်မႅၼ်ႈပႃး ၸိုၼ်ႈၶိူဝ်းလႄႈတိုၼ်းႁၢၼ်သေ ဢဝ်မၼ်းသမ်ႉပေႃးၵိုတ်းမိုင်လူင်ၵႂႃႇ။
“မီးလွင်ႈသင် ပဵၼ်သင်လႄႈၶဝ်ႈမႃးပေႃးဢမ်ႇတွႆႇၽၵ်းတူလႃႇ”
“ၵွပ်ႈဝႃႈ… ၼႂ်းလၢၼ်ႉၼၼ်ႉ မီးလွင်ႈသုၵ်ႉယုင်ႈယဝ်ႉ”
“ဝႃႈႁိုဝ်ၵေႃ!!…” ၶဝ်ၵေႃႈႁိပ်ႈၼႅတ်ႈဢွၼ်ၵၼ်ၵႂႃႇမူတ်းယဝ်ႉ။
လိုၼ်းၼုမ်ႇ ဢၼ်ၸုၵ်းယူႇၼႂ်းၵႄႈၽုင်ၵူၼ်းၼၼ်ႉ ထုၵ်ႇသၢႆတႃ၊ သူပ်းၵူၼ်းလၢတ်ႈၸူးထၢမ်တင်းၼမ် သဵင်ၵႂၢမ်းလၢတ်ႈသူၼ်ႈသိၼ်းသၢၼ်ၵၼ် သမ်ႉဢမ်ႇႁူႉၶေႃႈမၼ်းလီလီ တေတွပ်ႇၶိုၼ်းၵေႃႈပေႃးဢမ်ႇၸၢင်ႈ၊ မၼ်းၸင်ႇဝႆႉၸႂ်ၼိမ်ၼိမ်ယဝ်ႉ ထွတ်ႇဢွၵ်ႇသိူဝ်ႈဢၼ်ႁႄႉဝူၺ်ႇၼၼ်ႉသေ ဢဝ်ႁႅင်းမိုဝ်းမၼ်း တူပ်းသႂ်ႇပၢၼ်ႉ ဢၼ်မီးယူႇၼႂ်းမိုဝ်းၼၼ်ႉလင်လင်သၢမ်ၵမ်း ထိုင်တီႈပိူၼ်ႈဢွၼ်ၵၼ်ယၵ်ႉတူၺ်းမၼ်းမူတ်း။
“ဢွၼ်ၵၼ်ယဵၼ်သဵင်ဢိတ်းၼိုင်ႈၶႃႈ ၽႂ်မီးလွင်ႈၶႂ်ႈထၢမ် လွင်ႈၶွင်ႈၶမ်ၼႆၵေႃႈ ထၢမ်ၵမ်းၵေႃႉၶႃႈလႄႈ တေလႆႈႁူႉၶေႃႈမၼ်းလီ တေလႆႈတွပ်ႇပၼ်ႁႂ်ႈမၼ်းပေႃးၸႅင်ႈလႅင်းလႆႈ”
ၵူၼ်းၵေႃႉၼိုင်ႈၵေႃႈထၢမ်ၸူး
“သူတေလၢတ်ႈၸိူင်ႉႁိုဝ် လွင်ႈဢၼ်ၶဝ်လၢတ်ႈမႃးၸိူဝ်းၼၼ်ႉ မၼ်းပဵၼ်လွင်ႈတေႉယူႇႁႃႉ”
ၵူၼ်းၵေႃႉၼိုင်ႈ ၼႂ်းႁႃႈၵေႃႉၼၼ်ႉၵေႃႈ လၢတ်ႈၶိုၼ်းၵႂႃႇဝႃႈ
“ပဵၼ်ၵူၼ်းတမ်းၶႅၵ်ႇဢွၼ်ႇၵူၺ်း တေႁူႉလႆႈၸိူင်ႉႁိုဝ်ဝႃႈ ၵူၼ်းႁုင်မိုဝ်ႉမၼ်းႁဵတ်းၽၵ်းမူတ်းသႂ်ဢမ်ႇမူတ်းသႂ် မၼ်းၵေႃႈတိုၼ်းတေလၢတ်ႈဝႃႈ မူတ်းသႂ်ယူႇၵူၺ်းလေႃႇ ပေႃးလၢတ်ႈဝႃႈဢမ်ႇလီၵေႃႈ တေထုၵ်ႇလိုပ်ႈဢွၵ်ႇၵၢၼ်ႁေယဝ်ႉၵူၺ်းဢိူဝ်ႈ တေဢဝ်သင်မႃးထတ်းသၢင်ၼႄလႆႈ”
“ၼၼ်ႉယဝ်ႉ တေဢဝ်သင်မႃးထတ်းသၢင်လႆႈလႃႇ”
လိုၼ်းၼုမ်ႇၶိုၼ်ႈသဵင်လင်မႃးထႅင်ႈသေ
“ၶႃႈတေဢဝ်တူဝ်ၵဝ်ႇထတ်းသၢင်ၼႄၵူၺ်း ပေႃးဝႃႈမၼ်းဢမ်ႇမူတ်းသႂ်တေႉ ၶႃႈယွမ်းထုၵ်ႇလိုပ်ႈဢွၵ်ႇၵၢၼ်ယူႇ ၵူၺ်းၵႃႈ ၸွင်ႇမီးသၢၵ်ႈသေႇမၼ်းႁိုဝ်ဝႃႈ ၶဝ်ႈၽၵ်းႁဝ်းၼၼ်ႉမၼ်းဢမ်ႇမူတ်းသႂ်တေႉတေႉ”
“ဢၼ်ႁဝ်းပဵၼ်ယူႇၼႆႉ ဢမ်ႇၸႂ်ႈသၢၵ်ႈသေႇမၼ်းၼႄႇ!…”
လိုၼ်းၼုမ်ႇ မိုင်ယၵ်ႉတူၺ်းၸူးတီႈၶဝ် ယဵၼ်ၵႂႃႇၵမ်ႉၼိုင်ႈ မိူၼ်ဝႃႈ ၶဝ်ၼၼ်ႉၵေႃႈ တေဢမ်ႇပေႃးၶႂ်ႈယူႇသဝ်းလီလီမႃးယဝ်ႉ လိုၼ်းၼုမ်ႇ သုတ်ႉၶဝ်ႈၸမ် ၶဝ်ထႅင်ႈသေ
“ႁပ်ႉႁွင်းလႆႈယူႇၶႃႈႁႃႉ ဝႃႈမၼ်းၸႂ်ႈတေႉယူႇၼႆ မီးသၢၵ်ႈသေႇသင်လၢတ်ႈလႆႈထႅင်ႈၶႃႈ ႁႂ်ႈမၼ်းပေႃးၵိုင်ႇတၢၼ်ႇ တင်းဢၼ်ၶႃႈတေယွမ်းၸုၼ်ႉၼႃႈၵၢၼ်ၶႃႈၵႂႃႇလႆႈ”
ပီႈၸိင်ႇဢၼ်တူၺ်းၸွမ်းငဝ်းလၢႆးယူႇ ၵူႈၶၵ်ႉၵူႈတွၼ်ႈၼၼ်ႉၵေႃႈ ယဵၼ်ႉဢမ်ႇလႆႈ သမ်ႉပေႃးၶႂ်ႈလၢၵ်ႈဢဝ်တူဝ်လိုၼ်းၼုမ်ႇဢွၵ်ႇမႃးယဝ်ႉ ၵူၺ်းၵႃႈ လိူၼ်သႂ်သမ်ႉႁွတ်ႈမႃးသေ ထုၵ်ႇၸိုၼ်ႈၶိူဝ်းႁၢမ်ႈဝႆႉယူႇ။
“မိူဝ်ႈဝၼ်းသိုၼ်းၼၼ်ႉ ႁဝ်းလႆႈဢွၼ်ၵၼ်မႃးၵိၼ်ၶဝ်ႈၽၵ်းတီႈလၢၼ်ႉၼႆႉၵေႃႈ လႆႈသင်ႇသိုဝ်ႉၵိၼ်ၸွမ်းၼင်ႇ လၢႆးၵၢၼ်ၶဝ်ႈၽၵ်းဢၼ်မီးဝႆႉၼၼ်ႉၵူၺ်းၼင်ႇၵဝ်ႇ ဝၢႆးသေဢွၵ်ႇလၢၼ်ႉၵႂႃႇ ဢမ်ႇပႆႇထိုင်ႁိူၼ်း တွင်ႉႁဝ်းပေႃးၵႂႃႇယဝ်ႉ”
“ဢွၼ်တၢင်းတေမႃးၵိၼ်တၢင်းၵိၼ်ၼႂ်းလၢၼ်ႉၼႆႉ ႁဝ်းၵေႃႈယင်းတိုၵ်ႉလီယူႇ သင်ပဵၼ်ယွၼ်ႉတၢင်းၵိၼ်ဢွၼ်တၢင်းၼၼ်ႉ ႁဝ်းၵေႃႈတမ်ႉဢမ်ႇလႆႈၵိၼ်ၶဝ်ႈၸွမ်းၵၼ်လူး မၼ်းဢမ်ႇထုၵ်ႇလီပဵၼ်မိူၼ်ၵၼ်တင်းမူတ်းလေႃႇ”
“ဝၢႆးသေမႃးၵိၼ်ၼႂ်းလၢၼ်ႉၼႆႉယဝ်ႉ ႁဝ်းၵေႃႈဢမ်ႇလႆႈၵႂႃႇၵိၼ်တီႈလႂ်ထႅင်ႈ ဝၢႆးသေၵိၼ်ယဝ်ႉၵေႃႈ တွင်ႉပေႃးၵႂႃႇၵမ်းလဵဝ် လိူဝ်သေတၢင်းၵိၼ်ယဝ်ႉ တေပဵၼ်ႁင်လႆႈထႅင်ႈ”
ထွမ်ႇၶဝ်လၢတ်ႈသုတ်းသုတ်းယဝ်ႉ လိုၼ်းၼုမ်ႇၵေႃႈ လၢတ်ႈသဵင်ဢူၼ်ႈဢွၼ်ႇၵႂႃႇၸူး “ပဵၼ်မႃးပေႃးလႆႈပဵၼ်သၢမ်ဝၼ်းယဝ်ႉ တူၺ်းႁၢင်ႈၽၢင်ၵေႃႈႁူႉယဝ်ႉၶႃႈ ဝႃႈမၼ်းၶၢၼ်ၸႂ်ၵႃႈႁိုဝ် ပေႃးႁႂ်ႈလီ သူထုၵ်ႇလီလိုဝ်ႈႁိူဝ်ႉယူႇၶႃႈဢေႃႈ ၵိၼ်ယႃမႃးယူႇၶႃႈႁႃႉ”
ၵူၼ်းၵေႃႉၼိုင်ႈၵေႃႈတွပ်ႇ “ၵိၼ်မႃးယဝ်ႉၶႃႈ” လွင်ႈမႆႈၸႂ်ဢၼ်သၢဝ်ၼုမ်ႇႁၢင်ႈလဝ်းမေႃလၢတ်ႈၸူးၼၼ်ႉ ႁဵတ်းႁႂ်ႈဢမ်ႇတွပ်ႇၵေႃႈဢမ်ႇလႆႈ။
လိုၼ်းၼုမ်ႇ ယုမ်ႉၸူးၶႅၵ်ႇၼႂ်းလၢၼ်ႉၼၼ်ႉသေယဝ်ႉ
“ယွမ်းၼွမ်းယႂ်ႇၼမ် ဢၼ်ႁဵတ်းႁႂ်ႈမီးလွင်ႈသုၵ်ႉယုင်ႈၼႂ်းဝၼ်းမိူဝ်ႈၼႆႉ ထိုင်တီႈႁဵတ်းႁႂ်ႈပီႈၼွင်ႉၶႅၵ်ႇႁဝ်း ပဵၼ်ၸႂ်ဢမ်ႇလီ ယွၼ်ႉၶဝ်ႈၽၵ်းဢၼ်ဢမ်ႇမူတ်းသႂ်ၼႆၼၼ်ႉ ၶႃႈဢဝ်ၼႃႈၵၢၼ်ၶႃႈ ႁပ်ႉၶၢမ်ႇယူႇဝႃႈ လၢၼ်ႉၼႆႉ ၵူႈၶၵ်ႉၵူႈတွၼ်ႈ တႄႇၸဵမ်သုၵ်ႈလၢင်ႉမိုဝ်ႉၵႅင်၊ မေႃႈႁုင်သုၵ်း တိုၼ်းမူတ်းသႂ်လီ၊ ပေႃးဝႃႈၶဝ်ႈၽၵ်းႁဝ်းၼၼ်ႉ မၼ်းဢမ်ႇမူတ်းသႂ် ႁၢႆႉႁႅင်းလႆႈထိုင်တီႈမီးၽၢင်ႁၢင်ႈမိူၼ်ၼင်ႇ ဢၼ်ႁဝ်းလႆႈႁၼ်ၼႆႉၸိုင် ႁၼ်ထိုင်ဝႃႈ ၵူၼ်းပဵၼ်တေဢမ်ႇၵွမ်ႉၵႃးၼႂ်းႁႃႈၵေႃႉၼႆႉၵူၺ်း”
မိူၼ်ဝႃႈ ၶႅၵ်ႇၸိူဝ်းၼၼ်ႉၵေႃႈ ၸႂ်ယဵၼ်မႃးသေ ဝူၼ်ႉတူၺ်းၸွမ်းဢၼ်လိုၼ်းၼုမ်ႇလၢတ်ႈၼၼ်ႉယူႇ၊ ၶဝ်ႁႃႈၵေႃႉၼၼ်ႉၵေႃႈ ဢမ်ႇၸၢင်ႈလၢတ်ႈသင် လိူဝ်သေသူင်ႇသဵင်ၶၢင်းဢွၵ်ႇမႃးၵူၺ်း လိုၼ်းၼုမ်ႇၵေႃႈ ဢမ်ႇသူၼ်ၸႂ်သေ သိုပ်ႇလၢတ်ႈထႅင်ႈ
“သင်ဝႃႈ လၢၼ်ႉႁဝ်းမီးလွင်ႈႁဵတ်းသၢင်ႈၸိူင်ႉၼႆမႃးၸိုင် တေဢမ်ႇပဵၼ်လၢၼ်ႉၶဝ်ႈၽၵ်း ဢၼ်ၶၢႆလီလႄႈ ဢၼ်ၸိုဝ်ႈသဵင်လိုဝ်းလင်လႆႈ ပေႃးမၼ်းဢမ်ႇလီတေဢမ်ႇမီးၽႂ်ၶႂ်ႈမႃးပၼ်ႁႅင်းလႄႈ ၵူၼ်းဢၼ်ယၢမ်ႈမႃးၵိၼ်ၵေႃႈ တေဢမ်ႇမႃးထႅင်ႈယဝ်ႉ ၵူၺ်းၵႃႈ ဢၼ်လႆႈႁၼ်ၵူၼ်းတဵမ်လၢၼ်ႉၼႂ်းဝၼ်းမိူဝ်ႈၼႆႉ ယွၼ်ႉပီႈၼွင်ႉၶႅၵ်ႇၵူႈၵေႃႉ ဝႆႉၸႂ်ၼိူဝ်လၢၼ်ႉႁဝ်းၶႃႈလႄႈၸင်ႇမႃးၵိၼ်ယဝ်ႉ လိူဝ်ၼၼ်ႉ ၶႅၵ်ႇဢၼ်ယၢမ်ႈမႃးၵိၼ်ယူႇၵူႈဝၼ်းၵေႃႈ မိူဝ်ႈၼႆႉၵေႃႈယင်းမႃးလူးၵွၼ်ႇ” ဝၢႆႇတူၺ်း ၶႅၵ်ႇၸိူဝ်းဢၼ်ၵႆႉမႃးၵိၼ်တႃႇသေႇၼၼ်ႉယဝ်ႉ ၶဝ်ၸိူဝ်းၼၼ်ႉၵေႃႈ ယုမ်ႉၸူးမၼ်းၵႂႃႇယူႇ။ လၢတ်ႈလႆႈဝႃႈ သၢင်ႈပၼ်လွင်ႈယုမ်ႇၸႂ်ၼိူဝ်ၶႅၵ်ႇၼႂ်းလၢၼ်ႉၼၼ်ႉ မႃးလႆႈထႅင်ႈၶၵ်ႉၼိုင်ႈယဝ်ႉ။
“မိူဝ်ႈမီးပၼ်ႁႃၸိူင်ႉၼႆမႃးယဝ်ႉ ၽၢႆႇတၢင်းလၢၼ်ႉႁဝ်းၶႃႈၵေႃႈ တေၶိုၼ်းၵူတ်ႇထတ်းၸႅတ်ႈတူၺ်း ႁႂ်ႈၸႅင်ႈၸႅင်ႈလႅင်းလႅင်းယူႇၶႃႈ ပီႈၼွင်ႉၶႅၵ်ႇၵူႈၵေႃႉ သိုပ်ႇၵိၼ်ၶဝ်ႈၵႂႃႇၼင်ႇၵတ်းယဵၼ်ၸႂ်လႆႈယူႇၶႃႈ”
ၼႂ်းလၢၼ်ႉၼႆႉၵေႃႈ လီမႃးၶိုၼ်းမိူၼ်ၵဝ်ႇယဝ်ႉ။ မိူဝ်ႈဢၼ်လိုၼ်းၼုမ်ႇ ၽၢတ်ႇမူႇၶဝ်ႈၽုင်ၵူၼ်း ဢွၵ်ႇၵႂႃႇယဝ်ႉၼၼ်ႉ လႆႈႁၼ်ၽူႈၸတ်းၵၢၼ်၊ ၵူၼ်းႁဵတ်းၵၢၼ် ပေႃးတဵမ်ၵႂႃႇမူတ်း မိုင်ယၵ်ႉတူၺ်းမၼ်း သၢႆတႃလၢႆႁူၺ်ႇ တူၺ်းတီႈမၼ်းၵေႃႉလဵဝ် ဢဝ်မၼ်းႁဵတ်းသင်ပေႃးဢမ်ႇၶႂ်ႈမေႃယဝ်ႉ။
မိူဝ်ႈပဵၼ်ၸိူင်ႉၼၼ် တိုၼ်းႁၢၼ်ၵေႃႈ
“ၽူႈၸတ်းၵၢၼ် ဢမ်ႇမီးလွင်ႈသင်တေလၢတ်ႈတီႈလိုၼ်းၼုမ်ႇၽွင်ႈႁႃႉ”
“ဢေႃႈ… မီးတင်းၼမ်ၶႃႈယဝ်ႉ”
ၼႂ်းႁွင်ႈႁဵတ်းၵၢၼ် ၽူႈၸတ်းၵၢၼ်ၼၼ်ႉ လိုၼ်းၼုမ်ႇၵေႃႈ ၼင်ႈယူႇတႂ်ႈသၢႆတႃ ၽူႈၸၢႆးသၢမ်ၵေႃႉ တိုၼ်းႁၢၼ်၊ လုင်းဢွင်ႇ လႄႈ ၸိုၼ်ႈၶိူဝ်း ဢၼ်မိူၼ်သူၼ်ၸႂ်ဢမ်ႇသူၼ်ၸႂ်သင်ၵႃႈႁိုဝ်ၼၼ်ႉၵေႃႈ တူၺ်းၸူးလိုၼ်းၼုမ်ႇမိူၼ်ၵၼ် ၵူၺ်းဢမ်ႇမီးၽႂ်လၢတ်ႈၵႂၢမ်းသေၵေႃႉ ဢဝ်လိုၼ်းၼုမ်ႇယူႇယၢပ်ႇမႃးသေ ပေႃးတႅၵ်ႈတူၺ်းသၢႆတႃၵူၼ်းၼမ်မိူဝ်ႈၵႆႈၼၼ်ႉ ယင်းဢမ်ႇလီၵူဝ်တၢၼ်ႇ သၢႆတႃႁူဝ်ၼႃႈသၢမ်ၵေႃႉၼၼ်ႉလႃႈ မွင်းလၢတ်ႈၵႂၢမ်းဢွၵ်ႇမႃးၵူၺ်း မၼ်းၸၢင်ႈႁၢမ်းၵၢၼ်ပေႃးလႆႈၼၼ်ႉယဝ်ႉ။
တူၺ်းမိူၼ် လုင်းဢွင်ႇၼၼ်ႉၵေႃႈ တေလႃႇႁိုဝ်တေဢၢမ်းၵေႃႈ လၢတ်ႈဢမ်ႇဢွၵ်ႇမိူၼ်ၵၼ် ယွၼ်ႉႁူဝ်ၼႃႈမီးယူႇၽၢႆႇၼႃႈမၼ်းၼၼ်ႉသွင်ၵေႃႉလူး ပေႃးဢမ်ႇမေႃလၢတ်ႈ ၵူၼ်းၵေႃႉဢၼ်တေဢမ်ႇလႆႈယူႇ သမ်ႉလႅပ်ႈတေပဵၼ်မၼ်းဝႆႉယဝ်ႉ။
“လိုၼ်းၼုမ်ႇ! ဢၼ်သူႁဵတ်းသၢင်ႈဝၼ်းမိူဝ်ႈၼႆႉ မၼ်းသင်ႇထုၵ်ႇယဝ်ႉႁႃႉ သူႁၼ်ထိုင်ႁဝ်းၼႆႉပဵၼ်သင်ၵႂႃႇယဝ်ႉလႃႇ တႃႇၸွႆႈၵႄႈၶႆပၼ်ႁႃၼၼ်ႉ မၼ်းပဵၼ်ပုၼ်ႈၽွၼ်းႁဝ်းၽူႈၸတ်းၵၢၼ်ဢမ်ႇၸႂ်ႈႁိုဝ်”
တိုၼ်းႁၢၼ် တဝ်ႉၵၢင်းဢိင်ၶႅပ်ႇတင်ႇသေ ယၵ်ႉတူၺ်းလိုၼ်းၼုမ်ႇယဝ်ႉ
“လၢႆႈၽူႈၸတ်းၵၢၼ်ႁေဢမ်ႇလီႁိုဝ် ၸိုၼ်ႈၶိူဝ်း!”
မိူၼ်လၢတ်ႈၶိတ်ႈလုင်းဢွင်ႇၼၼ်ႉယဝ်ႉ။
“ယွမ်းၼွမ်းယူႇၶႃႈ…” မွင်းလိုၼ်းၼုမ်ႇလၢတ်ႈၵႂၢမ်းၶေႃႈၼႆႉမႃးၵူၺ်း သၢႆတႃၸိုၼ်ႈၶိူဝ်း တိုၼ်ႇပၵ်းတူၺ်းၸူးၵမ်းလဵဝ် မိူၼ်တေၶႂ်ႈငိၼ်းလွင်ႈဢၼ်လိုၼ်းၼုမ်ႇ လၢတ်ႈဢွၵ်ႇမႃးၼၼ်ႉယဝ်ႉ။
“ဢၼ်ဢဝ်ပၢႆးဝူၼ်သုၼ်ႇတူဝ်သေၵႄႈၶႆၵႂႃႇ လူၺ်ႈဢမ်ႇတၼ်းဝူၼ်ႉမႅၼ်ႈပုၼ်ႈၽွၼ်းၸဝ်ႈၵဝ်ႇ”
“လီယဝ်ႉဢၼ်ပဵၼ်သူ သင်ၽူႈၸတ်းၵၢၼ်ႁဝ်းၵႂႃႇၵႄႈၶႆၼႆ လၢၼ်ႉႁဝ်းယိုင်ႈၶႅၼ်းတေသုၵ်ႉသၵ်ႉလိူဝ်သေၼႆႉလူးၵွၼ်ႇ ဢမ်ႇၸၢင်ႈဝႃႈ တေဢဝ်ႁွင်ႈမိုဝ်ႉႁဝ်း ပဵၼ်ႁူင်းတူၺ်းၸိူင်းၵႂႃႇၵေႃႈပဵၼ်လႆႈ”
မိူဝ်ႈဢၼ်ၵိူတ်ႇပၼ်ႁႃမႃးၼၼ်ႉ လုင်းဢွင်ႇၵေႃႈ လႆႈယွၼ်းၶႂၢင်ႉႁႂ်ႈ ပၼ်ၵူၼ်းၵႂႃႇတူၺ်းၼႂ်းႁွင်ႈမိုဝ်ႉ တႃႇထတ်းသၢင်ႈဝႃႈ ႁွင်ႈမိုဝ်ႉၼၼ်ႉ မူတ်းသႂ်ၵႃႈႁိုဝ် ႁႂ်ႈပေႃးလႆႈႁၼ်တႂ်ႈတႃၼႆၼၼ်ႉယဝ်ႉ။ မိူဝ်ႈလၢတ်ႈမႃးတၢၼ်ႇၼႆႉယဝ်ႉ လုင်းဢွင်ႇၵေႃႈ ၼင်ႇႁိုဝ်တေဢမ်ႇ ယူႇၼႂ်းငဝ်းလၢႆးဢၼ်ယူႇယၢပ်ႇၼၼ်ႉ
“ပေႃးဝႃႈၵူၼ်းၼုမ်ႇႁဵတ်းၵၢၼ်လႆႈလီတၢၼ်ႇၼႆႉ မိူၼ်ဝႃႈၵူၼ်းထဝ်ႈၼင်ႇႁဝ်းၼႆႉ တေဢမ်ႇမီးၵၢၼ်ယဝ်ႉ”
“ၸႂ်ႈယဝ်ႉ လုင်းထုၵ်ႇလီလိုဝ်ႈႁိူဝ်ႉသေမိူဝ်းလဵၼ်ႈၵေႃႉလၢၼ်ဢွၼ်ႇၵူၺ်းယဝ်ႉ ႁၼ်ဝႃႈ လုၵ်ႈၸၢႆးလုင်း မီးလုၵ်ႈဢွၼ်ႇထႅင်ႈၵေႃႉၼိုင်ႈယဝ်ႉႁိုဝ်”
“ၸႂ်ႈယဝ်ႉ လီႁၵ်ႉၼႃႇယဝ်ႉဝႃႈ ပေႃးလၢတ်ႈထိုင်ၵေႃႈ ” ဢဝ်ၶႅပ်းႁၢင်ႈၼႂ်းၾူင်းမၼ်းၼၼ်ႉ ၼႄတိုၼ်းႁၢၼ်ၶႃၵႂႃႇယူႇ။
မိူဝ်ႈဢၼ်လိုၼ်းၼုမ်ႇလႆႈႁၼ် လွင်ႈၸမ်ၸႂ် ၵၢၼ်ဢုပ်ႇဢူဝ်း လွင်ႈႁဵတ်းသၢင်ႈၶဝ်ၸိူဝ်းၼၼ်ႉယဝ်ႉၵေႃႈ သမ်ႉပေႃးဢုၼ်ႇၸႂ်လူင်မႃးၵမ်းလဵဝ်။ မၼ်းဢမ်ႇမိူၼ် ႁဵတ်းၵၢၼ်ႁူမ်ႈၵၼ်ၼႂ်းၸၼ်ႉ ႁူဝ်ၼႃႈလႄႈလုၵ်ႈၼွင်ႉ ၵူၺ်းမိူၼ်ပဵၼ်ၵူၼ်းႁိူၼ်းလဵဝ်ၵၼ် ဢုပ်ႇၵၼ်ၵႂႃႇလႆႈလွတ်ႈလွတ်ႈလႅဝ်းလႅဝ်း လႄႈ ဢမ်ႇမီးၶေႃႈႁၢမ်ႈလၢတ်ႈ တႄႇၸဵမ်ၵၢၼ်သုၼ်ႇတူဝ်ၸိူဝ်းၼႆႉ။ မိူဝ်ႈငဝ်းလၢႆးၼႂ်းႁွင်ႈၼၼ်ႉ လီယူႇမႃးယဝ်ႉ ၸိုၼ်ႈၶိူဝ်းၵေႃႈ
“တႃႇၶိုၼ်းၵူတ်ႇထတ်းၸႅတ်ႈတူၺ်းပိူင်ပဵၼ်ႁႂ်ႈမၼ်းၸႅင်ႈလႅင်း ဢဝ်ၸိုဝ်ႈသဵင်လၢၼ်ႉႁဝ်းမႃးၶိုၼ်းၼၼ်ႉ သူ!. ၵေႃႉဢဝ်ပုၼ်ႈၽွၼ်းၵႂႃႇလႄႈ” တူၺ်းၵႂႃႇတီႈလိုၼ်းၼုမ်ႇ သမ်ႉပေႃးဢမ်ႇၶႂ်ႈမေႃယူႇယဝ်ႉ။
“ၽူႈၸတ်းၵၢၼ်ၵေႃႈမီးယူႇ.. ပဵၼ်သင်လႄႈၶႃႈတေလႆႈဢဝ်ပုၼ်ႈၽွၼ်း…ၶႃႈ.. တေဝႃႈႁိုဝ်ၵေႃႈ ၶႃႈဢမ်ႇလႆႈမီးပုၼ်ႈၽွၼ်း တႅပ်းတတ်းလႆႈထိုင်မွၵ်ႈၵၼၼ်ႉ”
သၢႆတႃပၵ်းတူၺ်းလိုၼ်းၼုမ်ႇ မိူၼ်ဝူၼ်ႉလႆႈသေလွင်ႈလွင်ႈလႄႈ ယုမ်ႉဢွၵ်ႇမႃးဢိတ်းၼိုင်ႈယဝ်ႉ။
“ၸိူင်ႉၼၼ်ႁႃႉ…” သူတ်ႉၵိၼ်ၼမ်ႉၼဵင်ႈ ဢၼ်တမ်းဝႆႉၼိူဝ်ၽိူၼ်ၼၼ်ႉၵမ်းၼိုင်ႈသေ တိုၼ်းႁၢၼ်ၵေႃႈ တူၺ်းသၢႆငၢႆ ၸိုၼ်ႈၶိူဝ်းဢမ်ႇပေႃးလီယဝ်ႉလႄႈ။
“တေဝႃႈႁိုဝ်ၵေႃႈ ဝၼ်းမိူဝ်ႈၼႆႉ လိုၼ်းၼုမ်ႇ.. ႁဵတ်းလႆႈလီတႄႉယဝ်ႉ ႁတ်းဢဝ်ၵၢၼ်ငၢၼ်းတူဝ်ၵဝ်ႇသေ လႅၵ်ႈၸိုဝ်ႈသဵင်လၢၼ်ႉႁဝ်းမႃး… ပေႃးဢမ်ႇၸႂ်ႈလိုၼ်းၼုမ်ႇ တေဢမ်ႇမီးၽႂ်ႁတ်းႁဵတ်းလႆႈထိုင်တၢၼ်ႇၼႆႉ ဢမ်ႇၸႂ်ႈႁႃႉ!.. လုင်းဢွင်ႇဝႃႈ”
“ၸႂ်ႈယဝ်ႉ ပေႃးဝႃႈတေႉလွင်ႈၼႆႉ ပဵၼ်ပၼ်ႁႃၼႂ်းလၢၼ်ႉ ၶႃႈပဵၼ်ၽူႈၸတ်းၵၢၼ်ၵေႃႈ ႁူႉတေလႆႈဢဝ်ပုၼ်ႈၽွၼ်းၵႄႈၶႆၵႂႃႇၼၼ်ႉယဝ်ႉ”
ၸိုၼ်ႈၶိူဝ်း တူၺ်းၼႃႈလိုၼ်းၼုမ်ႇ ဢၼ်ၼင်ႈၼိမ်သေထွမ်ႇယူႇၼၼ်ႉ
“မိူၼ်ဝႃႈသူလႆႈဢဝ်ၼႃႈၵၢၼ်သူႁပ်ႉၶၢမ်ႇယဝ်ႉဢမ်ႇၸႂ်ႈႁိုဝ်.. သူတေဢမ်ႇၸႂ်ႈၵူၼ်းဢၼ်သၢင်ႈပၼ်ႁႃယဝ်ႉ တေႁႂ်ႈပိူၼ်ႈၸွမ်းၵႄႈပၼ်ၼင်ႇၵဝ်ႇယူဝ်ႉၼေႃႈ”
ပေႃးဝႃႈလႆႈငိၼ်းၸိူင်ႉၼၼ်ယဝ်ႉၵေႃႈ ၶူၼ်တုမ်ႇၼိူဝ်ႉသမ်ႉပေႃးၵီႈလူင်မႃးၵမ်းလဵဝ် မိူၼ်တေဝႃႈ ပေႃးဢမ်ႇဢဝ်ပုၼ်ႈၽွၼ်းလႆႈၵေႃႈ ဢွၵ်ႇၵၢၼ်ၵႂႃႇလႄႈ ၼႆၼၼ်ႉယဝ်ႉ။ လိုၼ်းၼုမ်ႇၵေႃႈ မိူၼ်ဝူၼ်ႉလႆႈသေလွင်ႈလွင်ႈသေ ယုမ်ႉဢွၵ်ႇမႃးယဝ်ႉ၊ ၸိုၼ်ႈၶိူဝ်းဢၼ်လႆႈႁၼ်တၢင်းယုမ်ႉလိုၼ်းၼုမ်ႇၼၼ်ႉ ႁဵတ်းႁႂ်ႈၶၢတ်ႈလၢမ်းဢမ်ႇလႆႈဝႃႈ ဝူၼ်ႉသင်ယူႇ ပဵၼ်တီႈဢၼ်လီသူၼ်ၸႂ်မၼ်းမႃးၵမ်းလဵဝ်။
ယၢမ်းၼၼ်ႉလိုၼ်းၼုမ်ႇၵေႃႈ လၢတ်ႈဢွၵ်ႇမႃးၼင်ႇမၼ်ႈၸႂ်ဝႃႈ−
“မိူဝ်ႈဢၢပ်ႈပၼ်ပုၼ်ႈၽွၼ်းမႃးယဝ်ႉ ယိၼ်းလီႁပ်ႉႁဵတ်းၵႂႃႇယူႇၶႃႈ”
“လီယဝ်ႉ.. တႅပ်းတတ်းသၢင်ႇထုၵ်ႇယဝ်ႉ”
“ပေႃးၸိူင်ႉၼၼ်.. ၸွႆႈသူင်ႇၵူၼ်းၸိူဝ်းၼၼ်ႉပၼ်တီႈႁူင်းယႃယဝ်ႉ ယွၼ်းႁႂ်ႈတၢင်းလၢၼ်ႉ ၸွႆႈႁပ်ႉဢဝ်ပုၼ်ႈၽွၼ်း ယူတ်းယႃပၼ်ၶဝ် ႁႂ်ႈပေႃးၸိုၼ်ႈၶႅၼ်းလီၸွင်ႇလႆႈၶႃႈ”
မိူဝ်ႈငိၼ်းၸိူင်ႉၼၼ် တိုၼ်းႁၢၼ်ၵေႃႈ မိူၼ်တေယွမ်းႁပ်ႉဢမ်ႇလႆႈလႄႈ
“ၶဝ်မႃးယႃႉၸိုဝ်ႈသဵင်လၢၼ်ႉႁဝ်း ထိုင်တီႈႁဵတ်းႁႂ်ႈသူဢွၵ်ႇၵၢၼ်လႆႈၵွၼ်ႇယဝ်ႉ သူယင်းတိုၵ်ႉတေၸွႆႈထႅမ်ၶဝ်ယူႇႁႃႉ.. သင်ၸိူဝ်ႉဝႃႈၸွႆႈၶဝ်ၵႂႃႇ ပိူၼ်ႈတေဢမ်ႇထၢင်ႇဝႃႈလွင်ႈၼႆႉမၼ်းပဵၼ်လွင်ႈတေႉႁိုဝ်..”
ၸိုၼ်ႈၶိူဝ်းၵေႃႈ တုမ်ႉတွပ်ႇၸူႇၵႂႃႇၶိုၼ်း ၼင်ႇၸႂ်ယဵၼ်ဝႃႈ
“ႁႂ်ႈၶဝ်ႁဵတ်းၵႂႃႇလႄႈ…”
“ပေႃးၼၼ် ၶႃႈတေၵႂႃႇၸတ်းၵၢၼ်ၵွၼ်ႇၶႃႈ ” လုင်းဢွင်ႇၵေႃႈဢွၵ်ႇၵႂႃႇ လိုၼ်းၼုမ်ႇၵေႃႈ ဢၢင်ႈဢွၵ်ႇၵႂႃႇၸွမ်းယဝ်ႉ။
“သူ!.. ၵိုတ်းဝႆႉၵွၼ်ႇလႄႈ”
“မီးလွင်ႈသင်ထႅင်ႈၶႃႈ”
“ပေႃးဝႃႈႁဵတ်းဢမ်ႇလႆႈ သူႁၢင်ႈႁႅၼ်းဢွၵ်ႇၵၢၼ်ဝႆႉလႆႈယူႇၼႃႈ..”
တွၼ်ႈသၢမ်သုတ်းၵႂႃႇယဝ်ႉ ပႂ်ႉသိုပ်ႇတူၺ်းထႅင်ႈတွၼ်ႈသီႇၶႃႈ။
ႁပ်ႉထွမ်ႇပၼ်ႁႅင်းလူၺ်ႈသဵင် တၢင်း YouTube ၵေႃႈလႆႈၶႃႈ။
