တွၼ်ႈသီႇ
မိူဝ်ႈငိၼ်းၸိူင်ႉၼၼ် လိုၼ်းၼုမ်ႇမိုင်လူင်ၵႂႃႇသေ ဝိၼ်ႇၼႃႈ ယုမ်ႉတေႃႇၸိုၼ်ႈၶိူဝ်း လၢတ်ႈဢွၵ်ႇမႃးၼင်ႇဢမ်ႇၵူဝ်သင်ယဝ်ႉ
“ၶႃႈဢဝ်ၼႃႈၵၢၼ်ၶႃႈႁပ်ႉၶၢမ်ႇယဝ်ႉ ပေႃးဝႃႈၶႃႈဢွၵ်ႇၵႂႃႇ ဢမ်ႇၵူဝ်ဝႃႈ တေႁဵတ်းႁႂ်ႈၶႅၵ်ႇၶဝ်ထၢင်ႇၽိတ်းမႃးၶႃႈႁႃႉ…”
လၢတ်ႈယဝ်ႉၵေႃႈ ဢွၵ်ႇၵႂႃႇပႅတ်ႈ ၸိုၼ်ႈၶိူဝ်း ပေႃးဢမ်ႇတၼ်းလႆႈလၢတ်ႈသင်ၶိုၼ်းသေဢိတ်း၊ တိုၼ်းႁၢၼ် ဢၼ်လႆႈႁၼ် လွင်ႈႁဵတ်းသၢင်ႈလိုၼ်းၼုမ်ႇ တုမ်ႉတွပ်ႇၸူးၸိုၼ်ႈၶိူဝ်းၼၼ်ႉ သမ်ႉပေႃးဢၢမ်းလူင်ၵႂႃႇ။
“ဝၼ်းမိူဝ်ႈၼႆႉ ႁဝ်းၵေႃႈလႆႈႁၼ် ၽူႈယိင်းဢၼ်ႁတ်းၶဵင်ႇသၢႆတႃၸူး ၵူၼ်းၸိူင်ႉၼင်ႇၸိုၼ်ႈၶိူဝ်းသေဢမ်ႇၵႃး ႁတ်းလၢတ်ႈထိုင်တီႈ ၵူၼ်းၸိူင်ႉၼင်ႇၸိုၼ်ႈၶိူဝ်းပေႃးဢမ်ႇၸၢင်ႈထဵင်လႆႈယဝ်ႉ”
“ၵေႃႉႁႃးလူး..ဢမ်ႇလူဝ်ႇၵႂႃႇႁဵတ်းၵၢၼ်သင်ထႅင်ႈယဝ်ႉႁႃႉ”
“ဢမ်ႇၸႂ်ႈဝႃႈယဝ်ႉၵႂႃႇယဝ်ႉၼႄႇ”
“ႁၼ်ဝႃႈမၼ်းမိူၼ် ပဵၼ်ၵၢၼ်မႃးသုၵ်ႉယုင်ႈၼႂ်းလၢၼ်ႉ လွင်ႈလဵဝ်ၵူၺ်းၵႂႃႈ”
ၸိုၼ်ႈၶိူဝ်းလၢမ်းလႆႈယူႇယဝ်ႉ ပဵၼ်ယွၼ်ႉသင်ၼႆ ၵွပ်ႈလွင်ႈတၢင်းမၼ်းပဵၼ်မႃးဝၢႆးသေ မၼ်းလႆႈဢုပ်ႇၵုမ်တင်း လုင်းသၢင်ႇလႃႉၶဝ်ၼၼ်ႉယဝ်ႉ ။ ၼႂ်းဝၼ်းၼၼ်ႉ မိူဝ်ႈလႆႈႁၼ်လွင်ႈႁဵတ်းသၢင်ႈလုင်းသၢင်ႇလႃႉ ဢၼ်ႁဵတ်းၼိူဝ်ၵူၼ်းႁဵတ်းၵၢၼ်ယဝ်ႉၼၼ်ႉ မၼ်းၸင်ႇႁႂ်ႈလုၵ်ႈၼွင်ႉမၼ်း ၸွပ်ႇတူၺ်းပိုၼ်း လွင်ႈႁဵတ်းၵၢၼ်လုင်းသၢင်ႇလႃႉ မႃးတင်းမူတ်းသေ လႆႈႁူႉဝႃႈပဵၼ်ၵူၼ်းႁဵတ်းၵၢၼ်ဢမ်ႇလီတင်းၼမ်ၼႆၵေႃႈ ၸင်ႇပၢၵ်ႈပႅတ်ႈၵၢၼ်ႁူမ်ႈၼႃႈၵၢၼ်ၵၼ်ၵႂႃႇယူႇယဝ်ႉ။
ၸွမ်းလူၺ်ႈလုင်းသၢင်ႇလႃႉ ပဵၼ်ၵူၼ်းယွင်ႇဢႃႇၼႃႇဝႆႉလႄႈ သမ်ႉပဵၼ်ၵူၼ်းဢႃႇယုယႂ်ႇသေယဝ်ႉ မိူဝ်ႈပဵၼ်ၽၢႆႇယွမ်းသေ ၶဝ်ႈႁႃၵူၼ်းၼုမ်ႇၸိူင်ႉၼင်ႇၸိုၼ်ႈၶိူဝ်းၼၼ်ႉ လႆႈၶၢမ်ႇတၢင်းၸိုၼ်ႈၶိူဝ်းထဵင်ၶိုၼ်းၸိူင်ႉၼႆ မိူၼ်ပဵၼ်ၵၢၼ်ထၢင်ႇလဵၵ်ႉၼိူဝ်ၵၼ်ဝႆႉလႄႈ ႁဵတ်းႁႂ်ႈမၼ်းဢမ်ႇပေႃးၸႂ်မႃးတႄႉတႄႉယူႇ။
လိုၼ်းၼုမ်ႇလႄႈတင်းလုင်းဢွင်ႇၼၼ်ႉၵေႃႈ ဢွၼ်ၵၼ်ၸွႆႈဢဝ် ၵူၼ်းတွင်ႉၵႂႃႇႁႃႈၵေႃႉၼၼ်ႉ ၵႂႃႇသူင်ႇတီႈႁူင်းယႃသေ မိူဝ်ႈၽွင်းဢွၵ်ႇၶၢဝ်းတၢင်းၵႂႃႇၼၼ်ႉ လိုၼ်းၼုမ်ႇၵေႃႈ ႁိုဝ်တေၼင်ႈယဵၼ်ၵူၺ်း ယုမ်ႉလၢတ်ႈဢုပ်ႇၸူးၵူၼ်းၸိူဝ်းၼၼ်ႉၵႂႃႇ ထိုင်တီႈပေႃးမိုတ်ႈၵိုဝ်းၵၼ်မႃးယူႇယဝ်ႉ။ ထိုင်ႁူင်းယႃယဝ်ႉၵေႃႈ လိုၼ်းၼုမ်ႇလႄႈတင်းလုင်းဢွင်ႇ ဢွၼ်ၵၼ်ၸတ်းၵၢၼ် လွင်ႈၵူၼ်းပဵၼ်ၸိူဝ်းၼၼ်ႉၵႂႃႇယူႇယဝ်ႉ။ မိူၼ်ဝႃႈ ၶဝ်ၼၼ်ႉၵေႃႈ ပဵၼ်ႁၢႆႉႁႅင်းဝႆႉလႄႈ တေလႆႈၼွၼ်းႁူင်းယႃၼႆယူႇ တႃႇတေမႃးတူၺ်းထိုင်ၶဝ်ၼၼ်ႉၵေႃႈ လႆႈၸွႆႈၵပ်းသိုပ်ႇၵပ်းသၢၼ်ပၼ် ၵူၼ်းၼႂ်းၼႃႈႁိူၼ်းၶဝ်ပႃးယဝ်ႉ။
ၸိူဝ်းဢၼ်ပဵၼ်ၵူၼ်းၼႂ်းၼႃႈႁိူၼ်းၼၼ်ႉ မိူဝ်ႈႁူႉဝႃႈ ပေႃႈၶဝ်၊ ၽူဝ်ၶဝ်၊ လုၵ်ႈၶဝ် မီးႁူင်းယႃၼႆၵူၺ်း တူၵ်းၸႂ်သေၵိုင်ႉၵၢင်ႉမႃးၵမ်းလဵဝ်။ ၶဝ်ၵေႃႈ ဢွၼ်ၵၼ်ယိၼ်းၸူမ်းထိုင် လိုၼ်းၼုမ်ႇၶဝ် ဢၼ်ၸွႆႈတူၺ်းထိုင်ပၼ်ၼႆယူႇ လုင်းဢွင်ႇဢၼ်ၸတ်းၵၢၼ်လွင်ႈၼႂ်းႁူင်းယႃၵႂႃႇယဝ်ႉၵေႃႈ ပွၵ်ႈမိူဝ်းၵႂႃႇဢွၼ်တၢင်းယူႇ။ လိုၼ်းၼုမ်ႇတႄႉ ပႂ်ႉတူၺ်းယူႇႁိမ်းၶဝ် တေႃႇထိုင်ပေႃႈမႄႈပီႈၼွင်ႉၶဝ် တေႁွတ်ႈမႃးၸေးၵၼ်မူတ်းယဝ်ႉ ၸင်ႇတေပွၵ်ႈမိူဝ်း။
မိူဝ်ႈဢၼ်ဢွၵ်ႇႁူင်းယႃမႃးယဝ်ႉၵေႃႈ မိူင်းပေႃးလပ်းသိင်ႇယဝ်ႉ လၢႆမူင်းၵေႃႈဢမ်ႇႁူႉ၊ မိူဝ်ႈပဵၼ်ၸိူင်ႉၼၼ် ၸင်ႇတေဝူၼ်ႉၶုၵ်းၸႂ်လႆႈ လႅင်းဢွၼ်ႇဢၼ်ယူႇတီႈႁူင်းႁဵၼ်းၼၼ်ႉမႃးၵမ်းလဵဝ် တေဢၢၼ်းဢဝ်ၾူင်းၵပ်းသိုပ်ႇၸူး မၢၵ်ႇထၢၼ်ႇၾူင်းသမ်ႉမူတ်းပႅတ်ႈလႄႈ တေႁႃလူတ်ႉၵေႃႈ ႁိမ်းႁွမ်းၼၼ်ႉသမ်ႉဢမ်ႇႁၼ်လူတ်ႉလႅၼ်ႈယဝ်ႉ တေသိုပ်ႇၾူင်းႁႃၵေႃႈသမ်ႉဢမ်ႇၸၢင်ႈသေ မိူဝ်ႈဢၢၼ်းႁူၼ်လင်ၶဝ်ႈၵႂႃႇၼႂ်းႁူင်းယႃၶိုၼ်းၼၼ်ႉ လႆႈငိၼ်းသဵင်ႁွၼ်းလူတ်ႉ လင်မေႃးမႃးၽၢႆႇလင် မၼ်းလႆႈဝၢႆႇတူၺ်းၸူး လူတ်ႉလမ်းၼၼ်ႉၵေႃႈ ၵိုတ်းယူႇသိုဝ်ႈမၼ်းသေ မၢၼ်ႇလူတ်ႉပိုတ်ႇလူင်းယဝ်ႉ ဢဝ်လိုၼ်းၼုမ်ႇ မိူၼ်ႇမိုင်လူင်ၵႂႃႇ ၵူၼ်းၵေႃႉၼၼ်ႉၵေႃႈ…
“တေမိူဝ်းႁိူၼ်းႁႃႉ…”
မၼ်းၵေႃႈမိူၼ်ႇတူၺ်းႁိမ်းႁွမ်းယဝ်ႉသေ တူၺ်းၸူးတီႈၵူၼ်းဢၼ်ယူႇၼႂ်းလူတ်ႉၼၼ်ႉယဝ်ႉ။
“ၶူးပိုၼ်းမိူင်း!!.. ၸႂ်ႈယူႇၶႃႈႁႃႉ”
“ဢိုမ်ႈ! ၸႂ်ႈယဝ်ႉ.. တေမိူဝ်းႁိူၼ်းဢမ်ႇၸႂ်ႈႁႃႉ ”
“ဢေႃႈၸႂ်ႈယဝ်ႉၶႃႈ ”
“ၶိုၼ်ႈလူတ်ႉလႄႈ ႁဝ်းမိူဝ်းသူင်ႇ”
“ပေႃးၼၼ်ၵေႃႈ ယၢပ်ႇၸႂ်ၶူးယဝ်ႉၶႃႈ”
“ယိၼ်းလီၸွႆႈထႅမ်ယူႇ..” လိုၼ်းၼုမ်ႇၵေႃႈ ၶိုၼ်ႈလူတ်ႉၵႂႃႇယဝ်ႉ။
မိူဝ်ႈလူတ်ႉဢွၵ်ႇၵႂႃႇတီႈ သဵၼ်ႈတၢင်းဢၼ်ၼိမ်လီၼၼ်ႉယဝ်ႉ လိုၼ်းၼုမ်ႇၵေႃႈ ယႃႉလူႉပႅတ်ႈလွင်ႈတဵတ်ႇယဵၼ်ၼၼ်ႉသေ
“ၵမ်ႇၽႃႇလူင်ၼႆႉမၼ်းမူၼ်းသေတႃႉၵေႃႈ ၼင်ႇႁၢင်ႈမၼ်းၵႂၢင်ႈယူႇ မိူင်းလူင်ၵႂၢင်ႈယႂ်ႇပေႃးတၢၼ်ႇၼႆႉ ၶႃႈဢမ်ႇထၢင်ႇဝႃႈ တေလႆႈမႃးထူပ်းႁူပ်ႉၺႃးၶူးၶိုၼ်းၸိူင်ႉၼႆ ယိၼ်းၸူမ်းတႄႉယဝ်ႉၶႃႈ ဢၼ်လႆႈမႃးထူပ်းၶူးၶိုၼ်း..”
“ႁဝ်းၵေႃႈမိူၼ်ၵၼ် ယိၼ်းၸူမ်းတႄႉယဝ်ႉဢၼ်လႆႈမႃးထူပ်းသူ..”
“ဢမ်ႇလႆႈထူပ်းၶူးႁိုင်ၵႃႈႁိုဝ်ယဝ်ႉၼႆႉ တႄႇၸဵမ်မိူဝ်ႈၶႃႈဢွၵ်ႇႁူင်းႁဵၼ်းၵႂႃႇယဝ်ႉ”
“တေမီးယူႇႁႃႈပီႊပၢႆပၢႆၼႆႉယဝ်ႉ..”
“တေမီးမွၵ်ႈၼၼ်ႉယူႇ လႆႈဝႃႈႁိုင်တႄႉတႄႉၼင်ႇၵဝ်ႇ ယၢမ်းၼႆႉယင်းတိုၵ်ႉႁဵတ်းၶူးယူႇၶႃႈႁႃႉ”
ပိုၼ်းမိူင်းယဵၼ်ၵႂႃႇသေ ၸင်ႇယၵ်ႉတူၺ်းၸူးတီႈလိုၼ်းၼုမ်ႇယဝ်ႉၵေႃႈ
“ဢမ်ႇလႆႈႁဵတ်းယဝ်ႉ ဝၢႆးသေပီႊၼၼ်ႉၵူၺ်းၵေႃႈ ႁဝ်းလႆႈၵႂႃႇၶိုၼ်ႈၽၢႆႇမေႃယႃတီႈၼွၵ်ႈမိူင်း တိုၵ်ႉပွၵ်ႈမႃးသေ မႃးႁဵတ်းၵၢၼ်တီႈႁူင်းယႃၼႆႉၼႆဝႃႇ”
“ၸႂ်ႈၶႃႈႁႃႉ! မူၺ်ႁွမ်ၵေႃႈႁဵတ်းၵၢၼ်တီႈႁူင်းယႃၼႆႉမိူၼ်ၵၼ်ၶႃႈဢေႃႈ ၶူးတေႁၼ်မႅၼ်ႈယူႇၶႃႈယူဝ်ႉ မိူၼ်ဝႃႈမိူဝ်ႈၼႆႉမၼ်းလႅပ်ႈတေဢမ်ႇတၼ်းၶႃႈၼႃ လႆႈႁၼ်မၼ်းၵႅပ်ႉၼိုင်ႈၵူၺ်း”
ပိုၼ်းမိူင်းယုမ်ႉၸူးမၼ်းယဝ်ႉ “မိူဝ်ႈၼႆႉတႄႉဢမ်ႇပႆႇႁၼ်ၼႃ… ပေႃးလႆႈမႃးႁဵတ်းၵၢၼ်ယဝ်ႉတႄႉ တေၵႆႉလႆႈႁၼ်ယူႇ မိူဝ်ႈၼႆႉႁဝ်းတိုၵ်ႉမႃးတူၺ်းၵူၺ်း ၶဝ်ၵေႃႈဢမ်ႇပႆႇႁႂ်ႈႁဝ်းမႃးႁဵတ်းၵၢၼ်ၵမ်းလဵဝ်ၼႆဝႃႇ ႁွင်ႉဢုပ်ႇၵၼ် တေႃႇထိုင်ၵၢင်ဝၼ်းပေႃးၶမ်ႈၸိူင်ႉၼႆယဝ်ႉ”
လိုၼ်းၼုမ်ႇၵေႃႈ ႁႂ်ႈပိုၼ်းမိူင်းၸွႆႈသူင်ႇပၼ်တီႈ ႁိမ်းႁူင်းႁဵၼ်းၼၼ်ႉယူႇ။
“ၼႆႉမၼ်းဢမ်ႇၸႂ်ႈႁူင်းႁဵၼ်းႁႃႉ..”
“ၸႂ်ႈယဝ်ႉၶႃႈ မိူဝ်ႈၼႆႉႁဵတ်းၵၢၼ်ယဝ်ႉၶမ်ႈလႄႈ ဢမ်ႇတၼ်းလႆႈမႃးႁပ်ႉလႅင်းဢွၼ်ႇ မၼ်းလႅပ်ႈယင်းယူႇတီႈႁိူၼ်းၶူးၶဝ်ၼၼ်ႉၶႃႈယဝ်ႉ… ယိၼ်းၸူမ်းၼမ်ၼမ်ယဝ်ႉၶႃႈ..”
“ႁႂ်ႈႁဝ်းၸွႆႈမိူဝ်းသူင်ႇထိုင်ႁိူၼ်းၵေႃႈလႆႈယူႇၼႃ..”
“ဢမ်ႇပဵၼ်သင်ၶႃႈ ႁိူၼ်းမီးၸမ်ၸမ်ၵူၺ်း ပႆမိူဝ်းၵႅပ်ႉၼိုင်ႈၵေႃႈထိုင်ယဝ်ႉ”
ပိုၼ်းမိူင်းၵေႃႈ တူၺ်းမိူၼ်လိုၼ်းၼုမ်ႇတေဢမ်ႇယွမ်းမၼ်းယဝ်ႉလႄႈ
“ပေႃးၼၼ် ႁဝ်းယွၼ်းတီႈၵပ်းသိုပ်ႇသူဝႆႉၽွင်ႈၸွင်ႇလႆႈ”
“လႆႈၶႃႈဢေႃႈ..” လိုၼ်းၼုမ်ႇၵေႃႈ ဢဝ်မၢႆၾူင်းမၼ်းပၼ်ၵႂႃႇယူႇယဝ်ႉ။
“ပႂ်ႉထူပ်းၵၼ်ထႅင်ႈပွၵ်ႈၼႃႈပေႃးၼႆ..”
“ဢေႃႈၶႃႈ..လွႆးလွႆးၶႃႈ..”
လိုၼ်းၼုမ်ႇၵေႃႈ မိူဝ်ႈႁွတ်ႈထိုင်တီႈႁိူၼ်းမေႃသွၼ် ဢၼ်မီးႁိမ်းႁူင်းႁဵၼ်းၼၼ်ႉ လႆႈႁၼ်လႅင်းဢွၼ်ႇၼွၼ်းဝႆႉယူႇလႄႈ။
“ယၢပ်ႇၸႂ်သူတေႉယဝ်ႉ ဢၼ်ၸွႆႈတူၺ်းထိုင်ပၼ်လႅင်းဢွၼ်ႇ”
“ဢမ်ႇလႆႈယၢပ်ႇၸႂ်သင် ၶဝ်ပဵၼ်တင်းလုၵ်ႈႁဵၼ်း၊ တင်းလုၵ်ႈဢူၺ်းၵေႃႉ မၼ်းၵေႃႈမိူၼ်ပဵၼ်လုၵ်ႈႁဝ်းပႃးၼၼ်ႉယဝ်ႉ”
“ယိၼ်းၸူမ်းယဝ်ႉၼႃ.. ”
လိုၼ်းၼုမ်ႇၼၼ်ႉ သမ်ႉဝႃႈၵၢၼ်ၼမ်သေတႃႉ ပေႃးဝႃႈဢမ်ႇတၼ်းမႃးႁပ်ႉလႅင်းဢွၼ်ႇၼႆ တေၵႆႉလၢတ်ႈဝႆႉထႃႈဢွၼ်တၢင်းတႃႇသေႇ ၵူၺ်းၵႃႈ ဝၼ်းမိူဝ်ႈၼႆႉ ဢမ်ႇလႆႈလၢတ်ႈဝႆႉၼႆ ႁဵတ်းႁႂ်ႈမၼ်းၸႂ်ဢမ်ႇလီတေႃႇလႅင်းဢွၼ်ႇမႃးယူႇ။
“မိူဝ်ႈၼႆႉႁဝ်းတေႁဵတ်းၵၢၼ်ၼမ်ပူၼ်ႉတီႈၼႃႇယဝ်ႉ ထိုင်တီႈပေႃးလိုမ်းၶဝ်ၵႂႃႇ ဢမ်ႇတၼ်းလႆႈလၢတ်ႈၶဝ်ဝႆႉ ဝႃႈတေမႃးတူၵ်းလိုၼ်းၼႆ”
“လွင်ႈၼႆႉယႃႇပေမႆႈၸႂ်ၼႃ ႁဝ်းလၢတ်ႈၼႄၶဝ်ယဝ်ႉ ဝႃႈသူဢမ်ႇတၼ်းၼႆ ၶဝ်ပွင်ႇၸႂ်ယူႇၼႃႈ သမ်ႉဝႃႈတူဝ်လဵၵ်ႉလဵၵ်ႉၵူၺ်းၵေႃႈ ၶဝ်ႁူႉၵႂၢမ်းမိူၼ်ၵူၼ်းလူင်ယဝ်ႉၼႃ..”
“တေၸႂ်ႈယူႇ ပေႃးဢမ်ႇၼၼ်..ၶဝ်တေဢမ်ႇၼွၼ်းလပ်းယဵၼ်လႆႈၸိူင်ႉၼၼ်”
ဝၢႆႇတူၺ်းလႅင်းဢွၼ်ႇ ဢၼ်ၼွၼ်းလပ်းယူႇၼၼ်ႉယဝ်ႉ ယုမ်ႉဢွၵ်ႇမႃးသေ ဢၼ်ႁိူဝ်ႉမႃးတၢင်းဝၼ်းၼၼ်ႉၵေႃႈ မိူၼ်ဝႃႈႁၢႆၵႂႃႇတၢင်းလႂ်မူတ်းၵေႃႈဢမ်ႇႁူႉယဝ်ႉ။
မေႃသွၼ်ၼႆႉ တေႁွင်ႉဝႃႈ သႅင်ႁိူၼ်းၼုမ်ႇ ပဵၼ်မေႃသွၼ်ဢၼ် ယူႇၸမ်ႁူင်းႁဵၼ်းလႄႈ ပေႃးဝႃႈလိုၼ်းၼုမ်ႇဢမ်ႇတၼ်းမႃးႁပ်ႉလႅင်းဢွၼ်ႇ မေႃသွၼ်ၵေႃႈ တေႁွင်ႉမိူဝ်းလဵၼ်ႈၸွမ်း လုၵ်ႈယိင်းမၼ်းတီႈႁိူၼ်းယဝ်ႉ။ မေႃသွၼ်ၼႆႉၵေႃႈ လႆႈဝႃႈပဵၼ်ၽူႈယိင်းဢၼ်လဵင်ႉလုၵ်ႈၵေႃႉလဵဝ်မိူၼ်ၵၼ် ၸွမ်းလူၺ်ႈယူႇၼႂ်းငဝ်းလၢႆး ဢၼ်မိူၼ်ၵၼ်သေ သွင်ၽၢႆႇၵေႃႈ မိူဝ်ႈမီးလွင်ႈၶွင်ႈၶမ်မႃးၸိူဝ်းၼႆႉ တေၵႆႉမႃးတိူင်ႇပၢင်ႇဢုပ်ႇဢူဝ်းၵၼ်တႃႇသေႇလႄႈ ၶၢဝ်းယၢမ်းႁိုင်မႃးၵေႃႈ ပဵၼ်ဢူၺ်းလီၵၼ်ၵႂႃႇယဝ်ႉ။
လိုၼ်းၼုမ်ႇ ၸင်ႇၸေးဢဝ်လႅင်းဢွၼ်ႇသႂ်ႇလင်မၼ်း ပႆမိူဝ်းၵႂႃႇလွႆးလွႆးယူႇ။ ပိုၼ်းမိူင်းဢၼ်ဝႃႈပွၵ်ႈမိူဝ်းၼၼ်ႉ ႁိုဝ်တေပႃႈၽၢတ်ႇယၢၼ်မိူဝ်းလႆႈလႃႇ ၶပ်းလူတ်ႉလူင်ၵႂႃႇလွႆးလွႆး တူၺ်းၸွမ်းလိုၼ်းၼုမ်ႇၶႃၵႂႃႇ တေႃႇပေႃးပူၼ်ႉသၢႆတႃမၼ်းယဝ်ႉ။
မိူဝ်ႈထူပ်းႁၼ် ၵူၼ်းသၢင်ႈပၼ်ႁႃၼႂ်းလၢၼ်ႉၼၼ်ႉ ပဵၼ်ၵူၼ်းၶွင်လုင်းသၢင်ႇလႃႉၼႆ ၸိုၼ်ႈၶိူဝ်းၵေႃႈ ဢမ်ႇပႂ်ႉသင်ယဝ်ႉ သင်ႇႁႂ်ႈၽူႈမၢႆမၼ်း ၸၢႆးသၢႆလႅင်း ႁဵတ်းၵၢၼ်ၵႂႃႇၵမ်းလဵဝ်ယူႇ။
ယၢမ်းၵၢင်ၼႂ် ၽွင်းဢၼ်လိုၼ်းၼုမ်ႇတိုၵ်ႉမႃးၶဝ်ႈၵၢၼ်ၼၼ်ႉ လႆႈႁၼ်ၵႃးလမ်လၢႆလမ်း တမ်းယူႇတီႈၼႃႈလၢၼ်ႉလႄႈ ၶဝ်ႈၵႂႃႇတၢင်းၼႂ်းလၢၼ်ႉၵေႃႈ လႆႈႁၼ်ၵူၼ်းမင်ႈသင်ႈ ၶပ်ႉယႆၸႅၼ်ႇၵၼ်လူင်ၵႂႃႇမူတ်း။ ၵူၼ်းႁဵတ်းၵၢၼ်ၵေႃႈ သမ်ႉပေႃးဢမ်ႇမီးၽႂ်ႁတ်းတၵ်းသဵင်သင်ယဝ်ႉ လိုၼ်းၼုမ်ႇၵေႃႈ ၸင်ႇထၢမ် လိူၼ်သႂ် ဢၼ်မႃးႁွတ်ႈဢွၼ်တၢင်းမၼ်းၼၼ်ႉသေ။
“ပဵၼ်လွင်ႈသင်ၵၼ်လႃႇၼႆႉ”
“မိူၼ်ဝႃႈ တေမီးၵူၼ်းမႃးႁႃ ၽူႈပွင်ၵၢၼ်ႁဝ်းၼၼ်ႉယဝ်ႉ”
“မႃးပေႃးတၢၼ်ႇတေမႃးယႃႉလႅဝ်လၢၼ်ႉလႃႇ”
ယၢမ်းၼၼ်ႉ ၸိုၼ်ႈၶိူဝ်းလႄႈ ၽူႈမၢႆသၢႆလႅင်းၵေႃႈ ႁွတ်ႈမႃးၸွမ်းၵၼ်သေ လႆႈဢွၼ်ၵၼ်ၶဝ်ႈၵႂႃႇၼႂ်းႁွင်ႈၽူႈၸတ်းၵၢၼ် ဢၼ်မီးလုင်းသၢင်ႇလႃႉ ၼင်ႈတေႃႇၼႃႈၵၼ်တင်းတိုၼ်းႁၢၼ်ၼၼ်ႉယဝ်ႉ။
“ၶတ်းၸႂ်မႃးၸဵမ်ၸဝ်ႉတေႉလူးၼႆႉ”
ၼင်ႈလူင်းၼိူဝ်တင်ႇ ဢဝ်တင်းၶႃယၢဝ်းယၢဝ်းလူင်မၼ်းၼၼ်ႉ ၶႃၵၢႆႇၵွၼ်းဝႆႉသေ ႁဵတ်းမိူၼ်ဢမ်ႇလႆႈမီးသင် ၵိူတ်ႇၶိုၼ်ႈပဵၼ်မႃးၼၼ်ႉယဝ်ႉ။
“ႁွတ်ႈမႃးၵေႃႈလီယဝ်ႉ… ၸွင်ႇႁူႉႁႃႉ သူႁဵတ်းႁႂ်ႈၽူႈလူင်းတိုၼ်းႁဝ်း ထွၼ်ဢွၵ်ႇလၢႆၵေႃႉယဝ်ႉ သူဢမ်ႇလူင်းတိုၼ်းၵေႃႈ ဢမ်ႇထုၵ်ႇလီမႃးသုၵ်ႉယုင်ႈၸွမ်းၵၢၼ်ႁဝ်း ဢမ်ႇၸႂ်ႈႁိုဝ်”
“သူလၢတ်ႈလွင်ႈသင်လႃႇ ႁဝ်းၵေႃႈဢမ်ႇလႆႈႁဵတ်းသင်လူး.. ႁဝ်းတၼ်းၵႂႃႇသုၵ်ႉယုင်ႈၸွမ်းၼႃႈၵၢၼ်သူၸဵမ်မိူဝ်ႈလႂ်”
“ဢမ်ႇၸႂ်ႈသူႁႃႉ ႁူၺ်းႁွင်ႉဢဝ်ၽူႈလူင်းတိုၼ်းႁဝ်းၵႂႃႇမူတ်း ႁဵတ်းႁႂ်ႈၼႃႈၵၢၼ်ႁဝ်းဢမ်ႇၸၢင်ႈၵႂႃႇတၢင်းၼႃႈလႆႈ”
သၢႆတႃၸိုၼ်ႈၶိူဝ်း ပၵ်းတူၺ်းၸူး လူင်းသၢင်ႇလႃႉသေ
“သင်ၵေႃႈယဝ်ႉ ဢၼ်ပဵၼ်ၶူဝ်းၶွင်ႁဝ်းၵူႈလွင်ႈၼၼ်ႉ ပေႃးဝႃႈမီးၵူၼ်းမႃးယႃႉၵဝ်း ဢိတ်းဢွၼ်ႇၼိုင်ႈၵူၺ်းၵေႃႈ ႁဝ်းတေႁဵတ်းႁႂ်ႈမၼ်းလႅဝ်ၵႂႃႇမူတ်းၼၼ်ႉယဝ်ႉ ႁဵတ်းမွၵ်ႈၼႆႉယင်းဢေႇၵွၼ်ႇ သင်သူဢမ်ႇယွမ်းထွႆ ႁဝ်းၵေႃႈတေႁဵတ်းႁႂ်ႈသူ ယူႇၼႂ်းတူင်ႇဝူင်းၼႆႉဢမ်ႇလႆႈမိူၼ်ၵၼ် ဢမ်ႇလၢတ်ႈၵေႃႈ သူတေႁူႉလီယူႇ”
လုင်းသၢင်ႇလႃႉ မိူၼ်တေႁူႉယဝ်ႉဝႃႈ ၸိုၼ်ႈၶိူဝ်းၶႂ်ႈဝႃႈၸိူင်ႉႁိုဝ် ပႃးတင်းလွင်ႈဢမ်ႇႁၢၼ်ႉၸႂ်သေ လုၵ်ႉဢွၵ်ႇၵႂႃႇ ႁွင်ႉဢဝ်လုၵ်ႈၼွင်ႉမၼ်း ပွၵ်ႈမိူဝ်းၶိုၼ်းလီလီယူႇယဝ်ႉ။
မိူဝ်ႈဢၼ်လိုၼ်းၼုမ်ႇတိုၵ်ႉမိူၼ်ႇတူၺ်းၸွမ်း ၵူၼ်းၸိူဝ်းၼၼ်ႉယူႇၼၼ်ႉ လုင်းဢွင်ႇၵေႃႈ မႃးႁွင်ႉမၼ်းၵႂႃႇတီႈႁူင်းယႃၼႆယူႇ။ ႁွတ်ႈထိုင်ယဝ်ႉၵေႃႈ လႆႈႁၼ် ပိုၼ်းမိူင်း တူဝ်သုင်ၶႃယၢဝ်း သႂ်ႇသိူဝ်ႈသီၶၢဝ်မေႃယႃ တၢင်းလဝ်းမၼ်းၼၼ်ႉ တိူဝ်းၶိုၼ်ႈမႃးလိူဝ်မိူဝ်ႈဝႃးလူးၵွၼ်ႇ၊ ဢမ်ႇဝႃႈ မၼ်းတေတူင်ႉၼိုင်ႁဵတ်းသင်ၵေႃႈ ၼင်ႇႁၢင်ႈမီးသၢႆတႃသၢဝ်သၢဝ်ၶဝ် ပၵ်းတႃတူၺ်းၸွမ်းယူႇတႃႇသေႇ မွင်းဝႃႈ မၼ်းယုမ်ႉဢွၵ်ႇမႃး ႁၼ်ၶဵဝ်ႈၶၢဝ်ၶၢဝ် ၵႅမ်ႈလွၵ်းလွၵ်းဢွၼ်ႇၼၼ်ႉၼႆ သၼ်ႇၶွၼ်းႁူဝ်ၸႂ်သၢဝ်ၶဝ် သမ်ႉပေႃးဢမ်ႇၼိမ်သဝ်းလႆႈသေဢိတ်းယဝ်ႉ။
ပိုၼ်းမိူင်းၵေႃႈ ပႆမႃးၸူးလိုၼ်းၼုမ်ႇၶႃသေ ပူၵ်းမိုဝ်းယုမ်ႉၸူးလိုၼ်းၼုမ်ႇၵႂႃႇ ၵူၺ်းၵႃႈ လိုၼ်းၼုမ်ႇတႄႉ ဢမ်ႇမီးၽၢင်ႁၢင်ႈသင် မိူၼ်ၼင်ႇပိူၼ်ႈၼင်ႇၵဝ်ႇ၊ လိုၼ်းၼုမ်ႇ ယုမ်ႉၸူးမၼ်းသေ လႆႈမႃးတူင်ႉတၵ်ႉၵၼ်ၵႂႃႇဢိတ်းဢွတ်းယဝ်ႉၵေႃႈ ၸင်ႇဢွၼ်ၵၼ်သိုပ်ႇၵႂႃႇႁဵတ်းၵၢၼ်ၽႂ်မၼ်းယူႇ။
လုင်းဢွင်ႇၵေႃႈၵႂႃႇၸတ်းၵၢၼ်ၵႃႈၸႂ်ႉၸၢႆႇတင်းမူတ်းသေ လိုၼ်းၼုမ်ႇၼၼ်ႉၵေႃႈ ၵႂႃႇသူႇၸႂ်းၶဝ်ၸိူဝ်းၼၼ်ႉယဝ်ႉ သူင်ႇသင်ႇၶဝ်ႁႂ်ႈပွၵ်ႈမိူဝ်းႁိူၼ်းၶိုၼ်းလီလီယူႇ။ မိူဝ်ႈတေၽၢတ်ႇယၢၼ်ၵၼ်ၵႂႃႇၼၼ်ႉ လိုၼ်းၼုမ်ႇ လႆႈလၢတ်ႈၵႂႃႇတီႈၶဝ်ဝႃႈ..
“ပေႃးဝႃႈလၢၼ်ႉၶဝ်ႈၽၵ်းႁဝ်းၼၼ်ႉ ထုၵ်ႇသူပ်းဝၢၼ်ယူႇၵေႃႈ ယႃႇလိုမ်းၵႂႃႇဝႄႉၵၼ်ၶႃႈလႄႈၼႃႈ”
လိုၼ်းၼုမ်ႇလႄႈ လုင်းဢွင်ႇၵေႃႈ မိူဝ်ႈတိုၵ်ႉဢွၼ်ၵၼ်ပွၵ်ႈၶိုၼ်းၼၼ်ႉ။
“ၸွႆႈယူတ်းယႃၵႂႃႇပၼ်ၶဝ်လၢႆလၢႆၸိူင်ႉၼႆၵူၺ်းႁႃႉ… ဢမ်ႇႁၼ်ဝႃႈ မၼ်းတေၵႄႈၶႆပၼ်ႁႃသင်လူး… ပေႃးၵူၼ်းဢမ်ႇႁူႉ ယင်းတေထၢင်ႇဝႃႈ မၼ်းပဵၼ်ၵႂႃႇတႄႉလႄႈ တေႁၼ်ဝႃႈႁဝ်းၵႃႈလႆႈၸွႆႈယူတ်းယႃပၼ်ၶဝ် ဢမ်ႇၸႂ်ႈဝႃႈ တေသၢင်ႈပၼ်ႁႃမႃးထႅင်ႈႁိုဝ်”
“ပေႃးၼၼ် ႁဝ်းသမ်ႉတေလႆႈႁဵတ်းၸိူင်ႉႁိုဝ်ၶႃႈ…”
“ႁဝ်းၸၢင်ႈဢဝ်တၢင်းၽိတ်းၶဝ်လႆႈယူႇလူး မိူဝ်ႈလႂ်မၼ်းဢမ်ႇၸႂ်ႈလွင်ႈတေႉ ၸႂ်ႉပၵ်းပိူင်ဢဝ်ၵေႃႈပေႃးပေႉဝႆႉယူႇယဝ်ႉ ယွၼ်ႉသင်တေလႆႈမႃးသဵင်ႈငိုၼ်းၵွပ်ႈၶဝ်ၸိူင်ႉၼႆ”
“ဝႆႉဝႃႈႁဵတ်းၵၢၼ်လီၵုသူဝ်ႇ ၸွႆႈထႅမ်ၵူၼ်းတူၵ်းၵိၼ်းသေၶႃႈလႄႈ… ယွၼ်ႉၸဝ်ႈၶွင်လၢၼ်ႉႁဝ်း ဢမ်ႇႁဵတ်းၵၢၼ်လီလႄႈ ၸင်ႇလႆႈမီးလွင်ႈသုၵ်ႉယုင်ႈၸိူင်ႉၼႆမႃးယဝ်ႉ”
“ႁဵတ်းႁိုဝ်လႄႈဝႃႈဢမ်ႇႁဵတ်းၵၢၼ်လီလႃႇ ၽၢႆႇၸွႆႈထႅမ်ငိုၼ်းလုၵ်ႈႁဵၼ်း၊ ၸွႆႈပူၵ်းပွင်ႁူင်းႁဵၼ်း၊ ၸွႆႈထႅမ်ၼႂ်းတူင်ႇဝူင်း ၵူၼ်းထူပ်းတၢင်းယၢပ်ႇၽိုတ်ႇ ၽၢႆႇၸွႆႈထႅမ်ႁဵတ်းၵၢၼ်လီပၼ်ပိူၼ်ႈၼႆႉ ၸဝ်ႈၶွင်လၢၼ်ႉႁဝ်းၼၼ်ႉ ယူႇဝႆႉမၢႆၼိုင်ႈတႃႇသေႇယဝ်ႉ”
“ၸဝ်ႈၶွင်လၢၼ်ႉ မီးၼမ်ႉၸႂ်မေႃၸွႆႈထႅမ်ပိူၼ်ႈပေႃးတၢၼ်ႇၼႆႉ ငိုၼ်းၸွႆႈထႅမ်ၵူၼ်းပဵၼ်ႁႃႈၵေႃႉၵူၺ်း ဢမ်ႇလႆႈပဵၼ်ပၼ်ႁႃၵႃႈႁိုဝ်မႃးၼင်ႇၵဝ်ႇ ၽူႈၸတ်းၵၢၼ်ႁဝ်းၵေႃႈ ယႃႇပေၶီႈထီႇၼႃႇၶႃႈလႄႈ မိူဝ်ႈလႂ်ႁဵတ်းလွင်ႈလီၵေႃႈ လွင်ႈလီၼၼ်ႉတေမႃးၸူးႁဝ်းၶိုၼ်းယူႇၵူၺ်း”
မိူဝ်ႈႁွတ်ႈထိုင်ၼႂ်းႁွင်ႈၽူႈၸတ်းၵၢၼ်ၼၼ်ႉ ၸိုၼ်ႈၶိူဝ်းၵေႃႈ ပႂ်ႉတူၺ်းၵၢၼ်ငၢၼ်းလိုၼ်းၼုမ်ႇ ဢၼ်တေမႃးၼႄၼၼ်ႉသေ။
“ႁဝ်းႁဵတ်းၸွမ်းၼင်ႇဢၼ်သူလၢတ်ႈယဝ်ႉ မိူၼ်ဝႃႈ ဢမ်ႇလႆႈႁၼ်လွင်ႈၶိုပ်ႈၼႃႈသင်မႃးလႃႇ”
“သမ်ႉဝႃႈၶဝ်ပဵၼ်ၵူၼ်းယူဝ်းယူဝ်းၵူၺ်းၵေႃႈ ၶဝ်ၵေႃႈပဵၼ်ၶႅၵ်ႇၼႂ်းလၢၼ်ႉဢမ်ႇၸႂ်ႈၶႃႈႁိုဝ် တႅၼ်းတီႈတေႁဵတ်းၽူႈၶဵၼ်ၵၼ် ဝႆႉလွင်ႈပႅင်းၸင်းၵၼ်ၼၼ်ႉ လွင်ႈပဵၼ်ဢူၺ်းလီၵၼ်ၼႆႉ ဢမ်ႇၸႂ်ႈဝႃႈ မီးလွင်ႈၶိုပ်ႈၼႃႈမႃးၶႃႈႁႃႉ”
“ဢမ်ႇၸႂ်ႈဝႃႈႁႂ်ႈသူထတ်းသၢင်ၼႄ လွင်ႈပိူင်ပဵၼ်မၼ်းဢမ်ႇၸႂ်ႈႁိုဝ်”
လိုၼ်းၼုမ်ႇတူၺ်းၼႃႇရီႇ ဢၼ်ၽႅၼ်ဝႆႉၼႂ်းႁွင်ႈၼၼ်ႉယဝ်ႉၵေႃႈ ယဵၼ်ၵႂႃႇၵႅပ်ႉၼိုင်ႈယဝ်ႉ
“ထိုင်ၶၢဝ်းယၢမ်းယဝ်ႉၶႃႈ သင်ၶႂ်ႈႁူႉၵေႃႈ ၸွႆႈၵႂႃႇတူၺ်းတီႈၼႂ်းလၢၼ်ႉလႆႈယူႇ”
တီႈၼႂ်းလၢၼ်ႉ ဢၼ်မီးၵူၼ်းၼင်ႈပေႃးတဵမ်လူင်ဝႆႉၼၼ်ႉ ၶဝ်ႁႃႈၵေႃႉၵေႃႈ ၶဝ်ႈမႃးၼႂ်းလၢၼ်ႉသေ မႃးသင်ႇၵိၼ်ၶဝ်ႈၽၵ်းၼႂ်းလၢၼ်ႉမိူၼ်ၼင်ႇပိူၼ်ႈယူႇ။ ယၢမ်းၼၼ်ႉ ၸင်ႇမီးၽူႈယိင်းၵေႃႉၼိုင်ႈ ဢၼ်မႃးၵိၼ်ၼႂ်းလၢၼ်ႉၼႆႉတႃႇသေႇၼၼ်ႉ တွင်းၶဝ်လႆႈသေ မႃးထၢမ်တီႈၶဝ်ၵႂႃႇ လွင်ႈဢၼ်ပဵၼ်ၵႂႃႇၼႂ်းဝၼ်းၼၼ်ႉယဝ်ႉ။
ယၢမ်းၼၼ်ႉ ၼႂ်းၶဝ်ႁႃႈၵေႃႉၼၼ်ႉၵေႃႈ လႆႈဢွၼ်ၵၼ်လုၵ်ႉၸုၵ်း ယွမ်းၼွမ်းတီႈၼႂ်းလၢၼ်ႉၵႂႃႇ ယွမ်းၼွမ်းတေႃႇၵူၼ်းႁဵတ်းၵၢၼ်ၵူႈၵေႃႉ လႄႈ ၶႅၵ်ႇၸိူဝ်းဢၼ်ၼင်ႈယူႇၸိူဝ်းၼၼ်ႉပႃးယဝ်ႉ။ ယွၼ်ႉၶဝ်သၢင်ႈပၼ်လွင်ႈသုၵ်ႉယုင်ႈၼႆသေ လႆႈလၢတ်ႈၼႄၵႂႃႇလွင်ႈၼႂ်းဝၼ်းၼၼ်ႉ ဢမ်ႇၸႂ်ႈလွင်ႈတႄႉလႄႈ လႆႈလၢတ်ႈပႃး လွင်ႈလီတီႈၼႂ်းလၢၼ်ႉ၊ လွင်ႈၶဝ်ႈၽၵ်းတၢင်းၵိၼ် ဢိၵ်ႇတင်းလွင်ႈဢၼ်ၽၢႆႇတၢင်းလၢၼ်ႉ ႁဵတ်းပၼ်ၶဝ် လိူဝ်သေတေဢမ်ႇဢဝ်တၢင်းၽိတ်းယဝ်ႉ သမ်ႉပၢႆၸွႆႈလုမ်းလႃးတူၺ်းထိုင်ၶဝ်လီလီထႅင်ႈ လႄႈ မိူဝ်ႈဢၼ်ၵူၼ်းၼႂ်းလၢၼ်ႉ လႆႈငိၼ်းၸိူင်ႉၼၼ်ယဝ်ႉၵေႃႈ ၸွႆႈသၢင်ႈပၼ်လွင်ႈယုမ်ႇယမ် ၼိူဝ်လၢၼ်ႉၶိုၼ်ႈမႃးထႅင်ႈယူႇယဝ်ႉ။
ၵူၼ်းၼႂ်းလၢၼ်ႉ ဢၼ်လႆႈႁၼ်လွင်ႈႁဵတ်းသၢင်ႈၶဝ် ဢၼ်လႆႈငိၼ်းၶဝ်လၢတ်ႈမႃးၼၼ်ႉၵေႃႈ ႁဵတ်းႁႂ်ႈၵမ်ႉထႅမ်ပၼ်ႁႅင်းလၢၼ်ႉၼႆႉမႃးထႅင်ႈလႄႈ ၵမ်ႈၽွင်ႈၵေႃႈ သင်ႇၶဝ်ႈၽၵ်းၽိူမ်ႉမႃးထႅင်ႈ ၵမ်ႈၽွင်ႈသမ်ႉ ၸွႆႈသၢင်ႈပၼ်ၸိုဝ်ႈသဵင်လၢၼ်ႉ ၼိူဝ်ဢွၼ်ႇလၢႆး သမ်ႉပေႃးလိုဝ်းလင်ၶိုၼ်ႈမႃးထႅင်ႈလိူဝ်ၵဝ်ႇယူႇယဝ်ႉ။
ၸိုၼ်ႈၶိူဝ်းၵေႃႈ လႆႈႁၼ်ၸိူင်ႉၼၼ်ယဝ်ႉ မိူၼ်တေ ႁၢၼ်ႉၸႂ်ၸွမ်းလွင်ႈႁဵတ်းသၢင်ႈလိုၼ်းၼုမ်ႇယူႇ။ ၵူၺ်းၵႃႈ ဢမ်ႇပေႃးၶႂ်ႈယွမ်းႁပ်ႉၵႃႈႁိုဝ်လႄႈ တူၺ်းလိုၼ်းၼုမ်ႇသေ
“လွၵ်းလိင်ႉၼမ်တေႉယဝ်ႉ”
ႁဵတ်းမိူၼ်ဢမ်ႇသူၼ်ၸႂ်သင်ယဝ်ႉ ပႆဢွၵ်ႇလၢၼ်ႉၵႂႃႇယူႇ။ တိုၼ်းႁၢၼ်တႄႉ ယုၵ်ႉၼိဝ်ႉပုၵ်းပၼ်ယဝ်ႉ လုင်းဢွင်ႇၵေႃႈ ယုၵ်ႉၼိဝ်ႉပၼ်ၵႂႃႇႁေသွင်ၶွၼ်။
“ႁဵတ်းလွင်ႈလီၵႂႃႇၵေႃႈ တေလႆႈလွင်ႈလီမႃး…”
ၶဝ်ၸိူဝ်းၼၼ်ႉ မိူဝ်ႈလႆႈႁၼ်လိုၼ်းၼုမ်ႇ ပႂ်ႉတူၺ်းထိုင်ၶဝ်ၼႂ်းႁူင်းယႃၼၼ်ႉၵေႃႈ ႁၼ်ထိုင်ၵၢင်ၸႂ်လိုၼ်းၼုမ်ႇမႃးယဝ်ႉ လၢတ်ႈၼႄလွင်ႈၼႄတၢင်းၵူႈလွင်ႈ ဢၼ်ဝႃႈ မီးၵူၼ်းၸၢင်ႈႁႂ်ႈၶဝ် မႃးယႃႉၸိုဝ်ႈသဵင်လၢၼ်ႉႁႂ်ႈလူႉသုမ်းၼႆလႄႈ ယွမ်းႁပ်ႉတၢင်းၽိတ်းၵႂႃႇတေႃႇၼႃႈလိုၼ်းၼုမ်ႇယူႇ။ ၵူၺ်းၵႃႈ လိုၼ်းၼုမ်ႇၵေႃႈ ထွမ်ႇတူၺ်းလွင်ႈတၢင်းၶဝ်လီလီယဝ်ႉ ၸွႆႈၶဝ်ၵႄႈၶႆပၼ်ႁႃၵႂႃႇ ၼင်ႇႁိုဝ်တေဢမ်ႇလႆႈဢဝ်ပၵ်းပိူင် ၶဝ်ႈမႃးသုၵ်ႉယုင်ႈႁႂ်ႈပေႃးလၢမ်းၵႂႃႇၵႆ ၽၢႆႇလႂ်ၽၢႆႇၼိုင်ႈတေဢမ်ႇမီးလွင်ႈလူႉသုမ်းၼၼ်ႉ ၼႄႉၼမ်းႁႂ်ႈၶဝ်ၵႂႃႇတီႈလၢၼ်ႉသေ ယွမ်းၼွမ်းလွင်ႈဢၼ်ၶဝ်လႆႈႁဵတ်းၵႂႃႇၼၼ်ႉ ၼႆယူႇ။
သမ်ႉဝႃႈလွင်ႈဢၼ်ၶဝ်သၢႆႈတႅၼ်းၶိုၼ်းၼၼ်ႉ ဢမ်ႇႁၼ်ၵႃႈၶၼ်မၼ်း ပဵၼ်ၼမ်ႉပဵၼ်တူဝ်လႆႈသေတႃႉ လွင်ႈဢၼ်လၢၼ်ႉလႆႈႁပ်ႉၼၼ်ႉတႄႉ မၼ်းၼမ်လိူဝ်သေၵႃႈၶၼ် ဢၼ်ၶဝ်တေလႆႈသၢႆႈတႅၼ်းလူးၵွၼ်ႇၼႆ ပေႃးႁၼ်ဝႆႉထႃႈယူႇယဝ်ႉ။
ယၢမ်းၵၢင်ၶိုၼ်းလိုၵ်းယဵၼ် ၼႂ်းႁွင်ႈဢၼ်မီးၾႆးပိူင်းဝွႆးဝွႆးယူႇတႂ်ႈၽိူၼ်ၼၼ်ႉ ၸိုၼ်ႈၶိူဝ်းၵေႃႈ ယၵ်ႉတူၺ်းၶႅပ်းႁၢင်ႈၽူႈယိင်းၵေႃႉၼိုင်ႈသေ ၼမ်ႉတႃယိုင်ႈႁူၺ်ႇ ၸိုမ်ႉယမ်းလႆယွတ်ႇသႂ်ႇၵႅမ်ႈမၼ်းမႃးယူႇယဝ်ႉ။
တွၼ်ႈသီႇသုတ်းၵႂႃႇယဝ်ႉ သိုပ်ႇတူၺ်းထႅင်ႈတွၼ်ႈႁႃႈၶႃႈ။
ႁပ်ႉထွမ်ႇပၼ်ႁႅင်းလူၺ်ႈသဵင် တၢင်း YouTube ၵေႃႈလႆႈၶႃႈ။
