တွၼ်ႈသိပ်းႁူၵ်း
ၼႃႈၾႃႉၼႃႈမိူင်းလမ်မိုတ်းမႃး သဵင်ၾႃႉတႅၵ်ႇၾႃႉလင်ၼၼ်ႈမေႃးပၼ်း လူမ်းထူဝ်းထွင်းၽတ်ႉဢဝ်ၽိူဝ်မႆႉၽိူဝ်တွၵ်ႇ ပိဝ်ႁူင်ႈတူၵ်း သဵင်လုၵ်ႈဢွၼ်ႇလႅၼ်ႈႁွင်ႉလမ်းၸွမ်းမႄႈၶဝ် ဢၼ်ၵွင်လင်ၵႂႃႇပႅတ်ႈလွႆးလွႆး ၼႂ်းၵႄႈၽူၼ်လူင်ႁႃႇယႂ်ႇတူၵ်းလူင်းသႂ်ႇ ပေႃးယမ်းတူဝ်ႈၵႂႃႇတင်းတူဝ် ၵတ်းလၢင်ႈပေႃးသၼ်ႇၵေႃႈ ႁိုဝ်ၵိုတ်း ႁွင်ႉႁႃမႄႈၶဝ်
“မႄႈ!..မႄႈ..မႄႈ…..”
သဵင်လင်ယွၼ်ႈမေႃးၼႂ်းႁူ ႁူၺ်ႇတႃလမ်မိုၼ်းတူၺ်း ၼႂ်းႁွင်ႈလပ်းသိင်ႇ လိုၼ်းၼုမ်ႇဢၼ်ႁူႉတူဝ်ၶိုၼ်းမႃးၼၼ်ႉၵေႃႈ
“ႁဝ်းမီးယူႇတီႈလႂ်လႃႇ လပ်းသိင်ႇတေႉယဝ်ႉ” လၢတ်ႈယူႇၼႂ်းၸႂ်မၼ်းလႄႈ “တိုၵ်ႉဢွၵ်ႇၶၢဝ်းတၢင်းၵႂႃႇယူႇၸွင်ႇၸႂ်ႈ..”
ဝၢႆႇတူၺ်းသၢႆႉတူၺ်းၶႂႃ လႆႈႁၼ်မီးယႃမူၵ်ႇလူင်ၽႅၼ်ႁွႆႈဝႆႉယူႇႁိမ်းၵူႇလႄႈ တီႈၵွၵ်းႁူဝ်မၼ်းၼၼ်ႉၵေႃႈ ၼင်ႇႁၢင်ႈၶႂ်ႈၸဵပ်းၸဵပ်းသေ
“ဢမ်ႇၸႂ်ႈဝႃႈႁဝ်းလႆႈတၢႆၵႂႃႇယဝ်ႉႁႃႉ ပဵၼ်သင်လႄႈၵွၵ်းႁူဝ်ၸဵပ်းၸိူင်ႉၼႆ”
မိူဝ်ႈဢၼ်တူၺ်းၵႂႃႇၶၢင်ႈၵူႇမၼ်းၼၼ်ႉ လႆႈႁၼ်လႅင်းဢွၼ်ႇ ယိပ်းတင်းမိုဝ်းမၼ်းဝႆႉ သမ်ႉပေႃးမၼ်ႈတဵင်ႈတဵင် ၼွၼ်းႁွင်ႉမႄႈလူင်ယူႇတိၵ်းတိၵ်းယဝ်ႉ။
“ႁဵတ်းၽိတ်းတေႃႇၶဝ် ထိုင်တီႈဢမ်ႇႁတ်းတေႃႇၼႃႈၶဝ်လႆႈယဝ်ႉ ၵူၺ်းၵႃႈ တေႃႈၼင်ႇတေတၢႆၵေႃႈ ယင်းတိုၵ်ႉၸွမ်းႁွင်ႉၵၼ်လႆႈယူႇ၊ လိုမ်းတူဝ်ယူႇၵေႃႈ ယင်းၸွမ်းၶဝ်ႈၵႂႃႇပႃးၼႂ်းၾၼ်၊ သမ်ႉဝႃႈ တေၼွၼ်းလပ်းယူႇၵေႃႈ ယင်းတိုၵ်ႉႁွင်ႉဢမ်ႇၵိုတ်းဢမ်ႇလိုဝ်ႈလႆႈ၊ ၶေႃႈၵႂၢမ်းဢၼ်ၶဝ်ႁွင်ႉဝႃႈမႄႈၼၼ်ႉ ပူၵ်းတိုၼ်ႇႁႂ်ႈႁဝ်းမီးသၢႆၸႂ်သိုပ်ႇယူႇၵႂႃႇလႆႈ ၵူၺ်းၵႃႈ ၵူၼ်းႁၼ်သုၼ်ႇတူဝ်ၸိူင်ႉၼင်ႇႁဝ်း တေပဵၼ်မႄႈၶဝ်ၵႂႃႇလႆႈၸိူင်ႉႁိုဝ်လႃႇ”
တင်းဝူၼ်ႉတင်းပွႆႇၼမ်ႉတႃမၼ်းလႆဢွၵ်ႇမႃးယဝ်ႉ။
ယၢမ်းၵၢင်ၼႂ် ဝၢႆးၽူၼ်ႁိူတ်ႇယဝ်ႉၵေႃႈ တွင်ႉၾႃႉၸိုၼ်ႈပၢင်ႇသႂ် လူမ်းထူဝ်းထွင်းၶဝ်ႈၼႂ်းႁွင်ႈမႃး ၵတ်းၸိုၼ်ႈယဵၼ်ၸႂ် လိုၼ်းၼုမ်ႇၼၼ်ႉ တိုၼ်ႇယဝ်ႉၼႆၵေႃႈ ႁိုဝ်ႁတ်းမိုၼ်းတႃ ဢမ်ႇႁူႉဝႃႈ တေႁူပ်ႉတေႃႇၼႃႈၶဝ်လႆႈၸိူင်ႉႁိုဝ် ၼၼ်ႉယဝ်ႉ။
မိူဝ်ႈယူႇၼႂ်းငဝ်းလၢႆးၸိူင်ႉၼၼ် တေလႆႈႁွင်ႉၶဝ်ၸိူင်ႉႁိုဝ်လႃႇ သင်ဢမ်ႇႁူႉၸၵ်းၵေႃႈ ဝႃႈယူႇမဵဝ်းၼိုင်ႈ ၵူၺ်းၵႃႈ ၶဝ်ၵေႃႈပဵၼ်လုၵ်ႈၸၢႆး ဢၼ်မၼ်းႁၵ်ႉသုတ်းႁူဝ်ၸႂ် လႄႈ ၶဝ်ၵေႃႈ ပဵၼ်လုၵ်ႈဢွၼ်ႇ ဢၼ်မၼ်းဢဝ်ၽၢတ်ႇပေႃႈမႄႈၶဝ်ၵႂႃႇ ပဵၼ်လၢႆပီႊမိူၼ်ၵၼ်လူး။ ၽွင်းယၢမ်းတေႃႈလဵဝ် ယၢမ်းၼႆႉ ဢၼ်ဢမ်ႇမီးတၢင်းလိူၵ်ႈၼၼ်ႉ မၼ်းၵေႃႈ လႆႈမိုၼ်းတႃတူၺ်းၼႃႈၶဝ်ၵႂႃႇသေ လႅင်းဢွၼ်ႇ ဢၼ်လႆႈႁၼ်မၼ်းတိုၼ်ႇမႃးယဝ်ႉၼႆၵေႃႈ ၸူမ်းၸူမ်းသိူဝ်းသိူဝ်း ႁွင်ႉပၼ်းဢူၼ်တဵမ်ၼႂ်းႁွင်ႈ ယူႇယဝ်ႉ။ ယၢမ်းၼၼ်ႉ ၸိုၼ်ႈၶိူဝ်းၵေႃႈ ၶဝ်ႈမႃးႁႃမၼ်းယူႇ။
“ႁူႉတူဝ်မႃးယဝ်ႉႁႃႉ..သူပဵၼ်ၸိူင်ႉႁိုဝ်ၽွင်ႈ…”
“သူပဵၼ်ၽႂ်ၶႃႈ…ပဵၼ်သင်ႁဝ်းမႃးမီးယူႇတီႈၼႆႈၶႃႈလႃႇ”
မိူဝ်ႈလိုၼ်းၼုမ်ႇလၢတ်ႈၸိူင်ႉၼႆၵေႃႈ ဢဝ်ၸိုၼ်ႈၶိူဝ်းၶႃလႅင်းဢွၼ်ႇ မိုင်ယဵၼ်ၵႂႃႇၵႅပ်ႉၼိုင်ႈယဝ်ႉ။
“သူဢမ်ႇတွင်းႁဝ်းလႆႈႁႃႉ..ႁဝ်းပဵၼ်ၸိုၼ်ႈၶိူဝ်းဢိူဝ်ႈ”
လႅင်းဢွၼ်ႇၼၼ်ႉၵေႃႈ မႃးယိပ်းဢဝ်မိုဝ်းမၼ်းသေ “မႄႈ!..ဢမ်ႇတွင်းၸၢႆးႁႃႉ”
လိုၼ်းၼုမ်ႇၶွၼ်းႁူဝ်ၼႄၵႂႃႇ ဝႆႉသီၼႃႈမိူၼ်ဢမ်ႇႁူႉလွင်ႈသင်ၼၼ်ႉယဝ်ႉ။
“ႁဝ်းမႃးမီးယူႇတီႈၼႆႈလႆႈၸိူင်ႉႁိုဝ်ၶႃႈ”
ယၢမ်းၼၼ်ႉ မေႃပိုၼ်းမိူင်းၵေႃႈ ၶဝ်ႈမႃးၵူတ်ႇထတ်းၸႅတ်ႈတူၺ်း ၽၢင်ႁၢင်ႈတၢင်းပဵၼ်လိုၼ်းၼုမ်ႇ ၸွမ်းၼင်ႇပုၼ်ႈၽွၼ်းမေႃယႃၼၼ်ႉသေ မိူၼ်ဝႃႈဢမ်ႇမီးသင်ႁၢႆႉႁႅင်းမႃးယဝ်ႉၼႆလႄႈ ၸင်ႇဢွၵ်ႇႁွင်ႈၵႂႃႇယူႇ။ ၸိုၼ်ႈၶိူဝ်းၼၼ်ႉၵေႃႈ လမ်းၸွမ်းမေႃဢွၵ်ႇႁွင်ႈမႃးယဝ်ႉ။
“ၶဝ်ဢမ်ႇမီးလွင်ႈႁၢႆႉႁႅင်း..လွင်ႈၽိတ်းပိူင်ႈသင်မႃးသေဢိတ်းၶႃႈႁႃႉ”
“ဢေႃႈ..ၶဝ်ဢမ်ႇလႆႈပဵၼ်သင်ႁၢႆႉႁႅင်းမႃးၶႃႈ”
“တူၺ်းမိူၼ်ဝႃႈ ၶဝ်တေဢမ်ႇတွင်းသင်လႆႈၶႃႈဢေႃႈ”
မေႃၵေႃႈမိုင်ဝူၼ်ႉၵႂႃႇၵႅပ်ႉၼိုင်ႈယဝ်ႉ မိူၼ်တေဝူၼ်ႉလႆႈသေလွင်ႈလွင်ႈလႄႈ
“ယွၼ်ႉၶဝ်လႆႈတၢင်းမၢတ်ႇၸဵပ်းတီႈႁူဝ်လႄႈ မၼ်းၵေႃႈတေပဵၼ်ၵႂႃႇလႆႈယူႇၵူၺ်း ၶဝ်ၼၼ်ႉ..တေၸၢင်ႈလိုမ်းလွင်ႈဝၼ်းလင်လႆႈၸူဝ်ႈၶၢဝ်း”
“ပေႃးၼၼ်ၵေႃႈ ၸွႆႈၵူတ်ႇထတ်းတူၺ်းလီလီ..ၶိုၼ်းထႅင်ႈၸွင်ႇတေလႆႈၶႃႈႁိုဝ်”
မေႃၵေႃႈ တူၵ်းလူင်းႁဵတ်းၸွမ်းၵႂႃႇယူႇ။ မိူဝ်ႈဢွၼ်ဢဝ်လိုၼ်းၼုမ်ႇၶဝ်ႈၵႂႃႇ ၵူတ်းထတ်းၸႅတ်ႈတူၺ်းၵွၵ်းႁူဝ်ၼၼ်ႉ မိူၼ်ဝႃႈ ဢမ်ႇမီးသင်ၽိတ်းပိူင်ႈလႄႈ ပိုၼ်းမိူင်းၼၼ်ႉၵေႃႈ ႁႂ်ႈမေႃယႃၼႂ်းႁွင်ႈၼၼ်ႉဢွၵ်ႇၵႂႃႇသေ ဝႆႉၵိုတ်းမၼ်းလႄႈလိုၼ်းၼုမ်ႇၵူၺ်းယူႇ။
“သူဝူၼ်ႉတေႁဵတ်းသင်ယူႇလႃႇ..သူလႅၼ်ၶဝ်လႆႈၵေႃႈ တေလႅၼ်မေႃယႃ..ၸိူင်ႉၼင်ႇႁဝ်းဢမ်ႇလႆႈလေႃႇၼႃႈ ပဵၼ်သင်လႄႈတေလႆႈႁဵတ်းၸိူင်ႉၼၼ်”
“ႁဝ်းၵေႃႈၶႂ်ႈလိုမ်း ဢမ်ႇၶႂ်ႈတွင်းဝႆႉ.. ဝၼ်းၵဝ်ႇၵဝ်ႇၼၼ်ႉယဝ်ႉ ႁဝ်းၶႂ်ႈမီးၸၢတ်ႈပၢၼ်ဢၼ်မႂ်ႇမႂ်ႇ ဢၼ်ပဵၼ်ယူႇၶၢဝ်းယၢမ်းမိူဝ်ႈလဵဝ်ၼႆႉလႄႈ သိုပ်ႇမီးသၢႆၸႂ် ဢၼ်တိုၵ်ႉလိူဝ်ယူႇၼႆႉၵႂႃႇထႅင်ႈ ၶၢဝ်းယၢမ်းပူၼ်ႉမႃး မၼ်းႁဵတ်းႁႂ်ႈမီးတၢင်းတၢင်းသိူဝ်းသေတႃႉ မၼ်းၵေႃႈမီးတၢင်းတုၵ်ႉမိူၼ်ၵၼ် ၸိူင်ႉႁိုဝ်ၵေႃႈ တၢင်းသိူဝ်းဢၼ်ပူၼ်ႉမႃးၼၼ်ႉ ဢဝ်ၶိုၼ်းဢမ်ႇလႆႈယူႇယဝ်ႉ တၢင်းတုၵ်ႉဢၼ်ၸဵပ်းသႅပ်ႇၼၼ်ႉၵေႃႈ ယိုင်ႈၶႅၼ်းတေၸဵပ်းသႅပ်ႇမႃးထႅင်ႈၵူၺ်း ဢမ်ႇဝႃႈတေပဵၼ်သင်မႃး တေလႆႈယွမ်းႁပ်ႉမၼ်းလႄႈ ယူႇၸွမ်းမၼ်းၵႂႃႇ ၸိူင်ႉၼၼ်ယဝ်ႉ”
“ၶႂ်ႈယူႇၸွမ်းလွင်ႈဢၼ်ပဵၼ်ယူႇမိူဝ်ႈလဵဝ်!… ပဵၼ်သင်လႄႈ..တေလႆႈႁဵတ်းပဵၼ်ၵူၼ်းလိုမ်းလွင်ႈဝၼ်းလင်လႃႇ ဢမ်ႇၸႂ်ႈဝႃႈ..တေပဵၼ်ၵူၼ်းယွၵ်ႇလႅၼ်ၵႂႃႇၵူၺ်းႁိုဝ်”
“ယွၼ်ႉႁဝ်း..ယူႇၸွမ်းၶၢဝ်းယၢမ်းမိူဝ်ႈလဵဝ် ဢၼ်ပဵၼ်ယူႇၼႆႉဢမ်ႇလႆႈ ယွမ်းႁပ်ႉမၼ်းဢမ်ႇလႆႈ ဝူၼ်ႉထိုင်မၼ်းယူႇတိၵ်းတိၵ်း ဝူၼ်ႉမိူဝ်ႈလႂ်ၵေႃႈ မိူၼ်ႁူဝ်ၸႂ်ႁဝ်းတေတႅၵ်ႇလႅဝ်ၵႂႃႇယဝ်ႉ မိူဝ်ႈဝႃႈၶဝ်ၼၼ်ႉ ဢမ်ႇလႆႈယူႇၸွမ်းႁဝ်းယဝ်ႉလႄႈ ႁဝ်းၼၼ်ႉဢမ်ႇၸႂ်ႈမႄႈၶဝ်ၼႆၵေႃႈ မၼ်းၸဵပ်းမိူၼ်ဢမ်ႇၶႂ်ႈမီးသၢႆၸႂ်သိုပ်ႇယူႇၵႂႃႇလူးၵွၼ်ႇ ယွၼ်ႉၼၼ်… ႁဝ်းၸင်ႇၶႂ်ႈႁႂ်ႈမေႃၸွႆႈၼၼ်ႉယဝ်ႉ သမ်ႉဝႃႈ တေပဵၼ်လွင်ႈယွၵ်ႇလႅၼ်ႁိုဝ် ပဵၼ်လွင်ႈႁဵတ်းၵႅင်ႈၵေႃႈယဝ်ႉ မိူဝ်ႈႁဝ်းၽွမ်ႉယဝ်ႉ ႁဝ်းတေၶတ်းၸႂ်ယွမ်းႁပ်ႉမၼ်းႁႂ်ႈလႆႈလႄႈ မိူဝ်ႈၼၼ်ႉ ႁဝ်းၵေႃႈ တေမီးၸၢတ်ႈပၢၼ်ၶွင်ႁဝ်းၵႂႃႇ ယူႇၸွမ်းလွင်ႈဢၼ်ပဵၼ်ယူႇ ၼၼ်ႉႁႂ်ႈလႆႈၵူၺ်းၶႃႈ ”
“ၵေႃႈလႆႈ..ႁဝ်းၸွႆႈသူၵေႃႈလႆႈယူႇ ၵူၺ်းၵႃႈ မၼ်းၵေႃႈ..တေႁဵတ်းႁႂ်ႈသူ ယူႇမိူၼ်ဢမ်ႇၸႂ်ႈ..တူဝ်သူၼၼ်ႉယဝ်ႉ”
“မိူဝ်ႈလိူၵ်ႈယဝ်ႉ ဢမ်ႇဝႃႈတေပဵၼ်သင်မႃး ႁဝ်းၵေႃႈတေလႆႈယွမ်းႁပ်ႉမၼ်းၵႂႃႇ မိူၼ်လႆႈတႅပ်းတတ်းလဵင်ႉလုၵ်ႈဢွၼ်ႇၵေႃႉၼႆႉၼၼ်ႉယဝ်ႉ မိူဝ်ႈလဵဝ်ၵေႃႈ ႁဝ်းယင်းတိုၵ်ႉ ႁပ်ႉဢဝ်တၢမ်ႇဢၼ်ႁဝ်းႁဵတ်းဝႆႉၼၼ်ႉယူႇ ၸိူင်ႉႁိုဝ်ၵေႃႈလီ လွင်ႈၼႆႉဝႆႉပဵၼ်ၶေႃႈတူၵ်းလူင်း ၼႂ်းၵႄႈၵၢင်ႁဝ်းသွင်ၵေႃႉၵူၺ်းၶႃႈၼႃ သမ်ႉဝႃႈပဵၼ်မူၺ်ႁွမ်ၵေႃႈယဝ်ႉ”
“ႁူႉယဝ်ႉ..”
ဢဝ်လိုၼ်းၼုမ်ႇဢွၵ်ႇႁွင်ႈမႃးသေ ၸိုၼ်ႈၶိူဝ်းဢၼ်ႁၼ်ဢွၵ်ႇမႃးယဝ်ႉၼႆၵေႃႈ ပဵၼ်ဢၼ်မႆႈၸႂ်ၼႃႇလႄႈ ၼႅတ်ႈထၢမ်ၵႂႃႇယဝ်ႉ။
“ၶဝ်ပဵၼ်ၸိူင်ႉႁိုဝ်ၶႃႈ!…”
“မိူၼ်ဝႃႈ…လွင်ႈမၢတ်ႇၸဵပ်းတီႈႁူဝ်ၼၼ်ႉ တေႁဵတ်းႁႂ်ႈၶဝ်.. လိုမ်းလွင်ႈဝၼ်းလင်ၸူဝ်ႈၶၢဝ်းၶႃႈဢေႃႈ”
“တေႁိုင်မွၵ်ႈၵႃႈႁိုဝ်ၶႃႈလႃႇ”
“တေႁိုင်ၵႃႈႁိုဝ်ၼၼ်ႉ မေႃၵေႃႈဢမ်ႇလၢမ်းႁူႉလႆႈၶႃႈ လွင်ႈၼႆႉတႄႉ..တေယူႇတီႈၵူၼ်းပဵၼ်ထႅင်ႈၶၵ်ႉၼိုင်ႈၶႃႈဢေႃႈ”
ၸိုၼ်ႈၶိူဝ်းၼၼ်ႉၵေႃႈ ပဵၼ်ၸႂ်ဢမ်ႇလီတႄႉတႄႉ ၼင်ႈတူၺ်းလိုၼ်းၼုမ်ႇဢၼ်ၼွၼ်းယူႇ လႄႈ တင်းလႅင်းဢွၼ်ႇ ဢၼ်ၼွၼ်းလပ်းၼိူဝ်တင်ႇၼင်ႈၼၼ်ႉသေ ဝူၼ်ႉထိုင်ၶိုၼ်း ဝၼ်းဢၼ်လူတ်ႉၽႃႇၼၼ်ႉမႃးယဝ်ႉ။
ၽွင်းဢၼ်မၼ်းႁပ်ႉလႅင်းဢွၼ်ႇ တီႈႁိူၼ်းသႅင်ႁိူၼ်းၼုမ်ႇၶဝ်မႃးၸွမ်းတၢင်းၼၼ်ႉ လႆႈႁၼ်လိုၼ်းၼုမ်ႇပႆလႅၼ်ႈၶၢမ်ႈတၢင်းယူႇ၊ ယၢမ်းၼၼ်ႉၵေႃႈ ႁၼ်ၵႃးလမ်းၼိုင်ႈ ၽႃႇၺႃးလိုၼ်းၼုမ်ႇသေ ၵႃးလမ်းၼၼ်ႉၵေႃႈ ၼႅတ်ႈလႅၼ်ႈပူၼ်ႉၵႂႃႇပႅတ်ႈ ၵူၺ်းၵိုတ်းလိုၼ်းၼုမ်ႇ ဢၼ်ၼွၼ်းဢိူၵ်ႇလိူတ်ႈယူႇၵူၺ်းၼၼ်ႉယဝ်ႉ။ ၼႂ်းၸႂ်ဢၼ်လႆႈႁၼ်လိုၼ်းၼုမ်ႇ ၼွၼ်းလူမ်ႉဢိူၵ်ႇလိူတ်ႈဢိူၵ်ႇယၢင် ယူႇၸိူင်ႉၼၼ်ၵေႃႈ ၼႅတ်ႈလႅၼ်ႈၶဝ်ႈႁႃလႄႈ ပူၵ်းႁွင်ႉႁႂ်ႈၶဝ်တိုၼ်ႇၶိုၼ်ႈမႃးယူႇ၊ လႅင်းဢွၼ်ႇ ဢၼ်လႆႈႁၼ်ပဵၼ်လိုၼ်းၼုမ်ႇၼႆၼၼ်ႉ လႅၼ်ႈၶဝ်ႈၸူး ၼင်ႇဢမ်ႇၵူဝ်သင်သေ ၶဝ်ႈမႃးၵွတ်ႇဢဝ်လိုၼ်းၼုမ်ႇဝႆႉ ယူႇယဝ်ႉ။
လိုၼ်းၼုမ်ႇဢၼ်လႆႈႁၼ်ၸိုၼ်ႈၶိူဝ်းမိူၼ်ႇမိုင်ယူႇၼၼ်ႉၵေႃႈ
“သူပဵၼ်သင်ၵၼ်တင်းႁဝ်းၶႃႈလႃႇ ပဵၼ်သင်လႄႈ..တေလႆႈမႃးပႂ်ႉႁဝ်းယူႇၸိူင်ႉၼႆၶႃႈ”
ၸိုၼ်ႈၶိူဝ်းၵေႃႈ ဢမ်ႇႁူႉဝႃႈတေလႆႈလၢတ်ႈၸိူင်ႉႁိုဝ် မၼ်းလႄႈတင်းလိုၼ်းၼုမ်ႇၼၼ်ႉ ဢမ်ႇၸႂ်ႈသင်ၵၼ်လူး လႆႈႁၼ်လႅင်းဢွၼ်ႇယဝ်ႉၵေႃႈ လၢတ်ႈဢွၵ်ႇၵႂႃႇ
“သူႁႃႉ..သူၵေႃႈပဵၼ်..ဢိူဝ်ႈ..ပဵၼ်…သူၵေႃႈပဵၼ်မႄႈလုၵ်ႈဢွၼ်ႇႁဝ်းၼၼ်ႉၼႃႇ”
လၢတ်ႈဢဝ်လိုၼ်းၼုမ်ႇသမ်ႉပေႃးတူၵ်းၸႂ်မႃးယူႇ။
“ၶႂ်ႈဝႃႈၸိူင်ႉႁိုဝ်ၶႃႈ!…”
ၸိုၼ်ႈၶိူဝ်းၼၼ်ႉၵေႃႈ မိုင်ယၵ်ႉတူၺ်းၼႃႈလိုၼ်းၼုမ်ႇလီလီသေ ယုမ်ႉယဝ်ႉ ယိုၼ်ႈၼႃႈၶဝ်ႈၸူးၸမ်လိုၼ်းၼုမ်ႇၵႂႃႇ
“ၸိူင်ႉၼင်ႇဢၼ်သူလႆႈငိၼ်းၼၼ်ႉယဝ်ႉ ပဵၼ်မႄႈလုၵ်ႈဢွၼ်ႇႁဝ်း..”
လိုၼ်းၼုမ်ႇၼၼ်ႉၵေႃႈ ပၢႆႈသၢႆတႃၸိုၼ်ႈၶိူဝ်းၼၼ်ႉပႅတ်ႈသေ လၢတ်ႈယူႇၼႂ်းၸႂ်မၼ်းၵႂႃႇ“ပဵၼ်မႄႈလုၵ်ႈဢွၼ်ႇၶဝ်ၼႆႁႃႉ ၶေႃႈၵႂၢမ်းၼႆႉ..မၼ်းပေႉမႃးမိူၼ်ႁိုဝ်ဝႆႉလႃႇ ထွမ်ႇယၢပ်ႇတေႉယဝ်ႉ”
လိုၼ်းၼုမ်ႇၵေႃႈ ဢမ်ႇၶႂ်ႈထၢမ်သင်ၸွမ်းထႅင်ႈယဝ်ႉလႄႈ
“ႁဝ်းႁိူဝ်ႉယဝ်ႉၶႃႈ..”
မိူဝ်ႈဢၼ်လိုၼ်းၼုမ်ႇၼွၼ်းလပ်းယူႇၼၼ်ႉ ၸိုၼ်ႈၶိူဝ်းၸင်ႇမႄးဢဝ်ၽႃႈ ႁူမ်ႇပၼ်မၼ်းလီလီယူႇ။
မူၺ်ႁွမ်ၵေႃႈ မိူဝ်ႈႁူႉဝႃႈ လိုၼ်းၼုမ်ႇတိုၼ်ႇမႃးယဝ်ႉၼႆ ႁဵတ်းၵၢၼ်ယဝ်ႉယဝ်ႉသေ ၼႅတ်ႈမႃးၵမ်းလဵဝ်ယူႇ။ ၵူၺ်းၵႃႈ မိူဝ်ႈၶဝ်ႈမႃးၼႂ်းႁွင်ႈၼၼ်ႉသမ်ႉ ႁၼ်လိုၼ်းၼုမ်ႇတိုၵ်ႉၼွၼ်းယူႇလႄႈ ႁၼ်ၸိုၼ်ႈၶိူဝ်းၵူၺ်း ဢၼ်ၼင်ႈလူပပ်ႉလိၵ်ႈသေပႂ်ႉၶဝ်ဝႆႉယူႇ။
“ငိၼ်းဝႃႈၶဝ်ႁူႉတူဝ်ယဝ်ႉ ဢမ်ႇတၼ်းမႃးၶိုတ်း ၶဝ်ပဵၼ်ၸိူင်ႉႁိုဝ်မႃးၶႃႈ”
“လီမႃးယူႇ..ၵူၺ်းၵႃႈ…ၶဝ်တွင်းသင်ဢမ်ႇလႆႈ”
မိူဝ်ႈငိၼ်းၸိူင်ႉၼၼ်ၵေႃႈ ၼင်ႈသေႁွင်ႉႁႆႈမႃးၵမ်းလဵဝ်၊ ၽွင်းၼၼ်ႉသမ်ႉ မႅၼ်ႈၽွင်းဢၼ် သႅင်ႁိူၼ်းၼုမ်ႇၶဝ်ႈမႃးဢဝ်လီလီ။
“ဝႃႈႁိုဝ်ၶႃႈၵေႃ…”
“ၶဝ်တေလိုမ်းလွင်ႈဝၼ်းလင်ၵႂႃႇၸူဝ်ႈၶၢဝ်း ဢမ်ႇႁိုင်ၵေႃႈ ၶဝ်တေတွင်းလႆႈၶိုၼ်းယဝ်ႉ..”
သႅင်ႁိူၼ်းၼုမ်ႇမိုင်လူင်ၵႂႃႇယဝ်ႉ တူၺ်းလိုၼ်းၼုမ်ႇ ဢၼ်ၼွၼ်းၼိမ်ယူႇၼၼ်ႉလႄႈ ထူၺ်ႈၸႂ်လူင်မႃးသေ
“လွင်ႈဝၼ်းလင်.. မၼ်းၵေႃႈဢမ်ႇလႆႈမီးလွင်ႈမၢႆတွင်း..ဢၼ်လီလီၵႃႈႁိုဝ် ၶဝ်ထုၵ်ႇလီလိုမ်းမၼ်းၵႂႃႇၵေႃႈပဵၼ်လႆႈ…”
ၸိုၼ်ႈၶိူဝ်းလႄႈ မူၺ်ႁွမ်ၼၼ်ႉၵေႃႈ ဢွၼ်ၵၼ်မိုင်ယၵ်ႉတူၺ်းၸူး သႅင်ႁိူၼ်းၼုမ်ႇၵႂႃႇတင်းသွင်ၵေႃႉ ယူႇယဝ်ႉ။ မူၺ်ႁွမ်ၼၼ်ႉၵေႃႈ ၼင်ႈယိပ်းဢဝ်မိုဝ်းလိုၼ်းၼုမ်ႇဝႆႉယဝ်ႉ ထူၺ်ႈၸႂ်လူင်ဢွၵ်ႇမႃးယူႇ။
“ၶႂ်ႈဝႃႈ..ၶဝ်တေလိုမ်းႁဝ်းပႃးၸွင်ႇၸႂ်ႈႁိုဝ်”
“ၶဝ်ၵေႃႈလၢတ်ႈယဝ်ႉ ၶဝ်တေလိုမ်းၵႂႃႇၸူဝ်ႈၶၢဝ်းၵူၺ်းၼႆ ၶဝ်လွတ်ႈၽေးၵူၺ်းၵေႃႈလီယဝ်ႉၼႃႈ” သႅင်ႁိူၼ်းၼုမ်ႇလၢတ်ႈ။
ၵေႃႈၼၼ်ႉယဝ်ႉ မူၺ်ႁွမ်ၵေႃႈ ဢဝ်မိုဝ်းမၼ်းလုပ်ႈႁူဝ်ပၼ်လိုၼ်းၼုမ်ႇလွႆးလွႆးယူႇ။
“ၶဝ်ထုၵ်ႇလီလိုဝ်ႈႁိူဝ်ႉယဝ်ႉ တၢင်ႇပွၵ်ႈႁဝ်းၸင်ႇမႃးၶိုၼ်းထႅင်ႈ”
သႅင်ႁိူၼ်းၼုမ်ႇၵေႃႈ ယွၼ်းပွၵ်ႈမိူဝ်းသေယဝ်ႉ မိူဝ်ႈတိုၵ်ႉဢွၵ်ႇၽၵ်းတူၵႂႃႇၼၼ်ႉ သမ်ႉမႅၼ်ႈမိူဝ်ႈ တိုၼ်းႁၢၼ် ၶဝ်ႈမႃးဢဝ်လီလီလႄႈ သွင်ၶႃမိုင်ယၵ်ႉတူၺ်းၵၼ် မိူၼ်ပဵၼ်ၵူၼ်းယၢမ်ႈႁူႉၸၵ်းၵၼ်ၼၼ်ႉယဝ်ႉ။ မိူဝ်ႈဢၼ်သႅင်ႁိူၼ်းၼုမ်ႇ ၵွင်လင်ၵႂႃႇပႅတ်ႈၼၼ်ႉ တိုၼ်းႁၢၼ်ၵေႃႈ ၼႅတ်ႈလမ်းၸွမ်းယဝ်ႉ တၢဝ်းဝၵ်ႉဢဝ်မိုဝ်းမၼ်းၵႂႃႇယူႇ။
“ပဵၼ်သူတေႉတေႉလူး..သႅင်ႁိူၼ်းၼုမ်ႇ!” ယုမ်ႉဢွၵ်ႇမႃးၼင်ႇၸူမ်းသိူဝ်းတႄႉတႄႉယဝ်ႉ။
တိုၼ်းႁၢၼ်လႄႈသႅင်ႁိူၼ်းၼုမ်ႇၼၼ်ႉၵေႃႈ လႆႈၵႂႃႇၼင်ႈဢုပ်ႇၵၼ်ယူႇတီႈ လၢၼ်ႉၼမ်ႉၼဵင်ႈဝၢၼ်ႁိမ်းႁူင်းယႃၼၼ်ႉသေ မိူဝ်ႈႁူပ်ႉတေႃႇၼႃႈၵၼ် တင်းၵူၼ်းႁူႉၸၵ်း ဢၼ်ဢမ်ႇလႆႈထူပ်းၵၼ်ႁိုင်ၼၼ်ႉၵေႃႈ ဢမ်ႇႁူႉဝႃႈ တေလႆႈတႄႇလၢတ်ႈၸိူင်ႉႁိုဝ်ယဝ်ႉ။
“သူယူႇလီယူႇၸွင်ႇၸႂ်ႈ!” တိုၼ်းႁၢၼ်ထၢမ်
သႅင်ႁိူၼ်းၼုမ်ႇၵေႃႈတွပ်ႇၸူးၶိုၼ်း “ဢိုမ်ႈ!..ယူႇလီယူႇ.. ယဝ်ႉသူလူး”
“ၵေႃႈ..မိူၼ်ၼင်ႇသူႁၼ်ၼႆႉယဝ်ႉ..”
သႅင်ႁိူၼ်းၼုမ်ႇတူၺ်းတိုၼ်းႁၢၼ်ယဝ်ႉၵေႃႈ
“လႆႈဝႃႈ..လီမႃးလိူဝ်ၵဝ်ႇယူႇပေႃးၼၼ်”
“သူလူး.. လွင်ႈၼႃႈႁိူၼ်းပဵၼ်ၸိူင်ႉႁိုဝ်ၽွင်ႈ”
သႅင်ႁိူၼ်းၼုမ်ႇမိုင်ၵႂႃႇၵႅပ်ႉၼိုင်ႈယဝ်ႉ “လီယူႇၼႃ! ဢမ်ႇမီးၶဝ်ၵေႃႉၼၼ်ႉယဝ်ႉ လႆႈၸႂ်ႉၸၢတ်ႈပၢၼ်လွတ်ႈလႅဝ်းဢိတ်ႉၼိုင်ႈ”
“သူလႄႈတင်းၶဝ် ပႅတ်ႈၵၼ်ယဝ်ႉႁႃႉ!”
“ဢိုမ်ႈ! ႁိုင်ၼႃႇယဝ်ႉ ယၢမ်းလဵဝ်..ၶဝ်တေႇၼႃႈႁိူၼ်းမႂ်ႇလႄႈ မီးလုၵ်ႈႁူမ်ႈၵၼ်တင်းမေးၶဝ်ၼၼ်ႉ 2 ၵေႃႉယဝ်ႉ”
“ႁဝ်းၵေႃႈ..ယင်းပႆႇတေႇၼႃႈႁိူၼ်းၼႃ” လၢတ်ႈဢဝ်သႅင်ႁိုၼ်းၼုမ်ႇမိုင်တူၺ်းမၼ်းၵႂႃႇယဝ်ႉ။
“ပဵၼ်သင်လႃႇ..”
“ၵေႃႈ..ၶႂ်ႈလၢတ်ႈသူဝႃႈ ႁဝ်းၼၼ်ႉ..တိုၵ်ႉလွတ်ႈလႅဝ်းယူႇၼႆၼၼ်ႉၼႃႇ”
သႅင်ႁိူၼ်းၼုမ်ႇၵေႃႈ လုၵ်ႉၵႂႃႇပႅတ်ႈမၼ်းသေယဝ်ႉ..
“ယွၼ်းႁႂ်ႈၵၢမ်ႇလီၼႃႈ ပေႃးၼၼ်”
တိုၼ်းႁၢၼ်ပူၵ်းမိုဝ်းၼႄသေ “ယုမ်ႇဝႃႈတေၵႆႉလႆႈထူပ်းၵၼ်ထႅင်ႈယူႇၵူၺ်း”
တူၺ်းၸွမ်းလင်သႅင်ႁိူၼ်းၼုမ်ႇၼၼ်ႉၵႂႃႇလွႆးလွႆးယဝ်ႉ။
တေဝႃႈႁိုဝ်ၵေႃႈ သႅင်ႁိူၼ်းၼုမ်ႇၼၼ်ႉ ပဵၼ်ၽူႈယိင်းၵေႃႉဢွၼ်တၢင်းသုတ်း ဢၼ်တိုၼ်းႁၢၼ် ႁၵ်ႉမႅၼ်ႈလႄႈ သမ်ႉဝႃႈ ၶဝ်တႄႇၼႃႈႁိူၼ်းၵႂႃႇပႅတ်ႈမၼ်းသေတႃႉ မၼ်းၵေႃႈ ဢမ်ႇတွၼ်ႉလိုမ်းၶဝ်လႆႈသေပွၵ်ႈ ၼၼ်ႉယဝ်ႉ။
တွၼ်ႈသိပ်းႁူၵ်းသုတ်းၵႂႃႇယဝ်ႉ ပႂ်ႉသိုပ်ႇတူၺ်းထႅင်ႈတွၼ်ႈသိပ်းၸဵတ်းၶႃႈ။
ႁပ်ႉထွမ်ႇပၼ်ႁႅင်းလူၺ်ႈသဵင် တီႈ YouTube ၵေႃႈလႆႈၶႃႈ။
