တွၼ်ႈသိပ်းႁႃႈ
ၼႂ်းႁွင်ႈၶင်ဢၼ်တဵတ်ႇယဵၼ် ဢမ်ႇပေႃးမီးလွင်ႈမူတ်းသႂ်ၵႃႈႁိုဝ်ၼၼ်ႉ လိုၼ်းၼုမ်ႇၵေႃႈ ၼင်ႈဢိင်ၽႃယူႇၼႂ်းၸွၵ်ႉၼၼ်ႉသေ ဝူၼ်ႉထိုင်ၶိုၼ်းၶေႃႈၵႂၢမ်း ဢၼ်ဢူႈၶဝ်လၢတ်ႈမႃးၼၼ်ႉဝႃႈ
“ပေႃးမီးပၼ်ႁႃလွင်ႈလုၵ်ႈဢွၼ်ႇၵေႃႉၼႆႉမႃး မႂ်းတေလႆႈဢဝ်ပုၼ်ႈၽွၼ်းၼၼ်ႉၼႃႇ”
ပဵၼ်ၶေႃႈၵႂၢမ်း ဢၼ်ဢူႈၶဝ်လၢတ်ႈဝႆႉ မိူဝ်ႈဝၼ်းဢၼ်မၼ်းၵဵပ်းလႅင်းဢွၼ်ႇမႃးလဵင်ႉ ၼၼ်ႉယဝ်ႉ။
“ဢၼ်ဢူႈႁဝ်းလၢတ်ႈမႃးၼၼ်ႉ.. ထုၵ်ႇမႅၼ်ႈဢဝ်ၵူၺ်းယဝ်ႉႁိုဝ် မိူဝ်ႈလဵဝ်..ၶႃႈလႆႈမႃးႁပ်ႉဢဝ်ပုၼ်ႈၽွၼ်း ဢၼ်ၶႃႈလႆႈႁဵတ်းဝႆႉၼၼ်ႉယဝ်ႉ။
မိူဝ်ႈသၢမ်ပီႊပူၼ်ႉမႃးၼၼ်ႉ ၶႃႈလႆႈႁၼ်ၼႂ်းလိၵ်ႈပိုၼ်ၽၢဝ်ႇ ၸွမ်းႁႃၸွမ်ႇမိုဝ်း ဢၼ်မိူၼ်သၢႆၶေႃးလႅင်းဢွၼ်ႇၼၼ်ႉ ႁဵတ်းႁႂ်ႈၶႃႈၵူဝ်တေႉယဝ်ႉ ၶႃႈဢမ်ႇႁတ်းဢဝ်ပၼ်ပေႃႈမႄႈၶဝ်ၶိုၼ်း ၶႃႈၵူဝ်ဝႃႈ ပေႃးဢမ်ႇမီးၶဝ်ယဝ်ႉၶႃႈတေယူႇၸိူင်ႉႁိုဝ်၊ ပေႃးဢမ်ႇမီးၶဝ်ယဝ်ႉ ၶႃႈတေယူႇတွၼ်ႈတႃႇသင်၊ ၼင်ႇႁိုဝ်ၶႃႈတေယူႇလႆႈ ၶႃႈလႆႈသိုပ်ႇလဵင်ႉၶဝ်ၵႂႃႇ ဢမ်ႇသူၼ်ၸႂ်ဝႃႈ ပေႃႈမႄႈၶဝ်ၼၼ်ႉတေပဵၼ်ၽႂ်၊ သိူင်ႇသိမ်းပႅတ်ႈ သၢႆၶေႃးသဵၼ်ႈၼၼ်ႉမႃးယူႇ။ ၵူၺ်းၵႃႈ..မီးၵူၼ်းဢဝ်မၼ်းဢွၵ်ႇမႃး လႄႈ ပေႃႈတေႉတေႉၶဝ်ၼၼ်ႉၵေႃႈ လႆႈမႃးထူပ်းႁၼ်ၵႂႃႇယဝ်ႉ။
ၵူႈလွင်ႈ မၼ်းပဵၼ်လွင်ႈဢမ်ႇသၢင်ႇထုၵ်ႇသေၵိူတ်ႇပဵၼ်မႃး မၼ်းထိုင်ၶၢဝ်းယၢမ်းၶဝ်ယဝ်ႉၸွင်ႇၸႂ်ႈႁိုဝ်ဢူႈ…
သင်ၶဝ်လႆႈၸႂ်ႉၸၢတ်ႈပၢၼ်ယူႇၸွမ်းပေႃႈမႄႈၶဝ် ၸဵမ်မိူဝ်ႈသၢမ်ပီႊပူၼ်ႉမႃးၼၼ်ႉ ၶဝ်တေလႆႈၸႂ်ႉၸၢတ်ႈပၢၼ်ဢၼ်လီလႄႈ ဢမ်ႇလႆႈမႃးၶၢမ်ႇတုၵ်ႉ ၶၢမ်ႇယၢပ်ႇၸွမ်းၵူၼ်းၸိူင်ႉၼင်ႇၶႃႈၸိူင်ႉၼႆ ၶႃႈႁပ်ႉဢဝ်ပုၼ်ႈၽွၼ်းၶဝ်ဢမ်ႇလႆႈၵေႃႈ ထုၵ်ႇမႅၼ်ႈယဝ်ႉၸွင်ႇၸႂ်ႈႁိုဝ် ဢၼ်ၶႃႈတေလႆႈမႃးႁပ်ႉဢဝ်တၢမ်ႇၸိူင်ႉၼႆ ၶႃႈတေယူႇၼႂ်းၶွၵ်ႈၶင်ၼႆႉသေ တေႁပ်ႉဢဝ်ပုၼ်ႈၽွၼ်းဢၼ်ၶႃႈလႆႈႁဵတ်းဝႆႉၵူၺ်းၼႃဢူႈ.. ၶႃႈတေႁဵတ်းၸွမ်းၵႂၢမ်းဢၼ်ၶႃႈလၢတ်ႈဝႆႉၼၼ်ႉၵူၺ်း”
ၸိုၼ်ႈၶိူဝ်းၼၼ်ႉၵေႃႈ သမ်ႉဝႃႈ လႆႈလုၵ်ႈမႃးၶိုၼ်းယဝ်ႉသေတႃႉ တႃႇတေဢဝ်တၢင်းၽိတ်း ၵူၼ်းဢၼ်ႁဵတ်းႁႂ်ႈမၼ်းလႄႈလုၵ်ႈ ၽၢတ်ႇယၢၼ်ၵၼ်ၼၼ်ႉ ၶတ်းၸႂ်ႁႃလွင်ႈတၢင်းၵူၼ်းၸိူဝ်းၼၼ်ႉ ႁႂ်ႈပေႃးႁပ်ႉဢဝ်တၢင်းၽိတ်းႁႂ်ႈလႆႈၼႆယူႇ။
ၸိုၼ်ႈၶိူဝ်းၼၼ်ႉ လႆႈတူၺ်းၸွမ်းၵၢၼ်ၸွပ်ႇထၢမ်လိုၼ်းၼုမ်ႇ ၵူႈၶၵ်ႉၵူႈတွၼ်ႈယူႇ၊ လိုၼ်းၼုမ်ႇၼၼ်ႉၵေႃႈ လႆႈလၢတ်ႈၼႄၵႂႃႇ ၸွမ်းၼင်ႇဢၼ်မၼ်းႁူႉၼၼ်ႉၵူႈလွင်ႈ ၸဵမ်လွင်ႈဢၼ်လႆႈၵဵပ်းလုၵ်ႈဢွၼ်ႇမႃးလဵင်ႉၸိူဝ်းၼၼ်ႉယဝ်ႉ။ သမ်ႉဝႃႈ ၶႂ်ႈႁႂ်ႈလိုၼ်းၼုမ်ႇၼၼ်ႉ လၢတ်ႈလွင်ႈၵဵဝ်ႇၶွင်ႈၸွမ်း ၵၢၼ်လၵ်ႉလုၵ်ႈဢွၼ်ႇၼႆသေတႃႉၵေႃႈ လိုၼ်းၼုမ်ႇၼၼ်ႉတႄႉ လၢတ်ႈဝႃႈ ဢမ်ႇႁူႉၼႆတိၵ်းတိၵ်းၵူၺ်း။ လွင်ႈဢၼ်မၼ်းလၢတ်ႈဝႃႈ ဢမ်ႇႁူႉၼၼ်ႉၵေႃႈ ပဵၼ်ဢၼ်လီထၢင်ႇပိူင်ႈမႃး ယူႇယဝ်ႉ။
ၽၢႆႇတၢင်းၸၢႆးၸွမ်ၼၼ်ႉတႄႉ ဢမ်ႇလႆႈပၼ်ၶေႃႈတွပ်ႇသင်သေလွင်ႈ ထၢမ်သင်ၵေႃႈဢမ်ႇတၵ်းသဵင်။ ယွၼ်ႉပိူဝ်ႈၸၢႆးၸွမ်ၼၼ်ႉ ယၢမ်ႈႁဵတ်းၵၢၼ်တီႈႁိူၼ်းၸိုၼ်ႈၶိူဝ်းလႄႈ ဝၢႆးၼၼ်ႉဢမ်ႇႁိုင်ၵေႃႈ ဢွၵ်ႇၵၢၼ်ၵႂႃႇယဝ်ႉ။ လိူဝ်သေၼၼ်ႉ မၼ်းသမ်ႉပဵၼ်ၵူၼ်းၵေႃႉလၢတ်ႈၵူၺ်းဝႃႈ လုၵ်ႈလိုၼ်းၼုမ်ႇၼၼ်ႉ ပဵၼ်လုၵ်ႈၸိုၼ်ႈၶိူဝ်းၼႆ မိူၼ်ဝႃႈ မၼ်းၼၼ်ႉ တေမီးသုၼ်ႇၵဵဝ်ႈၶွင်ႈၸွမ်း လွင်ႈလၵ်ႉလုၵ်ႈဢွၼ်ႇၼႆႉယူႇယဝ်ႉ။
ပေႃးတေပႂ်ႉၽၢႆႇၽူႈမီးပုၼ်ႈၽွၼ်းၶဝ်ၵူၺ်းၼၼ်ႉ ဢမ်ႇပဵၼ်ၵၢၼ်ၼႆလႄႈ ႁႂ်ႈလုၵ်ႈၼွင်ႉမၼ်းၸွမ်းၸွပ်ႇတူၺ်း ၶေႃႈမုၼ်းထႅင်ႈယူႇယဝ်ႉ။
မူၺ်ႁွမ်လႄႈပိုၼ်းမိူင်းၼၼ်ႉၵေႃႈ မိူဝ်ႈႁူႉၶၢဝ်ႇယဝ်ႉ ၼႅတ်ႈမႃးႁႃလိုၼ်းၼုမ်ႇၵမ်းလဵဝ်ယူႇ။ ၵူၺ်းၵႃႈ မိူၼ်ဝႃႈလိုၼ်းၼုမ်ႇၼၼ်ႉ ဢမ်ႇယွမ်းႁူပ်ႉၶႃလႄႈ လႆႈဢွၼ်ၵၼ်ပွၵ်ႈမိူဝ်းၵႂႃႇ လူၺ်ႈဢမ်ႇလႆႈလၢတ်ႈသင် ၼၼ်ႉယဝ်ႉ။
မူၺ်ႁွမ်ၼၼ်ႉၵေႃႈ မိူၼ်ၸႂ်လဵၵ်ႉၶေႃးၶူမ်ဝႆႉယူႇ
“ပဵၼ်သင်လႄႈလိုၼ်းၼုမ်ႇႁဵတ်းၸိူင်ႉၼႆလႃႇ ၶဝ်တုၵ်ႉၶ..ယွၼ်ႉလုၵ်ႈဢွၼ်ႇၵေႃႉၼႆႉပေႃးတၢၼ်ႇသင် တေမႃးၸႂ်ႉၸၢတ်ႈပၢၼ်ယဝ်ႉၵႂႃႇ..တီႈၼႂ်းၶွၵ်ႈၶင်ၼႆႉၵူၺ်းယဝ်ႉႁႃႉ” ႁွင်ႉႁႆႈဢွၵ်ႇမႃးတေႃႇၼႃႈ ပိုၼ်းမိူင်းၼၼ်ႉသေ
“ၵဵပ်းလဵင်ႉလုၵ်ႈဢွၼ်ႇ..ဢၼ်မီးယူႇၶၢင်ႈတၢင်းၼၼ်ႉၵူၺ်းၵေႃႈ ၽိတ်းမၢႆမီႈသေႁႃႉ တေလႆႈႁဵတ်းၸိူင်ႉႁိုဝ်ၶႃႈလႃႇ တေလႆႈၸွႆႈၶဝ်ၸိူင်ႉႁိုဝ်လႃႇ ၶဝ်တေပဵၼ်ၸိူင်ႉႁိုဝ်လႃႇယူႇၼႂ်းၼၼ်ႉ”
“ၶဝ်ဢမ်ႇလႆႈႁဵတ်းၽိတ်းသင် ႁဝ်းတေႁႃတၢင်းၸွႆႈၶဝ် ႁႂ်ႈပေႃးဢွၵ်ႇမႃးႁႂ်ႈလႆႈၵူၺ်း”
မူၺ်ႁွမ်ၵေႃႈ ႁွင်ႉႁႆႈမိူၼ်လုၵ်ႈဢွၼ်ႇၼၼ်ႉသေ ၶဝ်ႈၵွတ်ႇသႂ်ႇပိုၼ်းမိူင်းဝႆႉယူႇ။ ပိုၼ်းမိူင်းၵေႃႈ လုပ်ႈလင်မၼ်းလွႆးလွႆး ပၼ်ႁႅင်းၸႂ်မၼ်းၵႂႃႇယဝ်ႉ။
ယၢမ်းၵၢင်ၼႂ် ၸိုၼ်ႈၶိူဝ်းဢၼ်တေဢၢၼ်းဢွၵ်ႇႁိူၼ်းၵႂႃႇ တႃႇတူၺ်းၵၢၼ်ၵူတ်ႇထတ်းၼၼ်ႉၵေႃႈ ယူႇယူႇၽူႈၵုမ်းၶွၵ်ႈၶင်လႆႈသိုပ်ႇၽူင်း လၢႆးငၢၼ်းမႃးၸူးမၼ်းဝႃႈ ၸၢႆးၸွမ်ၼၼ်ႉ လႆႈလူႉသဵင်ႈတၢႆၵႂႃႇၼႂ်းၶွၵ်ႈယဝ်ႉ ၼႆယူႇ။
ၵူႈလွင်ႈဢၼ်မၼ်းဝၢင်းၽႅၼ်ဝႆႉၼၼ်ႉၵေႃႈ လူႉလႅဝ်ၵႂႃႇမူတ်းယူႇယဝ်ႉ။ ၸွမ်းၼင်ႇယိူင်းဢၢၼ်းမၼ်းမီးဝႆႉၼၼ်ႉတႄႉ ၶတ်းၸႂ်ႁႂ်ႈၺွပ်းလႆႈ ၵူၼ်းၵေႃႉဢၼ်ဝၢင်းၽႅၼ်ၵၢၼ်လၵ်ႉလုၵ်ႈဢွၼ်ႇ ၼၼ်ႉယဝ်ႉ။
ၸွမ်းၼင်ႇဢၼ်လိုၼ်းၼုမ်ႇလၢတ်ႈမႃးၼၼ်ႉ မိူၼ်တေဢမ်ႇၵဵဝ်ႇၶွင်ႈၸွမ်း ၵၢၼ်လၵ်ႉလုၵ်ႈဢွၼ်ႇၵမ်းသိုဝ်ႈသေတႃႉ ၵူၺ်းၵႃႈ ႁူႉယူႇဝႃႈပေႃႈမႄႈၶဝ်ၸွမ်းႁႃ ဢမ်ႇသူင်ႇပၼ်ၶိုၼ်းၼၼ်ႉ ဢမ်ႇပိူင်ႈသင်ၵၼ်တင်း ၵၢၼ်လၵ်ႉလုၵ်ႈဢွၼ်ႇလႄႈ ၸိုၼ်ႈၶိူဝ်းၼၼ်ႉၵေႃႈ သင်ႇႁႂ်ႈဢဝ်တၢင်းၽိတ်းမၼ်းၵႂႃႇ ၼၵ်းၼၵ်းၼႃၼႃ ၼႆယဝ်ႉ။
တီႈၼႂ်းလၢၼ်ႉၼၼ်ႉၵေႃႈ တွၼ်ႈတႃႇတေဢမ်ႇပဵၼ်လွင်ႈသုၵ်ႉယုင်ႈၸွမ်းမႃးၼၼ်ႉ လႆႈပိၵ်ႉဢိုတ်းလွင်ႈလိုၼ်းၼုမ်ႇဝႆႉသေ လၢတ်ႈဝႃႈလိုၼ်းၼုမ်ႇၼၼ်ႉဢွၵ်ႇၵၢၼ်ၵႂႃႇ ယွၼ်ႉလွင်ႈတၢင်းသုၼ်ႇတူဝ် ၼႆယူႇ။
လိုၼ်းၼုမ်ႇဢၼ်ယူႇၼႂ်းၶွၵ်ႈၼၼ်ႉၵေႃႈ ဢမ်ႇၵိၼ်ၶဝ်ႈၵိၼ်ၼမ်ႉသေဢိတ်း ၼင်ႈမိူၼ်ႇမိုင် ဝူၼ်ႉၸွမ်းလွင်ႈလႅင်းဢွၼ်ႇယူႇၵူၺ်း။ မၢင်ၵမ်းၵေႃႈၶူဝ်ႁေ မၢင်ၵမ်းၵေႃႈႁႆႈႁေ ပိူၼ်ႈထၢင်ႇဝႃႈ မၼ်းယွင်ႇၵႂႃႇယဝ်ႉၼႆလႄႈ ဢမ်ႇမီးၽႂ်ႁတ်းမႃးယူႇၸမ်မၼ်းၵႃႈႁိုဝ် မၼ်းၵေႃႈယူႇႁင်းၵူၺ်းမၼ်းၵႂႃႇ ႁဵတ်းၼၼ်ၵူၺ်းယူႇယဝ်ႉ။
ဝၢင်းႁိူၼ်းဢၼ်ၵႂၢင်ႈယႂ်ႇ လင်ႁိူၼ်းလူင်ယႂ်ႇၵႂၢင်ႈၶိုၵ်ႉၶႅမ်ႉႁၢင်ႈလီ မီးတင်းသူၼ်မွၵ်ႇသူၼ်မၢၵ်ႇတဵမ်လွမ်ႉႁိူၼ်းဝႆႉ သမ်ႉမီးပႃးၼွင်လုၺ်းၼမ်ႉ ယူႇၼႂ်းဝၢင်းႁိူၼ်းၼၼ်ႉထႅင်ႈႁေ၊ တူၺ်းၵႂႃႇတၢင်းလႂ်ၵေႃႈ ပေႉၵႅၼ်ႇႁၢင်ႈလီထုၵ်ႇတႃ၊ ၶဝ်ႈၵႂႃႇတၢင်းၼႂ်းႁိူၼ်းၼၼ်ႉၵေႃႈ သမ်ႉပေႃးသွင်ႇႁိူဝ်ႈငဝ်းလူင်ၵႂႃႇမူတ်း၊ မီးလွင်ႈမူတ်းသႂ်ၸိုၼ်ႈပၢင်ႇ ၵိုင်ႇတင်းပဵၼ်ႁိူၼ်းသထေးယူႇ။ လႅင်းဢွၼ်ႇ ဢၼ်လႆႈမႃးယူႇတီႈႁိူၼ်းလူင်လင်ၼႆႉၵေႃႈ မိူၼ်တေၸူမ်းသိူဝ်းယူႇ ဢၼ်လႆႈယူႇၸွမ်းပေႃႈၼႆ ၵူၺ်းၵႃႈ ၸိုၼ်ႈၶိူဝ်းၼၼ်ႉသမ်ႉ ဢမ်ႇပေႃးလႆႈယူႇၸွမ်းမၼ်းၵႃႈႁိုဝ်လႄႈ ၵုမ်ႇမိုင်ႉၵႂႃႇႁဵတ်းၵၢၼ်ယူႇၵူၺ်း၊ ဝႆႉပၼ် မႄႈပႃႈၵေႃႉၼိုင်ႈ ဢၼ်ပဵၼ်ၵူၼ်းႁဵတ်းၵၢၼ်တီႈႁိူၼ်းလင်ၼၼ်ႉ လုမ်းလႃးၵႂႃႇယဝ်ႉ။ ယူႇတီႈႁိူၼ်းၼၼ်ႉ ဢမ်ႇမိူၼ်ယူႇတီႈႁိူၼ်း ဢၼ်မၼ်းယၢမ်ႈယူႇၸွမ်းလိုၼ်းၼုမ်ႇၼၼ်ႉလႄႈ ၸင်ႇလႆႈလၵ်ႉဢွၵ်ႇႁိူၼ်းၵႂႃႇယူႇ။
မႄႈပႃႈဢၼ်လုမ်းလႃးတူၺ်းထိုင်လႅင်းဢွၼ်ႇၼၼ်ႉၵေႃႈ မိူဝ်ႈထိုင်ၶိင်ႇၶၢဝ်းၵိၼ်ၶဝ်ႈယဝ်ႉၼၼ်ႉ ၵႂႃႇႁႃလႅင်းဢွၼ်ႇတီႈႁွင်ႈမၼ်း ဢမ်ႇႁၼ်ယဝ်ႉၼႆၵေႃႈ ၼႅတ်ႈလၢတ်ႈတီႈၸိုၼ်ႈၶိူဝ်းၵမ်းလဵဝ်ယူႇ။
ၵၢင်ၶမ်ႈလပ်းသိင်ႇၸွမ်ႉႁွမ်ႉ မိူဝ်ႈၽွင်းသႅင်ႁိူၼ်းၼုမ်ႇလႄႈလုၵ်ႈယိင်းဢွၼ်ႇမၼ်း တိုၵ်ႉၵိၼ်ၶဝ်ႈယူႇၼၼ်ႉ ၸင်ႇမီးသဵင်တွႆႇၽၵ်းတူမေႃးမႃးသေ သႅင်ႁိူၼ်းၼုမ်ႇပိုတ်ႇၽၵ်းတူယဝ်ႉ လႆႈႁၼ်လႅင်းဢွၼ်ႇမီးယူႇပႃႈၼႃႈၼၼ်ႉယဝ်ႉ။
“လႅင်းဢွၼ်ႇ..လုၵ်ႈႁဵတ်းႁိုဝ်မႃးမီးယူႇတီႈၼႆႈလႃႇ..လုၵ်ႈမႃးၸွမ်းၽႂ်”
“ၶူး!..ၸၢႆးၸႂ်ထိုင်မႄႈ..မႄႈၸၢႆးမီးယူႇတီႈလႂ်”
မီႇၼႃႈမီႇတႃမိပ်ႇၼမ်ႉတႃမၼ်းဢွၵ်ႇမႃး ယူႇယဝ်ႉ။ သႅင်ႁိူၼ်းၼုမ်ႇၵေႃႈ ၸၢင်ႈတေႁဵတ်းႁိုဝ် ၵႃႈလႆႈၵွတ်ႇဢဝ်မၼ်းၵႂႃႇၵူၺ်း၊ ၶေႃႈၵႂၢမ်းၶဝ်ၼၼ်ႉ ႁဵတ်းႁႂ်ႈသႅင်ႁိူၼ်းၼုမ်ႇ ၼမ်ႉတႃၸိုမ်ႉယမ်းႁူၺ်ႇတႃမႃးမိူၼ်ၵၼ်ယဝ်ႉ။
“မႄႈၸၢႆးၵႂႃႇလႂ်..ပဵၼ်သင်ၶဝ်ဝႃႈမႄႈၸၢႆးဢမ်ႇပွၵ်ႈမႃးၶိုၼ်းယဝ်ႉလႃႇ မႄႈၵႂႃႇႁႃငိုၼ်းယူႇၸွင်ႇၸႂ်ႈ”
ယၢမ်းၼၼ်ႉ ၸိုၼ်ႈၶိူဝ်းၵေႃႈ လႆႈႁေႃႈလူတ်ႉမၼ်း မႃးၵိုတ်းသႂ်ႇၼႃႈႁိူၼ်း သႅင်ႁိူၼ်းၼုမ်ႇၼၼ်ႉသေ ႁၼ်လႅင်းဢွၼ်ႇႁွင်ႉႁႆႈယူႇ ၼႂ်းဢွင်ႈၵွတ်ႇသႅင်ႁိူၼ်းၼုမ်ႇၼၼ်ႉယူႇလႄႈ ႁဵတ်းႁႂ်ႈမၼ်းလႆႈၵိုတ်းမိုင်တူၺ်းၵႂႃႇယဝ်ႉ ၸင်ႇသမ်ႉလႆႈငိၼ်းမႅၼ်ႈ ၶေႃႈၵႂၢမ်းလႅင်းဢွၼ်ႇ ဢၼ်လၢတ်ႈဢွၵ်ႇမႃးဝႃႈ
“ၸၢႆးဢမ်ႇၶႂ်ႈယူႇႁိူၼ်းလင်ၼၼ်ႉယဝ်ႉၼႃ ၸၢႆးဢမ်ႇမီးၵေႃႉ ၸၢႆးဢမ်ႇၶႂ်ႈမီးပေႃႈယဝ်ႉ ၸၢႆးၶႂ်ႈမီးမႄႈၵူၺ်း မႄႈၸၢႆးၸွင်ႇတေပွၵ်ႈမႃးၶိုၼ်းႁိုဝ် ၶူး..ၸွႆႈႁႃမႄႈပၼ်ၸၢႆးၸွင်ႇလႆႈ”
“ဢိုမ်ႈ..ၶူးတေၶတ်းၸႂ်ႁႃမႄႈၸၢႆးပၼ်ၵူၺ်းၼႃ”
ၸိုၼ်ႈၶိူဝ်း ဢၼ်လႆႈငိၼ်းၸိူင်ႉၼၼ်ၵေႃႈ ၵွင်လင်ပွၵ်ႈမိူဝ်းၵႂႃႇၶိုၼ်းၵမ်းလဵဝ် ယူႇယဝ်ႉ။
ၸိုၼ်ႈၶိူဝ်းၼၼ်ႉၵေႃႈ ၼင်ႈဢိင်တင်ႇၼင်ႈယူႇတီႈၼႃႈလၢၼ်ႉၶဝ်ႈၽၵ်းၼၼ်ႉသေ ၶုၵ်းၶူၼ်ႉၶိုၼ်း ဝၼ်းဢၼ်လႆႈထူပ်းႁၼ်ၽူႈယိင်းၵေႃႉၼိုင်ႈ ၼၼ်ႉယူႇ။
ဝၼ်းဢွၼ်တၢင်းသုတ်း မၼ်းလႆႈမႃးပွင်ၵၢၼ်တီႈလၢၼ်ႉၶဝ်ႈၽၵ်းဢၼ်ၼႆႉလႄႈ လႆႈမႃးၼင်ႈၵိၼ်ၶဝ်ႈတီႈၼႂ်းလၢၼ်ႉၼႆႉသေ မိူဝ်ႈဢၢင်ႈတေလုၵ်ႉၵႂႃႇၼၼ်ႉ ၸင်ႇမီးၽူႈယိင်းၵေႃႉၼိုင်ႈ ၸွမ်းႁွင်ႉမၼ်းယဝ်ႉ။ မၼ်းၵေႃႈဝၢႆႇတူၺ်းၸွမ်း လႆႈႁၼ်ၽူႈယိင်းၵေႃႉၼိုင်ႈ ဢၼ်မီးႁၢင်ႈၽၢင်ႁၢင်ႈလီ ၼႃႈသဵမ်ႈၶၢဝ်ပွတ်ႇ သီႇသူပ်းၶွင်ႇၶွင်ႇ ၼုင်ႈသႂ်ႇဝႆႉသိူဝ်ႈၶူဝ်းၵူၼ်းႁုင်မိုဝ်ႉၼၼ်ႉယဝ်ႉ လၢတ်ႈၸူးမၼ်းၵႂႃႇယူႇ။
“သူၵိၼ်ယဝ်ႉ..ပႆႇလႆႈၸၢႆႇၵႃႈမၼ်းၶႃႈၼႃ”
“ႁဝ်းပဵၼ်ၽူႈပွင်ၵၢၼ်လၢၼ်ႉၼႆႉၶႃႈဢေႃႈ ၵိၼ်ၶဝ်ႈၵေႃႈတေလႆႈၸၢႆႇၵႃႈမၼ်းယူႇၶႃႈႁႃႉ”
“ႁဝ်းဢမ်ႇယၢမ်ႈႁၼ်သူၶႃႈ သမ်ႉဝႃႈတေပဵၼ်ၽူႈပွင်ၵၢၼ်ႁိုဝ် ပဵၼ်ၽႂ်ၵေႃႈယဝ်ႉ ပေႃးႁႂ်ႈလီတႄႉ ၸၢႆႇၵႃႈမၼ်းၼႆႉတေလီၶႃႈဢေႃႈ”
သၢႆတႃၸိုၼ်ႈၶိူဝ်းယၵ်ႉတူၺ်းတီႈ ပၢႆႉၸိုဝ်ႈယိင်းၵေႃႉၼၼ်ႉယဝ်ႉ “သူၸိုဝ်ႈမူၺ်ၶၢဝ်ၸွင်ႇၸႂ်ႈ” တင်းပၼ်ငိုၼ်းတင်းထၢမ်ၵႂႃႇမိူဝ်ႈလဵဝ်ၵၼ်ယူႇ။
“ၸႂ်ႈၶႃႈဢေႃႈ..”
“ဢမ်ႇယုမ်ႇၵေႃႈ ႁဝ်းတေထတ်းသၢင်ၼႄသူႁႂ်ႈႁၼ်ၵူၺ်း တေၵႆႉလႆႈထူပ်းၵၼ်ယူႇ”
ပႆဢွၵ်ႇၵႂႃႇပႅတ်ႈယူႇယဝ်ႉ။
ထိုင်မႃးထႅင်ႈဝၼ်းၼိုင်ႈၼၼ်ႉ မူၺ်ၶၢဝ်ၵေႃႈ လႆႈႁၼ်ၸိုၼ်ႈၶိူဝ်း မႃးၸွမ်းၵၼ်တင်းၽူႈၸတ်းၵၢၼ်လုင်းဢွင်ႇ ဢၼ်ၼႄႉၼမ်းပၼ်ၵူၼ်းႁဵတ်းၵၢၼ် ႁႂ်ႈႁူႉၸၵ်းဝႃႈ ပဵၼ်ၽူႈပွင်ၵၢၼ်လၢၼ်ႉ ၼႆယဝ်ႉ။ ထိုင်ၵၢင်ဝၼ်းယဝ်ႉ ၸိုၼ်ႈၶိူဝ်းၼၼ်ႉၵေႃႈ ၵႂႃႇၼင်ႈၵိၼ်ၶဝ်ႈတီႈမိူဝ်ႈဝႃးၼၼ်ႉသေ ႁွင်ႉႁႂ်ႈမူၺ်ၶၢဝ်မႃးထူပ်းမၼ်းယူႇ ၵိၼ်ယဝ်ႉယဝ်ႉၵေႃႈ ၸၢႆႇၵႃႈၶၼ်မၼ်းၵႂႃႇတီႈမူၺ်ၶၢဝ် မိူၼ်ႁဵတ်းၶိတ်ႈႁဵတ်းပၢႆႇယူႇ။ ႁဵတ်းၸိူင်ႉၼၼ်ၵႂႃႇဝၼ်းယဝ်ႉဝၼ်း ထိုင်တီႈပေႃးလႆႈႁူႉၸၵ်းၵၼ် မိုတ်ႈၵၼ်မႃးယူႇယဝ်ႉ။
မီးယူႇဝၼ်းၼိုင်ႈ ၸိုၼ်ႈၶိူဝ်းဢၼ်ႁဵတ်းၵၢၼ်လိုၵ်းၼႃႇၼၼ်ႉ ဢွၵ်ႇလၢၼ်ႉမႃးသေ လႆႈႁၼ်မူၺ်ၶၢဝ် ၼင်ႈယူႇတီႈတင်ႇၼင်ႈ ဢၼ်မီးၼႃႈလၢၼ်ႉၼၼ်ႉၵေႃႉလဵဝ်လႄႈ မၼ်းၵေႃႈၸင်ႇလၢတ်ႈၸူးၵႂႃႇ
“ၶၢဝ်းၼႆႉယဝ်ႉ..ပဵၼ်သင်လႄႈ မႃးၼင်ႈယူႇတီႈၼႆႈၵေႃႉလဵဝ်လႃႇ ဢမ်ႇပွၵ်ႈမိူဝ်းႁိူၼ်းႁႃႉ”
မူၺ်ၶၢဝ်ၼၼ်ႉၵေႃႈ သုတ်ႇလူမ်းၵတ်းလူမ်းယဵၼ် ယူႇတႂ်ႈႁူမ်ႈၾူၺ်းမႆႉၼၼ်ႉသေ လၢတ်ႈၸူးမၼ်းၵႂႃႇၶိုၼ်း
“တီႈၼႆႈ..မၼ်းႁဵတ်းႁႂ်ႈၵတ်းယဵၼ်တူဝ်ၵတ်းယဵၼ်ၸႂ်လီ သူၶႃႈလူး ၶၢဝ်းၼႆႉယဝ်ႉ..ယင်းတိုၵ်ႉမီးယူႇတီႈၼႆႈၶႃႈလႃႇ”
“ႁဝ်းႁဵတ်းၵၢၼ်တိုၵ်ႉယဝ်ႉၵူၺ်း”
“ၶတ်းၸႂ်ႁဵတ်းၵၢၼ်တေႉၶႃႈယဝ်ႉ..မိူဝ်းလွႆးလွႆးၶႃႈ”
ၸိုၼ်ႈၶိူဝ်းယင်းပႆႇတၼ်းလၢတ်ႈဝႃႈ မၼ်းတေမိူဝ်းသေဢိတ်း လၢတ်ႈၸိူင်ႉၼႆၵေႃႈ မိူၼ်ထုၵ်ႇလိုပ်ႈမိူဝ်းၵေႃႈလူဝ်လူဝ်ၼၼ်ႉယဝ်ႉ။
“သူလူး..ပႆႇမိူဝ်းႁႃႉ..”
“ပႆႇထိုင်ၶၢဝ်းယၢမ်းၶႃႈၼႃ”
ၸိုၼ်ႈၶိူဝ်းၼၼ်ႉၵေႃႈ ႁူၼ်လင်ၶိုၼ်းသေ ၼင်ႈၸွမ်းမၼ်းၵႂႃႇယူႇ။
“ဢမ်ႇၸႂ်ႈဝႃႈမီးပၼ်ႁႃၸွမ်းၵူၼ်းတီႈႁိူၼ်းသေ ဢမ်ႇၶႂ်ႈမိူဝ်းႁိူၼ်းၸိူင်ႉၼၼ်ႁႃႉ”
“ဢေႃႈ!”
“ႁဝ်းလၢတ်ႈလဵၼ်ႈၵူၺ်း ပဵၼ်တေႉႁႃႉၼႆႉ”
“ၶႂၢင်းပၼ်ဢိတ်းၼိုင်ႈၶႃႈ ဢမ်ႇလႆႈတင်ႈၸႂ်ၶႂ်ႈတွပ်ႇၸိူင်ႉၼၼ်”
“သူၵေႃႈလၢတ်ႈဢွၵ်ႇမႃးယဝ်ႉလူး..”
“မီးလွင်ႈသင်လႃႇ..လၢတ်ႈႁႂ်ႈႁဝ်းႁပ်ႉထွမ်ႇလႆႈယူႇၵူၺ်း တူၺ်းႁဝ်းမိူၼ်ပဵၼ်ၵူၼ်းဢမ်ႇဝႆႉၸႂ်လႆႈသေတႃႉ ႁဝ်းၵေႃႈမေႃႁပ်ႉထွမ်ႇပိူၼ်ႈယူႇၼႃ”
ႁဵတ်းႁႂ်ႈမူၺ်ၶၢဝ်ယုမ်ႉဢွၵ်ႇမႃးယဝ်ႉ “သူၵေႃႈမေႃလၢတ်ႈၸိူင်ႉၼႆသေႁႃႉ…”
မူၺ်ၶၢဝ်ၵေႃႈ လႆႈလၢတ်ႈၼႄလွင်ႈၶမ်ဢူၵ်းၶမ်ၸႂ်မၼ်း ဢၼ်ဝႃႈ မႄႈသူင်ႇၵႂႃႇႁဵၼ်းသွၼ်ပီႇယႅၼ်ႇၼူဝ်ႇ တီႈၼွၵ်ႈမိူင်းသေ မၼ်းသမ်ႉလႆႈၵႂႃႇႁဵၼ်း လွင်ႈႁဵတ်းၶဝ်ႈၽၵ်းၼႆၼၼ်ႉယဝ်ႉ။ မၼ်းလႆႈပွၵ်ႈႁိူၼ်းၶိုၼ်း မိူဝ်ႈပေႃႈၶဝ်လူႉသဵင်ႈၵႂႃႇလႄႈ မိူဝ်ႈမႄႈၶဝ်ႁူႉဝႃႈမၼ်းဢမ်ႇလႆႈၵႂႃႇသွၼ်ႁဵၼ်း ၸွမ်းၼင်ႇဢၼ်သူင်ႇၵႂႃႇၼၼ်ႉၼႆၵေႃႈ ဢမ်ႇႁၢၼ်ႉၸႂ်မၼ်းမႃးယဝ်ႉ လိုပ်ႈမၼ်းဢွၵ်ႇႁိူၼ်းၵႂႃႇယူႇ။ ယွၼ်ႉမီးမႄႈၵေႃႉလဵဝ်ၵူၺ်းလႄႈ ဢမ်ႇၶႂ်ႈၵႂႃႇယူႇႁင်းၵူၺ်းသေ လႆႈပွၵ်ႈမိူဝ်းႁိူၼ်းလိုၵ်းလိုၵ်းလုၵ်ႉမႃးၸဝ်ႉၸဝ်ႉ ၵူၺ်းၼၼ်ႉယဝ်ႉ။ သင်မႄႈႁူႉဝႃႈမၼ်းပွၵ်ႈႁိူၼ်းၼႆၵေႃႈ တေပွင်ႉလႃႇမၼ်း ၶေႃႈၵႂၢမ်းပေႃးဢမ်ႇသုတ်းဢမ်ႇၶၢတ်ႈလႆႈသေပွၵ်ႈ ယူႇယဝ်ႉ။
ၸိုၼ်ႈၶိူဝ်းၵေႃႈ ၶိုၼ်းလၢတ်ႈၼႄ လွင်ႈမၼ်းၵႂႃႇမိူၼ်ၵၼ်လႄႈ သွင်ၶႃၵေႃႈ လႆႈဢုပ်ႇဢူဝ်းၵၼ် လွင်ႈၼိုင်ႈယဝ်ႉလွင်ႈၼိုင်ႈ ထိုင်တီႈမိူင်းပေႃးၸမ်တေလႅင်း ယဝ်ႉ။ ၸိုၼ်ႈၶိူဝ်းၼၼ်ႉလႆႈမိူဝ်းသူင်ႇမူၺ်ၶၢဝ်တီႈႁိူၼ်းသေ ၵူၺ်းၵႃႈ သမ်ႉမိူဝ်းၺႃးမႄႈမူၺ်ၶၢဝ်ဢဝ်လီလီလႄႈ မိူၼ်တေမီးလွင်ႈထၢင်ႇၽိတ်းၵၼ်မႃးယူႇယဝ်ႉ။
မႄႈၸင်ႇလၢၵ်ႈၸၼ်ဢဝ်မူၺ်ၶၢဝ်ၵႂႃႇ ပွင်ႉထႃႉလႃႇသႂ်ႇမၼ်းယဝ်ႉၵေႃႈ ႁႆႈဢွၵ်ႇမႃးတေႃႇၼႃႈမၼ်းၼၼ်ႉယဝ်ႉ။ ၸိုၼ်ႈၶိူဝ်းဢၼ်လႆႈႁၼ်ၸွမ်းၼၼ်ႉၵေႃႈ လၢတ်ႈဝႃႈ တေတႄႇၼႃႈႁိူၼ်းၸွမ်းမူၺ်ၶၢဝ်ၼႆသေ ႁဵတ်းႁႂ်ႈ မႄႈၵတ်းယဵၼ်ၸႂ်မႃးၶိုၼ်း ယူႇယဝ်ႉ။ လွင်ႈၼႆႉၵေႃႈ သမ်ႉပေႃးဢဝ်မူၺ်ၶၢဝ်တူၵ်းၸႂ်ၵႂႃႇယူႇ။ မိူၼ်မၼ်းတေလၢတ်ႈလဵၼ်ႈလဵၼ်ႈၵူၺ်း ဢမ်ႇထၢင်ႇဝႃႈတေယွၼ်းမူၺ်ၶၢဝ် တေႇၼႃႈႁိူၼ်းတေႉတေႉၼၼ်ႉယဝ်ႉ။
ပေႃးတေႁႂ်ႈလၢတ်ႈၵေႃႈ ၸဵမ်မိူဝ်ႈတႄႇထူပ်းႁၼ်မူၺ်ၶၢဝ်ၼၼ်ႉ မၼ်းၵေႃႈ ပေႃးထုၵ်ႇၸႂ်ၶဝ်ၵႂႃႇယဝ်ႉ။ ႁဵတ်းႁႂ်ႈမၼ်းယွမ်းႁဵတ်းၸွမ်း လွင်ႈဢၼ်မူၺ်ၶၢဝ်လၢတ်ႈ လႄႈ တႅၼ်းတီႈတေၵိၼ်ၶဝ်ႈ တီႈဢၼ်ပိူၼ်ႈႁၢင်ႈႁႅၼ်းပၼ်မၼ်းဝႆႉၼၼ်ႉ မၼ်းၵႂႃႇၵိၼ်ၶဝ်ႈၼႂ်းလၢၼ်ႉ ဢၼ်မီးၶႅၵ်ႇတဵမ်ၵႂႃႇမူတ်းၼၼ်ႉသေ ပေႃးၵိၼ်ယဝ်ႉၵေႃႈ တႃႇတေလႆႈထူပ်းၶဝ်ၼၼ်ႉ ႁႂ်ႈမူၺ်ၶၢဝ် ၵေႃႉပဵၼ်ၵူၼ်းၵဵပ်းၵႃႈမၼ်းၼႆယဝ်ႉ။ သမ်ႉဝႃႈမူၺ်ၶၢဝ် တေပဵၼ်ၽၢႆႇမိုဝ်ႉၵႅင်သေတႃႉ ယွၼ်ႉၶဝ်ပဵၼ်ၸဝ်ႈၵၢၼ်လႄႈၵႃႈလႆႈႁဵတ်းယူႇ။
တင်းသွင်ၵေႃႉ လႆႈတႄႇၼႃႈႁိူၼ်းၸွမ်းၵၼ် မိူၼ်ဢမ်ႇလႆႈတဵမ်ၸႂ်ၵႃႈႁိုဝ် လႄႈ ၼႃႈႁိူၼ်းသွင်ၶႃၼၼ်ႉ ဢမ်ႇလႆႈတႄႇတီႈတၢင်းႁၵ်ႉဢၼ်ႁွမ်ဝၢၼ်သေတႃႉ ၵူၺ်းၵႃႈ သိုပ်ႇယၢင်ႈၵႂႃႇပဵၼ်ၼႃႈႁိူၼ်း ဢၼ်ဢုၼ်ႇၸႂ် ဢၼ်တဵမ်လူၺ်ႈတၢင်းႁၵ်ႉၼၼ်ႉယဝ်ႉ။ သွင်ၶႃၵေႃႈမီးလုၵ်ႈႁူမ်ႈၵၼ်ၵႂႃႇ ၵေႃႉၼိုင်ႈ ၼၼ်ႉတႄႉပဵၼ် လႅင်းဢွၼ်ႇ ဢၼ်လိုၼ်းၼုမ်ႇၵဵပ်းလဵင်ႉဝႆႉ ၼၼ်ႉယဝ်ႉ။
တီႈၼႂ်းလၢၼ်ႉ ဢၼ်ဢမ်ႇမီးႁူဝ်ၼႃႈၽၢႆႇႁပ်ႉၶႅၵ်ႇယဝ်ႉၼႆၵေႃႈ ၽၢႆႇပွင်ၵၢၼ်ၶဝ် လႆႈမႃးဢုပ်ႇဢူဝ်းၵၼ်ၵႂႃႇယူႇ ၼႂ်းၼၼ်ႉၵေႃႈ မီးပႃးၸိုၼ်ႈၶိူဝ်း ယူႇယဝ်ႉ။ လၢတ်ႈလႆႈဝႃႈ ပဵၼ်ပွၵ်ႈဢွၼ်တၢင်းသုတ်း ဢၼ်ၶဝ်ႈမႃးၼႂ်းလၢၼ်ႉ ဝၢႆးသေလိုၼ်းၼုမ်ႇဢွၵ်ႇၵႂႃႇယဝ်ႉၵေႃႈဝႃႈလႆႈ။ မိူဝ်ႈလတ်းၽၢၼ်ႇႁွင်ႈ လိုၼ်းၼုမ်ႇၵႂႃႇၼၼ်ႉၵေႃႈ ႁၢမ်ႈသၢႆတႃဢမ်ႇလႆႈ တႃႇတေဢမ်ႇဝၢႆႇတူၺ်း။ တိုၼ်းႁၢၼ်ဢၼ်ႁၼ်မၼ်းၼၼ်ႉၵေႃႈ ထူၺ်ႈၸႂ်လူင်မႃးသေ
“တူၺ်းႁဵတ်းသင်လႃႇ..”
“ၸွႆႈသိမ်းၶူဝ်းၶဝ်ဢွၵ်ႇၵႂႃႇလႄႈ”
“ဢိုမ်ႈ!..”
တိုၼ်းႁၢၼ်ၵေႃႈ သင်ႇႁႂ်ႈၵူၼ်းႁဵတ်းၵၢၼ်မႃးၽဵဝ်ႈၵႂႃႇၵမ်းလဵဝ်ယူႇ။
ဝၢႆးသေပၢင်ၵုမ်ယဝ်ႉ ၸိုၼ်ႈၶိူဝ်းဢၼ်ဢွၵ်ႇႁွင်ႈမႃးၼၼ်ႉၵေႃႈ ၽူႈမၢႆလုင်းဢွင်ႇ ၸင်ႇဢဝ်ထူင်ဢၼ်ၼိုင်ႈ မႃးယိုၼ်ႈပၼ်မၼ်းၵႂႃႇယူႇ။
“ၵူၼ်းႁဵတ်းၵၢၼ်ၽဵဝ်ႈၼႂ်းႁွင်ႈႁူဝ်ၼႃႈ လႆႈႁၼ်ထူင်ၼႆႉ မိူၼ်တေမီးသိူဝ်ႈသူဝႆႉၶႃႈဢေႃႈ”
မိူဝ်ႈဢၼ်ၼင်ႈၼႂ်းလူတ်ႉယူႇၼၼ်ႉ ႁၼ်ထူင်ၼၼ်ႉၵေႃႈ ယဵၼ်ႉယၢပ်ႇၼႃႇ တႃႇတေဢမ်ႇဢဝ်ဢွၵ်ႇမႃးတူၺ်း မၼ်းၸင်ႇထူၵ်းတူၺ်းသေ ၼႂ်းထူင်ၼၼ်ႉတႄႉ မီးသိူဝ်ႈဢၼ်မၼ်းဢဝ်ႁူမ်ႇပၼ်လိုၼ်းၼုမ်ႇၶမ်ႈၼၼ်ႉ ၼၼ်ႉယဝ်ႉ။ ၵူၺ်းၵႃႈ မီးထႅင်ႈသိူဝ်ႈၽိုၼ်ၼိုင်ႈလႄႈ မၼ်းၵေႃႈလႆႈဢဝ်ဢွၵ်ႇမႃးတူၺ်းသေ မိူၼ်ဝႃႈပဵၼ်သိူဝ်ႈဢၼ်မၼ်းယၢမ်ႈႁၼ်ဝႆႉယူႇ ၵူၺ်းသမ်ႉဢမ်ႇတွင်းယဝ်ႉလႄႈ ၸင်ႇမီးလိၵ်ႈၽိုၼ်ၼိုင်ႈ သႂ်ႇပႃးၸွမ်းယဝ်ႉ။ မၼ်းၵေႃႈပိုတ်ႇတူၺ်းသေ ၼႂ်းၼၼ်ႉတႄႉတႅမ်ႈဝႆႉဝႃႈ−
“ယိၼ်းၸူမ်းတႄႉၶႃႈယဝ်ႉ ပဵၼ်ၶေႃႈၵႂၢမ်းဢၼ်လုၵ်ႉမႃးၼႂ်းၸႂ်ၶႃႈဢေႃႈ”
မိူဝ်ႈလူၵႂႃႇယဝ်ႉၵေႃႈ မိူၼ်ႁၢင်ႈဢမ်ႇလၢတ်ႈထိုင်သိူဝ်ႈၽိုၼ်ၼႆႉၼႆလႄႈ ပဵၼ်ဢၼ်ထၢင်ႇပိူင်ႈမႃးဝႃႈပဵၼ်သိူဝ်ႈၽႂ်ၼႆယဝ်ႉ။ မၼ်းၸင်ႇတူၺ်းလီလီသေ လႆႈႁၼ်မႅၼ်ႈမိၵ်ႈမၢႆမွၵ်ႇမၼ်းမူၺ်ယဝ်ႉၵေႃႈ မိူၼ်တေပဵၼ်သိူဝ်ႈမၼ်းၼႆယူႇ။ ဝူၼ်ႉၸိူင်ႉႁိုဝ်ၵေႃႈဢမ်ႇပွင်ႇၸႂ် ယွၼ်ႉသင်လႄႈသိူဝ်ႈၼၼ်ႉ မီးတီႈလိုၼ်းၼုမ်ႇၼႆ။ ယၢမ်းၼၼ်ႉ သၢႆလႅင်းၵေႃႈ ပွင်ႇၶၢဝ်ႇလွင်ႈၶိုပ်ႈၼႃႈ လိုၼ်းၼုမ်ႇၼၼ်ႉမႃးပၼ် ယူႇယဝ်ႉ။
မၼ်းၵေႃႈ မိူဝ်ႈဢၼ်လႆႈငိၼ်းလွင်ႈလိုၼ်းၼုမ်ႇ ၵဵပ်းလဵင်ႉလုၵ်ႈဢွၼ်ႇဝႆႉလႄႈ လွင်ႈၼႃႈႁိူၼ်းလိုၼ်းၼုမ်ႇ ဢၼ်လႆႈလူႉသုမ်းပေႃႈၵႂႃႇ တေႃႇထိုင် ပေႃးလႆႈၶၢႆႉဢွၵ်ႇမႃးႁဵတ်းၵၢၼ်ၼႂ်းဝဵင်းလူင်ၼႆႉ ၼႆၵေႃႈ မၼ်းၸင်ႇဝူၼ်ႉလႆႈ လွင်ႈသိူဝ်ႈၽိုၼ်ၼၼ်ႉမႃးယူႇယဝ်ႉ။ ပဵၼ်သိူဝ်ႈဢၼ်မၼ်းလႆႈထွတ်ႇပၼ် ၽူႈယိင်းၵေႃႉၼိုင်ႈဢၼ်ပႃးလုၵ်ႈသေ တေထုၵ်ႇၵူၼ်းႁဵတ်းႁၢႆႉၶဝ်ၼၼ်ႉလႄႈ လႆႈၸွႆႈၵႂႃႇသူင်ႇၶဝ်တီႈႁူင်းယႃၼၼ်ႉ ၼႆယဝ်ႉ။
“ပဵၼ်ၶဝ်ၼႆႉလူး…” ဢဝ်မၼ်းသမ်ႉပေႃးမိူၼ်ႇမိုင်လူင်ၵႂႃႇယူႇယဝ်ႉ။
သၢႆလႅင်းဢၼ်ဢမ်ႇလႆႈငိၼ်းသဵင်ၸိုၼ်ႈၶိူဝ်းလီၼၼ်ႉၵေႃႈ ထၢမ်မႃးၸူးၶိုၼ်းယူႇ
“မီးလွင်ႈသင်ၶႃႈ…”
“ဢမ်ႇမီးလွင်ႈသင်..မိူဝ်ႈၼႆႉဝၼ်းတႅပ်းတတ်းပၼ်တၢမ်ႇၶဝ်ၸွင်ႇၸႂ်ႈႁိုဝ်”
“ၸႂ်ႈယဝ်ႉၶႃႈ..”
“သူယူႇတီႈၼၼ်ႈၸွင်ႇၸႂ်ႈ”
“ဢေႃႈ! မီးလွင်ႈသင်ၶႃႈ..”
“ၸွႆႈႁဵတ်းႁႂ်ႈမၼ်းထုၵ်ႈမႅၼ်ႈလႄႈၼႃႈ..”
မၼ်းၵေႃႈႁိပ်ႈၼႅတ်ႈၵႂႃႇတီႈ လုမ်းတႅပ်းတတ်းတြႃးၼၼ်ႉၵမ်းလဵဝ်။ ပေႃးဝႃႈၶဝ်ပဵၼ် ၽူႈယိင်းၵေႃႉဢၼ်မၼ်းၸွႆႈဝႆႉဝၼ်းၼၼ်ႉၼႆ လႆႈဝႃႈၸၢတ်ႈပၢၼ်ၶဝ် လႆႈယၢပ်ႇၽိုတ်ႇၸွမ်းလုၵ်ႈဢွၼ်ႇၵေႃႉၼႆႉၵေႃႈ ဢမ်ႇၸႂ်ႈငၢႆႈငၢႆႈ ၼၼ်ႉယဝ်ႉ။ ပေႃးထွမ်ႇတူၺ်း ဢၼ်သၢႆလႅင်းလၢတ်ႈမႃးၼၼ်ႉထႅင်ႈႁေ မၼ်းယိုင်ႈၶႅၼ်း ႁိပ်ႈၼႅတ်ႈႁေႃႈလူတ်ႉမၼ်းၵႂႃႇဝႆးဝႆးယူႇ။
ၸိုၼ်ႈၶိူဝ်းၵေႃႈ မိူဝ်ႈၵႂႃႇႁွတ်ႈၼၼ်ႉ သမ်ႉပေႃးဢမ်ႇၶႂ်ႈၵိုတ်းၽႂ်ယဝ်ႉလႄႈ သၢႆလႅင်းၸင်ႇမႃးၸူးမၼ်းသေ
“ယွမ်းၼွမ်းယူႇၶႃႈ..ၽၢႆႇႁဝ်းဢဝ်တၢင်းၽိတ်းၶဝ်ဢမ်ႇလႆႈ ယွၼ်ႉၶဝ်ဢမ်ႇမီးတၢင်းၽိတ်းသင်”
မိူဝ်ႈငိၼ်းၸိူင်ႉၼၼ်ၵေႃႈ ၼင်ႇႁၢင်ႈလူမ်ၸႂ်လူမ်ၶေႃးမႃးယူႇယဝ်ႉ။
“သူႁဵတ်းလႆႈလီတေႉယဝ်ႉ ၸူမ်းယဝ်ႉၼႃႈ”
မူၺ်ႁွမ်လႄႈပိုၼ်းမိူင်းၵေႃႈ ႁပ်ႉဢဝ်လိုၼ်းၼုမ်ႇပွၵ်ႈမိူဝ်းႁိူၼ်းၵႂႃႇယူႇ ဢွၼ်တၢင်းတေမိူဝ်းႁိူၼ်းၵေႃႈ တေဢွၼ်ၵၼ်မိူဝ်းဝႄႉတီႈႁိူၼ်း သႅင်ႁိူၼ်းၼုမ်ႇ ၼႆယဝ်ႉ။ လိုၼ်းၼုမ်ႇၵေႃႈ မိူဝ်ႈဢၼ်မုင်ႈႁၼ်လႅင်းဢွၼ်ႇ မီးယူႇတီႈၼၼ်ႈၼၼ်ႉ ဢမ်ႇသိုပ်ႇယၢင်ႈလႆႈထႅင်ႈယဝ်ႉ ၵိုတ်းၵႂႃႇၵၢင်တၢင်းၼၼ်ႉယူႇ။ မူၺ်ႁွမ် ဢၼ်ႁၼ်လွင်ႈႁဵတ်းသၢင်ႈလိုၼ်းၼုမ်ႇၼၼ်ႉ ဢမ်ႇပွင်ႇၸႂ်ၸွမ်းသေ
“လိုၼ်း..ပဵၼ်သင်လႃႇ!..လႅင်းဢွၼ်ႇပႂ်ႉသူယူႇတီႈႁိူၼ်းၼၼ်ႉယဝ်ႉၼႃ ၶဝ်လၵ်ႉဢွၵ်ႇႁိူၼ်းမႃးႁင်းၵူၺ်း မႃးႁႃသူထိုင်တီႈၼႆႈၼၼ်ႉယဝ်ႉ”
လိုၼ်းၼုမ်ႇၵေႃႈ ဢမ်ႇထွမ်ႇသင်သေ လႅၼ်ႈၵႂႃႇပႅတ်ႈၵမ်းလဵဝ်ယဝ်ႉ။ ပိုၼ်းမိူင်းၼၼ်ႉၵေႃႈ ၼႅတ်ႈလမ်းၸွမ်းၵႂႃႇ၊ မူၺ်ႁွမ် ၸွမ်းႁွင်ႉလိုၼ်းၼုမ်ႇသေ သဵင်လင်ႁႅင်းၼႃႇ ထိုင်တီႈလႅင်းဢွၼ်ႇ ပေႃးလႆႈငိၼ်းယဝ်ႉ လႅၼ်ႈဢွၵ်ႇႁိူၼ်းမႃးတူၺ်းၵမ်းလဵဝ် လိုၼ်းၼုမ်ႇတၼ်းပူၼ်ႉၵႂႃႇလႄႈ လႅင်းဢွၼ်ႇၵေႃႈဢမ်ႇတၼ်းလႆႈႁၼ်။
“ၼႃႉမူၺ်ႁွင်ႉမႄႈႁႃႉ!..မႄႈမႃးယဝ်ႉႁႃႉ..”
“ဢမ်ႇၼႃ…ၼႃႉဢမ်ႇလႆႈႁွင်ႉ..”
“မိူဝ်ႈၵႆႈၸၢႆးလႆႈငိၼ်းယူႇ ၼႃႉႁွင်ႉၸိုဝ်ႈမႄႈၼႆ..”
မူၺ်ႁွမ် ဢၼ်ဢမ်ႇႁူႉတေလႆႈႁဵတ်းႁိုဝ်ယဝ်ႉၼၼ်ႉၵေႃႈ လႆႈၵွတ်ႇဢဝ်လႅင်းဢွၼ်ႇဝႆႉၵူၺ်း။
ပိုၼ်းမိူင်းဢၼ်ၸွမ်းမႃးတၢင်းလင်လိုၼ်းၼုမ်ႇၼၼ်ႉၵေႃႈ ႁွင်ႉႁႂ်ႈမၼ်းၵိုတ်းယူႇ လိုၼ်းၼုမ်ႇၼၼ်ႉၵိုတ်းၵႂႃႇသေ ဝိၼ်ႇဝၢႆႇႁူပ်ႉတေႃႇၼႃႈ ပိုၼ်းမိူင်းၵႂႃႇယဝ်ႉ။
“ၶႂၢင်းပၼ်ၶႃႈဢိတ်ႉၼိုင်ႈ..ၶႃႈယွၼ်းၶၢဝ်းယၢမ်းယူႇႁင်းၵူၺ်းၽွင်ႈ”
ပိုၼ်းမိူင်းဢၼ်လႆႈငိၼ်းၸိူင်ႉၼၼ်ၵေႃႈ ၵိုတ်းၵႂႃႇသေ တူၺ်းၸွမ်းလိုၼ်းၼုမ်ႇ ဢၼ်ၵွင်လင်ပႆဢွၵ်ႇႁၢင်ႇမၼ်းၵႂႃႇလွႆးလွႆးၵူၺ်းယဝ်ႉ။
ၸိုၼ်ႈၶိူဝ်းၼၼ်ႉၵေႃႈ ဝူၼ်ႉဝႃႈလိုၼ်းၼုမ်ႇၶဝ် တေပွၵ်ႈမႃးတၢင်းႁိူၼ်းၼႆသေ ၸင်ႇလႆႈဢွၵ်ႇၶၢဝ်းတၢင်းမႃး တၢင်းႁိူၼ်းလိုၼ်းၼုမ်ႇၶဝ်ၼၼ်ႉယူႇ။
ၼိူဝ်သဵၼ်ႈတၢင်းလူင်ဢၼ်ၵႂၢင်ႈယႂ်ႇ မီးလူတ်ႉလူင်လႅၼ်ႈလတ်းၽၢၼ်ႇၵႂႃႇမႃး ဢမ်ႇႁူႉလမ်းလႂ်ပဵၼ်လမ်းလႂ် ၶပ်ႉၸႅၼ်ႇလမ်းၵၼ်ၵႂႃႇလႄႈ ယၢမ်းၼၼ်ႉ လူတ်ႉလူင်လမ်းၼိုင်ႈ ပုင်ႈသႂ်ႇၺႃးၵူၼ်းၵေႃႉၼိုင်ႈသေ လူတ်ႉလမ်းၼၼ်ႉၵေႃႈ ၼႅတ်ႈဝိၼ်ႇဝၢႆႇႁူဝ်လူတ်ႉပၢႆႈၵႂႃႇၵမ်းလဵဝ် ၵိုတ်းၵူၼ်းဢၼ်ၼွၼ်းလူမ်ႉဢိူၵ်ႇလိူတ်ႈ ယူႇၼိူဝ်သဵၼ်ႈတၢင်းၼၼ်ႉၵူၺ်း။
ယၢမ်းၼၼ်ႉ သဵင်တၢင်းလႂ်ၵေႃႈဢမ်ႇႁူႉလင်ႁွင်ႉမေႃးမႃး
“လိုၼ်းၼုမ်ႇ!!”
သဵင်လင်လႅမ်ၸီးၶဝ်ႈမေႃးၼႂ်းႁူ ၵွၵ်းႁူဝ်တုမ်ႉလေႃႇပိုၼ်ႉလိၼ်မိူင်း သဵင်ယဵၼ်ႁၢႆၵႂႃႇ ၼမ်ႉတႃၸုမ်ႉယမ်း လႆယွႆႉယွတ်ႇသႂ်ႇၼိူဝ်လိၼ်မိူင်း ႁူၺ်ႇတႃသွင်ၶွၼ်မွႆႈလပ်းၵႂႃႇ လူမ်းထူၺ်ႈၸႂ်ၼၼ်ႉၵေႃႈ ဝွႆးလူင်းၵႂႃႇလွႆးလွႆးယဝ်ႉ။
တွၼ်ႈသိပ်းႁႃႈသုတ်းၵႂႃႇယဝ်ႉ ပႂ်ႉသိုပ်ႇတူၺ်းထႅင်ႈတွၼ်ႈသိပ်းႁူၵ်းၶႃႈ။
ႁပ်ႉထွမ်ႇပၼ်ႁႅင်းလူၺ်ႈသဵင် တၢင်း YouTube ၵေႃႈလႆႈၶႃႈ။
