တွၼ်ႈသိပ်းၸဵတ်း
လိုၼ်းၼုမ်ႇၵေႃႈ မိူဝ်ႈၽွင်းယူတ်းယႃတူဝ်ယူႇတီႈႁူင်းယႃၼၼ်ႉ မီးၸိုၼ်ႈၶိူဝ်းလႄႈ လႅင်းဢွၼ်ႇ ပႂ်ႉတူၺ်းထိုင်လုမ်းလႃးမၼ်းဝႆႉယူႇ။ သွင်ၶႃၼၼ်ႉ ယူႇတီႈၼၼ်ႈ တၢင်းဝၼ်းတၢင်းဝၼ်း ဢမ်ႇၵႂႃႇတၢင်းလႂ် ဢဝ်လိုၼ်းၼုမ်ႇ သမ်ႉပေႃးဢမ်ႇၶႂ်ႈမေႃယူႇမႃးယဝ်ႉ မိူဝ်ႈတေလႆႈယူႇ ၼင်ႇၵူၼ်းဢမ်ႇႁူႉဢမ်ႇႁၼ်ၸိူင်ႉၼၼ်တိၵ်းတိၵ်း။
“ပဵၼ်သင်..သူတေလႆႈယူႇတီႈၼႆႈ..တၢင်းဝၼ်းတၢင်းဝၼ်းၸိူင်ႉၼႆၶႃႈလႃႇ”
“သူဢမ်ႇယူႇလီ..သမ်ႉတေႁႂ်ႈႁဝ်းၵႂႃႇတၢင်းလႂ်လႆႈ”
ယၢမ်းၼၼ်ႉ ပိုၼ်းမိူင်းၵေႃႈၶဝ်ႈႁွင်ႈမႃးသေ လႆႈမႃးၵူတ်ႇထတ်းၸႅတ်ႈတူၺ်း တၢင်းပဵၼ်လိုၼ်းၼုမ်ႇၵႂႃႇ၊ မိူၼ်ဝႃႈၸိုၼ်ႈၶႅၼ်းလီယဝ်ႉလႄႈ လၢတ်ႈႁႂ်ႈပွၵ်ႈမိူဝ်းႁိူၼ်းလႆႈယဝ်ႉ ၼႆယူႇ။ လိုၼ်းၼုမ်ႇ ဢၼ်လႆႈငိၼ်းၸိူင်ႉၼၼ်ၵေႃႈ ၼႅတ်ႈလုၵ်ႉလူင်းၵူႇၵမ်းလဵဝ်။ ၸိုၼ်ႈၶိူဝ်းဢၼ်ႁၼ်ၸိူင်ႉၼၼ် ၸင်ႇဝႃႈ−
“သူတေၵႂႃႇတၢင်းလႂ်!”
“ပွၵ်ႈမိူဝ်းႁိူၼ်းၼၼ်ႉၶႃႈၼႃႇ!”
“သူႁူႉယူႇႁႃႉဝႃႈႁိူၼ်းမီးတီႈလႂ်”
လိုၼ်းၼုမ်ႇၶုၼ်ႇၵိုတ်းၵႂႃႇသေ လေႉသၢႆတႃၸူးပိုၼ်းမိူင်း မိူၼ်ယွၼ်းတၢင်းၸွႆႈထႅမ်ယူႇ ၼၼ်ႉယဝ်ႉ။ ပိုၼ်းမိူင်းၼၼ်ႉၵေႃႈ ႁူႉၶိုတ်းလႄႈ
“မိူဝ်ႈၼႆႉ ၵၢၼ်ႁဝ်းၵေႃႈဢမ်ႇမီးသင်ယဝ်ႉ ႁဝ်းမိူဝ်းသူင်ႇၵေႃႈလႆႈယူႇၶႃႈ”
လိုၼ်းၼုမ်ႇၼၼ်ႉၵေႃႈ လၢတ်ႈၵမ်ႉထႅမ်ၵႂႃႇၸွမ်းထႅင်ႈ
“လီၶႃႈဢေႃႈ..မေႃၵေႃႈပဵၼ်ၵူၼ်းႁူႉၸၵ်းၶႃႈၵေႃႉၼိုင်ႈမိူၼ်ၵၼ်လူး တေႁူႉဝႃႈ ႁိူၼ်းၶႃႈၼၼ်ႉ..မီးယူႇတီႈလႂ်ၸွင်ႇၸႂ်ႈၶႃႈ”
“ဢိုမ်ႈ!..ႁဝ်းႁူႉဝႃႈႁိူၼ်းသူၼၼ်ႉ မီးယူႇတီႈလႂ်”
လွင်ႈႁဵတ်းသၢင်ႈၶႃၼၼ်ႉ ဢမ်ႇပေႃးထုၵ်ႇသၢႆတႃၸိုၼ်ႈၶိူဝ်းၵႃႈႁိုဝ်လႄႈ မၼ်းၸင်ႇပႆၶဝ်ႈၸူးလိုၼ်းၼုမ်ႇယဝ်ႉ ၵူမ်ႈၼႃႈသႂ်ႇၸမ်ၸမ်သေ
“ပဵၼ်သင်လႄႈ..ႁႂ်ႈၶဝ်မိူဝ်းသူင်ႇလႃႇ..”
“ၶဝ်ပဵၼ်မေႃ..ဢၼ်ႁူႉဝႃႈ..ႁိူၼ်းႁဝ်းယူႇတီႈလႂ်..ၼၼ်ႉၶႃႈၼႃႇ”
သုတ်ႉယၢင်ႈၶဝ်ႈၸူးလိုၼ်းၼုမ်ႇၵႂႃႇၼိုင်ႈယၢင်ႈယဝ်ႉ ဢဝ်လိုၼ်းၼုမ်ႇ လႆႈထွႆႁၢင်ႇဢွၵ်ႇတၢင်းလင်ၵႂႃႇၼိုင်ႈယၢင်ႈယူႇ။
“သူပဵၼ်မႄႈလုၵ်ႈႁဝ်း သူၵေႃႈတေႁူႉဝႃႈ..ႁဝ်းပဵၼ်ၽႂ်ဢမ်ႇၸႂ်ႈႁႃႉ ပဵၼ်သင်လႄႈ တေႁႂ်ႈမေႃမိူဝ်းသူင်ႇလႃႇ ”
ဢဝ်လိုၼ်းၼုမ်ႇၸုၵ်းမိုင်ၵႂႃႇ သမ်ႉပေႃးဢမ်ႇၸၢင်ႈတူင်ႉတူဝ်လႆႈယဝ်ႉ။ ပေႃးလၢတ်ႈလွင်ႈၸိူင်ႉၼႆ တေဢမ်ႇႁူႉၵေႃႈသမ်ႉဢမ်ႇလႆႈ တေႁဵတ်းၵႅင်ႈၵေႃႈ သမ်ႉတေၵႂႃႇယႂ်ႇတိၵ်းတိၵ်း။ လိုၼ်းၼုမ်ႇၵေႃႈ တိုတ်ႉၼႃႈယၵ်ႉၸူးသႂ်ႇၸိုၼ်ႈၶိူဝ်း ၼင်ႇဢမ်ႇၵူဝ်ၼၼ်ႉသေ သၢႆတႃသွင်ၶႃ တုမ်ႉလေႃႇၺႃးၵၼ်ၸူဝ်ႈၾႃႉမႅပ်ႈၼၼ်ႉ ပေႃးတၢၼ်ႇတေဢွၵ်ႇ မုၵ်ႉၾႆးမႃးယဝ်ႉ။ လိုၼ်းၼုမ်ႇသုတ်ႉၶဝ်ႈၸူးၸမ်ၸိုၼ်ႈၶိူဝ်း ၼင်ႇႁတ်းႁတ်း
“သူပဵၼ်ၽႂ်လႃႇ.. ႁဝ်းၶႂ်ႈႁူႉႁႂ်ႈမၼ်းၸႅင်ႈလႅင်းဢေႃႈ သူၼၼ်ႉပဵၼ်ၽႂ်တေႉတေႉ တႄႇၸဵမ်မိူဝ်ႈႁဝ်းတိုၼ်ႇမႃး သူၵုမ်ႇဝႃႈႁဝ်းပဵၼ်မႄႈလုၵ်ႈသူၼႆၵူၺ်း သူယင်းဢမ်ႇပႆႇလႆႈလၢတ်ႈၼႄဝႃႈသူၼၼ်ႉ ပဵၼ်ၽႂ် တေႁႂ်ႈႁဝ်းမိူဝ်းၸွမ်းသူ ႁဝ်းတေယုမ်ႇၸႂ်သူလႆႈၸိူင်ႉႁိုဝ်”
ဢဝ်ၸိုၼ်ႈၶိူဝ်းပေႃးဢမ်ႇၸၢင်ႈတၵ်းသဵင်ယဝ်ႉ သိုပ်ႇလၢတ်ႈထႅင်ႈ
“သမ်ႉဝႃႈ..ႁဝ်းဢမ်ႇႁူႉႁိူၼ်းႁဝ်းၼၼ်ႉ..ပဵၼ်တီႈလႂ် သင်မေႃလၢတ်ႈဝႃႈ.. ၼၼ်ႉယဝ်ႉ..ပဵၼ်ႁိူၼ်းႁဝ်း ႁဝ်းၵေႃႈ..တေဝူၼ်ႉဝႃႈမၼ်းပဵၼ်ႁိူၼ်းႁဝ်းယဝ်ႉ ယွၼ်ႉသင်လႃႇ ယွၼ်ႉႁဝ်းၸိုဝ်ႈလိုၼ်းၼုမ်ႇ ႁဝ်းမီးဢူၺ်းၵေႃႉ ပဵၼ်..မေႃယႃမူၺ်ႁွမ် မေႃပိုၼ်းမိူင်းၵေႃႈ..ပဵၼ်ဢူၺ်းၵေႃႉၵၼ်တင်း ႁဝ်းလႄႈမူၺ်ႁွမ် ၶဝ်ၼၼ်ႉ..ႁူႉၸၵ်းႁဝ်းလီ သင်ဢမ်ႇသင်ၵေႃႈ ႁဝ်းယုမ်ႇၸႂ်ၶဝ် လိူဝ်သေသူၼၼ်ႉၶႃႈယဝ်ႉ”
သုတ်ႉယၢင်ႈၶဝ်ႈၸူးၸိုၼ်ႈၶိူဝ်းၵႂႃႇၶိုၼ်း ယၢင်ႈၼိုင်ႈယဝ်ႉ ၸိုၼ်ႈၶိူဝ်းၼၼ်ႉၵေႃႈ သမ်ႉပေႃးလႆႈထွႆပၼ်ၶိုၼ်းယၢင်ႈၼိုင်ႈယူႇ။
“ႁဝ်းပဵၼ်မႄႈလုၵ်ႈသူၵူၺ်း သူမီးသုၼ်ႇသင်လႄႈ တေႁႂ်ႈႁဝ်းမိူဝ်းၸွမ်းလႃႇ ႁဝ်းဢမ်ႇၸႂ်ႈမေးသူလူး ႁတ်းလၢတ်ႈယူႇႁႃႉ..ဝႃႈႁဝ်းပဵၼ်မေးသူၼႆ”
မိုင်ယဵၼ်တူၺ်းၼႃႈၸိုၼ်ႈၶိူဝ်း ဢၼ်ဢမ်ႇၸၢင်ႈတွပ်ႇသင်လႆႈၼၼ်ႉယဝ်ႉ
“ႁၼ်ႁိုဝ်..သူၵေႃႈလၢတ်ႈလႆႈဝႃႈ..ပဵၼ်မႄႈလုၵ်ႈသူမွၵ်ႈၼၼ်ႉၵူၺ်း”
လိုၼ်းၼုမ်ႇၼၼ်ႉၵေႃႈ ၵွင်လင်ပႆဢွၵ်ႇၵႂႃႇၸွမ်းမေႃ ၼင်ႇဢမ်ႇသူၼ်ႇၸႂ်သင်ၼၼ်ႉယဝ်ႉ။ ယၢမ်းၼၼ်ႉ လႅင်းဢွၼ်ႇ ၼႅတ်ႈလႅၼ်ႈလမ်းႁွင်ႉလိုၼ်းၼုမ်ႇၵႂႃႇဝႃႈ−
“မႄႈ! ယႃႇၵႂႃႇပႅတ်ႈၸၢႆးၼႃ..မႄႈဢမ်ႇႁၵ်ႉၸၢႆးယဝ်ႉႁႃႉ..”
သမ်ႉပေႃးဢဝ်လိုၼ်းၼုမ်ႇၵိုတ်းမိုင်ၵႂႃႇယဝ်ႉ လႅင်းဢွၼ်ႇၼၼ်ႉၵေႃႈ ၼႅတ်ႈလႅၼ်ႈၵွတ်ႇဢဝ်ၶႃမၼ်းဝႆႉ ၸွမ်းၼင်ႇႁႅင်းမီးၼၼ်ႉယူႇ။ ၸိုၼ်ႈၶိူဝ်းဢၼ်ႁၼ်ၸွမ်းၵူႈလွင်ႈၼၼ်ႉ ပႆၶဝ်ႈၵႂႃႇၸူးတီႈလိုၼ်းၼုမ်ႇသေ လၢတ်ႈၸူး။
“သူပဵၼ်မႄႈလုၵ်ႈႁဝ်းၵေႃႈ ထုၵ်ႇလီႁူႉယူႇယဝ်ႉဝႃႈ..သူပဵၼ်မေးႁဝ်း ႁဝ်းၼၼ်ႉပဵၼ်ၸဝ်ႈၽူဝ်သူ..ၸိုၼ်ႈၶိူဝ်း ပဵၼ်ပေႃႈလႅင်းဢွၼ်ႇ ႁဝ်းလႄႈတင်းသူၼၼ်ႉၵေႃႈ ပဵၼ်ၵူၼ်းႁိူၼ်းလဵဝ်ၵၼ်ယဝ်ႉ”
လိုၼ်းၼုမ်ႇၼၼ်ႉၵေႃႈ မိူဝ်ႈငိၼ်းၸိူင်ႉၼၼ် သမ်ႉပေႃးဢမ်ႇႁူႉဝႃႈ တေတွပ်ႇၸိူင်ႉႁိုဝ်ယဝ်ႉ သင်ဝႃႈ လွင်ႈဝၼ်းလင်မၼ်းပွၵ်ႈမႃးယဝ်ႉၼႆၵေႃႈ တေလႆႈႁူပ်ႉတေႃႇၼႃႈလႅင်းဢွၼ်ႇ လူၺ်ႈပဵၼ်မႄႈဢၼ်ဢမ်ႇလႆႈလွင်ႈလႄႈ သင်တေဝႃႈလိုမ်းလွင်ႈဝၼ်းလင်သမ်ႉ တေလႆႈပဵၼ်မေးၸိုၼ်ႈၶိူဝ်း ၼၼ်ႉယဝ်ႉ။ ၵူၺ်းၵႃႈ မိုဝ်းဢွၼ်ႇဢၼ်လႅင်းဢွၼ်ႇၵွတ်ႇမၼ်းဝႆႉယူႇၼၼ်ႉ ၸိုင်သမ်ႉပေႉမႃးမၼ်ႈ ႁတ်ႉသႂ်ႇႁူဝ်ၸႂ်မၼ်း ပေႃးဢမ်ႇၸၢင်ႈၸၼ်ဢွၵ်ႇလႆႈယဝ်ႉ။
ပိုၼ်းမိူင်းဢၼ်လႆႈငိၼ်းၼင်ႇၼၼ်ၵေႃႈ မိုင်လူင်ၵႂႃႇမိူၼ်ၵၼ်
“ၼေႈသူ!..ပဵၼ်သင်လၢတ်ႈၸိူင်ႉၼၼ်လႃႇ!” မိူၼ်ၶႂ်ႈပႃးလူမ်းၸႂ်လမ်မႃးယဝ်ႉ။
“ပဵၼ်သင်လႄႈ..ႁဝ်းတေလၢတ်ႈဢမ်ႇလႆႈ ၶဝ်ပဵၼ်မႄႈလုၵ်ႈႁဝ်းတေႉတေႉလူး ဢမ်ႇၼၼ်ၵေႃႈဢမ်ႇၸႂ်ႈ”
“လိုၼ်းၼုမ်ႇၶဝ်ဢမ်ႇၸႂ်ႈမႄႈ..”
လၢတ်ႈပႆႇသုတ်း လိုၼ်းၼုမ်ႇၼၼ်ႉၵေႃႈ ၵမ်းႁူဝ်မၼ်း မိူၼ်တေႁူဝ်ၸဵပ်းမႃးယဝ်ႉ ၶၢင်းဢွၵ်ႇမႃးဝႃႈၸဵပ်းယူႇ။ ၽူႈၸၢႆးသွင်ၵေႃႉ ဢၼ်မိူၼ်တေထဵင်ၵၼ်ယူႇၼၼ်ႉ ၼႅတ်ႈဢွၼ်ၵၼ်မႃးႁွင်းဢဝ်မၼ်းဝႆႉသေ ဢွၼ်ဢဝ်ၼွၼ်းၼိူဝ်ၵူႇၶိုၼ်းယဝ်ႉ။ ပိုၼ်းမိူင်းၼၼ်ႉၵေႃႈ တေၵူတ်ႇထတ်းတူၺ်းတၢင်းပဵၼ်ၼႆသေ ႁႂ်ႈၸိုၼ်ႈၶိူဝ်းၶဝ် ဢွၵ်ႇၵႂႃႇပႂ်ႉဝႆႉတၢင်းၼွၵ်ႈႁွင်ႈ ၼႆယူႇ။
ၼႂ်းႁွင်ႈၼၼ်ႉ ၵိုတ်းလိုၼ်းၼုမ်ႇလႄႈပိုၼ်းမိူင်းၵူၺ်းယဝ်ႉ၊ ပိုၼ်းမိူင်းဢၼ်ႁူႉၶိုတ်း လွၵ်းလိင်ႉလိုၼ်းၼုမ်ႇၼၼ်ႉၵေႃႈ လၢတ်ႈၸူး..
“ႁဝ်းႁူႉယဝ်ႉၼႃႈ..ယႃႇႁဵတ်းၵႅင်ႈယူႇယဝ်ႉ..သူတေသိုပ်ႇႁဵတ်းၸိူင်ႉႁိုဝ်ၵႂႃႇလႃႇ..”
လိုၼ်းၼုမ်ႇဢၼ်မိူၼ်တေဝူၼ်ႉသေလွင်ႈလွင်ႈယူႇၼၼ်ႉၵေႃႈဝႃႈ−
“မိူဝ်ႈၶဝ်ယင်းဢွၼ်ႇ မိုဝ်းလဵၵ်ႉလဵၵ်ႉဢွၼ်ႇၶဝ်ၼၼ်ႉ တေၵႆႉယိပ်းမိုဝ်းႁဝ်းယူႇတႃႇသေႇ မိူဝ်ႈလႂ်ၶဝ်လႆႈယိပ်းယဝ်ႉ ၶဝ်တေဢမ်ႇၶႂ်ႈပွႆႇ တေႃႇထိုင်ၶဝ်ပွႆႇပၼ်လႆႈၵေႃႈ မိူဝ်ႈမီးသေလွင်ႈလွင်ႈ မႃးတႅၼ်းမိုဝ်းႁဝ်းလႆႈၼၼ်ႉၵူၺ်း၊ ႁဝ်းထုၵ်ႇလီပွႆႇမိုဝ်းၶဝ်ႁႃႉ ဢမ်ႇၼၼ် တေႁႂ်ႈၶဝ်ပွႆႇမိုဝ်းႁဝ်းၵႂႃႇႁင်းၵူၺ်း ဢမ်ႇဝႃႈၸိူင်ႉႁိုဝ် တၢင်းၽိတ်းဢၼ်ႁဝ်းႁဵတ်းဝႆႉၼိူဝ်ၶဝ်ၼၼ်ႉၵေႃႈ ဢမ်ႇလႆႈလူတ်းယွမ်းမႃးလူး..”
“ဢမ်ႇဝႃႈ..သူတေတႅပ်းတတ်းၸိူင်ႉႁိုဝ် ႁဝ်းၵမ်ႉထႅမ်သူယူႇယဝ်ႉ ၸႂ်ႉၶၢဝ်းယၢမ်းသေဝူၼ်ႉတူၺ်းလီလီလႄႈ သင်ဝူၼ်ႉလႆႈယဝ်ႉ ၸွင်ႇၵွႆႈဢွၵ်ႇႁူင်းယႃၵေႃႈလႆႈယူႇ ႁဝ်းတေလၢတ်ႈပၼ်တီႈၶဝ်ၵူၺ်း”
“ၸူမ်းယဝ်ႉၼႃ..”
မေႃဢွၵ်ႇႁွင်ႈၵႂႃႇယဝ်ႉ ၸိုၼ်ႈၶိူဝ်းၶႃၶဝ်ႈမႃးၶိုၼ်းသေ
“သူပဵၼ်ၸိူင်ႉႁိုဝ်မႃးလႃႇ..ယင်းတိုၵ်ႉၸဵပ်းယူႇႁႃႉ”
“ၶႅၼ်းမႃးယဝ်ႉ..ႁဝ်းယွၼ်းယူႇၵေႃႉလဵဝ်ဢိတ်ႉၼိုင်ႈ..”
ၵွင်လင်ပႅတ်ႈ ၼင်ႇဢမ်ႇၶႂ်ႈႁၼ်ၶဝ် ၼၼ်ႉယဝ်ႉ။
လိုၼ်းၼုမ်ႇၼၼ်ႉၵေႃႈ ၶုၵ်းၶူၼ်ႉဝူၼ်ႉၶိုၼ်း ဝၼ်းၸိူဝ်းဢၼ် လႆႈယူႇသဝ်းၸွမ်းလႅင်းဢွၼ်ႇမႃးၼၼ်ႉ ပေႃးဝႃႈတေၽၢတ်ႇပႅတ်ႈၶဝ်ၵႂႃႇၼႆၵေႃႈ မိူၼ်ႁူဝ်ၸႂ်ပေႃးၶႂ်ႈတႅၵ်ႇလႅဝ်လူင်ၵႂႃႇမူတ်း။ ၸိုၼ်ႈၶိူဝ်းၼၼ်ႉၵေႃႈ မိူၼ်တေဢွၵ်ႇပူၼ်ႉၽၵ်းတူၵႂႃႇယဝ်ႉသေတႃႉ ၵူၺ်းၵႃႈလွမ်ၶျွင်းတူၺ်းသေယဝ်ႉ လႆႈႁၼ်လိုၼ်းၼုမ်ႇႁွင်ႉႁႆႈမႃးယူႇ။
ဝၼ်းမႂ်ႇတွင်ႉၾႃႉၸိုၼ်ႈပၢင်ႇသႂ်ႇ လိုၼ်းၼုမ်ႇၵေႃႈလူင်းႁူင်းယႃသေ ပႂ်ႉယူႇတီႈၼႃႈႁူင်းယႃ ၼၼ်ႉယဝ်ႉ။ ပိုၼ်းမိူင်းဢၼ်လႆႈႁၼ်လိုၼ်းၼုမ်ႇ ပႂ်ႉယူႇတၢင်းႁိုင်ၸိူင်ႉၼၼ် ဢမ်ႇယဵၼ်ႉၸႂ်လႆႈယဝ်ႉလႄႈ ထၢမ်မိူဝ်းသူင်ႇယူႇ ၵူၺ်းၵႃႈ လိုၼ်းၼုမ်ႇၵေႃႈဢမ်ႇယွမ်းမိူဝ်းၸွမ်း။
“သူလိူၵ်ႈလႆႈယဝ်ႉၸွင်ႇၸႂ်ႈႁိုဝ်”
“ဢိုမ်ႈ!..ႁဝ်းပဵၼ်ၵူၼ်းႁႂ်ႈၶဝ်ယိပ်းမိုဝ်းယဝ်ႉ ႁဝ်းဢမ်ႇထုၵ်ႇလီပဵၼ်ၽၢႆႇပွႆႇမိုဝ်းၶဝ် ၵူၺ်းၵႃႈ တေႁဵတ်းႁႂ်ႈၶဝ်ၼၼ်ႉ ၵေႃႉပဵၼ်ၽၢႆႇပွႆႇမိုဝ်းႁဝ်းၵႂႃႇႁင်းၵူၺ်း ပေႃးထိုင်ၶၢဝ်းယၢမ်းမႃး မၼ်းၵေႃႈတေမီးယူႇၵႂႃႈ ဢၼ်လီလိူဝ်သေမိုဝ်းႁဝ်းၼၼ်ႉ”
“သင်မၼ်းယိုင်ႈၶႅၼ်းတေႁဵတ်းႁႂ်ႈသူၸဵပ်းထႅင်ႈလူး သူတေႁဵတ်းႁိုဝ်”
“ႁဝ်းဢမ်ႇပဵၼ်ႁင်ၶႃႈ မၼ်းပဵၼ်လွင်ႈဢၼ်ႁဝ်းတေလႆႈႁပ်ႉယူႇယဝ်ႉ ႁဝ်းႁဵတ်းသင်ဝႆႉၵေႃႈ ႁဝ်းတေလႆႈဢဝ်ပုၼ်ႈၽွၼ်း လွင်ႈဢၼ်ႁဝ်းလႆႈႁဵတ်းၵႂႃႇၼၼ်ႉယဝ်ႉ”
“သူတေယူႇၸွမ်းၶဝ်ၵႂႃႇ..လူၺ်ႈပဵၼ်ၵူၼ်းလိုမ်းလွင်ႈဝၼ်းလင်ၸိူင်ႉၼၼ်ႁႃႉ”
“ၸွမ်းလူၺ်ႈလိုၼ်းၼုမ်ႇ ၼႂ်းဝၼ်းလင်ၼၼ်ႉ ဢမ်ႇမီးသုၼ်ႇလႆႈႁူပ်ႉတေႃႇၼႃႈၶဝ်ယဝ်ႉ လိူဝ်သေတေလႆႈပဵၼ်မႄႈၶဝ်ၵူၺ်း”
“ႁဝ်းပွင်ႇၸႂ်ယဝ်ႉ”
လိုၼ်းၼုမ်ႇၼၼ်ႉၵေႃႈ သမ်ႉဝႃႈမူၺ်ႁွမ် မႃးဢွၼ်ႈဝွၼ်း ႁႂ်ႈမၼ်းပွၵ်ႈမိူဝ်းၸွမ်းသေတႃႉ မၼ်းၵေႃႈဢမ်ႇယွမ်းမိူဝ်း၊ သႅင်ႁိူၼ်းၼုမ်ႇၵေႃႈ မႃးပႂ်ႉႁပ်ႉမၼ်းသေတႃႉၵေႃႈ ယင်းလႆႈထဵင်ၵႂႃႇၶိုၼ်း။ ၵူၺ်းမွင်းပႂ်ႉၽႂ်သေၵေႃႉၼိုင်ႈ တေမႃးႁပ်ႉမၼ်းပွၵ်ႈမိူဝ်းၼႆယူႇ ပႂ်ႉတေႃႇထိုင်ၵၢင်ဝၼ်းၶမ်ႈၵေႃႈ ဢမ်ႇလႆႈႁၼ်ငဝ်းၶဝ်မႃးသေဢိတ်း ၼၼ်ႉယဝ်ႉ။ လိုၼ်းၼုမ်ႇၼၼ်ႉၵေႃႈ ဢမ်ႇယွမ်းၵႂႃႇတၢင်းလႂ် ပႂ်ႉၶဝ်သမ်ႉပေႃးမီးၵႂႃႇတဵင်ႈၶိုၼ်းယဝ်ႉ ႁိမ်းႁွမ်းၸိူဝ်းၼၼ်ႉၵေႃႈ ဢမ်ႇလႆႈႁၼ်ၵူၼ်းသေၵေႃႉယဝ်ႉလူး။
“ႁဝ်းမုင်ႈမွင်းသင်ယူႇလႃႇ ႁဝ်းတေဝူၼ်ႉၼမ်ၼႃႇယဝ်ႉ”
မိူၼ်သဵင်ႈၸႂ်မႃးသေ ပႆဢွၵ်ႇႁၢင်ႇႁူင်းယႃၼၼ်ႉၵႂႃႇလွႆးလွႆး ၸွမ်းၶႅပ်ႇၶၢင်ႈတၢင်း ဢၼ်ဢမ်ႇမီးယိူင်းမၢႆသင် ၼၼ်ႉယဝ်ႉ။
ၼႂ်းၶမ်ႈၶိုၼ်းဢၼ်လပ်းသိင်ႇ သႅင်ၾႆးႁိူဝ်ႈလႅင်းဝွႆးဝွႆး လူမ်းထူဝ်းထွင်းသိူဝ်ႈမၢင်မၢင်ဢွၼ်ႇမၼ်းၼၼ်ႉ ၵတ်းလၢင်ႈဢဝ်ၶူၼ်တုမ်ႇၼိူဝ်ႉ ၵီႈပိုဝ်းမႃးပဵၼ်ၵမ်းယူႇ။ ၵူၺ်းၵႃႈ တိၼ်ဢွၼ်ႇမၼ်းသွင်ၶွၼ်ၼၼ်ႉတႄႉ ယင်းတိုၵ်ႉသိုပ်ႇယၢင်ႈၵႂႃႇတိၵ်းတိၵ်း ဢမ်ႇၵိုတ်းလိုဝ်ႈလႆႈ မိူၼ်ပႆၵႂႃႇလူၺ်ႈဢမ်ႇႁူႉတူဝ် ၼၼ်ႉယဝ်ႉ။
“သူတေၵႂႃႇတၢင်းလႂ်!” သဵင်ၵူၼ်းဢၼ်ႁွင်ႉမႃးတၢင်းလင်မၼ်းၼၼ်ႉၵေႃႈ ၼင်ႇႁၢင်ႈဢမ်ႇလႆႈငိၼ်း။
“လိုၵ်းၼႃႇယဝ်ႉ!..သူတေၵႂႃႇလႂ်လႃႇ ပွၵ်ႈမိူဝ်းႁိူၼ်းလႆႈယဝ်ႉၼႃႈ”
ဢမ်ႇဝႃႈၵူၼ်းၵေႃႉၼၼ်ႉ တေလၢတ်ႈသင်ၵေႃႈ မၼ်းဢမ်ႇလႆႈငိၼ်း။ ၵူၼ်းၵေႃႉၼၼ်ႉၵေႃႈ လႅၼ်ႈလမ်းၸွမ်းၵႂႃႇ ၸၼ်ဢဝ်ၶႅၼ်မၼ်းယဝ်ႉ ဝၢႆႇၼႃႈၶဝ်ႈႁႃၵၼ်သေ လိုၼ်းၼုမ်ႇၵေႃႈ မိူဝ်ႈမီးသေလွင်ႈလွင်ႈ မႃးႁုၵ်ႉၸၼ်ဢဝ်တူဝ်မၼ်းၼၼ်ႉ လႆႈသတိမႃးယဝ်ႉလႄႈ ၸင်ႇတေၾၢင်ႉမႅၼ်ႈဝႃႈ မၼ်းၼၼ်ႉ မီးယူႇၼႂ်းဢွင်ႈဢူၵ်းၸိုၼ်ႈၶိူဝ်းယဝ်ႉလူး။
“သူ! တၼ်းမႃးမိူဝ်ႈလႂ်ၶႃႈ..”
ၸိုၼ်ႈၶိူဝ်းယၵ်ႉတူၺ်းၼႃႈလိုၼ်းၼုမ်ႇယဝ်ႉ ယဵၼ်လူင်ၵႂႃႇ လူၺ်ႈဢမ်ႇလႆႈလၢတ်ႈသင်လႄႈ ၵွတ်ႇဢဝ်တူဝ်မၼ်းဝႆႉယူႇ။
မိူဝ်ႈၸိုၼ်ႈၶိူဝ်းဢၢင်ႈမႃးႁပ်ႉလိုၼ်းၼုမ်ႇၼႆၼၼ်ႉ သမ်ႉလႆႈႁၼ်လိုၼ်းၼုမ်ႇ ၼင်ႈဢုပ်ႇၵၼ်တင်းပိုၼ်းမိူင်းယူႇလႄႈ မၼ်းၵေႃႈလႆႈႁူၼ်လူတ်ႉပွၵ်ႈၶိုၼ်းဝႆးဝႆး ယဝ်ႉ။ ယၢမ်းၵၢင်ၶိုၼ်းၼၼ်ႉသမ်ႉ မိူၼ်လႅင်းဢွၼ်ႇတေဢမ်ႇယူႇလီ ၼွၼ်းႁႆႈၼွၼ်းႁွင်ႉႁႃမႄႈယူႇတိၵ်းတိၵ်း ၽႂ်ဢဝ်ၵေႃႈဢမ်ႇလႆႈ ထိုင်တီႈၸိုၼ်ႈၶိူဝ်း ပေႃးလႆႈၸွမ်းၶႆႈလိုၼ်းၼုမ်ႇ ထိုင်ႁိူၼ်းယူႇ၊ ၵူၺ်းၵႃႈဢမ်ႇလႆႈႁၼ် လႄႈ ၸင်ႇလႆႈမိူဝ်းၶႆႈထိုင်တီႈႁိူၼ်းပိုၼ်းမိူင်းယဝ်ႉ မိူၼ်ဝႃႈပိုၼ်းမိူင်းၼၼ်ႉသမ်ႉ ဢမ်ႇလႆႈယူႇႁိူၼ်းမိူၼ်ၵၼ် ၸင်ႇၸွမ်းမႃးၶႆႈထိုင်တီႈႁူင်းယႃယူႇ။ ၵူၺ်းၵႃႈ ပိုၼ်းမိူင်းသမ်ႉမီးၼႂ်းႁွင်ႈၽႃႇတတ်းဝႆႉ ၸင်ႇသမ်ႉလႆႈထၢမ်မေႃယႃ ဢၼ်ပႂ်ႉႁူင်းယႃၼၼ်ႉသေ ႁူႉဝႃႈလိုၼ်းၼုမ်ႇ တိုၵ်ႉဢွၵ်ႇႁူင်းယႃၵႂႃႇၵူၺ်းၼႆၵေႃႈ မၼ်းလႆႈၶပ်းလူတ်ႉဢွၵ်ႇၸွမ်းႁႃ ယူႇယဝ်ႉ။ မိူဝ်ႈႁွတ်ႈထိုင်သဵၼ်ႈတၢင်းလူင်ၼၼ်ႉ လႆႈႁၼ်ၽူႈယိင်းၵေႃႉၼိုင်ႈ ပႆၵေႃႉလဵဝ်ယူႇႁိမ်းၶၢင်ႈတၢင်းၼၼ်ႉလႄႈ မၼ်းၸင်ႇၶပ်းလူတ်ႉၵႂႃႇလွႆးလွႆး ၵႂႃႇတူၺ်းၸမ်သေ လႆႈႁူႉဝႃႈပဵၼ်လိုၼ်းၼုမ်ႇ ၼႆယဝ်ႉ။
“ပွၵ်ႈမိူဝ်းႁိူၼ်းၸွမ်းႁဝ်းလႄႈၼႃႈ လႅင်းဢွၼ်ႇၶဝ်ဢမ်ႇယူႇလီ.. ႁွင်ႉႁႃသူယူႇတိၵ်းတိၵ်းယဝ်ႉ”
လိုၼ်းၼုမ်ႇဢၼ်ႁူႉဝႃႈ လႅင်းဢွၼ်ႇဢမ်ႇယူႇလီၼႆၵေႃႈ မိူဝ်ႈႁွတ်ႈထိုင်ႁိူၼ်းယဝ်ႉ ဢမ်ႇတၼ်းႁူႉသင် သမ်ႉပေႃးၵႂႃႇမီးယူႇႁိမ်းလႅင်းဢွၼ်ႇ ၼၼ်ႉယဝ်ႉ။ လႅင်းဢွၼ်ႇ ဢၼ်လႆႈႁၼ်လိုၼ်းၼုမ်ႇသေယဝ်ႉ လႆႈယိပ်းမိုဝ်းလိုၼ်းၼုမ်ႇဝႆႉၼႆၵေႃႈ ၼင်ႇႁၢင်ႈသမ်ႉပေႃးၼွၼ်းၼိမ်လူင်မႃးၵမ်းလဵဝ်ယူႇ။
လိုၼ်းၼုမ်ႇဢၼ်ၵွမ်ႇလႅင်းဢွၼ်ႇၼွၼ်းၼၼ်ႉၵေႃႈ လႆႈလပ်းၵႂႃႇၸွမ်းယူႇယဝ်ႉ။
ယၢမ်းၵၢင်ၼႂ် သၢႆလႅင်းလႅတ်ႇတွင်ႈၶဝ်ႈမႃးၼႂ်းမၢၼ်ႇႁူးလႅင်း ႁိူဝ်ႈထွင်ႇသႂ်ႇတႃ ဢၼ်တိုၵ်ႉၼွၼ်းဝၢၼ်ယူႇၼၼ်ႉ သမ်ႉပေႃးတိုၼ်ႇ၊ လိုၼ်းၼုမ်ႇတိုၼ်ႇမႃးယဝ်ႉ မိူၼ်ဝႃႈ လႆႈႁၼ် ဢၼ်ဢမ်ႇထုၵ်ႇလီႁၼ် ဢၼ်မီးၸိုၼ်ႈၶိူဝ်းၼွၼ်းယူႇၽၢႆႇၼႃႈမၼ်း လိူဝ်သေလႅင်းဢွၼ်ႇ ၼၼ်ႉယဝ်ႉ။ ပဵၼ်ဢၼ်တူၵ်းၸႂ်ၼႃႇသေ ဢၢင်ႈႁွင်ႉဢွၵ်ႇမႃး ၵူၺ်းမီးလႅင်းဢွၼ်ႇၼွၼ်းယူႇလႄႈ လႆႈယဵၼ်ႉဝႆႉယူႇ တေဢၢင်ႈလုၵ်ႉသမ်ႉ မိုဝ်းလဵၵ်ႉလဵၵ်ႉဢွၼ်ႇ လႅင်းဢွၼ်ႇၼၼ်ႉၵေႃႈ ၵွတ်ႇဢဝ်တူဝ်မၼ်းသေ မွၼ်သႂ်ႇဝႆႉၶႅၼ်မၼ်းၼၼ်ႉလႄႈ ၽိုတ်ႉၶဝ်ႈၼႂ်းဢွင်ႈဢူၵ်းလိုၼ်းၼုမ်ႇၼၼ်ႉထႅင်ႈ ဢဝ်မၼ်းသမ်ႉပေႃး ဢမ်ႇၸၢင်ႈတူင်ႉတူဝ်မႃးယဝ်ႉ။
လိုၼ်းၼုမ်ႇဢၼ်ႁၼ်ၸိုၼ်ႈၶိူဝ်း တူင်ႉတူဝ်မိူၼ်တေတိုၼ်ႇမႃးယဝ်ႉၼၼ်ႉၵေႃႈ ၼႅတ်ႈလပ်းတႃၵႂႃႇပႅတ်ႈ ႁႂ်ႈမိူၼ်တိုၵ်ႉလပ်းယူႇၼၼ်ႉယဝ်ႉ။ ၸိုၼ်ႈၶိူဝ်းၼၼ်ႉ ၸင်ႇမႄးဝိၼ်ႇဝၢႆႇၼႃႈ ၶဝ်ႈႁႃလိုၼ်းၼုမ်ႇၶႃ ဝၢႆႇတူၺ်းသွင်ၵေႃႉမႄႈလုၵ်ႈ ဢၼ်ၼွၼ်းၵွတ်ႇၵၼ်ယူႇၼၼ်ႉသေ ယုမ်ႉဢွၵ်ႇမႃးယဝ်ႉ မႄးတင်ႈၸႂ်ယၵ်ႉတူၺ်းလီလီယူႇ။ လိုၼ်းၼုမ်ႇဢၼ်ႁဵတ်းၵႅင်ႈလပ်းယူႇၼၼ်ႉၵေႃႈ ဢမ်ႇႁတ်းမိုၼ်းတႃသေဢိတ်း ယူႇယၢပ်ႇၼႃႇယဝ်ႉလႄႈ မွင်းႁႂ်ႈၸိုၼ်ႈၶိူဝ်းၼၼ်ႉ လုၵ်ႉၵႂႃႇဝႆးဝႆးယူႇယဝ်ႉ။
တီႈၼိူဝ်ၽိူၼ်မူႇၶဝ်ႈ မီးမႄႈပႃႈၵေႃႉၼိုင်ႈ ႁၢင်ႈႁႅၼ်းၶဝ်ႈၽၵ်း သမ်ႉပေႃးတဵမ်ၽိူၼ်လူင်ဝႆႉယဝ်ႉ။ မႄႈပႃႈၵေႃႉၼၼ်ႉတႄႉ ပဵၼ်ၵူၼ်းတူၺ်းထိုင်လုမ်းလႃးၸိုၼ်ႈၶိူဝ်း ၸဵမ်လွင်ႈယူႇလွင်ႈၵိၼ်ၸိူဝ်းၼႆႉ မိူၼ်ပဵၼ်မႄႈၸိုၼ်ႈၶိူဝ်းၵေႃႉၼိုင်ႈၵေႃႈဝႃႈလႆႈယဝ်ႉ။ ယွၼ်ႉပိူဝ်ႈမႄႈၸိုၼ်ႈၶိူဝ်း လူႉသဵင်ႈတၢႆၵႂႃႇ ၸဵမ်မိူဝ်ႈၵေႃႉလဵၵ်ႉၼၼ်ႉသေ ပေႃႈၶဝ်ၵေႃႈ လႆႈတႄႇၼႃႈႁိူၼ်းမႂ်ႇထႅင်ႈလႄႈ မိူၼ်ဢမ်ႇပေႃးသူၼ်ၸႂ်မၼ်းၵႃႈႁိုဝ် ၼၼ်ႉယဝ်ႉ။ ၵူၺ်းၵႃႈ ပႃႈဢွင်ႇ ဢၼ်ႁဵတ်းၵၢၼ်ၸွမ်းၶဝ် ၸဵမ်မိူဝ်ႈမႄႈၶဝ်ယင်းတိုၵ်ႉယူႇၼၼ်ႉၵေႃႈ လႆႈပဵၼ်ၵူၼ်းယူႇႁိမ်းၶၢင်ႈမၼ်း ၸွႆႈတူၺ်းထိုင်လုမ်းလႃးမၼ်းမႃးယူႇ။ သမ်ႉဝႃႈမၼ်းဢွၵ်ႇႁိူၼ်း ယူႇႁင်းၵူၺ်းယဝ်ႉသေတႃႉ ပႃႈဢွင်ႇၼၼ်ႉတႄႉ ယင်းတိုၵ်ႉၸွမ်းမႃးလုမ်းလႃး တူၺ်းထိုင်မၼ်း ၸွမ်းမႆႈၸႂ်မၼ်း မိူၼ်ၵဝ်ႇယူႇ။
မိူဝ်ႈဢၼ်ႁၼ်လိုၼ်းၼုမ်ႇၶႃမႄႈလုၵ်ႈ ဢွၵ်ႇႁွင်ႈမႃးယဝ်ႉၵေႃႈ ၼႅတ်ႈႁွင်ႉၵိၼ်ၶဝ်ႈယဝ်ႉ။ လိုၼ်းၼုမ်ႇဢၼ်ႁၼ်မီးၶႃၵူၺ်းလႄႈ
“ၶဝ်..ၸွင်ႇတေမႃးၵိၼ်ၶႃႈ”
“ၶဝ်..ဢမ်ႇလႆႈၸႂ်ၵိၼ်ၶဝ်ႈၼႂ်..ဢွၵ်ႇၵႂႃႇႁဵတ်းၵၢၼ်ယဝ်ႉဝႃႈ”
“ပႃႈလူး..ၵိၼ်ၶဝ်ႈယဝ်ႉၶႃႈႁႃႉ..ၵိၼ်ၸွမ်းၵၼ်ၶႃႈလႄႈ”
“ပႃႈၵိၼ်ယဝ်ႉယဝ်ႉၼႃႈ..ယိင်းၶႃၵိၼ်ၵႂႃႇလႄႈ”
ပႃႈဢွင်ႇၼၼ်ႉ လႆႈႁၼ်လႅင်းဢွၼ်ႇၵိၼ်ၶဝ်ႈဝၢၼ်ၵေႃႈ မိူဝ်ႈၼႆႉၼၼ်ႉယဝ်ႉ ၸဵမ်မိူဝ်ႈမႃးယူႇတီႈႁိူၼ်းၼႆႉ ဢမ်ႇလႆႈႁၼ်ၶဝ်ၵိၼ်ၶဝ်ႈၵိၼ်ၼမ်ႉမိူၼ်ၼႆသေပွၵ်ႈ၊ ပွၵ်ႈၼႆႉတႄႉ တင်းၵိၼ်တင်းဢုပ်ႇလိုၼ်းၼုမ်ႇသေ လိုၼ်းၼုမ်ႇၼၼ်ႉၵေႃႈ ၸေႃႉၶဝ်ႈပွၼ်ႈသႂ်ႇသူပ်းပၼ်မၼ်းၵႂႃႇ ယဝ်ႉဢုပ်ႇၵၼ်ၵႂႃႇ ပႃႈဢွင်ႇဢၼ်ႁၼ်ၸိူင်ႉၼၼ်ၵေႃႈ မိူၼ်ဢမ်ႇပေႃးႁၢၼ်ႉၸႂ်ၵႃႈႁိုဝ် ၼၼ်ႉယဝ်ႉ။
ပႃႈဢွင်ႇဢၼ်ဢမ်ႇယၢမ်ႈႁူႉၸၵ်းလိုၼ်းၼုမ်ႇလႄႈ ၸိုၼ်ႈၶိူဝ်းႁပ်ႉလိုၼ်းၼုမ်ႇမႃး ပဵၼ်မႄႈလႅင်းဢွၼ်ႇၼႆၼၼ်ႉ ဢမ်ႇပေႃးႁၼ်လီၸွမ်းၵႃႈႁိုဝ်။ ယွၼ်ႉလိုၼ်းၼုမ်ႇၼၼ်ႉ ပဵၼ်ၵူၼ်းဢဝ်လုၵ်ႈဢွၼ်ႇ ၽၢတ်ႇၸိုၼ်ႈၶိူဝ်းၵႂႃႇ ၼႆၼၼ်ႉယဝ်ႉ။ မိူဝ်ႈဢၼ်လႆႈႁၼ်လိုၼ်းၼုမ်ႇၼၼ်ႉၵေႃႈ ႁဵတ်းႁႂ်ႈမၼ်းၶုၵ်းၶူၼ်ႉထိုင်ၶိုၼ်း လွင်ႈဢၼ်ဝႃႈ သင်မူၺ်ၶၢဝ်ၼၼ်ႉ တိုၵ်ႉမီးယူႇၼႆ တေပဵၼ်ၼႃႈႁိူၼ်းဢၼ်ဢုၼ်ႇၸႂ် ဢၼ်မီးပေႃႈမႄႈလုၵ်ႈသၢမ်ၵေႃႉၼၼ်ႉ ယူႇယဝ်ႉ။ တေဝႃႈႁင်လိုၼ်းၼုမ်ႇၵေႃႈဢမ်ႇလႆႈတေႉတေႉ ယွၼ်ႉလိုၼ်းၼုမ်ႇၼၼ်ႉ ပဵၼ်ၵူၼ်းလိုမ်းလွင်ႈဝၼ်းယူႇ လၢတ်ႈဢမ်ႇလၢတ်ႈၵေႃႈ ဢမ်ႇလႆႈလွင်ႈသင်မႃး လိူဝ်သေၼၼ်ႉသမ်ႉ ၸိုၼ်ႈၶိူဝ်းၵေႃႈ လၢတ်ႈႁႂ်ႈလုမ်းလႃးတူၺ်းထိုင်ၶဝ်လီလီၼႆထႅင်ႈလူးၵွၼ်ႇ သမ်ႉဝႃႈဢမ်ႇတဵမ်ၸႂ်ၵေႃႈ ၵႃႈလႆႈႁဵတ်းၵႂႃႇယူႇ။
မိူဝ်ႈဢၼ်တိုၵ်ႉၼင်ႈၵိၼ်ၶဝ်ႈၵၼ်ယူႇၼၼ်ႉ သၢႆလႅင်းၵေႃႈႁွတ်ႈမႃးသေ မႃးၼႄႉၼမ်းတူဝ်တီႈလိုၼ်းၼုမ်ႇၵႂႃႇ။
“မႂ်ႇသုင်ၶႃႈပီႈလူဝ်း..” လၢတ်ႈဢဝ်လိုၼ်းၼုမ်ႇသမ်ႉပေႃးၵႅၼ်ႉၶဝ်ႈဢွၵ်ႇမႃးယဝ်ႉ။
သၢႆလႅင်းသိုပ်ႇလၢတ်ႈထႅင်ႈ “ၶႃႈၸိုဝ်ႈသၢႆလႅင်း ပဵၼ်ၽူႈမၢႆပီႈဢၢႆႈႁဝ်း ၶဝ်ႁႂ်ႈၶႃႈမႃးႁပ်ႉပီႈလူဝ်းၶႃၼႆဢေႃႈ”
ငိၼ်းယဝ်ႉၵေႃႈ ၵိၼ်ၶဝ်ႈပေႃးဢမ်ႇၶႂ်ႈလူင်းၶေႃးယဝ်ႉ။
သၢႆလႅင်းၼၼ်ႉ ဢွၼ်ဢဝ်ၶႃၵႂႃႇသူင်ႇတီႈႁူင်းႁဵၼ်းလင်ၼိုင်ႈယူႇ။ မိူၼ်တေပဵၼ်ႁူင်းႁဵၼ်း ဢၼ်ၵူၼ်းမီးငိုၼ်းၶဝ်ၵမ်ႈၼမ် ၶိုၼ်ႈၵၼ်ၼၼ်ႉယဝ်ႉ။ ၸင်ႇသမ်ႉမီးမေႃသွၼ် ၽူႈယိင်းၵေႃႉၼိုင်ႈ မႃးႁပ်ႉဢဝ်လႅင်းဢွၼ်ႇၵႂႃႇလႄႈ လႅင်းဢွၼ်ႇၼၼ်ႉၵေႃႈ ပူၵ်းမိုဝ်းသူင်ႇသင်ႇလိုၼ်းၼုမ်ႇသေၶဝ်ႈႁွင်ႈႁဵၼ်းၵႂႃႇယဝ်ႉ။
လိုၼ်းၼုမ်ႇဢၼ်တူၺ်းၸွမ်းလႅင်းဢွၼ်ႇၼၼ်ႉၵေႃႈ မိူၼ်ဝႃႈၶဝ်တေလႆႈၸႂ် ႁူင်းႁဵၼ်းလင်ၼႆႉမိူၼ်ၵၼ် ယုမ်ႉၸူးလႅင်းဢွၼ်ႇၵႂႃႇသေ ယၵ်ႉတူၺ်းႁူင်းႁဵၼ်းလင်ၼၼ်ႉယဝ်ႉ ၶိုၼ်ႈလူတ်ႉၵႂႃႇၸွမ်းသၢႆလႅင်း ယူႇယဝ်ႉ။ လိုၼ်းၼုမ်ႇဢၼ်ဢမ်ႇႁူႉဝႃႈ တေၵႂႃႇတၢင်းလႂ်ၼၼ်ႉၵေႃႈ လႆႈထၢမ်ၵႂႃႇ−
“တေၵႂႃႇတၢင်းလႂ်ထႅင်ႈၶႃႈ”
“ပေႃးႁွတ်ႈယဝ်ႉၵေႃႈ..တေႁူႉၵူၺ်းၶႃႈ..”
သၢႆလႅင်းၵေႃႈ ဢွၼ်ဢဝ်လိုၼ်းၼုမ်ႇ ၵႂႃႇသူင်ႇပၼ်တီႈႁဵတ်းၵၢၼ်ၸိုၼ်ႈၶိူဝ်း ယဝ်ႉ။
တွၼ်ႈသိပ်းၸဵတ်းသုတ်းၵႂႃႇယဝ်ႉ ပႂ်ႉသိုပ်ႇတူၺ်းထႅင်ႈတွၼ်ႈသိပ်းပႅတ်ႇၶႃႈ။
ႁပ်ႉထွမ်ႇပၼ်ႁႅင်းလူၺ်ႈသဵင်တၢင်း YouTube ၵေႃႈလႆႈၶႃႈ။
