တွၼ်ႈသိပ်းသီႇ
ဝၼ်းၼိုင်ႈ လိုၼ်းၼုမ်ႇဢၼ်ႁဵတ်းၵၢၼ်ယူႇတီႈလၢၼ်ႉ ၶၢႆတၢင်းၵိၼ်ယွႆႈၼၼ်ႉ လႆႈႁၼ်ၸဝ်ႈၶွင်လၢၼ်ႉ လူလိၵ်ႈၽိုၼ်ၶၢဝ်ႇၽိုၼ်ၼိုင်ႈသေ ၼႂ်းၼၼ်ႉသမ်ႉ မီးႁၢင်ႈၸွမ်ႇမိုဝ်း ဢၼ်မိူၼ်သၢႆၶေႃးႁွႆႈပၼ်လႅင်းဢွၼ်ႇၼၼ်ႉၼႆလႄႈ ပဵၼ်ဢၼ်ၸၼ်ၸႂ်မၼ်းမႃးယဝ်ႉ။ ၼႅတ်ႈလူဢၢၼ်ႇတူၺ်းၵႂႃႇ မိူဝ်ႈၼၼ်ႉ မၼ်းၵေႃႈလႆႈႁူႉဝႃႈ လႅင်းဢွၼ်ႇယင်းတိုၵ်ႉမီးပေႃႈမႄႈယူႇ၊ ပေႃႈမႄႈၶဝ်ၼၼ်ႉ ယွမ်းၸၢႆႇငိုၼ်းတင်းၼမ် တွၼ်ႈတႃႇႁႃလုၵ်ႈၶဝ်၊ လႆႈဝႃႈပေႃႈမႄႈၶဝ် တေပဵၼ်ၵူၼ်းဢၼ်မၢၵ်ႈမီးတေႉတေႉယဝ်ႉ။ ၶေႃႈမုၼ်းၵဵဝ်ႇလူၺ်ႈ လွင်ႈလုၵ်ႈဢွၼ်ႇ ဢၼ်ဝႃႈ ပေႃႈမႄႈၶဝ်ပဵၼ်ၽႂ်လႄႈ ၸိုဝ်ႈသင်ၼႆၼၼ်ႉတႄႉ ဢမ်ႇမီးပႃး ၵူၺ်းမီးၸွမ်ႇမိုဝ်းၼၼ်ႉဢၼ်လဵဝ်ၵူၺ်း လႄႈ ပၼ်ဝႆႉမၢႆၽူင်းႁႂ်ႈၵပ်းသိုပ်ႇၶဝ်ၵႂႃႇ ၵၼၼ်ႉၵူၺ်းယူႇ။
ၸၢတ်ႈပၢၼ်လိုၼ်းၼုမ်ႇၽွင်းၼၼ်ႉၵေႃႈ ဢမ်ႇလႆႈမီးသင်လႄႈ တႃႇလဵင်ႉလူလႅင်းဢွၼ်ႇၼၼ်ႉ လႆႈႁႃလဵင်ႉၵၼ်ၵႂႃႇ ၸွမ်းဝၼ်းလႂ်ဝၼ်းၼၼ်ႉၵူၺ်း၊ ႁဵတ်းႁႂ်ႈမၼ်းဝူၼ်ႉဢၢၼ်းတေဢဝ်လႅင်းဢွၼ်ႇ သူင်ႇပၼ်တီႈပေႃႈမႄႈၶဝ်ၵႂႃႇယူႇ၊ သင်ၶဝ်မီးပေႃႈမႄႈဢၼ်မီးငိုၼ်းၶမ်းတဵမ်ထူၼ်ႈ ၸၢတ်ႈပၢၼ်ၶဝ်ၵေႃႈ တေဢမ်ႇလႆႈမႃးယၢပ်ႇၽိုတ်ႇၸွမ်းမၼ်း ၼႆၼၼ်ႉယဝ်ႉ။
မိူဝ်ႈလိုၼ်းၼုမ်ႇတေသိုပ်ႇၽူင်းၼၼ်ႉ လႆႈႁၼ်ၼႃႈတွင်ႇတွင်ႇယုမ်ႉၵီႈဢွၼ်ႇ ပႆသိုင်ႉသၢင်ႉသိုင်ႉသၢင်ႉ ၶဝ်ႈမႃးႁႃမၼ်းၵမ်းလွႆးလွႆးလႄႈ ၶဝ်ႈၸုင်ယိပ်းဢဝ် မိုဝ်းမၼ်းသေ မိုဝ်းဢွၼ်ႇလဵၵ်ႉလဵၵ်ႉၶဝ်ၼၼ်ႉ ႁဵတ်းႁႂ်ႈပွႆႇၶဝ်ၵႂႃႇဢမ်ႇလႆႈယူႇယဝ်ႉ။ ၸွမ်းလူၺ်ႈလဵင်ႉလူၶဝ်မႃး ၸဵမ်မိူဝ်ႈၽႃႇတိၼ်ဢွၼ်ႇၶဝ် လႆႈသွင်ၼိဝ်ႉ ယင်းပႆႇမေႃတူင်ႉတူဝ်လႆႈႁင်းၵူၺ်း မိူဝ်ႈလဵဝ်ၵေႃႈ ၶဝ်သမ်ႉပေႃးမေႃပႆမႃးယဝ်ႉ။
ပေႃႈၵေႃႈဢမ်ႇမီးယဝ်ႉလူး သင်တေႁႂ်ႈလႅင်းဢွၼ်ႇ ၽၢတ်ႇမၼ်းၵႂႃႇထႅင်ႈၵေႃႉၼိုင်ႈ ဢမ်ႇႁူႉဝႃႈတေၸႂ်ႉၸၢတ်ႈပၢၼ်ယူႇၵႂႃႇၸိူင်ႉႁိုဝ်ယဝ်ႉလႄႈ မၼ်းၸင်ႇတႅပ်းတတ်း သိုပ်ႇလဵင်ႉလူလုမ်းလႃးတူၺ်းထိုင်လႅင်းဢွၼ်ႇၵႂႃႇ၊ ၶတ်းၸႂ်ႁႂ်ႈၶဝ် ပေႃးလႆႈယူႇလီ လႆႈၵိၼ်လႆႈၼုင်ႈမႃး တေႃႇထိုင်ဝၼ်းမိူဝ်ႈၼႆႉယူႇ။ တႄႇဢဝ်ဝၼ်းၼၼ်ႉမႃး သၢႆၶေႃးဢၼ်ႁွႆႈသႂ်ႇပၼ် တီႈလႅင်းဢွၼ်ႇယူႇတႃႇသေႇၼၼ်ႉ လႆႈထွတ်ႇဢွၵ်ႇသိမ်းဝႆႉ ယူႇယဝ်ႉ။
ဝၼ်းဢၼ်မၼ်းၵူဝ်လိူဝ်သေပိူၼ်ႈၼၼ်ႉၵေႃႈ မိူၼ်ၸမ်ႁွတ်ႈထိုင်မႃးလွႆးလွႆးယဝ်ႉ။ ယွၼ်ႉပိူဝ်ႈ သၢႆၶေႃးဢၼ်မၼ်းၵဵပ်းသိမ်းမႃးတၢင်းႁိုင်ၼၼ်ႉ လႆႈႁၢႆၵႂႃႇယဝ်ႉလူး၊ ၵူဝ်ဝႃႈ တေမီးၵူၼ်းမႃးဢဝ်လႅင်းဢွၼ်ႇ ၽၢတ်ႇယၢၼ်မၼ်းၵႂႃႇၼၼ်ႉယဝ်ႉ။ ယွၼ်ႉဝႃႈ လွင်ႈသၢႆၶေႃးၼႆႉ မၼ်းဢမ်ႇတွၼ်ႉလၢတ်ႈၼႄၽႂ်သေပွၵ်ႈ ပႃးၸဵမ်မူၺ်ႁွမ်ၵေႃႈ မၼ်းယင်းဢမ်ႇလႆႈလၢတ်ႈၼႄလူးၵွၼ်ႇ။ ၵူၼ်းၵေႃႉဢၼ် လၵ်ႉၶဝ်ႈႁိူၼ်းၼႆႉ မိူၼ်တေႁူႉလွင်ႈလႅင်းဢွၼ်ႇသေ ၸင်ႇလႆႈ လၵ်ႉသၢႆၶေႃးၵႂႃႇယဝ်ႉ၊ လိုၼ်းၼုမ်ႇၵေႃႈ ပဵၼ်ဢၼ်မႆႈၸႂ်လႅင်းဢွၼ်ႇ ၸႂ်ဢမ်ႇလီ ထိုင်တီႈၼွၼ်းပေႃးဢမ်ႇလပ်းတၢင်းၶိုၼ်းယူႇ။
ထိုင်မႃးထႅင်ႈဝၼ်းၼိုင်ႈ လိုၼ်းၼုမ်ႇ သူင်ႇလႅင်းဢွၼ်ႇၵႂႃႇႁူင်းႁဵၼ်းသေ လၢတ်ႈၵႂၢမ်းသင်ႇထိုင် သႅင်ႁိူၼ်းၼုမ်ႇၼၼ်ႉၵႂႃႇၼၵ်းၼၵ်းၼႃၼႃ ႁႂ်ႈတူၺ်းလႅင်းဢွၼ်ႇ ယႃႇပၼ်ၽၢတ်ႇသၢႆတႃ ၼႆယူႇ။
ၽွင်းၶၢဝ်းလိုဝ်ႈ လုၵ်ႈဢွၼ်ႇၶဝ် ဢွၼ်ၵၼ်ဢွၵ်ႇမႃးလဵၼ်ႈယူႇ ၼွၵ်ႈႁွင်ႈႁဵၼ်းၼၼ်ႉသေ လႅင်းဢွၼ်ႇၵေႃႈ ဢွၵ်ႇမႃးလဵၼ်ႈၵျေႃႇၸွမ်းပိူၼ်ႈယဝ်ႉ။ ယၢမ်းၼၼ်ႉ ၸင်ႇမီးမၢၵ်ႇၼင် ၼွၵ်ႈႁူင်းႁဵၼ်း ဝိုတ်ႉၶဝ်ႈမႃးတူၵ်းသႂ်ႇပႃႈၼႃႈ မၼ်းလႄႈ မၼ်းၵေႃႈ ဝၢႆႇတူၺ်းတၢင်းၼွၵ်ႈၼၼ်ႉ မိူၼ်ႁၼ်ၵူၼ်း တေပႂ်ႉဢဝ်မၢၵ်ႇၼင်ၼႆသေ ၼႅတ်ႈယိပ်းဢဝ်ၵႂႃႇပၼ်တီႈၽၵ်းတူႁူဝ်ႉယဝ်ႉ ယိုၼ်ႈပၼ်ၵူၼ်းၵေႃႉၼၼ်ႉၵႂႃႇ၊ ၵူၼ်းၵေႃႉၼၼ်ႉၵေႃႈ ယုမ်ႉတေႃႇမၼ်းသေ ၵွင်လင်ၵႂႃႇပႅတ်ႈလွႆးလွႆးယဝ်ႉ။
လိုၼ်းၼုမ်ႇ လႄႈ တင်းၵူၼ်းႁဵတ်းၵၢၼ်ၵေႃႈ ႁဵတ်းၵၢၼ်ၶဝ်ႈၵၼ်လႆႈလီသေ မိူၼ်ဝႃႈ ၵူၼ်းႁဵတ်းၵၢၼ်ၵမ်ႈၼမ် မီးလွင်ႈယုမ်ႇယမ်မၼ်းမႃးလိူဝ်ၵဝ်ႇယူႇယဝ်ႉ။ ၶႅၵ်ႇၼႂ်းလၢၼ်ႉၼၼ်ႉၵေႃႈ ၵိုၼ်းၶွၼ်ႈမႃးၶိုၼ်းယူႇ။
ၸိုၼ်ႈၶိူဝ်းဢမ်ႇလႆႈမႃးတီႈလၢၼ်ႉတၢင်းႁိုင် ယွၼ်ႉၵုမ်ႇၸွမ်းႁႃၵူၼ်းၼၼ်ႉယဝ်ႉ။ လိုၼ်းၼုမ်ႇၵေႃႈ မိူဝ်ႈဢမ်ႇလႆႈႁၼ်ၸိုၼ်ႈၶိူဝ်းၼႆ ၼင်ႇႁၢင်ႈမွင်းၶႂ်ႈႁႂ်ႈၶဝ်မႃးယူႇ။ ၽွင်းၶၢဝ်းၵၢင်ဝၼ်းၼႆၵေႃႈ ၼႂ်းၸႂ်ၼႆႉ ဝူၼ်ႉဝႃႈၶဝ်တေမႃးၵိၼ်ၶဝ်ႈဝၼ်းၼႆသေ လွမ်ငွၵ်ႈႁႃတူၺ်းယူႇ။ လၢႆဝၼ်းယဝ်ႉလူး လိုၼ်းၼုမ်ႇဢၼ်ဢၢၼ်းဢဝ်သိူဝ်ႈၶဝ် မႃးသူင်ႇၶိုၼ်းၼၼ်ႉ ၶဝ်သမ်ႉဢမ်ႇမႃးလႄႈ ၵႃႈလႆႈဢဝ်ဝႆႉၼႂ်းႁွင်ႈမၼ်းသေ တူၺ်းၶမ်ႈတူၺ်းၼႂ်တူၺ်းတၢင်ၼႃႈ ၸိုၼ်ႈၶိူဝ်းၵႂႃႇၵူၺ်းၼၼ်ႉယဝ်ႉ။
ဝၼ်းယဝ်ႉဝၼ်းပူၼ်ႉၵႂႃႇ ထိုင်မႃးဝၼ်းၼိုင်ႈ လႅင်းဢွၼ်ႇ ဢၼ်လူင်းႁူင်းႁဵၼ်းမႃးၼၼ်ႉ ႁူပ်ႉၺႃးၵူၼ်းၵေႃႉဢၼ်မၼ်းဢဝ် မၢၵ်ႇၼင်ပၼ်ၼၼ်ႉသေ ၵူၼ်းၵေႃႉၼၼ်ႉၵေႃႈ လႆႈတူင်ႉတၵ်ႉမၼ်းၵႂႃႇ
“မႂ်ႇသုင်ၼႃ..ၸၢႆးဢွၼ်ႇ”
“လုင်းမၢၵ်ႇၼင်!..”
“မႄႈၸၢႆးဢမ်ႇမႃးႁပ်ႉႁႃႉ..”
“မႃးပုၼ်ႉယဝ်ႉ..” လႆႈႁၼ်လိုၼ်းၼုမ်ႇလႅၼ်ႈလူင်မႃးယူႇ။
လိုၼ်းၼုမ်ႇဢၼ်လႆႈႁၼ်ၽူႈၸၢႆးၵေႃႉၼၼ်ႉၵေႃႈ မိုင်လူင်ၵႂႃႇသေ
“ပီႈၸွမ်!!.. ႁဵတ်းႁိုဝ်မႃးမီးယူႇတီႈၼႆႈၶႃႈလႃႇ”
ၸၢႆးၸွမ်ပဵၼ်ၼွင်ႉၸၢႆးပီႈၶမ်း လႄႈ ၶႃသွင်ၵေႃႉပီႈၼွင်ႉ မႃးႁဵတ်းၵၢၼ်ၼႂ်းဝဵင်းလူင် ႁိုင်ၼႃႇယဝ်ႉသေ ပေႃးဝႃႈမၼ်းမိူဝ်းၸႂ်းႁိူၼ်းၸိူဝ်းၼႆႉၼႆ တေၵႆႉၵႆႉမႃးတီႈလၢၼ်ႉ လိုၼ်းၼုမ်ႇၶဝ်ယူႇတႃႇသေႇ မိုတ်ႈၵၼ်တင်းပေႃႈလိုၼ်းၼုမ်ႇသေဢမ်ႇၵႃး မိုတ်ႈၵၼ်ပႃးတင်းလိုၼ်းၼုမ်ႇယူႇ။ ဝၢႆးသေလိုၼ်းၼုမ်ႇမီးလုၵ်ႈယဝ်ႉၼႆ မၼ်းၵေႃႈ တေၵႆႉၵႆႉသိုဝ်ႉ ၼူမ်းသိုဝ်ႉၶူဝ်းၶွင်လုၵ်ႈဢွၼ်ႇၸိူဝ်းၼႆႉ မႃးတွၼ်ႈယဝ်ႉ။ ဝၢႆးသေပေႃႈဢမ်ႇယူႇယဝ်ႉ မၼ်းၵေႃႈ ယင်းၵႆႉၵႆႉမႃးၸႂ်းၶႃယူႇတႃႇသေႇ လိုၼ်းၼုမ်ႇၵေႃႈ ၼပ်ႉယမ်မၼ်းမိူၼ်ပဵၼ်ပီႈၸၢႆးၵေႃႉၼိုင်ႈၼၼ်ႉ ယဝ်ႉ။
သၢႆလႅင်းၵေႃႈ ႁူႉၵေႃႉဢၼ်လမ်းလိုၼ်းၼုမ်ႇ ၼႂ်းဝၼ်းၼၼ်ႉယဝ်ႉလႄႈ ၵေႃႉၼိုင်ႈၼၼ်ႉ ထုၵ်ႇၸၢင်ႈမႃး ႁႂ်ႈႁဵတ်းႁၢႆႉလိုၼ်းၼုမ်ႇၼႆသေ လႆႈၵုမ်းၶင်ၸွပ်ႇထၢမ်ၶဝ်ဝႆႉယူႇ။ ထႅင်ႈၵေႃႉၼိုင်ႈသမ်ႉ ပဵၼ်ၵေႃႉလဵဝ်ၵၼ်တင်း ၵူၼ်းၵေႃႉဢၼ် လၵ်ႉၶဝ်ႈႁိူၼ်းလိုၼ်းၼုမ်ႇၼၼ်ႉ ၼႆယဝ်ႉ။ ၸွမ်းၼင်ႇလႆႈသင်ႇႁႂ်ႈ ၵူၼ်းပႂ်ႉတူၺ်းၸွမ်း လွင်ႈႁဵတ်းသၢင်ႈၵူၼ်းၵေႃႉၼၼ်ႉၼၼ်ႉ ႁူႉဝႃႈဝၼ်းမိူဝ်ႈၼႆႉ ၵူၼ်းၵေႃႉၼၼ်ႉ မႃးႁူပ်ႉလိုၼ်းၼုမ်ႇၼႆသေ ၸိုၼ်ႈၶိူဝ်းၼၼ်ႉၵေႃႈ မွင်းလၢႆးငၢၼ်းၵူၺ်း ၼႅတ်ႈလုၵ်ႉဢွၵ်ႇႁွင်ႈ ႁေႃႈလူတ်ႉၵႂႃႇဝႆးဝႃႈဝႆး ယူႇယဝ်ႉ။
ၸၢႆးၸွမ်ၵေႃႈ ယွၼ်းဢုပ်ႇလၢတ်ႈတေႃႇလိုၼ်းၼုမ်ႇပဵၼ်ၵၢၼ်သုၼ်ႇတူဝ်ၼႆယူႇ။ လိုၼ်းၼုမ်ႇ ႁႂ်ႈလႅင်းဢွၼ်ႇ ပႂ်ႉဝႆႉတီႈႁိူၼ်းသႅင်ႁိူၼ်းၼုမ်ႇသေ ဢွၼ်ၵၼ်ၵႂႃႇတီႈလၢၼ်ႉၵေႃႇၾီႇႁိမ်းႁွမ်းၼၼ်ႉယဝ်ႉ။
“ဢမ်ႇလႆႈထူပ်းၵၼ်ႁိုင်ယဝ်ႉ…ပဵၼ်ၸိူင်ႉႁိုဝ်လႃႇ”
“လီယူႇၶႃႈ..ပီႈၶႃႈလူး..ဢမ်ႇလႆႈႁဵတ်းၵၢၼ်ၸွမ်းၵၼ်တင်းပီႈၶမ်းယဝ်ႉၶႃႈႁႃႉ”
“ဢွၵ်ႇၵၢၼ်ၵႂႃႇႁိုင်ၼႃႇယဝ်ႉ..မိူဝ်ႈလဵဝ်ၵေႃႈ..ႁဵတ်းၵၢၼ်ႁေႃႈလူတ်ႉတေႃႉၵုၼ်ႇပၼ်ပိူၼ်ႈဝႃႇ” ယဵၼ်ၵႂႃႇၵႅပ်ႉၼိုင်ႈသေ သိုပ်ႇလၢတ်ႈထႅင်ႈ
“မႃးထိုင်ဝၼ်းမိူဝ်ႈၼႆႉလႆႈ.. သူၵေႃႈ..တေထူပ်းလွင်ႈယၢပ်ႇၽိုတ်ႇမႃး..ဢမ်ႇဢေႇၼၼ်ႉယဝ်ႉ..”
“တေလႆႈဝႃႈၼၼ်ႉယူႇၶႃႈ”
“လႅင်းဢွၼ်ႇ..ၵေႃႉယႂ်ႇမႃးယဝ်ႉၵေႃႈ ပဵၼ်လုၵ်ႈဢွၼ်ႇဢၼ်လႅတ်းသႅဝ်းတေႉယဝ်ႉ”
“ၸႂ်ႈယဝ်ႉၶႃႈ.. လႅတ်းသႅဝ်းဢမ်ႇမိူၼ်ၽႂ်ၼၼ်ႉၶႃႈယဝ်ႉ ဢမ်ႇႁူႉဝႃႈလႆႈမႃးတီႈၽႂ်”
“တေပဵၼ်ယွၼ်ႉ..သူမေႃလဵင်ႉလူၶဝ်မႃးၼၼ်ႉၼႃႇ”
ၸၢႆးၸွမ်ယဵၼ်ၵႂႃႇၵမ်းၼိုင်ႈယဝ်ႉ ဢဝ်သၢႆၶေႃးလိုၼ်းၼုမ်ႇ ဢၼ်ႁၢႆၵႂႃႇၼၼ်ႉ ဢွၵ်ႇမႃးပၼ်သေ
“ႁဝ်းယွမ်းၼွမ်းယူႇၼႃႈလိုၼ်းၼုမ်ႇ..”
“ၼႆႉပီႈ!!.. ပီႈႁူႉၸၵ်းသၢႆၶေႃးသဵၼ်ႈၼႆႉသေႁႃႉ”
“ဢိုမ်ႈ!.. ပီႈပဵၼ်ၵူၼ်းဢဝ်မၼ်းၵႂႃႇၵူၺ်း”
လိုၼ်းၼုမ်ႇၵေႃႈ တင်းတူၵ်းၸႂ် တင်းၸႂ်မႆႈမိူဝ်ႈလဵဝ်ၵၼ်မႃး သမ်ႉပေႃးဢမ်ႇၸၢင်ႈလၢတ်ႈသင်လႆႈ ၼၼ်ႉယဝ်ႉ။
“ႁဝ်းယွမ်းၼွမ်းယူႇ… ႁဝ်းၵေႃႈႁူႉယူႇဝႃႈသူၼၼ်ႉ..တုၵ်ႉၶတၢၼ်ႇႁိုဝ် ဢၼ်လႆႈလဵင်ႉလူၶဝ်မႃး ႁဝ်းဝူၼ်ႉၽိတ်းဢၼ်လႆႈႁဵတ်းၵႂႃႇလႄႈ ၸင်ႇလႆႈဢဝ်မႃးပၼ်သူၶိုၼ်းၼၼ်ႉယဝ်ႉ.. တွၼ်ႈတႃႇ ၸွႆႈၵႃႈယူတ်းယႃလုၵ်ႈႁဝ်း ဢၼ်ၼွၼ်းယူႇတီႈႁူင်းယႃၼၼ်ႉ ၸမ်ပဵၼ်လူဝ်ႇၸႂ်ႉငိုၼ်းလႄႈ မၼ်းၵေႃႈ..ပဵၼ်တၢင်းလိူၵ်ႈ ဢၼ်ႁဝ်းတေၸွႆႈၶဝ်လႆႈ ႁဝ်းဝူၼ်ႉဝႃႈ ပေႃးဢဝ်လႅင်းဢွၼ်ႇၵႂႃႇပၼ်ပေႃႈမႄႈၶဝ်ၶိုၼ်းၼႆ တေမီးငိုၼ်းၸွႆႈထႅမ်လုၵ်ႈႁဝ်း ႁႂ်ႈပေႃးတိုၼ်ႇၶိုၼ်ႈမႃးလႆႈ ၵူၺ်းၵႃႈ လီသေလၢႆ မိူဝ်ႈႁဝ်းမီးတၢင်းမုင်ႈမွင်းမႃးၼၼ်ႉ ၶဝ်ၵေႃႈလႆႈလူႉသဵင်ႈတၢႆၵႂႃႇယဝ်ႉ”
လိုၼ်ၼုမ်ႇၼၼ်ႉၵေႃႈ မိူၼ်ႇမိုင်လူင်ၵႂႃႇၸွမ်းၵႂၢမ်းလၢတ်ႈၶဝ်ၼၼ်ႉသေ ႁဵတ်းသင်ပေႃးဢမ်ႇပဵၼ် လၢတ်ႈသင်ပေႃးဢမ်ႇလႆႈမႃးယဝ်ႉ မိုဝ်းသွင်ၶွၼ်း တဝ်ႉၽိူၼ်ထွၵ်ႈႁူဝ်မၼ်းဝႆႉလႄႈ ထူၺ်ႈၸႂ်လူင်ၵမ်းယဝ်ႉၵမ်းသေ
“လီသေလၢႆ..ၼႆႁႃႉ ယွမ်းၼွမ်းၼႆႁႃႉ ဝူၼ်ႉၽိတ်းၼႆႁႃႉ ပေႃးလုၵ်ႈပီႈဢမ်ႇတၢႆပႅတ်ႈ ပီႈတေမႃးလၢတ်ႈၸိူင်ႉၼႆယူႇႁႃႉ” လိုၼ်းၼုမ်ႇၵမ်တႃမိုဝ်းသမ်ႉပေႃးၵႅၼ်ႇၵႅၵ်းၵႅၵ်းလူင်ဝႆႉယဝ်ႉ။
“ပီႈမီးသုၼ်ႇသင်လႄႈ..တေလႆႈဢဝ်လုၵ်ႈဢွၼ်ႇ ဢၼ်ၶႃႈလဵင်ႉလူမႃးၼၼ်ႉ မႃးလႅၵ်ႈဢဝ်ၵႃႈယူတ်းယႃလုၵ်ႈပီႈၼၼ်ႉလႃႇ ပီႈပဵၼ်ၵူၼ်းလဵင်ႉလူၶဝ်ႁႃႉ ဢမ်ႇၸႂ်ႈလူး.. ဢမ်ႇထၢင်ႇဝႃႈပီႈတေပဵၼ်ၵူၼ်းၸိူင်ႉၼႆ ၶႃႈပဵၼ်ၵူၼ်းလဵင်ႉလူၶဝ်ဢေႃႈ သမ်ႉဝႃႈ..ၶႃႈဢမ်ႇလႆႈၵိူတ်ႇၶဝ်မႃးၵေႃႈ ၶႃႈႁၵ်ႉၶဝ်မိူၼ်လုၵ်ႈၶႃႈၼၼ်ႉယဝ်ႉ.. မိူၼ်ပီႈ..ႁၵ်ႉလုၵ်ႈပီႈၼၼ်ႉယဝ်ႉ ယွၼ်ႉၼၼ် ပီႈဢမ်ႇထုၵ်ႇလီပဵၼ်ပေႃႈၽႂ်ၼၼ်ႉ..လီလိူဝ်ပိူၼ်ႈယဝ်ႉ”
ၸၢႆးၸွမ်ၼၼ်ႉၵေႃႈ မိူၼ်ၶေႃႈၵႂၢမ်းလိုၼ်းၼုမ်ႇၼၼ်ႉ တေတိူဝ်ႉလူမ်းၸႂ်လမ်မႃးမိူၼ်ၵၼ်လႄႈ
“လုၵ်ႈဢွၼ်ႇ..ၶဝ်ၵေႃႈမီးပေႃႈမႄႈဢိူဝ်ႈ ပေႃႈမႄႈဢၼ်ၵိူတ်ႇၶဝ်မႃးၼၼ်ႉ ႁၵ်ႉလုၵ်ႈၶဝ်..မိူၼ်သူၼၼ်ႉ..မိူၼ်ၵၼ် သူၵေႃႈယႃႇႁၼ်သုၼ်ႇတူဝ်ၼႃႇလႄႈ ၸိူင်ႉႁိုဝ်ၵေႃႈ..ၶဝ်ၼၼ်ႉဢမ်ႇၸႂ်ႈလုၵ်ႈသူယူႇယဝ်ႉ”
ယၢမ်းၼၼ်ႉ ၸိုၼ်ႈၶိူဝ်းဢၼ်ၸွမ်းႁႃလိုၼ်းၼုမ်ႇၼၼ်ႉၵေႃႈ ႁၼ်လိုၼ်းၼုမ်ႇ ဢုပ်ႇဢူဝ်းၵၼ်တင်းၽူႈၸၢႆးၵေႃႉၼၼ်ႉယူႇၼႆလႄႈ ပဵၼ်ဢၼ်မႆႈၸႂ်ၼႃႇသေ ႁိပ်ႈၼႅတ်ႈၶဝ်ႈၼႂ်းလၢၼ်ႉၵႂႃႇယဝ်ႉ၊ လိူၵ်ႈလိူၵ်ႈသမ်ႉ ႁၼ်မႅၼ်ႈသၢႆၶေႃး ဢၼ်မၼ်းၸွမ်းႁႃယူႇၼၼ်ႉ မီးၼိူဝ်ၽိူၼ်သေ ယိပ်းဢဝ်မႃးတူၺ်းယဝ်ႉ
“သၢႆၶေႃး!! ႁဵတ်းႁိုဝ်မႃးမီးယူႇတီႈၼႆႈလႃႇ!” ပဵၼ်ဢၼ်ၶႂ်ႈႁူႉၶႂ်ႈႁၼ်မႃးၵမ်းလဵဝ်၊ လူၺ်ႈတီႈဢမ်ႇတၼ်းႁူႉဝႃႈ ၸၢႆးၸွမ်ၼၼ်ႉလုၵ်ႉၵႂႃႇပႅတ်ႈမိူဝ်ႈလႂ်။
“သူ.. ႁူႉၸၵ်းသၢႆၶေႃးသဵၼ်ႈၼႆႉသေၶႃႈႁႃႉ..”
“ပဵၼ်ၶွင်သူႁႃႉ!!..”
“ဢေႃႈ..”
လၢၵ်ႈဢဝ်လိုၼ်းၼုမ်ႇဢွၵ်ႇလၢၼ်ႉၵႂႃႇသေ ၵမ်ပၼ်ၶေႃႈမိုဝ်းလိုၼ်းၼုမ်ႇၼၼ်ႉ သမ်ႉပေႃးၵႅၼ်ႇလူင်ဝႆႉ မိူၼ်လိူတ်ႈတေဢမ်ႇလႆၼၼ်ႉယဝ်ႉ။ လိုၼ်းၼုမ်ႇၵေႃႈ ၸဵပ်းၼႃႇယဝ်ႉသေ တုၵ်းယွၼ်းႁႂ်ႈမၼ်းပွႆႇၵႂႃႇယူႇ၊ မိူဝ်ႈႁွတ်ႈထိုင်တီႈ ဢၼ်ဢမ်ႇပေႃးမီးၵူၼ်းၼၼ်ႉၵေႃႈ ၶုၼ်ႇပွႆႇလိုၼ်းၼုမ်ႇ သမ်ႉပေႃးဝူင်လူင်ၵႂႃႇယဝ်ႉ။ သၢႆတႃဢၼ်လီၵူဝ်မၼ်းၼၼ်ႉ ယၵ်ႉတူၺ်းၸူးလိုၼ်းၼုမ်ႇ မိူၼ်တေၵိၼ်ၼိူဝ်ႉမၼ်းၵႂႃႇလႄႈ ယိပ်းဢဝ်တင်းႁူဝ်မႃႇလိုၼ်းၼုမ်ႇၼၼ်ႉသွင်ၶွၼ်သေ
“လႅင်းဢွၼ်ႇ!! ဢမ်ႇၸႂ်ႈလုၵ်ႈသူၸွင်ႇၸႂ်ႈ!.. လၢတ်ႈႁဝ်းမႃးလႄႈ!..”
ၶိုၼ်ႈသဵင်ႁိုတ်းသႂ်ႇလိုၼ်းၼုမ်ႇ သမ်ႉပေႃးၽႅတ်းသၼ်ႇလူင်ၵႂႃႇ ဢမ်ႇတွၼ်ႉယၢမ်ႈႁၼ် ၶဝ်ပဵၼ်ၸိူင်ႉၼႆသေပွၵ်ႈလႄႈ မၼ်းသမ်ႉပေႃးၶႂ်ႈၵူဝ်ၶဝ်မႃးယဝ်ႉ။
လိုၼ်းၼုမ်ႇၵေႃႈ ႁိုဝ်တေႁတ်းတွပ်ႇၵႂႃႇၵမ်းသိုဝ်ႈလႆႈ
“ၸႂ်ႈဢမ်ႇၸႂ်ႈလုၵ်ႈႁဝ်း..မၼ်းၵဵဝ်ႇသင်ၵၼ်တၢင်းသူၶႃႈလႃႇ..”
ၸိုၼ်ႈၶိူဝ်းၼၼ်ႉၵေႃႈ သုတ်ႉတူဝ်ၶဝ်ႈၸမ်လိုၼ်းၵႂႃႇထႅင်ႈလႄႈ ဢဝ်သၢႆၶေႃးသဵၼ်ႈၼၼ်ႉ ၼႄပႃႈၼႃႈလိုၼ်းၼုမ်ႇၵႂႃႇယူႇ။
“ၼႆႉ! မၼ်းၼႄသၢၵ်ႈသေႇလႆႈယဝ်ႉဝႃႈ လုၵ်ႈဢွၼ်ႇၵေႃႉၼၼ်ႉဢမ်ႇၸႂ်ႈလုၵ်ႈသူ”
လိုၼ်းၼုမ်ႇၵမ်တႃမိုဝ်းသမ်ႉပေႃးၵႅၼ်ႇၵႅၵ်းၵႅၵ်းယဝ်ႉ။
“ၼႆႉမၼ်းပဵၼ်လွင်ႈၼႃႈႁိူၼ်းႁဝ်း မၼ်းဢမ်ႇၵဵဝ်ႇၶွင်ႈၵၼ်တင်းသူၶႃႈၼႃ”
သၢႆတႃမၼ်းၵူမ်ႈလူင်းၸူးၸမ်လိုၼ်းၼုမ်ႇ ဢၼ်တေႃႇၼႃႈၸူးမၼ်းၼင်ႇဢမ်ႇၵူဝ်ၼၼ်ႉသေ
“ႁဵတ်းသင်လႄႈဝႃႈဢမ်ႇၵဵဝ်ႇလႃႇ.. သၢႆၶေႃးသဵၼ်ႈၼႆႉ..ၼႄႁႂ်ႈဝႃႈၶဝ်ၼၼ်ႉ..ပဵၼ်လုၵ်ႈႁဝ်းယဝ်ႉ!!”
ဢဝ်လိုၼ်းၼုမ်ႇ သမ်ႉပေႃးတူၵ်းၸႂ်မႃးယူႇယဝ်ႉ၊ ငိၼ်းပိူၼ်ႈလၢတ်ႈ လွင်ႈၶဝ်တင်းၼမ်တင်းလၢႆ ဢမ်ႇတွၼ်ႉငိၼ်းဝႃႈ ၶဝ်တေႇၼႃႈႁိူၼ်းမီးလုၵ်ႈသေပွၵ်ႈလူး။ မိူဝ်ႈလႆႈငိၼ်းၸိူင်ႉၼၼ် လၢတ်ႈၵႂၢမ်းပေႃးဢမ်ႇၶႂ်ႈဢွၵ်ႇယဝ်ႉ။
“တေပဵၼ်လုၵ်ႈသူလႆႈၸိူင်ႉႁိုဝ်ၶႃႈ! ယွၼ်ႉသၢႆၶေႃးသဵၼ်ႈလဵဝ်..ၵေႃႈဝႃႈပဵၼ်လုၵ်ႈသူၶႃႈယဝ်ႉႁႃႉ ဢမ်ႇၸႂ်ႈဝႃႈ..ပေႃႈမႄႈလုၵ်ႈဢွၼ်ႇ ဢၼ်မီးသၢႆၶေႃးၸိူင်ႉၼႆ ၸွမ်ႇမိုဝ်းၸိူင်ႉၼႆ တေပဵၼ်လုၵ်ႈသူမူတ်းၶႃႈၼႄႇ ပဵၼ်သင်လႄႈ..တေလႆႈဝူၼ်ႉဝႃႈ လုၵ်ႈႁဝ်းၼၼ်ႉ..ပဵၼ်လုၵ်ႈသူၶႃႈလႃႇ”
“သမ်ႉဝႃႈ..တေမီးၵူၼ်းႁဵတ်းဢွၵ်ႇမႃး ႁႂ်ႈမၼ်းမိူၼ်ၵႃႈႁိုဝ်ၵေႃႈ ဢမ်ႇမီးဢၼ်ႁဵတ်းဢွၵ်ႇမႃးႁႂ်ႈမိူၼ်မၼ်းလႆႈ ယွၼ်ႉမၼ်းဢမ်ႇၸႂ်ႈ ၶူဝ်းၶွင်ဢၼ်ႁဵတ်းၶၢႆၵၼ်လႆႈငၢႆႈငၢႆႈ ဢမ်ႇၸႂ်ႈၶူဝ်းၶွင်ဢၼ်ႁႃသိုဝ်ႉလႆႈ ၸွမ်းၵၢတ်ႇၸိူဝ်းၼၼ်ႉၵူၺ်း. ႁဝ်းတွင်းလႆႈလီယူႇဝႃႈ ၸွမ်ႇမိုဝ်းသဵၼ်ႈၼႆႉ ပဵၼ်ၶွင်လုၵ်ႈႁဝ်း ၽၢႆႇတၢင်းၼႂ်းမၼ်းၼၼ်ႉ မီးႁၢင်ႈမွၵ်ႇမၼ်းမူၺ်ဝႆႉယူႇ..”
လိုၼ်းၼုမ်ႇၼၼ်ႉၵေႃႈ မိူၼ်တေၾၢင်ႉမႅၼ်ႈၵူၺ်းလႄႈ မီးႁၢင်ႈမွၵ်ႇမၼ်းမူၺ် လဵၵ်ႉလဵၵ်ႉဢွၼ်ႇဝႆႉတေႉယူႇယဝ်ႉ။
လုၵ်ႈၼွင်ႉၸိုၼ်ႈၶိူဝ်းၼၼ်ႉၵေႃႈ ၺွပ်းလႆႈၸၢႆးၸွမ်သေ လႆႈလွင်ႈလႆႈတၢင်းမၼ်းယဝ်ႉ မႃးလၢႆးငၢၼ်းတီႈၸိုၼ်ႈၶိူဝ်းၵႂႃႇဝႃႈ လုၵ်ႈလိုၼ်းၼုမ်ႇၼၼ်ႉ ပဵၼ်လုၵ်ႈၸိုၼ်ႈၶိူဝ်း ၼႆယူႇ။ လိုၼ်းၼုမ်ႇဢၼ်ငိၼ်းၸိူင်ႉၼၼ်ၵေႃႈ ၼင်ႇႁၢင်ႈၶႃမၼ်းၼၼ်ႉ ဢမ်ႇမီးႁႅင်းသေဢိတ်းယဝ်ႉ ၼင်ႈလူမ်ႉလူင်းၵႂႃႇတီႈၼၼ်ႈၵမ်းလဵဝ်။
“မၼ်းဢမ်ႇၸႂ်ႈ… ၶဝ်ပဵၼ်လုၵ်ႈႁဝ်း… ၶဝ်ပဵၼ်လုၵ်ႈႁဝ်းဢိူဝ်ႈ..” ဢဝ်မၼ်း သမ်ႉပေႃးဢမ်ႇမီးသတိသေဢိတ်းယူႇယဝ်ႉ။
ၸိုၼ်ႈၶိူဝ်းဢၼ်ႁူႉၸိူင်ႉၼၼ်ၵေႃႈ ႁႂ်ႈဢဝ်တူဝ်လိုၼ်းၼုမ်ႇ ၵႂႃႇသူင်ႇပၼ်ၽူႈမီးပုၼ်ႈၽွၼ်းၶဝ် တေဢၢၼ်းဢဝ်တၢင်းၽိတ်း ႁႂ်ႈထိုင်တီႈသုတ်း ၼႆယူႇ။ ၸိုၼ်ႈၶိူဝ်း ဢၼ်ႁၼ်ၸၢႆးၸွမ်ၼၼ်ႉၵေႃႈ ႁႂ်ႈဢဝ်တူဝ်မၼ်းၵႂႃႇၸွမ်းယဝ်ႉ ၵွပ်ႈဝႃႈ မၼ်းလီထၢင်ႇပိူင်ႈ ဢၼ်ႁူႉဝႃႈလႅင်းဢွၼ်ႇပဵၼ်လုၵ်ႈၽႂ်၊ လိူဝ်သေၼၼ်ႉ မၼ်းသမ်ႉပဵၼ်ၵူၼ်းဢၼ် ယၢမ်ႈႁဵတ်းၵၢၼ်တီႈႁိူၼ်းၸိုၼ်ႈၶိူဝ်း မိူဝ်ႈဢွၼ်တၢင်းထႅင်ႈႁေ မၼ်းၼၼ်ႉလႅပ်ႈတေၵဵဝ်ႇၶွင်ႈၸွမ်း လွင်ႈလၵ်ႉလုၵ်ႈဢွၼ်ႇယူႇဢမ်ႇႁၢင်ႉ ၼႆယဝ်ႉ။
လႅင်းဢွၼ်ႇဢၼ်မွင်းပႂ်ႉလိုၼ်းၼုမ်ႇၼၼ်ႉၵေႃႈ မိူဝ်ႈႁၼ်လူတ်ႉၸိုၼ်ႈၶိူဝ်းၼၼ်ႉ လွမ်မုင်ႈမွင်းဝႃႈ လိုၼ်းၼုမ်ႇတေမႃးသေ ၼႅတ်ႈဢွၵ်ႇမႃးငွၵ်ႈတူၺ်းယူႇ။ ၵူၺ်းသမ်ႉဢမ်ႇႁၼ်လိုၼ်းၼုမ်ႇမႃးလႄႈ ႁၼ်ၸိုၼ်ႈၶိူဝ်းၼၼ်ႉ ပႆမႃးၸူးမၼ်းလွႆးလွႆးသေ ၵွတ်ႇဢဝ်မၼ်းၵႂႃႇ ထိုင်တီႈ မၼ်းပေႃးဢမ်ႇတၼ်းတင်ႈတူဝ်ယူႇယဝ်ႉ။
“လုၵ်ႈ…”
ၼမ်ႉတႃၵေႃႉပဵၼ်ပေႃႈ မိူဝ်ႈလႆႈႁၼ်လုၵ်ႈၸၢႆးၼၼ်ႉၵေႃႈ လႆယမ်းဢွၵ်ႇမႃးယူႇ။ လႅင်းဢွၼ်ႇၼၼ်ႉတႄႉ တူဝ်ၶႅင်လူင်ၵႂႃႇၼင်ႇဢမ်ႇႁူႉလွင်ႈသင်ၼၼ်ႉယဝ်ႉ။
“ပွၵ်ႈမိူဝ်းၸွမ်းပေႃႈလႄႈ..ႁဝ်းမိူဝ်းႁိူၼ်းႁဝ်း”
“မႄႈၸၢႆးယင်းပႆႇမႃးလူး…”
“ၽူႈယိင်းၵေႃႉၼၼ်ႉ.. ဢမ်ႇၸႂ်ႈမႄႈၸၢႆးၼႃ..ပွၵ်ႈမိူဝ်းႁိူၼ်းႁဝ်းလႆႈယဝ်ႉ”
လႅင်းဢွၼ်ႇၼၼ်ႉၵေႃႈ မိူဝ်ႈငိၼ်းၸိုၼ်ႈၶိူဝ်း ႁွင်ႉလိုၼ်းၼုမ်ႇၸိူင်ႉၼၼ် ဢီးမၼ်းဢွၵ်ႇၵႂႃႇပႅတ်ႈၵမ်းလဵဝ်ယဝ်ႉ။
“ဢမ်ႇ!! ၸၢႆးဢမ်ႇမိူဝ်း! ၸၢႆးပႂ်ႉမႄႈမႃးႁပ်ႉမိူဝ်းၵူၺ်း”
“မႄႈလုၵ်ႈဢမ်ႇပွၵ်ႈမႃးယဝ်ႉၼႃႈ တေဢမ်ႇပွၵ်ႈမႃးႁႃလုၵ်ႈယဝ်ႉ”
“ဢမ်ႇၸႂ်ႈ! မႄႈလၢတ်ႈဝႃႈတေမႃးႁပ်ႉၸၢႆးၼႆ”
“ၶဝ်လၢတ်ႈပေႃႈဝႃႈ တေဢမ်ႇမႃးႁပ်ႉၸၢႆးယဝ်ႉ ႁဝ်းမိူဝ်းႁိူၼ်းႁဝ်းၼႃလုၵ်ႈ”
ၸိုၼ်ႈၶိူဝ်းၼၼ်ႉၵေႃႈ ဢုမ်ႈႁွပ်ႇဢဝ်လႅင်းဢွၼ်ႇၼၼ်ႉမိူဝ်းႁိူၼ်းၵႂႃႇယဝ်ႉ။
သႅင်ႁိူၼ်းၼုမ်ႇၼၼ်ႉၵေႃႈ မိူဝ်ႈႁူႉဝႃႈ လိုၼ်းၼုမ်ႇထုၵ်ႇတိၺွပ်းၵႂႃႇတီႈၶွၵ်ႈၶင်ၼႆ ႁိပ်ႈၼႅတ်ႈၵႂႃႇၸူးၵမ်းလဵဝ်ယဝ်ႉ။
လိုၼ်းၼုမ်ႇဢၼ်ၼင်ႈမိူၼ်ႇမိုင် ဢမ်ႇသူၼ်ၸႂ်ၽႂ်ၼၼ်ႉၵေႃႈ ပွႆႇၼမ်ႉတႃမၼ်း လႆယွႆႉလူင်းၵႅမ်ႈသမ်ႉပေႃးယမ်းလူင်ၵႂႃႇမူတ်း။ ၼႂ်းဢူၵ်းၼႂ်းၸႂ်ၸဵပ်းၵႅၼ်းၼႃႇ ႁူဝ်ၸႂ်လိူတ်ႇမႆႈမိူၼ်တေတႅၵ်ႇလႅဝ်ၵႂႃႇ ႁႅင်းတူဝ်ႁႅင်းၸႂ်ၼၼ်ႉ ႁၢႆၵႂႃႇတၢင်းလႂ်မူတ်းၵေႃႈဢမ်ႇႁူႉ တႃႇတေၸွႆႈတင်ႈတူဝ် ပူၵ်းတိုၼ်ႇသတိၶိုၼ်း မႃးၵူၺ်းၵေႃႈ ဢမ်ႇပဵၼ်လႆႈယဝ်ႉလႄႈ ပွႆႇတူဝ်ပွႆႇၸႂ်မၼ်းၵႂႃႇ ၸွမ်းတၢင်းဝူၼ်ႉမၼ်းၼၼ်ႉယူႇ။
လုၵ်ႈဢွၼ်ႇဢၼ်ႁၵ်ႉသုတ်းႁူဝ်ၸႂ် လုၵ်ႈဢၼ်ပဵၼ်ၵူႈလွင်ႈၼႂ်းၸၢတ်ႈပၢၼ်၊ ဢၼ်မီးၵႃႈၶၼ်လိူဝ်ပိူၼ်ႈ ၼႂ်းၸၢတ်ႈပၢၼ်မၼ်းၼၼ်ႉ ထုၵ်ႇပိူၼ်ႈဢဝ်ၵႂႃႇယဝ်ႉလူး။ ယိုင်ႈဝူၼ်ႉၵေႃႈ ယိုင်ႈႁၼ်ႁၢင်ႈၼႂ်းဝၼ်းလင်ၼၼ်ႉ ၸႅင်ႈလႅင်းမႃး တႄႇၸဵမ်မိူဝ်ႈထူပ်းႁၼ်ၶဝ် လႆႈလဵင်ႉလူလုမ်းလႃးၶဝ်မႃး ၸဵမ်မိူဝ်ႈၶဝ်ယင်းတိုၵ်ႉယူႇၼႂ်းၽႃႈဢွမ်ႈ၊ တူဝ်ၶႅင်မေႃၶုပ်ႉမေႃၵၢၼ်း၊ မေႃပႆမေႃလႅၼ်ႈ၊ မေႃလၢတ်ႈမေႃၸႃ မေႃႁူႉမေႃႁၼ် တူဝ်ဢွၼ်ႇလဵၵ်ႉလဵၵ်ႉၶဝ် ဢၼ်ႁွပ်ႇဢုမ်ႈလႆႈမဝ်မဝ်ၼၼ်ႉၵေႃႈ ယႂ်ႇသုင်ၶိုၼ်ႈမႃး ၸေးသမ်ႉပေႃးဢမ်ႇၶႂ်ႈပေႉယဝ်ႉၼၼ်ႉ ႁဵတ်းႁႂ်ႈမၼ်းယုမ်ႉၶူဝ်ဢွၵ်ႇမႃးယူႇ။
ဢမ်ႇဝႃႈတေထူပ်းလွင်ႈယၢပ်ႇၽိုတ်ႇသင်မႃးၵေႃႈယဝ်ႉ ၶဝ်ၼၼ်ႉပဵၼ်ၵေႃႉဢၼ် ၸွႆႈပူၵ်းတိုၼ်ႇႁႂ်ႈမီးႁႅင်းမႃး၊ ၶၢဝ်းယၢမ်းဢၼ်လႆႈယူႇၸွမ်းၶဝ် မၼ်းပဵၼ်ၶၢဝ်းယၢမ်း ဢၼ်မီးၵႃႈၶၼ်ၼႃႇလႄႈ ၶဝ်တင်းပဵၼ်ႁႅင်းၸႂ်၊ ပဵၼ်ၵေႃႉသႄႈ ပဵၼ်ၵူႈလွင်ႈတွၼ်ႈတႃႇမၼ်း ၼၼ်ႉယဝ်ႉ။ ၶၢဝ်းယၢမ်း ဢၼ်ၸႂ်ႉၸၢတ်ႈပၢၼ်ယူႇၸွမ်းၵၼ် ပၼ်တၢင်းယုမ်ႉလႄႈတၢင်းသိူဝ်း ၶၢဝ်းယၢမ်းၸိူဝ်းၼၼ်ႉ မၼ်းပဵၼ်ၶၢဝ်းယၢမ်းဢၼ်လီတႄႉတႄႉယူႇ ၵူၺ်းၵႃႈ မၼ်းၵေႃႈလႆႈႁၢႆၵႂႃႇမူတ်းယဝ်ႉလႄႈ ႁဵတ်းႁႂ်ႈမၼ်းႁႆႈဢွၵ်ႇမႃးယူႇယဝ်ႉ။
သႅင်ႁိူၼ်းၼုမ်ႇဢၼ်လႆႈႁၼ်လိုၼ်းၼုမ်ႇ ၵမ်ႉႁႆႈၵမ်ႉၶူဝ် ယူႇမိူၼ်ၵူၼ်းယွင်ႇၼၼ်ႉၵေႃႈ ဢဝ်ၼမ်ႉတႃမၼ်း ပေႃးယိုင်ႈႁူၺ်ႇမႃးၸွမ်းယဝ်ႉ။ မၼ်းၸင်ႇႁွင်ႉလိုၼ်းၼုမ်ႇသေ
“လိုၼ်း! ပႂ်ႉႁဝ်းလႄႈၼႃႈ ႁဝ်းတေၶတ်းၸႂ်..ဢဝ်သူဢွၵ်ႇမႃးႁႂ်ႈလႆႈၼၼ်ႉယဝ်ႉ”
လိုၼ်းၼုမ်ႇ ဢၼ်ဢမ်ႇလႆႈသူၼ်ၸႂ် ၵႂၢမ်းလၢတ်ႈသႅင်ႁိူၼ်းၼုမ်ႇၼၼ်ႉၵေႃႈ
“လႅင်းဢွၼ်ႇ…လုၵ်ႈႁဝ်း.. ၶဝ်မီးယူႇတီႈႁိူၼ်းၸွင်ႇၸႂ်ႈႁိုဝ် ၶဝ်တမ်ႉဢမ်ႇလႆႈဢဝ်လုၵ်ႈႁဝ်းၵႂႃႇၸွင်ႇၸႂ်ႈ”
သႅင်ႁိူၼ်းၼုမ်ႇၼၼ်ႉၵေႃႈ သမ်ႉပေႃးဢမ်ႇၸၢင်ႈတွပ်ႇသင်ပၼ်ၶဝ်လႆႈယဝ်ႉ။
“ႁဝ်းယွမ်းၼွမ်းယူႇ”
လိုၼ်းၼုမ်ႇဢၼ်လႆႈငိၼ်းၸိူင်ႉၼၼ် ဢမ်ႇမီးႁႅင်းသိုပ်ႇလၢတ်ႈသင်လႆႈထႅင်ႈယဝ်ႉ။
ပီႈၶမ်းၼၼ်ႉ မိူဝ်ႈႁူႉဝႃႈ ၼွင်ႉၸၢႆးမၼ်းတူၵ်းၶွၵ်ႈၶင် ယွၼ်ႉလုၵ်ႈလိုၼ်းၼုမ်ႇၼႆၵေႃႈ ၼႅတ်ႈမႃးၸႂ်းၵမ်းလဵဝ်ယူႇ။
တွၼ်ႈသိပ်းသီႇသုတ်းၵႂႃႇယဝ်ႉ သိုပ်ႇတူၺ်းထႅင်ႈတွၼ်ႈသိပ်းႁႃႈၶႃႈ။
ႁပ်ႉထွမ်ႇပၼ်ႁႅင်းလူၺ်ႈသဵင် တၢင်း YouTube ၵေႃႈလႆႈၶႃႈ။
