တွၼ်ႈသိပ်းသွင်
လိုၼ်းၼုမ်ႇ ဢၼ်မီးတူဝ်ယွမ်လဵၵ်ႉသေး ဢမ်ႇပေႃးသုင်ၵႃႈႁိုဝ်လႄႈ ၸိုၼ်ႈၶိူဝ်းသမ်ႉတူဝ်သုင်ဝႆႉသေ ႁူဝ်လိုၼ်းၼုမ်ႇၼၼ်ႉ တေႃႉတႄႉပဵင်းဢဝ်ၵၢင်းမၼ်းၵူၺ်းယူႇ။ ယၢမ်းၼၼ်ႉ ၸိုၼ်ႈၶိူဝ်းၵေႃႈ မိူၼ်တေသုတ်ႇၼူမ်ၺႃး ၶူၼ်ႁူဝ်လိုၼ်းၼုမ်ႇၵႂႃႇယဝ်ႉ သုတ်ႉတူဝ်မၼ်းဢွၵ်ႇၵႂႃႇသေ
“သူဢမ်ႇလႆႈသၢႆႇႁူဝ်မႃးလၢႆဝၼ်းယဝ်ႉလႃႇၼႆႉ..”
လိုၼ်းၼုမ်ႇၼၼ်ႉၵေႃႈ ၼႅတ်ႈလုပ်ႈဢဝ်ၶူၼ်ႁူဝ်မၼ်းမႃးၼူမ်တူၺ်းယဝ်ႉ ယၵ်ႉတူၺ်းၼႃႈၸိုၼ်ႈၶိူဝ်း မိူၼ်ဢမ်ႇႁၢၼ်ႉၸႂ်ဝႆႉသေ
“ၸမ်မီးဝူင်ႈယဝ်ႉၶႃႈ!..”
ယိပ်းဢဝ်ထူင်လႄႈၶႅပ်းတိၼ်မၼ်း ပႆဢွၵ်ႇၵႂႃႇပႅတ်ႈ လူၺ်ႈဢမ်ႇႁူၼ်လင် ဝၢႆႇတူၺ်းၸိုၼ်ႈၶိူဝ်းၶိုၼ်းသေဢိတ်း။ ၸိုၼ်ႈၶိူဝ်းၵေႃႈ ၼႅတ်ႈၵႂႃႇဢဝ်လူတ်ႉမၼ်း မႃးၵိုတ်းၶႂၢင်တၢင်းၼႃႈလိုၼ်းၼုမ်ႇၼၼ်ႉယဝ်ႉ။
“လိုၵ်းၵေႃႈလိုၵ်းၼႃႇယဝ်ႉ သူမိူဝ်းၵေႃႉလဵဝ်ၸိူင်ႉၼႆ.. တေဢမ်ႇပေႃးလွတ်ႈၽေးၵႃႈႁိုဝ် ၶိုၼ်ႈလူတ်ႉလႄႈ.. ႁဝ်းမိူဝ်းသူင်ႇ”
“ဢၢႆတူဝ်ႁဝ်းမဵၼ်ၶႃႈဢေႃႈ လိူဝ်သေၼၼ်ႉ.. ႁဝ်းၵေႃႈ..ဢမ်ႇလႆႈသၢႆႇႁူဝ်မႃးလၢႆဝၼ်းယဝ်ႉ.. သူဢမ်ႇၵူဝ်လူတ်ႉသူတေမဵၼ်ၶႃႈႁႃႉ”
“ၽႂ်သူၼ်ၸႂ်လႃႇ..”
“မိူဝ်ႈၵႆႈၵေႃႈ..တိုၵ်ႉလၢတ်ႈၵႂႃႇၵူၺ်း”
“လၢတ်ႈၵႂႃႇမွၵ်ႈၼၼ်ႉၵေႃႈၸႂ်လမ်ယဝ်ႉၵႂႃႈ.. ဢမ်ႇထၢင်ႇဝႃႈ..သူတေပဵၼ်ၵူၼ်းၸႂ်လမ်ငၢႆႈၸိူင်ႉၼႆၼႃ”
“ပဵၼ်သင်လႄႈ..တေလႆႈၸႂ်လမ်ၶႃႈလႃႇ ဢၼ်လၢတ်ႈၵေႃႈပဵၼ်လွင်ႈတေႉမၼ်းၵူၺ်းၶႃႈလူး”
“ပေႃးဢမ်ႇၸႂ်လမ်..ပဵၼ်သင်လႄႈ ဢမ်ႇၶိုၼ်ႈလူတ်ႉလႃႇ”
လိုၼ်းၼုမ်ႇမိုင်ယဵၼ်ၵႂႃႇၵႅပ်ႉၼိုင်ႈယဝ်ႉ။
“ႁဝ်းဝႆႉၸႂ်သူလႆႈယူႇႁႃႉ…”
မိုင်ၸုၵ်းတူၺ်းၸိုၼ်ႈၶိူဝ်း ဢၼ်မီးၼႂ်းလူတ်ႉၼၼ်ႉတၢင်းႁိုင်။ ယွၼ်ႉငဝ်းလၢႆးၼႂ်းဝၼ်းမိူဝ်ႈၼႆႉ ႁဵတ်းႁႂ်ႈၶုၵ်းၶူၼ်ႉထိုင်ၶိုၼ်း ဝၼ်းဢၼ်ပူၼ်ႉမႃးၼၼ်ႉယဝ်ႉ။
ၼႂ်းၶမ်ႈၶိုၼ်း ဢၼ်လိုၼ်းၼုမ်ႇလႅၼ်ႈပၢႆႈၵူၼ်းမဝ်းလဝ်ႈယူႇၼၼ်ႉ ၸင်ႇမီးလူတ်ႉလူင်လမ်းၼိုင်ႈ ၵိုတ်းတေႃႇၼႃႈမၼ်းဝႆႉသေ ၼႂ်းလူတ်ႉၼၼ်ႉၵေႃႈ မီးၵူၼ်းၸၢႆးႁၢမ်ႉၶႂ်ႈၶၢဝ်ႉၶၢဝ်ႉဝႆႉဢိတ်းၼိုင်ႈ ႁၼ်လိုၼ်းၼုမ်ႇၶႃ မီးယူႇၼိူဝ်သဵၼ်ႈတၢင်းၼႆလႄႈ ထၢမ်ၸွႆႈမိူဝ်းသူင်ႇ ၼႆယူႇ။ လိုၼ်းၼုမ်ႇၵေႃႈ လႆႈၶိုၼ်ႈလူတ်ႉၵႂႃႇယဝ်ႉ။ မိူဝ်ႈႁူႉဝႃႈလိုၼ်းၼုမ်ႇ ဢမ်ႇမီးတီႈၵႂႃႇၼႆၵေႃႈ ၼႅတ်ႈလၢတ်ႈႁႂ်ႈမိူဝ်းလိုဝ်ႈ တီႈႁိူၼ်းမၼ်းၵမ်းလဵဝ်။ လိုၼ်းၼုမ်ႇ တူၺ်းသၢႆငၢႆလုင်းၼၼ်ႉ ဢမ်ႇပေႃးလီယဝ်ႉၼႆလႄႈ ယွၼ်းလူင်းလူတ်ႉၵႂႃႇယူႇ မိူၼ်ဝႃႈ လုင်းၼၼ်ႉသမ်ႉ ဢမ်ႇၶႂ်ႈပၼ်မၼ်းလူင်း ၼၼ်ႉယဝ်ႉ။ မိူဝ်ႈပဵၼ်ၸိူင်ႉၼၼ် မိူၼ်လၢမ်းလႆႈဝႃႈ ၵူၼ်းၵေႃႉၼၼ်ႉ ဢမ်ႇဝူၼ်ႉလီၼႆသေ ၼႅတ်ႈႁႃလၢႆးတၢင်းမၼ်းယူႇ။ ၸင်ႇသမ်ႉႁၼ်မႅၼ်ႈ လၢၼ်ႉၶၢႆၶူဝ်းၶွင် ပိုတ်ႇဝႆႉယူႇႁိမ်းတၢင်းၼၼ်ႉလႄႈ ယွၼ်းႁႂ်ႈလုင်းၵိုတ်းပၼ်မၼ်းသေ တေလူင်းသိုဝ်ႉၶူဝ်းၶွင်ပၼ်လုၵ်ႈၼႆၵေႃႈ လုင်းၼၼ်ႉၸင်ႇတေၵိုတ်းပၼ်ယဝ်ႉ။
လိုၼ်းၼုမ်ႇၵေႃႈ မိူဝ်ႈဢွၵ်ႇၼႂ်းလူတ်ႉမႃးလႆႈယဝ်ႉၼၼ်ႉ ႁႃတၢင်းလႅၼ်ႈပၢႆႈပႅတ်ႈယူႇ။ လုင်းၼၼ်ႉ လႆႈႁၼ်လိုၼ်းၼုမ်ႇလႅၼ်ႈပၢႆႈၼႆၵေႃႈ ၼႅတ်ႈၶပ်းလူတ်ႉလမ်းၸွမ်းၵမ်းလဵဝ်၊ သမ်ႉဝႃႈမၼ်းလႅၼ်ႈဝႆးၼႃႇသေတႃႉ ႁိုဝ်တေၶိုတ်းလူတ်ႉလႆႈ လူတ်ႉၼၼ်ႉဝႆးလိူဝ်လူး။ လုင်းၼၼ်ႉၵေႃႈ ၶတ်းၸႂ်ဢဝ်လိုၼ်းၼုမ်ႇၶိုၼ်ႈလူတ်ႉမၼ်းၼႆယူႇ လိုၼ်းၼုမ်ႇၼၼ်ႉၵေႃႈ လႆႈႁွင်ႉသႅၼ်ႇယွၼ်းတၢင်းၸွႆႈထႅမ်ၵႂႃႇယဝ်ႉ။
“ၸွႆႈဢိတ်းၼိုင်ႈၶႃႈ! ၸွႆႈဢိတ်းၼိုင်ႈၶႃႈ..” ၶတ်းၸႂ်ဢီးလုင်းၼၼ်ႉဢွၵ်ႇၵႂႃႇယူႇယဝ်ႉ။
လုင်းၼၼ်ႉၵေႃႈ ယိုင်ႈၶႅၼ်းဢဝ်ဢဵၼ်ဢဝ်ႁႅင်းမၼ်း ၸၼ်လိုၼ်းၼုမ်ႇမႃးႁႅင်းထႅင်ႈ၊ သမ်ႉဝႃႈၵူၼ်းၵေႃႉၼၼ်ႉ ဢမ်ႇလႆႈမင်ႈသင်ႈသင်သေတႃႉ ယွၼ်ႉလိုၼ်းၼုမ်ႇၼၼ်ႉ ဢုမ်ႈလုၵ်ႈဝႆႉလႄႈ ဢမ်ႇမီးႁႅင်းတႃႇတေၽိုတ်ႉဢီးမၼ်းဢွၵ်ႇလႆႈတဵမ်တီႈ။ လႅင်းဢွၼ်ႇဢၼ်ငိၼ်းသဵင်လိုၼ်းၼုမ်ႇၼၼ်ႉ တိုၼ်ႇမႃးသေ ႁွင်ႉႁႆႈလင်မေႃးႁႅင်းမႃးယူႇ။ မိူဝ်ႈယင်းတိုၵ်ႉၶတ်းၸႂ် ဢီးတူဝ်လုင်းၼၼ်ႉဢွၵ်ႇၵႂႃႇ လုင်းၼၼ်ႉသမ်ႉ ၸၼ်ဢဝ်သိူဝ်ႈမၼ်း သိၵ်ႇၵႂႃႇယဝ်ႉ။ ယၢမ်းၼၼ်ႉ ၸင်ႇမီးၵူၼ်းၵေႃႉၼိုင်ႈ ၶီႇတၢင်းလူတ်ႉၶိူင်ႈသေ ၶဝ်ႈမႃးၸၼ်ဢဝ်တူဝ်လုင်းၵေႃႉၼၼ်ႉဢွၵ်ႇ ၶုၼ်ႇဢီးပၼ်မၼ်း လူမ်ႉလူင်းၵႂႃႇယူႇယဝ်ႉ။ လိုၼ်းၼုမ်ႇၼၼ်ႉၵေႃႈ မိူၼ်တေလွတ်ႈၽေးယဝ်ႉၼႆသေ လူမ်ႉၼင်ႈလူင်ၵႂႃႇယူႇ။
ၵူၼ်းၵေႃႉၼၼ်ႉ ထွတ်ႇဢဝ်သိူဝ်ႈမၼ်း ႁူမ်ႇပၼ်လိုၼ်းၼုမ်ႇၵႂႃႇသေ။ ထၢမ်ၵႂႃႇၸွမ်းၼင်ႇမႆႈၸႂ်ဝႃႈ
“သူပဵၼ်ၸိူင်ႉႁိုဝ်.. မၢတ်ႇၸဵပ်းတီႈလႂ်ၶႃႈ”
ၵူၼ်းၵေႃႉၼၼ်ႉၵေႃႈ ႁွင်းဢဝ်မၼ်းလုၵ်ႉၶိုၼ်ႈမႃးယဝ်ႉ ၸွႆႈဢဝ်လိုၼ်းၼုမ်ႇၶႃ သူင်ႇပၼ်တီႈၶႃယူႇ ၼႆယူႇ။ လိုၼ်းၼုမ်ႇၼၼ်ႉ ယွၼ်ႉဢမ်ႇႁူႉဝႃႈတေၵႂႃႇတၢင်းလႂ်လႄႈ တီႈဢၼ်မၼ်းႁူႉၸၵ်းၼၼ်ႉၵေႃႈ ပဵၼ်တီႈႁူင်းယႃၵူၺ်း ႁႂ်ႈၵူၼ်းၵေႃႉၼၼ်ႉ ၵႂႃႇသူင်ႇတီႈႁူင်းယႃ ယူႇယဝ်ႉ။ ယွၼ်ႉၵူၼ်းၵေႃႉၼၼ်ႉ သႂ်ႇမၢၵ်ႇႁူဝ်ဝႆႉလႄႈ ဢမ်ႇလႆႈႁၼ်ၼႃႈၶဝ်လီလီ။
ၸိုၼ်ႈၶိူဝ်းဢၼ်ငိၼ်းလိုၼ်းၼုမ်ႇ လၢတ်ႈဢွၵ်ႇမႃးၸိူင်ႉၼၼ်ၼၼ်ႉၵေႃႈ သီၼႃႈမိူၼ်ဢမ်ႇပေႃးၸႂ်မႃးၵႃႈႁိုဝ်လႄႈ
“ပေႃးတၢၼ်ႇဝႃႈဢမ်ႇယၢမ်ႈမိူဝ်းသူင်ႇယဝ်ႉ… ဢမ်ႇၶိုၼ်ႈၵေႃႈယဝ်ႉလႄႈ”
ႁေႃႈလူတ်ႉမၼ်းဢွၵ်ႇၵႂႃႇပႅတ်ႈၵမ်းလဵဝ်။ လိုၼ်းၼုမ်ႇၵေႃႈ တူၺ်းၸွမ်းလင်လူတ်ႉမၼ်းသေ
“ႁဝ်းယုမ်ႇၸႂ်ၶဝ်လႆႈယူႇႁႃႉ ဢမ်ႇၼၼ် ဢမ်ႇထုၵ်ႇလီယုမ်ႇၶဝ်”
ၸိုၼ်ႈၶိူဝ်းၼၼ်ႉ ဢမ်ႇပေႃးၵတ်းယဵၼ်ၸႂ်ၵႃႈႁိုဝ်လႄႈ လွမ်တူၺ်းၼႂ်းမၢၼ်ႇလူတ်ႉမၼ်း ယင်းတိုၵ်ႉလႆႈႁၼ်လိုၼ်းၼုမ်ႇ ပႆယူႇၼိူဝ်သဵၼ်ႈတၢင်းၼၼ်ႉၼႆၵေႃႈ ႁူၼ်လူတ်ႉမၼ်းမႃးၶိုၼ်းယဝ်ႉ။
“ၶိုၼ်ႈလူတ်ႉလႄႈ.. လိုၵ်းၼႃႇယဝ်ႉ.. သူထုၵ်ႇလီမိူဝ်းလိုဝ်ႈႁိူဝ်ႉဢိူဝ်ႈ ဢမ်ႇၸႂ်ႈဝႃႈ..မႃးပႆယူႇၸွမ်းတၢင်းၸိူင်ႉၼႆ.. ပေႃးတႃၼွၼ်းဢမ်ႇဢိမ်ႇ ႁဵတ်းၵၢၼ်ၵေႃႈ..တေဢွၵ်ႇမႃးဢမ်ႇၶႅမ်ႉၼၼ်ႉယဝ်ႉ”
“ယူဝ်ဝႃႈပဵၼ်ၵူၼ်းမီးၼမ်ႉၸႂ် တီႈတေႉၵေႃႈ..မႆႈၸႂ်ၵၢၼ်ၵူၺ်းလူင်”
မၼ်းၵေႃႈၶိုၼ်ႈလူတ်ႉၵႂႃႇ ၼင်ႇဢမ်ႇႁၢၼ်ႉၸႂ်ၵႃႈႁိုဝ်။ တီႈၼႂ်းလူတ်ႉဢၼ်မီးသွင်ၶႃၵူၺ်းၼၼ်ႉ သမ်ႉပေႃးယဵၼ်သီႇသီႇလူင်မိူဝ်းယူႇ။ ၸိုၼ်ႈၶိူဝ်းၵေႃႈ ဢမ်ႇႁူႉတေလၢတ်ႈသင်လႄႈ
“ပေႃးႁိူဝ်ႉၵေႃႈ..ၼွၼ်းလိုဝ်ႈလႆႈယူႇၵူၺ်း သင်ထိုင်ယဝ်ႉတေႁွင်ႉလႂ်”
“ဢမ်ႇၶႃႈ!..”
“ၸိူင်ႉၼၼ်ႁႃႉ..”
လိုၼ်းၼုမ်ႇဢၼ်ဢမ်ႇၸၢင်ႈလၢတ်ႈသင်ၼၼ်ႉၵေႃႈ တူၺ်းသၢႆႉတူၺ်းၶႂႃ ယၵ်ႉတူၺ်းၼႃႈၸိုၼ်ႈၶိူဝ်း ဢၼ်တိုၵ်ႉႁေႃႈလူတ်ႉယူႇၼၼ်ႉလႄႈ၊ ၸိုၼ်ႈၶိူဝ်းၼၼ်ႉသမ်ႉ ၵိုင်ႉၵၢင်ႉဝၢႆႇတူၺ်းမၼ်းသေ သၢႆတႃလေႃႇၺႃးၵၼ်ၵႂႃႇယဝ်ႉ ၼႅတ်ႈသၢႆႇၼႃႈၵႂႃႇပႅတ်ႈတၢင်ႇတၢင်းယူႇ။
“သူတူၺ်းႁဝ်းယူႇႁႃႉ…”
လိုၼ်းၼုမ်ႇၵေႃႈ ယွမ်းႁပ်ႉၵႂႃႇသေ “ဢေႃႈ”
“လၢတ်ႈသိုဝ်ႈသိုဝ်ႈၸိူင်ႉၼႆ..ဢမ်ႇမီးတၢင်းဢၢႆၽွင်ႈႁႃႉ”
“ပဵၼ်သင်လႄႈတေလႆႈဢၢႆၶႃႈ.. ႁဝ်းထၢင်ႇပိူင်ႈလႄႈတူၺ်းၵူၺ်း..”
“ထၢင်ႇပိူင်ႈ!.. လွင်ႈသင်လႃႇ”
“ဢေႃႈ..မီးၵူၼ်းလၢတ်ႈဝႃႈ..သူ..ပဵၼ်ၵူၼ်းလီၵူဝ် ဢမ်ႇမီးၽႂ်ႁတ်းၶဝ်ႈၸမ်.. မိူဝ်ႈလႂ်တူၺ်းသၢႆတႃသူၼၼ်ႉ သမ်ႉပေႃးၶႂ်ႈလႅၼ်ႈပၢႆႈယဝ်ႉၼႆဝႃႇ ၵူၺ်းၵႃႈ ႁဝ်းၵေႃႈ..ဢမ်ႇလႆႈႁၼ်မီးႁင်လူး.. ထၢင်ႇပိူင်ႈဝႃႈမၼ်းလီၵူဝ်တီႈလႂ်ၼႆၵူၺ်းၶႃႈ..”
“ၸိူင်ႉၼၼ်ႁႃႉ.. ပဵၼ်သင်လႄႈသူဝူၼ်ႉၸိူင်ႉၼၼ်လႃႇ..”
“ၶႃႈဝူၼ်ႉၼႆႉ..မၼ်းပႅၵ်ႇပိူင်ႈယူႇၶႃႈႁႃႉ”
“ဢိုမ်ႈ!.. မီးၵူၼ်းတင်းၼမ်..ဢၼ်ႁၼ်ႁဝ်း..ၶဝ်ႈၸမ်ႁဝ်းယဝ်ႉ လႅၼ်ႈပၢႆႈ.. ဢမ်ႇမီးၽႂ်ႁတ်းတူၺ်းၼႃႈႁဝ်းႁိုင်ႁိုင်..မိူၼ်သူသေပွၵ်ႈ..”
“ယွၼ်ႉၶႃႈၸင်းသူယူႇၵေႃႈပဵၼ်လႆႈ..”
“ဢမ်ႇလၢတ်ႈသိုဝ်ႈၼႃႇႁႃႉ..”
“ဢမ်ႇၸႂ်ႈဝႃႈ သူၵေႃႈ..ႁဵတ်းႁႂ်ႈပိူၼ်ႈၸင်းယူႇယဝ်ႉၶႃႈႁိုဝ်”
“ႁႃးႁႃး..ႁႃး..”
သမ်ႉပေႃးဢဝ်ၸိုၼ်ႈၶိူဝ်းၶူဝ်လင်ဢွၵ်ႇမႃးယဝ်ႉ။ လႆႈဝႃႈပဵၼ်ပွၵ်ႈဢွၼ်တၢင်းသုတ်း ဢၼ်လိုၼ်းၼုမ်ႇ ငိၼ်းသဵင်ၶူဝ်ၶဝ် ယွၼ်ႉၵူႈဝၼ်းၼၼ်ႉ ႁၼ်ၼႃႈတူႇ ဢမ်ႇယုမ်ႉဢမ်ႇၵီႈသေပွၵ်ႈၼၼ်ႉၵူၺ်း ဢမ်ႇဝူၼ်ႉမႅၼ်ႈဝႃႈ တေလႆႈႁၼ်ၼႃႈယုမ်ႉၶဝ်ၸိူင်ႉၼႆ သမ်ႉပေႃးႁဵတ်းႁႂ်ႈမၼ်းမိူၼ်ႇမိုင် တူၺ်းပေႃးဢမ်ႇၽႅပ်ႉတႃၵႂႃႇၵႅပ်ႉၼိုင်ႈယဝ်ႉ။
ၸိုၼ်ႈၶိူဝ်းၵေႃႈ မိူဝ်းသူင်ႇလိုၼ်းၼုမ်ႇ တီႈၼႃႈႁိူၼ်းသႅင်ႁိူၼ်းၼုမ်ႇ မိူၼ်ပွၵ်ႈဢွၼ်တၢင်းၼၼ်ႉယူႇ။ လိုၼ်းၼုမ်ႇၵေႃႈ လၢတ်ႈယိၼ်းၸူမ်းၵႂႃႇသေ လူင်းလူတ်ႉၵႂႃႇယဝ်ႉ။
လိုၼ်းၼုမ်ႇ ၽုၺ်ႇၽၵ်းတူၶဝ်ႈႁိူၼ်းမိူဝ်း ႁွပ်ႇဢုမ်ႈဢဝ်လႅင်းဢွၼ်ႇ ဢၼ်ၼွၼ်းဝၢၼ်ယူႇၼၼ်ႉ သႂ်ႇႁူဝ်မႃႇမၼ်းသေ ပွၵ်ႈမိူဝ်းၵႂႃႇလွႆးလွႆးယူႇ။ မိူဝ်ႈယင်းတိုၵ်ႉဢဝ်တိၼ်ဢွၼ်ႇမၼ်း ပႆယဵပ်ႇယၢင်ႈမိူဝ်းၵႂႃႇ ၼိူဝ်သဵၼ်ႈတၢင်းလွႆးလွႆး ယူႇၼၼ်ႉ ၸင်ႇသမ်ႉမိူၼ်မီးၵူၼ်းမႃးၸွမ်းၽၢႆႇလင်မၼ်းလႄႈ ၶတ်းၸႂ်ပႆဝႆးဝႆးယူႇ။ ၵူၺ်းၵႃႈ တိၼ်မၼ်းၼၼ်ႉ ၸဵပ်းႁႅင်းၼႃႇယဝ်ႉသေ သမ်ႉပႃးလႅင်းဢွၼ်ႇထႅင်ႈလႄႈ ပေႃးလႅၼ်ႈၵေႃႈ ၶဝ်ႁူႉတေလမ်းၶိုတ်းယူႇယဝ်ႉ။ မၼ်းၵေႃႈ ၶတ်းၸႂ်ပႆလွႆးလွႆး ပႆၵႂႃႇမိူၼ်ဢမ်ႇဝူၼ်ႉသင်ၼၼ်ႉၵူၺ်းယူႇ။
သၢႆတႃၸၢႆႉတူၺ်းငဝ်း ဢၼ်ပႆၶဝ်ႈမႃးၸမ်မၼ်းၼၼ်ႉတိၵ်းတိၵ်းလႄႈ မိုဝ်းၶွၼ်ၼိုင်ႈ ယိပ်းဢဝ်ၶႅပ်းတိၼ်မၼ်းဝႆႉမၼ်ႈမၼ်ႈသေ မိူဝ်ႈဢၼ်ၵူၼ်းၵေႃႉၼၼ်ႉ မိူၼ်တေၶိုတ်းၸမ်မၼ်းယဝ်ႉၵေႃႈ ၵိုတ်းဝိၼ်ႇဝၢႆႇသႂ်ႇၵူၼ်းၵေႃႉၼၼ်ႉ လူၺ်ႈဢမ်ႇတၼ်းတူၺ်းဝႃႈပဵၼ်ၽႂ် ဢဝ်သူၼ်ႈၶႅပ်းတိၼ်မၼ်း တွႆႇသႂ်ႇပၼ်ၼႃႈၵူၼ်းၵေႃႉၼၼ်ႉၵႂႃႇႁႅင်းႁႅင်း မိူၼ်တေၺႃးတီႈလႂ်သေတီႈတီႈ ၼၼ်ႉယဝ်ႉ။ ဢၢင်ႈတွႆႇသႂ်ႇထႅင်ႈၵမ်းၼိုင်ႈ မိုဝ်းၶွၼ်ၼိုင်ႈ ၵမ်ၶေႃႈမိုဝ်းမၼ်းဝႆႉသေ ႁၼ်ၼႃႈၵၼ်လီလီယဝ်ႉ ပဵၼ်ၸိုၼ်ႈၶိူဝ်းၼႆၵေႃႈ ဢဝ်မၼ်းပေႃးတူၵ်းၸႂ်လူင်မႃးၵမ်းလဵဝ်ယူႇ။
“ပဵၼ်သူၶႃႈႁႃႉ!”
ၸိုၼ်ႈၶိူဝ်းၵေႃႈဢဝ်ထူင်ပႃးလိုၼ်းၼုမ်ႇၼၼ်ႉ ယိုၼ်ႈပၼ်ၵႂႃႇသေ မိူၼ်ၼႃႈၽၢၵ်ႇၶႂ်ႈၸဵပ်းဝႆႉလႄႈ ၵမ်းတူၺ်းယဝ်ႉ မီးလိူတ်ႈဢၼ်ဢုၼ်ႇဢုၼ်ႇ လႆဢွၵ်ႇၼႃႈၽၢၵ်ႇမၼ်းမႃး တိတ်းၸပ်းၸွမ်းမိုဝ်းမၼ်းပႃးယူႇ။
“ပဵၼ်သင်လႄႈ မႃးၸွမ်းတၢင်းလင်..ဢမ်ႇသူပ်းဢမ်ႇသဵင်ၸိူင်ႉၼၼ်ၶႃႈလႃႇ”
ၸိုၼ်ႈၶိူဝ်းၵေႃႈ မိူဝ်ႈဢၼ်ႁၼ်ထူင်လိုၼ်းၼုမ်ႇ လိုမ်းဝႆႉၼႂ်းလူတ်ႉၼၼ်ႉ ၸင်ႇႁူၼ်လူတ်ႉ ပွၵ်ႈမိူဝ်းတၢင်းႁိူၼ်းလိုၼ်းၼုမ်ႇၼႆသေ သမ်ႉလႆႈႁၼ်လိုၼ်းၼုမ်ႇၶဝ်ႈၵႂႃႇ ၼႂ်းသဵၼ်ႈတၢင်း ဢၼ်ၵႅပ်ႈၵႅပ်ႈၼၼ်ႉလႄႈ ၵိုတ်းလူတ်ႉမၼ်းၵႂႃႇႁိမ်းတၢင်းၽႄၼၼ်ႉယဝ်ႉ တေဢၢၼ်းႁွင်ႉမၼ်းၼႆယူႇ လိူၵ်ႈလိူၵ်ႈသမ်ႉႁၼ်မႅၼ်ႈ ၵူၼ်းသႂ်ႇၶူဝ်းလမ်ၵေႃႉၼိုင်ႈ ပႆလမ်းၸွမ်းလိုၼ်းၼုမ်ႇၵႂႃႇလွႆးလွႆးယဝ်ႉ။ မၼ်းၵေႃႈပႆလွႆးလွႆး လမ်းငွႆးၵူၼ်းၵေႃႉၼၼ်ႉၵႂႃႇသေ မိူၼ်ၵူၼ်းၵေႃႉၼၼ်ႉ တေႁူႉတူဝ်မႃးယဝ်ႉလႄႈ လႅၼ်ႈၶဝ်ႈၵႂႃႇ တၢင်းၽေထႅင်ႈတၢင်ႇသဵၼ်ႈပႅတ်ႈယူႇ။ မၼ်းၵေႃႈ လမ်းၸွမ်းၵူၼ်းၵေႃႉၼၼ်ႉၵႂႃႇမိူၼ်ၵၼ် ၵူၺ်းၵႃႈ ဢမ်ႇတၼ်းႁၼ်ၵူၼ်းၵေႃႉၼၼ်ႉယဝ်ႉလႄႈ ၸင်ႇႁူၼ်လင်ပွၵ်ႈမႃးၸူးလိုၼ်းၼုမ်ႇၶိုၼ်းယဝ်ႉ။
“ႁၼ်လုၵ်ႈသူၼွၼ်းလပ်းယူႇ ပေႃးႁဝ်းႁွင်ႉၵေႃႈ..ၶဝ်တိုၼ်ႇႁေယဝ်ႉလေႃႇ”
“ၵေႃႈၸႂ်ႈယူႇ”
ၸိုၼ်ႈၶိူဝ်းၼၼ်ႉၵေႃႈ တူၺ်းလႅင်းဢွၼ်ႇလီလီသေ မိူၼ်ဝူၼ်ႉသေလွင်ႈလွင်ႈမႃးယူႇၵႅပ်ႉၼိုင်ႈယဝ်ႉ။
“ႁႂ်ႈႁဝ်းဢုမ်ႈမိူဝ်းၸွႆႈလႄႈ”
“ၶဝ်ၼၵ်းၶႃႈဢေႃႈ”
“ၼၼ်ႉယဝ်ႈ သူၵေႃႈတေၼၵ်းမိူၼ်ၵၼ်”
ႁိမ်ဢဝ်တူဝ်လႅင်းဢွၼ်ႇ တီႈလိုၼ်းၼုမ်ႇၼၼ်ႉသေ ဢုမ်ႈႁွပ်ႇမိူဝ်းၵႂႃႇယူႇ။ မိုဝ်းလဵၵ်ႉလဵၵ်ႉဢွၼ်ႇလႅင်းဢွၼ်ႇၼၼ်ႉၵေႃႈ ၵွတ်ႇသႂ်ႇၶေႃးမၼ်းၵႂႃႇ ၼင်ႇဢုၼ်ႇၸႂ်ၼၼ်ႉလႄႈ လၢတ်ႈဢွၵ်ႇမႃးလွႆးလွႆးႁိမ်းႁူမၼ်းၼၼ်ႉဝႃႈ“ပေႃႈ” ၼႆယဝ်ႉ။
ၼႂ်းႁိူၼ်းလိုၼ်းၼုမ်ႇ ဢၼ်ဢမ်ႇလႆႈၵႂၢင်ႈယႂ်ႇသင်ၼၼ်ႉ မိူၼ်ဝႃႈ တီႈဝၢင်းၶူဝ်းၶွင်မီးပိူင်လီ လႄႈ မူတ်းသႂ်လီတေႉတေႉယူႇ။ ၸိုၼ်ႈၶိူဝ်းဢၼ်ၶဝ်ႈမိူဝ်းတၢင်းၼႂ်းၼၼ်ႉၵေႃႈ တူၺ်းသမ်ႉပေႃးၸွတ်ႇၵူႈၸွၵ်ႉၵူႈၸဵင်ႇယဝ်ႉ။ လိုၼ်းၼုမ်ႇၸင်ႇႁႂ်ႈမၼ်း ၼင်ႈၼႂ်းႁွင်ႈႁပ်ႉၶႅၵ်ႇၼၼ်ႉသေ သွင်ၶႃၵေႃႈၼင်ႈတေႃႇၼႃႈၵၼ်ၵႂႃႇယူႇ။
လိုၼ်းၼုမ်ႇၼၼ်ႉၵေႃႈ မိူဝ်ႈႁဵတ်းႁႂ်ႈၸိုၼ်ႈၶိူဝ်းမၢတ်ႇၸဵပ်းယဝ်ႉၼၼ်ႉ တင်ႈၸႂ်တင်ႈၶေႃးသေ ယႃၸဵပ်းပၼ်ၶဝ်ၵႂႃႇ၊ မိူဝ်ႈၽွင်းသႂ်ႇယႃတႃးၸဵပ်းပၼ်ၶဝ်ယူႇလွႆးလွႆးၼၼ်ႉ ၼင်ႇႁၢင်ႈလူမ်းထူၺ်ႈၸႂ်သွင်ၶႃ လင်ယွၼ်ႈထိုင်ၵၼ်မႃးလႄႈ လိုၼ်းၼုမ်ႇၼၼ်ႉၵေႃႈ မိူၼ်ထိင်းႁူဝ်ၸႂ် ဢၼ်တွတ်ႇတဵၼ်ႈ မေႃးလင်ႁႅင်းၼႃႇၼၼ်ႉ ဢမ်ႇလႆႈယဝ်ႉသေ သုတ်ႉဢွၵ်ႇႁၢင်ႇၵႂႃႇဢိတ်းၼိုင်ႈ ဝိၼ်ႇၼႃႈဝၢႆႇပႅတ်ႈၸိုၼ်ႈၶိူဝ်းယဝ်ႉ လၢမ်းတႃးယႃပၼ်ၵႂႃႇယူႇ။
ယၢမ်းၼၼ်ႉ ၸိုၼ်ႈၶိူဝ်းၸင်ႇၵမ်ၶေႃႈမိုဝ်းမၼ်းဝႆႉယဝ်ႉ ဢဝ်မၼ်းသမ်ႉပေႃးၽႅတ်းလူင်ၵႂႃႇ။
“ပေႃးတေဝၢႆႇၼႃႈသေ..သႂ်ႇပၼ်ၸိူင်ႉၼႆ ႁဝ်းသႂ်ႇႁင်းၵူၺ်းၵေႃႈလႆႈယူႇၼႃ”
“ဢေႃႈ.. သႂ်ႇႁင်းၵူၺ်းၶႃႈလႄႈ သႂ်ႇယဝ်ႉၵေႃႈ..ပွၵ်ႈမိူဝ်းလႆႈယဝ်ႉၶႃႈၼႃ”
ၸိုၼ်ႈၶိူဝ်းယၵ်ႉတူၺ်းလိုၼ်းၼုမ်ႇၵႂႃႇ လူၺ်ႈဢမ်ႇလႆႈလၢတ်ႈသင်ၸွမ်း။
“ၶႂ်ႈဝႃႈ..ႁဝ်းလိုပ်ႈၵေႃႈလႆႈယူႇၶႃႈ.. တေႁႂ်ႈသူယူႇတီႈၼႆႈ..ၽွင်းယၢမ်းၵၢင်ၶမ်ႈၵၢင်ၶိုၼ်းၸိူင်ႉၼႆ မၼ်းဢမ်ႇပေႃးလီၵႃႈႁိုဝ်..”
“ႁဝ်းႁူႉယဝ်ႉ!..”
“ႁူႉၵေႃႈလီယဝ်ႉၶႃႈ”
ယၢမ်းၶမ်ႈၶိုၼ်းလိုၵ်းယဵၼ်လူင်ၼၼ်ႉ လိုၼ်းၼုမ်ႇၵေႃႈ ၼွၼ်းဢဝ်မိုဝ်းတၢင်ႇၼႃႈၽၢၵ်ႇသေ
“ၶမ်ႈၶိုၼ်းၼႆႉ ယၢဝ်းတေႉတေႉၼၼ်ႉယဝ်ႉ”
မိူဝ်ႈဢၼ် လိုၼ်းၼုမ်ႇဢဝ်သိူဝ်ႈၸိုၼ်ႈၶိူဝ်းၵႂႃႇသၵ်ႉၼၼ်ႉ လႆႈႁၼ် မီးမိၵ်ႈမၢႆ ပၵ်းသႂ်ႇဝႆႉ ႁၢင်ႈမွၵ်ႇမၼ်းမူၺ် ၼႆသေ၊ ႁဵတ်းႁႂ်ႈမၼ်းတူၵ်းၸႂ်မႃးၵမ်းလဵဝ်ယူႇ ယွၼ်ႉပိူဝ်ႈ သိူဝ်ႈၵူၼ်းၵေႃႉဢၼ်ၸွႆႈမၼ်း မိူဝ်ႈပူၼ်ႉမႃးၼၼ်ႉ မီးႁၢင်ႈမွၵ်ႇမၼ်းမူၺ်မိူၼ်ၼႆဝႆႉလႄႈ ၸင်ႇၼႅတ်ႈဢဝ်သိူဝ်ႈ ဢၼ်မၼ်းလႆႈၵဵပ်းဝႆႉၼၼ်ႉ မႃးတူၺ်းသေ ႁၢင်ႈလႄႈ တီႈဢၼ်ဢဝ်ႁၢင်ႈပၵ်းသႂ်ႇဝႆႉၼၼ်ႉၵေႃႈ မိူၼ်ၵၼ်ဢဝ်လီလီယဝ်ႉ ႁဵတ်းႁႂ်ႈမၼ်းႁူႉၵမ်းလဵဝ်ဝႃႈ ပဵၼ်ၶဝ်ယဝ်ႉ ၼႆယူႇ။
တီႈၼႂ်းလၢၼ်ႉၼၼ်ႉ ပီႈၸိင်ႇၵေႃႈ မႃးႁဵတ်းၵၢၼ်ၶိုၼ်းသေ ၵူၼ်းႁဵတ်းၵၢၼ်ၸိူဝ်းၼၼ်ႉ မိူဝ်ႈႁူႉဝႃႈပီႈၸိင်ႇ ဢမ်ႇထုၵ်ႇလိုပ်ႈဢွၵ်ႇၼႆၵေႃႈ မိူၼ်ဝႃႈ ၶၢဝ်ႇလိုဝ်းဢၼ်လၢတ်ႈထိုင်ပီႈၸိင်ႇၼၼ်ႉ ဢမ်ႇၸႂ်ႈလွင်ႈတေႉၼႆလႄႈ ၶဝ်ၵေႃႈ ဢွၼ်ၵၼ်ပွၵ်ႈၵႂႃႇႁဵတ်းၵၢၼ်ၶိုၼ်းမိူၼ်ၵဝ်ႇ ယူႇယဝ်ႉ။ ၼွင်ႉလႅင်းဢၼ်ႁၼ်ပီႈၸိင်ႇ ပွၵ်ႈမႃးၶိုၼ်းၼၼ်ႉၵေႃႈ မိူၼ်ဢမ်ႇပေႃးၸႂ်ၵႃႈႁိုဝ်လႄႈ လၢတ်ႈၶိတ်ႈလၢတ်ႈပၢႆႇၵႂႃႇယူႇ။
“ထုၵ်ႇပိူၼ်ႈလိုပ်ႈဢွၵ်ႇယဝ်ႉ ယင်းတိုၵ်ႉမီးၼႃႈပွၵ်ႈမႃးၶိုၼ်းယူႇႁႃႉ”
“ၽႂ်ဝႃႈႁဝ်းထုၵ်ႇလိုပ်ႈဢွၵ်ႇ…သူလၢတ်ႈႁႃႉ” တူၺ်းၼႃႈလိူၼ်သႂ်ၵႂႃႇ။
“ဢမ်ႇၼႃပီႈ.. ပီႈတိုၵ်ႉဢွၵ်ႇၵႂႃႇၵူၺ်း.. သမ်ႉပေႃးမီးၶၢဝ်ႇလိုဝ်းဢွၵ်ႇမႃးဝႃႈ..ပီႈထုၵ်ႇလိုပ်ႈဢွၵ်ႇယဝ်ႉ”
“ၶၢဝ်ႇလိုဝ်းမၼ်းၽႄႈဝႆးတေႉလူး.. မိူၼ်ဝႃႈႁဝ်းၼၼ်ႉ ထုၵ်ႇၶၢဝ်ႇလိုဝ်းၽၢမ်းတႃဝႆႉယူႇဢမ်ႇဝႃႈႁႃႉ ငိၼ်းဝႃႈမိူဝ်ႈဝႃး သူဢွၼ်ၵူၼ်းႁဵတ်းၵၢၼ် ဢမ်ႇမႃးႁဵတ်းၵၢၼ်ၼႆႁႃႉ” လၢတ်ႈတီႈၼွင်ႉလႅင်းၵႂႃႇယူႇ။
“မိူၼ်ဝႃႈ ၵူၼ်းဢၼ်ဢမ်ႇမႃးမိူဝ်ႈဝႃးၼၼ်ႉ တေထုၵ်ႇလိုပ်ႈဢွၵ်ႇမူတ်းမူတ်း ၼႆဢေႃႈ”
“ၽႂ်တေႁတ်းလိုပ်ႈႁဝ်းဢွၵ်ႇလႃႇ ႁဵတ်းၵၢၼ်ပၼ်တီႈလၢၼ်ႉၼႆႉမႃးပဵၼ်လၢႆပီႊယဝ်ႉ ၵူၼ်းဢၼ်ထုၵ်ႇလီဢွၵ်ႇၼၼ်ႉ လီပဵၼ်ႁူဝ်ၼႃႈသူၵူၺ်းဢိူဝ်ႈ ယွၼ်ႉမၼ်းသေ ႁဵတ်းႁႂ်ႈၵူၼ်းႁဵတ်းၵၢၼ်ဢမ်ႇၶႂ်ႈမႃးႁဵတ်းၵၢၼ်လူး”
ပႆၶဝ်ႈၼႂ်းလၢၼ်ႉၵႂႃႇ ၼင်ႇမၼ်ႈၸႂ်ယူႇ မွင်းၶဝ်ႈၵႂႃႇၵူၺ်း ၽူႈမၢႆလုင်းဢွင်ႇၼၼ်ႉ မႃးႁွင်ႉၵႂႃႇႁွင်ႈပၢင်ၵုမ်ၵမ်းလဵဝ် ႁူမ်ႈပႃးၵူၼ်းႁဵတ်းၵၢၼ် ၸိူဝ်းဢၼ်ဢမ်ႇမႃးမိူဝ်ႈဝႃးၼၼ်ႉ လိူဝ်သေပီႈၸိင်ႇ ၼႆယူႇ။
ၼႂ်းႁွင်ႈပၢင်ၵုမ် ၵူၼ်းႁဵတ်းၵၢၼ်ၼင်ႈၸႅၼ်ႇၵၼ်ယူႇ မွၵ်ႈသိပ်းပၢႆၼၼ်ႉၵေႃႈ ပဵၼ်ဢၼ်ၸႂ်ဢမ်ႇလီမႃးယဝ်ႉ ယွၼ်ႉၵူဝ်ထုၵ်ႇလိုပ်ႈဢွၵ်ႇၵၢၼ်ၼႆယူႇ။ ယၢမ်းၼၼ်ႉ လုင်းဢွင်ႇၵေႃႈ ၶဝ်ႈမႃးသေ
“ၸွမ်းလူၺ်ႈႁဝ်းၵေႃႈပဵၼ်ၽူႈၸတ်းၵၢၼ်သူလႄႈ တေမႃးပွင်ႇလႅင်းၼႄသူၸဝ်ႈၵူႈၵေႃႉ ယွၼ်ႉမိူဝ်ႈဝႃးၼၼ်ႉ မီးၵႂၢမ်းသင်ႇဝႃႈ ၵူၼ်းဢၼ်ဢမ်ႇမႃး တေထုၵ်ႇလိုပ်ႈဢွၵ်ႇၵၢၼ်ၵူႈၵေႃႉၼႆၶႃႈ”
မိူဝ်ႈငိၼ်းၸိူင်ႉၼၼ် ၼွင်ႉလႅင်းၵေႃႈပဵၼ်ဢၼ်ဢမ်ႇႁၢၼ်ႉၸႂ်မႃးတေႉတေႉလႄႈ လုၵ်ႉၸုၵ်းသေ
“ႁဝ်းႁဵတ်းၵၢၼ်မႃးပဵၼ်လၢႆပီႊယဝ်ႉ ယွၼ်းလိုဝ်ႈၵႂႃႇၼိုင်ႈဝၼ်းၵူၺ်းၵေႃႈ ထုၵ်ႇလိုပ်ႈဢွၵ်ႇၵႂႃႇၵမ်းလဵဝ်ၶႃႈႁႃႉ”
“ႁဝ်းဢမ်ႇမီးသုၼ်ႇတႅပ်းတတ်းလွင်ႈၼႆႉလႆႈ”
ယၢမ်းၼၼ်ႉ လိုၼ်းၼုမ်ႇပႆၶဝ်ႈမႃးသေ
“ယွၼ်းႁႂ်ႈၶဝ်သိုပ်ႇယူႇၶႃႈလႄႈ ၶႃႈပဵၼ်ႁူဝ်ၼႃႈၶဝ် ဢၼ်လွင်ႈၸိူဝ်းၼႆႉ ၵိူတ်ႇပဵၼ်မႃးၵေႃႈ ပဵၼ်ယွၼ်ႉၶႃႈၵူၺ်း ယွၼ်ႉၶႃႈႁဵတ်းၸွမ်းပုၼ်ႈၽွၼ်း ဢမ်ႇတဵမ်ထူၼ်ႈလႄႈ မၼ်းၸင်ႇလႆႈပဵၼ်မႃးယဝ်ႉ ႁႂ်ႈၶဝ်ႁဵတ်းၵၢၼ်ၶိုၼ်းၶႃႈလႄႈ ပိူင်မၼ်းၵေႃႈမီးယူႇၶႃႈလူး ပေႃးဝႃႈမီးလွင်ႈၸမ်ပဵၼ် ၵူၼ်းႁဵတ်းၵၢၼ်ၵူႈၵေႃႉ မီးသုၼ်ႇလိုဝ်ႈလႆႈၼႆ ပၼ်သုၼ်ႇလႆႈၶဝ်တီႈၼၼ်ႈၽွင်ႈၶႃႈလႄႈ.. သင်မီးပၼ်ႁႃလွင်ႈၼႆႉမႃး ၶႃႈၵေႃႉတေၸတ်းၵၢၼ်ၵႂႃႇၵူၺ်း ”
“ပေႃးသူလၢတ်ႈဝႃႈ တေဢဝ်ပုၼ်ႈၽွၼ်းလႆႈၵေႃႈ သူၸတ်းၵၢၼ်ၵႂႃႇလႄႈ” လုင်းဢွင်ႇ ဢွၵ်ႇႁွင်ႈၵႂႃႇပႅတ်ႈယဝ်ႉ။
ၵူၼ်းၸိူဝ်းၼၼ်ႉၵေႃႈ မိူဝ်ႈဢမ်ႇလႆႈဢွၵ်ႇၵၢၼ်ယဝ်ႉၼႆ ပဵၼ်ဢၼ်ယိၼ်းၸူမ်းလိုၼ်းၼုမ်ႇတႄႉတႄႉယူႇ၊ ၵမ်ႈၽွင်ႈၵေႃႈ ဝူၼ်ႉၽိတ်းဢၼ်လႆႈႁဵတ်းတေႃႇလိုၼ်းၼုမ်ႇၼၼ်ႉသေ ယွမ်းၼွမ်းၸူးမၼ်းၶိုၼ်းယဝ်ႉ၊ ၵူၺ်းၵႃႈ ၼွင်ႉလႅင်းၼၼ်ႉတႄႉ ဝႆႉၼႃႈဝႆႉတႃမိူၼ်ဢမ်ႇထုၵ်ႇၸႂ်မၼ်းသေဢိတ်းလႄႈ ပႆၽၢၼ်ႇပူၼ်ႉၵႂႃႇယူႇ။ လိုၼ်းၼုမ်ႇၸင်ႇ ႁွင်ႉမၼ်းဝႆႉယဝ်ႉ။
တွၼ်ႈသိပ်းသွင်သုတ်းၵႂႃႇယဝ်ႉ သိုပ်ႇတူၺ်းထႅင်ႈတွၼ်ႈသိပ်းသၢမ်ၶႃႈ။
