တွၼ်ႈသိပ်းဢဵတ်း
ငဝ်းလၢႆးတီႈၼႂ်းလၢၼ်ႉၼၼ်ႉ ၵူၼ်းႁဵတ်းၵၢၼ်ၵမ်ႈၽွင်ႈၵေႃႈ ဢွၼ်ၵၼ်ပွၵ်ႈမႃးႁဵတ်းၵၢၼ်ၶိုၼ်း ယွၼ်ႉၵူဝ်ထုၵ်ႇလိုပ်ႈဢွၵ်ႇၼႆယူႇ။ ၵမ်ႈၽွင်ႈႁဵတ်းၵၢၼ်ယူႇၵေႃႈ ဢမ်ႇသႂ်ႇၸႂ်သႂ်ႇၶေႃးသင်ၵႃႈႁိုဝ်သေ ဝႆႉၵၢၼ်ၼၼ်ႉမဝ်မၢင်တႄႉတႄႉယဝ်ႉ။
လိုၼ်းၼုမ်ႇၵေႃႈ ႁိုဝ်တေတူၺ်းလၢႆ ၸွႆႈပိူၼ်ႈႁဵတ်းၵၢၼ်ၵႂႃႇယူႇ။ ယၢမ်းၼၼ်ႉ ႁၼ်ၵူၼ်းႁဵတ်းၵၢၼ်ၵေႃႉၼိုင်ႈ ယိပ်းဢဝ်တၢင်းပၢၼ်ႉၶဝ်ႈၽၵ်း ၵႂႃႇတမ်းပၼ်ၶႅၵ်ႇသေ သမ်ႉဢမ်ႇပေႃးတမ်းလီလီလႄႈ ဢဝ်ဢိူၵ်ႇၵူဝ်ႈသႂ်ႇၽိူၼ် ပေႃးဝူၺ်ႇလူင်ၵႂႃႇမူတ်း လိူဝ်သေၼၼ်ႉ ၼႃႈမၼ်းၵေႃႈသမ်ႉဢမ်ႇၵီႈၸူးပိူၼ်ႈထႅင်ႈႁေ။ လိုၼ်းၼုမ်ႇဢၼ်လႆႈႁၼ်လွင်ႈႁဵတ်းသၢင်ႈမၼ်းၼၼ်ႉ ႁဵတ်းႁႂ်ႈၶႅၵ်ႇၶဝ် ဢမ်ႇပေႃးၸႂ်မႃးဢိတ်းၼိုင်ႈလႄႈ မၼ်းၸင်ႇဢဝ်ၽႅၼ်ႇၸဵတ်ႉမၼ်းၼၼ်ႉ ၸဵတ်ႉပၼ်ၼိူဝ်ၽိူၼ်ဢၼ်ဢိူၵ်ႇၼၼ်ႉသေ ယုမ်ႉတေႃႇၶႅၵ်ႇၵႂႃႇ မိူၼ်ပၼ်တၢင်းၼပ်ႉယမ်ၸူးၼၼ်ႉယဝ်ႉ။
လိုၼ်းၼုမ်ႇၵေႃႈ ပႆၵႂႃႇၸွမ်းတၢင်းလင်ယိင်းၵေႃႉၼၼ်ႉသေ
“ယိၼ်းၸူမ်းယဝ်ႉၶႃႈ ဢၼ်သူပွၵ်ႈမႃးၶိုၼ်း.. လၢၼ်ႉၼႆႉၵေႃႈ ယင်းတိုၵ်ႉလူဝ်ႇၵူၼ်းႁဵတ်းၵၢၼ်..ၸိူင်ႉၼင်ႇသူယူႇၶႃႈဢေႃႈ”
ယုမ်ႉၸူးၼင်ႇတဵမ်ၸႂ် လၢတ်ႈတေႃႇယိင်းၵေႃႉၼၼ်ႉၵႂႃႇ ၼင်ႇၸႂ်ယဵၼ်။ ၶေႃႈၵႂၢမ်းမၼ်းၼၼ်ႉ ဢမ်ႇလႆႈမီးၼမ်ႉၵႂၢမ်းဢၼ်ၶိုၵ်ႉယမ်သင် ၵူၺ်းၵႃႈ ထွမ်ႇယဝ်ႉၵေႃႈ မိူၼ်မႃးဢိုၵ်ႉၼိုၵ်ႉၶမ်ဝႆႉယူႇၼႂ်းၸႂ် ၶႂ်ႈထဵင်ၶိုၼ်းလွင်ႈႁဵတ်းသၢင်ႈမၼ်းၵေႃႈ သမ်ႉပေႃးဢမ်ႇၸၢင်ႈယဝ်ႉ။
ဢမ်ႇၵႃးယိင်းၵေႃႉၼႆႉၵူၺ်း ဢၼ်ၼႃႈတူႇသေႁဵတ်းၵၢၼ် ၵူၼ်းၸိူဝ်းဢၼ်ပွၵ်ႈမႃးႁဵတ်းၵၢၼ်ၶိုၼ်းၸိူဝ်းၼၼ်ႉၵေႃႈ ၼႄၽၢင်ႁၢင်ႈ ဢၼ်ဢမ်ႇႁၢၼ်ႉၸႂ် ၼႃႈဢမ်ႇယုမ်ႉဢမ်ႇၵီႈၵမ်ႈၼမ်ၼၼ်ႉယဝ်ႉ။ မိူဝ်ႈဢၼ်ၶႅၵ်ႇၶဝ်ႈလၢၼ်ႉမႃးၼမ်တိၵ်းတိၵ်းၼၼ်ႉ ၵူၼ်းႁဵတ်းၵၢၼ်သမ်ႉ ၼိုၵ်းထိူင်းႁဵတ်းဢမ်ႇၶိုတ်းၵၼ်မႃးလႄႈ လိုၼ်းၼုမ်ႇၵေႃႈတင်းႁဵတ်းၵၢၼ် တင်းလၢတ်ႈတီႈၵူၼ်းႁပ်ႉၶႅၵ်ႇၶဝ်ၵႂႃႇ ႁႂ်ႈၸွႆႈၵၼ်ၼႆယူႇ၊ ၵူၺ်းၵႃႈ မၢင်ၵေႃႉၵေႃႈတူင်ႉ ၵမ်ႈၽွင်ႈၵေႃႈႁူႉယူႇ တင်ႈၸႂ်ဢမ်ႇသူၼ်ၸႂ်သေ ဢမ်ႇႁဵတ်းၵေႃႈမီးယဝ်ႉ။
ၵၢင်ဝၼ်းယဝ်ႉ ၸိုၼ်ႈၶိူဝ်းလႄႈ ၽူႈမၢႆမၼ်းၵေႃႈ ၸူဝ်းၵၼ်မႃးၵိၼ်ၶဝ်ႈတီႈလၢၼ်ႉၼႆယူႇ။ မိူဝ်ႈမႃးႁၼ်ၼႂ်းလၢၼ်ႉၼၼ်ႉ ပေႃးသုၵ်ႉသိၵ်ႉသုၵ်ႉသၵ်ႉလူင်ၵႂႃႇမူတ်း ၵူၺ်းမီးလိုၼ်းၼုမ်ႇလႄႈ ၵူၼ်းႁဵတ်းၵၢၼ်လၢႆၵေႃႉဢွၼ်ႇၵူၺ်း ဢၼ်တူင်ႉၼိုင်လႅၼ်ႈၵႂႃႇလႅၼ်ႈမႃး တေႃႉဝၢၼ်ႇ၊ ၸဵတ်ႉၽိူၼ်တင်ႇၼင်ႈ ၼႂ်းလၢၼ်ႉဢၼ်ၵႂၢင်ႈယႂ်ႇလူင်ၼၼ်ႉ။ မၢင်ၵေႃႉသမ်ႉ တူၺ်းမိူၼ်ႁဵတ်းယူႇ ၵူၺ်းဢမ်ႇတူင်ႉဢမ်ႇၼိုင်သင် ၸဵတ်ႉၽိူၼ်ၼႆၵေႃႈဢဝ်လွႆးလွႆးၵူၺ်း ဢမ်ႇသူၼ်ၸႂ်ၶႅၵ်ႇသူၼ်ၸႂ်ၽႂ် ၼၼ်ႉယဝ်ႉ။
ၵမ်ႈၽွင်ႈဢၼ်ႁၼ်ၸိုၼ်ႈၶိူဝ်းၼၼ်ႉၵေႃႈ ၼႅတ်ႈႁဵတ်းၵႂႃႇယဝ်ႉ၊ ၵမ်ႈၽွင်ႈဢၼ်ဢမ်ႇႁူႉၼၼ်ႉၵေႃႈ ယင်းတိုၵ်ႉႁဵတ်းလဵၼ်ႈလဵၼ်ႈယူႇ။ ၸိုၼ်ႈၶိူဝ်းလႄႈ သၢႆလႅင်းၵေႃႈ ၵႂႃႇၸုၵ်းႁိမ်းၽိူၼ်ဢၼ်ၼိုင်ႈ ဢၼ်မီးၽူႈယိင်းသွင်ၵေႃႉ ၸဵတ်ႉၽိူၼ်ၵႂႃႇၵႂႃႇမႃးမႃး ဢမ်ႇယဝ်ႉႁေပွၵ်ႈၼၼ်ႉလႄႈ သၢႆလႅင်းၸင်ႇၵႂႃႇယူႇႁိမ်းမၼ်းသေလၢတ်ႈ
“ၽိူၼ်ၼႆႉၸွင်ႇတေၸၢင်ႈၼင်ႈလႆႈၶႃႈ!”
“ၽိူၼ်ပဝ်ႇမီးပဵၼ်လၢႆၽိူၼ် ၵႂႃႇၼင်ႈတၢင်ႇတီႈၶႃႈလႄႈ ၽိူၼ်ၼႆႉယင်းတိုၵ်ႉၸဵတ်ႉယူႇၶႃႈ”
“ႁၼ်ၸဵတ်ႉၸဵမ်မိူဝ်ႈၵႆႈယဝ်ႉ..ယူဝ်ဝႃႈတေယဝ်ႉလႄႈ လႆႈမႃးထၢမ်ၶႃႈဢေႃႈ”
ၽူႈယိင်းၵေႃႉၼိုင်ႈ လႆႈႁၼ်ၸိုၼ်ႈၶိူဝ်းၸုၵ်းတူၺ်းယူႇသေ တူၵ်းၸႂ်ၵူဝ်မႃးယဝ်ႉ ႁႂ်ႈၸိုၼ်ႈၶိူဝ်းၼင်ႈယဝ်ႉၵေႃႈ ႁိပ်ႈၼႅတ်ႈလႅၼ်ႈဢွၵ်ႇၵႂႃႇပႅတ်ႈၵမ်းလဵဝ်။ ၽူႈယိင်းထႅင်ႈၵေႃႉၼိုင်ႈၵေႃႈ မိူဝ်ႈႁၼ်ၸိုၼ်ႈၶိူဝ်းၼင်ႈယူႇႁိမ်းမၼ်းၼၼ်ႉ ပဵၼ်ဢၼ်တူၵ်းၸႂ်ၼႃႇလႄႈ ဢၢင်ႈလႅၼ်ႈပၢႆႈယဝ်ႉ ထုၵ်ႇၸိုၼ်ႈၶိူဝ်းႁွင်ႉႁႂ်ႈၵိုတ်းၵႂႃႇ။
“ပေႃးႁဵတ်းၵၢၼ်ၸိူင်ႉၼႆ ဢမ်ႇထုၵ်ႇလီမႃးႁဵတ်းၵၢၼ်ယဝ်ႉ”
ယိင်းၵေႃႉၼၼ်ႉၵေႃႈ ၼႅတ်ႈဢဝ်ၵွင်ဝၢၼ်ႇမၼ်းယဝ်ႉ ဢၢၼ်းဢွၵ်ႇၵႂႃႇယူႇ။
“ပႂ်ႉၵွၼ်ႇလႄႈ..ႁဝ်းယင်းပႆႇလႆႈသင်ႇၶဝ်ႈၽၵ်း ဢမ်ႇၼၼ်ၵေႃႈ..သူဢမ်ႇဢၢၼ်းႁဵတ်းၵၢၼ်တီႈၼႆႈယဝ်ႉႁႃႉ”
ႁဵတ်းႁႂ်ႈယိင်းၵေႃႉၼၼ်ႉဝၢႆႇၼႃးႁူပ်ႉၸူး ၸိုၼ်ႈၶိူဝ်းၶႃၶိုၼ်းယဝ်ႉ။
မိူဝ်ႈမီးၸိုၼ်ႈၶိူဝ်းၼႆၵေႃႈ ၵူၼ်းႁဵတ်းၵၢၼ်ၶဝ် ဢွၼ်ၵၼ်တူင်ႉတူင်ႉတိုၼ်ႇတိုၼ်ႇၵၼ်မႃးၶိုၼ်းယူႇ။ လိုၼ်းၼုမ်ႇၵေႃႈ ဝၢႆးသေႁဵတ်းၵၢၼ်ယဝ်ႉ ဢၢၼ်းတေပွႆႇတူဝ်ပွႆႇၸႂ်မၼ်း လိုဝ်ႈယူႇၼႂ်းႁွင်ႈၼႆလႄႈ ၵူၺ်းသမ်ႉ မီးၵၢၼ်ဢၼ်တေလႆႈႁဵတ်းထႅင်ႈၼႆၵေႃႈ ႁၢင်ႈႁႅၼ်းတူဝ်ဢွၵ်ႇၵႂႃႇယဝ်ႉ။
လိုၼ်းၼုမ်ႇၼၼ်ႉလႆႈမိူဝ်းႁွတ်ႈထိုင် တီႈႁိူၼ်းပီႈၸိင်ႇသေ ႁၼ်ပိၵ်ႉဢိုတ်းၽၵ်းတူဝႆႉ မိူၼ်တေဢမ်ႇယူႇႁိူၼ်းလႄႈ ၸင်ႇလႆႈထၢမ်တီႈၵူၼ်းႁိမ်းႁွမ်းယဝ်ႉ ႁူႉဝႃႈမၼ်းဢွၵ်ႇၵႂႃႇႁဵတ်းၵၢၼ် ၵၢင်ၶမ်ႈၸင်ႇတေပွၵ်ႈမႃးၼႆယူႇ။ လိုၼ်းၼုမ်ႇၵေႃႈ ဢမ်ႇၸၢင်ႈႁဵတ်းႁိုဝ် ၵႃႈတေလႆႈပႂ်ႉတေႃႇပီႈၸိင်ႇပေႃးမႃးၵူၺ်း။
ၵွပ်ႈဝႃႈ ၵပ်းသိုပ်ႇၶဝ်ဢမ်ႇလႆႈသေဢိတ်းလူး တႄႇၸဵမ်မိူဝ်ႈဝၼ်းဢၼ်ၶဝ်ဢွၵ်ႇၵၢၼ်ၵႂႃႇၼၼ်ႉ။ ယၢမ်းၼၼ်ႉ လႅင်းဢွၼ်ႇ သိုပ်ႇၽူင်းမႃးၸူးမၼ်းသေ မိူဝ်ႈလႆႈငိၼ်းသဵင်လုၵ်ႈၼၼ်ႉၵေႃႈ ၼင်ႇႁၢင်ႈ ဢၼ်ႁိူဝ်ႉမႃးတၢင်းဝၼ်းၼၼ်ႉ သမ်ႉပေႃးႁၢႆလူင်ၵႂႃႇမူတ်းယဝ်ႉ။ သမ်ႉဝႃႈ တၢင်းၼွၵ်ႈႁိူၼ်းၼၼ်ႉ လူမ်းတေထူဝ်းထွင်း ယုင်းတေၶူပ်းၵေႃႈ မိူၼ်ႁၢင်ႈဢမ်ႇၵတ်းဢမ်ႇၶူမ်းသင်သေဢိတ်း။
ၵၢင်ၶမ်ႈလိုၵ်းယဵၼ်လိူၼ်လႅင်းဝွႆးဝွႆး မႃႁဝ်ႇႁွင်ႉၸွမ်းၵိဝ်ႇၸွမ်းတၢင်း မေႃးၼၼ်ႈပၼ်းဢူၼ်၊ သဵၼ်ႈတၢင်းၵပ်ႉၵႅပ်ႈလူင်ၼၼ်ႉ ဢမ်ႇမီးသၢႆႁိူဝ်ႈလႅင်းသင် ႁၼ်ငဝ်းလမ်လမ်ဢၼ်မိူၼ်တေပဵၼ်ပီႈၸိင်ႇၼၼ်ႉ မႃးၸူးမၼ်းလွႆးလွႆးယူႇ။
“ပီႈ! ႁွတ်ႈမႃးယဝ်ႉႁႃႉ..”
“ၵၢင်ၶမ်ႈၵၢင်ၶိုၼ်းၸိူင်ႉၼႆမႃးႁဵတ်းသင်တီႈႁိူၼ်းၵဝ်လႃႇ!..”
“ၶႃႈဢဝ်ၼႆႉမႃးပၼ်” ဢဝ်ဝႂ်ဢွၵ်ႇၵၢၼ်ပီႈၸိင်ႇၼၼ်ႉ ယိုၼ်ႈပၼ်ၵႂႃႇယဝ်ႉ။
“တေမႃးဢွၼ်ႈဝွၼ်းႁႂ်ႈၵႂႃႇႁဵတ်းၵၢၼ်ၶိုၼ်းၸိူင်ႉၼၼ်ႁႃႉ ပွၵ်ႈမိူဝ်းၶိုၼ်းလႄႈ ၵဝ်ဢမ်ႇၵႂႃႇၶိုၼ်းလေႃႇ”
ၶဝ်ႈႁိူၼ်းပိၵ်ႉၽၵ်းတူပႅတ်ႈလိုၼ်းၼုမ်ႇယူႇ။
“ပီႈၶႂ်ႈၸင်းၶႃႈၵေႃႈၸင်းလႄႈ..ပေႃးဝႃႈတေႁဵတ်းႁႂ်ႈပီႈၵတ်းယဵၼ်ၸႂ်မႃး ၵူၺ်းၵႃႈ ယွၼ်ႉၵူၼ်းၵေႃႉဢၼ်ပီႈၸင်းၼၼ်ႉသေ ယႃႇပေႁႂ်ႈပီႈလႆႈမႃးယၢပ်ႇၸႂ်..ယွၼ်ႉၵူၼ်းၵေႃႉၼၼ်ႉၶႃႈလႄႈ ဝႆႉဝႃႈ..လွင်ႈၵၢၼ်လႄႈလွင်ႈၵူၼ်းၼၼ်ႉ ဢမ်ႇၸႂ်ႈလွင်ႈလဵဝ်ၵၼ်သေ ပွၵ်ႈၵႂႃႇႁဵတ်းၵၢၼ်ၸွင်ႇလႆႈႁိုဝ်..”
“ႁဝ်းၸႅၵ်ႇဢမ်ႇလႆႈလေႃႇၼႃႈ..လွင်ႈၵၢၼ်လႄႈလွင်ႈၵူၼ်းမၼ်းပိူင်ႈၵၼ်ၸိူင်ႉႁိုဝ် သင်လႆႈႁဵတ်းၵၢၼ်ၸွမ်းၵူၼ်းဢၼ်ထုၵ်ႇၵၼ် ဢမ်ႇဝႃႈႁဵတ်းၵၢၼ်ယၢပ်ႇတၢၼ်ႇႁိုဝ်ၵေႃႈ ႁဝ်းႁဵတ်းၵႂႃႇလႆႈယူႇ ၵူၺ်းၵႃႈ သင်ႁဵတ်းၸွမ်းၵူၼ်းဢၼ်ဢမ်ႇလႆႈၸႂ်ၼႆ ဢမ်ႇဝႃႈႁဵတ်းသင်ၵေႃႈ ယူႇယၢပ်ႇၶၢၼ်ၸႂ်ၵႂႃႇမူတ်းယဝ်ႉ သမ်ႉဝႃႈၵၢၼ်တၢင်ႇတီႈ မၼ်းယၢပ်ႇ..ဢမ်ႇလႆႈငိုၼ်းၼမ်ၵေႃႈ ႁဝ်းတေဢမ်ႇၵႂႃႇၶိုၼ်းလေႃႇ ပေႃးဝႃႈသူယင်းယူႇ”
လိုၼ်းၼုမ်ႇၵေႃႈ ႁိုဝ်ႁတ်းတၵ်းသဵင် ပီႈၸိင်ႇသိုပ်ႇလၢတ်ႈထႅင်ႈ
“ပေႃးလၢတ်ႈၸိူင်ႉၼႆ..သူၵေႃႈဢမ်ႇႁတ်းတၵ်းသဵင်ယဝ်ႉလႃႇ သူတေဢမ်ႇႁတ်းဢွၵ်ႇၵၢၼ်ၵႂႃႇဢမ်ႇၸႂ်ႈႁႃႉ”
လိုၼ်းၼုမ်ႇၵေႃႈဝူၼ်ႉထိုင်ၶိုၼ်း လွင်ႈဢၼ်ပဵၼ်ပၼ်ႁႃမႃးၸိူဝ်းၼၼ်ႉ ပဵၼ်မႃးယွၼ်ႉမၼ်းၵူၺ်းလႄႈ၊ ပီႈၸိင်ႇၼၼ်ႉၵေႃႈ ပဵၼ်ၵူၼ်းလမ်ႇလွင်ႈ တွၼ်ႈတႃႇၵူၼ်းႁဵတ်းၵၢၼ်ၶဝ်မိူၼ်ၵၼ် ယွၼ်ႉမၼ်းၵူၺ်း ႁဵတ်းႁႂ်ႈၵူႈၸိူဝ်ႉၵူႈလွင်ႈ ပေႃးသုၵ်ႉသၵ်ႉလူင်ၵႂႃႇမူတ်းၼၼ်ႉ မၼ်းၵေႃႈမီးသုၼ်ႇတေလႆႈဢဝ်ပုၼ်ႈၽွၼ်းယူႇ ၼႆသေ တွပ်ႇၸူးၵႂႃႇၶိုၼ်း
“လႆႈယူႇၶႃႈ ပီႈပွၵ်ႈၵႂႃႇႁဵတ်းၵၢၼ်ၶိုၼ်းလႄႈ ၶႃႈၵေႃႉတေဢွၵ်ႇၵၢၼ်ၵႂႃႇၵူၺ်း”
လိုၼ်းၼုမ်ႇၵေႃႈ ၵွင်လင်ပွၵ်ႈမိူဝ်းၵႂႃႇတႂ်ႈငဝ်းလပ်းသိင်ႇၼၼ်ႉလွႆးလွႆးယဝ်ႉ။ ပီႈၸိင်ႇၼၼ်ႉၵေႃႈ လွမ်လွမ်ပိုတ်ႇၽၵ်းတူၶျွင်းတူၺ်းၸွမ်းလင်မၼ်းယူႇ။
လူမ်းထူဝ်းထွင်းၽတ်ႉၶဝ်ႈသႂ်ႇ တႂ်ႈသိူဝ်ႈဢွၼ်ႇမၢင်မၢင်ၼၼ်ႉ သမ်ႉပေႃးၵတ်းလၢင်ႈငႅၼ်းငႅၼ်းလူင်ဝႆႉယဝ်ႉ။ မိူဝ်ႈပွၵ်ႈမိူဝ်းၵႂႃႇလွႆးလွႆးၼၼ်ႉ လႆႈငိၼ်းသဵင်တိၼ်လင်မေႃးၸွမ်းလင်မၼ်းမႃးလႄႈ ဢဝ်မၼ်းသမ်ႉပေႃးဢမ်ႇႁတ်းဝၢႆႇတူၺ်းတၢင်းလင်ယဝ်ႉ ၼႅတ်ႈယုၵ်ႉယၢင်ႈတိၼ်လႅၼ်ႈဝႆးဝႆး ႁႂ်ႈပေႃးထိုင်တၢင်းလူင်ၼႆယူႇ။
ယၢမ်းၼၼ်ႉသမ်ႉ ၽႃႇၺႃးၵွၼ်ႈၶႅင်ၶႅင်ဢၼ်ၼိုင်ႈသေ ၶီႈလိုတ်းလူမ်ႉလူင်လူင်းၵႂႃႇ၊ ငိၼ်းသဵင်ၵူၼ်းလင်မေႃးလႄႈ ၸင်ႇႁူႉဝႃႈပဵၼ်ၵူၼ်းၼႆသေ မိူၼ်တေပဵၼ်ၵူၼ်းမဝ်းလဝ်ႈၼႆယူႇ ယွၼ်ႉၺိၼ်းဢၢႆလဝ်ႈႁိုၼ်ႇႁိုၼ်းႁႅင်းဝႆႉလႄႈ ယူႇယူႇၵူၼ်းၵေႃႉၼၼ်ႉသမ်ႉ ၸၼ်ၶႃမၼ်းဝႆႉပေႃးမၼ်ႈတဵင်ႈတဵင်ႈယဝ်ႉ။ တေသိုပ်ႇလႅၼ်ႈၵေႃႈဢမ်ႇၸၢင်ႈ ၶတ်းၸႂ်ၽိုတ်ႉတိၼ်မၼ်းဢွၵ်ႇၵႂႃႇယူႇ ၵူၺ်းၵႃႈ ယိုင်ႈၽိုတ်ႉၵႃႈႁိုဝ် ၵူၼ်းၵေႃႉၼၼ်ႉ ယိုင်ႈၶႅၼ်းၵမ်ႁႅင်းမႃးတိၵ်းတိၵ်း။ သဵင်တိၼ်ဢၼ်မေႃးမႃးၸွမ်းတၢင်းလင်ၼၼ်ႉၵေႃႈ မိူၼ်တေမႃးၶိုတ်းၸမ်မၼ်းၼႃႇယဝ်ႉလႄႈ မၼ်းၸင်ႇထင်ႇႁႅင်းထိပ်ႇဢီးသႂ်ႇၵူၼ်းၵေႃႉၼၼ်ႉ သမ်ႉပေႃးၽိုၼ်ႉလူင်ၵႂႃႇယဝ်ႉ၊ ၵူၼ်းၵေႃႉၼၼ်ႉၵေႃႈ ပွႆႇၶေႃႈတိၼ်မၼ်းၵႂႃႇႁင်းၵူၺ်းယူႇ။ မၼ်းၸင်ႇထွတ်ႇယိပ်းဢဝ်ၶႅပ်းတိၼ်မၼ်းသေ လႅၼ်ႈလူင်ၵႂႃႇဝႆးဝႆးယဝ်ႉ။ ၽႃႇတိၼ်ဢွၼ်ႇမၼ်း ယုၵ်ႉတမ်းယဵပ်ႇယၢင်ႈသႂ်ႇၼိူဝ်လိၼ်၊ ၼိူဝ်မၢၵ်ႇႁိၼ်ၼၼ်ႉ ဢမ်ႇႁူႉၸဵပ်းႁူႉသႅပ်ႇသင် ႁွတ်ႈထိုင်ၽင်ႇတၢင်းလူင်ယဝ်ႉၵေႃႈ ယင်းတိုၵ်ႉသိုပ်ႇလႅၼ်ႈလူင်ၵႂႃႇတိၵ်းတိၵ်း။
ႁႃႈပီႊပူၼ်ႉမႃး မွင်းလူင်းႁူင်းႁဵၼ်းၵူၺ်း မၼ်းၵေႃႈၼႅတ်ႈလႅၼ်ႈလူင်မိူဝ်းႁိူၼ်း တွၼ်ႈတႃႇမိူဝ်းလဵၼ်ႈၸွမ်းလုၵ်ႈမၼ်းၼႆသေ ပဵၼ်ၶၢဝ်းယၢမ်းဢၼ်မီးတၢင်းသိူဝ်းတေႉတေႉယူႇယဝ်ႉ။ ၵူႈဝၼ်းၵူႈဝၼ်း လႅၼ်ႈပွၵ်ႈမိူဝ်းႁိူၼ်းတႃႇသေႇလႄႈ ႁဵတ်းႁႂ်ႈမၼ်းပဵၼ်ၵူၼ်းလႅၼ်ႈၽၢႆၵႂႃႇ လူၺ်ႈဢမ်ႇလႆႈၽိုၵ်းၼၼ်ႉယဝ်ႉ။ ထိုင်ၼင်ႇဝၼ်းၼိုင်ႈ ၵူႈယၢင်ႈဢၼ်မၼ်းလႅၼ်ႈလူင်ပွၵ်ႈမိူဝ်းႁိူၼ်းၼၼ်ႉ မိူၼ်ဢမ်ႇတၼ်းႁူႉဝႃႈတမ်းၼိူဝ်လိၼ်ယဝ်ႉ မၼ်းလႅၼ်ႈဝႆးႁႅင်းၼႃႇ မိူဝ်းထိုင်ႁိူၼ်းၵေႃႈ ၶႃပေႃးဢူၼ်ႈလူင်ၵႂႃႇမူတ်း ယွၼ်ႉပိူဝ်ႈ ပေႃႈၶဝ်ၵိုင်ႉၵၢင်ႉဢမ်ႇယူႇလီ ပဵၼ်ႁႅင်းဝႆႉၼၼ်ႉယဝ်ႉ။ လႅင်းဢွၼ်ႇၼၼ်ႉတႄႉ ၼွၼ်းဢဝ်တိၼ်ပူၵ်းယူႇႁိမ်းပေႃႈၶဝ်ၼၼ်ႉယူႇ။
ဝၢႆးသေဝၼ်းၼၼ်ႉ ပေႃႈၶဝ်ၵေႃႈ ပဵၼ်တၢင်းပဵၼ်ႁၢႆႉႁႅင်းမႃးတိၵ်းတိၵ်း ယူတ်းယႃတီႈႁူင်းယႃၼႂ်းဝဵင်းဢွၼ်ႇၼၼ်ႉ ဢမ်ႇလႆႈယဝ်ႉၼႆသေ ၼင်ႇႁိုဝ်ပေႃႈပေႃးတေၸိုၼ်ႈၶႅၼ်းၶိုၼ်းၼၼ်ႉ မၼ်းၵေႃႈလႆႈဢွၼ်ဢဝ် ၵႂႃႇယူတ်းယႃၼႂ်းဝဵင်းလူင်ယူႇ။
တႃႇတေယူတ်းယႃႁႂ်ႈပေႃးၸိုၼ်ႈၶႅၼ်းလီၼၼ်ႉၵေႃႈ မၼ်းလႆႈၸေးဢဝ်တင်းလႅင်းဢွၼ်ႇသေ လႅၼ်ႈၵႂႃႇၵူႈငိုၼ်းပိူၼ်ႈႁိူၼ်းၼိုင်ႈယဝ်ႉႁိူၼ်းၼိုင်ႈ ၵူၺ်းၵႃႈ ဢမ်ႇပေႃးၸႂ်ႉၸၢႆႇလႄႈ လႆႈၵႂႃႇၵူႈယိမ်တီႈႁိူၼ်းသထေး ဢၼ်မီးလိူဝ်ပိူၼ်ႈၼႂ်းဝၢၼ်ႈၶဝ်ၼၼ်ႉယဝ်ႉ ဢဝ်လၢၼ်ႉမၼ်းၵမ်ႉဝႆႉယူႇ။
ဝၢႆးသေဢဝ်ၵႂႃႇယူတ်းယႃတီႈၼႂ်းဝဵင်းလူင်ၼၼ်ႉမႃးယဝ်ႉၵေႃႈ မိူၼ်ဝႃႈ ပေႃႈတေၸိုၼ်ႈၶႅၼ်းလီမႃးယူႇ ၵူၺ်းၵႃႈ ဢမ်ႇၸၢင်ႈႁဵတ်းၵၢၼ်သင်လႆႈတေႉတေႉ။ မၼ်းၵေႃႈ မိူဝ်ႈၽွင်းလႆႈၵႂႃႇလုမ်းလႃးတူၺ်းထိုင်ပေႃႈ တီႈၼႂ်းဝဵင်းလူင်ၼၼ်ႉ ပဵၼ်ၽွင်းတွပ်ႇလိၵ်ႈလႄႈ ဢမ်ႇၸၢင်ႈၶိုၼ်းမႃးတွပ်ႇသေ ႁဵတ်းႁႂ်ႈမၼ်းဢမ်ႇဢွင်ႇပူၼ်ႉၸၼ်ႉယဝ်ႉ။
သမ်ႉဝႃႈဢမ်ႇဢွင်ႇပူၼ်ႉၸၼ်ႉသေတႃႉ မၼ်းၵေႃႈဢမ်ႇလႆႈသိုပ်ႇၶိုၼ်ႈႁဵၼ်းၶိုၼ်း ယွၼ်ႉဢမ်ႇမီးၽႂ်လုမ်းလႃးၵေႃႉပဵၼ်ပေႃႈ ဢၼ်ဢမ်ႇယူႇလီၼၼ်ႉလႄႈ လုၵ်ႈဢွၼ်ႇဢၼ်ယင်းတိုၵ်ႉလႅင်ယူႇၼၼ်ႉသေ သမ်ႉမီးၼီႈထူမ်ႈႁူဝ်ဢၼ်လူဝ်ႇတႅၼ်းၼၼ်ႉၼႆၵေႃႈ မၼ်းၸင်ႇပိုတ်ႇလၢၼ်ႉပေႃႈၶဝ် ၶိုၼ်းၶၢႆၶဝ်ႈသွႆးၵႂႃႇယူႇ။ ၵွပ်ႈဝႃႈ ၵႆႉလႆႈၸွႆႈပေႃႈႁဵတ်းယူႇတႃႇသေႇလႄႈ မၼ်းၵေႃႈလႆႈမေႃႁဵတ်းမႃးၼၼ်ႉယဝ်ႉ။
မၼ်းႁဵတ်းၵၢၼ်တႅၼ်းၼီႈယင်းပႆႇပေႇမူတ်း ပေႃႈၵေႃႈသမ်ႉပေႃးဢမ်ႇယူႇလီမႃးထႅင်ႈယဝ်ႉ။ တႃႇၵႃႈယူတ်းယႃပေႃႈၼႆၵေႃႈ ၵႃႈတေလႆႈဢဝ်လၢၼ်ႉၵႂႃႇၵမ်ႉထႅင်ႈၵူၺ်း ၽၢႆႇႁပ်ႉၵူႈၼၼ်ႉသမ်ႉ ဢမ်ႇၶၢမ်ႇပၼ်ၵူႈ တေႃႇထိုင်မၼ်းပေႃးလႆႈၶၢႆလၢၼ်ႉပၼ်ၶဝ်ယဝ်ႉ။ သမ်ႉဝႃႈၶၢႆၵႂႃႇယဝ်ႉသေတႃႉ လႆႈၶၼ်မၼ်းဢေႇၼႃႇလႄႈ ငိုၼ်းဢၼ်လႆႈမႃးၼၼ်ႉ ဢမ်ႇၵုမ်ႇထူၼ်ႈသေ လႆႈၵူႈလိူဝ်ပဵၼ်ၼီႈဝႆႉထႅင်ႈ ယူႇယဝ်ႉ။
ဢဝ်ပေႃႈၵႂႃႇႁူင်းယႃလူင်ထႅင်ႈပွၵ်ႈၼိုင်ႈ ဢမ်ႇႁၼ်ၶႅၼ်းသင်မႃး ၵူၺ်းၵႃႈ မေႃၵေႃႈႁႂ်ႈဢဝ်ပွၵ်ႈႁိူၼ်းၶိုၼ်းၼႆယူႇ ဝၢႆးသေယူႇႁိူၼ်းလႆႈလၢႆဝၼ်းၵူၺ်း ပေႃႈၵေႃႈလႆႈလူႉသဵင်ႈတၢႆၵႂႃႇယဝ်ႉ။ ဝၢႆးပေႃႈလူႉတၢႆၵႂႃႇယဝ်ႉ လွင်ႈဢၼ်မၼ်းလႆႈထူပ်း ဢမ်ႇတွၼ်ႉမီးလွင်ႈၵတ်းယဵၼ်ၸႂ်လႆႈလႄႈ ၵူႈဝၼ်းၵူႈဝၼ်းၼၼ်ႉ မီးၵူၼ်းမႃးယွၼ်းၼီႈမၼ်းယူႇတႃႇသေႇ၊ ၵၢၼ်ၵေႃႈဢမ်ႇလႆႈႁဵတ်း၊ ၵိၼ်ၵေႃႈသမ်ႉလူဝ်ႇၵိၼ်ယူႇ၊ လုၵ်ႈၵေႃႉသမ်ႉလူဝ်ႇလဵင်ႉထႅင်ႈလႄႈ မၢင်ပွၵ်ႈၵေႃႈ လႆႈၸေးဢဝ်တင်းလုၵ်ႈသေ ၵႂႃႇႁႃၵိၼ်ၸၢင်ႈ သၵ်ႉၶူဝ်းလွႆးၶူဝ်းပိူၼ်ႈ ၸိူဝ်းၼႆႉၵေႃႈႁဵတ်းယဝ်ႉ။ ႁဵတ်းၸိူင်ႉၼၼ်ၵေႃႈ ပေႃးယူႇၵႂႃႇလႆႈဝၼ်းလႂ်ဝၼ်းၼၼ်ႉၵူၺ်း မၼ်းၸင်ႇတႅပ်းတတ်း ၶၢႆႁိူၼ်းပၼ်တီႈၸဝ်ႈၼီႈယဝ်ႉ တႅၼ်းၼီႈသေ လႆႈငိုၼ်းၸႂ်ႉၸၢႆႇမႃးၵမ်ႈၽွင်ႈလႄႈ ဢွၵ်ႇၶၢဝ်းတၢင်းၵႂႃႇႁႃၵၢၼ်ၼႂ်းဝဵင်းလူင် ယူႇယဝ်ႉ။
ၽူးယိင်းတူဝ်ယွမ်လဵၵ်ႉသေး ၸေးလုၵ်ႈဢွၼ်ႇသေ မီးယူႇၶႅပ်ႇလႅၼ်ဝဵင်းလူင် တင်းလႅတ်ႇမႆႈတႅင်ႈတႅင်ႈလူင်သေ တီႈယူႇတီႈသဝ်းၵေႃႈဢမ်ႇမီး၊ ငိုၼ်းဢၼ်လႆႈမႃးၼၼ်ႉၵေႃႈ ၸၢႆႇၵႃႈၵႃးၵႂႃႇ ဢမ်ႇပေႃးၶႂ်ႈၵိုတ်းလိူဝ်သင်ယဝ်ႉလႄႈ လူဝ်ႇဝႆႉသိုဝ်ႉလဵင်ႉၼူမ်းလုၵ်ႈၼႆၵေႃႈ ဢမ်ႇႁတ်းၸၢႆႇၵိၼ်သင်သေဢိတ်း တွင်ႉမႆႈယူႇၵေႃႈ လႆႈတၢင်းတွင်ႉမႆႈလၢႆလၢႆၵူၺ်း။
ပႆၵႂႃႇၸွမ်းသၢႆသဵၼ်ႈတၢင်းဝဵင်းလူင်ၼၼ်ႉ သမ်ႉမီးသႅင်ႇၶၢႆၶဝ်ႈၼမ်ႉတၢင်းၵိၼ်ပေႃးၸေးလူင်ၵႂႃႇမူတ်း ၶႂ်ႈၵိၼ်ၼႃႇၵေႃႈဢမ်ႇၸၢင်ႈႁဵတ်းႁိုဝ် ၵႃႈလႆႈၸုၵ်းတူၺ်းသေဢိုၼ်ၼမ်ႉလၢႆးယူႇၵူၺ်း။ ပႆၵႂႃႇႁွတ်ႈထိုင်တီႈ ၼၢႆးမွၼ်ႇၵေႃႉၼိုင်ႈ ၼင်ႈၶၢႆၶဝ်ႈမုၼ်းယူႇလႄႈ မိူဝ်ႈႁၼ်သွင်ၵေႃႉမႄႈလုၵ်ႈမႃးၼၼ်ႉ မိူၼ်ႁူႉလႆႈဝႃႈ သွင်ၶႃလႅပ်ႈတေတွင်ႉမႆႈၼႆသေ လင်ၵွမ်းၵွမ်းၶႅၼ်ယွၼ်ႇယွၼ်ႇ ယိပ်းဢဝ်ၶဝ်ႈမုၼ်းမၼ်းၼၼ်ႉ ယိုၼ်ႈပၼ်ၶႃမႄႈလုၵ်ႈၵႂႃႇယဝ်ႉ။
ၶဝ်ႈမုၼ်းၼၼ်ႉတႄႉ ပဵၼ်ၶဝ်ႈမုၼ်းဢွၵ်းၵူၺ်းၼင်ႇၵဝ်ႇ မိူၼ်ဝႃႈ မၼ်းဝၢၼ်တႄႉတႄႉၼၼ်ႉယဝ်ႉ။ ၼၢႆးမွၼ်ႇၼၼ်ႉၵေႃႈ ဢမ်ႇၶီႈထီႇၶီႈၼဵဝ်သင်သေ ပၼ်မၼ်းၵိၼ်တေႃႇပေႃးဢိမ်ႇယူႇ။ လိုၼ်းၼုမ်ႇၵေႃႈဝၢင်းၶူဝ်းမၼ်းသေ ၼင်ႈလိုဝ်ႈယူႇၸိူဝ်းၼၼ်ႉယဝ်ႉ။ ၵၢင်ဝၼ်းၸၢႆႉၸိူၼ်းလပ်ႉလွႆၵႂႃႇ ၵူၼ်းၵႃႉၵူၼ်းၶၢႆၶဝ်ၵေႃႈ ဢွၼ်ၵၼ်သိမ်းၶူဝ်းသိမ်းလဵင်းၵၼ်သေ ၼၢႆးမွၼ်ႇၼၼ်ႉၵေႃႈ ႁႅၼ်းၶူဝ်းႁႅၼ်းလဵင်းမၼ်းမိူၼ်ၵၼ်ယဝ်ႉ။ လိုၼ်းၼုမ်ႇဢၼ်ႁၼ်ၼၢႆးမွၼ်ႇ သိမ်းၶူဝ်းယူႇႁင်းၵူၺ်းၼၼ်ႉ ၸင်ႇလႆႈၸွႆႈသိမ်းၵႂႃႇပၼ်ယူႇ၊ ၸေးဢဝ်တင်းလႅင်းဢွၼ်ႇသေ ၸွႆႈယွင်ႈၶူဝ်းၶွင် မိူဝ်းသူင်ႇၼၢႆးမွၼ်ႇထိုင်ႁိူၼ်းယဝ်ႉ။
ၽွင်းဢၼ်ပွၵ်ႈမိူဝ်းၵႂႃႇၸွမ်းၵၼ်ၼၼ်ႉ ၶဝ်ၵေႃႈဢုပ်ႇၵၼ်လူင်မိူဝ်းယူႇ။ မိူဝ်ႈၼၢႆးမွၼ်ႇႁူႉလွင်ႈတၢင်း ဢၼ်ႁဵတ်းႁႂ်ႈၶႃလႆႈမႃးၼႂ်းဝဵင်းလူင်ၼႆႉၼႆၵေႃႈ ပဵၼ်ဢၼ်ႁၼ်ထိုင်ၵၢင်ၸႂ်လိုၼ်းၼုမ်ႇမႃးသေ ပၼ်လိုဝ်ႈသဝ်းတီႈႁိူၼ်းမၼ်းၵႂႃႇၸူဝ်ႈၶၢဝ်း ၼႆယဝ်ႉ။ လိုၼ်းၼုမ်ႇၵေႃႈ ႁိုဝ်ယူႇလၢႆ ၸွႆႈၼၢႆးမွၼ်ႇႁဵတ်းတၢင်းၶၢႆ၊ တေႃႉၶူဝ်းၵုၼ်ႇၶူဝ်းၶၢႆ၊ ၸွႆႈၶၢႆတၢင်းၶၢႆ ၸိူဝ်းၼႆႉမႃးယူႇ။ သမ်ႉဝႃႈၶၢဝ်းယၢမ်းယူႇၸွမ်းၵၼ်ဢမ်ႇႁိုင်သေတႃႉ ၶဝ်သၢမ်ၵေႃႉၼၢႆးမွၼ်ႇၵေႃႈ တူၺ်းထိုင်ၵၼ် မိူၼ်ပဵၼ်ၼၢႆးလၢၼ်ၵၼ်တႄႉတႄႉၼၼ်ႉယဝ်ႉ။
ယၢမ်းၵၢင်ၶမ်ႈ ၶမ်ႈၼိုင်ႈ တီႈႁိူၼ်းၼၢႆးမွၼ်ႇၼၼ်ႉ ငိၼ်းသဵင်ၵူၼ်းမဝ်းလဝ်ႈမေႃးပၼ်းယူႇလႄႈ သဵင်ၽၵ်းတူပိုတ်ႇၽုၺ်ႇၵႂၢင်ႈမႃး သမ်ႉမႅၼ်ႈၽွင်းလိုၼ်းၼုမ်ႇ ယင်းတိုၵ်ႉဢဝ်လႅင်းဢွၼ်ႇၼွၼ်းယူႇၼၼ်ႉယဝ်ႉ။ ၸင်ႇမီးၵူၼ်းၸၢႆးၵေႃႉၼိုင်ႈ ယၵ်ႉတူၺ်းၸူးမၼ်းႁူဝ်တေႃႇတိၼ် မိူၼ်တေသူၼ်ၸႂ်တူဝ်ၶိင်းမၼ်းမႃးသေ ပုင်ႈၶဝ်ႈႁႃမၼ်းၵႂႃႇ၊ သဵင်ႁွင်ႉမၼ်းလင်မေႃးမႃး လႅင်းဢွၼ်ႇႁွင်ႉႁႆႈလႄႈ ႁွပ်ႇဢဝ်လႅင်းဢွၼ်ႇသေ ၶတ်းၸႂ်ပၢႆႈၵူၼ်းၵေႃႉၼၼ်ႉယူႇ။ ၵူၺ်းၵႃႈ ၵူၼ်းၵေႃႉၼၼ်ႉသမ်ႉ ၵႅၼ်ႇၶႅင်မီးႁႅင်းၼႃႇလႄႈ ယိုင်ႈၶတ်းၸႂ်ပၢႆႈ ယိုင်ႈမၼ်းသုတ်ႉၶဝ်ႈၸမ်တိၵ်းတိၵ်း၊ ၼၢႆးမွၼ်ႇၼၼ်ႉၵေႃႈ လႆႈငိၼ်းသဵင်ယဝ်ႉ ၼႅတ်ႈၶဝ်ႈမႃးဢီးၸွႆႈသေ ႁႂ်ႈလိုၼ်းၼုမ်ႇၶႃမႄႈလုၵ်ႈပၢႆႈဢွၵ်ႇၵႂႃႇယူႇ။ ၵူၼ်းၵေႃႉၼၼ်ႉၵေႃႈ ဢၢင်ႈလမ်းၵႂႃႇၸွမ်းၼႆသေတႃႉ ၵူၺ်းၵႃႈ ၼၢႆးမွၼ်ႇၼၼ်ႉသမ်ႉ ႁွမ်ႁႅင်းမၼ်းသေ ၵွတ်ႇၶႃၵူၼ်းၵေႃႉၼၼ်ႉဝႆႉယဝ်ႉ။ ႁႅင်းလူင်ၵူၼ်းၵေႃႉၼၼ်ႉ ထိပ်ႇဢီးသႂ်ႇပၼ်ၼၢႆးမွၼ်ႇ သမ်ႉပေႃးသဵၼ်ဝူင်လူင်ၵႂႃႇယဝ်ႉ သိုပ်ႇလမ်းၸွမ်းလိုၼ်းၼုမ်ႇၶႃထႅင်ႈယူႇ။
လိုၼ်းၼုမ်ႇၼၼ်ႉၵေႃႈ ၶတ်းၸႂ်လႅၼ်ႈၼင်ႇၵႃႈႁႅင်းမီးသေ လႅၼ်ႈလူင်ၵႂႃႇတိၵ်းတိၵ်း လႅၼ်ႈပေႃးဢမ်ႇတၼ်းႁူႉဝႃႈ မၼ်းလႅၼ်ႈလတ်းၽၢၼ်ႇသင်မႃးလၢႆလၢႆယဝ်ႉ။ မိူဝ်ႈႁူႉဝႃႈလႅပ်ႈတေလွတ်ႈၽေးယဝ်ႉၼႆၵေႃႈ လႆႈၵိုတ်းလိုဝ်ႈႁိူဝ်ႉၵႂႃႇသေ ဝၢႆႇတူၺ်းၸိူဝ်းၼၼ်ႉသမ်ႉ ပဵၼ်ၼႃႈလၢၼ်ႉ ဢၼ်မၼ်းႁဵတ်းၵၢၼ်ယူႇၼၼ်ႉယဝ်ႉ။
လိုၵ်းၵေႃႈလိုၵ်းၼႃႇယဝ်ႉလႄႈ တႃႇတေႁႃလူတ်ႉၵေႃႈ လႅပ်ႈဢမ်ႇမီးလူတ်ႉလႅၼ်ႈယဝ်ႉ။ မိူဝ်ႈယင်းတိုၵ်ႉ လိုဝ်ႈႁိူဝ်ႉၵတ်းၵတ်းယဵၼ်ယဵၼ်ယူႇၼၼ်ႉ ၸင်ႇမီးသဵင်မေႃးမႃးဢမ်ႇၸမ်ဢမ်ႇၵႆၼၼ်ႉဝႃႈ
“လိုၵ်းပေႃးတၢၼ်ႇၼႆႉယဝ်ႉ ပဵၼ်သင်လႄႈ..ယင်းတိုၵ်ႉမီးယူႇတီႈၼႆႈလႃႇ”
လိုၼ်းၼုမ်ႇဝၢႆႇတူၺ်းၸွမ်းသဵင်ၼၼ်ႉသေ ႁၼ်ၸိုၼ်ႈၶိူဝ်း ပႆမႃးႁႃမၼ်းယူႇ။
“သူၶႃႈလူး..ၶၢဝ်းၼႆႉယဝ်ႉ..ပဵၼ်သင်လႄႈမႃးမီးယူႇတီႈၼႆႈၶႃႈ.. ”
“လူမ်းမၼ်းၵတ်းယဵၼ်လီ”
ၵႂႃႇၼင်ႈယူႇႁိမ်းလိုၼ်းၼုမ်ႇယဝ်ႉ၊ မိူၼ်ဝႃႈသၢႆတႃမၼ်းၼၼ်ႉ ႁၼ်မႅၼ်ႈၺႃးတိၼ်လိုၼ်းၼုမ်ႇ မိူၼ်တေၸမ်ႉလိူတ်ႈဝႆႉလႄႈ
“တိၼ်သူၼၼ်ႉ….”
လိုၼ်းၼုမ်ႇၵေႃႈ ဢမ်ႇလႆႈဝူၼ်ႉသင်သေ တွပ်ႇၵႂႃႇ
“ဢေႃႈ.. ႁၼ်ဝႃႈထွတ်ႇၶႅပ်းတိၼ်သေပႆ မၼ်းၵတ်းယဵၼ်လီ”
“ၸိူင်ႉၼၼ်ႁႃႉ..ၵူၺ်းၵႃႈ..မိူၼ်ဝႃႈမၼ်းလိူတ်ႈယူႇၼႃ”
ၸင်ႇတၼ်းၾၢင်ႉသတိတူၺ်းတိၼ်မၼ်းလီလီယဝ်ႉ ဢဝ်မၼ်းမိုင်ယဵၼ်လူင်ၵႂႃႇၵႅပ်ႉၼိုင်ႈသေ
“မိူၼ်ဝႃႈတိၼ်ႁဝ်းၼၼ်ႉ တေၼႃၼႃႇပူၼ်ႉတီႈယဝ်ႉ လိူတ်ႈဢွၵ်ႇတၢၼ်ႇၼႆႉၵေႃႈ ဢမ်ႇႁူႉဝႃႈမၼ်းၸဵပ်း”
သိၵ်ႇဢဝ်ၶႅၼ်သိူဝ်ႈမၼ်းၶွၼ်ၼိုင်ႈ မႃးႁတ်ႉပႅတ်ႈတီႈဢၼ်လိူတ်ႈဢွၵ်ႇၼၼ်ႉသေ
“လိုၵ်းၼႃႇယဝ်ႉ ၶႃႈတေယွၼ်းမိူဝ်းၵွၼ်ႇ”
ၸိုၼ်ႈၶိူဝ်းၼၼ်ႉ ႁၼ်ၶူၼ်ႁူဝ်လိုၼ်းၼုမ်ႇ သမ်ႉပေႃးယမ်းလူင်ၵႂႃႇမူတ်း၊ ၼႃႈၵေႃႈပေႃးယမ်းလူင်ၵႂႃႇသဵင်ႈ၊ သိူဝ်ႈၶူဝ်းၼၼ်ႉၵေႃႈ မိူၼ်တေမိုၵ်းယမ်းဝႆႉမိူၼ်ၵၼ်လႄႈ လူမ်းၵတ်းၵတ်းၼၼ်ႉသမ်ႉ ထူဝ်းထွင်းမႃးသေ မိူဝ်ႈလႆႈႁပ်ႉႁူႉႁႅင်းလူမ်းထွင်းၼၼ်ႉၵေႃႈ ၼင်ႇႁၢင်ႈၶူၼ်တုမ်ႇၼိူဝ်ႉမၼ်း သမ်ႉပေႃးၵီႈသၢၼ်ႈလူင်မႃးၵမ်းလဵဝ်ယဝ်ႉ။ ၸိူင်ႉၼင်ႇလိုၼ်းၼုမ်ႇ ဢၼ်သႂ်ႇသိူဝ်ႈမၢင်မၢင် ၶႅၼ်သိူဝ်ႈၶၢတ်ႇထႅင်ႈႁေၼၼ်ႉ တေၵတ်းတၢၼ်ႇႁိုဝ်ၼႆ ၸင်ႇထွတ်ႇဢဝ်သိူဝ်ႈၵူၵ်ႉမၼ်းၼၼ်ႉပၼ်ၵႂႃႇ။ လိုၼ်းၼုမ်ႇၵေႃႈ ၵူမ်ႈတူၺ်းတူဝ်ၵဝ်ႇ မိူၼ်ပဵၼ်ၵူၼ်းတူၵ်းၼမ်ႉဝႆႉယူႇ၊ တင်းဢၢႆတူဝ်မဵၼ်ႁိူဝ်ႇမဵၼ်ၶႆးသေ တင်းသိူဝ်ႈၵႃႈၶၼ်ယႂ်ႇၶဝ်ၼၼ်ႉ ဢမ်ႇၵိုင်ႇတၢင်းဢဝ်မႃးသႂ်ႇၼႆလႄႈ ၸင်ႇလႆႈထဵင်ၵႂႃႇၶိုၼ်းယဝ်ႉ။
ၸိုၼ်ႈၶိူဝ်းၼၼ်ႉၵေႃႈဢမ်ႇတၼ်းသူၼ်ၸႂ်သင် ၸွမ်းၼင်ႇလွင်ႈၸႂ်လီ ဢၼ်မီးပႃးလွင်ႈမႆႈၸႂ်လူင်ၼၼ်ႉ သုတ်ႉၶဝ်ႈၸမ်လိုၼ်းၼုမ်ႇယဝ်ႉ ဢဝ်သိူဝ်ႈမၼ်းႁူမ်ႇသႂ်ႇပၼ်ၵႂႃႇ သမ်ႉပေႃးဢမ်ႇတၼ်းၾၢင်ႉမႅၼ်ႈဝႃႈ တူဝ်သွင်ၶႃၼၼ်ႉ ၶဝ်ႈၸမ်ၵၼ်ႁႅင်းၼႃႇ ႁၢင်ႇၵၼ်ၵႂႃႇမွၵ်ႈၼိုင်ႈၸွမ်းၵူၺ်း သမ်ႉပေႃးငိၼ်းသဵင်ထူၺ်ႈၸႂ်ၵၼ်မႃးယဝ်ႉ။
တွၼ်ႈသိပ်းဢဵတ်းသုတ်းၵႂႃႇယဝ်ႉၶႃႈ သိုပ်ႇတူၺ်းထႅင်ႈတွၼ်ႈသိပ်းသွင်။
ႁပ်ႉထွမ်ႇပၼ်ႁႅင်း တၢင်း YouTube ၵေႃႈလႆႈၶႃႈ။
