တွၼ်ႈသိပ်း
ဝၢႆးဝၼ်းၶၢဝ်းလူင်းၵၢၼ်မႃးယဝ်ႉ လိုၼ်းၼုမ်ႇၸင်ႇမႃးပႂ်ႉယူႇတီႈ တၢင်းၶဝ်ႈတၢင်းဢွၵ်ႇၼၼ်ႉသေ ၵူၼ်းႁဵတ်းၵၢၼ်ၶဝ်ၵေႃႈ ဢွၼ်ၵၼ်ပွၵ်ႈမိူဝ်းၵႂႃႇႁင်းၽႂ်ႁင်းမၼ်းယဝ်ႉ။ ၵမ်ႈၽွင်ႈၵေႃႈယုမ်ႉၸူး တူင်ႉတၵ်ႉမၼ်းၵႂႃႇ၊ ၵမ်ႈၽွင်ႈၵေႃႈ ဢမ်ႇလႆႈသူၼ်ၸႂ်သေ ပႆၽႅတ်ႈပူၼ်ႉၵႂႃႇယဝ်ႉ။ ဝၢႆးသေပူၼ်ႉၵႂႃႇၵူၺ်း သမ်ႉပေႃးၶႆႈထိုင်ၸိုဝ်ႈမၼ်းလူင်မိူဝ်းယူႇ။ လိုၼ်းၼုမ်ႇ ဢၼ်ႁၼ်လိူၼ်သႂ်ဢွၵ်ႇမႃးၼၼ်ႉၵေႃႈ ၼႅတ်ႈၶဝ်ႈႁႃမၼ်းသေ
“လိူၼ်သႂ်… လိုဝ်ႈၵၢၼ်ယဝ်ႉၸွင်ႇလူဝ်ႇၵႂႃႇတၢင်းလႂ်ႁိုဝ်”
လိူၼ်သႂ်မိုင်ဝူၼ်ႉၵႅပ်ႉၼိုင်ႈယဝ်ႉ “ဢမ်ႇပႆႇမီးၶႃႈ ပီႈမီးလွင်ႈလူဝ်ႇသင်ဢမ်ႇႁူႉ..”
“ၵႂႃႇၵိၼ်ၶဝ်ႈၸွမ်းၵၼ်ၼႄႇ…”
“ပီႈဢမ်ႇလူဝ်ႇႁိပ်ႈပွၵ်ႈမိူဝ်းႁိူၼ်းယဝ်ႉႁႃႉ”
လိုၼ်းၼုမ်ႇယုမ်ႉၸူးသေ “ပေႃးၽွမ်ႉယဝ်ႉၵေႃႈ..ၵႂႃႇလႄႈႁဝ်းၵႂႃႇ”
ၵွတ်ႇဢဝ်ၶႅၼ်လိူၼ်သႂ်သေ ၸူဝ်းၵၼ်ၶိုၼ်ႈလူတ်ႉၵႂႃႇယဝ်ႉ။
မိူဝ်ႈၶီႇလူတ်ႉၵႂႃႇၸွမ်းၵၼ်ယူႇၼၼ်ႉ လိုၼ်းၼုမ်ႇၵေႃႈ
“ယိၼ်းၸူမ်းယဝ်ႉၼႃႈ ဢၼ်မႃးပဵၼ်ၵေႃႉႁဝ်း”
လိူၼ်သႂ်ၵေႃႈ မိူဝ်ႈဢၼ်ယူႇၸွမ်းလိုၼ်းၼုမ်ႇၼၼ်ႉ မိူၼ်တေမီးလွင်ႈၶႂ်ႈလၢတ်ႈမႃးလႄႈ
“ပီႈ…ပီႈတေႁဵတ်းႁိုဝ်လႃႇ..လွင်ႈပီႈၸိင်ႇၼၼ်ႉ..”
လိုၼ်းၼုမ်ႇထူၺ်ႈၸႂ်လူင်မႃးသေ “ၸဵမ်မိူဝ်ႈႁဝ်းပဵၼ်ႁူဝ်ၼႃႈမႃး.. မိူၼ်ဝႃႈ..ႁဝ်းဢမ်ႇပေႃးမီးၶၢဝ်းယၢမ်း..လႆႈယူႇၸွမ်းၵၼ်ၵႃႈႁိုဝ် ဢမ်ႇၵႆႉလႆႈဢုပ်ႇလၢတ်ႈတေႃႇၵၼ်..မိူၼ်မိူဝ်ႈဢွၼ်တၢင်းယဝ်ႉလႄႈ ႁဝ်းၵေႃႈဢမ်ႇႁူႉဝႃႈ..ၶၢဝ်းယၢမ်းဢမ်ႇလႆႈယူႇၸွမ်းၵၼ်ၼၼ်ႉ ၶဝ်လႆႈထူပ်းလွင်ႈယၢပ်ႇၽိုတ်ႇၸိူင်ႉႁိုဝ်ၽွင်ႈ သူယူႇၸွမ်းၶဝ်တႃႇသေႇ သူမီးတၢင်းႁၼ်ထိုင်ၸိူင်ႉႁိုဝ်လႃႇ..”
“ၶႃႈႁႃႉ.. ပေႃးဢဝ်ၶႃႈဝႃႈတႄႉ..ၶႃႈဢမ်ႇၶႂ်ႈပၼ်ၶဝ်ဢွၵ်ႇၶႃႈၼႃ ၵူၺ်းၵႃႈ.. ပေႃးတူၺ်းၶဝ်ၵေႃႈ.. လႅပ်ႈတေဢမ်ႇၶႂ်ႈယူႇတေႉတေႉၼၼ်ႉယဝ်ႉ.. ၶဝ်ၵေႃႈလၢတ်ႈယူႇလၢႆပွၵ်ႈလၢႆၵမ်းဝႃႈ..တေဢွၵ်ႇၵႂႃႇတေႉတေႉယဝ်ႉ သမ်ႉဝႃႈၶႃႈၶႂ်ႈႁႂ်ႈၶဝ်ယူႇသေတႃႉၵေႃႈ..ၶႃႈၵေႃႈဢမ်ႇႁဵတ်းသင်လႆႈ လိူဝ်သေႁႂ်ႈၶဝ်ႁဵတ်းၵႂႃႇၸွမ်းၼင်ႇၵၢင်ၸႂ်ၶဝ်ၼၼ်ႉၵူၺ်း..”
“ၸွင်ႇႁူႉႁႃႉ ၶဝ်မီးပၼ်ႁႃသင်လႄႈ..ၶႂ်ႈဢွၵ်ႇၵၢၼ်ၵႂႃႇလႃႇ..”
လိူၼ်သႂ်ယဵၼ်ၵႂႃႇၵမ်းၼိုင်ႈ မိူၼ်ဢမ်ႇႁတ်းလၢတ်ႈဢွၵ်ႇမႃးၼၼ်ႉယူႇ။ ႁွတ်ႈထိုင်တီႈယဝ်ႉၵေႃႈ ႁႂ်ႈၸဝ်ႈလူတ်ႉၵိုတ်းပၼ်ၶႃသေ လိုၼ်းၼုမ်ႇၵေႃႈ ဢွၼ်ဢဝ်လိူၼ်သႂ် ၶဝ်ႈၼႂ်းလၢၼ်ႉၶဝ်ႈၽၵ်းၼၼ်ႉၵႂႃႇယဝ်ႉ။
မိူဝ်ႈယင်းတိုၵ်ႉပႂ်ႉၶဝ်ႈၽၵ်းဢၼ်သင်ႇၵႂႃႇယူႇၼၼ်ႉ လိုၼ်းၼုမ်ႇၵေႃႈ မႄးသိုပ်ႇလၢတ်ႈၶိုၼ်းၶေႃႈၵႂၢမ်းမိူဝ်ႈၵႆႈၼၼ်ႉသေ
“ပေႃးသူႁူႉၵေႃႈ ၸွႆႈလၢတ်ႈၼႄႁဝ်းၽွင်ႈၸွင်ႇလႆႈႁိုဝ်”
“ပၼ်ႁႃမၼ်းမီးတႄႉမီးယူႇ.. ပေႃးဝႃႈလၢတ်ႈဢွၵ်ႇယဝ်ႉ..ဢမ်ႇႁူႉဝႃႈၸွင်ႇပီႈတေၸႂ်လမ်ၶႃႈႁိုဝ်..”
“မၼ်းၵဵဝ်ႇၶွင်ႈတင်းႁဝ်းႁႃႉ!..”
“ပီႈႁူႉယူႇယဝ်ႉႁႃႉ..”
“ႁဝ်းဢမ်ႇႁူႉလွင်ႈတၢင်းမၼ်းပဵၼ်ၸိူင်ႉႁိုဝ် ၵူၺ်းၵႃႈ..မၼ်းမိူၼ်တေၵဵဝ်ႇၶွင်ႈတင်းႁဝ်းဝႆႉလႄႈ သူၸွႆႈလၢတ်ႈၼႄႁဝ်းၸွင်ႇလႆႈ ဢမ်ႇဝႃႈတေပဵၼ်လွင်ႈသင်ၵေႃႈ..ႁဝ်းႁပ်ႉထွမ်ႇလႆႈယူႇၵူၺ်း..”
လိူၼ်သႂ် မိူၼ်ဢမ်ႇပေႃးၶႂ်ႈႁတ်းလၢတ်ႈၵႃႈႁိုဝ်လႄႈ ဢိုၼ်ၼမ်ႉလၢႆးၵမ်းၼိုင်ႈယဝ်ႉ လွင်ႈဢၼ်ၶႂ်ႈႁူႉၼၼ်ႉၵေႃႈ လၢတ်ႈဢွၵ်ႇမႃးယူႇ
“လွင်ႈၼွင်ႉဢွမ်ထုၵ်ႇလိုပ်ႈဢွၵ်ႇၵၢၼ်ၼၼ်ႉ.. ပဵၼ်ယွၼ်ႉသင်ၶႃႈ တၢင်းၽိတ်းၶဝ်ၼၼ်ႉ..ဢမ်ႇလႆႈႁၢႆႉႁႅင်းသင် ပဵၼ်သင်..ၶဝ်သမ်ႉထုၵ်ႇလိုပ်ႈဢွၵ်ႇၵႂႃႇၸိူင်ႉၼၼ် ပီႈၸွႆႈလၢတ်ႈၼႄၽွင်ႈၸွင်ႇလႆႈ”
ယၢမ်းၼၼ်ႉ ၶဝ်ႈၽၵ်းဢၼ်ၶႃသင်ႇၵေႃႈႁွတ်ႈမႃးယဝ်ႉ။
“လွင်ႈၼႆႉ..ႁဝ်းၵေႃႈ..ဢမ်ႇၵတ်းယဵၼ်ၸႂ်မိူၼ်ၵၼ် ဢၼ်ၶဝ်ထုၵ်ႇလိုပ်ႈဢွၵ်ႇၵၢၼ်ၵႂႃႇလႄႈ ႁဝ်းၸွႆႈသင်ၶဝ်ဢမ်ႇလႆႈ”
“ဢမ်ႇၸႂ်ႈဝႃႈ..ပီႈပဵၼ်ၵူၼ်းလိုပ်ႈၶဝ်ဢွၵ်ႇႁႃႉ..”
“ႁဝ်းဢမ်ႇမီးသုၼ်ႇႁဵတ်းလႆႈထိုင်တၢၼ်ႇၼၼ်ႉလေႃႇၼႃႈ.. ႁဝ်းၵေႃႈပဵၼ်ၵူၼ်းႁဵတ်းၵၢၼ်မိူၼ်ၵၼ်တင်းသူၵူၺ်း.. မီးလွင်ႈသင်လႃႇ! ဢမ်ႇၼၼ်ၵေႃႈ..ပီႈၸိင်ႇဢွၵ်ႇၵၢၼ်ယွၼ်ႉလွင်ႈၼႆႉၸိူင်ႉၼၼ်ႁႃႉ..”
“ၶႂ်ႈဝႃႈၼၼ်ၵေႃႈလႆႈယူႇ ပေႃးဝႃႈတေႉ..ၶႃႈၵေႃႈဝူၼ်ႉၸိူင်ႉၼၼ်မိူၼ်ၵၼ် မိူၼ်ဝႃႈ..ၸူဝ်ႈပီႈၶိုၼ်ႈပဵၼ်ႁူဝ်ၼႃႈမႃးၼႆႉ ႁဵတ်းႁႂ်ႈဢမ်ႇပေႃးမီး..လွင်ႈယုမ်ႇယမ်ၼိူဝ်ပီႈမႃးၵႃႈႁိုဝ်ၼၼ်ႉယဝ်ႉ”
လိုၼ်းၼုမ်ႇယၵ်ႉတူၺ်းၼႃႈလိူၼ်သႂ်သေ ယုမ်ႉဢွၵ်ႇမႃးယဝ်ႉ “ယိၼ်းၸူမ်းယဝ်ႉၼႃႈ!”
“ၶႃႈလၢတ်ႈၸိူင်ႉၼၼ်..ပီႈဢမ်ႇၸႂ်လမ်ႁႃႉ”
“သူလၢတ်ႈမႃးၵေႃႈၸႂ်ႈယူႇလူး ႁဝ်းသမ်ႉတေၸႂ်လမ်ႁဵတ်းသင် သင်ႁူႉဝႃႈ..လွင်ႈဢၼ်ႁဝ်းႁဵတ်းၼၼ်ႉဢမ်ႇမႅၼ်ႈၼႆၵေႃႈ တေၸၢင်ႈၵႄႈၶႆၵႂႃႇလႆႈၼၼ်ႉၼႃႇ”
လိူၼ်သႂ်မိုင်တူၺ်းလိုၼ်းၼုမ်ႇ ဢၼ်ယုမ်ႉလၢတ်ႈဢုပ်ႇၸွမ်းမၼ်းၼၼ်ႉသေ
“ပီႈပဵၼ်ၵူၼ်းလီတၢၼ်ႇၼႆႉ ၶႃႈၵႂႃႇဝူၼ်ႉၸိူင်ႉႁိုဝ်ၼိူဝ်ပီႈလႃႇၼႆႉ”
“သူလၵ်ႉၸင်းႁဝ်းယူႇႁႃႉ.. ၸင်းလႄႈၼႃႈ.. ပေႃးဝႃႈတေႁဵတ်းႁႂ်ႈသူၵတ်းယဵၼ်ၸႂ်..”
“ၶႃႈၸင်းပီႈဢမ်ႇလႆႈယဝ်ႉ..”
ယုမ်ႉယုမ်ႉယၢႆႈယၢႆႈၵိၼ်ၶဝ်ႈၵုမ်းၵၼ်ၵႂႃႇ ၼင်ႇႁၢင်ႈဝၢၼ်ႁၢင်ႈမၼ်းယူႇယဝ်ႉ။ မိူဝ်ႈတိုၵ်ႉၵိၼ်ၶဝ်ႈယူႇၼၼ်ႉ သႅင်ႁိူၼ်းၼုမ်ႇၵေႃႈ သိုပ်ႇၽူင်းမႃးသေ လိုၼ်းၼုမ်ႇၵေႃႈ ႁပ်ႉၽူင်းၵႂႃႇတေႃႇၼႃႈ လိူၼ်သႂ်ၼၼ်ႉယဝ်ႉ။ သဵင်လဵၵ်ႉလဵၵ်ႉလႅင်းဢွၼ်ႇၼၼ်ႉၵေႃႈ လင်မေႃးၼႂ်းၾူင်းဝႃႈ
“မႄႈ! တေမႃးမိူဝ်ႈလႂ်”
“ဢေႃႈ! မႄႈတေမိူဝ်းၶမ်ႈဢိတ်းၼိုင်ႈၼႃႈ…”
လႅင်းဢွၼ်ႇၵေႃႈ မိူဝ်ႈလႆႈငိၼ်းၸိူင်ႉၼၼ် ဢမ်ႇသိုပ်ႇလၢတ်ႈသင်ထႅင်ႈယဝ်ႉ ဢဝ်ၽူင်းယိုၼ်ႈပၼ် သႅင်ႁိူၼ်းၼုမ်ႇၵႂႃႇ မိူၼ်ၶႂ်ႈၸႂ်လဵၵ်ႉမႃးၼၼ်ႉယဝ်ႉ။
“ယၢပ်ႇၸႂ်သူယဝ်ႉၼႃႈ သႅင်ႁိူၼ်း..”
“ဢမ်ႇပဵၼ်သင်ၼႃ..”
ဝၢႆးသေလိုၼ်းၼုမ်ႇဝၢင်းၽူင်းၵႂႃႇယဝ်ႉၵေႃႈ ၸွမ်းၼင်ႇလွင်ႈၶႂ်ႈႁူႉၶႂ်ႈႁၼ်လိူၼ်သႂ်ၼၼ်ႉသေ
“ပီႈတၼ်းမီးလုၵ်ႈယဝ်ႉႁႃႉ!..”
“ဢိုမ်ႈ!..ၸႂ်ႈယဝ်ႉ.”
“ပီႈယင်းတိုၵ်ႉႁၢင်ႈလီမိူၼ်သၢဝ်ယူႇ ၶႃႈဢမ်ႇထၢင်ႇဝႃႈ..ပီႈတေမီးလုၵ်ႈယဝ်ႉ”
လိုၼ်းၼုမ်ႇမိုင်ဝူၼ်ႉၸွမ်းၵႂၢမ်းလိူၼ်သႂ်သေ“ ၵေႃႈတေၸႂ်ႈယူႇ..” ယၵ်ႉတူၺ်းလိူၼ်သႂ်ယဝ်ႉၵေႃႈ “တူၺ်းမိူၼ်သူတေၶႂ်ႈႁူႉလွင်ႈၼႆႉတေႉယဝ်ႉ”
“ဢေႃႈ!.. ဢမ်ႇထိုင်တၢၼ်ႇၼၼ်ႉၼင်ႇၵဝ်ႇ”
“လုၵ်ႈႁဝ်း.. မိူဝ်ႈလဵဝ်လႆႈ 5 ၶူပ်ႇပၢႆယဝ်ႉ ၵေႃႉဢၼ်သိုပ်ႇၽူင်းမႃးမိူဝ်ႈၵႆႈၼၼ်ႉၵေႃႈ ပဵၼ်မေႃသွၼ်ၶဝ် ပဵၼ်ဢူၺ်းၵေႃႉၵၼ်တင်းႁဝ်း ယွၼ်ႉပိူဝ်ႈႁဝ်းလဵင်ႉလုၵ်ႈႁင်းၵူၺ်း..ၵူၺ်းလႄႈ ပေႃးမီးၵၢၼ်ၵေႃႈ တေၽၢၵ်ႇတီႈၶဝ်တူၺ်းထိုင်ဝႆႉ သူၵေႃႈတေၵႆႉႁၼ်ယူႇ မိူဝ်ႈႁဵတ်းၵၢၼ်ၸွမ်းၵၼ် ႁဝ်းတေႁိပ်ႈၼႅတ်ႈမိူဝ်းႁိူၼ်းတႃႇသေႇ..”
“ဢေႃႈ.. တွင်းလႆႈယဝ်ႉၶႃႈ..”
“ဝၢႆးသေလႆႈၶိုၼ်ႈမႃးပဵၼ်ႁူဝ်ၼႃႈယဝ်ႉၵေႃႈ.. ႁဵတ်းႁႂ်ႈႁဝ်းဢမ်ႇမီးၶၢဝ်းယၢမ်းလႆႈမိူဝ်းၸဝ်ႉလႄႈ ၵမ်ႈၼမ်..ၶဝ်ၵေႃႈတေလႆႈပႂ်ႉႁဝ်းဝႆႉယူႇတီႈ..ႁိူၼ်းမေႃသွၼ်ၶဝ်ၼၼ်ႉယဝ်ႉ ပေႃးဝူၼ်ႉယဝ်ႉၵေႃႈ တႃႉၶႂ်ႈဢွၵ်ႇၵၢၼ်ၵႂႃႇ မိူၼ်ၼင်ႇပီႈၸိင်ႇၼၼ်ႉႁေယဝ်ႉဝႃႈ..”
သွင်ၶႃၵေႃႈ ၵိၼ်ၶဝ်ႈယဝ်ႉသေ ဢွၼ်ၵၼ်ဢွၵ်ႇမႃးပႆလဵၼ်ႈယူႇႁိမ်းၶၢင်ႈတၢင်းၼၼ်ႉယဝ်ႉ။
“ပေႃးလၢတ်ႈထိုင်လွင်ႈပီႈပဵၼ်ႁူဝ်ၼႃႈမႃးၵေႃႈ ၶႃႈၵေႃႈၶႂ်ႈႁူႉမိူၼ်ၵၼ် ပီႈႁဵတ်းႁိုဝ်သေ..ၶိုၼ်ႈမႃးပဵၼ်ႁူဝ်ၼႃႈၶႃႈလႃႇ ၵူၺ်းငိၼ်းပိူၼ်ႈလၢတ်ႈၼႄ လွင်ႈတၢင်းမၼ်း..ပေႃးၸွတ်ႇပေႃးၸေးယဝ်ႈ လွင်ႈဢၼ်ပီႈပဵၼ်ႁူဝ်ၼႃႈၼႆႉ”
“မၼ်းၵေႃႈတႃႉလီလၢတ်ႈယူႇၵူၺ်းၼင်ႇၵဝ်ႇ..တိုၵ်ႉႁႃမႃးႁဵတ်းၵၢၼ်ၵူၺ်း သမ်ႉႁႂ်ႈမႃးပဵၼ်ႁူဝ်ၼႃႈၸိူင်ႉၼႆ… ပေႃးတေႁႂ်ႈလၢတ်ႈၼႄၵေႃႈ မိူၼ်တဵၵ်းတဵင်ၵၼ်ႁႂ်ႈႁဵတ်းၼၼ်ႉယဝ်ႉ ပေႃးဢမ်ႇႁဵတ်းသမ်ႉ ႁႂ်ႈႁဝ်းဢွၵ်ႇၵၢၼ်ၼႆဝႃႇ မိူဝ်ႈၼၼ်ႉ ႁဝ်းၵေႃႈ..ဢမ်ႇလႆႈဝူၼ်ႉသင်ၵႃႈႁိုဝ် ပေႃးလႆႈႁဵတ်းၵၢၼ်ၵေႃႈ..ပေႃးယဝ်ႉၼႆလႄႈ ႁပ်ႉႁဵတ်းၵႂႃႇၼၼ်ႉယဝ်ႉ မႃးဝူၼ်ႉတူၺ်းၶိုၼ်းမိူဝ်ႈလဵဝ် သမ်ႉပေႃးၶႂ်ႈႁူၼ်ၶၢဝ်းယၢမ်းၼၼ်ႉသေ ဢွၵ်ႇၵၢၼ်ၵႂႃႇပႅတ်ႈၵူၺ်းယဝ်ႉ”
လိူၼ်သႂ် ဝူၼ်ႉၶိုၼ်းဢၼ်မၼ်းလႆႈငိၼ်းမႃးၸိူဝ်းၼၼ်ႉသေ “ၶႂ်ႈဝႃႈ ၶၢဝ်ႇလိုဝ်းၸိူဝ်းၼၼ်ႉၵေႃႈ ဢမ်ႇၸႂ်ႈလွင်ႈတေႉၵူၺ်းလေႃႇ.. ”
လိုၼ်းၼုမ်ႇမိူၼ်ဢမ်ႇပေႃးပွင်ႇၸႂ်ၵႃႈႁိုဝ်လႄႈ “ၶၢဝ်ႇလိုဝ်းၼႆႁႃႉ..”
“ဢေႃႈ! လွင်ႈၸိူဝ်းၼႆႉယဝ်ႉ ႁဵတ်းႁႂ်ႈၵူၼ်းႁဵတ်းၵၢၼ် မီးလွင်ႈၽိတ်းမေႃးၵၼ်မႃးၼၼ်ႉၶႃႈယဝ်ႉ”
မိူၼ်တေလီသူၼ်ၸႂ်မႃးဝႆႉလႄႈ “ၶႆႈၼႄႁဝ်းၸွင်ႇလႆႈႁိုဝ်.. မၼ်းပဵၼ်ၸိူင်ႉႁိုဝ်ၽွင်ႈ..”
လိူၼ်သႂ်ၵေႃႈ လၢတ်ႈၼႄလိုၼ်းၼုမ်ႇၵႂႃႇ တႄႇၸဵမ်လွင်ႈတႅၵ်ႇၸတ်ႉ ၼႂ်းၵႄႈၵၢင်ၵူၼ်းႁဵတ်းၵၢၼ်ၼင်ႇၵၼ် ၸႅၵ်ႇၸုမ်းၵဝ်ၸုမ်းမႂ်းမႃး၊ ၵူၼ်းႁဵတ်းၵၢၼ်ၵေႃႈဢမ်ႇမႅၼ်ႈၵၼ်ၸိူဝ်းၼႆႉမႃး ယဝ်ႉ။
သွင်ၶႃၵေႃႈ ၽႄၵၼ်ပွၵ်ႈမိူဝ်းၵႂႃႇတၢင်းၽႂ်တၢင်းမၼ်းယဝ်ႉ။ လိုၼ်းၼုမ်ႇတႄႉ ပွၵ်ႈမိူဝ်းႁပ်ႉဢဝ်လႅင်းဢွၼ်ႇမိူဝ်းႁိူၼ်းသေ သွင်ၵေႃႉမႄႈလုၵ်ႈၵေႃႈ ဢုပ်ႇယဝ်ႉၵၼ်လူင်မိူဝ်းၸွမ်းတၢင်းၼၼ်ႉယူႇ။ ၽွင်းၼၼ်ႉ မိူၼ်ဝႃႈမီးၵူၼ်းၵေႃႉၼိုင်ႈ လွမ်တူၺ်းၸွမ်းၶႃဝႆႉယဝ်ႉ။
ထိုင်မႃးထႅင်ႈဝၼ်းၼိုင်ႈ လၢၼ်ႉၼၼ်ႉ တဵတ်ႇယဵၼ်ၼႃႇလႄႈ ၶဝ်ႈၵႂႃႇၼႂ်းလၢၼ်ႉၵေႃႈ ဢမ်ႇႁၼ်ၵူၼ်းႁဵတ်းၵၢၼ်ၽၢႆႇႁပ်ႉၶႅၵ်ႇၶဝ်မႃးသေၵေႃႉ မိူၼ်ပိၵ်ႉဢိုတ်းလၢၼ်ႉဝႆႉယူႇ။ လိုၼ်းၼုမ်ႇ ဢၼ်ဢၢၼ်းသိုပ်ႇၽူင်းႁႃ လုင်းဢွင်ႇၼၼ်ႉၵေႃႈ လုင်းဢွင်ႇၼၼ်ႉသမ်ႉပေႃးသိုပ်ႇၸူးမၼ်းမႃးယဝ်ႉ။
“မီးယူႇတီႈလႂ်!..”
“ပဵၼ်လွင်ႈသင်ၶႃႈ.. မိူဝ်ႈၼႆႉဢမ်ႇႁၼ်ၽႂ်မႃးႁဵတ်းၵၢၼ်သေၵေႃႉၶႃႈလႃႇ”
“ၵူၼ်းႁဵတ်းၵၢၼ်ၶဝ်..ဢွၼ်ယွၼ်းၶႂၢင်ႉမိူဝ်ႈလဵဝ်ၵၼ်မူတ်းၼၼ်ႉယဝ်ႉ..”
“ပဵၼ်ၵႂႃႇလႆႈယူႇၶႃႈႁႃႉ ၵူၼ်းႁဵတ်းၵၢၼ်ၼၼ်ႉ..တေယွၼ်းၶႂၢင်ႉမိူဝ်ႈလဵဝ်ၵၼ်ၸိူင်ႉၼႆ..”
လုင်းဢွင်ႇၵေႃႈႁွင်ႉထူပ်းလိုၼ်းၼုမ်ႇၵႂႃႇယူႇ
“သူမီးပၼ်ႁႃသင်..တင်းၵူၼ်းႁဵတ်းၵၢၼ်လႃႇ”
လိုၼ်းၼုမ်ႇၵေႃႈ ဝူၼ်ႉထိုင်ၶိုၼ်း လွင်ႈဢၼ်လိူၼ်သႂ်လၢတ်ႈၼႄမၼ်း မိူဝ်ႈၶမ်ႈဝႃးၼၼ်ႉသေ မိူၼ်တေပွင်ႇၸႂ်မႃးယဝ်ႉ။ လုင်းဢွင်ႇၵေႃႈ မိူၼ်တေႁူႉၸွမ်းငဝ်းလၢႆးမၼ်းမႃးလႄႈ
“မိူဝ်ႈဝႃးၼႆႉ.. ဢမ်ႇၸႂ်ႈဝႃႈသူတဵၵ်းတဵင်ႁႂ်ႈၼၢင်းၸိင်ႇဢွၵ်ႇၵၢၼ်ၵႂႃႇႁႃႉ!”
“ဢမ်ႇၶႃႈ!”
လုင်းဢွင်ႇ ၸင်ႇဢဝ်တင်းလိၵ်ႈတၢင်ႇထိုင်ၸိူဝ်းၼၼ်ႉ ၼႄလိုၼ်းၼုမ်ႇ ဢၼ်မီးဝႃႈ လိုၼ်းၼုမ်ႇတဵၵ်းႁႂ်ႈၵူၼ်းႁဵတ်းၵၢၼ်ဢွၵ်ႇၵၢၼ်ၼႆသေ တုၵ်းယွၼ်းႁႂ်ႈမၼ်းဢွၵ်ႇၵၢၼ်ၵႂႃႇၼႆၼၼ်ႉယဝ်ႉ။ ယွၼ်ႉပဵၼ်သဵင်ၵၢင်ၸႂ်ၵူၼ်းၼမ် ဢွၼ်လၢတ်ႈမိူၼ်ၵၼ်မူတ်းလႄႈ လုင်းဢွင်ႇၼၼ်ႉၵေႃႈ ၶိုၼ်ႈသဵင်သႂ်ႇလိုၼ်းၼုမ်ႇၵႂႃႇ
“ႁဝ်းႁူႉယူႇဝႃႈသူၶႂ်ႈဢွၵ်ႇၵၢၼ်ၼႆ.. ဢမ်ႇၸမ်ပဵၼ်တေလႆႈႁဵတ်းထိုင်တၢၼ်ႇၼႆႉၵေႃႈလႆႈ သူဢဝ်ပိူၼ်ႈမႃးပဵၼ်တူဝ်ၶၢမ်ႇပၼ်သူၸိူင်ႉၼႆ မၼ်းၵေႃႈႁၢႆႉႁႅင်းၼႃႇၽႅဝ် ၸွင်ႇႁူႉႁႃႉ ၶဝ်ပဵၼ်ၵူၼ်းႁဵတ်းၵၢၼ်လီၵေႃႉၼိုင်ႈ ဢၼ်ႁဵတ်းၵၢၼ်ၼႂ်းလၢၼ်ႉႁဝ်းမႃး ႁိုင်လိူဝ်သေသူတေႉတေႉယဝ်ႉ ပေႃးဢမ်ႇမီးပၼ်ႁႃသင် ၶဝ်တေဢမ်ႇဢွၵ်ႇၵၢၼ်ၵႂႃႇငၢႆႈငၢႆႈလေႃႇ ငိၼ်းဝႃႈ ဝၢႆးသေၶဝ်ၶဝ်ႈၵႂႃႇထူပ်းသူယဝ်ႉၵေႃႈ ယွၼ်းဢွၵ်ႇၵၢၼ်ၵႂႃႇၵမ်းလဵဝ်ၼႆ ၸွင်ႇၸႂ်ႈႁႃႉ”
လိုၼ်းၼုမ်ႇၵေႃႈ ႁိုဝ်ၸၢင်ႈထဵင် သမ်ႉဝႃႈဢမ်ႇၸႂ်ႈၼႆၵေႃႈ ၸွမ်းလူၺ်ႈဢၼ်ႁၼ်ၼၼ်ႉသမ်ႉပဵၼ်ၸိူင်ႉၼၼ်တေႉတေႉလူး။ လုင်းဢွင်ႇထူၺ်ႈၸႂ်လူင်မႃးယဝ်ႉ ၶိုၼ်းသိုပ်ႇလၢတ်ႈထႅင်ႈ
“မီးသူၵေႃႉလဵဝ်ၵူၺ်း သူၵေႃႈႁဵတ်းၵၢၼ်ဢမ်ႇပေႉလႆႈလေႃႇၼႃႈ လွင်ႈၼႆႉ ႁဝ်းတေထၢမ်တူၺ်းတၢင်းၼိူဝ်ၶိုၼ်းယဝ်ႉ ၸင်ႇတေလၢတ်ႈသူထႅင်ႈၵမ်းၼိုင်ႈ”
လိုၼ်းၼုမ်ႇၵေႃႈ တေၸၢင်ႈႁဵတ်းႁိုဝ် ၼႃႈႁႅင်ႈသေ ဢွၵ်ႇႁွင်ႈၼၼ်ႉၵႂႃႇၵူၺ်း။ ပေႃးမႃးဝူၼ်ႉတူၺ်း ၶၢဝ်ႇလိုဝ်းၼႆႉၵေႃႈ ပဵၼ်ဢၼ်လီၵူဝ်တေႉတေႉၼၼ်ႉယဝ်ႉ။ ႁဵတ်းႁႂ်ႈလွင်ႈဢမ်ႇၸိုဝ်ႈဢမ်ႇၸႂ်ႈၼၼ်ႉ မီးလွင်ႈမီးတၢင်းမႃးသေ ႁဵတ်းႁၢႆႉၵူၼ်းမႃးလႆႈလႄႈ မိူဝ်ႈဢမ်ႇမီးၶေႃႈထတ်းသၢင်ၸႅင်ႈလႅင်းၼၼ်ႉၵေႃႈ တေဢိင်ဢဝ် ႁူဝ်ၼပ်ႉၵူၼ်းတင်းၼမ် တၢင်းႁၼ်ထိုင်ၼမ်သေ တေႁၼ်ဝႃႈမၼ်းပဵၼ်တီႈလီယုမ်ႇယမ်ယဝ်ႉ မၵ်းမၼ်ႈၵႂႃႇ။ လူၺ်ႈဢမ်ႇသူၼ်ၸႂ်ငိူၼ်ႈငဝ်ႈတီႈမႃးမၼ်း မိူဝ်ႈၵေႃႉဢၼ်လၢတ်ႈၸိုဝ်ႈၸႂ်ႈထုၵ်ႇမႅၼ်ႈယူႇၼၼ်ႉ ဢမ်ႇမီးၵူၼ်းယွမ်းႁပ်ႉၼမ်ၼၼ်ႉၵေႃႈ လႆႈပဵၼ်ၶေႃႈၵႂၢမ်းဢမ်ႇမီးၼမ်ႉၼၵ်းဢမ်ႇလီယုမ်ႇၵႂႃႇယူႇ။ ၶၢဝ်ႇလိုဝ်း ဢမ်ႇမီးလႅင်ႇၶၢဝ်ႇ ဢၼ်ၸႅင်ႈလႅင်း၊ ၵေႃႉၼၼ်ႉၵေႃႈဝႃႈ ငိၼ်းမႃးတီႈၵေႃႉၼၼ်ႉၼႆသေ ပဵၼ်ၵႂၢမ်းသိုပ်ႇၵႂၢမ်းၵႂႃႇၵူၺ်း။
မီးလိူၼ်သႂ်ၵူၺ်း ဢၼ်မႃးႁဵတ်းၵၢၼ် ယွၼ်ႉဢမ်ႇႁၼ်ၽႂ်လႄႈ လႆႈၵႂႃႇႁႃလိုၼ်းၼုမ်ႇယူႇ ဢမ်ႇပႆႇတၼ်းလႆႈလၢတ်ႈသင် မီးပၢင်ၵုမ်ၼႆၵေႃႈ လိုၼ်းၼုမ်ႇဢွၵ်ႇၵႂႃႇပႅတ်ႈယဝ်ႉ။
ၸိုၼ်ႈၶိူဝ်းလႄႈတိုၼ်းႁၢၼ်ၵေႃႈ ဢွၼ်ၵၼ်မႃးတီႈလၢၼ်ႉၵမ်းလဵဝ်သေ ႁွင်ႉဢုပ်ႇဢူဝ်းၵၼ်ၵႂႃႇ ၼႂ်းႁွင်ႈပၢင်ၵုမ်ၶဝ် ၼၼ်ႉယဝ်ႉ။ ၽူႈမၢႆလုင်းဢွင်ႇၼၼ်ႉၵေႃႈ လၢႆးငၢၼ်းလွင်ႈဢၼ်ပဵၼ်မႃးၸိူဝ်းၼၼ်ႉ ၼႄၸိုၼ်ႈၶိူဝ်းၶႃသေ တိုၼ်းႁၢၼ်ဢၼ်လႆႈငိၼ်းၼၼ်ႉၵေႃႈ ၸႂ်မႆႈမႃးယဝ်ႉ
“ဢမ်ႇမီးၵူၼ်းႁဵတ်းၵၢၼ်ၸိူင်ႉၼႆ ပိၵ်ႉဢိုတ်းလၢၼ်ႉသေဝၼ်းၼိုင်ႈလႄႈ မၼ်းၵေႃႈ..ဢမ်ႇလႆႈမီးလွင်ႈတုမ်ႉတိူဝ်ႉသင်ၼင်ႇၵဝ်ႇ”
“ပိုတ်ႇလၢၼ်ႉၵႂႃႇလႄႈ!” ၸိုၼ်ႈၶိူဝ်းလၢတ်ႈဢွၵ်ႇမႃးၼင်ႇဢမ်ႇသူၼ်ၸႂ်သဵင်ၽႂ်ၼၼ်ႉယဝ်ႉ။ ဢဝ်ၵူၼ်းၼႂ်းႁွင်ႈၼၼ်ႉတူၺ်းၵႂႃႇတီႈမၼ်းမူတ်းယူႇ။
“ယဝ်ႉၵူၼ်းႁဵတ်းၵၢၼ်လူး..”
“ၼၼ်ႉပဵၼ်ပုၼ်ႈၽွၼ်းၸဝ်ႈၶွင်လၢၼ်ႉတေလႆႈဝူၼ်ႉဢမ်ႇၸႂ်ႈႁႃႉ လိူဝ်သေၵူၼ်းႁပ်ႉၶႅၵ်ႇယဝ်ႉ..ၵူၼ်းႁုင်မိုဝ်ႉ.. ၵူၼ်းႁဵတ်းၵၢၼ်လၢႆလၢႆၽၢႆႇၶဝ်ၵေႃႈ မႃးႁဵတ်းၵၢၼ်ၵၼ်ယူႇဢမ်ႇၸႂ်ႈႁိုဝ် ဢွၼ်သိုပ်ႇႁဵတ်းၵႂႃႇၸွမ်းပိူင်ဢၼ်လၢၼ်ႉမီးၼၼ်ႉၵူၺ်းလႄႈ ၶၢဝ်းပိုတ်ႇၵေႃႈပိုတ်ႇ..ၶၢဝ်းပိၵ်ႉၵေႃႈပိၵ်ႉ”
တိုၼ်းႁၢၼ်လႄႈလုင်းဢွင်ႇၶဝ်ၵေႃႈ ဢမ်ႇၸၢင်ႈထဵင်သင်ၸွမ်းလႆႈၼၼ်ႉယဝ်ႉ။
“ယဝ်ႉၵေႃႈ..ၵူၼ်းဢၼ်ဢမ်ႇမႃးႁဵတ်းၵၢၼ်မိူဝ်ႈၼႆႉၼၼ်ႉ ပွင်ႇပၼ်ၶဝ်ၶိုၼ်းသေ.. ပေႃးဢမ်ႇမႃးၵေႃႈ.. ဢမ်ႇလူဝ်ႇမႃးႁဵတ်းၵၢၼ်ယဝ်ႉ.. ပေႃးဢမ်ႇမီးၵူၼ်းၵေႃႈ ႁပ်ႉၵူၼ်းမႂ်ႇၶဝ်ႈမႃးထႅင်ႈလႄႈ”
လုင်းဢွင်ႇၵေႃႈ ၵႃႈလႆႈႁပ်ႉၵႂၢမ်းၵႂႃႇၵူၺ်း ယၢမ်းၼၼ်ႉ မၼ်းၸင်ႇတူၺ်းၼႃႈလိုၼ်းၼုမ်ႇသေယဝ်ႉ ထၢမ်ၵႂႃႇ
“ယဝ်ႉလွင်ႈလိုၼ်းၼုမ်ႇၼႆႉၶႃႈလူး.. တေႁဵတ်းႁိုဝ်ၶႃႈ..”
ၸိုၼ်ႈၶိူဝ်းတူၺ်းၼႃႈလိုၼ်းၼုမ်ႇသေ
“သူမီးပၼ်ႁႃသင်ထႅင်ႈလႃႇ..”
“လွင်ႈဢၼ်ပဵၼ်ပၼ်ႁႃၸိူဝ်းၼႆႉမႃးၵေႃႈ.. ပဵၼ်ယွၼ်ႉၶႃႈမႃးပဵၼ်ႁူဝ်ၼႃႈၼၼ်ႉယဝ်ႉ”
“သူၵေႃႈႁူႉလီယူႇလူး ၵႄႈၶႆၵႂႃႇလႄႈ”
လိုၼ်းၼုမ်ႇဢၢင်ႈတေတွပ်ႇၶိုၼ်း လုင်းဢွင်ႇၵေႃႈၼႅတ်ႈလၢတ်ႈၸိမ်ၵႂႃႇ
“မိူဝ်ႈဝႃးမီးၵူၼ်းႁဵတ်းၵၢၼ်ၵေႃႉၼိုင်ႈလႆႈဢွၵ်ႇၵၢၼ်ၵႂႃႇလႄႈ ႁဵတ်းႁႂ်ႈမိူဝ်ႈၼႆႉ ၵူၼ်းႁဵတ်းၵၢၼ်ၶဝ်ဢမ်ႇမႃးႁဵတ်းၵၢၼ်ၼၼ်ႉၶႃႈယဝ်ႉ”
“ဢွၵ်ႇၵႂႃႇၵေႃႈဢွၵ်ႇလႄႈ ပဵၼ်သင်တေႁႂ်ႈမၼ်းသုၵ်ႉသၵ်ႉလႃႇ”
“ဢိူဝ်ႈ.. ၵွပ်ႈဝႃႈ..” ဢဝ်လိၵ်ႈတၢင်ႇထိုင် ၶွင်ၵူၼ်းႁဵတ်းၵၢၼ်ၸိူဝ်းၼၼ်ႉ ပၼ်ၸိုၼ်ႈၶိူဝ်းတူၺ်းၵႂႃႇယူႇ။ ၸိုၼ်ႈၶိူဝ်းယၵ်ႉတူၺ်းၵႅပ်ႉၼိုင်ႈယဝ်ႉ
မိူၼ်တေႁူႉလွင်ႈႁူႉတၢင်းမၼ်းသေ
“သူလႆႈႁဵတ်းတေႉယူႇႁႃႉ..”
လိုၼ်းၼုမ်ႇၼိမ်ယဵၼ်ၵႂႃႇ ဢမ်ႇပႆႇတွပ်ႇသင်ၶိုၼ်း ၶဝ်ၼႂ်းၼၼ်ႉၵေႃႈ ဢွၼ်ၵၼ်ပၵ်းတူၺ်းတီႈမၼ်း မုင်ႈမွင်းၶေႃႈတွပ်ႇၵၼ်ယူႇ။ ပေႃးတေတွပ်ႇဝႃႈၸႂ်ႈၵေႃႈ သမ်ႉဢမ်ႇလႆႈႁဵတ်းတေႉ ပေႃးတေလၢတ်ႈဝႃႈဢမ်ႇၸႂ်ႈ သၢၵ်ႈသေႇလၵ်းထၢၼ် ဢၼ်ပိူၼ်ႈႁၼ်လႆႈၼၼ်ႉသမ်ႉ ပေႃးၼႄဢွၵ်ႇမႃးဝႆႉယဝ်ႉလႄႈ မၼ်းၵေႃႈဢမ်ႇမီးသင် ၼႄလႆႈသၢၵ်ႈသေႇဝႃႈမၼ်းၼၼ်ႉ ဢမ်ႇလႆႈႁဵတ်းတေႉၼႆလူး။
“ႁႂ်ႈၶႃႈပဵၼ်ၵူၼ်းဢမ်ႇမေႃႁပ်ႉဢဝ်ပုၼ်ႈၽွၼ်းၼၼ်ႉ လီလိူဝ်ယဝ်ႉ ၶႅၼ်းလိူဝ်သေတေလႆႈမႃးႁပ်ႉဢဝ် လွင်ႈဢၼ်ၶႃႈဢမ်ႇလႆႈႁဵတ်းၼၼ်ႉ” ၶႂ်ႈလၢတ်ႈၸိူင်ႉၼႆယူႇသေတႃႉ လႆႈတင်းဝူၼ်ႉဢဝ်ၵူၺ်း။
“မိူဝ်ႈလႂ်မိူဝ်ႈမၼ်းပဵၼ်မႃးယဝ်ႉ လွင်ႈၼႆႉၵေႃႈပဵၼ်ယွၼ်ႉၶႃႈပႃးၽွင်ႈယူႇ ၵူၺ်းၵႃႈ လွင်ႈဢၼ်လိၵ်ႈတၢင်ႇထိုင်ၼၼ်ႉဝႃႈ ၶႃႈတဵၵ်းႁႂ်ႈၵူၼ်းႁဵတ်းၵၢၼ်ဢွၵ်ႇၵၢၼ်ၼၼ်ႉ ၶႃႈဢမ်ႇလႆႈတဵၵ်းတဵင် ၵူၺ်းၵႃႈ..မိူၼ်ဝႃႈ..ၶဝ်ၵေႃႈ ဢမ်ႇတဵမ်ၸႂ်ဢွၵ်ႇမိူၼ်ၵၼ်ၼၼ်ႉယဝ်ႉ ၶႃႈဝူၼ်ႉဝႃႈ တေဢၢၼ်းႁွင်ႉၶဝ်ပွၵ်ႈမႃးၶိုၼ်း လႄႈ မိူဝ်ႈဝႃးၼၼ်ႉၵေႃႈ ၶႃႈလႆႈယွၼ်းၶိုၼ်းဝႂ်ယွၼ်းဢွၵ်ႇၵၢၼ်ၼၼ်ႉယူႇ ၵူၺ်းၵႃႈ ၽူႈၸတ်းၵၢၼ်ဢမ်ႇတၼ်းသေ လၢတ်ႈႁႂ်ႈၶႃႈမႃးဢဝ်ဝၼ်းမိူဝ်ႈၼႆႉၼႆလႄႈ ဢမ်ႇထၢင်ႇဝႃႈ တေပဵၼ်လွင်ႈၸိူင်ႉၼႆမႃးၼၼ်ႉၶႃႈယဝ်ႉ”
လုင်းဢွင်ႇၼၼ်ႉၵေႃႈ သမ်ႉပေႃးဢမ်ႇၸၢင်ႈတၵ်းသဵင်သင်လႆႈၸွမ်းယဝ်ႉ။ ၸိုၼ်ႈၶိူဝ်း မိူဝ်ႈႁူႉလွင်ႈတၢင်းမၼ်းမႃးၼၼ်ႉၵေႃႈ
“မိူဝ်ႈသူဝူၼ်ႉဢၢၼ်းတေႁဵတ်းၸိူင်ႉၼၼ်ၵေႃႈ သိုပ်ႇႁဵတ်းၵႂႃႇလႄႈ”
ၸိုၼ်ႈၶိူဝ်းၼၼ်ႉတႄႉ ၵမ်းၵမ်းဝၢႆႇတူၺ်းဢွမ်မွင်း တီႈၶေႃႈမိုဝ်းမၼ်းယူႇတိၵ်းတိၵ်း မိူၼ်တေႁိပ်ႈၼႅတ်ႈဝႆႉလႄႈ တိုၼ်းႁၢၼ်ၵေႃႈၼႅတ်ႈပိၵ်ႉဢိုတ်းပၢင်ၵုမ်ယဝ်ႉသေ သွင်ၶႃၵေႃႈၼႅတ်ႈဢွၵ်ႇၵႂႃႇယူႇယဝ်ႉ။
တွၼ်ႈသိပ်းသုတ်းၵႂႃႇယဝ်ႉ သိုပ်ႇတူၺ်းထႅင်ႈတွၼ်ႈသိပ်းဢဵတ်းၶႃႈ။
ႁပ်ႉထွမ်ႇပၼ်ႁႅင်းလူၺ်ႈသဵင် တၢင်း YouTube ၵေႃႈလႆႈၶႃႈ။
