ၵူၼ်းၵေႃႉဢၼ်ႁၼ်လွင်ႈလီလႄႈလွင်ႈဢမ်ႇလီႁဝ်းသေယဝ်ႉ ၶဝ်ၵေႃႈယင်းတိုၵ်ႉယူႇၸွမ်းႁဝ်းၼၼ်ႉ ပွင်ႇဝႃႈၶဝ်ပဵၼ်ဢူၺ်းၵေႃႉဢၼ်လီလိူဝ်ပိူၼ်ႈယဝ်ႉ။
တႃႇပဵၼ်ဢူၺ်းၵေႃႉတင်းၽႂ်သေၵေႃႉ ၼႂ်းၶၢဝ်းယၢမ်းလီၼၼ်ႉ မၼ်းဢမ်ႇၸႂ်ႈလွင်ႈယၢပ်ႇ၊ ၽႂ်ၽႂ်ၵေႃႈယုမ်ႉၶူဝ်ၵႂႃႇၸွမ်းၵၼ်လႆႈ၊ မိူဝ်ႈယၢမ်းဢၼ်မူၼ်ႈသိူဝ်းလႄႈသိူဝ်းၸႂ်ၼၼ်ႉ ၽႂ်ၵေႃႈၶႂ်ႈယူႇၸမ်ယဝ်ႉ ဢၼ်ႁဝ်းၸိုၼ်ႈသႂ်ပဵၼ်ၵူၼ်းလီ ပဵၼ်ၵူၼ်းဝူၼ်ႉလွင်ႈလီၼၼ်ႉ။
ၵူၺ်းၵႃႈ ၵူၼ်းၵေႃႉဢၼ်ယင်းတိုၵ်ႉယူႇ ၼႂ်းဝၼ်းဢၼ်ႁဝ်းထူပ်းလွင်ႈဢမ်ႇလီလိူဝ်ပိူၼ်ႈ ၼႂ်းဝၼ်းဢၼ်ႁဝ်းသုၵ်ႉၸႂ် ဢမ်ႇမီးလွင်ႈမီးတၢင်း လၢတ်ႈၵႂၢမ်းဢမ်ႇလီထွမ်ႇ ဝၼ်းဢၼ်ႁဝ်းတဵတ်ႇယဵၼ်ႁၢႆၵႂႃႇ ဝၼ်းဢၼ်ႁဝ်းဢမ်ႇၶႂ်ႈဢုပ်ႇလၢတ်ႈတေႃႇၽႂ်၊ ဝၼ်းဢၼ်ႁဝ်းႁဵတ်းၽိတ်း၊ ဝၼ်းဢၼ်ႁဝ်းမီးလွင်ႈဢၼ်တူၵ်းသုမ်းယူႇၼၼ်ႉ သင်ၵူၼ်းၵေႃႉၼၼ်ႉယင်းတိုၵ်ႉယူႇ ယင်းတိုၵ်ႉဢုပ်ႇလၢတ်ႈတေႃႇၵၼ်မိူၼ်ၵဝ်ႇ သမ်ႉဝႃႈႁၼ်လွင်ႈဢမ်ႇလီႁဝ်းၵႂႃႇမူတ်းၵေႃႈ ယင်းႁပ်ႉထွမ်ႇ သမ်ႉဝႃႈႁဝ်းဢမ်ႇမီးသင်လီၵေႃႈယဝ်ႉ ယင်းတိုၵ်ႉယဵၼ်ႉၵၼ်ႈလႄႈ ဢမ်ႇပွႆႇႁႂ်ႈလွင်ႈႁၢင်ႇၵႆႁဝ်းသုတ်းသဵင်ႈၵႂႃႇ ၵူၼ်းၸိူင်ႉၼႆၼႆႉ ႁွင်ႉဝႃႈ “ဢူၺ်းၵေႃႉဢၼ်လီတေႉတေႉယဝ်ႉ”။
မိူဝ်ႈၶိုၼ်ႈၸိုဝ်ႈဝႃႈ ဢူၺ်းၵေႃႉလီ ဢမ်ႇၸႂ်ႈၵူၼ်းဢၼ်ယူႇၸွမ်းၵၼ်ၼႂ်းဝၼ်းဢၼ်မီးတၢင်းသိူဝ်းၵူၺ်း မၼ်းပဵၼ်ၵူၼ်းၵေႃႉဢၼ်ယူႇၸွမ်းႁဝ်းၼႂ်းဝၼ်းဢၼ်ႁဝ်းလီၸင်းလိူဝ်ပိူၼ်ႈ ၵူၼ်းၵေႃႉဢၼ်ႁူႉႁၼ်ၵူႈလွင်ႈႁဝ်းလႄႈ ၶဝ်ၵေႃႈယင်းဢမ်ႇၵႂႃႇတၢင်းလႂ်ပႅတ်ႈ။
သင်မီးဢူၺ်းၵေႃႉၸိူင်ႉၼႆၼႂ်းၸၢတ်ႈပၢၼ် ႁႂ်ႈထိင်းသိမ်းၶဝ်ဝႆႉလီလီ ယွၼ်ႉၼႂ်းၶူင်းၵၢင်ၼႆႉ မီးလွင်ႈၸမ်ၸႂ်ၸူဝ်ႈၶၢဝ်းၼမ်ၼႃႇလႄႈ ၵူၼ်းၵေႃႉဢၼ်ယင်းတိုၵ်ႉယူႇသေ ႁၼ်ၵႃႈၶၼ်ႁဝ်းယူႇၼၼ်ႉ ႁႃယၢပ်ႇၼႃႇ။
ပိၼ်ႇ – ငဝ်မွင်မိုတ်းမူဝ်း
