သၽႃႇဝဢၼ်ႁၢင်ႈလီ လူမ်းၸိုၼ်ႈၵတ်းယဵၼ် မိူၼ်ၼင်ႇမိူဝ်ႈပီႊပူၼ်ႉမႃးၼၼ်ႉသေတႃႉ လွင်ႈတၢင်းႁၢင်ႈလီဝၼ်းမိူဝ်ႈၼႆႉ တွၼ်ႈတႃႇလိုၼ်းသႅင်တႄႉ တိူဝ်းၼမ်မႃး လိူဝ်သေမိူဝ်ႈပီႊပူၼ်ႉၼၼ်ႉတႄႉတႄႉယူႇ ၵွပ်ႈဝႃႈ ပဵၼ်ဝၼ်းဢၼ် ၸၢႆးဝၼ်းႁွင်ႉထူပ်းၵၼ်လူး တေလႆႈႁၼ်ၵၼ်ၸိူင်ႉၼႆ ႁူႉၵႃႈၸႂ်သိူဝ်းယူႇလေႃႇ တူၺ်းၵႂႃႇတၢင်းလႂ်ၵေႃႈ သမ်ႉပေႃးႁၢင်ႈလီလူင်ၵႂႃႇမူတ်းၼၼ်ႉယဝ်ႉ။
ၸၢႆးဝၼ်းၵေႃႈ တွၼ်ႈတႃႇတေလႆႈထူပ်းလိုၼ်းသႅင်ၼၼ်ႉ ႁၢင်ႈၶိူင်ႈပၼ်သမ်ႉပေႃးလဝ်း ၼႅတ်ႈႁၢင်ႈႁႅၼ်းတူဝ်ဢွၵ်ႇႁိူၼ်းမႃးၸဵမ်ၸဝ်ႉယူႇ မိူဝ်ႈတေဢွၵ်ႇယၢၼ်ႁိူၼ်းၵႂႃႇၼၼ်ႉ မႄႈလႆႈႁၼ်မၼ်းဢွၵ်ႇၵႂႃႇၸိူင်ႉၼၼ် ၸႂ်ဢမ်ႇပေႃးလီဝႆႉလႄႈ
“လုၵ်ႈတေၵႂႃႇတၢင်းလႂ်လႃႇ မိူဝ်ႈၼႆႉ ဢမ်ႇၵႂႃႇဢမ်ႇလႆႈႁႃႉ”
“ၸၢႆးတေၵႂႃႇၸူးၵေႃႉႁၵ်ႉဢေႃႈ လႆႈလၢတ်ႈဝႆႉယဝ်ႉၵေႃႈ လူဝ်ႇႁဵတ်းၸွမ်းၵႂၢမ်းမၼ်ႈၶႃႈဢေႃႈမႄႈ ၸၢႆးၵႂႃႇၵွၼ်ႇယဝ်ႉ”
“ၾၢင်ႉတူဝ်လႄႈၼႃႈ ၶပ်းလူတ်ႉလီလီဢိတ်းၼိုင်ႈလႄႈ”
“ဢေႃႈၶႃႈ…” တၢင်းၸူမ်းတၢင်းသိူဝ်းလူင်သေ ဢွၵ်ႇႁိူၼ်းၵႂႃႇယူႇယဝ်ႉ။
ၸၢႆးဝၼ်း ၶပ်းလူတ်ႉၶိူင်ႈဢွၼ်ႇမၼ်းၵႂႃႇၸွမ်းသဵၼ်ႈတၢင်းလူင်ၼၼ်ႉတိၵ်းတိၵ်းယူႇယဝ်ႉ ယွၼ်ႉၶၢဝ်းတၢင်းၵႆလႄႈ သင်ၼၢၼ်းႁွတ်ႈၼႆ တၢင်းႁၢင်ႈလီလုၵ်ႈတႃဝၼ်းဢၼ်ဢၢၼ်းတေပႂ်ႉတူၺ်းႁူမ်ႈၵၼ်ၼၼ်ႉၵေႃႈ တေဢမ်ႇတၼ်းလႆႈႁၼ်ယဝ်ႉလူး ၼႅတ်ႈၶပ်းလူတ်ႉမၼ်းၵႂႃႇဝႆးဝႆးယူႇ။ ႁႅင်းဝႆးလူတ်ႉမၼ်းၼၼ်ႉ ဝႆးႁႅင်းၼႃႇလႄႈ မိူဝ်ႈလႆႈႁွတ်ႈထိုင်တီႈတၢင်းၽႄၼၼ်ႉ ၸင်ႇသမ်ႉမီးၵႃးတၢင်ႇၵုၼ်ႇလူင်ၵူတ်ႉႁူဝ်ၵႃးမႃးတၢင်းမၼ်းၼၼ်ႉလႄႈ လူတ်ႉမၼ်းၼၼ်ႉ ၵိုင်ႉၵၢင်ႉထိင်းဢမ်ႇလႆႈမႃးလႄႈ လူတ်ႉဢွၼ်ႇတင်းလူတ်ႉလူင် လေႃႈၶဝ်ႈၸူးၵၼ်ၵႂႃႇ ၸူဝ်ႈၽႅပ်ႉတႃၵူၺ်း မၼ်းလႄႈတင်းလူတ်ႉလူမ်ႉထူလူင်းၵႂႃႇၸွမ်းၵၼ်ယူႇယဝ်ႉ ပိုၼ်ႉလိၼ်ဢၼ်ႁႅင်ႈႁွင်ၼၼ်ႉၵေႃႈ မီးလိူတ်ႈလႅင်လႅင် ၽုတ်းလၼ်ဢွၵ်ႇမႃးတီႈႁူဝ်မၼ်းၼၼ်ႉသေ ၸိုမ်ႉယမ်းသိူဝ်ႇၼိူဝ်သဵၼ်ႈတၢင်း သမ်ႉပေႃးလႅင်ၸၢင်းဢၢင်းဝႆႉယဝ်ႉ။
တႃဝၼ်းၵေႃႈဢွၵ်ႇ မွၵ်ႇၵုမ်ႈဢၢႆႊၼမ်ႉၵေႃႈၶိုၼ်ႈသုင်မႃး တၢင်းႁၢင်ႈလီၼၼ်ႉၵေႃႈ လႆႈၸူမ်ႁၢႆၵႂႃႇၸွမ်းသၢႆလႅင်းလႅတ်ႇဢၼ် ထွင်ႇပိူင်းႁွၼ်ႉမႆႈထိုင်ၼိူဝ်ႉၼင်လိုၼ်းသႅင်ၼၼ်ႉလႄႈ ဢမ်ႇလႆႈႁၼ် ၸၢႆးဝၼ်းႁွတ်ႈမႃးၸွမ်းၶၢဝ်းယၢမ်းၼႆၵေႃႈ ၸႂ်ႁိုဝ်တေသိူဝ်းလႆႈလႄႈ ၸႂ်ၵေႃႈဢမ်ႇလီမႃးယူႇ သင်တေသိုပ်ႇၽူင်းၸူး ၵူဝ်ၶဝ်သမ်ႉတိုၵ်ႉၶပ်းလူတ်ႉယူႇၼၼ်ႉယဝ်ႉ။ လိူဝ်သေၼၼ်ႉ ဢမ်ႇႁွတ်ႈမႃးၸွမ်းၶၢဝ်းယၢမ်းၸိူင်ႉၼႆ ၼႂ်းၸႂ်ၵေႃႈလွမ်လွမ်ၸႂ်လမ်ဝႆႉယူႇ မၼ်းၵေႃႈတေဢမ်ႇဢၢၼ်းသိုပ်ႇၽူင်းၸူးၶဝ်တေႃႇၶဝ်ႁွတ်ႈမႃးၼႆယဝ်ႉ။ ၵူၺ်းၵႃႈ မၼ်းလႃႈႁႅင်းၼႃႇ ဢမ်ႇလႆႈႁၼ်ၶဝ်မႃးသေပွၵ်ႈၼၼ်ႉ ထိုင်တီႈႁႄႉႁၢမ်ႈၸႂ်ဝႆႉဢမ်ႇလႆႈသေ သိုပ်ႇၵႂႃႇၸူးယဝ်ႉ။ သိုပ်ႇၸူးၶဝ်ဢမ်ႇႁပ်ႉသေ ႁဵတ်းႁႂ်ႈၶဝ်ယိုင်ႈၶႅၼ်းၸႂ်လမ်မႃးထႅင်ႈႁႅင်းယူႇ ဢၢၼ်းတေသိုပ်ႇၸူးၶဝ် တေႃႇၶဝ်ပေႃးႁပ်ႉၵႂႃႇၼႆယဝ်ႉ။ သဵင်ၽူင်းဢၼ်သၼ်ႇယူႇတီႈၼႂ်းသိူဝ်ႈ ၸၢႆးဝၼ်းၼၼ်ႉၵေႃႈ သဵင်မၼ်းၼၼ်ႉ မေႃးမႃးတုမ်ႉယွၼ်ႈထိုင်ၼႂ်းႁူဝ်ၸႂ်မၼ်းယူႇသေတႃႉ မိုဝ်းဢွၼ်ႇမၼ်းၼၼ်ႉ ၶတ်းၸႂ်တူင်ႉယိပ်းၶဝ်ႈထိုင်ၽူင်းယူႇၵေႃႈ ႁိုဝ်တေၸၢင်ႈ ယၢမ်းၼၼ်ႉ မေႃယႃ ႁၼ်မႄႈၾႆးၽူင်းဢၼ်လႅင်းဢွၵ်ႇမႃးၼႂ်းထွင်းသိူဝ်ႈၼၼ်ႉသေ လႆႈႁပ်ႉၽူင်းၵႂႃႇပၼ်ယူႇ။
လိုၼ်းသႅင်ၵေႃႈ မိူဝ်ႈၸၢႆးဝၼ်းႁပ်ႉၽူင်းယဝ်ႉၼၼ်ႉ တၢင်းလူမ်းၸႂ်လမ်ဢၼ်လေႃးတေႃးသၼၼ်ႉ တိုၵ်ႉဢၢင်ႈတေၶိုၼ်ႈသဵင်လၢတ်ႈယူႇ မေႃယႃ လႆႈလၢတ်ႈဢွၵ်ႇမႃးဢွၼ်တၢင်းယဝ်ႉ
“သူပဵၼ်ပီႈၼွင်ႉၶဝ်ၶႃႈႁႃႉ… ၶဝ်ထူပ်းၽေးၵိုင်ႉၵၢင်ႉ မိူဝ်ႈလဵဝ်မီးယူႇတီႈႁူင်းယႃၼႆႉၶႃႈဢေႃႈ”
သီၼႃႈမၼ်းၵိုင်ႉၵၢင်ႉလႅၵ်ႈလၢႆႈလူင်ၵႂႃႇၸွမ်းၶေႃႈၵႂၢမ်းၶဝ် မိူဝ်ႈပဵၼ်ၸိူင်ႉၼၼ် ၽႂ်ႁိုဝ်ၸႂ်လမ်လႆႈလႃႇ ဢဝ်မၼ်းပေႃးဢမ်ႇၸၢင်ႈၼိမ်သဝ်းလႆႈ ၼႅတ်ႈလႅၼ်ႈလူင်းလွႆၵႂႃႇ ႁိပ်ႈဢဝ်လူတ်ႉဢွၵ်ႇၶၢဝ်းတၢင်းၵႂႃႇႁူင်းယႃၼၼ်ႉဝႆးဝႆႉယဝ်ႉ။ မိူဝ်ႈႁွတ်ႈပွတ်းတၢင်း လူတ်ႉသမ်ႉလႆႈၵိုတ်းသေ ၼမ်ႉမၼ်းလူတ်ႉသမ်ႉမူတ်းၵႂႃႇလႄႈ မၼ်းၵေႃႈႁိုဝ်တေယွမ်းသုမ်းလႆႈလႃႇ လူတ်ႉဢမ်ႇလႅၼ်ႈလႆႈၵေႃႈ ၵူၼ်းၵေႃႈလႅၼ်ႈလႆႈယူႇလူး။ ဢဝ်ႁႅင်းတူဝ်ႁႅင်းၸႂ်မၼ်း ၸိုၼ်ႇလႅၼ်ႈလူင်ၵႂႃႇၸွမ်းသဵၼ်ႈတၢင်းႁူင်းယႃၼၼ်ႉတိၵ်းတိၵ်းယဝ်ႉ သမ်ႉဝႃႈ လႅၼ်ႈယူႇၵေႃႈ ၼႂ်းၸႂ်ၼၼ်ႉ ႁိုဝ်တၼ်းတူၺ်းတၢင်းဝႆးမၼ်းလႃႇ ႁူႉဝႃႈလူဝ်ႇထိုင်လႄႈ လူဝ်ႇႁၼ်ၶဝ်ၼၼ်ႉၵူၺ်းယဝ်ႉ။
ႁွတ်ႈထိုင်ႁူင်းယႃယဝ်ႉ လွင်ႈဢၼ်မၼ်းလႆႈငိၼ်းၵေႃႈ မေႃယႃလၢတ်ႈဝႃႈ “မွင်ၸႂ်ၸွမ်းတေႉယဝ်ႉ မေႃယႃ ၸွႆႈသင်ၶဝ်ဢမ်ႇလႆႈယဝ်ႉ” ၶေႃႈၵႂၢမ်းမေႃယႃၼၼ်ႉ ႁဵတ်းႁႂ်ႈႁႅင်းၶႃမၼ်းသမ်ႉပေႃးဢူၼ်ႈဢွၼ်ႇၵႂႃႇမူတ်း ၼမ်ႉတႃမၼ်းၼၼ်ႉလႆႈၸိုမ်ႉယမ်းတီႈႁူၺ်ႇတႃမၼ်းသေ လႆယမ်းသႂ်ႇၼိူဝ်ၵႅမ်ႈဢွၼ်ႇမၼ်းလူင်းမႃး ပေႃးဢမ်ႇထၢတ်ႇဢမ်ႇဝၢႆးလႆႈယဝ်ႉ။ မိူဝ်ႈမီးသတိမႃးၶိုၼ်းၼၼ်ႉ မၼ်းၸင်ႇ လႆႈၶဝ်ႈၵႂႃႇတူၺ်းၸၢႆးဝၼ်းဢၼ်တိုၵ်ႉၼွၼ်းပႂ်ႉ ၵူၼ်းၵေႃႉဢၼ်တေထွတ်ႇလူမ်းထူၺ်ႈၸႂ်မၼ်းယူႇၼၼ်ႉၵူၺ်းယဝ်ႉ။ တူဝ်ၶဝ်ၼၼ်ႉၵေႃႈ သမ်ႉပေႃးဢမ်ႇတူင်ႉတူဝ်လႆႈသေဢိတ်း လၢတ်ႈၵႂၢမ်းၵူၺ်းယင်းဢမ်ႇလႆႈ။ လိုၼ်းသႅင်ၵေႃႈ လႆႈၵႂႃႇယိပ်းၵမ်ဢဝ်မိုဝ်းၶဝ်ၼၼ်ႉဝႆႉယူႇ မိုဝ်းၶဝ်ၼၼ်ႉၵေႃႈ မိူၼ်တေႁပ်ႉႁူႉလႆႈသေ တုမ်ႉတွပ်ႇၸူးမၼ်းၶိုၼ်းယဝ်ႉ။ ဢမ်ႇႁိုင် မႄႈလႄႈ ဢူၺ်းၵေႃႉမၼ်း လႆႈဢွၼ်ၵၼ်ႁွတ်ႈမႃးယဝ်ႉ လိုၼ်းသႅင်ႁၼ်ၶဝ်ယဝ်ႉၵေႃႈ လႆႈထွႆဢွၵ်ႇႁၢင်ႇၵႂႃႇပႅတ်ႈၶဝ်ယူႇ ၵူၺ်းၵႃႈ မႄႈၸၢႆးဝၼ်းၼၼ်ႉ လႆႈမႃးယိပ်းဢဝ်မိုဝ်းလိုၼ်းသႅင်သေ ပွႆႇၼမ်ႉတႃလႆႈဢွၵ်ႇၸူးယဝ်ႉ
“သူ ၸွႆႈဢဝ်ၶိူင်ႈထူၺ်ႈၸႂ် ဢွၵ်ႇပၼ်ပႃႈၸွင်ႇလႆႈႁိုဝ်”
မိူၼ်ဝႃႈ လိုၼ်းသႅင်ၵေႃႈ ဢမ်ႇၶႂ်ႈႁႂ်ႈမၼ်းဢွၵ်ႇမိူၼ်ၵၼ် ၽႂ်ႁိုဝ်တေၶႂ်ႈႁၼ်ၵူၼ်းၵေႃႉဢၼ်တူဝ်ၸဝ်ႈၵဝ်ႇႁၵ်ႉ ၽၢတ်ႇယၢၼ်ၵႂႃႇလႃႇ ၵူၺ်းၵႃႈ တေႁႂ်ႈၶဝ်သိုပ်ႇယူႇ မၼ်းၵေႃႈတေႁဵတ်းႁႂ်ႈၶဝ် တုၵ်ႉၶထႅင်ႈၵူၺ်းလူး။ လိုၼ်းသႅင်ၵေႃႈ တၢင်းႁတ်းဢမ်ႇႁတ်းသေ ဢဝ်ဢွၵ်ႇၵႂႃႇယဝ်ႉ တူၺ်းလူမ်းထူၺ်ႈၸႂ် ၸၢႆးဝၼ်းၼၼ်ႉ မူတ်းသဵင်ႈၵႂႃႇလွႆးလွႆး။ သဵင်ႁွင်ႉႁႆႈၶဝ်ၵေႃႈ လႆႈလင်ဢွၵ်ႇပေႃးပူၼ်ႉႁွင်ႈလူင်ၼၼ်ႉၵႂႃႇယူႇ။
လိုၼ်းသႅင်တၢင်းႁွင်ႉတၢင်းႁႆႈ ပွၵ်ႈမိူဝ်းႁိူၼ်းၵႂႃႇ သမ်ႉပေႃးဢမ်ႇၶႂ်ႈမီးႁႅင်းယၢင်ႈတိၼ်လူးၵွၼ်ႇ ယင်ႈၵႂႃႇတၢင်းၼႃႈၼႆသေတႃႉ မိူၼ်ဝႃႈထွႆၵႂႃႇၶိုၼ်းတၢင်းလင်ၼၼ်ႉယဝ်ႉ ပႆၵႂႃႇၵေႃႈ ၸိုင်ပေႉၵႅၼ်ႇႁိူဝ်ႉဢူၼ်ႈၼႃႇ ႁိူဝ်ႉၼႃႇတၢၼ်ႇလႂ်ၵေႃႈ တေႃႈတေလႆႈၶတ်းၸႂ်သိုပ်ႇၵႂႃႇ တေႃႇပေႃးႁွတ်ႈထိုင်ႁိူၼ်းၼၼ်ႉယဝ်ႉ။
သိုပ်ႇမႃးထႅင်ႈသၢမ်ပီႊ လိုၼ်းသႅင်ၵေႃႈ ယွမ်းႁပ်ႉလႆႈလွင်ႈၸိူဝ်းဢၼ်ပဵၼ်ပူၼ်ႉမႃးၼၼ်ႉယဝ်ႉသေတႃႉ မၼ်းဢမ်ႇတွၼ်ႉလိုမ်းလႆႈ လွင်ႈၸိူဝ်းဢၼ်ပူၼ်ႉမႃးၼၼ်ႉသေပွၵ်ႈ မၼ်းလႆႈၶတ်းၸႂ်ယူႇၵႂႃႇၸွမ်းၸၢတ်ႈပၢၼ်မၼ်းဢၼ်ပဵၼ်ယူႇၼႆၵေႃႈ ပေႃးဝၼ်းလိုဝ်ႈမႃးၼႆ သင်မီးၶၢဝ်းယၢမ်းၼႆၸိုင် တေၵႆႉၵႆႉၵႂႃႇၼင်ႈလဵၼ်ႈ တီႈၼိူဝ်သၼ်လွႆဢၼ်ႁၢင်ႈလီၼၼ်ႉတႃႇသေႇယဝ်ႉ။
သၼ်လွႆလုၵ်ႈၼႆႉ မၼ်းပၼ်တၢင်းႁၢင်ႈလီ၊ ပၼ်တၢင်းမူၼ်ႈသိူဝ်း၊ ပၼ်လွင်ႈဢုၼ်ႇၸႂ်၊ ပၼ်လွင်ႈမွင်ၸႂ်၊ ပၼ်လွင်ႈၶီငဝ်၊ ပၼ်မၢႆတွင်းဢၼ် လိုၼ်းသႅင်ဢမ်ႇတွၼ်ႉလိုမ်းလႆႈသေပွၵ်ႈၼၼ်ႉယဝ်ႉ။
သုတ်းယဝ်ႉ။
❖ ၸူဝ်ႈၵႅပ်ႉၵမ်းဢၼ်လႆႈႁၵ်ႉၵၼ်ၼၼ်ႉ မၼ်းဢမ်ႇႁဵတ်းႁႂ်ႈတၢင်းႁၵ်ႉ လူတ်းယွမ်းႁၢႆၵႂႃႇလႆႈ ၼႂ်းၸူဝ်ႈၵႅပ်ႉၵမ်းၵူၺ်း။
❖ ၵူၼ်းပွႆႇၽႃႈတႄႉတေလိုမ်းၵႂႃႇယဝ်ႉ ၵူၺ်းၵႃႈ ၵူၼ်းထုၵ်ႇပွႆႇၽႃႈၼၼ်ႉ ႁိုဝ်တေလိုမ်းလႆႈ။
❖ ယႃႇပေဢဝ်လူမ်းၸႂ်လမ်သေတႅပ်းတတ်းၵႂႃႇ ယွၼ်ႉႁဝ်းဢမ်ႇႁူႉဝႃႈၶဝ်လႆႈထူပ်းလွင်ႈသင်ယူႇ။
❖ မိူဝ်ႈမီးၶၢဝ်းယၢမ်း၊ မီးတိုဝ်ႉတၢင်းၼၼ်ႉ ၸႂ်ႉၶၢဝ်းယၢမ်းယူႇၸွမ်းၶဝ်ႁႂ်ႈမီးၵႃႈၶၼ်လႄႈ ယူႇၸွမ်းၵၼ်ႁႂ်ႈမီးတၢင်းသိူဝ်းလႄႈ ႁဝ်းဢမ်ႇႁူႉလႆႈ ဝၼ်းလႂ်တေလႆႈၽၢတ်ႇယၢၼ်ၵၼ်ၵႂႃႇလူး။
❖ သင်ဢမ်ႇႁတ်းလိူၵ်ႈ သဵၼ်ႈတၢင်းၼႂ်းဝၼ်းၼၼ်ႉၵေႃႈ တေဢမ်ႇမႃးထိုင်လႆႈဝၼ်းမိူဝ်ႈၼႆႉ။
❖ သင်ယူႇၸွမ်းလွင်ႈဝၼ်းလင် မၼ်းၵေႃႈတေဢမ်ႇမီးဝၼ်းၵႂႃႇတၢင်းၼႃႈလႆႈ။
❖ ၵေႃႉႁၵ်ႉႁဝ်းၼၼ်ႉ သင်ႁဝ်းဢမ်ႇထိင်းသိမ်းမၼ်းဝႆႉလီလီၼႆ မၼ်းတေၸၢင်ႈထုၵ်ႇပိူၼ်ႈႁိမ်ဢဝ်ၵႂႃႇလႆႈၼၼ်ႉယဝ်ႉ။
❖ ပေႃးဝႃႈ ၶဝ်သိုဝ်ႈယူဝ်းတေႃႇတၢင်းႁၵ်ႉတေႉယူႇၼႆ ဢမ်ႇဝႃႈၶဝ်မီးယူႇတီႈလႂ်ၵေႃႈ ၶဝ်တေဢမ်ႇႁၵ်းလင်ႁဝ်း။
❖ ပေႃးၶဝ်ႁၵ်ႉႁဝ်းတေႉ ၶဝ်တေဢမ်ႇလႅၼ်ႁဝ်းလႄႈ တေဢမ်ႇၵႂႃႇႁႃၵူၼ်းတၢင်ႇၵေႃႉလေႃႇ ၵူၼ်းၸိူင်ႉၼႆ မၼ်းၵေႃႈဢမ်ႇၵိုင်ႇတၢၼ်ႇတေပၼ်တၢင်းႁၵ်ႉတီႈၶဝ်မိူၼ်ၵၼ်။
❖ ၵူၼ်းၵေႃႉဢၼ်ပွႆႇၽႃႈႁဝ်းၵႂႃႇယဝ်ႉၼၼ်ႉ ယွၼ်ႉၶဝ်ဢမ်ႇၵိုင်ႇထိူၵ်ႈၵၼ်တၢင်းႁဝ်းၼၼ်ႉယဝ်ႉ ၵူၼ်းၵေႃႉဢၼ်ၵိုင်ႇတၢၼ်ႇႁဝ်းလႄႈ ဢၼ်ၵိုင်ႇထိူၵ်ႈႁဝ်းၼၼ်ႉၵေႃႈ တေၸၢင်ႈပႂ်ႉႁဝ်းဝႆႉယူႇ။
ၼပ်ႉယမ်ထိုင်ၽူႈလူလိၵ်ႈႁဝ်းၶဝ်ယူႇဢေႃႈ
တႅမ်ႈ – ငဝ်မွင်မိုတ်းမူဝ်း
05/12/2021
