လႃႈၵေႃႈလႃႈမႃးယဝ်ႉလႄႈ ယိင်းၵေႃႈ ယွၼ်းပွၵ်ႈမိူဝ်းၵႂႃႇယူႇ။ မိူၼ်ဝႃႈ ၸၢႆးဝၼ်းၵေႃႈ တေပွၵ်ႈမိူဝ်းမိူၼ်ၵၼ်လႄႈ ဢဝ်တိုဝ်ႉတၢင်း ပွၵ်ႈမိူဝ်းၵႂႃႇၸွမ်းၵၼ်ယဝ်ႉ ဢုပ်ႇၵၼ်လူင်မိူဝ်းၵႂႃႇၸွမ်းတၢင်းသေ မိူဝ်ႈႁွတ်ႈထိုင်တိၼ်လွႆၼၼ်ႉၵေႃႈ လႆႈႁွတ်ႈထိုင်ႁိူၼ်း ယိင်းမိူၼ်ၵၼ်ယဝ်ႉ တွၼ်ႈတႃႇၸၢႆးဝၼ်းတႄႉ မၼ်းပႄႉၸဵဝ်းထိုင်ၼႆယူႇၼႂ်းၸႂ်မၼ်းယဝ်ႉ။ ယၢမ်းဢၼ်ယိင်းၵေႃႉၼၼ်ႉ တေယၢင်ႈၶဝ်ႈဝၢင်းႁိူၼ်းၵႂႃႇ
“ၵွပ်ႈဝႃႈ… ၶႅပ်းႁၢင်ႈသူ ႁဝ်းတေလႆႈသူင်ႇပၼ်တၢင်းလႂ်ဢမ်ႇႁူႉၶႃႈၼေႃ သင်ပဵၼ်လႆႈၶႂ်ႈယွၼ်းတီႈၵပ်းသိုပ်ႇသူဝႆႉၽွင်ႈဢေႃႈ မိူဝ်ႈၼႆႉႁဝ်းဢမ်ႇလႆႈပႃးၽူင်းမႃးလႄႈ သူၸွႆႈမၢႆပၼ်ၵေႃႈလႆႈၶႃႈ”
ထူၵ်းၼႂ်းထူင်မၼ်း ဢွၵ်ႇမႃးၸေႈလႄႈၵမ် လႅမ်ႈၼိုင်ႈ ယိုၼ်ႈပၼ် ယိင်းၵႂႃႇယဝ်ႉ။
ယိင်းၵေႃႈ တႅမ်ႈယဝ်ႉ ယိုၼ်ႈၸူးၵႂႃႇသေ ၸၢႆးဝၼ်းၶွပ်ႈၸႂ်ၸူးယဝ်ႉ ႁၢင်ႇယၢၼ်ၵၼ်ဢွၵ်ႇၵႂႃႇယူႇ။ လိူဝ်သေတေပဵၼ်တီႈၵပ်းသိုပ်ႇယဝ်ႉ ယင်းပဵၼ်ၸိုဝ်ႈယိင်းၵေႃႉၼၼ်ႉထႅင်ႈလူးၵွၼ်ႇ ဢၼ်မီးၸိုဝ်ႈဝႃႈ လိုၼ်းသႅင်ၼႆ ၼၼ်ႉယဝ်ႉ။
ယၢမ်းၵၢင်ၶမ်ႈ ၸမ်တေၼွၼ်း လိုၼ်းသႅင် ပႂ်ႉတူၺ်းၽူင်းမၼ်း ဢၼ်တေမီးၵေႃႉႁၵ်ႉမၼ်းသိုပ်ႇၸူးမႃးၼၼ်ႉယဝ်ႉ ပႂ်ႉယူႇတၢင်းႁိုင်ၵေႃႈ ဢမ်ႇငိၼ်းသဵင်သင်မေႃးၸူးလႄႈ ၸင်ႇတေဢိုတ်းၽူင်းမၼ်းပႅတ်ႈယူႇ ယၢမ်းၼၼ်ႉ သဵင်လင်ၽူင်းမၼ်းမေႃးမႃး ပိုတ်ႇၶဝ်ႈတူၺ်းယဝ်ႉ ႁၼ်ၶႅပ်းႁၢင်ႈမၼ်း ဢၼ်ႁၢင်ႈလီတၢင်းၼမ်တၢင်းလၢႆယူႇ။ လိုၼ်းသႅင်ႁၼ်ႁၢင်ႈတူဝ်ၵဝ်ႇၼမ်ထိုင်တၢၼ်ႇၼၼ်ႉ လိူၵ်ႈပေႃးဢမ်ႇလႆႈဝႃႈ တေၵဵပ်းဝႆႉဢၼ်လႂ်ၽွင်ႈ ႁၢင်ႈလီၵူႈဢၼ်လႄႈ ၵဵပ်းဝႆႉတၢင်းမူတ်းသေ လႆႈငိၼ်းၸူမ်းၸူး ၸၢႆးဝၼ်းၵႂႃႇ။ ယၢမ်းၼၼ်ႉ ၸၢႆးဝၼ်းၵေႃႈ တႄႇပိုတ်ႇၶေႃႈၵႂၢမ်းဢုပ်ႇၸူး လိုၼ်းသႅင်မႃးယဝ်ႉ လိုၼ်းသႅင်ၵေႃႈ ၸူမ်းတၵ်ႉၸူမ်းဢုပ်ႇၸူးတေႃႇမိူၼ်ၵၼ် တွပ်ႇၸွမ်းၵႂႃႇၵူႈၶေႃႈၵူႈၵမ်း ယိုင်ႈဢုပ်ႇယိုင်ႈလီဢုပ်ႇတိၵ်းတိၵ်းလႄႈ မိုတ်ႈၵၼ်ၵႂႃႇၼႂ်းၶမ်ႈၶိုၼ်းလဵဝ်ၵူၺ်းသေ ဢဝ်သွင်ၶႃပေႃးလႆႈၼွၼ်းလိုၵ်းၵႂႃႇတေႃႇထိုင်တဵင်ႈၶိုၼ်းယဝ်ႉ။
ၸၢႆးဝၼ်းၵေႃႈ တႄႇၸဵမ်မိူဝ်ႈလႆႈဢုပ်ႇတေႃႇလိုၼ်းသႅင်မႃးၼႆႉ ပေႃးမီးၶၢဝ်းယၢမ်းမႃးၼႆ တေၵႆႉဢဝ်ၶၢဝ်းယၢမ်းၼၼ်ႉ ဢုပ်ႇၸူးလိုၼ်းသႅင်ယူႇ သမ်ႉဝႃႈတိုၵ်ႉႁဵတ်းၵၢၼ်ယူႇၵေႃႈ သင်ဝႃႈလိုၼ်းသႅင်လၢတ်ႈဢုပ်ႇမႃးၼႆ တွပ်ႇပၼ်ၵႂႃႇၵမ်းလဵဝ် တွၼ်ႈတႃႇလိုၼ်းသႅင်ၼၼ်ႉ တိုၼ်းမီးၶၢဝ်းယၢမ်းပၼ်တႃႇသေႇလႄႈ ႁဵတ်းႁႂ်ႈမၼ်းတိူဝ်းလဵၼ်ႈၽူင်းမႃးလိူဝ်သေၵဝ်ႇယဝ်ႉ။ ၵူႈပွၵ်ႈတႄႉ ၶၢဝ်းယၢမ်းႁဵတ်းၵၢၼ်ၵေႃႈႁဵတ်းၵၢၼ် ၵိၼ်ၶဝ်ႈၵေႃႈၵိၼ်ၶဝ်ႈ တူၺ်းၽူင်းၵေႃႈတူၺ်းၽူင်း ၸႅၵ်ႇၽႄပၼ်ၸႅင်ႈလႅင်းယူႇ လႄႈ မိူဝ်ႈထိုင်ၶၢဝ်းယၢမ်းလိုဝ်ႈမၼ်းၼၼ်ႉၵေႃႈ တေၵႆႉၵႂႃႇႁႃလႄႇထႆႇၶႅပ်းႁၢင်ႈၸိူဝ်းၼႆႉ မၼ်းဢမ်ႇဢဝ်ၽူင်းပဵၼ်ယႂ်ႇၵႃႈႁိုဝ် လိူဝ်သေၸႂ်ႉတိုဝ်းမိူဝ်ႈလူဝ်ႇႁဵတ်းၵၢၼ်ၵူၺ်း ၵူၺ်းၵႃႈ ယၢမ်းလဵဝ် ဢမ်ႇဝႃႈႁဵတ်းသင်ၵေႃႈယဝ်ႉ ၽူင်းၼၼ်ႉတိုၼ်းၽႃႈမိုဝ်းဢမ်ႇလႆႈသေပွၵ်ႈ ယွင်ႇၽူင်းႁိုဝ် ယွင်ႇသၢဝ်တႄႉဢမ်ႇႁူႉယဝ်ႉ။
လိုၼ်းသႅင်ၵေႃႈ မိူဝ်ႈၵေႃႉႁၵ်ႉမၼ်းဢမ်ႇတၵ်ႉမႃးၼၼ်ႉ တေၵႆႉဢုပ်ႇၽူင်းၸူး ၸၢႆးဝၼ်းတိၵ်းတိၵ်းလႄႈ လွင်ႈၸမ်ၸႂ်ၼႂ်းၵႄႈၵၢင်ၵေႃႉႁၵ်ႉမၼ်းၼၼ်ႉၵေႃႈ လႆႈယွမ်းလူင်းယဝ်ႉ လိူဝ်သေတေသိုပ်ႇၽူင်းၸူးၵေႃႉႁၵ်ႉမၼ်း မၼ်းသမ်ႉသိုပ်ႇၸူးၵႂႃႇႁႃၸၢႆးဝၼ်းၼၼ်ႉယဝ်ႉ မီးလွင်ႈသင်ၵေႃႈ လၢတ်ႈၸူးၸၢႆးဝၼ်း သမ်ႉပေႃးလိုမ်းဝႃႈမၼ်းမီးၵေႃႉႁၵ်ႉလူးၵွၼ်ႇ။ ဢမ်ႇၸႂ်ႈဝႃႈဢမ်ႇသႂ်ႇၸႂ်ၵေႃႉႁၵ်ႉမၼ်းၼင်ႇၵဝ်ႇ ၵူၺ်းၵႃႈ ဢုပ်ႇၵၼ်ဢမ်ႇတၼ်းႁိုင် မီးသဵင်လင်မေႃးၵၼ်မႃးယဝ်ႉ ပေႃးဢမ်ႇမေႃးၵၼ်ၵေႃႈ ၶဝ်ၵေႃႈတေၵႆႉလၢတ်ႈဝႃႈမီးၵၢၼ်တႃႇသေႇ မၢင်ပွၵ်ႈၶႂ်ႈဢုပ်ႇၵုမ်ၵၼ်လီလီယူႇသေတႃႉ ဢမ်ႇပဵၼ်လႆႈလႄႈ ၵႃႈလႆႈပွႆႇၶဝ်ၵႂႃႇဝႆႉၸိူင်ႉၼၼ်ယဝ်ႉ။
မိူဝ်ႈသဵင်ၶေႃႈၵႂၢမ်းယဵၼ်ယူႇၼၼ်ႉ လိူဝ်သေၸၢႆးဝၼ်းတၵ်ႉၸူးယဝ်ႉတေမီးၽႂ်ထႅင်ႈလႃႇ ဢမ်ႇဢုပ်ႇၵေႃႈ သမ်ႉယဵၼ်ၼႃႇၽႅဝ်လူး မိူဝ်ႈလႆႈဢုပ်ႇတေႃႇၶဝ်ၼၼ်ႉ မိူၼ်ဝႃႈ မီးလွင်ႈၵတ်းယဵၼ်ၸႂ်လႄႈ လိုမ်းလွင်ႈၶမ်ၸႂ်လူင်ၵႂႃႇတၢင်းမူတ်းၼၼ်ႉယဝ်ႉ။ ၸၢႆးဝၼ်းၵေႃႈ မိူဝ်ႈလႆႈဢုပ်ႇၵၼ်တင်းလိုၼ်းသႅင်ၼႆ ၼႂ်းၸႂ်ၵေႃႈၸိုင်ပေႃႉသိူဝ်းၵျေႃႇ ယိုင်ႈႁူႉၸၵ်းယိုင်ႈၶႂ်ႈႁူႉၸၵ်းၵႂႃႇတိၵ်းတိၵ်း ထိုင်တီႈဢမ်ႇၶႂ်ႈႁႂ်ႈ လိုၼ်းသႅင်ႁၢႆၵႂႃႇတၢင်းလႂ်ထႅင်ႈၼၼ်ႉယဝ်ႉ။ သမ်ႉဝႃႈ ပိူၼ်ႈတေမီးၸဝ်ႈၶွင်ယဝ်ႉသေတႃႉ ဢုပ်ႇတွၼ်ႈတႃႇမိုတ်ႈၵိုဝ်းႁူႉၸၵ်းၵၼ်ၵူၺ်းၼႆၵေႃႈ တေႃႈႁိုဝ်တေႁႄႉႁၢမ်ႈၸႂ်လႆႈ ၶေႃႈၵႂၢမ်းမၢင်ၶေႃႈမၢင်ၵမ်း သမ်ႉပႃးလေႃးၵႂၢမ်းႁၵ်ႉယူႇယဝ်ႉ။
လိုၼ်းသႅင်ၵေႃႈ တေႃႈလၢမ်းႁူႉယူႇ မၢင်ၶေႃႈ ဢၼ်ၸၢႆးဝၼ်းလၢတ်ႈၸူးမႃး ၵွပ်ႈမီးၵေႃႉႁၵ်ႉယဝ်ႉလူး တေၸၢင်ႈႁဵတ်းႁိုဝ်ၵဝ်းၸူးထႅင်ႈတၢင်ႇၵေႃႉလႃႇ ဢမ်ႇဝႃႈ ၼႂ်းၸႂ်တေဝူၼ်ႉယူႇသေတႃႉ တေႃႈႁိုဝ်တေႁတ်းမွၵ်ႇလၢတ်ႈဢွၵ်ႇၸူးၶဝ်သေဢိတ်း ၶတ်းၸႂ်ငိူင်ႉဝႄႈၶေႃႈၵႂၢမ်းႁၵ်ႉၵႂၢမ်းပႅင်းယူႇၵေႃႈ ယင်းဢမ်ႇၸၢင်ႈႁႄႉႁၢမ်ႈၸႂ်ၶဝ်လႆႈ ႁၢမ်ႈၸႂ်ႁဝ်းလႆႈသေတႃႉ ႁိုဝ်တေၸၢင်ႈႁၢမ်ႈၸႂ်ပိူၼ်ႈလႆႈ ၶဝ်လၢတ်ႈဢုပ်ႇၸူးမႃးတိၵ်းတိၵ်းလူး ပေႃးဢမ်ႇဢုပ်ႇၸူးၶဝ် ၸၢင်ႈတေဢုပ်ႇၸူးၽႂ် မီးၵေႃႉႁၵ်ႉၵေႃႈ ယင်းဢမ်ႇတၵ်ႉၸူးၵၼ်လူး ဢၼ်မီးၶဝ်ၼၼ်ႉ ႁဵတ်းႁႂ်ႈဢမ်ႇငဝ်မႃးၼၼ်ႉယဝ်ႉ။
ဢမ်ႇတၼ်းႁူႉလွင်ႈသင် ယူႇၸွမ်းၽူင်းၸပ်းတိတ်းၽူင်းတိၵ်းတိၵ်း ၸၢတ်ႈပၢၼ်ၸၢႆးဝၼ်းၼၼ်ႉ သမ်ႉပေႃးလႅၵ်ႈလၢႆႈၵႂႃႇၸွမ်းၽူင်းယူႇယဝ်ႉ။ သမ်ႉဝႃႈ ၶႂ်ႈဢဝ်မၼ်းဢွၵ်ႇႁၢင်ႇၼႃႇၵေႃႈ ႁိုဝ်တေၸၢင်ႈၽႃႈလႆႈ ၽူင်းမိူၼ်ပဵၼ်တႃႇၵပ်းသိုပ်ႇၸူးႁူဝ်ၸႂ်မၼ်းၼၼ်ႉယဝ်ႉ။
လိုၼ်းသႅင်ၵေႃႈ မိူဝ်ႈဢၼ်ၵေႃႉႁၵ်ႉမၼ်း လႆႈမီးၶၢဝ်းယၢမ်းလီလီသေ ဢုပ်ႇၸူးၵၼ်ယူႇၼၼ်ႉ ၼႂ်းၸႂ်မၼ်း လႆႈလႅၵ်ႈလၢႆႈမႃးဢမ်ႇမိူၼ်ၵဝ်ႇယဝ်ႉ ႁဵတ်းႁႂ်ႈမၼ်းသမ်ႉပေႃးဝူၼ်ႉၵႂင်လူင်ၵႂႃႇယူႇ။ မိူဝ်ႈတိုၵ်ႉဢုပ်ႇၸူးၵေႃႉႁၵ်ႉမၼ်းသိုပ်ႇၽူင်းမႃးယူႇၼၼ်ႉ ၸၢႆးဝၼ်းၵေႃႈ လႆႈသိုပ်ႇမႃးထႅင်ႈဢၼ်ၼိုင်ႈယူႇ မိူဝ်ႈပဵၼ်ၸိူင်ႉၼၼ်ဢဝ်မၼ်းသမ်ႉပေႃးဢမ်ႇႁူႉဝႃႈ တေလိူၵ်ႈဢၼ်လႂ်ဢွၼ်တၢင်းယဝ်ႉ။ တေႁဵတ်းႁိုဝ်လႃႇ မၼ်းၵေႃႈ လႆႈၸႂ်ၸၢႆးဝၼ်းမိူၼ်ၵၼ်လူး လိူဝ်သေဝႃႈ ဢမ်ႇပႆႇၶၢတ်ႇၵၼ်တင်းၵေႃႉႁၵ်ႉမၼ်းလႄႈ ပႆႇလႆႈပၼ်ၶေႃႈတွပ်ႇၵူၺ်း။
ယွၼ်ႉၵူၼ်းၵေႃႉၼိုင်ႈသေ ႁဵတ်းႁႂ်ႈတၢင်းႁၵ်ႉမၼ်းလႄႈၵေႃႉႁၵ်ႉမၼ်းၼၼ်ႉ လႅၵ်ႈလၢႆႈၵႂႃႇၼႆ ပဵၼ်လွင်ႈတၢင်းဢၼ်ဢမ်ႇလီတႄႉၼၼ်ႉယဝ်ႉ မၼ်းလႄႈၵေႃႉႁၵ်ႉမၼ်းၼၼ်ႉ ပဵၼ်ၵေႃႉႁၵ်ႉၵၼ်မႃး ပေႃးမီးပဵၼ်သၢမ်ပီႊယဝ်ႉ ယွၼ်ႉၵူၼ်းၵေႃႉဢၼ်ႁူႉၸၵ်းၵၼ်ဢမ်ႇထိုင်သၢမ်လိူၼ်သေ မႃးယႃႉလုသႅတ်ႉၸႃႇတၢင်းႁၵ်ႉၶဝ်ၽၢတ်ႇယၼ်ၵႂႃႇၼႆ ဢမ်ႇၶႂ်ႈႁႂ်ႈမၼ်းပဵၼ် ဢမ်ႇၸႂ်ႈဝႃႈ ဢမ်ႇႁၵ်ႉၵေႃႉႁၵ်ႉမၼ်း မၼ်းၵေႃႈယင်းတိုၵ်ႉႁၵ်ႉ မီးၸႂ်ၼိူဝ်ၵေႃႉႁၵ်ႉမၼ်းမိူၼ်ၵၼ်ၼၼ်ႉယဝ်ႉ။ ဝၢင်းၵႂႃႇပႅတ်ႈႁင်း ၸၢႆးဝၼ်းယဝ်ႉသိုပ်ႇဢုပ်ႇၽူင်းၸူးၵေႃႉႁၵ်ႉမၼ်းၵႂႃႇယူႇ။
လိုၼ်းသႅင်ၵေႃႈ လႆႈလိူၵ်ႈဢုပ်ႇၵေႃႉႁၵ်ႉမၼ်းၵႂႃႇ ၵွပ်ႈပိူဝ်ႈ ၸၢႆးဝၼ်းလႄႈ မၼ်းၼၼ်ႉ မၼ်းၵေႃႈဢမ်ႇလႆႈမီးလွင်ႈၸမ်ၸႂ်သင်ၵၼ် တႃႇတေပဵၼ်ငဝ်ႈႁၢၵ်ႈ ၵမ်ႉယၼ်ႁူမ်ႈသၢင်ႈၵၼ်ၵႂႃႇၶၢဝ်းၼႃႈလႆႈလူး မၼ်းလႄႈတင်းၵေႃႉႁၵ်ႉမၼ်းတႄႉ ယၢမ်ႈဝၢင်းၽႅၼ်တႃႇတေတေႇၼႃႈႁိူၼ်းႁူမ်ႈၵၼ်ယဝ်ႉ တေဢဝ်လွင်ႈၸိူင်ႉၼႆ မႃးပဵၼ်ပၼ်ႁႃတေႃႇတၢင်းႁၵ်ႉမၼ်းလႄႈၵေႃႉႁၵ်ႉမၼ်းၼၼ်ႉဢမ်ႇလႆႈ မၼ်းၸင်ႇတႅပ်းတတ်းၸႂ် တတ်းၶၢတ်ႇ ၸၢႆးဝၼ်းၵႂႃႇယဝ်ႉ။
“ႁဝ်းဢုပ်ႇၵၼ်မႃး မၼ်းပူၼ်ႉၶၵ်ႉတွၼ်ႈၵၢၼ်ပဵၼ်ဢူၺ်းၵေႃႉႁႅင်းၼႃႇယဝ်ႉ ႁဝ်းဢမ်ႇႁူႉဝႃႈ သူဝူၼ်ႉၸိူင်ႉႁိုဝ် ၵူၺ်းၵႃႈ ႁဝ်းဝူၼ်ႉဝႃႈ သူပဵၼ်ဢူၺ်းၵေႃႉႁဝ်းၵေႃႉၼိုင်ႈၵူၺ်း ႁဝ်းဢမ်ႇၶႂ်ႈသုမ်းဢူၺ်းၵေႃႉ ၸိူင်ႉၼင်ႇသူၵႂႃႇၼႃ”
“ဢိုမ်ႈ… ႁဝ်းတေတဵၵ်းတဵင်ႁႂ်ႈသူဝူၼ်ႉမိူၼ်ႁဝ်းဢမ်ႇလႆႈ… သူၵေႃႈတဵၵ်းတဵင်ႁႂ်ႈႁဝ်းဝူၼ်ႉမိူၼ်သူ ဢမ်ႇလႆႈမိူၼ်ၵၼ် ပေႃးဝႃႈႁဝ်းႁၢမ်ႈလႆႈ ႁဝ်းၵေႃႈတေဢမ်ႇပွႆႇႁႂ်ႈမၼ်းပူၼ်ႉပႅၼ်ထိုင်တီႈႁၢမ်ႈဢမ်ႇလႆႈၸိူင်ႉၼႆ သူယႃႇတဵၵ်းတဵင်ႁဝ်းလႄႈ သူမီးႁူဝ်ၸႂ်ႁၵ်ႉၶဝ်လႆႈၵေႃႈ ႁဝ်းၵေႃႈမီးႁူဝ်ၸႂ်ႁၵ်ႉသူလႆႈမိူၼ်ၵၼ် ပေႃးဝႃႈ ဢုပ်ႇၵၼ်ၸိူင်ႉၼႆ တေပဵၼ်ပၼ်ႁႃတွၼ်ႈတႃႇသူၵေႃႈ ႁဝ်းတေၵိုတ်းလိုဝ်ႈၵႂႃႇၵူၺ်း…
ႁဝ်းၶႂ်ႈလၢတ်ႈသူဝႃႈ ႁဝ်းဢမ်ႇလႆႈၸႂ်တိုဝ်းၽူင်းသင်လေႃႇၼႃႈ ၵူၺ်းၵႃႈ ယွၼ်ႉၵူၼ်းၵေႃႉၼိုင်ႈ ၶဝ်ၶႂ်ႈႁႂ်ႈႁဝ်း လူဝ်ႇၸႂ်ႉတိုဝ်းမၼ်းတႃႇသေႇၼၼ်ႉယဝ်ႉ ႁဝ်းယိၼ်းၸူမ်းသူတႄႉယဝ်ႉ ဢၼ်ၸွႆႈၶဝ်ႈမႃးၼႂ်းၸၢတ်ႈပၢၼ်ႁဝ်း… လွင်ႈဢၼ်ယၢပ်ႈသေပိူၼ်ႈၼႂ်းၸၢတ်ႈပၢၼ်ႁဝ်း ၵေႃႈလွင်ႈႁႄႉႁၢမ်ႈႁူဝ်ၸႂ်ယႃႇႁႂ်ႈလႆႈႁၵ်ႉသူၼၼ်ႉယဝ်ႉ…”
မိူဝ်ႈၼၼ်ႉ သဵင်လိုၼ်းသႅင်ဢမ်ႇလႆႈတွပ်ႇသင်ၸူးၶိုၼ်းလႄႈ ၸၢႆးဝၼ်းၵေႃႈ ပွႆႇၽူင်းမၼ်းဝႆႉၸိူင်ႉၼၼ် ပၼ်ႁႂ်ႈ လိုၼ်းသႅင်ဝၢင်းၵႂႃႇႁင်းၵူၺ်းယူႇယဝ်ႉ။ ႁၵ်ႉယူႇလႄႈဢမ်ႇထိူၵ်ႈ တၢင်းတိူၵ်ႈယဝ်ႉ တေသိုပ်ႇယူႇၵေႃႈ တေႃႈႁိုဝ်မီးလွင်ႈသင် ပၼ်ႁႂ်ႈၶဝ်ပဵၼ်ၵႂႃႇၸွမ်းတၢင်းၶဝ်လိူၵ်ႈ သဵၼ်ႈတၢင်းဢၼ်ပၼ်တၢင်းသိူဝ်းတွၼ်ႈတႃႇၶဝ်ၼၼ်ႉ လီလိူဝ်ပိူၼ်ႈယဝ်ႉ။
ပႂ်ႉသိုပ်ႇလူထႅင်ႈတွၼ်ႈသိုပ်ႇထႅင်ႈ တွၼ်ႈသၢမ်
ၼပ်ႉယမ်ထိုင်ၽူႈလူလိၵ်ႈႁဝ်းယူႇဢေႃႈ
တႅမ်ႈ – ငဝ်မွင်မိုတ်းမူဝ်း
03/12/2021
