တွင်ႉၾႃႉၸိုၼ်ႈပၢင်ႇ သီႇသွမ်ႇသွမ်ႇၸိုၼ်ႈသႂ်လီ သၼ်လွႆယၢဝ်းလူင်ၶပ်ႉယႆၸႅၼ်ႇ ပႃႇမႆႉသီၶဵဝ်ႁေႃႇလွမ်ႉႁွပ်ႈဝႆႉ ပဵၼ်သၽႃႇဝဢၼ်ႁၢင်ႈလီၼႃႇ။ ၽွင်းၶၢဝ်းၵတ်း ယၢမ်းၵၢင်ၼႂ် မိူင်းလႅင်းမႃး မွၵ်ႇၵႂၢၼ်းဢၢႆႊၼမ်ႉ ပိဝ်ၶိုၼ်ႈၸွမ်းၵႄႈတေးလွႆ ၸၼ်ဢဝ်သၢႆတႃတူၺ်းပေႃးဢမ်ႇၶႂ်ႈၽၢတ်ႇ တၢင်းႁၢင်ႈလီမၼ်းၼၼ်ႉ တေႁႃတူၺ်းတီႈလႂ်ဢမ်ႇလႆႈထႅင်ႈယဝ်ႉ သၢႆလႅတ်ႇဢုၼ်ႇဢုၼ်ႇၼၼ်ႉၵေႃႈထွင်ႇပိူင်းပၼ် ႁဵတ်းႁႂ်ႈၼႃႈမိူင်းပေႃးၸိုၼ်ႈပၢင်ႇ တဵမ်တူဝ်ႁူဝ်ၸႂ် မူၼ်ႈသိူဝ်းၸွမ်း တၢင်းႁၢင်ႈလီမၼ်း ယူႇယဝ်ႉ။
ၸၢႆးဝၼ်းၵေႃႈ ဢဝ်တင်းၵွင်ႈထႆႇသေ လႄႇလဵပ်ႈယိူင်းထွင်ႇၸူးထုင်ႉႁၢင်ႈလီၸိူဝ်းၼၼ်ႉ တၢင်းၼိုင်ႈယဝ်ႉတၢင်းၼိုင်ႈ ယိုင်ႈတူၺ်းယိုင်ႈႁၢင်ႈလီမႃးတိၵ်းတိၵ်းလႄႈ မိုဝ်းဢွၼ်ႇမၼ်းၼၼ်ႉၵေႃႈ တေႃႈႁိုဝ်ၸၢင်ႈၽႃႈဝၢင်းၵွင်ႈထႆႇမၼ်းလႆႈလႃႇ ယိူင်းၵႂႃႇတၢင်းလႂ် သမ်ႉပေႃးႁၢင်ႈလီၵႂႃႇမူတ်း ပၼ်ႇၵႂႃႇပၼ်ႇမႃးၼိူဝ်သၼ်လွႆလူင်လုၵ်ႈၼၼ်ႉ လႆႈႁူပ်ႉႁၼ်မႅၼ်ႈၺႃးယိင်းၵေႃႉၼိုင်ႈ ပႆၽႅတ်ႈပူၼ်ႉၵႂႃႇၽၢႆႇၼႃႈမၼ်းၵႂႃႇယူႇ။ မိူဝ်ႈလႆႈႁၼ်ၸိူင်ႉၼၼ် သၢႆတႃမၼ်းၸၢႆႉဝၢႆႇမိုင်တူၺ်းၸွမ်းယိင်းၵေႃႉၼၼ်ႉၵႅပ်ႉၼိုင်ႈယဝ်ႉ ယုၵ်ႉဢဝ်ၵွင်ႈထႆႇမၼ်း ယိူင်းသႂ်ႇတီႈယိင်းၵေႃႉၼၼ်ႉၵႂႃႇၵမ်းလဵဝ်။ သၢႆလူမ်းထူဝ်းထွင်း ပတ်ႉဢဝ်ၶူၼ်ႁူဝ် ယိင်းၽူင်ႉပိဝ်လူင်ၵႂႃႇပဵၼ်ၵမ်းပဵၼ်ၵမ်းလႄႈ လႆႈသုမ်ႇလပ်ႉမႅၼ်ႈၼႃႈယိင်းသေ မိုဝ်းၼုမ်ႇၼုမ်ႇဢွၼ်ႇယိင်းၼၼ်ႉၵေႃႈ ယိပ်းဢဝ်ၶူၼ်ႁူဝ်ၵွင်ႉသႂ်ႇႁူယဝ်ႉ လႆႈႁၼ်ၼႃႈၶၢဝ်ၼုမ်ႇဢွၼ်ႇယိင်းၼၼ်ႉလီလီယဝ်ႉ သၢႆတႃၸၢႆးဝၼ်း ယၵ်ႉတူၺ်းၸူးပေႃးဢမ်ႇၽၢတ်ႇလႆႈ ႁူဝ်ၸႂ်မၼ်းၼၼ်ႉၵေႃႈ မိူၼ်မီးသင်မႃးၶဝ်ႇၶွၼ်းဝႆႉဢမ်ႇႁူႉယဝ်ႉ တွတ်ႇတဵၼ်ႈလိူဝ်ႁႅင်းမႃးၵမ်းလဵဝ်။ မိူၼ်ဝႃႈယိင်းၵေႃႉၼၼ်ႉ ဢမ်ႇလႆႈသူၼ်ၸႂ်တူၺ်းၸူးတီႈမၼ်း လိူဝ်သေယုမ်ႉၶူဝ်ႁုၼ်ႉၼူဝ်ၸွမ်းၵူၼ်းၼႂ်းၽူင်းၼၼ်ႉယူႇၵူၺ်း။
ဝၢႆးသေယိင်းဝၢင်းၽူင်းယဝ်ႉ လႆႈဝၢႆႇႁၼ်ၼႃႈၸူးတင်းၸၢႆးဝၼ်းလႄႈ သၢႆတႃသွင်ၶႃလေႃႇတုမ်ႉၺႃးၵၼ်ၵႂႃႇ ၸၢႆးဝၼ်းတႄႉမိုင်ၸိူဝ်ႈၸုၵ်းတူၺ်းၵႂႃႇယူႇ ၵူၺ်းၵႃႈ ယိင်းတႄႉ ၼႅတ်ႈဢဝ်သၢႆတႃၶၢႆႉပၢႆႈၵႂႃႇပႅတ်ႈၵမ်းလဵဝ်လႄႈ ၶိုၼ်းယုမ်ႉၸူးတေႃႇၸၢႆးဝၼ်း ၼင်ႇၵူၼ်းတူင်ႉတၵ်ႉၵၼ်ယဝ်ႉ ပႆပူၼ်ႉၽၢတ်ႇၶဝ်ၵႂႃႇယူႇ။ မိူၼ်ဝႃႈ တၢင်းယုမ်ႉယိင်းၼၼ်ႉ လႆႈႁၼ်ၼႂ်းၸူဝ်ႈၽႅပ်ႉတႃဢွၼ်ႇၵူၺ်းၵေႃႈ မၼ်းလႆႈၶဝ်ႈမႃးတုမ်ႉပၼ်ႁူဝ်ၸႂ်ၸၢႆးဝၼ်း သမ်ႉပေႃးၶႂ်ႈမဝ်းသေ လမ်းၸွမ်းၶဝ်ၵႂႃႇယဝ်ႉ သဵင်တွတ်ႇတဵၼ်ႈႁူဝ်ၸႂ်မၼ်းလင်သၼ်ႇဝႆႁႅင်းၼႃႇ ၼင်ႇဢမ်ႇယၢမ်ႈပဵၼ်မႃးသေပွၵ်ႈၼၼ်ႉယဝ်ႉ။ မိူဝ်ႈတိုၵ်ႉမိူၼ်ႇတူၺ်းၶဝ်ၵႂႃႇၼၼ်ႉ ယူႇယူႇၵေႃႈ ဝူၼ်ႉလႆႈသေၸိူဝ်ႉသေလွင်ႈမႃးလႄႈ လမ်းၵႂႃႇၸွမ်းယိင်းၵေႃႉၼၼ်ႉသေ
“သူၶႃႈ… ” ယိင်းၵေႃႉၼၼ်ႉ ဝၢႆႇၸူးယဝ်ႉ မၼ်းလႆႈသိုပ်ႇလၢတ်ႈထႅင်ႈ
“ႁဝ်းၶႂ်ႈယွၼ်းတၢင်းၸွႆႈထႅမ်ဢိတ်းၼိုင်ႈဢေႃႈ ၸွင်ႇတေမီးၶၢဝ်းယၢမ်းပၼ်ၸွင်ႇလႆႈၶႃႈႁိုဝ်”
ယိင်းၵေႃႉၼၼ်ႉ ၵူမ်ႈတူၺ်း ၼႃႇရီႇတီႈၶေႃႈမိုဝ်းသေ “လႆႈယူႇၶႃႈ… ”
ၸၢႆးဝၼ်း ပဵၼ်ၵူၼ်းလႆႈၸႂ်ထႆႇၶႅပ်းႁၢင်ႈလႄႈ လႆႈၸႂ်ယၵ်ႉယဵမ်ႈတူၺ်းတၢင်းႁၢင်ႈလီသၽႃႇဝတႄႉတႄႉ။ လွင်ႈဢၼ်လႆႈမႃးလႄႇပိုၼ်ႉတီႈၼႆႈၼႆႉ ၸွမ်းလူၺ်ႈဢူၺ်းၵေႃႉမၼ်းဢၼ်ပဵၼ်ၵူၼ်းၼႂ်းပိုၼ်ႉတီႈၼႆသေ ၼႄႉၼမ်းပၼ်ႁႂ်ႈမၼ်းမႃးယူႇ။ မိူဝ်ႈႁွတ်ႈမႃးထိုင်ၼၼ်ႉ ၼႄပၼ်လႆႈတၢင်းႁၢင်ႈလီသၽႃႇဝ ဢၼ်မၼ်းဢမ်ႇတွၼ်ႉယၢမ်ႈႁၼ်သေပွၵ်ႈၼၼ်ႉ ႁၢင်ႈလီၼႃႇလႄႈ မီးၸႂ်ၶႂ်ႈထႆႇၶႅပ်းႁၢင်ႈတူဝ်ၵဝ်ႇပဵၼ်တီႈမၢႆတွင်းဝႆႉၼႆယူႇ ၵူၺ်းၵႃႈ မိူဝ်ႈလႆႈႁၼ်ၵူၼ်းၸိူင်ႉၼႆ လႆႈဝႃႈပဵၼ်တိုဝ်ႉတၢင်းလီတွၼ်ႈတႃႇမၼ်းတႄႉတႄႉယဝ်ႉ။
“သူၸွႆႈထႆႇၶႅပ်းႁၢင်ႈပၼ်ႁဝ်းၸွင်ႇလႆႈၶႃႈ… ႁဝ်းမႃးပဵၼ်ပွၵ်ႈဢွၼ်တၢင်းသုတ်း မႃးၵေႃႉလဵဝ်လႄႈ ဢမ်ႇႁူႉဝႃႈ တၢင်းႁၢင်ႈလီၼိူဝ်လွႆၼႆႉ မၼ်းတေႁၼ်တၢင်းႁၢင်ႈလီသၽႃႇဝႁၢင်ႈလီထိုင်တၢၼ်ႇၼႆႉ”
မိူၼ်ဝႃႈ ယိင်းၵေႃႉၼၼ်ႉ ဢမ်ႇလႆႈတွပ်ႇၸူးၶိုၼ်းယဝ်ႉ သီၼႃႈမိူၼ်မီးလွင်ႈၶမ်ၸႂ်ယူႇ။
“ပေႃးဝႃႈ ႁိပ်ႈၵေႃႈ ဢမ်ႇပဵၼ်သင်ၶႃႈ”
ယိင်းၵေႃႉၼၼ်ႉၵေႃႈ “ ႁႂ်ႈႁဝ်းဢဝ်ၽူင်းထႆႇၸွင်ႇလႆႈၶႃႈႁိုဝ် ၵွပ်ႈဝႃႈ ႁဝ်းဢမ်ႇ… ဢမ်ႇမေႃၸႂ်ႉမၼ်းၶႃႈၼႃ” သၢႆတႃတူၺ်းၸူး ၵွင်ႈထႆႇၸၢႆးဝၼ်းၼၼ်ႉယူႇ။
ၸၢႆးဝၼ်းယုမ်ႉၸူးယဝ်ႉ “လႆႈယူႇၶႃႈ” မၼ်းၸင်ႇတေဢဝ်ၽူင်းမၼ်းၼႂ်းထူင်ဢွၵ်ႇမႃး ၵူၺ်းၵႃႈ ဢမ်ႇႁၼ်ၽူင်းလႄႈ “ထၢင်ႇတႄႉ ၽူင်းႁဝ်းလိုမ်းဢဝ်မႃးပႃးယဝ်ႉ” တူၺ်းၸူး ယိင်းၼၼ်ႉသေ “ပေႃးဝႃႈဢမ်ႇၸၢၼ်ႈၸင်း ဢဝ်ၽူင်းသူထႆႇပၼ်ၸွင်ႇလႆႈၶႃႈႁိုဝ် ၶႂ်ႈလႆႈဝႆႉပဵၼ်တီႈမၢႆတွင်းၵူၺ်းၼင်ႇၵဝ်ႇၶႃႈ”
“ဢေႃႈၶႃႈ…” ၵူၺ်းၵႃႈ မိူဝ်ႈယိင်းပိုတ်ႇၽူင်းၶိုၼ်းၼၼ်ႉ ပိုတ်ႇဢမ်ႇလႆႈမႃးသေ မိူၼ်ၾႆးၽူင်းမူတ်းပႅတ်ႈလႄႈ “ယွမ်းၼွမ်းယူႇၶႃႈ ၾႆးၽူင်းၶႃႈ မၢၵ်ႇမၼ်းမူတ်းၵႂႃႇယဝ်ႉ”
“ၸၢမ်းၸႂ်ႉတိုဝ်းတူၺ်းၵွင်ႈထႆႇၵေႃႈလႆႈယူႇၶႃႈၼႃ မၼ်းၵေႃႈဢမ်ႇလႆႈယၢပ်ႇသင်ၼင်ႇၵဝ်ႇၶႃႈ” ၸၢႆးဝၼ်းၵေႃႈ ဢဝ်တင်းၵွင်ႈထႆႇၼၼ်ႉ ယိုၼ်ႈၼႄၸူးယဝ်ႉ လၢတ်ႈၼႄလွၵ်းလၢႆးၸႂ်ႉတိုဝ်းမၼ်း ပၼ်ယိင်းၵေႃႉၼၼ်ႉၵႂႃႇ မိူၼ်ဝႃႈယိင်းၵေႃႈ လႅပ်ႈၶဝ်ႈၸႂ်ၶဝ်ႈၶေႃးသေထွမ်ႇၸွမ်းၶဝ်သပ်းလႅင်းၼၼ်ႉတႄႉ မိူဝ်ႈပွင်ႇၸႂ်လီယဝ်ႉ ယိင်းၸင်ႇတေယိပ်းဢဝ်ၵွင်ႈၼၼ်ႉသေ ယိူင်းၸူးတီႈၸၢႆးဝၼ်းၵႂႃႇ။ ၸၢႆးဝၼ်းၼၼ်ႉၵေႃႈ ၸုၵ်းသေယုမ်ႉၸူးတေႃႇၵွင်ႈထႆႇသေတႃႉ သၢႆတႃၼၼ်ႉတႄႉ တူၺ်းၵႂႃႇၸူးတီႈယိင်းၵေႃႉၼၼ်ႉယူႇတိၵ်းတိၵ်းၵူၺ်း။ တၢင်းယုမ်ႉလႄႈ သၢႆတႃဢၼ်တူၺ်းၸူးၼၼ်ႉ တုမ်ႉထိုင်ႁူဝ်ၸႂ်ယိင်းမႃးမိူၼ်ၵၼ် သမ်ႉပေႃးဢဝ်ယိင်းပေႃးမိုင်ၵိုတ်းယိုတ်းယိူင်းၵႂႃႇႁဵတ်းၼၼ် ထိုင်တီႈလိုမ်းၵႂႃႇတီႈလႂ်ပဵၼ်တီႈလႂ်ယဝ်ႉ။ မိူဝ်ႈဢၼ်ဢမ်ႇလႆႈႁၼ်ယိင်းမီးလွင်ႈတုမ်ႉတွပ်ႇသင်ၶိုၼ်းၼၼ်ႉ ၸၢႆးဝၼ်းၸင်ႇပႆၶဝ်ႈၸူးမၼ်းၵႂႃႇ
“ယဝ်ႉယဝ်ႉၶႃႈႁႃႉ”
ယိင်းတင်ႈသတိမႃးလႆႈၶိုၼ်းလႄႈ “ၶႃႈလိုမ်းၵႂႃႇယဝ်ႉ တေလႆႈတဵၵ်းတုမ်ႇလႂ်…”
ၸၢႆးဝၼ်း ၶၢႆႉယူႇၽၢႆႇလင်ယိင်းၼၼ်ႉသေ ၶႅၼ်မၼ်းသွင်ၽၢႆႇ ၶဝ်ႈၵွတ်ႇႁူဝ်မႃႇယိင်းဝႆႉ သွၼ်ပၼ်ၵႂႃႇ လူၺ်ႈတီႈ ၵွၵ်းႁူဝ်သွင်ၶႃ ပေႃးတေလေႃႇၵၼ်ယူႇယဝ်ႉ။ သဵင်လူမ်းထူၺ်ႈၸႂ်ၸၢႆးဝၼ်း လႆႈငိၼ်းမႃးထိုင်ၼႂ်းႁူယိင်းလႄႈ လူမ်းဢၼ်ထူၺ်ႈဢွၵ်ႇမႃးၼၼ်ႉၵေႃႈ တုမ်ႉသႂ်ႇၵႅမ်ႈယိင်းမႃးပဵၼ်ၵမ်းပဵၼ်ၵမ်းသေ ၼႃႈသွင်ၶႃၼၼ်ႉမၼ်းၸမ်ၵၼ်ႁႅင်းၼႃႇ ဢဝ်ယိင်းပေႃးဢမ်ႇႁတ်းတူင်ႉတူဝ် ဝၢႆႇၸူးသေဢိတ်း။ ၼႃႈသွင်ၶႃၶဝ်ႈၸမ်ၵၼ်ၸိူင်ႉၼႆ ႁဵတ်းႁႂ်ႈႁူဝ်ၸႂ်တၢင်းသွင်တဵၼ်ႈတွတ်ႇဝႆးလင်ႁႅင်းမႃးလႄႈ သၢႆလႅတ်ႇဢၼ်ဢုၼ်ႇဢုၼ်ႇၼၼ်ႉၵေႃႈ တိူဝ်းမႆႈမႃးလိူဝ်ယဝ်ႉ ဢဝ်ၼႃႈယိင်းပေႃးလႅင်လူင်မႃးၵမ်းလဵဝ်။ ၸၢႆးဝၼ်းၵေႃႈ မိူၼ်တေထိင်းၸႂ်ဢမ်ႇလႆႈယဝ်ႉလႄႈ လႆႈႁၢင်ႇဢွၵ်ႇယိင်းၵႂႃႇ ယၢမ်းၼၼ်ႉသဵင်လူမ်းသဵင်ၼူၵ်ႉသဵင်ၼူသမ်ႉပေႃးယဵၼ်လူင်ၵႂႃႇၵႅပ်ႉၼိုင်ႈယူႇ။ မိူဝ်ႈလႅပ်ႈတေလီမႃးၶိုၼ်းယဝ်ႉလႄႈ
“ႁဝ်းတေ… ၶတ်းၸႂ်ထႆႇပၼ်ၶႃႈၼႃ”
ယိင်းၵေႃႈ တၢင်းမေႃႁေဢမ်ႇမေႃႁေ ၶတ်းၸႂ်ထႆႇပၼ်ၵႂႃႇယူႇ မိူဝ်ႈဢၼ် ၸၢႆးဝၼ်းမႃးတူၺ်းႁၢင်ႈၼၼ်ႉၶိုၼ်းယဝ်ႉ ယုမ်ႉၸူးသေ သူၵေႃႈမေႃထႆႇတႄႉယဝ်ႉ။ တီႈတေႉ ႁၢင်ႈၼၼ်ႉ တွၼ်ႈတႃႇ ယိင်းၼၼ်ႉတႄႉ ဢမ်ႇလႆႈဝႃႈႁၢင်ႈလီသင်လေႃႇ ပေႃးတႅၵ်ႈၵၼ်တူၺ်းတင်းဢၼ်ၶဝ်ထႆႇၼၼ်ႉ ယင်းဢမ်ႇလႆႈၽိတ်ႇၶဝ်လူးၵွၼ်ႇ မိူဝ်ႈႁၼ်ၶဝ်လၢတ်ႈၸိူင်ႉၼၼ်ႉ ယိုင်ႈၶႅၼ်းဝူၼ်ႉၽိတ်းတေႃႇၶဝ်မႃးယူႇ။
“ႁဝ်းၵေႃႈၶတ်းၸႂ်ယဝ်ႉ ၵူၺ်းၵႃႈ မၼ်းၵေႃႈဢွၵ်ႇမႃးလႆႈၵၼၼ်ႉၵူၺ်း”
“မွၵ်ႈၼႆႉၵေႃႈ လီၼႃႇယဝ်ႉၶႃႈ မိူဝ်ႈလႂ်မိူဝ်ႈၶိုၼ်ႈမႃးယဝ်ႉ သူၵေႃႈ ထုၵ်ႇလီထႆႇဝႆႉၽွင်ႈၶႃႈဢေႃႈၼႃ ဝႆႉပဵၼ်တီႈတွင်းဢေႃႈ”
“ဢမ်ႇပဵၼ်သင်ၶႃႈ ႁဝ်းႁၼ်ယူႇၵူႈဝၼ်း”
“တၢင်းႁၢင်ႈလီသၽႃႇဝၸိူင်ႉၼႆ ႁၼ်ၵူႈဝၼ်းၵေႃႈ မၼ်းမေႃလႅၵ်ႈလၢႆႈၶႃႈဢေႃႈ ၶၢဝ်းၼႆႉ ပဵၼ်ၶၢဝ်းဢၼ်ႁၢင်ႈလီလိူဝ်ပိူၼ်ႈၼၼ်ႉၶႃႈယဝ်ႉ မိူဝ်ႈမီးတိုဝ်ႉတၢင်းလီၸိူင်ႉၼႆ ထုၵ်ႇလီၵဵပ်းသိမ်းႁၢင်ႈမၼ်း ဝႆႉပဵၼ်တီႈမၢႆတွင်းၽွင်ႈၶႃႈဢေႃႈ ႁဝ်းၵေႃႈပႃးၵွင်ႈထႆႇမႃးယဝ်ႉ ႁဝ်းယိၼ်းလီတေထႆႇပၼ်ယူႇၶႃႈဢေႃႈ ပေႃးဝႃႈသူၽွမ်ႉၸွမ်းယူႇတႄႉ”
မိူၼ်ဝႃႈယိင်းယင်းတိုၵ်ႉယၢပ်ႇၸႂ်ယူႇ တေထဵင်ၶိုၼ်းႁိုဝ် တေၽွမ်ႉၸွမ်းႁိုဝ်ၼၼ်ႉယဝ်ႉ။
“သၽႃႇဝမၼ်းႁၢင်ႈလီယူႇၵူႈဝၼ်းယဝ်ႉ ၵူၺ်းၵႃႈ တၢင်းႁၢင်ႈလီသၽႃႇဝ ဢၼ်ဢမ်ႇမိူၼ်ၵူႈဝၼ်းလႆႈၼၼ်ႉ မိူဝ်ႈမီးၵူၼ်းသွတ်ႇၵႄႈၵၢင်မၼ်းသေ ပဵၼ်ငဝ်းႁၢင်ႈပၼ်မၼ်းၼၼ်ႉ ယိုင်ႈၶႅၼ်းတေတိူဝ်းႁၢင်ႈလီလႄႈ တၢင်းႁၢင်ႈလီမၼ်းၼၼ်ႉၵေႃႈ တေလၢၵ်ႇလၢႆးသေၵူႈဝၼ်းၼၼ်ႉၶႃႈယဝ်ႉ ၸွင်ႇတေၸၢမ်းတူၺ်းၶႃႈႁိုဝ်”
မိူၼ်ပဵၼ်ၶေႃႈၵႂၢမ်းယုၵ်ႉယွင်ႈ ၵူၺ်းၵႃႈ ပဵၼ်ၶေႃႈၵႂၢမ်းဢီးသူၼ်းၼၼ်ႉယဝ်ႉ ယိင်းၵေႃႈ ႁိုဝ်တေထဵင်ၶိုၼ်းလႆႈလႃႇ ၸုၵ်းယူႇၽၢႆႇၼႃႈၵွင်ႈၼၼ်ႉသေ ဢဝ်ၸၢႆးဝၼ်းပဵၼ်ၵူၼ်းထႆႇႁၢင်ႈပၼ်ၵႂႃႇယူႇ။
ပႂ်ႉသိုပ်ႇလူထႅင်ႈတွၼ်ႈသိုပ်ႇထႅင်ႈ တွၼ်ႈသွင်
ၼပ်ႉယမ်ထိုင်ၽူႈလူလိၵ်ႈႁဝ်းယူႇဢေႃႈ
တႅမ်ႈ – ငဝ်မွင်မိုတ်းမူဝ်း
02/12/2021
