ႁူဝ်ၸႂ်ၵူၼ်းဢမ်ႇၸႂ်ႈတၢင်းလဵၼ်ႈ
သင်ၼၼ်ႉပဵၼ်တၢင်းလဵၼ်ႈ
သူၵေႃႈလဵၼ်ႈၽိတ်းၵေႃႉမၼ်းယဝ်ႉ။
ၶမ်ႈၶိုၼ်းယၢမ်းၵိၼ်ၶဝ်ႈ တီႈပၢင်ၵိၼ်လဵင်ႉဝႆၢးပၢင်လူင်းၵၢၼ်သွၼ်ယဝ်ႉ မိူဝ်ႈသႂ်သႂ် တေဢွၵ်ႇမိူဝ်းၵႂႃႇၼၼ်ႉ ၸႆၢးၼုမ်ႇလႅၼ်ႈလမ်းၸွမ်းလင်သေ
“သႂ်သႂ် ပႂ်ႉၵမ်ႉလူး”
“ဢေႃႈ..မီးလွင်ႈႁင်ၶႃႈပီႈၼုမ်ႇ”
“ဢိူဝ်ႈ..ပီႈဝႃႈ..ပီႈၵျိူၵ်ႈၼွင်ႉယဝ်ႉၼႃႈသႂ်သႂ်”
“မဝ်းသေလၢတ်ႈၵူၺ်းယူဝ်ႉ”
“ပေႃးဢမ်ႇမဝ်းၵေႃႈဢမ်ႇႁတ်းလၢတ်ႈၼင်ႇၵွၼ်ႇ”
“သမ်ႉႁူႉတူဝ်ယူႇ”
သႂ်သႂ်ယၵ်ႉတူၺ်းၼႃႈလႄႈသႆၢတႃၼၼ်ႉ ႁဵတ်းႁႂ်ႈမၼ်းလႆႈယုမ်ႇၵႂႃႇယဝ်ႉ။
“ယွၼ်းတီႈၵပ်းသိုပ်ႇသူၽွင်ႈ”
ဢဝ်ၾူၼ်းမၼ်းယိုၼ်ႈပၼ်သေ သႂ်သႂ်ၵေႃႈဢဝ်တီႈၵပ်းသိုပ်ႇမၼ်းပၼ်ၵႂႃႇယူႇ။
ၵွပ်ႈၼႃႈၵၢၼ်တႃငၢၼ်းၵေႃႉတီႈလႄႈ တေဢဝ်လွင်ႈၵပ်းသိုပ်ႇတၢင်းသႆၢၼႅင်ႈလႅင်းၼဵတ်ႇၵွင်ႉသၢၼ်ၵၼ်၊ ႁိုင်ႁိုင်ၼိုင်ႈပွၵ်ႈၵေႃႈ ၸူဝ်းၵၼ် လႄႇၸွမ်းၵၼ် ၵူၺ်းၵႃႈ မိူဝ်ႈၶၢဝ်းယၢမ်းႁိုင်မႃး ၸႆၢးၼုမ်ႇၵေႃႈၵႆႉၵႆႉႁႆၢၵႂႃႇ ၵၢၼ်ၵပ်းသိုပ်ႇၵေႃႈဢမ်ႇမိူၼ်ၵဝ်ႇယဝ်ႉလႄႈ လွင်ႈလႅၵ်ႈလႆၢႈၼၼ်ႉ မၼ်းႁဵတ်းႁႂ်ႈၸႂ်ဢမ်ႇမၼ်ႈၵိုမ်းမႃးယဝ်ႉလႄႈ ႁူဝ်ၸႂ်သႂ်သႂ်ဢၼ်မိူၼ်တေႁၵ်ႉမႅၼ်ႈယဝ်ႉၼၼ်ႉၵေႃႈ မိူၼ်ဝႃႈတေတူၵ်းလွၵ်းႁႅဝ်ႉၽူႈၸႆၢးၵေႃႉၼၼ်ႉယဝ်ႉဢိူဝ်ႈလေႃႇ။
မိူဝ်ႈပိူၼ်ႈပႆႇမီးၸႂ် သမ်ႉဝႃႈၵျိူၵ်ႈၼႃႇႁၵ်ႉၼႃႇ၊ ၸိူင်ႉႁိုဝ်ၵေႃႈတိုၼ်းႁၵ်ႉ ၽိူဝ်ႇႁူႉဝႃႈပိူၼ်ႈၵျိူၵ်ႈၶဝ်ယဝ်ႉၼႆ ၵႂၢမ်းတေႉပဵၼ်ၵႂၢမ်းၽၢင်း လၢတ်ႈယဝ်ႉလိုမ်းတွင်း ၵေႃႉမွင်းသမ်ႉထၢင်ႇတေႉ ပေႉၸႂ်သေယုမ်ႇၵႂႃႇတင်းပိုၵ်းယဝ်ႉဢိူဝ်ႈလေႃႇ။
လွင်ႈႁဵတ်းသၢင်ႈဢၼ်လႅၵ်ႈလႆၢႈၵႂႃႇ ၵႂၢမ်းဢၼ်ဝႃႈႁၵ်ႉဢေႃႈ ပဵၼ်လႆႈလူမ်းပဝ်ႇၵူၺ်း ႁူႉထိုင်မႃးၼႂ်းၵၢင်ၸႂ်ယူႇဢိူဝ်ႈ၊ ၼႂ်းၵႄႈသွင်ၶႃ ၵေႃႉႁၵ်ႉၵေႃႈဢမ်ႇၸႂ်ႈ ဢူၺ်းၵေႃႈဝႃႈဢမ်ႇပဵၼ်ၼႆသေ ၸႂ်ၶၢမ်ႇယဵၼ်ႉဢမ်ႇမီးယဝ်ႉလႄႈ သႂ်သႂ်သုတ်ႉထွႆဢွၵ်ႇၵႂႃႇပႅတ်ႈ ၽွင်းၼႂ်းၵႄႈတၢင်းႁၵ်ႉ ဢၼ်တိုတ်ႉၸၼ်ၵၼ်ဝႆႉယူႇၼၼ်ႉယဝ်ႉ။
“ပီႈ ႁဝ်းပေႃးမွၵ်ႈၼႆႉၵူၺ်းယဝ်ႉၼေႃႈ ယူႇၵႂႃႇၸိူင်ႉၼႆၵေႃႈ ဢမ်ႇမီးသင်လီမႃးယူႇယဝ်ႉလူး”
“ဢဝ်ၼွင်ႉဝႃႈၵူၺ်း”
ယူႇဢမ်ႇႁိုင် သမ်ႉၵႆႉႁၼ်ၵႆႉႁူပ်ႉ ၸႂ်တူပ်ႉသိူင်ႇဝႆႉၵေႃႈသမ်ႉၶိုၼ်းတိုၼ်ႇသၢၼ်ႈဢွၵ်ႇ ၽုတ်းၵီႈမွၼ်းမႂ်ႇမႃး သွင်ၶႃၶိုၼ်းလႆႈၶွႆႈၸူးၸမ် ၵူၺ်းသမ်ႉၸမ်ယူႇၵႆ ယိုင်ႈသုတ်ႉယိုင်ႈဢွၵ်ႇႁၢင်ႇ ယိုင်ႈ ႁူႉၸၵ်းၵၼ် ယိုင်ႈၶႅၼ်းဢမ်ႇၶႂ်ႈၸမ်မႃးယဝ်ႉ။
ယူႇယူႇၸႆၢးၼုမ်ႇတၵ်ႉၸူးသႂ်သႂ်
“ၼွင်ႉလၢတ်ႈဝႃႈမီးပပ်ႉလွင်ႈပႆၢးၸႂ်ၸိူဝ်းၼႆႉၼမ်ၼႃႇၼႆ ယွၼ်းယိမ်ၸွင်ႇလႆႈႁ”
“ဢေႃႈ”
လုၵ်ႉတီႈပပ်ႉလိၵ်ႈၼၼ်ႉသေယဝ်ႉ။ ပပ်ႉၵေႃႈဢမ်ႇမႃးဢဝ်သေပွၵ်ႈ ၵူၺ်းၵႃႈႁိုင်ႁိုင်ၵေႃႈ ယူႇယူႇတၵ်ႉမႃးထၢမ်။
မႃးယွၵ်ႇၸႂ်ႁႂ်ႈလူႉ တေတတ်းလႆႈသမ်ႉမႃးၵဝ်း၊ ၵဝ်းယွၵ်ႇယဝ်ႉသမ်ႉၶိုၼ်းယၢၼ်ၵႂႃႇ။
တၢင်းႁၵ်ႉၼၼ်ႉသုၵ်ႉသၵ်ႉၼႃႇ ၵူၼ်းဢမ်ႇယၢမ်ႈဝႆႉၸူႉ ဢမ်ႇႁူႉႁူဝ်ၸႂ်ၸဝ်ႈၵဝ်ႇၸိူင်ႉၼင်ႇသႂ်သႂ်ၼၼ်ႉတႄႉ ႁၵ်ႉၵႂႃႇယဝ်ႉၵေႃႈႁၵ်ႉတေႉဢိူဝ်ႈ၊ မၼ်းလႆႈၶတ်းၸႂ်တတ်းၸႂ်မႃး ၸဵမ်မိူဝ်ႈဝၼ်းယွၼ်းဢွၵ်ႇႁၢင်ႇဝၼ်းၼၼ်ႉမီးၵႂႃႇပဵၼ်ပီယဝ်ႉၵေႃႈ ဢမ်ႇတတ်းလႆႈသေပွၵ်ႈ။
ဝၼ်းၼိုင်ႈသႂ်သႂ်မိူဝ်းလႄႇဢူၺ်းၵေႃႉသေ ႁၼ်မႅၼ်ႈဢူၺ်းၵေႃႉမၼ်းဢုပ်ႇမၢဝ်ႇၼႆလႄႈ ၵေႃႉဢုပ်ႇသမ်ႉပဵၼ်ၸႆၢးၼုမ်ႇၼႆၵေႃႈ ၼႂ်းၸႂ်ၼႆႉၸဵပ်းၵႅၼ်းၸူၵ်ႉတႅင်းၸမ်ႈၸႂ်ပေႃးၶႂ်ႈတႅၵ်ႇလႅဝ်ယဝ်ႉ၊ သႂ်သႂ်ၵေႃႈမိူဝ်းထၢမ်လွင်ႈထၢမ်တၢင်း ၵႂၢမ်းၽၢမ်းလၢတ်ႈဢွၵ်ႇဝႃႈၵဝ်းလႆၢ ၶွင်ပိူဝ်ႈလိၼ်ႉဢမ်ႇမီးလုပ်ႇ ဢုပ်ႇသင်ၵေႃႈလႆႈလူး။
သမ်ႉဝႃႈဢမ်ႇၶႂ်ႈယုမ်ႇၵေႃႈ ၵွပ်ႈႁၵ်ႉလႄႈပွႆႇဝၢင်းပၼ်၊ ၵူၺ်းၵႃႈ တၢင်းႁၵ်ႉၼႂ်းၵႄႈၶႃၼၼ်ႉ ဢမ်ႇမီးလွင်ႈဢုပ်ႇလၢတ်ႈ လွင်ႈတဵတ်ႇယဵၼ်ပဵၼ်ၶဵၼ်တၢင်းႁၵ်ႉသေ။ တၢင်းႁၵ်ႉမိူၼ်သုတ်းသဵင်ႈၵႂႃႇယဝ်ႉ ၵူၺ်းၵႃႈတၢင်းမွင်းၼႂ်းၸႂ်သႂ်သႂ်တႄႉ တိုၵ်ႉႁၵ်ႉယူႇလႄႈ မွင်းႁႂ်ႈမၼ်းပွၵ်ႈမႃးမိူၼ်မိူဝ်ႈဢွၼ်ယူႇဢိူဝ်ႈ။
တၢင်းမွင်းၼၼ်ႉဢမ်ႇပဵၼ်မႃး တၢင်းႁၵ်ႉၼၼ်ႉဢမ်ႇၸၢင်ႈယိုၼ်းမိုဝ်းထိုင်ၵၼ်ယဝ်ႉလႄႈ ၸႆၢးၼုမ်ႇလႄႈတင်းဢူၺ်းၵေႃႉသႂ်သႂ်ၵေႃႈ ပဵၼ်ၸူႉၵၼ်ၵႂႃႇယဝ်ႉ။
သႂ်သႂ်မိူၼ်ထုၵ်ႇမိတ်ႈၸူၵ်ႉတႅင်း သဵင်တဵတ်ႇယဵၼ်ၼႂ်းၵႄႈတၢင်းမွင်းၼၼ်ႉ မၼ်းၵေႃႈဢမ်ႇလႆႈသင်မႃး၊ မွင်းလႆၢလႆၢၵူၺ်း ဢမ်ႇႁဵတ်းသင်ၵေႃႈလႆႈတၢင်းမွင်းၵူၺ်းၼင်ႇဝႃႈဢိူဝ်ႈ။
“ၵွပ်ႈပိူဝ်ႈဝႆႉၼမ်ႉၼၵ်းၼိူဝ်ၵႂၢမ်းလၢတ်ႈသူၼမ်ၼႃႇပူၼ်ႉလႄႈ ႁဝ်းယုမ်ႇၵူႈလွင်ႈဢၼ်သူလၢတ်ႈႁဝ်း ထိုင်တီႈဢမ်ႇႁတ်းမိုၼ်းတႃ ၵူၺ်းၵႃႈ ဝၼ်းမိူဝ်ႈၼႆႉႁဝ်းၵေႃႈႁူႉယဝ်ႉဝႃႈ ၵႂၢမ်းလၢတ်ႈသူၵူႈၶေႃႈၼၼ်ႉ ႁဝ်းထုၵ်ႇလီယုမ်ႇမိူဝ်ႈသူတိုၵ်ႉလၢတ်ႈၵူၺ်း ဢမ်ႇလီဢဝ်မႃးၵဵပ်းသႂ်ႇၸႂ်”
ၶေႃႈၵႂၢမ်းၼႂ်းၸႂ်ဢၼ်ၶႂ်ႈလၢတ်ႈတီႈမၼ်းတင်းၼမ်ၼၼ်ႉ သႂ်သႂ်ၵေႃႈၶိုၼ်းမွတ်ႇပႅတ်ႈသေ မွတ်ႇပႅတ်ႈၵူႈလွင်ႈဢၼ်ၵဵဝ်ႇၶွင်ႈတင်းၶဝ်လႄႈ ဢမ်ႇသူၼ်ၸႂ်ဝႃႈၶဝ်တေပဵၼ်သင် ယူႇၸိူင်ႉႁိုဝ်ၵိၼ်ၸိူင်ႉႁိုဝ် ဢဝ်လွင်ႈတဵတ်ႇယဵၼ်လၢတ်ႈၵႂၢမ်းၼႄၵူၺ်းယဝ်ႉ။
ၽွင်းယူႇၼႂ်းၵႄႈလွင်ႈတဵတ်ႇယဵၼ်ယူႇၼၼ်ႉ ၶေႃႈတွပ်ႇမၼ်းဢွၵ်ႇမႃးပၼ်လႆႈၵူႈၸွၵ်ႉၵူႈၸဵင်ႇ၊ လွင်ႈတဵတ်ႇယဵၼ်ၼၼ်ႉၵေႃႈ ပဵၼ်သဵင်လဵဝ်ဢၼ်ၸွႆႈႁႂ်ႈသႂ်သႂ်ႁၢင်ႇဢွၵ်ႇမၼ်းလႆႈ။
တၢင်းယၢမ်ႈၶဝ်ဢၵျၢင်ႉၶဝ် မၼ်းပဵၼ်ၵူၼ်းၸိူင်ႉႁိုဝ်ၵေႃႈယဝ်ႉ ၼၼ်ႉမၼ်းပဵၼ်တူဝ်ၶဝ်ယဝ်ႉ၊ ယွမ်းႁပ်ႉလႆႈၵေႃႈဢဝ် ဢမ်ႇယွမ်းႁပ်ႉလႆႈၵေႃႈဢမ်ႇဢဝ်။
ၸႆၢးၼုမ်ႇၵေႃႈတေဢမ်ႇႁူႉမိူၼ်ၵၼ် ၵူၼ်းၸိူင်ႉၼင်ႇသႂ်သႂ် မိူဝ်ႈလႂ်တႅပ်းတတ်းယဝ်ႉၼၼ်ႉမၼ်းႁဵတ်းတေႉလႄႈဢဝ်တေႉယဝ်ႉ။ မၼ်းႁၵ်ႉတေႉလႄႈဢၢၼ်းဢဝ်ဢိူဝ်ႈ ၵူၺ်းၵႃႈ ၵူၼ်းၵေႃႉၼၼ်ႉသမ်ႉ ၵဝ်းလဵၼ်ႈၵူၺ်းၼႆ ႁူႉလႆႈၵေႃႈတတ်းၶၢတ်ႇႁႂ်ႈပေႃးလႆႈယဝ်ႉ။
သႂ်သႂ်တႄႉဝူၼ်ႉဝႃႈ တၢင်းႁၵ်ႉၵူၼ်းၵေႃႉၼၼ်ႉယိုၼ်းယၢဝ်းလႆႈတေႃႇၸူဝ်ႈယူႇဢိူဝ်ႈ ၵူၺ်းၵႃႈ ဢမ်ႇထၢင်ႇဝႃႈတၢင်းႁၵ်ႉမၼ်းတေဢႃႇယုပွတ်း၊ မိူဝ်ႈမၼ်းဝူၼ်ႉဝႃႈတေတတ်းၸႂ်ယဝ်ႉၼၼ်ႉ မၼ်းၵေႃႈၶတ်းတၢင်းဝူၼ်ႉမႃးတႃႇသေႇ တေႃႇထိုင်ပေႃးတတ်းမၼ်းဢွၵ်ႇၸႂ်ၵႂႃႇပႅတ်ႈၵမ်းဢိတ်းဢိတ်း တေႃႇမၼ်းပေႃးမူတ်းသဵင်ႈၼၼ်ႉ လႆႈၸႂ်ႉၶၢဝ်းယၢမ်းတင်းႁိုင်ယဝ်ႉ။
မၼ်းၵေႃႈသွၼ်ႁႂ်ႈႁူႉဝႃႈ တၢင်းႁၵ်ႉၼၼ်ႉယူႇတီႈၵူၼ်းၵေႃႉလဵဝ်သေႁၵ်ႉလႆႈဢိူဝ်ႈ ၵူၺ်းၵႃႈတႃႇယူႇႁူမ်ႈၸွမ်းၵၼ်လႆႈၼၼ်ႉတႄႉ ယူႇတီႈလွင်ႈၽွမ်ႉၸႂ်ၵၼ်တင်းသွင်ၵေႃႉယဝ်ႉ။
ထိုင်ပၢၼ်တေႇၼႃႈႁေႃတေႃႁိူၼ်းမႃးယဝ်ႉ ၵူၺ်းၵႃႈယင်းတိုၵ်ႉၸင်ႇႁႃမေႃသုမ်းတၢင်းႁၵ်ႉမႃးၼႆ ပဵၼ်လွင်ႈတူၵ်းသုမ်းယႂ်ႇလူင်လိူဝ်ပိူၼ်ႈၼႂ်းၸၢတ်ႈပၢၼ်မၼ်းယဝ်ႉ ၵွပ်ႈပိူဝ်ႈဝႆႉတၢင်းမုင်ႈမွင်းၼမ်ၼႃႇပူၼ်ႉလူး။
တႃႇႁၵ်ႉၵၼ်ၼၼ်ႉငႆၢႈၼႃႇ ႁၼ်ၵၼ်ႁူပ်ႉၵၼ်ဢုပ်ႇၵၼ်ၼႆၵူၺ်းၵေႃႈ တၢင်းႁၵ်ႉမၼ်းမုၼ်းၵီႈမႃးႁၢင်ႈလီတႃပေႃးၵႅၼ်း၊ ၵူၺ်းၵႃႈမိူဝ်ႈလႂ် မၼ်းႁဵဝ်ႇၸွပ်ႈၵႂႃႇ တႃႇယွမ်းႁပ်ႉမၼ်းလႆႈၼၼ်ႉ လႆႈၸႂ်ႉၶၢဝ်းယၢမ်းတင်းၼမ် လႆႈၼပ်ႉလႆႈသွၼ်ႇၵူႈလွင်ႈၸိူဝ်းပူၼ်ႉမႃး ႁႃလွင်ႈတၢင်းၶေႃႈဢၢင်ႈမၼ်းတင်းၼမ် ယူႇတီႈမၼ်းႁႃႉယူႇတီႈၵဝ်ႁႃႉ ၼႆဢိူဝ်ႈ။
မိူဝ်ႈႁၵ်ႉမၼ်းငႆၢႈၼႃႇတေႉၵေႃႈ မိူဝ်ႈဢမ်ႇႁၵ်ႉယဝ်ႉၵေႃႈငႆၢႈဢိူဝ်ႈ မၼ်းၵေႃႈဢမ်ႇႁၵ်ႉၵူၺ်းၼႃႇ၊ ၵူၺ်းၵႃႈ သင်ဢမ်ႇၶႂ်ႈႁၵ်ႉသေလႄႈၸႂ်ယင်းတိုၵ်ႉႁၵ်ႉ တိုၵ်ႉမုင်ႈမွင်းယူႇၼၼ်ႉတႄႉ ပၼ်လွင်ႈယၢပ်ႇၸႂ်ယဝ်ႉ။
တႃႇဢဝ်ၵူၼ်းၵေႃႉၼိုင်ႈဢွၵ်ႇၵႂႃႇၼႂ်းၸၢတ်ႈပၢၼ်ၼႆႉမၼ်းယၢပ်ႇသေတႃႉ၊ မိူဝ်ႈလႂ်မိူဝ်ႈတတ်းမၼ်းလႆႈယဝ်ႉၼၼ်ႉ ပွင်ႇဝႃႈဢမ်ႇမီးသင်တိုတ်ႉၸၼ်ဝႆႉယဝ်ႉလႄႈ ပွႆႇမၼ်းၵႂႃႇလႆႈယဝ်ႉသေ သႂ်သႂ်ၵေႃႈလႆႈလွင်ႈလွတ်ႈလႅဝ်းမႃးၶိုၼ်း။
သင်ႁၵ်ႉၵေႃႈႁၵ်ႉၵူၺ်း သင်တူၺ်းဝႃႈပဵၼ်တၢင်းလဵၼ်ႈ ဢမ်ႇလဵၼ်ႈၸွမ်းလႆႈ။ သမ်ႉဝႃႈၸႂ်မၼ်းၶႅင်မိူၼ်ႁိၼ်ၵေႃႈ မၼ်းပဵၼ်ၵူၼ်းမီးႁူဝ်ၸႂ်ယူႇဢိူဝ်ႈ။
ဢမ်ႇမီးလွင်ႈတၢင်းသင်တေသေလႆၢ၊ ဢမ်ႇမီးလွင်ႈတၢင်းသင်တေၸႂ်လမ်၊ ဢမ်ႇမီးလွင်ႈတၢင်းသင်တေသူၼ်ၸႂ်၊ ဢမ်ႇမီးလွင်ႈတၢင်းသင် တေလႆႈဢဝ်မၢၵ်ႇတႃတၢင်းႁၵ်ႉသေယၵ်ႉတူၺ်း၊ တေပဵၼ်သင်တေပဵၼ်ၽႂ်ၵေႃႈလွင်ႈမၼ်းၵူၺ်း သႂ်သႂ်လႆႈပွႆႇပႅတ်ႈမၼ်းၵႂႃႇယဝ်ႉ။
တၢင်းႁၵ်ႉမၼ်းၼၼ်ႉ ဢမ်ႇလႆႈမၵ်းမၼ်ႈဝႃႈပဵၼ်ၵေႃႉႁူမ်ႈၸၢတ်ႈပၢၼ်၊ ၵူၺ်းတေပဵၼ်ၶူးသွၼ်ၸၢတ်ႈပၢၼ် ဢၼ်ဢမ်ႇမီးၽႂ်သွၼ်ပၼ်လႆႈလိူဝ်သေမၼ်း။
သမ်ႉဝႃႈသႂ်သႂ်တေႁူပ်ႉ တေႁၼ်ၸႆၢးၼုမ်ႇယူႇၵေႃႈယဝ်ႉ။ တႃႇဝႃႈတေဢဝ်ႁူဝ်ၸႂ်သေယၵ်ႉတူၺ်းမိူၼ်ၵူႈပွၵ်ႈၼၼ်ႉတႄႉ ဢမ်ႇပဵၼ်လႆႈယဝ်ႉ။
သင်တၢင်းႁၵ်ႉပဵၼ်လွင်ႈလႅၼ်ၽၢင်း ၵၢင်းယၢၼ်ၼၢင်းသေလႄႈ။
သင်တၢင်းႁၵ်ႉပဵၼ်လွင်ႈၵဝ်းၸႂ် ၵႂႃႇယွၵ်ႇၵႆၵႆလႃႈ။
သင်တၢင်းႁၵ်ႉဢၢၼ်းၸူဝ်ႈၵႅပ်ႉၵမ်း ၵႂႃႇတမ်းသေတၢင်ႇတီႈလႄႈၼႃႈ။
သႅၼ်ငဝ်း
19/02/2026
