တွၼ်ႈၼိုင်ႈ
ပီႊ2016..
ၼိူဝ်သဵၼ်ႈတၢင်းလိၼ် ဢၼ်လွမ်ႉႁွပ်ႈဝႆႉပႃႇမႆႉယႂ်ႇမႆႉလူင် မႆႉၸိင်မႆႉမူဝ်ႇမႆႉၵူင် သုမ်ႇငမ်းသမ်ႉပေႃးသႅမ်းၵၼ်လူင်ၵႂႃႇ သုတ်းသၢႆတၢင်း၊ လိၼ်ၸိုမ်ႉမိုၵ်းယမ်း ၼမ်ႉၸေႃႉၸႄႉဝၢႆးၽူၼ်တူၵ်း မၢင်တီႈၵေႃႈဢုင်ပိူဝ်ႉပႃႉ မၢင်တီႈၵေႃႈဢုၵ်းလုၵ်းဢၢၵ်းလၢၵ်း တင်းထူဝ်ႈဢွၼ်ႇသဵင်လင်မေႃးႁႅင်း သမ်ႉပေႃးၶၢၼ်ႉငိၼ်း၊ ႁၼ်လုၵ်းတီႈလႂ်သွင်ႉသႂ်ႇ ၵူၼ်ႈပေႃးၶႂ်ႈၸမ်ႉမူတ်းယဝ်ႉ၊ ၶမ်းလၢဝ်ၼင်ႈမႃးတင်းႁိုင် မိူၼ်တေထိုင်ဢမ်ႇထိုင်သေပွၵ်ႈၼၼ်ႉၵေႃႈ ၼႃႈမၼ်းႁိုဝ်တေၵီႈယုမ်ႉလႆႈယဝ်ႉလႃႇ။
ႁဵတ်းၵႂႃႇႁဵတ်းမႃး ၺႃးတၢင်းၶိုၼ်ႈလွႆ ထူဝ်ႈသမ်ႉဢမ်ႇၶိုၼ်ႈလႆႈ ၵူၼ်းယူႇတၢင်းလင်ထူဝ်ႈၼၼ်ႉၵေႃႈ ၵႃႈတေလႆႈလူင်းဢီးယဝ်ႉ၊ ဢၼ်ထူဝ်ႈဢမ်ႇၶိုၼ်ႈလႆႈၼၼ်ႉ ဢမ်ႇၸႂ်ႈလွႆၸၼ်း တၢင်းမၼ်းပိူဝ်ႉမၼ်းမိုၼ်ႈၼႃႇၼၼ်ႉလႄႈ ၸင်ႇဢမ်ႇၶိုၼ်ႈလႆႈယဝ်ႉ။
လိူဝ်သေၶမ်းလၢဝ် ယင်းမီးထႅင်ႈၸၢႆးၼုမ်ႇဢွၼ်ႇၵေႃႉၼိုင်ႈၶီႇမႃးၸွမ်းၵၼ် ၶႃသွင်ၵေႃႉၼၼ်ႉၵေႃႈ လႆႈၸွႆႈၵၼ်လူင်းဢီးယဝ်ႉ၊ ၵူၼ်းႁေႃႈထူဝ်ႈၵေႃႈ ၶတ်းၸႂ်ႁေႃႈထူဝ်ႈမၼ်းမိူၼ်ၵၼ်၊ ၵူၺ်းၵႃႈ ႁေႃႈၶိုၼ်ႈလႆႈၼိုင်ႈဝႃး သမ်ႉလူင်းမႃးသွင်ဝႃး ၵူၼ်းႁေႃႈမၼ်း ထၢၼ်ႈပေႃးႁိူဝ်ႉ ၵူၼ်းဢီးမၼ်းယိုင်ႈၶႅၼ်းႁိူဝ်ႉၼႃႇဢမ်ႇၸၢင်ႈလၢတ်ႈယဝ်ႉ။ တႃႇတေပူၼ်ႉလွႆၼၼ်ႉ လႆႈၸႂ်ႉၶၢဝ်းယၢမ်းၵႂႃႇတင်းႁိုင် ၵၢင်ဝၼ်းသမ်ႉပေႃးၶမ်ႈ ၵေႃႈဢမ်ႇတၼ်းႁူႉယဝ်ႉ။
ၶမ်းလၢဝ်ၼၼ်ႉတႄႉသမ်ႉဝႃႈၶႂ်ႈပွင်ႉတၢၼ်ႇလႂ်ၵေႃႈ ႁိူဝ်ႉၼႃႇယဝ်ႉလႄႈ သမ်ႉပေႃးဢမ်ႇမီးႁႅင်းပွင်ႉလႆႈယဝ်ႉ။ မိူဝ်းႁွတ်ႈထိုင်တီႈၼႂ်းဝၢၼ်ႈဢုင် ၵၢင်ၶမ်ႈလပ်းပေႃးသိင်ႇၸွမ်ႉႁွမ်ႉ ၽူၼ်သမ်ႉတူၵ်းယွႆးယွႆးထႅင်ႈႁေ သိူဝ်ႈၶူဝ်းၵေႃႈ ၵူဝ်ႈၵူမ်ႇၼုၵ်းလိၼ်ၵႂႃႇသဵင်ႈ။ ၶမ်းလၢဝ်ၼၼ်ႉတႄႉ မွင်းႁႃတီႈတေလိုဝ်ႈၵူၺ်းယဝ်ႉ ဢမ်ႇသူၼ်ၸႂ်ဝႃႈ ပိူၼ်ႈတေဢဝ်မၼ်းလူင်းၵႂႃႇတီႈလႂ်။ ၸဝ်ႈထူဝ်ႈၸင်ႇလႆႈထၢမ်ၸူး
“တေလႆႈၵႂႃႇသူင်ႇသၢင်ႇၼွင်ႉၶဝ်လူင်းတီႈလႂ်လႃႇဝႃႈ”
ၸၢႆးၼုမ်ႇဢွၼ်ႇၵေႃႉၼၼ်ႉၵေႃႈ တွပ်ႇၸူးၵႂႃႇၶိုၼ်း “ႁိူၼ်းၼၢႆးၶမ်းလႅင်ၶဝ်ၶႃႈဢေႃႈ ပီႈဢၢႆႈ”
“လႆႈၵႂႃႈ..လူင်းၸွမ်းၵၼ်ၼေႃႈပေႃးၼႆ”
“ပီႈၼၢင်းၵေႃႈလူင်းတီႈၼၼ်ႈႁႃႉ”
“ဢိူဝ်ႈ!..” ၶႂ်ႈလိုဝ်ႈၼႃႇယဝ်ႉလႄႈ တွပ်ႇၵႂႃႇႁဵတ်းၼၼ်ႉၵူၺ်း။
ၸဝ်ႈထူဝ်ႈၼၼ်ႉၵေႃႈ ၵႂႃႇၶျႃႉပၼ်တီႈ ႁိူၼ်းၼၢႆးၶမ်းလႅင်ၼၼ်ႉယူႇယဝ်ႉ။
မိူဝ်ႈငိၼ်းသဵင်ထူဝ်ႈၶဝ်ႈႁိူၼ်းမႃးၸိူင်ႉၼၼ် ၼၢႆးၶမ်းလႅင်ၵေႃႈ လႆႈဢွၵ်ႇႁိူၼ်းမႃးတူၺ်းသေ ႁၼ်မႅၼ်ႈၵူၼ်းၼုမ်ႇ ဢၼ်မၼ်းဢမ်ႇသူႈလႆႈႁၼ်ၼႃႈႁေပွၵ်ႈၼၼ်ႉလႄႈ လႆႈတွင်ႈထၢမ်ၵႂႃႇၶိုၼ်း
“လၢၼ်ၶဝ်ဢွၼ်ၵၼ်လုၵ်ႉတၢင်းလႂ်မႃးလႃႇ ဢွၵ်ႇတၢင်းမႃးႁိူဝ်ႉၵၼ်ၼႃႇယဝ်ႉယူဝ်ႉၼေႃ ၶဝ်ႈမႃးလိုဝ်ႈႁိူဝ်ႉလိုဝ်ႈၸႂ်ၼႂ်းႁိူၼ်းႁေၵွၼ်ႇလႄႈ”
ၶမ်းလၢဝ်ၼၼ်ႉတႄႉ ဢမ်ႇပဵၼ်တူဝ်ယဝ်ႉ၊ ဢမ်ႇတၼ်းထွမ်ႇယဝ်ႉၽႂ်လၢတ်ႈသင်ၵေႃႈ မွင်းႁၼ်ႁူမ်ႈလႄႈ တီႈယူႇဢၼ်ၼွၼ်းလႆႈဢိတ်ႉၼိုင်ႈၵူၺ်း သမ်ႉပေႃးၼွၼ်းၽေႇလူင်ၵႂႃႇ ၼိူဝ်ၸၢၼ်းႁိူၼ်းၼၢႆးၶမ်းလႅင်ၶဝ်ၼၼ်ႉယဝ်ႉ။ ၸၢႆးၼုမ်ႇဢွၼ်ႇၵေႃႉၼၼ်ႉတႄႉၵေႃႈ လႆႈၼႄႉၼမ်းတူင်ႉတၵ်ႉ ၸူးၼၢႆးၵႂႃႇ
“မႂ်ႇသုင်ၶႃႈၼၢႆး ယူႇလီၵိၼ်ဝၢၼ်ယူႇၶႃႈၼေႃႈ ၶႃႈၸၢႆးပဵၼ်လုၵ်ႈလုင်းသၢင်ႇမိူင်းၶမ်းၶဝ်ဢေႃႈ ၸိုဝ်ႈၸၢႆးႁွင်ႉလႅင်းမိူင်းသႂ်ၶႃႈ”
“ႁႃ! ၼႆႉပဵၼ်လုၵ်ႈဢေးယဵၼ်သႂ်ၶႃၼၼ်ႉၼႄႇ ၼၢႆးသူလႆႈႁၼ်မႂ်းၸဵမ်မိူဝ်ႈယင်းဢွၼ်ႇၼၼ်ႉယူႇ တၼ်းၵေႃႉယႂ်ႇပဵၼ်မၢဝ်ႇလူင်ယဝ်ႉလူးၼႆႉ ဢူႈမႄႈသူယူႇလီၵိၼ်ဝၢၼ်ယူႇၼေႃႈ”
“ယူႇလီၵိၼ်ဝၢၼ်ၵၼ်ယူႇၶႃႈ”
“လီယဝ်ႉ..ၸူမ်းယဝ်ႉလၢၼ်ဢူၺ်ႉ! မႃးလႄႇမႃးၸႂ်းၵၼ်၊ ဢွၼ်ၵၼ်ယမ်းၽူၼ်လူင်မႃး ၵႂႃႇႁႃဢၢပ်ႇၼမ်ႉသုၵ်ႈတူဝ်သီၶိင်းၵၼ်ၵွၼ်ႇႁေလႄႈပေႃးၼႆ”
လႅင်းမိူင်းသႂ်ၵေႃႈ ႁၢင်ႈႁႅၼ်းၶူဝ်းၵႂႃႇႁႃဢၢပ်ႇၼမ်ႉဢၢပ်ႇတႃႈမၼ်း တီႈဢၼ်ၼၢႆးလၢတ်ႈၼႄၼၼ်ႉယဝ်ႉ။
ၶမ်းလၢဝ်ၼၼ်ႉတႄႉ ယင်းတိုၵ်ႉၼွၼ်းမိူၼ်ႇမိုင်ယူႇသေ တူၺ်းၶဝ်ႈၵႂႃႇ ၼႂ်းၽၵ်းတူႁိူၼ်းၼၼ်ႉယဝ်ႉ မုင်ႈႁၼ်တၢင်းၼႂ်းလပ်းသိင်ႇၽိုတ်းၽိုတ်းလူင်ၼၼ်ႉ လႄႈ မီးၾႆးတဵၼ်းလုၵ်ႉလႅင်းလႅင် ပုင်ႈလႅင်းပုင်ႈလႅင်းယူႇႁင်းၵွၺ်းလႅမ်ႈၼိုင်ႈ၊ ၼိူဝ်ၶဵင်ႇၽြႃး ဢၼ်ၸမ်တေသုတ်းၵႂႃႇၼၼ်ႉယဝ်ႉ။ မိုင်ဝူၼ်ႉထိုင်ၸၢတ်ႈပၢၼ်မၼ်း ဢၼ်လႆႈႁူပ်ႉမႃးဝၼ်းမိူဝ်ႈၼႆႉၼၼ်ႉသေ ဢမ်ႇႁူႉဝႃႈ ယွၼ်ႉသင်လႄႈမၼ်းၼၼ်ႉ တေလႆႈမႃးယူႇတီႈၼႂ်းဝၢၼ်ႈၼွၵ်ႈၸွၵ်ႉထိူၼ်ႇၸိူင်ႉၼႆ၊ ၵႆၵေႃႈၵႆဝဵင်း၊ တၢင်းၵေႃႈယၢပ်ႇ၊ ဝၢၼ်ႈၵေႃႈဝၢၼ်ႈၼွၵ်ႈတေႉတေႉ၊ ၾႆးၾႃႉၵေႃႈဢမ်ႇမီး ႁဵတ်းႁႂ်ႈမၼ်းမိုင်ဝူၼ်ႉၸႂ်ထိုင်ၶိုၼ်းႁိူၼ်းမႃးလႄႈ ၼႂ်းၸႂ်ၼႂ်းၶေႃးၵေႃႈ ပဵၼ်ဢၼ်ဢမ်ႇၶႂ်ႈယူႇသေဢိတ်းၼၼ်ႉယဝ်ႉ။
မၼ်းဢမ်ႇသူၼ်ၸႂ်ယဝ်ႉဝႃႈ ဢၼ်ဢူႈၶဝ် သင်ႇလၢတ်ႈသင်ဝႆႉတီႈမၼ်းၼၼ်ႉ မၼ်းၵူၺ်းဝူၼ်ႉဢၢၼ်းတေႁႃတၢင်းပွၵ်ႈမိူဝ်းၶိုၼ်း ႁႂ်ႈပေႃးလွတ်ႈတၢင်းလႃႇၼၼ်ႉၵူၺ်း။ မိူဝ်ႈပဵၼ်ၸိူင်ႉၼၼ် ႁဵတ်းႁႂ်ႈမၼ်းမီးပၢႆးဝူၼ်ႉဢွၵ်ႇမႃး ႁႂ်ႈလႆႈၸဵဝ်းပွၵ်ႈမိူဝ်းယူႇႁိူၼ်းၶိုၼ်း ၼင်ႇၵႃႈဝႆးလႆႈၼႆယူႇ၊ လွင်ႈဢၼ်မၼ်းလူင်ႉလႅၼ်ႇလိူဝ်ပိူၼ်ႈၵေႃႈ ၵၢၼ်လၢတ်ႈၵႂၢမ်းၶတ်း ၽိတ်းႁူဝ်ပိူၼ်ႈၼၼ်ႉၼႃႇ ပေႃးပိူၼ်ႈႁၼ်ဝႃႈ မၼ်းပဵၼ်ၵူၼ်းဢမ်ႇလီ ၽႂ်ၵေႃႈတေဢမ်ႇၶႂ်ႈဢဝ်မၼ်းမႃးသွၼ်လုၵ်ႈၶဝ်ၼႆလႄႈ မၼ်းၵေႃႈတေလႆႈထုၵ်ႇပိူၼ်ႈ သူင်ႇမိူဝ်းတီႈႁိူၼ်းၶိုၼ်း ပေႃးပိူၼ်ႈဢမ်ႇၶႂ်ႈလႆႈမၼ်း တေၼႄႁႂ်ႈဢူႈမႄႈမၼ်းႁၼ်ဝႃႈ မၼ်းၼၼ်ႉ ဢမ်ႇမီးၼမ်ႉၵတ်ႉတႃႇပဵၼ်မေႃသွၼ်လႆႈ ၼႆလႄႈ မိူဝ်ႈဝူၼ်ႉၸိူင်ႉၼၼ်ၼႆၵေႃႈ ႁဵတ်းႁႂ်ႈမၼ်းသမ်ႉပေႃးယုမ်ႉၶူဝ်ဢွၵ်ႇမႃးယဝ်ႉ။
“ယိင်းၼႆႉ တေပဵၼ်လုၵ်ႈမေႃသွၼ်သႅင်ဝၼ်းဢိူဝ်ႈၼေႃႈ မၼ်းလၢတ်ႈမႃးဝႃႈ ႁႂ်ႈမိူဝ်းႁပ်ႉမိူဝ်ႈၼႆႉၼႆၼႃႇ”
“ၸႂ်ႈယဝ်ႉၶႃႈ ဢူႈႁဝ်းလၢတ်ႈဝႃႈႁႂ်ႈၶႃႈမႃးတီႈႁိူၼ်းၼၢႆးၶမ်းလႅင်ၼႆၶႃႈဝႃႇ”
“ဢိူဝ်ႈ!…ပဵၼ်ၼၢႆးၼႆႉယဝ်ႉ”
“ဢေႃ..”
“လီယဝ်ႈ လုၵ်ႉၵႂႃႇႁႃဢၢပ်ႇၼမ်ႉဢၢပ်ႇသင်ႁေ ၸင်ႇၵွႆႈမႃးလိုဝ်ႈလႄႈၼၢႆးဝႃႈ ၵမ်ႉမႃးတေဢမ်ႇယူႇလီယဝ်ႉ”
“ပဵၼ်ၼႆၵေႃႈလီယူႇလူး ပေႃးဢမ်ႇယူႇလီၵေႃႈ တေလႆႈမိူဝ်းယူတ်းယႃတီႈဝဵင်းဢမ်ႇၸႂ်ႈႁႃႉ”
“တီႈဝၢၼ်ႈၼႆႉၵႆဝဵင်းၼႃႇလူး.. တူၺ်းဢဝ်ဢၼ်ယိင်းၶဝ်မႃးမိူဝ်ႈၼႆႉၼၼ်ႉၵူၺ်းယဝ်ႈ၊ ပေႃးဢမ်ႇယူႇလီၼႆၵေႃႈ တႃႇတေဢဝ်ၵႂႃႇဝဵင်းၼၼ်ႉ ဢမ်ႇတေႃႇတေႃႇလူင် တၢင်းၵေႃႈယၢပ်ႇထႅင်ႈ၊ မၢင်ပွၵ်ႈပေႃးပဵၼ်ႁႅင်းၼႃႇ ဢဝ်ၵႂႃႇဝဵင်းၵေႃႈ သမ်ႉၵႆႉၵႂႃႇလူႉသဵင်ႈပႅတ်ႈၸွမ်းတၢင်းႁဵတ်းၼၼ်ဢိူဝ်ႈလၢၼ်ဝႃႈ”
ၶမ်းလၢဝ်ၼၼ်ႉၵေႃႈ ၽုၼ်ႇၽၢၼ်ႇလုၵ်ႉလူင်ၵႂႃႇဢဝ်ၶူဝ်းဢဝ်လဵင်းမၼ်း ၼႅတ်ႈၵႂႃႇႁႃဢၢပ်ႇၼမ်ႉၵမ်းလဵဝ်ယဝ်ႉ၊ ငိၼ်းယူႇဝွႆးဝွႆး ဢၼ်ၼၢႆးလၢတ်ႈၼႄလႅင်းမိူင်းသႂ်ႇမိူဝ်ႈၵႆႈၼၼ်ႉ။ လူင်းႁိူၼ်းယဝ်ႉ ပၼ်ႇလဵပ်ႈၵႂႃႇတၢင်းတူၵ်းႁိူၼ်းၼၼ်ႉသေ တေမီးၼမ်ႉမေႃႇလႄႈ တီႈဢၢပ်ႇၼမ်ႉဝႆႉယူႇ။ မၼ်းၵေႃႈ လႆႈႁၼ်ၾႆးလႅင်းဝွႆးဝွႆးယူႇတီႈဢၢပ်ႇၼမ်ႉၼၼ်ႉလႄႈ ယိၼ်းသဵင်တွင်ႈၼမ်ႉမေႃးယူႇ မၼ်းႁူႉဝႃႈလႅင်းမိူင်းသႂ်တိုၵ်ႉဢၢပ်ႇယူႇၼႆသေ ၸင်ႇဢမ်ႇလႆႈၵႂႃႇႁိမ်းၼၼ်ႉယဝ်ႉ ပႂ်ႉယူႇတၢင်းၼွၵ်ႈၼၼ်ႉၵူၺ်း။
မိူဝ်ႈႁၼ်တီႈဢၢပ်ႇၼမ်ႉ ၼႂ်းလပ်းသိင်ႇသိင်ႇ ၾႆးသၢႆတႆႈလႅင်းဝွႆးဝွႆး တႂ်ႈၽူၼ်ဢွႆယွႆးယွႆး တေႃႉတႄႉမီးတီႈႁႄႉတၢင်းၶၢင်ႈၵူၺ်း ဢမ်ႇလႆႈႁူမ်ႇလူမ်ႈပႃးတၢင်းၼိူဝ်ၼၼ်ႉ ႁဵတ်းႁႂ်ႈမၼ်း ၸႂ်ထိုင်ႁိူၼ်း ဢၼ်မီးႁွင်ႈဢၢပ်ႇၼမ်ႉလႄႈႁွင်ႈၽၢႆႈၸပ်းႁိူၼ်းဝႆႉ ၸႂ်ႉတိုဝ်းငၢႆႈလူမ်ၸႂ်လီၼၼ်ႉမႃးၵမ်းလဵဝ်။ မိူဝ်ႈပဵၼ်ၸိူင်ႉၼၼ်ၵေႃႈ လွမ်ငွၵ်ႈႁႃတူၺ်းႁွင်ႈၽၢႆႈယူႇ ၸင်ႇလႆႈႁၼ်သုမ်ႉလဵၵ်ႉလဵၵ်ႉဢွၼ်ႇ ဢၼ်ၵႆဝႃႈၵႆၼႃႇၼၼ်ႉလႄႈ
“ၼၼ်ႉတႄႉတေပဵၼ်ႁွင်ႈၽၢႆႈယဝ်ႉၵႂႃႈ”
ၼင်ႈသေထူၺ်ႈၸႂ်လူင်ဢွၵ်ႇမႃးၵမ်းယဝ်ႉၵမ်း ဢမ်ႇတၼ်းႁူႉတၼ်းႁၼ် လႅင်းမိူင်းသႂ်ၵေႃႈ မႃးယူႇတေႃႇၼႃႈမၼ်းၼၼ်ႉသေ
“ပီႈၼၢင်းတေဢၢပ်ႇၼမ်ႉႁႃႉ ၶႃႈယဝ်ႉယဝ်ႈ”
“ဢိူဝ်ႈ!”
လႅင်းမိူင်းသႂ်ၼၼ်ႉၵေႃႈ ဢဝ်ၾႆးသၢႆၼၼ်ႉယိုၼ်ႈပၼ်ၵႂႃႇႁေ “ပီႈၼၢင်းတမ်ႉဢမ်ႇမီးၾႆးႁိုဝ်လႃႇ!”
မၼ်းၵေႃႈယိပ်းဢဝ်ႁေယဝ်ႉ မိုင်ဝၢႆႇတူၺ်းၸွမ်းလင်လႅင်းမိူင်းသႂ်ၵႂႃႇ ၼင်ႇမီးလွင်ႈၶႂ်ႈႁူႉၶႂ်ႈႁၼ်ၸွမ်းမႃးယူႇၼႂ်းၸႂ်ယဝ်ႉ။
မိူဝ်ႈၵႂႃႇတီႈတႃႈၼမ်ႉၼၼ်ႉ လႆႈႁၼ်ၼမ်ႉၼႂ်းဢူင်ႇ ဢမ်ႇမီးႁေဢိတ်းယဝ်ႉလႄႈ ၸႂ်ၶႂ်ႈၸမႃးယဝ်ႉ၊ ယွၼ်ႉ လႆႈၸႂ်ႉၼမ်ႉမေႃႇတၵ်းဢၢပ်ႇဢဝ်ၼၼ်ႉၼႃႇ ပေႃးၼမ်ႉမူတ်းၵေႃႈ မၼ်းၵေႃႈတေလႆႈတၵ်းၼၼ်ႉၼိုင်၊ ၶႅၼ်းယူႇ ယင်းပဵၼ်ၼမ်ႉမေႃဢၼ်ၸႂ်ႉၵၢဝ်ႉပၼ်ႇဢဝ် မၼ်းၵေႃႈ ၵႃႈလႆႈတၵ်းၼမ်ႉသႂ်ႇၼႂ်းဢူင်ႇႁႂ်ႈတဵမ်သေ မိူဝ်ႈၼမ်ႉတဵမ်ယဝ်ႉၼၼ်ႉ ၼင်ႇဝႃႈႁႅင်းၵေႃႈမူတ်းယဝ်ႉလႄႈ ၼင်ႈၸႄႈတီႈၼၼ်ႈလူင်ၵႂႃႇၵမ်းလဵဝ်သေ ႁွင်ႉႁႆႈဢွၵ်ႇမႃးယဝ်ႉ။ မိူဝ်ႈၼင်ႈႁႆႈပႆႇႁိုင် သဵင်တွင်ႉသမ်ႉႁွင်ႉမေႃးမႃးထႅင်ႈ တွင်ႉမႆႈၶဝ်ႈယဝ်ႉၼႆၵေႃႈ မၼ်းၸင်ႇတူင်ႉတိုၼ်ႇႁႃဢၢပ်ႇၼမ်ႉလႆႈ။
တီႈၼိူဝ်ၽိူၼ်ၶဝ်ႈ ဢၼ်မီးငွႆးၾႆးလႅင်းလႅင်လုၵ်ႉဝွႆးဝွႆးယူႇၼၼ်ႉ ၶမ်းလၢဝ်လႆႈႁၼ်ၽၵ်းၼႆၵေႃႈ ၼင်ႇႁၢင်ႈလူမ်းတွင်ႉမႆႈၶဝ်ႈပေႃးၶႂ်ႈႁၢႆၵႂႃႇယူႇ၊ တူၺ်းၽၵ်းၵေႃႈ ႁၢင်ႈသမ်ႉပေႃးဢမ်ႇဢၢပ်ႈမီးဢရသႃႇသင်သေဢိတ်းၼၼ်ႉၼႃႇ။ လိူဝ်ၼၼ်ႉသမ်ႉပဵၼ်ၽၵ်းပၵ်ႉၵႅင် ဢၼ်မၼ်းယူႇႁိူၼ်း ဢမ်ႇတွၼ်ႉၵိၼ်ႁေပွၵ်ႈၼၼ်ႉ လႄႈ တေဢမ်ႇၵိၼ်သေဢိတ်း တွင်ႉၵေႃႈသမ်ႉႁွင်ႉဢူဝ်ႈလူတ်ႈဢလၢတ်ႈယူႇတိၵ်းတိၵ်း၊ ၼၢႆးဢၼ်လႆႈငိၼ်းၼင်ႇၼၼ်ၵေႃႈ တၵ်းၽၵ်းသႂ်ႇပၼ်ၼႂ်းဝၢၼ်ႇၶဝ်ႈမၼ်းၼၼ်ႉသေ ၸေႃႉဢဝ်မၢၵ်ႇၽိတ်ႉတမ် သႂ်ႇပၼ်ဢိတ်ႉၼိုင်ႈယဝ်ႉ
“ႁိူၼ်းၼၢႆးသူၵေႃႈ မီးၽၵ်းၸိူင်ႉၼႆၵူၺ်းဢိူဝ်ႈလၢၼ်ဢိူဝ်ႉ”
“ဝၢၼ်ယူႇၶႃႈဢေႃႈၼၢႆး ၶႃႈတႄႉမၵ်ႉၼႃႇၶႃႈၽၵ်းၸိူင်ႉၼႆ” လႅင်းမိူင်းသႂ်လၢတ်ႈ။
“ယိင်းဢမ်ႇၵိၼ်ႁႃႉ…”
မၼ်းၵေႃႈတွင်ႉမႆႈၼႃႇယဝ်ႉလႄႈ ဢဝ်ၵမ်ႈမၼ်းဝႃႈၼႆသေ ၸၢၼ်ၶဝ်ႈတင်းၽၵ်းလေႃးၵၼ်ယဝ်ႉ ၸေႃႉၵိၼ်ၶဝ်ႈၵႂႃႇ၊ မွင်းၵဵဝ်ႉၵႂႃႇၵူၺ်း ၼင်ႇဝႃႈဢရသႃႇၶဝ်ႈၽၵ်းၼၼ်ႉ မိူၼ်တေထုၵ်ႇသူပ်းမၼ်းၵႂႃႇၵမ်းလဵဝ်။ တွင်ႉမႆႈႁိုဝ်တႄႉဢမ်ႇႁူႉ ဢမ်ႇၸၢင်ႈႁဵတ်းႁိုဝ်ၵေႃႈပဵၼ်လႆႈယူႇ၊ ၵိၼ်ၵႂႃႇၵိၼ်မႃး သမ်ႉပေႃးတၼ်းၵွၼ်ႉၶဝ်ႈသႂ်ႇဝၢၼ်ႇပဵၼ်သွင်ၵမ်းယဝ်ႉ။
သိုပ်ႇလူၵႂႃႇထႅင်ႈတွၼ်ႈတေမႃးၶႃႈ။
