တွၼ်ႈၼမ်း
ယၢမ်းၵၢင်ဝၼ်း တီႈၼႂ်းႁွင်ႈဢၼ်ဢမ်ႇပေႃးၵႂၢင်ႈၼၼ်ႉ သဵင်လဵၼ်ႈၵဵမ်းပေႃးၼၼ်ႈၸွင်ႇၸွင်ႇ တၢၼ်ႇဝႃႈမီးၵူၼ်းယူႇပဵၼ်လၢႆၵေႃႉယဝ်ႉ၊ ၵူၺ်းသမ်ႉမီး ၶမ်းလၢဝ် ၵေႃႉလဵဝ်ၵူၺ်းၼင်ႇၵဝ်ႇ သမ်ႉဝႃႈမီးသဵင်တွႆႇၽၵ်းတူႁွင်ႈမေႃးလင်ၵမ်းယဝ်ႉၵမ်းၵေႃႈ ဢမ်ႇငိၼ်းမႅၼ်ႈလႄႈ ၵုမ်ႇမူၼ်ႈယူႇၸွမ်းၵဵမ်းၼၼ်ႉၵူၺ်း၊ မီးၵူၼ်းသိုပ်ႇၽူင်းၵေႃႈဢမ်ႇတူၺ်း၊ သူင်ႇၶေႃႈၵႂၢမ်းၸူးၵေႃႈဢမ်ႇႁၼ် ဢၼ်ၸၼ်ၸႂ်ၼႃႇၼၼ်ႉတႄႉ ပဵၼ်ၵဵမ်းယူႇၼႃႈၶွမ်းၼၼ်ႉယဝ်ႉ။
ဢမ်ႇႁိုင်ဢမ်ႇၼၢၼ်း ၽၵ်းတူၽူၺ်ႇမႃးသေ မိုင်ယၵ်ႉတူၺ်းၵႂႃႇ ၵူၼ်းၵေႃႉဢၼ်ၶဝ်ႈႁွင်ႈမႃးၼၼ်ႉ ပဵၼ်ဢူၺ်းၵေႃႉမၼ်း ၼုမ်ႇလိုၼ်းလႄႈ
“ဢေးလိုၼ်း မိူဝ်ႈၼႆႉၵႂႃႇႁူင်းႁဵၼ်းၸဵဝ်းမႃးၵျႃႉလႃႇ”
ႁၼ်ၵူၼ်းထႅင်ႈၵေႃႉၼိုင်ႈမႃးတၢင်းလင် ၵိုင်ႉၵၢင်ႉတူၵ်းၸႂ်လူင်ၵႂႃႇ ဢၢင်ႈလႅၼ်ႈပၢႆႈ ၵူၺ်းႁွင်ႈသမ်ႉဢမ်ႇၵႂၢင်ႈလႄႈ မႄႈၶဝ်ၼၼ်ႉ ၶုၼ်ႇႁုၵ်ႉၸၼ်ဢဝ်ၶူၼ်ႁူဝ်မၼ်းၵမ်းလဵဝ်။
“မႂ်းတေပၢႆႈၵႂႃႇတၢင်းလႂ်ထႅင်ႈ!!..”
“ပွႆႇယိင်းလႄႈယိင်းၸဵပ်းဢေႃႈ”
“မဵဝ်းမႂ်းၼႆႉမေႃၸဵပ်းယူႇႁႃႉ!! ၼုမ်ႇလိုၼ်းလၢတ်ႈၵဝ်မူတ်းယဝ်ႉ”
ၼုမ်ႇလိုၼ်းသမ်ႉပေႃးဢမ်ႇႁတ်းတၵ်းသဵင်၊ ဢမ်ႇႁတ်းတူၺ်းၼႃႈၶမ်းလၢဝ်ယဝ်ႉ။
“ႁဝ်းယွမ်းၼွမ်းယူႇၼႃႈၶမ်းလၢဝ်”
ၶမ်းလၢဝ်ဢမ်ႇတၼ်းလၢတ်ႈသင် မႄႈၶဝ်ၼၼ်ႉတႄႉ
“ၵဝ်ဝူၼ်ႉၽိတ်းႁႃႉဝူၼ်ႉထုၵ်ႇႁႃႉၼႆႉ သူင်ႇမႂ်းမႃးၶိုၼ်ႈႁူင်းႁဵၼ်းတီႈၵႆၸိူင်ႉၼႆ ႁႅၼ်းၶူဝ်းမႂ်းလႄႈ ပေႃးမႂ်းဢမ်ႇၶႂ်ႈႁဵၼ်းၵေႃႈပွၵ်ႈမိူဝ်းႁိူၼ်းၶိုၼ်းႁေ”
“ၶႃႈတေၵႂႃႇႁႃၵၢၼ်ႁဵတ်းၵူၺ်းယဝ်ႉ ၶႃႈဢမ်ႇမိူဝ်း”
“ၵဝ်ပၼ်မႂ်းလိူၵ်ႈသွင်တၢင်း တေသိုပ်ႇၶိုၼ်ႈႁဵၼ်းၶိုၼ်းႁႃႉ ပေႃးဢမ်ႇႁဵၼ်းၵေႃႈ မိူဝ်းတီႈႁိူၼ်းၶိုၼ်းၵူၺ်း”
“ယိင်းတေဢမ်ႇႁဵၼ်း လႄႈ တေဢမ်ႇမိူဝ်း မိူဝ်းတၢင်းႁိူၼ်းၶိုၼ်းၵေႃႈ ဢမ်ႇမီးၵၢၼ်မီးငၢၼ်းသင်ႁဵတ်းၼင်ႇၵဝ်ႇ”
မႄႈၶဝ်ၼၼ်ႉၵေႃႈ ယဵၼ်ၵႂႃႇသေ ဢဝ်ၶမ်းလၢဝ်ၸႂ်ဢမ်ႇလီမႃးယဝ်ႉ၊ ႁူႉဝႃႈ မႄႈယဵၼ်မိူဝ်ႈလႂ်ၼႆ ပဵၼ်ဢၼ်လီၵူဝ်လိူဝ်သေမိူဝ်ႈမၼ်းပွင်ႉၼၼ်ႉၵွၼ်ႇယဝ်ႉ။
“မႂ်းၵေႃႈၵေႃႉယႂ်ႇပေႉတူဝ်မႃးယဝ်ႉလူး ႁဝ်းၵေႃႈထုၵ်ႇလီပွႆႇမႂ်းၵႂႃႇၸွမ်းတၢင်းလိူၵ်ႈမႂ်းယဝ်ႉဢိူဝ်ႈ..”
မႄႈလၢတ်ႈၸိူင်ႉၼႆၵေႃႈ ၼင်ႇဝႃႈၼႂ်းၸႂ်ၶမ်းလၢဝ်ၼၼ်ႉ မိူၼ်ထုၵ်ႇပွႆႇၽႃႈမႃးၵမ်းလဵဝ်။
“ၶႂ်ႈဝႃႈမႄႈတေဢမ်ႇႁၢမ်ႈၶႃႈယဝ်ႉႁႃႉ”
“ႁဝ်းတွၼ်ႉႁၢမ်ႈမႂ်းလႆႈမိူဝ်ႈလႂ် ယိုင်ႈႁၢမ်ႈမႂ်းယိုင်ႈႁဵတ်းၵူၺ်းဢမ်ႇၸႂ်ႈႁိုဝ်လႃႇ မႂ်းၵေႃႈမီးတၢင်းဝူၼ်ႉပဵၼ်ႁင်းမႂ်းယူႇယဝ်ႉ မႂ်းယင်းဢမ်ႇတွၼ်ႉထွမ်ႇၵႂၢမ်းႁဝ်းႁေပွၵ်ႈဢမ်ႇၸႂ်ႈႁိုဝ်၊ ယူႇႁူင်းႁဵၼ်းၵေႃႈၽိတ်းႁူဝ်ပိူၼ်ႈ၊ သူင်ႇမႃးၶိုၼ်ႈႁဵၼ်းတီႈၵႆၵေႃႈ သမ်ႉၶႂ်ႈႁဵတ်းၵၢၼ်ၼႆ ၸၢင်ႈတေႁဵတ်းႁိုဝ် မႂ်းၶႂ်ႈႁဵတ်းသင်ၵေႃႈႁဵတ်းလႃႈ၊ ၼႂ်းၸိူဝ်ႉၶိူဝ်းႁဝ်း ဢမ်ႇမီးမႂ်းသေၵေႃႉၼိုင်ႈၵေႃႈ ၸၢင်ႈတေပဵၼ်သင်မႂ်းဝႃႈ”
ၼမ်ႉၵႂၢမ်းသီၼႃႈမႄႈၼၼ်ႉ လၢတ်ႈဢဝ်မၼ်းသမ်ႉပေႃးဢမ်ႇၸၢင်ႈထဵင်လႄႈ
“ယိင်းမိူဝ်းၵေႃႈလႆႈ ၵူၺ်းၵႃႈ ႁႂ်ႈယိင်းသိုပ်ႇၶိုၼ်ႈႁဵၼ်းတႄႉဢမ်ႇႁဵၼ်းယဝ်ႉ၊ ယိင်းၶႂ်ႈႁဵတ်းၵၢၼ်ဢေႃႈ ႁဵတ်းၵၢၼ်သင်ၵေႃႈလႆႈယဝ်ႉ”
“ႁဵတ်းၵၢၼ်သင်ၵေႃႈလႆႈ.. လီဢိူဝ်ႈ..”
ၶမ်းလၢဝ်ၵေႃႈပွၵ်ႈမိူဝ်းၸွမ်းမႄႈၶိုၼ်းလီလီယူႇ။ မိူဝ်းႁွတ်ႈႁိူၼ်းယဝ်ႉ ထၢင်ႇဝႃႈတေလႆႈႁဵတ်းၵၢၼ်သင် ဢူႈၶဝ်ၵေႃႈ ႁႂ်ႈမၼ်းႁဵတ်းမေႃသွၼ်ၼႆယူႇ။
မိူဝ်ႈႁူႉၸိူင်ႉၼၼ် ပေႃးတၢၼ်ႇၾၼ်တေပၢႆႈယဝ်ႉ၊ ယွၼ်ႉဢမ်ႇၶႂ်ႈႁဵတ်းမေႃသွၼ် ဢမ်ႇၶႂ်ႈၸႂ်ႉၸၢတ်ႈပၢၼ်မိူၼ်တင်းဢူႈမႄႈ ဢၼ်ႁဵတ်းမေႃသွၼ်မႃးၸွမ်းၸိူဝ်ႉၸွမ်းၶိူဝ်း ပၢၼ်သိုပ်ႇပၢၼ်ၼၼ်ႉလႄႈ ၸင်ႇလႆႈပဵၼ်ၵူၼ်းဢမ်ႇၶတ်းၸႂ်ႁဵၼ်း၊ ၼင်ႇႁိုဝ်တေဢမ်ႇမီးၼမ်ႉၵတ်ႉပဵၼ်မေႃသွၼ်မႃးလႆႈၼၼ်ႉ မၼ်းၵေႃႈ ႁဵတ်းၶတ်းႁဵတ်းပိၼ်ႈၽူၼ်မႃးတႃႇသေႇ၊ ၺႃးၵႂၢမ်းလႃႇၵွပ်ႈမၼ်းၵေႃႈဢမ်ႇယဝ်ႉဢမ်ႇဝၢႆးလႆႈ၊ လိုၼ်းသုတ်းမႃးၵေႃႈ ႁႂ်ႈၵၼ်ႁဵတ်းမေႃသွၼ်ႁႂ်ႈလႆႈၸိူင်ႉၼၼ်၊ မၼ်းဢမ်ႇၽွမ်ႉၸွမ်းလႄႈ လႆႈထဵင်ၵႂႃႇၶိုၼ်း
“ဢမ်ႇ! ၶႃႈတေဢမ်ႇႁဵတ်း၊ ၵူၼ်းၸိူင်ႉၼင်ႇၶႃႈၼႆႉ ဢမ်ႇမီးၼမ်ႉၵတ်ႉသွၼ်ပိူၼ်ႈလႆႈလေႃႇ၊ လိၵ်ႈၵေႃႈဢမ်ႇမေႃဢမ်ႇႁူႉသင်သေမဵဝ်း၊ သမ်ႉပၢႆပဵၼ်ၵူၼ်းဢမ်ႇလီထႅင်ႈႁေ ၽႂ်တေမႃးယုမ်ႇယမ်ၶႃႈလႆႈ၊ ၵူၼ်းၸိူင်ႉၼင်ႇၶႃႈၼႆႉ တေပဵၼ်ပိူင်တႅၵ်ႈဢၼ်ဢမ်ႇလီ တေႃႇလုၵ်ႈႁဵၼ်းၶဝ်ၵူၺ်း”
“ၵူႈလွင်ႈ..မၼ်းႁဵတ်းပဵၼ်လႆႈယူႇယဝ်ႉ ၽိုၵ်းၵႂႃႇတူၺ်းၵေႃႈ ဢမ်ႇပဵၼ်သင်လူး” ဢူႈၶဝ်လၢတ်ႈၸူးမၼ်းၵႂႃႇ ၼင်ႇၸႂ်ယဵၼ်။
မၼ်းၼၼ်ႉတႄႉ ၸႂ်ဢမ်ႇယဵၼ်ယဝ်ႉ ၶိုၼ်ႈသဵင်ၸူးသေ
“ၶႃႈလၢတ်ႈယဝ်ႉဝႃႈၶႃႈဢမ်ႇႁဵတ်း!! တႃႉႁႂ်ႈၶႃႈႁဵတ်းမေႃသွၼ် လိုပ်ႈၶႃႈၵႂႃႇၵေႃႈလႆႈယူႇ”
“ၸိုင်မႂ်းဝႃႈႁဵတ်းၵၢၼ်သင်ၵေႃႈလႆႈၼႆဢမ်ႇၸႂ်ႈႁိုဝ်လႃႇ” မႄႈၶဝ်လၢတ်ႈၶိုၼ်း။
“ၵၢၼ်ဢၼ်ဝႃႈၼၼ်ႉၸႂ်ႈယဝ်ႉ ၶႃႈဢမ်ႇၶႂ်ႈဝႃႈပဵၼ်ၵၢၼ်မေႃသွၼ်လူး”
ၼွင်ႉၸၢႆးမၼ်း ယွတ်ႈဝၼ်းလၢဝ် ဢၼ်ၼင်ႈထွမ်ႇၸဵမ်မိူဝ်ႈၵႆႈၼၼ်ႉၵေႃႈ ႁၼ်ပီႈၼၢင်းမၼ်းယဝ်ႉ ယဵၼ်ႉၸႂ်ဢမ်ႇလႆႈလႄႈ။
“ၵေႃႉယႂ်ႇတၢၼ်ႇၼႆႉယဝ်ႉ ပေႃးဢမ်ႇမေႃႁူႉၸၵ်းၵုင်ႇမုၼ်ဢူႈမႄႈသေဢိတ်း၊ သင်ဢမ်ႇသင် ဝူၼ်ႉၽိတ်းတေႃႇဢူႈမႄႈသေဢိတ်ႉၼိုင်ႈၵေႃႈယင်းလီ မႄႈႁဝ်းၶဝ် ၵၢၼ်ႉႁႃငိုၼ်းႁႃတွင်းသူင်ႇၶိုၼ်ႈႁူင်းႁဵၼ်းတီႈၵႆၵႆၼၼ်ႉ ပေႃးတၢၼ်ႇဝႃႈဢေႇဢေႇၵူၺ်းယဝ်ႈ၊ သင်ဢမ်ႇသင် မႂ်းၵေႃႈထုၵ်ႇလီတႅၼ်းၶိုၼ်းဢမ်ႇၸႂ်ႈႁႃႉ”
“သူင်ႇၵဝ်ၵႂႃႇၶိုၼ်ႈ ထၢမ်တူၺ်းၵၢင်ၸႂ်ၵဝ်ယူႇႁႃႉဝႃႈၵဝ်ၶႂ်ႈၶိုၼ်ႈၼႆ၊ ႁႂ်ႈၵႂႃႇၵဝ်ၵေႃႈၵႂႃႇၵူၺ်း၊ ဢဝ်ၵၢင်ၸႂ်သူသေႁဵတ်းၵူၺ်း ဢမ်ႇတွၼ်ႉထၢမ်ၵၢင်ၸႂ်ပိူၼ်ႈႁေပွၵ်ႈလူး သင်ႁူႉၼၼ် ပဵၼ်ၵူၼ်းဢမ်ႇမီးၸိူဝ်ႉမီးၶိူဝ်းၵေႃႈယင်းလီ”
ဢူႈၶဝ်ဢၼ်ပဵၼ်ၵူၼ်းၸႂ်ယဵၼ်ၼၼ်ႉၵေႃႈ မိူဝ်ႈငိၼ်းၸိူင်ႉၼၼ် ၸႂ်ႁွၼ်ႉမႆႈမႃးယဝ်ႉ။
“လုၵ်ႈဢွၼ်ႇၵေႃႉၼႆႉ! လၢတ်ႈၸိူင်ႉၼႆဢွၵ်ႇမႃးလႆႈၸိူင်ႉႁိုဝ်!!”
“မႄႈႁဝ်းပဵၼ်ၵူၼ်းလၢတ်ႈၸိူင်ႉၼႆႁင်းၶႃႈလူး”
“ၵႂႃႇလႄႈ! ၸူဝ်ႈၵႃႈၵဝ်တိုၵ်ႉထိင်းၸႂ်ၵဝ်လႆႈယူႇၼႆႉ”
ၶမ်းလၢဝ်ၼၼ်ႉၵေႃႈ ဢမ်ႇသူၼ်ၸႂ်သင်သေ တိုပ်ႈတိၼ် ဢွၵ်ႇႁိူၼ်းၵႂႃႇပႅတ်ႈယဝ်ႉ၊ ဢွၵ်ႇႁိူၼ်းၵႂႃႇဢမ်ႇႁိုင် တင်းၸႂ်လမ်သေ လမ်တိုဝ်လမ်တၼ်လူင်ၵႂႃႇ ဢမ်ႇတူၺ်းၼႃႈတူၺ်းလင် သမ်ႉၵႂႃႇၽႃႇၺႃးၽူႈၸၢႆးၵေႃႉၼိုင်ႈ တိုၵ်ႉပႆယူႇလီလီၼၼ်ႉလႄႈ မၼ်းသမ်ႉ ထၢင်ႇဝႃႈၵူၼ်းၵေႃႉၼၼ်ႉ မႃးၽႃႇမၼ်းၼႆသေ ၶိုၼ်ႈသဵင်ႁႃလွင်ႈႁႃတၢင်းမႃးယဝ်ႉ၊ ၵူၼ်းၵေႃႉၼၼ်ႉၵေႃႈ ၵွပ်ႈဢမ်ႇလႆႈႁဵတ်းလႄႈ ထဵင်သဵင်ၶႅင်သဵင်ၸႃးၵႂႃႇ ဢဝ်ၶမ်းလၢဝ်ၵူၼ်းၸႂ်ႁၢဝ်ႈၼၼ်ႉ ထိင်းၸႂ်ဢမ်ႇလႆႈယဝ်ႉလႄႈ တွႆႇမင်ပတ်ႉပၼ်ၸၢႆးၵေႃႉၼၼ်ႉ တႃပေႃးၵမ်ႇလႅင်လူင်ၵႂႃႇၽၢႆႇၼိုင်ႈယဝ်ႉ၊ ၵမ်ၶေႃးသိူဝ်ႈမၼ်း မႃးတွႆႇပၼ်ထႅင်ႈၵမ်းၼိုင်ႈ၊ မိုဝ်းမၼ်းဝႆးၼႃႇ ၸၢႆးၵေႃႉၼၼ်ႉ ယင်းဢမ်ႇတၼ်းတုမ်ႉတွပ်ႇလႆႈသေၵမ်း ၵႅပ်ႉဢွၼ်ႇၵူၺ်းၵေႃႈ သမ်ႉပေႃးၼွၼ်းၶူတ်းၶူၺ်ႇယူႇၼိူဝ်ပိုၼ်ႉလိၼ်ၼၼ်ႉယဝ်ႉၼႃႇ၊ ႁမ်ႉပၢႆပဵၼ်ၽူႈၸၢႆးထႅင်ႈႁေၵွၼ်ႇ။
ယွၼ်ႉဢၼ်မၼ်းၵႂႃႇႁဵတ်းႁၢႆႉပိူၼ်ႈၼႆႉလႄႈ ထုၵ်ႇပလိၵ်ႈၶဝ်တိၺွပ်းၵႂႃႇၶင်ဝႆႉယဝ်ႉ၊ ဢမ်ႇႁိုင်ဢမ်ႇၼၢၼ်းဢူႈၶဝ်ၵေႃႈႁွတ်ႈမႃးသေ
“ဢၼ်ၵဝ်ႁႂ်ႈမႂ်းၵႂႃႇၼႆႉ မႃးယူႇတီႈၼႆႈၵူၺ်းဢိူဝ်ႈၼေႃႈ”
ၶမ်းလၢဝ်ၼၼ်ႉၵေႃႈ ႁိုဝ်တေတၵ်းသဵင်သင်လႆႈ ၼင်ႈၼိမ်ယူႇႁဵတ်းၼၼ်ၵူၺ်း၊ ဢူႈၶဝ်ၸင်ႇၶိုၼ်းသိုပ်ႇလၢတ်ႈထႅင်ႈ
“ယူႇၼႂ်းၼႆႉၵေႃႈလီမိူၼ်ၵၼ် တေဢမ်ႇလႆႈၵႂႃႇႁဵတ်းလွင်ႈသုၵ်ႉယုင်ႈထႅင်ႈ၊ မႂ်းၶႂ်ႈၵိၼ်သင်ၵေႃႈလၢတ်ႈလႄႈ ၶဝ်ႈၽၵ်းၵဝ်တေႁႂ်ႈၼွင်ႉမႂ်းဢဝ်မႃးသူင်ႇပၼ်ၵူၺ်း”
ၶမ်းလၢဝ်ဢၼ်လႆႈငိၼ်းၸိူင်ႉၼၼ်ၵေႃႈ မိူၼ်တေၶႂ်ႈႁႆႈဢွၵ်ႇမႃးယဝ်ႉ၊ သမ်ႉဝႃႈတေၵႆႉလႆႈမႃးတၢၼ်ႇႁိုဝ်ၵေႃႈ ယူႇၼႂ်းႁွင်ႈၶင်ၸိူင်ႉၼႆ မၼ်းဢမ်ႇလီယူႇသေဢိတ်းလူး။
တႃႇမၼ်းတေဢဝ်တူဝ်လွတ်ႈၼၼ်ႉၵေႃႈ တၢၼ်ႇယွမ်းၵေႃႈယွမ်း တၢၼ်ႇဢိူဝ်ႈၵေႃႈဢိူဝ်ႈယဝ်ႉၼႃႇ
“ယိင်းၽိတ်းၵႂႃႇယဝ်ႉဢူႈ ယိင်းတေဢမ်ႇႁဵတ်းထႅင်ႈယဝ်ႉ ၸွႆႈယိင်းၽွင်ႈ”
“ၵဝ်ႁၼ်မႂ်းလၢတ်ႈၸိူင်ႉၼႆလၢႆလၢႆယဝ်ႉ ဢမ်ႇတွၼ်ႉႁၼ်မႂ်းႁဵတ်းၸွမ်းလႆႈႁေပွၵ်ႈ”
“ယိင်းလၢတ်ႈတေႉဢေႃႈ ယိင်းတေဢမ်ႇႁဵတ်းထႅင်ႈယဝ်ႉ”
“ပေႃးမႂ်းဢမ်ႇႁဵတ်းၸိူင်ႉၼႆ မႂ်းသမ်ႉတေႁဵတ်းသင်လႃႇ ဢွၵ်ႇၵႂႃႇၵေႃႈ မႂ်းပေႃးတေၶဝ်ႈမႃးၶိုၼ်းယူႇယဝ်ႉဢမ်ႇၸႂ်ႈႁိုဝ်”
“ၵူၼ်းမီးတၢင်းယၢမ်ႈပိုၼ်းတူဝ်ၸိူင်ႉၼင်ႇယိင်းၼႆႉ ပဵၼ်မေႃသွၼ်ဢမ်ႇလႆႈလေႃႇဢူႈ”
ဢူႈၶဝ်ၼၼ်ႉၵေႃႈ ယၵ်ႉတူၺ်းၼႃႈမၼ်းသေထူၺ်ႈၸႂ်လူင်ၸူးယဝ်ႉ။ ဢမ်ႇႁိုင်ဢမ်ႇၼၢၼ်းၸင်ႇဢဝ်မၼ်းဢွၵ်ႇႁူင်းပလိၵ်ႈမႃးယူႇ။ မိူဝ်ႈၽွင်းပႆမိူဝ်းၸွမ်းတၢင်းယူႇၼၼ်ႉ ဢူႈၶဝ်ၵေႃႈၸင်ႇလၢတ်ႈၸူးမၼ်းၵႂႃႇ
“ၼႂ်းၵၢင်ၸႂ်မႂ်းမီးၸိူင်ႉႁိုဝ်ၵေႃႈလၢတ်ႈမႃးလႄႈ မႂ်းၶႂ်ႈပဵၼ်သင်ၶႂ်ႈႁဵတ်းသင်တေႉတေႉလႃႇ”
“ယိင်းၶႂ်ႈႁဵတ်းၵၢၼ်ဢေႃႈ ၵၢၼ်သင်ၵေႃႈလႆႈယဝ်ႉ လိူဝ်သေႁဵတ်းမေႃသွၼ်”
“ၵၢၼ်သင်ၵေႃႈလႆႈ မႂ်းယင်းဢမ်ႇႁူႉဝႃႈတူဝ်မႂ်းတေႁဵတ်းသင် မႂ်းသမ်ႉဝႃႈၶႂ်ႈႁဵတ်းၵၢၼ်ၼႆႉ ဢမ်ႇပႆႇထုၵ်ႇယူဝ်ႉ၊ မိူဝ်ႈလႂ်မႂ်းပႆႇႁူႉဝႃႈမႂ်းတေႁဵတ်းသင် မႂ်းၵေႃႈၸွႆႈႁဵတ်းၵၢၼ်ႁဝ်းၵႂႃႇသေဢိတ်ႉၼိုင်ႈလႄႈ သင်ဢမ်ႇသင်ၵၢၼ်မေႃသွၼ်မႂ်းၵေႃႈ ယင်းႁူႉလွင်ႈမၼ်းယူႇဢိတ်းဢွတ်း တေႃႇထိုင်မႂ်းပေႃးတေႁူႉဝႃႈ မႂ်းၶႂ်ႈႁဵတ်းသင်ၼၼ်ႉ မႂ်းၸင်ႇတေမႃးလၢတ်ႈၵဝ်ဝႃႈ တေဢမ်ႇႁဵတ်းမေႃသွၼ်ယဝ်ႉၼႆၵေႃႈ ၵဝ်တေပၼ်ႁႂ်ႈမႂ်းၵႂႃႇႁဵတ်းၵၢၼ် ဢၼ်မႂ်းၶႂ်ႈႁဵတ်းၼၼ်ႉယူႇၵူၺ်း”
“လၢတ်ႈတေႉၸွင်ႇၸႂ်ႈ”
“လၢတ်ႈတေႉဢိူဝ်ႈ မႂ်းႁၼ်ၵဝ်လၢတ်ႈလဵၼ်ႈမိူဝ်ႈလႂ် သင်ဢမ်ႇသင်ၵေႃႈ ၸွႆႈႁေမွၵ်ႈၼိုင်ႈပီႊဢွၼ်ႇၵူၺ်းၵေႃႈလႆႈယဝ်ႉ”
“ဢူဝ်ႇၶေႇ! တူၵ်းလူင်းယဝ်ႉၼႃႈဢူႈ ၼိုင်ႈပီႊၵေႃႈလႆႈယူႇၵူၺ်း”
ၼႂ်းၶၢဝ်းတၢင်းၼိုင်ႈပီႊၼၼ်ႉ တေပဵၼ်ၸိူင်ႉႁိုဝ် ၸွင်ႇၶမ်းလၢဝ်ၼၼ်ႉ လႆႈထူပ်းၵၢၼ်ဢၼ်မၼ်းသူၼ်ၸႂ်ၼၼ်ႉတေႉယူႇႁိုဝ်ၼႆ သိုပ်ႇလူၵႂႃႇထႅင်ႈၶႃႈ။
