တွၼ်ႈသွင်
ယၢမ်းၵၢင်ၼႂ် မိူင်းလႅင်းပႆႇပၢင်ႇယင်းတိုၵ်ႉလပ်းသိင်ႇယူႇၽိုတ်းၽိုတ်းၼၼ်ႉ ၼၢႆးၶမ်းလႅင်ၵေႃႈ လုၵ်ႉမႃးႁႃသုၵ်ႈၼႃႈလၢင်ႉတႃ ႁုင်ၶဝ်ႈႁဵတ်းၽၵ်း တႆႈတဵၼ်းတင်ႇသွမ်းၽြႃးမၼ်းၸဵမ်ၸဝ်ႉၸဵမ်ၸဵဝ်း၊ ၶမ်းလၢဝ် ဢၼ်တိုၵ်ႉၼွၼ်းဝၢၼ်ယူႇၼၼ်ႉ လႆႈငိၼ်းသဵင်ဝႆႈၽြႃး သမ်ႉပေႃးတိုၼ်ႇယဝ်ႉ၊ ၵွပ်ႈဢမ်ႇလိူဝ်လႆႈတႃၼွၼ်းၼၼ်ႉသေ သမ်ႉဝႃႈသဵင်လင်ၵေႃႈ ၵူမ်ႁူဝ်တူမ်းႁူမၼ်းယဝ်ႉ မႄးၶိတ်းၵူၼ်ႈသိုပ်ႇၼွၼ်းၵႂႃႇထႅင်ႈႁေယဝ်ႉ။
လႅင်းမိူင်းသႂ်ၼၼ်ႉတႄႉ လုၵ်ႉၶွၵ်ႉၽႃႈသေ ၵႂႃႇႁႃသုၵ်ႈၼႃႈမၼ်းတၢင်းၼမ်ႉမေႃႇၼၼ်ႉယူႇ။ မိူဝ်ႈသုၵ်ႈၼႃႈလၢင်ႉတႃယဝ်ႉ မိူင်းၵေႃႈၼင်ႇႁၢင်ႈၶႂ်ႈပၢင်ႇမႃးဢိတ်းဢိတ်းယဝ်ႉလႄႈ မိူဝ်ႈတေဢၢၼ်းၶိုၼ်ႈႁိူၼ်းမိူဝ်းၼၼ်ႉ လႆႈငိၼ်းမႅၼ်ႈ သဵင်ၽုၺ်ႇၵိူၼ်ႇတၢင်းၼႃႈႁိူၼ်းၼၼ်ႉသေ ဝၢႆႇၼႃႈၸၢႆႉတႃတူၺ်း ဢမ်ႇႁူႉဝႃႈမီးသင်မႃးၸၼ်ၸႂ် ပၼ်ႁႂ်ႈမၼ်းလႆႈႁၼ်ၺႃး ယိင်းသၢဝ်လဝ်းၼုမ်ႇဢွၼ်ႇၵေႃႉၼိုင်ႈ တိုဝ်းၵုပ်းဝႆၽႃႈယၢင် ၽၵ်းပႅမ်းမႅၵ်ႇသဵမ်လူင်ဢွၵ်ႇႁိူၼ်းမႃး၊ လိူၵ်ႈလိူၵ်ႈ ယိင်းသၢဝ်ဢွၼ်ႇၵေႃႉၼၼ်ႉၵေႃႈ ယၵ်ႉဝၢႆႇမႃးတၢင်းမၼ်း ပၼ်တၢင်းယုမ်ႉၸူးၵႂႃႇ။ ၼႃႈသဵမ်ႈၼုမ်ႇဢွၼ်ႇယိင်းလဝ်း တႃးဝႆႉမုၼ်ႈမူၼ်ႇမူၼ်ႇဢွၼ်ႇပဵၼ်ဝိူင်း သီႇသူပ်းၶွင်ႇၸွင်းႁွင်း လုၵ်ႈတႃဢွၼ်ႇမူၼ်းမူၼ်း မွႆတႃလမ်ယၢဝ်း ၶူၼ်တႃလမ်မွင်ႉ ၵွင်ႉဢဝ်ႁူဝ်ၸႂ်ၸၢႆးမၢဝ်ႇတႆးဝဵင်းၶဝ် ပေႃးလႆႈမိုင်ယၵ်ႉဝၢႆႇတူၺ်းၸွမ်း တၢင်းႁၢင်ႈလီသၽႃႇဝဢွၼ်ႇယိင်းသၢဝ်ဝၢၼ်ႈၼွၵ်ႈၵေႃႉၼႆႉယဝ်ႉ။
ၽွင်းၶၢဝ်းဢိုတ်းႁဵၼ်းလႅင်းမိူင်းသႂ်ၼႆလႄႈ မၼ်းၼႆႉသမ်ႉသူၼ်ၸႂ်ပႃးၸႂ် ဢႅဝ်ႇလႄႇယဵမ်ႈသၽႃႇဝၼႆၵေႃႈပႃးယဝ်ႉ၊ ၸင်ႇလႆႈဢဝ်တိုဝ်ႉတၢင်းၼႆႉသေ မႃးလႄႇၶိုၼ်း ဝၢၼ်ႈဢွၼ်ႇဢၼ်ယၢမ်ႈႁွတ်ႈထိုင် မိူဝ်ႈယင်းတိုၵ်ႉဢွၼ်ႇ ၽွင်းဢႃႇယုဢသၢၵ်ႈလႆႈယူႇမွၵ်ႈ 10 ၶူပ်ႇၼၼ်ႉ ၼႆယူႇယဝ်ႉ။
ယၢမ်းၵၢင်ၼႂ်လႃႈမႃး ၵၢင်ဝၼ်းသမ်ႉပေႃးဢွၵ်ႇ ထွင်ႇလႅင်းၸွမ်းႁူးၽႃၼၼ်ႉယဝ်ႉၵေႃႈ ဢမ်ႇပႆႇႁၼ်ဝႃႈ ၶမ်းလၢဝ်ၼၼ်ႉ တေဢွၵ်ႇႁိူၼ်းမႃးသေဢိတ်း၊ ၼၢႆးၸင်ႇၶဝ်ႈၼႂ်းႁိူၼ်းမိူဝ်းသေ
“ယိင်း..ဢမ်ႇယူႇလီႁႃႉ ပဵၼ်ႁိုဝ်မႃးလႃႇ”
ၶမ်းလၢဝ်ၵေႃႈ ထၢင်ႇဝႃႈၼၢႆးတေမႃးႁွင်ႉမၼ်းလုၵ်ႉ ၵူၺ်းသမ်ႉမႃးထၢမ်ၸိူင်ႉၼႆလႄႈ ႁဵတ်းၵႅင်ႈဝႃႈဢမ်ႇယူႇလီၼႆႁေ မႄးဢႆ ဢႁူၵ်ႉ!..ဢႁူၵ်ႉ!ႁူၵ်ႉ..မႃးထႅင်ႈယဝ်ႉ။
“တေႁႂ်ႈၼၢႆးၵႂႃႇႁွင်ႉမေႃယႃမႃးသမ်းပၼ်ၶဵမ်ၼႄႇ…”
ပေႃးဝႃႈၶဵမ်ၼႆၵေႃႈ ၼင်ႇႁၢင်ႈၶူၼ်တုမ်ႇၼိူဝ်ႉမၼ်းပေႃးၵီႈပိုဝ်းလူင်မႃးသေယဝ်ႉ၊ ၶုၼ်ႇလုၵ်ႉၼင်ႈၵမ်းလဵဝ်သေ
“ဢမ်ႇပဵၼ်ႁင်ယဝ်ႉၶႃႈၼၢႆး!!” ၽႃႈၵေႃႈဢမ်ႇတူပ်ႉ ၽုၼ်ႇၽၢၼ်ႇလုၵ်ႉလူင်ၵႂႃႇၵမ်းလဵဝ်၊ လိူၵ်ႈလိူၵ်ႈသမ်ႉၵႂႃႇသိူၵ်ႈသႂ်ႇ ၽိူၼ်ၶဝ်ႈၶဝ် ဢၼ်လႅင်းမိူင်းသႂ်ႁၢင်ႈႁႅၼ်းတမ်းဝႆႉလီလီငၢမ်းငၢမ်း လူဝ်ႇၵိၼ်ၵူၺ်းယဝ်ႉလႄႈ မၼ်းၵေႃႈ ဢမ်ႇသူၼ်ၽႂ်သေ ၵႂႃႇဢဝ်ဝၢၼ်ႇၶဝ်ႈဝၢၼ်ႇၼိုင်ႈဢၼ်ၵွၼ်ႉဝႆႉ ဢၢပ်ႈတေၵွၼ်ႉပၼ်တႃႇၼၢႆးၶဝ်ၼၼ်ႉယူႇ။ လႅင်းမိူင်းသႂ်တိုၵ်ႉဢၢင်ႈတေလၢတ်ႈယူႇ ၵူၺ်းၵႃႈ ၵမ်းၶဝ်ႈၼၼ်ႉ သမ်ႉပေႃးၵႂႃႇမီးယူႇၼႂ်းသူပ်းမၼ်းယဝ်ႉလႄႈ လႅင်းမိူင်းသႂ်ၵေႃႈ ၵႃႈလႆႈမိူၼ်ႇမိုင်ယၵ်ႉတူၺ်းမၼ်းသေ။
မၼ်းၵေႃႈယၵ်ႉတူၺ်းၶိုၼ်းလႅင်းမိူင်းသႂ်သေယဝ်ႉ “တူၺ်းႁင်လႃႇ တေၵိၼ်ၶဝ်ႈဢမ်ႇၸႂ်ႈႁႃႉ!”
“ပီႈဢဝ်ဝၢၼ်ႇၶဝ်ႈၼၢႆးႁဝ်းၵိၼ်..”
“ဝၢၼ်ႇၶဝ်ႈ..တိုၵ်ႉမီးဝၢၼ်ႇၵဝ်ဝၢၼ်ႇမႂ်းယူႇၵႂႃႈ” ၸေႃႉဢဝ်ၽၵ်းဢၼ်ပႆႇမီးၽႂ်တၵ်းသေၵေႃႉၼၼ်ႉ သႂ်ႇၼႂ်းဝၢၼ်ႇမၼ်းၵႂႃႇ ၵိၼ်ၼင်ႇႁၢင်ႈဝၢၼ်ႁၢင်ႈမၼ်း ယူႇယဝ်ႉ။
“ၼၢႆးယင်းပႆႇတၼ်းလႆႈၵိၼ် ပီႈပေႃးၵိၼ်ဢွၼ်တၢင်းယဝ်ႉလႃႇ ပႂ်ႉႁႂ်ႈၵူၼ်းလူင်ၶဝ်ၵိၼ်ဢွၼ်တၢင်းၵွၼ်ႇလႄႈ”
“ၼၢႆးသမ်ႉပေႃးၸိမ်းဢွၼ်တၢင်းတေမႃးတၵ်းသႂ်ႇဝၢၼ်ႇၵွၼ်ႇယဝ်ႈ ၵိၼ်လႃႈ”
“ၼႃႈၵေႃႈဢမ်ႇသုၵ်ႈမိုဝ်းၵေႃႈဢမ်ႇလၢင်ႉႁေ” လႅင်းမိူင်းသႂ်ၵေႃႈတင်းလၢတ်ႈ တင်းတူၺ်းၼႃႈၶမ်းလၢဝ် ၼင်ႇဢဵတ်ႇသဵတ်ႇယူႇယဝ်ႉ။
ၼၢႆးတႄႉၵေႃႈဢမ်ႇတၵ်းသဵင်သင် မႃးၼင်ႈႁေၵိၼ်ၶဝ်ႈၵုမ်းၵၼ်ၵႂႃႇယဝ်ႉ။
“ယိင်း! ပေႃးၵိၼ်ၶဝ်ႈယဝ်ႉ တေၵႂႃႇတၢင်းလႂ်လႃႇ”
သမ်ႉပေႃးဢဝ်ၶမ်းလၢဝ်ၵႅၼ်ႉဢွၵ်ႇမႃးသေ “ထၢမ်ၶႃႈႁႃႉ!!”
“ဢိုမ်ႉ!..”
“မိူဝ်းၶိုၼ်းၵူၺ်းဢေႃႈ!..”
“ဢေႃ..ဢိူဝ်ႈ တေမိူဝ်းၶိုၼ်းႁေယဝ်ႉၼေႃႈ”
ၶမ်းလၢဝ်ၵေႃႈဢမ်ႇႁူႉဝႃႈတေလၢတ်ႈသင်ယဝ်ႉလႄႈ မႄးႁႃၼမ်ႉမႃးၵိၼ်ယဝ်ႉ။ လႅင်းမိူင်းသႂ်တႄႉၵေႃႈ ဢမ်ႇႁူႉဝႃႈတေလၢတ်ႈသင်ၸွမ်း ၼင်ႈႁေၵိၼ်ၶဝ်ႈၵႂႃႇၵူၺ်းယူႇ။
“ၶႃႈမိူဝ်းလႆႈယူႇၼေႃႈပေႃးၼႆ!!”
“လႆႈၵႂႃႈ..ၶႂ်ႈမိူဝ်းၵေႃႈမိူဝ်းလႆႈယူႇၵူၺ်း.. ဢမ်ႇႁူႉၼႃႇတီႈႁိူၼ်းယိင်းၶဝ်လၢတ်ႈႁင်မႃး”
မၼ်းၵေႃႈၶိုၼ်းဝူၼ်ႉတူၺ်းၶေႃႈၵႂၢမ်းဢၼ်ဢူႈၶဝ်သင်ႇလၢတ်ႈမႃး
“ပေႃးမႂ်းဢမ်ႇပႆႇႁူႉဝႃႈ မႂ်းၶႂ်ႈႁဵတ်းသင် မႂ်းၵေႃႈယူႇတီႈၼၼ်ႈၵႂႃႇလႄႈ မိူဝ်ႈလႂ်မႂ်းႁူႉဝႃႈမႂ်းတေႁဵတ်းသင် မႂ်းၸွင်ႇၵွႆႈပွၵ်ႈမႃးၶိုၼ်း မိူဝ်ႈၼၼ်ႉၵဝ်ၸင်ႇတေပွႆႇမႂ်းလႆႈ”
မိူဝ်ႈဝူၼ်ႉၺႃးၸိူင်ႉၼၼ်ၵေႃႈ ဢဝ်ၵမ်းၶဝ်ႈမၼ်းသမ်ႉပေႃးၸၢင်လူင်ၵႂႃႇယဝ်ႉ၊ ၶဝ်ဢွၼ်ၵၼ်ၼင်ႈၵိၼ်ၶဝ်ႈ ယူႇတီႈၸၢၼ်းႁိူၼ်းၶႃသုင် ႁူမ်ႇလူမ်ႈမုင်းႁဵၵ်ႇ မႆႉပႅၼ်ႈၽႃၼႃၼၼ်ႉ ယၵ်ႉယဵမ်ႈမုင်ႈၵႂႃႇတူၺ်းပႃႈႁွင်ႇပႃႈၸၢၼ်း လႆႈႁၼ်ႁိူၼ်းၶႃး ၶပ်ႉသႅမ်းၵၼ်ပဵၼ်ထႅဝ်ပဵၼ်တႅဝ်း၊ ႁိူၼ်းမုင်းႁဵၵ်ႇၸွမ်ႇၵႄႈပဵၼ်ယွမ်ႇပဵၼ်ယႅမ်ႇ၊ မၢင်လင်သုင်မၢင်လင်တႅမ်ႇ မၢင်လင်ၵေႃႈသၢၼ်ၽႃ၊ မၢင်လင်ၵေႃႈႁိူၼ်းၽႃႁၢႆမုင်းၶႃးလၢႆ ဢၼ်ဝႃႈၼၼ်ႉၵေႃႈမီး။ ၶမ်းလၢဝ်ႁၼ်ၼင်ႇၼၼ် ႁဵတ်းႁႂ်ႈမၼ်းထူၺ်ႈၸႂ်လူင်မႃးသေယဝ်ႉ ဢဝ်ပေႃးၶဝ်ႈမၼ်းၵႂႃႇပႅတ်ႈယူႇ။
ၵိၼ်ၶဝ်ႈယဝ်ႉ ဢၢၼ်းတေၵႂႃႇႁႃသုၵ်ႈၼႃႈလၢင်ႉတႃမၼ်းၼႆၵေႃႈ လႆႈႁၼ်ၼမ်ႉမေႃႇၼၼ်ႉယဝ်ႉ ၼႂ်းၵၢင်ၸႂ်မၼ်း ႁဵတ်းႁင်ၵေႃႈ ပေႃးဢမ်ႇလူမ်ၸႂ်သေမဵဝ်းလႄႈ ၶုၵ်းၸႂ်လႆႈတီႈႁိူၼ်းမႃးၵမ်းလဵဝ်သေ ပွင်ႉယူႇႁင်းမၼ်း
“ႁႂ်ႈမႃးယူႇတီႈၸိူင်ႉၼႆ ဢမ်ႇၶၢမ်ႇလႆႈယဝ်ႉ၊ ၶႂ်ႈပဵၼ်ႁိုဝ်ပဵၼ် ဢမ်ႇမိူဝ်းၶိုၼ်းတႄႉဢမ်ႇလႆႈ ၸိူင်ႉႁိုဝ်ၵေႃႈလူဝ်ႇမိူဝ်းၶိုၼ်းယဝ်ႉ မိူဝ်းၺႃးပွင်ႉၺႃးလႃႇႁေသွင်သၢမ်ဝၼ်း ဢေႃ…ဢမ်ႇဢၢပ်ႈပဵၼ်လႆႈ မွၵ်ႈလိူၼ်ၼိုင်ႈၵေႃႈလႆႈယူႇ ၶႅၼ်းသေယူႇတီႈၼႆႈပဵၼ်ပီႊၵဝ်ႇယဝ်ႈ တႃႉယူႇတီႈၼႆႈပဵၼ်ပီႊ တႃႉႁဵတ်းၵၢၼ်တၢင်ႇမဵဝ်းဢဝ်လႃႈ”
“ပီႈၼၢင်းပေႉပွင်ႉသင်ယူႇလႃႇ!”
ၶမ်းလၢဝ်ဢၼ်ႁၼ်လႅင်းမိူင်းသႂ်မႃးထၢမ်မၼ်းၸိူင်ႉၼၼ်ၵေႃႈ ယၵ်ႉတူၺ်းၼႃႈလႅင်းမိူင်းသႂ်ၼၼ်လီလီသေ
“ဢၢႆႈၼွင်ႉ! မႃးႁဵတ်းသင်တီႈဝၢၼ်ႈၼႆႉလႃႇ..”
လႅင်းမိူင်းသႂ်ၼၼ်ႉၵေႃႈ ယုမ်ႉၸူးမၼ်းသေ “မႃးလႄႇၵူၺ်းဢေႃႈ! တီႈၼႆႈၾိင်ႈၾႃႉလီပေႃးတၢၼ်ႇၼႆႉ ယူႇၼႂ်းဝဵင်း တေႁႃတီႈၵတ်းတီႈယဵၼ်မိူၼ်ၼႆဢမ်ႇမီးၶႃႈၼႃ”
“ၶႂ်ႈၵႂႃႇတၢင်းလႂ်ၵေႃႈၵႂႃႇလႄႈ!..” ၼႃႈႁူႇတႃႁမ်းၼင်ႇဢမ်ႇႁၼ်လီၸွမ်း ၶေႃႈၵႂၢမ်း လႅင်းမိူင်းသႂ်ၼၼ်ႉယဝ်ႉ။
လႅင်းမိူင်းသႂ်ၼၼ်ႉၵေႃႈမႃးတီႈၼမ်ႉမေႃႇၼၼ်ႉသေ ဢဝ်ပုင်းတၵ်းၼမ်ႉမေႃႇ ဢၼ်မတ်ႉၸိူၵ်ႈၵိုၵ်းၵၢဝ်ႉမၼ်းၼၼ်ႉ တွတ်ႈလူင်းၵႂႃႇၼႂ်းမေႃႇသေယဝ်ႉ ပၼ်ႇၵၢဝ်ႉမၼ်း ဢၢတ်ႉ…ဢိတ်ႈ.. ဢၢတ်ႉ..ဢွတ်ႈ ၵမ်ႉၵေႃႈ သမ်ႉပေႃးဢဝ်ၼမ်ႉၼႂ်းပုင်းၼၼ်ႉ ထွၵ်ႇသႂ်ႇပၼ်ဢူင်ႇႁိမ်းၶမ်းလၢဝ်ၼၼ်ႉယဝ်ႉ။
“ပီႈလူးမႃးႁဵတ်းသင်ၶႃႈ..တူၺ်းတႄႉတေဢမ်ႇၸႂ်ႈမႃးလႄႇၶႃႈၼႃ”
“ဢိုမ်ႈ! ဢမ်ႇလႆႈမႃးလႄႇ မႃးႁေမိူဝ်းၶိုၼ်းၵူၺ်းဢိူဝ်ႈ!”
“မိူဝ်ႈလႂ်မိူဝ်ႈမႃးယဝ်ႉၵေႃႈ ၵႂႃႇလႄႇတူၺ်းၸွမ်းၸိူဝ်းဝၢၼ်ႈၼႆႉႁေဢိတ်ႉၼိုင်ႈၶႃႈလႄႈ”
“ဢမ်ႇႁၼ်မီးတီႈလႂ်လူဝ်ႇလႄႇသေဢိတ်း..ပဵၼ်ၵူမ်ႇပဵၼ်ဢုင်လူင်ၵႂႃႇမူတ်း ၵိုင်ႇတင်းၸိုဝ်ႈမၼ်းဝႃႈဝၢၼ်ႈဢုင်ယူႇၵူၺ်း”
သီၶဵဝ်ႈသုၵ်ႈၼႃႈမၼ်းယဝ်ႉၵေႃႈ ဢဝ်ၽႃႈၸဵတ်ႉပၢႆႉတီႈမႃႇမၼ်းၼၼ်ႉ မႃးၸဵတ်ႉၼႃႈလီလီငၢမ်းငၢမ်းသေယဝ်ႉ ၶိုၼ်ႈႁိူၼ်းမိူဝ်းဢဝ်ၶူဝ်းမၼ်းလူင်းႁိူၼ်းၶိုၼ်း။ ၼၢႆးၶမ်းလႅင်ဢၼ်ဝဵၵ်ႉသူၼ်မၼ်းယူႇတၢင်းၼႃႈႁိူၼ်းၼၼ်ႉၵေႃႈ
“တေမိူဝ်းယဝ်ႉႁႃႉ!..”
“ဢေႃႈမိူဝ်းယဝ်ႉၶႃႈ..”
“မိူဝ်းၸွမ်းၽႂ်လႃႇ ဢမ်ႇပႆမိူဝ်းၼင်ႇၵဝ်ႇယူဝ်ႉၼေႃႈ..”
သမ်ႉပေႃးဢဝ်ၶမ်းလၢဝ်ၵိုတ်းလူင်ၵႂႃႇႁေ ၵွပ်ႈၼႂ်းၵၢင်ၸႂ်ဢၼ်ၶႂ်ႈမိူဝ်းၼႃႇၼႃႇၼၼ်ႉ ႁဵတ်းႁႂ်ႈမၼ်းဢမ်ႇတၼ်းဝူၼ်ႉထိုင်ဝႃႈ မၼ်းတေႁဵတ်းႁိုဝ်မိူဝ်းၼႆလႄႈ ၸင်ႇယၵ်ႉတူၺ်းၼၢႆးသေ
“ၼႂ်းဝၢၼ်ႈၼႆႉ ၸွင်ႇမီးၽႂ်မိူဝ်းဝဵင်းယူႇၶႃႈႁႃႉၼၢႆး!”
ၼၢႆးၵေႃႈဝၢင်းသဵမ်မၼ်းၼၼ်ႉသေ မႄးဝႅတ်ႉသိၼ်ႈမၼ်းလီလီယဝ်ႉ တဝ်ႉဢဝ်ၵၢၼ်းသဵမ်မၼ်း ယၵ်ႉတူၺ်းၸူးၶမ်းလၢဝ်ၵႂႃႇ ပႃးသီၼႃႈဢၼ်ဢမ်ႇပေႃးလီၵႃႈႁိုဝ်လႄႈ ထူၺ်ႈၸႂ်လူင်မႃးၵမ်ႉၼိုင်ႈယဝ်ႉ။
“ၶၢဝ်းၼႆႉၶၢဝ်းၽူၼ် တၢင်းၵေႃႈယၢပ်ႇၼႃႇ ယိင်းၶဝ်မႃးမိူဝ်ႈဝႃးၵေႃႈ တေႁၼ်ယူႇဢမ်ႇႁိုဝ်.. ပေႃးဢမ်ႇလူဝ်ႇၼႃႇဢႃးလႃး ႁိုင်ႁိုင် ၼိုင်ႈဝူင်ႈ သွင်ဝူင်ႈ မၢင်ပွၵ်ႈပဵၼ်လိူၼ်ၸိူဝ်းၼႆႉ ၸင်ႇၵွႆႈမိူဝ်းၵူၺ်း၊ တူၺ်းမိူဝ်ႈၼႆႉတႄႉ ဢၢပ်ႈတေဢမ်ႇမီးၽႂ်မိူဝ်းယဝ်ႉ တိုၵ်ႉၸင်ႇႁႃမိူဝ်းမႃးမိူဝ်ႈဝႃးၵူၺ်း၊ ပေႃးယိင်းၶႂ်ႈမိူဝ်းၵေႃႈ ပႆမိူဝ်းဢဝ်လႆႈယူႇၼႃႇ”
ၼၢႆးလၢတ်ႈမႃး ဢဝ်ၶမ်းလၢဝ်ပေႃးႁၼ်ႁၢင်ႈမိူဝ်ႈဝႃး မႃးမီးယူႇၼႂ်းတႃၼၼ်ႉယဝ်ႉ၊ ဢဝ်ၶႅၼ်ဢၼ်ယိပ်းထူင်ၶူဝ်းမၼ်းၼၼ်ႉ သမ်ႉပေႃးတေလူၼ်ႇတူၵ်းမိုဝ်းယူႇ။ ၼၢႆးဢၼ်လႆႈႁၼ်ၶမ်းလၢဝ်ပဵၼ်ၸိူင်ႉၼၼ်ၵေႃႈ
“တေႃႈၼင်ႇၶီႇထူဝ်ႈ ယင်းႁွတ်ႈမႃးပေႃးၶမ်ႈ၊ သင်ပႆမိူဝ်းတႄႉ ဢမ်ႇတေႃႇတေႃႇတေထိုင်ယူဝ်ႉ၊ တၢင်းၵေႃႈယၢပ်ႇ ထိူၼ်ႇၵေႃႈၼႃဢိုမ်တိုမ်း ဢမ်ႇႁၼ်လိူၼ်ႁၼ်ဝၼ်းၸိူင်ႉၼၼ် ပေႃးၵႂင်တၢင်းတေႁဵတ်းႁိုဝ်လႃႇ ဢမ်ႇၶႂ်ႈႁႂ်ႈမိူဝ်းတႄႉဢမ်ႇၸႂ်ႈ မိူဝ်းၵေႃႉလဵဝ်ၵူၺ်းၼၢႆးၵေႃႈမႆႈၸႂ်ၼင်ႇၵဝ်ႇဢိူဝ်ႈ”
ယိုင်ႈလၢတ်ႈယိုင်ႈလွၵ်ႇႁႂ်ႈၶမ်းလၢဝ် ဢမ်ႇႁတ်းယၢင်ႈဢွၵ်ႇဝၢင်းႁိူၼ်းထႅင်ႈၵူၺ်း။ ၸွမ်းၼင်ႇႁႅင်းႁတ်းတႃႉ ဢၼ်ဢမ်ႇၶႂ်ႈၶၢမ်ႇယူႇတီႈၼႆႈၼၼ်ႉၵေႃႈ
“ဢမ်ႇပဵၼ်သင်ၶႃႈၼၢႆး ၶႃႈႁႃတၢင်းမိူဝ်းႁင်းၵူၺ်းလႆႈယူႇ”
ၸွင်ႇတေမိူဝ်းလႆႈႁိုဝ်ၼၼ်ႉ သိုပ်ႇလူၵႂႃႇထႅင်ႈၶႃႈ။ၸ
