တွင်ႉၾႃႉပၢင်ႇ လူမ်းၸိုၼ်ႈၵတ်းယဵၼ် သဵင်ၼူၵ်ႉႁွင်ႉမေႃးၸွမ်းႁူၺ်ႈတူၼ်းလွႆပေႉၵႅၼ်ႇလီသိူဝ်း ၸဵမ်ၸွၼ်ႈၸဵမ်ၼႆႇ လႅၼ်ႈလူၺ်းလမ်းၵၼ် ႁၼ်လႅပ်ႈလီမူၼ်ႈလီၵျေႃႇ သဵင်ႁိင်ႇႁွၵ်ႈဝူဝ်းမေႃးတွင်းတွင်းတႅင်းတႅင်း ထွမ်ႇမူၼ်ႈႁူၼႃႇ ၵူၺ်းၵႃႈ သဵင်ၵွင်ႈသဵင်မၢၵ်ႇ ဢၼ်မေႃးယူႇၸွမ်းပၢၼ်းႁူၺ်ႈလွႆတၢင်းႁွင်ႇတၢင်းၸၢၼ်းၼၼ်ႉ ပေႉမႃးငိၼ်းၵူဝ် သဵင်ၶူဝ်ၵူၺ်းပေႃးဢမ်ႇႁတ်းဢွၵ်ႇ၊ သဵင်မွၵ်ႇလၢတ်ႈၵူၺ်းပေႃးဢမ်ႇလႆႈငိၼ်း၊ သဵင်တိၼ်ၵူၼ်းလႅၼ်ႈပၢႆႈၽေး ပၼ်းၼၼ်ႈမေႃးဢူၼ်၊ သဵင်မၢၵ်ႇလူင်တူၵ်းလူင်းၼိူဝ်ၼင်လိၼ်မိူင်းၼၼ်ႉ ၸိုင်ပေႉမႃးတုမ်ႉယွၼ်ႈထိုင်ၸႂ်။
ယၢမ်းၵၢင်ၼႂ် လႅတ်ႇထွင်ႇပိူင်းမႃး တွင်ႉၾႃႉ ၸိုၼ်ႈပၢင်ႇသႂ်လီ မူၺ်လႅင်းလႄႈၶမ်းလိုၼ်း သွင်ၵေႃႉပီႈၼွင်ႉ ဢွၼ်ၵၼ်လႅၼ်ႈၸွမ်းၵိဝ်ႇၵၢင်ဝၢၼ်ႈ ပဵၼ်ဢၼ်မူၼ်ႈၵျေႃႇ မိူဝ်ႈတိုၵ်ႉလဵၼ်ႈယူႇၼၼ်ႉ သဵင်လင်ၵွင်ႈႁူၺ်ႈၵွင်ႈလွႆလူင်မေႃးမႃး ပေႃးတၢၼ်ႇပဵၼ်သဵင်ၾႃႉတႅၵ်ႇၾႃႉလင်ၼၼ်ႉယဝ်ႉ။ ၶမ်းလိုၼ်းငိၼ်းသဵင်သေ ၵိုင်ႉၵၢင်ႉတူၵ်းၸႂ်ၵူဝ်မႃးၵမ်းလဵဝ် သမ်ႉပေႃးၼင်ႈယေႃႈလူင်ၵႂႃႇ ၵူၺ်းၵႃႈ မူၺ်လႅင်းတႄႉ ဢမ်ႇလႆႈတိုၼ်ႇၵူဝ်သင် မိုင်ၸုၵ်းတူၺ်းပိူၼ်ႈ ဢၼ်ဢွၼ်ၵၼ်တိုၼ်ႇလႅၼ်ႈပၢႆႈယူႇၼၼ်ႉၵူၺ်း ယၢမ်းၼၼ်ႉ ဢူႈတင်းမႄႈၶဝ် ဢၼ်ၵႂႃႇသူၼ်မိူဝ်ႈၸဝ်ႉၼၼ်ႉၵေႃႈ လႆႈႁၼ်ၶႃပီႈၼွင်ႉ မီးယူႇၵၢင်တၢင်းၼၼ်ႉလႄႈ ၼႅတ်ႈႁွပ်ႇဢုမ်ႈဢဝ်ပွၵ်ႈမိူဝ်းၼႂ်းႁိူၼ်းၵႂႃႇ။ ၵူၺ်းၵႃႈ မူၺ်လႅင်းလႆႈႁၼ်လွင်ႈလၢၵ်ႇလၢႆး ဢၼ်ဢမ်ႇယၢမ်ႈႁၼ်သေပွၵ်ႈၼၼ်ႉ ပဵၼ်လွင်ႈဢၼ်ထၢင်ႇပိူင်ႈမႃး ၸွမ်းလူၺ်ႈ ၸင်ႇလႆႈထၢမ်ၵႂႃႇဝႃႈ
“ဢူႈ ယိင်းႁၼ်ပိူၼ်ႈလႅၼ်ႈပၢႆႈပေႃးဢူၼ်ၵႂႃႇမူတ်း ပိူၼ်ႈႁဵတ်းသင်လႃႇဢူႈ”
ၵူၺ်းၵႃႈ မၼ်းၵေႃႈ ဢမ်ႇလႆႈၶေႃႈတွပ်ႇသင်ၶိုၼ်း။ ဢူႈတင်းမႄႈၶဝ် ဢဝ်ၶႃပီႈၼွင်ႉမိူဝ်းယူႇဝႆႉၼႂ်းႁိူၼ်းယဝ်ႉ ႁႅၼ်းၶူဝ်းႁႅၼ်းလဵင်းသႂ်ႇသႃႉသႂ်ႇသွင်း၊ ႁႅၼ်းႁၢပ်ႇႁႅၼ်းၵၢၼ်းယဝ်ႉၵေႃႈ ႁိပ်ႈၼႅတ်ႈပိၵ်ႉၽၵ်းတူ မႄႈၸုင်တင်းမိုဝ်းမူၺ်လႅင်းသေႁၢပ်ႇပႃးၶူဝ်း ပေႃႈၵေႃႉၸေးဢဝ်ၶမ်းလိုၼ်းယဝ်ႉ တိဝ်ႈပႃးထူင် ဢွၼ်ဢဝ်ၽႃႇတိၼ်ယုၵ်ႉတမ်း ယဵပ်ႇယၢင်ႈၵႂႃႇၼိူဝ်လိၼ်ၼၼ်ႉ ၵမ်းယၢင်ႈ ၵမ်းယၢင်ႈ ယိုင်ႈယၢင်ႈယိုင်ႈႁၢင်ႇၵႆလင်ႁိူၼ်းၶဝ်ၼၼ်ႉ ၵႂႃႇတိၵ်းတိၵ်းယူႇယဝ်ႉ။
မူၺ်လႅင်းၵေႃႈ တူၵ်းၸႂ်ယူႇလေႃႇ ယူႇယူႇၵေႃႈ ဢွၼ်ဢွၵ်ႇဝၢၼ်ႈမႃးၸိူင်ႉၼႆ သမ်ႉပၢႆပႃးတၢင်းၶူဝ်းတၢင်းလဵင်းလူင်သေ တေၵႂႃႇတၢင်းလႂ်ၵေႃႈ ပေႃးဢမ်ႇလၢတ်ႈသေဢိတ်း
“မႄႈ! ႁဝ်းတေၵႂႃႇလႂ်လႃႇ”
“ႁဝ်းတေၵႂႃႇယူႇတီႈၵႆၵႆပုၼ်ႉ တီႈဢၼ်ဢမ်ႇလႆႈငိၼ်းသဵင်လင်လင်ၼၼ်ႉၼႃႇ”
“ၸွင်ႇမၼ်းၵျေႃႇႁိုဝ် ” သဵင်လုၵ်ႈယိင်းဢၼ်ပႃးတၢင်းယုမ်ႉတၢင်းသိူဝ်းသေလၢတ်ႈဢွၵ်ႇမႃးၼၼ်ႉ ပေႃးတၢၼ်ႇဝႃႈမိူင်းၵူၼ်းလူင်ၼႆႉ ဢမ်ႇလႆႈမီးလွင်ႈသုၵ်ႉယုင်ႈသင်ၼၼ်ႉယဝ်ႉ။
“ပေႃးဢမ်ႇၵျေႃႇၸွင်ႇယိင်းတေၶႂ်ႈၵႂႃႇႁိုဝ်”
“ဢမ်ႇၶႂ်ႈၵႂႃႇယူႇယဝ်ႉ ယူႇႁိူၼ်းႁဝ်းၵျေႃႇပေႃးတၢၼ်ႇသင် ႁဝ်းတေၵႂႃႇႁိုင်ယူႇႁႃႉမႄႈ”
“မိူဝ်ႈလႂ် သဵင်ၵွင်ႈသဵင်မၢၵ်ႇ ယဵၼ်ယဝ်ႉ ႁဝ်းၸင်ႇတေမိူဝ်းႁိူၼ်းလႆႈၼၼ်ႉယဝ်ႉ”
“မိူဝ်ႈလႂ်လႃႇမႄႈ ”
ဢမ်ႇၸႂ်ႈဝႃႈ ပဵၼ်ၶေႃႈထၢမ် မူၺ်လႅင်းၵူၺ်းၶႂ်ႈႁူႉ ပေႃႈတင်းမႄႈလႄႈ ၵူၼ်းတၢင်းမိူင်းၵေႃႈၶႂ်ႈႁူႉမိူၼ်ၵၼ်ၼၼ်ႉယဝ်ႉ။ မိူဝ်ႈလႂ်လႃႇ သဵင်ၵွင်ႈသဵင်မၢၵ်ႇ ဢူၼ်ပၼ်းၼၼ်ႈလင်ၼၼ်ႉတေယဵၼ် သဵင်မၼ်းလင်ယွၼ်ႈမေႃးထိုင်ၼႂ်းႁူဝ်ၸႂ် သမ်ႉပေႃးတိုၼ်ႇၽၢၼ်ႈၵူဝ်ႁေလူင်ၵႂႃႇမူတ်း တေယူႇၵေႃႁိုဝ်ႁတ်း ၵႃႈလႆႈႁွပ်ႇၶူဝ်းၶွင်လႅၼ်ႈပၢႆႈၽၢတ်ႇၽၢၵ်ႈယၢၼ်ၵၼ်ၵႂႃႇၵူၺ်းလေႃႇ။
ၶဝ်ပေႃႈမႄႈလုၵ်ႈၵေႃႈ ပႃးႁၢပ်ႇၶူဝ်းၶဝ်လူင်ဢွၵ်ႇၶၢဝ်းတၢင်းၵႂႃႇ ယိုင်ႈၵႂႃႇယိုင်ႈၼၵ်းမႃးတိၵ်းတိၵ်းတိၵ်း ၸင်ႇဢွၼ်ၵၼ်လိုဝ်ႈႁိူဝ်ႉ ၵိၼ်ၶဝ်ႈဝၼ်းယူႇတီႈႁိမ်းတၢင်းၼၼ်ႉယဝ်ႉ။ မိူဝ်ႈတိုၵ်ႉၼင်ႈၵိၼ်ၶဝ်ႈယူႇၼၼ်ႉ ၵိၼ်ၶဝ်ႈႁိုဝ်တၼ်းဢိမ်ႇ သဵင်မၢၵ်ႇၼၼ်ႉမေႃးမႃးၸမ်ၼႃႇယဝ်ႉ ်ႁိပ်ႈၼႅတ်ႈဢွၼ်ၵၼ်သိမ်းၶဝ်ႈသိမ်းၽၵ်းၶဝ်သေ ႁႅၼ်းၶူဝ်းယဝ်ႉသိုပ်ႇဢွၵ်ႇၶၢဝ်းတၢင်းၵႂႃႇထႅင်ႈယူႇ။ ပွၵ်ႈၼႆႉ မႄႈၵေႃႉၸေးဢဝ်လုၵ်ႈယိင်းဢွၼ်ႇလႄႈ ဢူႈၵေႃႉႁၢပ်ႇဢဝ်ၶူဝ်းၼၼ်ႉၵႂႃႇယဝ်ႉ။
လႅတ်ႇမႆႈတႅင်ႈတႅင်ႈ လူမ်းႁႅင်ႈႁႅင်ႈၼၼ်ႉ တေႁိူဝ်ႉတၢၼ်ႇႁိုဝ်ၵေႃႈ တေႃႇဢမ်ႇႁိူဝ်ႉတၢၼ်ႇ သဵင်မၢၵ်ႇလူင် ဢၼ်လႆႈငိၼ်းမေႃးၸမ်ၶဝ်ႈႁူမႃးတိၵ်းတိၵ်းလႃႈ ယိုင်ႈၵႂႃႇယိုင်ႈမေႃးလင်မႃးၸမ် ဝၢႆးသေဢွၵ်ႇယၢၼ်ၵႂႃႇ တီႈၶဝ်လိုဝ်ႈႁိူဝ်ႉၼၼ်ႉဢမ်ႇပေႃးၵႆ မၢၵ်ႇၼၼ်ႉၵေႃႈ သဵင်ၸီးၶဝ်ႈလင်မေႃးၼႂ်းႁူ ၶဝ်မႄႈလုၵ်ႈမႃးသေ ၽိူဝ်ႇဝၢႆႇလင်တူၺ်း မၢၵ်ႇဢၼ်တူၵ်းၼၼ်ႉ တိူဝ်ႉမၢတ်ႇၸပ်းသႂ်ႇ ၵေႃႉပဵၼ်ဢူႈပေႃးလူမ်ႉၼွၼ်းလူင်ၵႂႃႇၼႂ်းၵၢင်တၢင်းၼၼ်ႉယဝ်ႉ။ သဵင်ႁွင်ႉမႄႈလႄႈ သဵင်ႉႁွင်ႉမူၺ်လႅင်း လင်ၼၼ်ႈပၼ်းဢူၼ် သမ်ႉပေႃးဢမ်ႇႁူႉဝႃႈတေႁဵတ်းၸိူင်ႉႁိုဝ်ယဝ်ႉ တၢင်း ၶမ်းလိုၼ်း ဢၼ်ၼွၼ်းလပ်းယူႇၼိူဝ်လင်မႄႈၼၼ်ႉၵေႃႈ ယင်းပႆႇႁူႉသင်လူး သဵင်မၢၵ်ႇၼၼ်ႉ လင်ႁႅင်းၼႃႇလႄႈ ဢဝ်မၼ်းၽႅတ်းတိုၼ်ႇမႃးသေ ၵိုင်ႉၵၢင်ႉႁွင်ႉႁႆႈလင်ဢွၵ်ႇမႃးယူႇယဝ်ႉ။
ၶဝ်မႄႈလုၵ်ႈ ၸင်ႇဢွၼ်ၵၼ်ပုင်ႈၶဝ်ႈၵႂႃႇၵႂႃႇတူၺ်းဢူႈ ဢၼ်မၢတ်ႇၸဵပ်းၼွၼ်းမူပ်ႇဝႆႉယူႇၼၼ်ႉၵမ်းလဵဝ် မႄႈႁိပ်ႈၼႅတ်ႈၽိုၼ်ႉတူဝ်တူၺ်းယဝ်ႉ ႁွင်ႉႁႃၸူး ၵူၺ်းၵႃႈ သဵင်လူမ်းထူၺ်ႈၸႂ်ဢူႈၼၼ်ႉပေႃးဢမ်ႇငိၼ်းယဝ်ႉ။ မိုဝ်းဢွၼ်ႇလဵၵ်ႉလဵၵ်ႉ ဢၼ်လႆႈႁၼ်ဢူႈၼွၼ်းမူပ်ႇထူဝႆႉယူႇၼၼ်ႉၵေႃႈ ၵႂႃႇၶဝ်ႇၶဝ်ႇၶွၼ်းၶွၼ်းယဝ်ႉ ဢဝ်သဵင်လဵၵ်ႉလဵၵ်ႉလႅမ်လႅမ်ဢွၼ်ႇၼၼ်ႉ ႁွင်ႉပူၵ်းဢူႈႁႂ်ႈတိုၼ်ႇလုၵ်ႉမႃးၶိုၼ်းယူႇ သမ်ႉဝႃႈႁွင်ႉတၢၼ်ႇႁိုဝ်ၵေႃႈ ဢမ်ႇလႆႈငိၼ်းသဵင်သင်တုမ်ႉတွပ်ႇၶိုၼ်း တူဝ်ဢူႈၼၼ်ႉၵေႃႈ ဢမ်ႇတူင်ႉဢမ်ႇၼုင်ၸူးၶဝ်ၶိုၼ်းသေဢိတ်းယဝ်ႉလူး။ သဵင်ႁွင်ႉႁႆႈ ၶမ်းလိုၼ်းၼၼ်ႉ တုမ်ႉယွၼ်ႈထိုင်ႁူဝ်ၸႂ် ဢဝ်ၼမ်ႉတႃလႆယွႆႉဢွၵ်ႇမႃးလႄႈ သမ်ႉပေႃးဢမ်ႇၸၢင်ႈလၢတ်ႈသင်လႆႈၸွမ်း သဵင်ႁွင်ႉမူၺ်လႅင်းဢၼ်ပူၵ်းဢူႈတိုၼ်ႇယူႇတိၵ်းတိၵ်းၼၼ်ႉယဝ်ႉ။
“မႄႈ ပဵၼ်သင်လႄႈ ဢူႈႁဝ်းဢမ်ႇလၢတ်ႈတေႃႇယိင်းယဝ်ႉလႃႇ ပဵၼ်သင်လႄႈ ဢူႈဢမ်ႇလုၵ်ႉမႃးၶိုၼ်းယဝ်ႉလႃႇ ဢူႈဢမ်ႇလႆႈငိၼ်းသဵင်ယိင်းယဝ်ႉႁႃႉ” တၢင်းလၢတ်ႈ ၼမ်ႉတႃမၼ်းၵေႃႈလႆဢွၵ်ႇမႃးသမ်ႉပေႃးဢမ်ႇၵိုတ်းလႆႈၼၼ်ႉယဝ်ႉ။ မႄႈတေႁဵတ်းႁိုဝ်ဢဝ်သဵင်ၶေႃႈၵႂၢမ်းလၢတ်ႈတေႃႇယိင်းလႆႈလႃႇ တေႃႈၼင်ႇၼမ်ႉတႃမႄႈၼၼ်ႉၵူၺ်း ယင်းၸဵတ်ႉပႅတ်ႈဢမ်ႇမူတ်းလႆႈ။ သဵင်ႁွင်ႉႁႆႈ ဢၼ်ၵွင်ႈႁူၺ်ႈၵွင်ႈလွႆယူႇၼၼ်ႉ ၸွင်ႇတေမီးၽႂ်ႁူႉငိၼ်းလႆႈႁိုဝ် ဝႃႈၶဝ်ႁႆႈယွၼ်ႉသင်၊ သဵင်မၢၵ်ႇသဵင်ၵွင်ႈဢၼ်တူၵ်းလူင်းမႃးယူႇၼၼ်ႉ ၸွင်ႇတေႁပ်ႉႁူႉလႆႈႁိုဝ်ဝႃႈ မီးၵူၼ်းဢၼ်ဢမ်ႇႁူႉလွင်ႈသင်ၼၼ်ႉ လူႉတၢႆယွၼ်ႉမၼ်း၊ မၢတ်ႇၸဵပ်းယွၼ်ႉမၼ်း မၼ်းသိၵ်ႇယႃႉႁူဝ်ၸႂ်ၵူၼ်းလႄႈ လွင်ႈမူၼ်ႈသိူဝ်းၼႂ်းၸၢတ်ႈပၢၼ်ၵူၼ်းၸိူဝ်းၼၼ်ႉလႆႈလူႉႁၢႆၵႂႃႇ ႁွႆးမၢတ်ႇၸဵပ်းလူင်ၼႆႉ တေဢဝ်သင်မႃးယူတ်းယႃႁၢႆလႆႈလႃႇ လိူဝ်တေလႅၵ်ႈလၢႆႈပဵၼ်လွင်ႈၸဵပ်းသႅပ်ႇဢၼ်မီးယူႇၼႂ်းႁူဝ်ၸႂ် ဢၼ်ဢမ်ႇမီးဝၼ်းလိုမ်းလႆႈၼၼ်ႉၵူၺ်း။
တႃႇတေသိုပ်ႇယၢင်ႈၵႂႃႇတၢင်းၼႃႈ ဢမ်ႇမီးဢူႈယဝ်ႉ မႄႈၵေႃႉတေလႆႈသိုပ်ႇဢွၼ်ၵႂႃႇ ယၢပ်ႇတၢၼ်ႇႁိုဝ်ၵေႃႈ တေႃႈတေလႆႈပၢႆႈ ႁႂ်ႈသၢႆၸႂ်ပေႃးယူႇလွတ်ႈလႆႈၼၼ်ႉယဝ်ႉ။
ထိုင်ယၢမ်းဝၢႆးဝၼ်း ၽူၼ်လူင်ၵေႃႈတူၵ်းလူင်းမႃး သမ်ႉပၢႆပႃးလူမ်းထူဝ်းထွင်းသေ မႄႈၸင်ႇဢွၼ်လုၵ်ႈ ၵႂႃႇသေႃႉယူႇတီႈၼႂ်းသုမ်ႉထဵင်ယွၵ်းဢွၼ်ႇလင်ၼိုင်ႈၼၼ်ႉယူႇ သမ်ႉဝႃႈယူႇၼႂ်းသုမ်ႉၼၼ်ႉသေတႃႉ တေႃႉတႄႉယူႇလွတ်ႈၽူၼ်ၵူၺ်း ၼမ်ႉၶႃးၼၼ်ႉသမ်ႉပၢႆယွတ်ႇယွႆႉယမ်းသႂ်ႇၶဝ် ဢဝ်ၶူဝ်းပေႃးယမ်းလူင်ၵႂႃႇမူတ်း။ ၵတ်းၼႃႇတၢၼ်ႇလႂ်ၵေႃႈ တေၸၢင်ႈႁဵတ်းႁိုဝ် ၶူဝ်းလဵင်းဢၼ်ဢဝ်မႃးၼၼ်ႉ ယင်းယမ်းပႃးလူး သင်တေလၢႆႈၵႂႃႇ တေယမ်းထႅင်ႈၵူၺ်း။ ယိုင်ႈပႂ်ႉၽူၼ်ႁိူတ်ႇ ယိုင်ႈလပ်းသိင်ႇမႃးတိၵ်းတိၵ်း ယိုင်ႈလပ်းသိင်ႇမႃး ၽူၼ်သမ်ႉယႂ်ႇမႃးထႅင်ႈ ၶဝ်မႄႈလုၵ်ႈ ႁိုဝ်တေၸၢင်ႈသိုပ်ႇဢွၵ်ႇၶၢဝ်းတၢင်းၼၼ်ႉလႆႈထႅင်ႈယဝ်ႉလႃႇ ၶမ်ႈၶိုၼ်းၼႆႉ ႁူႉၵႃႈတေလႆႈလိုဝ်ႈၼႂ်းသုမ်ႉထဵင်ယွၵ်းဢွၼ်ႇၼႆႉၵူၺ်းၼၼ်ႉယဝ်ႉ။
မႄႈလႆႈႁၼ်လုၵ်ႈတၢင်းသွင်ၼၼ်ႉ ၵတ်းလၢင်ႈသမ်ႉပေႃးသၼ်ႇတိုၼ်းတိုၼ်း ၸင်ႇၵွတ်ႇဢဝ်လုၵ်ႈမႃးယူႇၼႂ်းဢွင်ႈၵွတ်ႇမၼ်းၵႂႃႇယူႇ ၶမ်ႈၶိုၼ်းၵေႃႈလပ်းသိင်ႇၵႂႃႇတိၵ်းတိၵ်း ၽူၼ်လူင်လူမ်းလူင်ၵေႃႈ လူင်းမႃးဢမ်ႇထၢတ်ႇဢမ်ႇဝၢႆး သဵင်ၾႃႉတႅၵ်ႇၾႃႉလင်ၵေႃႈ လင်မေႃးၸွမ်းမႃးယူႇယဝ်ႉ မိူၼ်ဝႃႈ သဵင်ၼၼ်ႉ မၼ်းလင်မိူၼ်ၼင်ႇမိူဝ်ႈၵၢင်ဝၼ်းၼၼ်ႉလႄႈ ႁဵတ်းႁႂ်ႈ မူၺ်လႅင်းတိုၼ်ႇၵူဝ်မႃးထႅင်ႈသေ ၵွတ်ႇဝႆႉမႄႈမၼ်းသမ်ႉပေႃးမၼ်ႈတဵင်ႈတဵင်ႈယဝ်ႉ။
“မႄႈ ယိင်းၵူဝ်” ၶမ်းလိုၼ်းဢၼ် ဢမ်ႇပႆႇႁူႉၵႂၢမ်းသင်ၼၼ်ႉၵေႃႈ ႁၼ်ပီႈမၼ်းၵွတ်ႇမႄႈမၼ်းယဝ်ႉ ၼႅတ်ႈၵွတ်ႇၶဝ်ႈသႂ်ႇထႅင်ႈသေ လၢတ်ႈၸွမ်းပီႈၼၢင်းမၼ်းယဝ်ႉ
“မႄႈ ယိင်းၵေႃႈၵူဝ်”
“ဢမ်ႇပဵၼ်သင်ယဝ်ႉလုၵ်ႈယိင်း မၼ်းပဵၼ်သဵင်ၾႃႉလင်ၵူၺ်း မၼ်းဢမ်ႇမႃးႁဵတ်းသင်ႁဝ်းလႆႈလေႃႇ မီးမႄႈယူႇ ယႃႇပေၵူဝ်”
ၶမ်းလိုၼ်းဢွၼ်ႇၼၼ်ႉ မိူၼ်ဝႃႈ ဢမ်ႇလႆႈႁၼ်ဢူႈၶဝ်မႃးႁိုင်ယဝ်ႉလႄႈ
“မႄႈ ဢူႈႁဝ်းလူး တေမႃးမိူဝ်ႈလႂ်” မိူဝ်ႈလႆႈငိၼ်း လုၵ်ႈယိင်းဢွၼ်ႇမၼ်း ထၢမ်ႁႃဢူႈၶဝ်ၼၼ်ႉ မႄႈၵေႃႈ ႁိုဝ်တွပ်ႇပၼ်လႆႈၵမ်းလဵဝ်လႃႇ ၼမ်ႉတႃၼၼ်ႉၵေႃႈၸိုမ်ႉယမ်းလႆဢွၵ်ႇမႃးတီႈႁူၺ်ႇတႃမႄႈၼၼ်ႉသေ ယွတ်ႇသႂ်ႇၼိူဝ်ၵႅမ်ႈဢွၼ်ႇလုၵ်ႈယိင်းမၼ်း သမ်ႉပေႃးၵတ်းလၢင်ႈတီႈၼိူဝ်ၼႃႈမႃးလႄႈ ၼႅတ်ႈဝၢႆႇၶိုၼ်ႈတူၺ်း ႁၼ်ၼႃႈမႄႈယမ်းဝႆႉယူႇယဝ်ႉ။
“ၽူၼ်တူၵ်းသႂ်ႇၼႃႈမႄႈယမ်းမူတ်းယဝ်ႉ” ဢဝ်မိုဝ်းလဵၵ်ႉလဵၵ်ႉဢွၼ်ႇမၼ်းၼၼ်ႉၸဵတ်ႉပၼ်ၵႂႃႇယူႇ။
ၶမ်ႈၶိုၼ်းၼႆႉ ၽူၼ်ဢၼ်ဝႃႈတူၵ်းႁႅင်းၼႃႇၼၼ်ႉ ယင်းဢမ်ႇႁႅင်းတၢၼ်ႇၼမ်ႉတႃဢၼ်လႆႈယွတ်ႇလႆလူင်းမႃးၼၼ်ႉလႃႈ၊ သဵင်ၾႃႉဢၼ်လင် ၵွင်ႈႁူၺ်ႈၵွင်ႈလွႆဢၼ်ငိၼ်းၵႂၢင်ႈၵႆၼႃႇၼၼ်ႉ ယင်းဢမ်ႇလင်တၢၼ်ႇ သဵင်မၢၵ်ႇဢၼ်မေႃးမႃးမိူဝ်ႈၵၢင်ဝၼ်းၼၼ်ႉလူးၵွၼ်ႇ။ သမ်ႉဝႃႈပဵၼ်သုမ်ႉၶႃးဢၼ်မီးၽူၼ်ႁူဝ်ႈပွင်ႇယမ်းၼႆသေတႃႉ တွၼ်ႈတႃႇၶဝ်မႄႈလုၵ်ႈၼၼ်ႉ ၼႂ်းၶမ်ႈၼႆႉ ပဵၼ်ၶမ်ႈၶိုၼ်းဢၼ် ပၼ်လွင်ႈလွတ်ႈၽေးတွၼ်ႈတႃႇၶဝ်ယူႇယဝ်ႉ။ မၼ်းတေလွတ်ႈၽေးလႆႈတၢၼ်ႇႁိုဝ်လႃႇ တၢင်းလၢင်ႈတၢင်းၵတ်း တေႃႈၼင်ႇဢွင်ႈဢူၵ်းဢၼ် ပၼ်လွင်ႈဢုၼ်ႇၸႂ်မႄႈၼၼ်ႉ ၶူတ်းၶဝ်ႈတၢၼ်ႇႁိုဝ်ၵေႃႈယင်းဢမ်ႇႁဵတ်းႁႂ်ႈဢုၼ်ႇမႃးလႆႈလူး။ လွင်ႈဢၼ်ၶဝ်မႄႈလုၵ်ႈ လႆႈၼွၼ်းၵတ်းယူႇၼႂ်းသုမ်ႉထဵင်ၼႆႉ ၽႂ်ႁိုဝ်ႁပ်ႉႁူႉလႆႈလႃႇ ၵူၼ်းဢၼ်ၼွၼ်းၼိူဝ်ၽႃႈၵွပ်းႁူမ်ႇၼႃလူင်ဢၼ်ဢူၼ်ႈယုမ်ႈယုမ်ႈၼၼ်ႉ ယိုင်ႈၶႅၼ်းတေဢမ်ႇႁပ်ႉႁူႉလႆႈယဝ်ႉ။
ယၢမ်းၵၢင်ၼႂ် ၼႃႈၾႃႉၼႃႈမိူင်းမိုတ်းမူဝ်း မွၵ်ႇၵုမ်ႈသုမ်ႇတၼ် ၽူၼ်ဢွႆယွႆးယွႆး မိူင်းလႅင်းသေတႃႉ ႁိုဝ်ႁၼ်လႆႈတွင်ႉၾႃႉလႄႈ တႃဝၼ်း ဢၼ်ၸိုၼ်ႈပၢင်ႇမိူၼ်ၵူႈဝၼ်းၼၼ်ႉယဝ်ႉလႃႇ လုၵ်ႉမႃးယဝ်ႉၵေႃႈ ႁွင်ႉႁႃဢူႈဢၼ်ယၢမ်ႈမီးယူႇႁိမ်းၸမ်တႃႇသေႇၼၼ်ႉၵေႃႈႁိုဝ်ႁၼ် ပၼ်ဢဝ်ၼမ်ႉတႃလႆယွႆႉယွတ်ႇတူၵ်းၵႂႃႇၵူၺ်းယဝ်ႉ။
သဵၼ်ႈတၢင်းပႆဢၼ်ယၢဝ်းလူင်ၵႂႃႇ ဢမ်ႇမုင်ႈႁၼ်တီႈသုတ်းတိူၵ်ႈၼၼ်ႉ မူၺ်လႅင်းၵေႃႈ
“မႄႈ! ဢူႈႁဝ်းဢမ်ႇမႃးၸွမ်းႁဝ်းလႆႈယဝ်ႉ ႁဝ်းတေၵႂႃႇတၢင်းလႂ်ထႅင်ႈယဝ်ႉလႃႇ”
“ၵႂႃႇယူႇတီႈဢၼ်ႁဝ်းတေလွတ်ႈၽေးၼၼ်ႉၼႃႇ”
“မိူဝ်ႈလႂ်တေထိုင်လႃႇ ယိင်း ၶႂ်ႈမိူဝ်းႁိူၼ်းၵူၺ်းယဝ်ႉ”
“ႁဝ်းတေႁဵတ်းႁိုဝ်မိူဝ်း ႁိူၼ်းႁဝ်းပူၼ်ႉမႃးပေႃးၵႆၼႃႇယဝ်ႉ”
“ႁဝ်းမႃးၵႆပေႃးတၢၼ်ႇၼႆႉ ပေႃးပိူၼ်ႈဢဝ်ႁိူၼ်းႁဝ်းတေႁဵတ်းႁိုဝ်လႃႇ ပေႃးႁဝ်းဢမ်ႇမီးတီႈယူႇယဝ်ႉ ႁဝ်းတေလႆႈယူႇတီႈလႂ်လႃႇမႄႈ ယိင်းဢမ်ႇၶႂ်ႈၵႂႃႇယဝ်ႉ ယိင်းၶႂ်ႈမိူဝ်းႁိူၼ်း”
“ပႂ်ႉသဵင်ၵွင်ႈသဵင်မၢၵ်ႇယဵၼ်ၵွၼ်ႇလႄႈ ႁဝ်းၸွင်ႇၵွႆႈမိူဝ်းၶိုၼ်း ”
“မိူဝ်ႈလႂ်လႃႇမႄႈ မိူဝ်ႈလႂ်မၼ်းတေယဵၼ်လႃႇ တေႃႇသဵင်ယဵၼ်ၵေႃႈ ပိူၼ်ႈပေႃးဢဝ်ႁိူၼ်းႁဝ်းယဝ်ႉဢမ်ႇႁူႉ ႁဝ်းတေဢမ်ႇမီးတီႈယူႇယဝ်ႉၼႃမႄႈ ၵႂႃႇလႃႈႁဝ်းမိူဝ်းႁိူၼ်းၶိုၼ်း”
“ၵႂႃႇထႅင်ႈဢိတ်းၼိုင်ႈၵေႃႈတေထိုင်ယဝ်ႉၼႃႈ ယဵၼ်ႉၸႂ်ၽွင်ႈလႄႈ”
ၵႂႃႇထႅင်ႈဢမ်ႇႁိုင်သင် ႁွတ်ႈၵႂႃႇတီႈယူႇၵူၼ်းပၢႆႈၽေး ဢၼ်မီးၵူၼ်းပေႃးတဵမ်ၵႂႃႇသဵင်ႈလႄႈ သဵင်ဢူၼ်ပၼ်းၼၼ်ႈလူင်ၵႂႃႇမူတ်းၼၼ်ႉယဝ်ႉ။
“မႄႈဢွၼ်ႁဝ်းမႃးတီႈၼႆႈႁဵတ်းသင်လႃႇ ႁဝ်းမီးႁိူၼ်းယူႇ ပဵၼ်သင်တေလႆႈမႃးယူႇတီႈၼႆႈလႃႇ ယိင်းၶႂ်ႈမိူဝ်းႁိူၼ်း ယိင်းဢမ်ႇၶႂ်ႈယူႇတီႈၼႆႈ”
“ဢမ်ႇၶႂ်ႈယူႇႁိုဝ်လႆႈ မိူဝ်ႈလဵဝ် ႁဝ်းပၢႆႈၽေးမႃးလူး တီႈႁိူၼ်းႁဝ်းၼၼ်ႉ ယင်းတိုၵ်ႉမီးၽေးၶဵၼ်ယူႇ ႁဝ်းဢမ်ႇၸၢင်ႈမိူဝ်းၼႃ”
ဢွၼ်လုၵ်ႈမၼ်းယဵပ်ႇယၢင်ႈၶဝ်ႈၵႂႃႇၼႂ်းပိုၼ်ႈတီႈၸိူဝ်းၼၼ်ႉသေ လိုဝ်ႈႁိူဝ်ႉၶဝ်ၵႂႃႇယူႇယဝ်ႉ။ ယွၼ်ႉ ပိုၼ်ႉတီႈၸိူဝ်းၼၼ်ႉ ၵူၼ်းၼမ်လႄႈ မၼ်းဢမ်ႇလႆႈမိူၼ်ယူႇတီႈႁိူၼ်းၶဝ်ၼၼ်ႉသေဢိတ်း ၼႂ်းၸႂ်မူၺ်လႅင်းၼၼ်ႉ ၸႂ်တိတ်းႁိူၼ်းယူႇတိၵ်းတိၵ်းၵူၺ်း။
“မႄႈ ပဵၼ်သင်လႄႈႁဝ်းလႆႈမႃးယူႇတီႈၸိူင်ႉၼႆလႃႇ ယူႇတီႈႁိူၼ်းႁဝ်းမီးၵူႈလွင်ႈ ၶႂ်ႈၵိၼ်သင်ၵေႃႈလႆႈၵိၼ် ၶႂ်ႈၼွၼ်းၸိူင်ႉႁိုဝ်ၵေႃႈၼွၼ်း တီႈႁိူၼ်းႁဝ်းၶႅမ်ႉပေႃးတၢၼ်ႇၼၼ်ႉ ႁဝ်းတေလႆႈမႃးယူႇၸိူင်ႉၼႆထႅင်ႈႁိုင်ၵႃႈႁိုဝ်လႃႇမႄႈ ၸွင်ႇထိုင်တေႃႇယိင်းၵေႃႉယႂ်ႇလႆႈႁိုဝ် ယိင်းၸႂ်ထိုင်ႁိူၼ်းၼႃႇယဝ်ႉ”
“ႁိူၼ်းႁဝ်း မၼ်းဢမ်ႇလွတ်ႈၽေးမိူၼ်မိူဝ်ႈဢွၼ်တၢင်းယဝ်ႉၼႃလုၵ်ႈ မၼ်းတေဢမ်ႇမိူၼ်ၵဝ်ႇယဝ်ႉ”
“ပဵၼ်သင်လႄႈ မၼ်းဢမ်ႇမိူၼ်ၵဝ်ႇလႃႇ တေႃႇထိုင်ႁဝ်းလႆႈမိူဝ်းၶိုၼ်း ပိူၼ်ႈပေႃးတေဢဝ်ႁိူၼ်းႁဝ်းမူတ်းယဝ်ႉဢမ်ႇႁူႉ ႁိူၼ်းႁဝ်းပေႃးတေၵွႆမူတ်းယဝ်ႉ ယိင်းတေလႆႈႁဵတ်းၸိူင်ႉႁိုဝ် ၸင်ႇတေလႆႈပွၵ်ႈမိူဝ်းႁိူၼ်းလႃႇ”
မိူဝ်ႈလႂ်လႃႇ သဵင်ၼၼ်ႉတေတဵတ်ႇယဵၼ်၊ မိူဝ်ႈလႂ်လႃႇ ၽေးသိုၵ်းၽေးသိူဝ်ၼၼ်ႉတေႁၢႆၵႂႃႇ၊ မိူဝ်ႈလႂ်လႃႇ တေလႆႈယူႇႁိူၼ်းဢၼ်ၵတ်းယဵၼ်ၸႂ်၊ မိူဝ်ႈလႂ်လႃႇ တေလႆႈႁဵတ်းၼႃႈၵၢၼ်တႃငၢၼ်းၼၼ်ႉလီလီ၊ တေႃႇထိုင်ပၢၼ်လႂ် တေႃႇထိုင်မိူဝ်ႈလႂ်လႃႇ တေလႆႈပူၼ်ႉၸၢတ်ႈပၢၼ်ဢၼ်လႆႈ ႁွပ်ႇၶူဝ်းပၢႆႈၸွၵ်ႉပၢႆႈၸဵင်ႇယူႇ တေမီးၽူႈႁတ်းႁၢၼ်ၵေႃႉလႂ် မႃးၸွႆႈထႅမ်လႃႇ၊ တေမီးၽူႈၵတ်ႉၶႅၼ်ႇၵေႃႉလႂ်မႃးပူၵ်းပွင်ပၼ်လႃႇ၊ တေမီးၽူႈမီးၼမ်ႉၵတ်ႉၵေႃႉလႂ် တေမႃးၵႄႈပၼ်ႁႃၼႆႉလႆႈလႃႇ၊ တေမီးၽူႈမၢၵ်ႈမီးၵေႃႉလႂ် မႃးၵမ်ႉၸွႆႈ မၼ်းၵေႃႈပဵၼ်လွင်ႈမုင်ႈမွင်းဢၼ်ပဵၼ်လူမ်းပဵၼ်လႅင်ႉၵူၺ်း မုင်ႈမွင်းယူႇၵေႃႈ ႁဝ်းဢမ်ႇလႆႈသင်မႃး ၵူၺ်းၵႃႈ ပေႃးဝႃႈတူဝ်ႁဝ်းလူင်းမိုဝ်းႁဵတ်းသၢင်ႈၸိုင် ယူဝ်ၶေးၸၢင်ႈပဵၼ်ၵူၼ်းဢၼ်ႁဝ်းမုင်ႈမွင်းယူႇၼၼ်ႉၵေႃႈပဵၼ်လႆႈယဝ်ႉ။
သင်ဝႃႈၽူႈလူဢၢၼ်ႇႁဝ်း ပဵၼ်မူၺ်လႅင်းလူး ၼင်ႇႁိုဝ်တေပွၵ်ႈမိူဝ်းႁိူၼ်းလႆႈၼၼ်ႉတေႁဵတ်းႁိုဝ်?၊ ႁိူၼ်းၸဝ်ႈၵဝ်ႇဢၼ်မီးတဵမ်ထူၼ်ႈၵူႈလွင်ႈၼၼ်ႉ တေၵႅတ်ႇၶႄမၼ်းဝႆႉၸိူင်ႉႁိုဝ် ၼင်ႇႁိုဝ်ပိူၼ်ႈပေႃးတေဢမ်ႇၸၢင်ႈမႃးဢဝ်ၵႂႃႇ၊ ၼင်ႇႁိုဝ်ပေႃးတေပွၵ်ႈမိူဝ်းႁိူၼ်းႁႂ်ႈလွတ်ႈၽေးလႄႈ ယူႇလႆႈလွတ်ႈလွတ်ႈလႅဝ်းလႅဝ်းၼၼ်ႉ တေႁဵတ်းၸိူင်ႉႁိုဝ်? ၽူႈလူလိၵ်ႈႁဝ်းၶဝ် ၸွင်ႇတေၸွႆႈႁႃတၢင်းဢွၵ်ႇပၼ်မူၺ်လႅင်းလႆႈၶႃႈႁိုဝ်။
သုတ်းယဝ်ႉ…
တွၼ်ႈသိုပ်ႇမၼ်းတႄႉ ယူႇတီႈၽူႈလူလိၵ်ႈႁဝ်းၶဝ်ၵူၺ်း တေႁႂ်ႈၶိုၼ်းပွၵ်ႈမိူဝ်းႁိုဝ် သိုပ်ႇယူႇ ၼၼ်ႉ ယုမ်ႇယမ်ဝႃႈၽူႈလူလိၵ်ႈႁဝ်းၶဝ် တေႁႃတၢင်းဢွၵ်ႇပၼ်လႆႈယူႇ။
ၼပ်ႉယမ်ထိုင်ၽူႈလူလိၵ်ႈႁဝ်းၶဝ်ယူႇဢေႃႈ
သင်ဝႃႈမၼ်းမီးတီႈၽိတ်းၵေႃႈ ၶႅၼ်းတေႃႈၸွႆႈၸီႉၸမ်ႈမူၼ်ႉမႄးပၼ်ၵႂႃႇသေၵမ်း
ပၢႆၵမ် ငဝ်မွင်မိုတ်းမူဝ်း
