မူၺ်လႄႈဢူၺ်းၵေႃႉ ထႆႇၶႅပ်းႁၢင်ႈပၼ်ၵၼ်၊ ဢူၺ်းၵေႃႉမူၺ် လႆႈႁၼ်ၽူႈၸၢႆးလဝ်းၵေႃႉၼိုင်ႈဢုပ်ႇၾူၼ်းသေပႆမႃးတၢင်းၶႃ မၼ်းၸင်ႇႁႂ်ႈမူၺ် သုတ်ႉၵႂႃႇယူႇၸမ်ၸမ်ၵၼ် ၼင်ႇတင်ႈၸႂ် မူၺ်ၵေႃႈဢမ်ႇႁူႉ မိူဝ်ႈပၢၵ်ႈၶူၼ်ႁူဝ်ၼၼ်ႉ သမ်ႉတုမ်ႉၺႃးၵူၼ်းၵေႃႉၼၼ်ႉလႄႈ ၶုၼ်ႇဝၢႆႇၼႃႈတူၺ်း သၢႆတႃတုမ်ႉၺႃးၵၼ် မိုင်ယၵ်ႉတူၺ်းၵၼ်ၵႂႃႇၵႅပ်ႉၼိုင်ႈ။
ဢူၺ်းၵေႃႉမူၺ်ၵေႃႈ လၢတ်ႈႁႂ်ႈၶမ်းပၢင်ႇထႆႇပၼ်ၶႅပ်းႁၢင်ႈၶႃၸွမ်းၵၼ် ၶမ်းပၢင်ႇၵေႃႈ တင်းထႆႇတင်းတူၺ်းၼႂ်းၾူၼ်းၼၼ်ႉသေမိူၼ်ႇမိုင်လူင်ၵႂႃႇ၊ မိူဝ်ႈၼၼ်ႉ ၾႆးၾူၼ်းသမ်ႉသဵင်ႈပႅတ်ႈ လႆႈဢဝ်ၾူၼ်းၶမ်းပၢင်ႇထႆႇပၼ်၊ တွၼ်ႈတႃႇသူင်ႇၶႅပ်းႁၢင်ႈပၼ်ၶိုၼ်းၼႆလႄႈ ၶမ်းပၢင်ႇလႄႈမူၺ် လႅၵ်ႈတီႈၵပ်းသိုပ်ႇၵၼ်ယူႇယဝ်ႉ။
ၵၢင်ၶမ်ႈၵေႃႈၶမ်းပၢင်ႇလႆႈသူင်ႇၶႅပ်းႁၢင်ႈၸူးမူၺ်သေ ၶႃၵေႃႈဢုပ်ႇၵၼ်တင်းၶိုၼ်း သူင်ႇၶေႃႈၵႂၢမ်းလၢတ်ႈတေႃႇၵၼ် ယုမ်ႉၸူမ်းသိူဝ်း ႁိုင်ႁိုင်မႃးၵေႃႈ သမ်ႉပေႃးလႆႈလၢႆႈသီ Chat ပဵၼ်သီၶွင်ႇ ၵႂႃႇယဝ်ႉ။
ၵူၺ်းၵႃႈ ၶမ်းပၢင်ႇၼႆႉသမ်ႉ ပဵၼ်ၵူၼ်းဢၼ်မၵ်ႉလဝ်ႈလႄႈ ၵႆႉလႄႇၵႆႉလၢဝ်းဝႆႉသေ ပေႃးဢူၺ်းၵေႃႉၸူဝ်းလႄႇၼႆတႄႉ ဢမ်ႇတွၼ်ႉထဵင်သေပွၵ်ႈ ထဵင်ၸူႉတႄႉလႆႈယူႇ ထဵင်ဢူၺ်းၵေႃႉတႄႉလူဝ်ႇၽိတ်းႁူဝ်ၵၼ်ယဝ်ႉ။ မူၺ်ၵေႃႈ ယွမ်းသေပၼ်မၼ်းၵႂႃႇလွတ်ႈလွတ်ႈလႅဝ်းလႅဝ်းယူႇ။
မၢင်ပွၵ်ႈၵေႃႈလၢတ်ႈမူၺ် မၢင်ပွၵ်ႈၵေႃႈဢမ်ႇလၢတ်ႈ၊ ပေႃးမူၺ်သိုပ်ႇၾူၼ်းၸူးဢမ်ႇႁပ်ႉတႄႉ ပွင်ႇဝႃႈမီးယူႇၸွမ်းဢူၺ်းၵေႃႉယဝ်ႉ၊ ၽိူဝ်ႇမဝ်းမႃး သမ်ႉသိုပ်ႇၾူၼ်းႁႃမူၺ် ၾွင်းတိုၵ်ႉၼွၼ်းလပ်းလီယူႇ မူၺ်ၵေႃႈလႆႈႁပ်ႉႁေထွမ်ႇမၼ်းၸၢႆးဢုပ်ႇယူႇတင်းၶိုၼ်း။
ဝၼ်းၼိုင်ႈမူၺ်ဢၢင်ႈသူင်ႇၶေႃႈၵႂၢမ်း “ႁဝ်းၵႂႃႇလႄႇၼေႃႈ ” ၵူၺ်းၵႃႈ မီးၶေႃႈၵႂၢမ်းလၢတ်ႈမႃးဢွၼ်တၢင်းဝႃႈ “ႁဝ်းၵႂႃႇလႄႇၸွမ်းဢူၺ်းၵေႃႉၼႃႈ”
“ဢေႃႈၶႃႈ”
မူၺ်ၵေႃႈလႆႈၸူဝ်းဢူၺ်းၵေႃႉသေၵႂႃႇလႄႇယဝ်ႉ။
တီႈၼႂ်းၵၢတ်ႇၵၢင်ၶမ်ႈၵူၼ်းၵိုၼ်း မူၺ်မိူၼ်တေႁၼ်ၶမ်းပၢင်ႇသေ ႁႅၼ်မုင်ႈတူၺ်းၸွမ်း လူၺ်ႈသီၼႃႈ တူၵ်းၸႂ်လႄႈၵူဝ် မီးလွင်ႈဢမ်ႇႁၢၼ်ႉၸႂ်ပႃး ၵူမ်ႈၼႃႈၵမ်ႉၼိုင်ႈ ၶိုၼ်းတူၺ်းႁႂ်ႈယုမ်ႇၸႂ် ငွၵ်ႈၶေႃးသွၵ်ႈႁႃတူၺ်း ၵူၺ်းသမ်ႉဢမ်ႇလႆႈႁၼ်ယဝ်ႉ ဢူၺ်းၵေႃႉၼႅတ်ႈၸူဝ်းၵႂႃႇသိုဝ်ႉတၢင်းၵိၼ်ပႅတ်ႈ။
ၶမ်ႈၼၼ်ႉမူၺ်ၼွၼ်းသေသူင်ႇၶေႃႈၵႂၢမ်းဝႃႈ “ႁဝ်းၼွၼ်းယဝ်ႉၼႃႈ ၾၼ်လီ” ပႂ်ႉတူၺ်းၶမ်းပၢင်ႇတေတွပ်ႇၶိုၼ်းယူႇ ၵူၺ်းၵႃႈ ဢမ်ႇမီးသင်တွပ်ႇၸူး။
တေႃႇထိုင်ၵၢင်ဝၼ်းမူၺ်ၼင်ႈငဝ်သေ သိုပ်ႇၾူၼ်းၸူး ၶမ်းပၢင်ႇၵူၺ်းသမ်ႉဢမ်ႇႁပ်ႉ၊ မူၺ်မႆႈၸႂ်သေ သူင်ႇၶေႃႈၵႂၢမ်းၵႂႃႇ “ဢမ်ႇယူႇလီႁႃႉ ပဵၼ်သင်လႃႇ” ၶမ်းပၢင်ႇတွပ်ႇၸူး “ဢမ်ႇပဵၼ်သင် ႁဝ်းႁဵတ်းၵၢၼ်ယူႇ”
မိူဝ်ႈမူၺ်ႁေႃႈလူတ်ႉသေၼမ်ႉမၼ်းလူတ်ႉမူတ်းၸွမ်းတၢင်း သိုပ်ႇၾူၼ်းၸူးၶမ်းပၢင်ႇၵေႃႈဢမ်ႇလႆႈ မၼ်းသမ်ႉပေႃးလႆႈဢီးလူတ်ႉမိူဝ်းႁင်းၵူၺ်း။
မိူဝ်ႈမူၺ်တိုၵ်ႉၼွၼ်းလပ်းယူႇၼၼ်ႉ ဢူၺ်းၵေႃႉၽႃၽိူဝ်းၶမ်းပၢင်ႇဢၼ်မဝ်းၼၼ်ႉမႃးႁႃမူၺ်၊ ၶမ်းပၢင်ႇမဝ်းလဝ်ႈဢေႃႉႁၢၵ်ႈ မူၺ်လႆႈၽဵဝ်ႈပၼ်လႄႈ တူၺ်းထိုင်ႁူမ်ႇၽႃႈပၼ် ပႂ်ႉတူၺ်းမၼ်းၼွၼ်းလပ်းလႄႈ မွတ်ႇၾႆးပၼ်ယဝ်ႉၸင်ႇၼွၼ်းလႆႈ။
ဝၼ်းယဝ်ႉဝၼ်း ၶမ်းပၢင်ႇၵိၼ်လဝ်ႈမဝ်း မူၺ်လႆႈႁွင်ႉမိူဝ်းႁိူၼ်း၊ မၢင်ပွၵ်ႈမဝ်းလဝ်ႈ ၼင်ႈဢိင်ၼႃႈၽၵ်းတူႁွင်ႈမူၺ်သေ မူၺ်မႅၵ်ႇၶဝ်ႈႁွင်ႈၵေႃႈမီး။
ဝၼ်းၼိုင်ႈသိုပ်ႇၾူၼ်းမိူဝ်းတၢင်းႁိူၼ်း မႄႈဢမ်ႇယူႇလီ သိမ်းၶူဝ်းသိမ်းလဵင်းမၼ်းသေ သိုပ်ႇၾူၼ်းႁွင်ႉၶမ်းပၢင်ႇ ၵူၺ်းၵႃႈ သမ်ႉမႅၼ်ႈမိူဝ်ႈ ၶမ်းပၢင်ႇတိုၵ်ႉၼင်ႈၵိၼ်လဝ်ႈၵဝ်းသၢဝ်ယူႇ။
မူၺ်သူင်ႇၶေႃႈၵႂၢမ်းၸူးၶမ်းပၢင်ႇ လူၺ်ႈသီၼႃႈ ဢမ်ႇလီ
“မႄႈႁဝ်းၶိုၼ်ႈႁူင်းယႃဝႆႉယူႇ မိူဝ်ႈၽုၵ်ႈႁဝ်းတေမိူဝ်းႁိူၼ်းယဝ်ႉၼႃႈ” ၼွၼ်းၶမ်တင်ႇၼင်ႈပႂ်ႉၶမ်းပၢင်ႇ မွင်းတူၺ်းၾူၼ်း ယၢမ်းၵၢင်ၶိုၼ်းဢၼ်လပ်းသိင်ႇ။
မူၺ်တိုၼ်ႇမႃး ဢမ်ႇလႆႈႁၼ်ၶမ်းပၢင်ႇတွပ်ႇၶေႃႈၵႂၢမ်းလႄႈ ဢမ်ႇတူၺ်း မူၺ်ပႃးဢဝ်ၶူဝ်းသေ ယိပ်းၾူၼ်းယဝ်ႉ မွတ်ႇၶေႃႈၵႂၢမ်းမိူဝ်ႈဝႃးၼၼ်ႉလႄႈမႄးတွပ်ႇၶေႃႈၵႂၢမ်းၵႂႃႇၶိုၼ်း။
ၶမ်းပၢင်ႇတိုၼ်ႇမႃးတီႈႁိူၼ်းဢူၺ်းၵေႃႉ ဢၼ်မီးၽႃႈႁူမ်ႇသုမ်ႇၼႃႈဝႆႉၼၼ်ႉသေ တၢဝ်းႁႃၾူၼ်းမၼ်း ႁႅင်းၾူၼ်းသမ်ႉမူတ်း ဢဝ်ပႅတ်ႈဝႆႉၼိူဝ်ၽိူၼ်ၼၼ်ႉယဝ်ႉ၊ ၼႅတ်ႈၵႂႃႇႁႃႁဵတ်းၵၢၼ်မၼ်းယူႇ။
ၵၢင်ၶမ်ႈ သၢင်းၾူၼ်းတဵမ်ယဝ်ႉ ၽုၺ်ႇတူၺ်းၾူၼ်း ႁၼ်ၶေႃႈၵႂၢမ်း မူၺ်သူင်ႇမႃး ဢမ်ႇတူၺ်းၵမ်းလဵဝ် ဢၢပ်ႇၼမ်ႉဢၢပ်ႇသင်ယဝ်ႉ ၾုၺ်ႇတူၺ်းၸင်ႇလႆႈႁၼ် ၶေႃႈၵႂၢမ်းဢၼ်ဝႃႈ
“သူဢမ်ႇလႆႈမီးၵႃႈၶၼ်ထိုင်တီႈ ႁဝ်းတေလႆႈၸွမ်းသေလၢႆယူႇယဝ်ႉ ႁဝ်းၶၢတ်ႇၵၼ်လႃႈ”
မၼ်းၸင်ႇ သိုပ်ႇၾူၼ်းၸူးမူၺ်ယူႇလၢႆၵမ်း၊ လၢတ်ႈၶေႃႈၵႂၢမ်းယွမ်းၼွမ်းၵေႃႈဢမ်ႇတွပ်ႇ၊ မိူဝ်းႁႃတီႈႁွင်ႈၵေႃႈ လွၵ်ႉၽၵ်းတူဝႆႉ ဢမ်ႇႁူႉမူၺ်ၵႂႃႇတၢင်းလႂ် ၼင်ႈဢိင်ၽၵ်းတူၼင်ႇၵူၼ်းဢမ်ႇမီးႁႅင်းႁိူဝ်ႉဢူၼ်ႈ တိူဝ်ႉၸႂ်ၼႃႇ ၼင်ႈပွႆႇၾူၼ်းမၼ်းဝိူဝ်ယူႇၼိူဝ်ပိုၼ်ႉၼၼ်ႉသေယဝ်ႉ။
သုတ်းယဝ်ႉ
တႅမ်ႈ-သႅၼ်ငဝ်း
28.02.2025
