သႅင်ၸိုၼ်ႈ ပဵၼ်ၽူႈၸၢႆးၼႃႈတႃႁၢင်ႈၽၢင်ငၢမ်းလဝ်း ၽႂ်ႁၼ်ၵေႃႈၸႂ်ၸပ်းၸွမ်းတၢင်းႁၢင်ႈလဝ်းမၼ်း ပေႃးဝႃႈ ၼုင်ႈသုပ်းသႂ်ႇသိူဝ်ႈၶူဝ်းသိုၵ်းၼႆ ၶႅၼ်းလဝ်းပေႃးဢမ်ႇၸၢင်ႈလၢတ်ႈ၊ ၵႂႃႇတၢင်းလႂ် သၢဝ်ၼႆႉဢမ်ႇတွၼ်ႉထၢမ်ႁႃ မႃးႁႃႁင်းၵူၺ်းလၢႆလၢႆ။
ယၢမ်းၵၢင်ၼႂ်ၸဵမ်ၸဝ်ႉ လုၵ်ႈႁဵၼ်းသိုၵ်းၶဝ်တေၵႆႉၵႆႉထွတ်ႇသိူဝ်ႈသေလုၵ်ႉလႅၼ်ႈၸွမ်းတၢင်း သႅင်ၸိုၼ်ႈ ပဵၼ်ၶူးသွၼ်ၵၢၼ်သိုၵ်း လႆႈၵုမ်းလုၵ်ႈႁဵၼ်းမၼ်းသေ လႅၼ်ႈၵႂႃႇၸွမ်းတၢင်းၶၢင်ႈထႅဝ်ယဝ်ႉ။ သမ်ႉဝႃႈမၼ်းဢမ်ႇလႆႈထွတ်ႇသိူဝ်ႈၸွမ်းပိူၼ်ႈသေတႃႉ သိူဝ်ႈၶဵဝ်ၶီႈမႃႉမၢင်မၢင် သုပ်းသႂ်ႇပေႃးမႅၼ်ႈဢဝ်တူဝ်ၶိင်းမၼ်း ပေႃးႁိူဝ်ႇယမ်းၼႆ သိူဝ်ႈၸပ်းၼိူဝ်ႉမႃးလႄႈ ၶႂ်ႈႁၼ်ဢမ်ႇႁၼ်ႁၢင်ႈၵၢမ်ႈၼိူဝ်ႉတႂ်ႈသိူဝ်ႈမႃးယဝ်ႉ သမ်ႉဝႃႈဢမ်ႇလႆႈႁၼ်ၵေႃႈ ၶႅၼ်လူင်မီးဢဵၼ်ၽူၵ်ႉဢွၵ်ႇမႃးဢိတ်းဢိတ်းၼၼ်ႉၵေႃႈ ၸၼ်ၸႂ်ၼႃႇယဝ်ႉ။
ၸုမ်းၼၢင်းႁၢၼ်ဢၼ်လႅၼ်ႈၵႂႃႇတၢင်းလင်ၼၼ်ႉ ဢွၼ်ဢုပ်ႇၵၼ်လူင်ၵႂႃႇ
“ၵူၼ်းလဝ်းၼႆႉ တူၺ်းၵူႈဝၼ်းၵေႃႈဢမ်ႇဢိမ်ႇ ႁၼ်တႃႇသေႇၵေႃႈဢမ်ႇမေႃၸၢၼ်ႈတေႉၼေႃ”
“ၽႂ်ၼေႃ တေပဵၼ်ၸူႉၶဝ် ပဵၼ်ႁဝ်းႁႃႉတေႃႈ..”
“ပေႃးလႆႈမႃးယဝ်ႉ တေပႅတ်ႈလႆႈယူႇႁႃႉဝႃႈၵူၼ်းၸိူင်ႉၼၼ်”
“ၸႂ်ႉႁွင်ႉသဵင်ဢမ်ႇဢွၵ်ႇ!! သဵင်ဢုပ်ႇၵၼ်ၵူၺ်းဢိူဝ်ႈလင်ၼႃႇ” သဵင်ႁၢဝ်ႈသဵင်ၶႅင် ၶူးသွၼ်ၵၢၼ်သိုၵ်း မီးၸိုဝ်ႈဝႃႈ သႅင်ယိင်း ၼၼ်ႉ ႁွင်ႉႁိုတ်းၸူးၶဝ်။
ႁူဝ်ၼႃႈၶဝ်ၼၼ်ႉၵေႃႈ ဢွၼ်ၵၼ်ႁွင်ႉ “သၢႆႉ..သၢႆႉၶႂႃသၢႆႉ” လႅၼ်ႈလမ်းတၢင်းလင်မူႇၽူႈၸၢႆးၶဝ်ၵႂႃႇယဝ်ႉ၊ ၶိုၼ်းပွၵ်ႈမႃးတီႈ ပၢင်ႇသွၼ်ၵၢၼ်ၶဝ် လဵၼ်ႈလၢႆးၸိူင်းၵႂႃႇၸွမ်းၵၼ်သေလႄႈ လိုဝ်ႈႁိူဝ်ႉၵႂႃႇႁႃဢၢပ်ႇၼမ်ႉႁင်းၽႂ်ႁင်းမၼ်းယူႇယဝ်ႉ။
မိူဝ်ႈဢွၼ်ၵၼ်ႁဵတ်းၵၢၼ်တေႃႉၽိုၼ်းယူႇၼၼ်ႉ
“လၢတ်ႈႁႂ်ႈၵၼ်မႃးတေႃႉၽိုၼ်း ဢမ်ႇပၼ်ၽူႈၸၢႆးမႃးၸွႆႈႁေၵေႃႉလူင် ၼၵ်းဝႃႈၼၵ်းမေႃႉ”
“ၼၼ်ႉယဝ်ႉ ပေႃးတၢၼ်ႇဝႃႈၽူႈယိင်းၼႆႉမီးႁႅင်းၼႃႇယဝ်ႉ”
“ႁႅင်းဢုပ်ႇၵၼ်တႄႉၼမ်ၼႃႇ ႁႅင်းတေႃႉမႆႉၵူၺ်းတႄႉ ဢမ်ႇမီးယဝ်ႉၵႃႈ” ၶူးသႅင်ယိင်း တင်းလၢတ်ႈတင်းပႆမႃးၸူးၶဝ်။ ဢဝ်သဵင်သမ်ႉပေႃးယဵၼ်သႅပ်း
“ပဵၼ်ၽူႈယိင်းၵေႃႈ ႁဵတ်းလႆႈမိူၼ်ၽူႈၸၢႆးယူႇဢိူဝ်ႈၼႆ ဢမ်ႇတွၼ်ႉဝူၼ်ႉတူၺ်းၽွင်ႈႁႃႉ ဢီႈသင်ၵေႃႈၽူႈၸၢႆး ဢီႈသင်ၵေႃႈၽူႈၸၢႆး ပေႃးဢမ်ႇမီးၽူႈၸၢႆး သူတေႁဵတ်းႁိုဝ်ယူႇလႃႇ၊ မိူဝ်ႈလႂ်ဢမ်ႇမီးၽူႈၸၢႆး ႁဝ်းၵေႃႈလူဝ်ႇမေႃယူႇ မေႃႁဵတ်းၵူႈလွင်ႈၼၼ်ႉယဝ်ႉ” လၢတ်ႈယဝ်ႉၵေႃႈ ၵႂႃႇပႅတ်ႈယဝ်ႉ။
ဝၢႆးမၼ်းၵႂႃႇၵူၺ်း လုၵ်ႈႁဵၼ်းယိင်းၶဝ်ၸိူဝ်းၼၼ်ႉတႄႉ
“ဢိူဝ်ႈ..ပေႃးတၢၼ်ႇဝႃႈၵူၼ်းၵူႈၵေႃႉတေမိူၼ်ၵၼ်လႆႈယဝ်ႉၼႃႇ”
“ၼၼ်ႉယဝ်ႉ ႁဝ်းပဵၼ်ၽူႈယိင်း ႁႂ်ႈႁဝ်းၵႅၼ်ႇၶႅင်မိူၼ်ၽူႈၸၢႆးတေႁဵတ်းႁိုဝ်လႆႈမေႃႉ”
“ၸွင်ႇႁႅင်းႁဝ်းတၢၼ်ႇၵၼ်ၵေႃႈဢမ်ႇၸႂ်ႈ”
“ႁဵတ်းပေႃးတၢၼ်ႇဝႃႈ ၼႂ်းမိူင်းၵူၼ်းလူင်ၼႆႉ ဢမ်ႇၶႂ်ႈလႆႈၽူႈၸၢႆးယဝ်ႉလႄႇမေႃႉ”
“ႁဝ်းယၢမ်ႈငိၼ်းဝႃႈ မၼ်းဢၢင်ႈတေႇၼႃႈႁိူၼ်းႁေလႄႈ ၺႃးပိူၼ်ႈပၢႆႈပႅတ်ႈၼႆဝႃႇ”
“ဢိူဝ်ႈၸွင်ႇဝႃႈ ပေႃးပဵၼ်ၼႆတႃႉလီပၢႆႈပႅတ်ႈၵဝ်ႇလႄႇမေႃႉ”
“ယဵၼ်ႉဢဝ်လႄႈ ထႅင်ႈလၢႆဝၼ်းၵူၺ်း ပၢင်သွၼ်ႁဝ်းၵေႃႈ တေယဝ်ႉယဝ်ႉၼင်ႇၵွၼ်ႇ”
“ပေႃးဝူၼ်ႉထိုင်ၶူးသႅင်ယိင်းတႄႉ ဢမ်ႇၶႂ်ႈယူႇႁေဢိတ်း ၵူၺ်းၵႃႈ ပေႃးလႆႈႁၼ်ၼႃႈ ၶူးသႅင်ၸိုၼ်ႈတႄႉ ဢမ်ႇၶႂ်ႈၵႂႃႇတၢင်းလႂ်ယဝ်ႉ”
“ၸႂ်ဢမ်ႇလီမႃးယဝ်ႉၼႆႉႁဝ်း ပေႃးဝႃႈၼၼ်ၵေႃႈ”
ဢုပ်ႇၵၼ်ႁုၼ်ႉၶူဝ်သိူဝ်းၼူဝ်ၵႂႃႇၸွမ်းၵၼ် ပဵၼ်ဢၼ်မူၼ်ႈမူၼ်ႈသိူဝ်းသိူဝ်း သဵင်ႁုၼ်ႉသဵင်ၶူဝ်ၶဝ်ၼၼ်ႉ ဢမ်ႇတၼ်းႁူႉ ၵၢၼ်ၶဝ်ၵေႃႈယဝ်ႉၵႂႃႇလီငၢမ်းယူႇ။
ပၢင်သွၼ်ၶဝ်ၵေႃႈ ယဝ်ႉၵႂႃႇယဝ်ႉလႄႈ ၸဵမ်ၸၢႆးႁၢၼ် ၼၢင်းႁၢၼ် ဢွၼ်ၵၼ်ၵႂႃႇၸွမ်းၼႃႈတီႈပုၼ်ႈၽွၼ်း ႁင်းၽႂ်ႁင်းမၼ်း၊ မၢင်ၵေႃႉ မႃးယူႇမႃးမိုတ်ႈၵၼ်၊ မၢင်ၵေႃႉမႃးႁူႉၸၵ်းလႆႈႁၵ်ႉၸူးၵၼ်ၵေႃႈမီး လွင်ႈႁူပ်ႉၺႃးၵၼ်ၼၼ်ႉၵေႃႈ ႁူႉၵႃႈလႆႈယၢၼ်ၽၢတ်ႇယဝ်ႉၼႃႇ။
ၼၢင်းႁၢၼ်ၼႆၼၼ်ႉ ႁိုင်ႁိုင်ၼၢၼ်းၼၢၼ်းၸင်ႇမီးၼိုင်ႈၸုပ်ႈၵူၺ်း ပေႃးဝႃႈလုၵ်ႈႁဵၼ်းဢမ်ႇမီးယဝ်ႉ ၶူးသွၼ်မၼ်းၵေႃႈ ဢမ်ႇၸၢင်ႈယူႇႁဵတ်းသင်၊ ယၢမ်းၵၢင်ၼႂ်ၸဵမ်ၸဝ်ႉ တီႈလုမ်းႁူင်းၽိုၵ်းသွၼ်ၶဝ်ၼၼ်ႉ သႅင်ယိင်းၵေႃႈ ႁူဝ်ၼႃႈႁွင်ႉထူပ်းသေ လႆႈႁပ်ႉၵႂၢမ်းသင်ႇ ႁႂ်ႈဢွၵ်ႇၶၢဝ်းတၢင်းၵႂႃႇႁဵတ်းၵၢၼ်ထႅင်ႈၼႂ်းပိုၼ်ႉတီႈလပ်ႉၼႆယဝ်ႉ။
ယၢမ်းၵၢင်ၶမ်ႈ တႂ်ႈငဝ်းၾႆးၶၢဝ်ၶၢဝ် မႅင်းလမ်ၽိုတ်းလမ်ၽၢတ်းတွမ်ၽူင်ႉပိဝ်ယူႇသဵင်ႈ ငဝ်းၵူၼ်းလမ်လမ် ၼင်ႈၵွတ်ႇၶဝ်ႇၵေႃႉလဵဝ်သေ ယိပ်းတင်းၵွၵ်းလဝ်ႈယဝ်ႉ မိူၼ်ႇမိုင်တူၺ်းၵႂႃႇၽၢႆႇတၢင်း တီႈလိုဝ်ႈသႅင်ၸိုၼ်ႈ ၼင်ႇၵူၼ်းမီးလွင်ႈတုၵ်ႉၸႂ်ဝႆႉ။
“လၵ်ႉၵိၼ်ႁင်းၵူၺ်းၼႆႉ ဝၢၼ်ယူႇၵႃႈ” သဵင်သႅင်ၸိုၼ်ႈ လၢတ်ႈ ယဝ်ႉမႃးၸၵ်ႉဢဝ်ၵွၵ်းလဝ်ႈ သႅင်ယိင်းသေ ႁိုဝ်ႈလဝ်ႈဢွၵ်ႉၵိၼ်ၵႂႃႇ။
“ၶၢဝ်းပိူၼ်ႈလပ်းပိူၼ်ႈၼွၼ်းယဝ်ႉ မႃးႁဵတ်းသင်!!”
“မႃးၵိၼ်လဝ်ႈပဵၼ်ၵေႃႉသူၼၼ်ႉၼႃႇ..”
“ၵႂႃႇလႄႈ..မိူဝ်ႈႁဝ်းတိုၵ်ႉလၢတ်ႈလီလႆႈယူႇၼႆႉ..”
“သူ..တေလႆႈၵႂႃႇတေႉႁႃႉ”
သဵင်သႅင်ယိင်းယဵၼ်ၵႂႃႇ ၸၵ်ႉဢဝ်ၵွၵ်းလဝ်ႈမၼ်းမႃးႁိုဝ်ႈၵိၼ်ၶိုၼ်း
“ပဵၼ်သိုၵ်းၼႆႉ မီးသုၼ်ႇထဵင်ၶိုၼ်းလႆႈယူႇႁႃႉသူဝႃႈ”
သႅင်ၸိုၼ်ႈၵေႃႈ ၼင်ႈၼိမ်ယဵၼ်ႁိမ်းသႅင်ယိင်းယူႇႁဵတ်းၼၼ် ၵွၵ်းလဝ်ႈႁူၺ်ႇလဵဝ် ပုတ်ႈၵၼ်ၵိၼ်ၵႂႃႇၵႂႃႇမႃးမႃး လဝ်ႈသမ်ႉပေႃးၶႂ်ႈသဵင်ႈ ၵိုတ်းၵူၼ်ႈတဝ်ႈမၼ်းၵူၺ်းယဝ်ႉ။
“ဢမ်ႇဝူၼ်ႉဝႃႈ ဝၼ်းမိူဝ်ႈၼႆႉ ႁဝ်းတေလႆႈမႃးၼင်ႈၵိၼ်လဝ်ႈၸွမ်းၵၼ်ၸိူင်ႉၼႆ”
“ၼၼ်ႉယဝ်ႉ ဢမ်ႇထၢင်ႇဝႃႈ သူမေႃၵိၼ်လဝ်ႈၵွၼ်ႇယဝ်ႉ..”
“လွင်ႈဢမ်ႇထၢင်ႇၼၼ်ႉၸၢင်ႈပဵၼ်မႃးယူႇ သူတေႁူႉလီလိူဝ်ပိူၼ်ႈဢမ်ႇၸႂ်ႈႁိုဝ်”
သႅင်ၸိုၼ်ႈၵေႃႈ ႁႅၼ်တူၺ်းတွင်ႉၾႃႉသေယဝ်ႉ “ၶမ်ႈၼႆႉ လၢဝ်လႅင်းလီတေႉယဝ်ႉ သူဢမ်ႇဝႃႈၼၼ်ႁႃႉ”
သႅင်ယိင်းမႄးႁိုဝ်ႈလဝ်ႈဢၼ်ၵိုတ်းၵူၼ်ႈတဝ်ႈၵူၺ်းၼၼ်ႉ သႂ်ႇၵွၵ်းသေယဝ်ႉ ဢိုၵ်ႉၵိၼ်ထႅင်ႈၵမ်းၼိုင်ႈယဝ်ႉ။
ယၢမ်းၵၢင်ၼႂ်မိူင်းပႆႇလႅင်း ထိုင်ၶၢဝ်းယၢမ်းတေဢွၵ်ႇတၢင်းယဝ်ႉၼႆၵေႃႈ ၵွပ်ႈပဵၼ်ၶၢဝ်းၵူၼ်းၼွၼ်းဝၢၼ်ယူႇလႄႈ ဢမ်ႇမီးၽႂ်မႃးၸွမ်းသူင်ႇ။ မၼ်း တႅမ်ႈလိၵ်ႈသေ ဢဝ်ၵႂႃႇတမ်းဝႆႉယူႇၼႃႈႁွင်ႈ သႅင်ၸိုၼ်ႈၼၼ်ႉ ဝႃႈ
ထိုင်
သႅင်ၸိုၼ်ႈ
ႁဝ်းၵႂႃႇယဝ်ႉၼႃႈ
ၶၢဝ်းတၢင်းႁဝ်းတေၵႂႃႇထိုင်လႂ် ဢမ်ႇလၢမ်းႁူႉလႆႈ၊ သဵၼ်ႈတၢင်းပႆ မၼ်းၵႆၼႃႇၵေႃႈ တေလႆႈၵႂႃႇယဝ်ႉ၊ ပုၼ်ႈၽွၼ်းတူၵ်းမႃး ပႃးႁဝ်းၵေႃႉၼိုင်ႈ တိုင်ႈၶိုၼ်ႈၼႃႈ ဢမ်ႇၸၢင်ႈလၢတ်ႈဝႃႈတေၶိုၼ်းမႃး၊ သုတ်းတၢင်းယဝ်ႉ ၸင်ႇၶိုၼ်းထိုင်ၵေႃႈတေထိုင်၊ သင်ႁိုင်လႄႈဢမ်ႇလွတ်ႈၽေးယဝ်ႉၼႆ ၽၢၵ်ႇမွၵ်ႇပၼ်တီႈၼွင်ႉယိင်းႁဝ်းၽွင်ႈၼႃႈ “ႁဝ်းဢမ်ႇၸၢင်ႈၶိုၼ်းမႃးယဝ်ႉ..”
တႅမ်ႈ သႅင်ယိင်း
သႅင်ၸိုၼ်ႈ ဢမ်ႇႁူႉဝႃႈ သႅင်ယိင်း တေဢွၵ်ႇၶၢဝ်းတၢင်းၵႂႃႇလႂ်၊ ၵွပ်ႈပဵၼ်ၵၢၼ်လပ်ႉလႄႈ သမ်ႉဝႃႈၶႂ်ႈႁူႉၵေႃႈ ဢမ်ႇထုၵ်ႇလီႁူႉၼႆ ႁူႉယူႇတီႈၸႂ်ၽႂ်မၼ်းယဝ်ႉ။
သဵင်မၢၵ်ႇတႅၵ်ႇလင်ၼၼ်ႈဢူၼ်ပၼ်း ၵူၼ်းလူင်လုၵ်ႇဢွၼ်ႇ ဢႅၼ်ႇလႅၼ်ႈသေႃႉႁႃတီႈလွတ်ႈၽေး၊ သဵင်ၵွင်ႈလင်ၼၼ်ႈပၼ်းမေႃး ၵူၼ်းလေႃးလႄးသူၼ်ႈသိၼ်းသၢၼ် ႁိမ်ၵၼ်ပၢႆႈ တၢင်းၵဝ်တၢင်းမႂ်း လႅၼ်ႈယူႇၵေႃႈ တေႃႈဢမ်ႇႁူႉဝႃႈ တေလွတ်ႈႁိုဝ်တေတၢႆ သၢႆၸႂ်ယူႇတႂ်ႈပၢႆမၢၵ်ႇၵွင်ႈ ၊ လုၵ်ႈဢွၼ်ႇၵမ်ႈၽွင်ႈ ႁွင်ႉႁႃဢူႈႁႃမႄႈၵေႃႈဢမ်ႇႁၼ်ယဝ်ႉ။
ဝၢႆးသဵင်မၢၵ်ႇသဵင်ၵွင်ႈတဵတ်ႇယဵၼ် လင်ႁိူၼ်းတႅၵ်ႈဢုတ်ႇတႅၵ်ႈဝႃး ၵူၼ်ႇလူမ်ႉၸူမ်တဵင် ယွၵ်းယွႆတႅၵ်ႇၸတ်ႉ တၢၼ်ႇဢိင်ႇသၼ်ႇလူမ်ႇလူမ်ႉၵူၼ်ႇထူမ်ယဝ်ႉယိုင်၊ ၵမ်ႈၽွင်ႈၵေႃႈတၢႆမၢၵ်ႇတၢႆမိူဝ် ၵမ်ႈၽွင်ႈၵေႃႈႁၢႆလၢႆၸွမ်းတႂ်ႈႁိူၼ်းၵူၼ်ႇလူမ်ႉ၊ ဢၢႆၵႂၼ်းဢၢႆယၢမ်း ပဵၼ်ၽုၼ်ႇပဵၼ်ၽွင်ဢဝ်မိူင်းသမ်ႉပေႃးမွင် ႁၼ်ယဝ်ႉ မႃးတွင်ႈတႅင်းတမ်ႁူဝ်ၸႂ် သၢႆၸႂ်လုၵ်ႈမႄႈၵူၼ်းမိူင်းတႆးႁဝ်းၼၼ်ႉ မၼ်းဢမ်ႇမီးၵႃႈၶၼ်သင်သေဢိတ်းယဝ်ႉႁိုဝ်။
သႅင်ယိင်းၶဝ်ၵေႃႈ လႆႈၼုင်ႈသႂ်ႇသိူဝ်ႈၶူဝ်းၸုမ်းၸွႆႈထႅမ်ၵူၼ်းထူပ်းၽေးသေယဝ်ႉ ၶဝ်ႈၵႂႃႇၸွႆႈတေႃႉဢဝ်ၵူၼ်းတၢႆမိူဝ်ယူႇၼၼ်ႉလႄႈ ၸွမ်းသွၵ်ႈႁႃၵူၼ်းဢၼ်လႆႈတၢႆၵႂႃႇၸိူဝ်းၼၼ်ႉယူႇ။
ဝၼ်းယဝ်ႉဝၼ်း ဢမ်ႇႁၼ်ဝႃႈမၼ်းတေယဝ်ႉၵႂႃႇလႆႈ၊ တီႈယဝ်ႉၵႂႃႇ တီႈမႂ်ႇၵေႃႈမီးမႃး ၵူၼ်းတၢႆၵေႃႈၸွမ်းပႃး ၵူႈဝၼ်းၵူႈဝၼ်း ပၢင်တိုၵ်းမီးတီႈလႂ် ၵူၼ်းမိူင်းၵေႃႈလႆႈပၢႆႈလႆႈတၢႆယူႇတႃႇသေႇ။ ၵူၼ်းၸွႆႈၼၼ်ႉ သမ်ႉဝႃႈတေႁိူဝ်ႉတေယၢပ်ႇတၢၼ်ႇႁိုဝ်ၵေႃႈယဝ်ႉ မိူဝ်ႈပဵၼ်ပုၼ်ႈၽွၼ်းၼႆ ႁူႉၵႃႈလႆႈႁၢပ်ႇႁၢမ်ႁဵတ်းၵႂႃႇ ဢမ်ႇဝႃႈၵၢၼ်ၼၼ်ႉ တေထိုင်သၢႆၸႂ်ၵေႃႈယဝ်ႉ ၵႃႈတေလႆႈၸုၼ်ႉသေၶဝ်ႈၵႂႃႇယဝ်ႉၼႃႇ။
ၵႃႈပၢင်တိုၵ်းပႆႇယဵၼ် တႃႇၶိုၼ်းပွၵ်ႈမိူဝ်းႁႃ ၵူၼ်းၼႂ်းၼႃႈႁိူၼ်းဢၼ်ဝႃႈၼၼ်ႉၵေႃႈ ဢမ်ႇႁၼ်တၢင်းယဝ်ႉ၊ ယူႇၼႂ်းပိုၼ်ႉတီႈသုၵ်ႉယုင်ႈ ယူႇလူၺ်ႈဢမ်ႇမီးတူဝ်တေႉ ၵပ်းသိုပ်ႇၽႂ်ၵေႃႈဢမ်ႇလႆႈ ႁူႉၵႃႈ လႆႈယူႇထႃႈမွင်းဝၼ်းပၢင်တိုၵ်းယဵၼ်ယူႇၵေႃႈ ၵႃႈတေလႆႈဝႆႉၸႂ်ယွမ်းႁပ်ႉဝႃႈ သၢႆၸႂ်ၼၼ်ႉ တေၸၢင်ႈၵႂႃႇၸွမ်းပၢင်တိုၵ်းလူင်ၼၼ်ႉယူႇယဝ်ႉ။
ၶၢဝ်းတၢင်းသႅင်ယိင်းၶဝ် တေၵႂႃႇၸွႆႈထႅမ်ၵူၼ်း ဢွင်ႈတီႈမီးမၢၵ်ႇတႅၵ်ႇၼၼ်ႉ ၸင်ႇသမ်ႉလႆႈလတ်းၽၢၼ်ႇ ဢွင်ႈတီႈဢၼ်ယၢမ်ႈမီးမၢၵ်ႇတႅၵ်ႇတူၵ်းသႂ်ႇ လင်ႁိူၼ်းႁၵ်းၽင်ႉၵွႆယွၵ်းယွႆ၊ ၵူၼ်းႁူလီၸိူင်ႉၼင်ႇသႅင်ယိင်းၼႆၵေႃႈ ငိၼ်းမႅၼ်ႈ သဵင်ႁွင်ႉႁႆႈလုၵ်ႈဢွၼ်ႇသေယဝ်ႉ ၵိုတ်းထွမ်ႇလီလီသေ ႁူႉဝႃႈ မၼ်းမီးလုၵ်ႈဢွၼ်ႇတေႉၼႆၵေႃႈ လႆႈၵိုတ်းၸွမ်းႁႃလုၵ်ႈဢွၼ်ႇၵွၼ်ႇၼႆယဝ်ႉ။
ဢမ်ႇႁိုင်ဢမ်ႇၼၢၼ်း မၼ်းၵေႃႈလႆႈထူပ်းႁၼ်လုၵ်ႈဢွၼ်ႇယိင်းၵေႃႉၼိုင်ႈ ဢႃႇယုတေမီးယူႇမွၵ်ႈ 10 ၶူပ်ႇၼႆႉ ၼင်ႈႁႆႈယူႇ သႅင်ယိင်းၵေႃႈ ထၢမ်လွင်ႈထၢမ်တၢင်းမၼ်း လႆႈႁူႉလွင်ႈလုၵ်ႈဢွၼ်ႇၼၼ်ႉ။
မိူဝ်ႈဢူႈမႄႈၶဝ်တၢႆ မၼ်းဢမ်ႇလႆႈယူႇၸွမ်းဢူႈမႄႈၶဝ်လႄႈ မိူဝ်းယူႇၸွမ်းပႃႈၶဝ်၊ ပိူၼ်ႈၵေႃႈလၢတ်ႈမၼ်းဝႃႈ ဢူႈမႄႈမၼ်းဢမ်ႇယူႇယဝ်ႉ၊ လႆႈတၢႆၵႂႃႇယဝ်ႉၼႆၵေႃႈ မၼ်းဢမ်ႇယုမ်ႇသေ ဝူၼ်ႉဝႃႈဢူႈမႄႈမၼ်း ဢမ်ႇၶႂ်ႈႁႂ်ႈမၼ်းမိူဝ်းႁိူၼ်းလႄႈ ပိူၼ်ႈလွၵ်ႇမၼ်းၵူၺ်းၼႆႁေၵေႃႈ လႆႈလၵ်ႉမႃးႁိူၼ်းမၼ်းၼၼ်ႉယဝ်ႉ။ ဢမ်ႇထၢင်ႇဝႃႈ မၼ်းတေလႆႈမႃးႁၼ် ဢွင်ႈတီႈဢၼ်ထၢင်ႇဝႃႈ ပဵၼ်ႁိူၼ်းၼၼ်ႉ ဢမ်ႇမီးႁိူၼ်းပုၼ်ႈတႃႇမၼ်းယဝ်ႉ။
သႅင်ယိင်းၵေႃႈ ဢမ်ႇၸၢင်ႈႁဵတ်းသင်ပၼ်လႆႈ လိူဝ်သေဢဝ်လုၵ်ႈဢွၼ်ႇၼၼ်ႉ မႃးၵွတ်ႇဝႆႉယူႇၼႂ်းဢူၵ်းမၼ်းၼၼ်ႉၵူၺ်း။ ယၢမ်းၼၼ်ႉ သဵင်ၵွင်ႈလင်မေႃးမႃးလႄႈ ဢွၼ်ၵၼ်မူပ်ႇပႅပ်ႉဝႆႉယဝ်ႉ။
မိူဝ်ႈသဵင်မၢၵ်ႇၵွင်ႈယဵၼ်ၵႂႃႇႁိုင်တၢၼ်ႇတၢၼ်ႇၼႆၵေႃႈ ဢွၼ်ၵၼ်သွၼ်ႉပႅပ်ႉပၢႆႈဢွၵ်ႇပိုၼ်ႉတီႈၼၼ်ႈယဝ်ႉ။ ယၢမ်းၼၼ်ႉ သိုဝ်ႈၶႃသွင်ၵေႃႉၼၼ်ႉၵေႃႈ မီးမၢၵ်ႇတႅၵ်ႇတူၵ်းလူင်းမႃး လင်ယွၼ်ႈတွင်ႈထိုင်လိၼ် ပေႃးသၼ်ႇၶွၼ်းဝႆ သဵင်လူမ်းထူၺ်ႈၸႂ် ၵူၼ်းသွင်ၵေႃႉၼၼ်ႉ လႆႈသုတ်းဝွတ်ႈႁၢႆၵႂႃႇ ၼႂ်းပႃႇပၢင်တိုၵ်းၼၼ်ႉယဝ်ႉ။
ဝၢႆးသေသႅင်ယိင်းၵႂႃႇယဝ်ႉ သႅင်ၸိုၼ်ႈၵေႃႈ ဢမ်ႇလႆႈၶိုၼ်းႁူႉၶၢဝ်ႇသႅင်ယိင်းထႅင်ႈႁေပွၵ်ႈ၊ ၵူၺ်းၵႃႈ ဢမ်ႇထၢင်ႇဝႃႈ လႆႈငိၼ်းၶၢဝ်ႇၶဝ် ပွၵ်ႈဢွၼ်တၢင်းသုတ်း ဝၢႆးသေဢမ်ႇႁၼ်ၵၼ်ႁိုင်ၼၼ်ႉဝႃႈ “သႅင်ယိင်း တၢႆယဝ်ႉ” ၼႂ်းႁူဝ်ၸႂ်ႁူဝ်ၶေႃး ဢိုၵ်ႉၼိုၵ်ႉဢိုမ်တိုမ်း ၸိုမ်းဢဝ်ႁူၺ်ႇတႃလမ်ၵေႃႉၸၢႆး မီးၼမ်ႉယမ်းၸမ်ႉဝႆႉယဝ်ႉ။
မိူဝ်ႈႁူႉၸိူင်ႉၼၼ် ၸွမ်းၼင်ႇၶေႃႈသင်ႇလိုၼ်းသုတ်းသႅင်ယိင်းၼၼ်ႉ သႅင်ၸိုၼ်ႈၵေႃႈ လႆႈပွင်ႇပၼ်တီႈ ၼွင်ႉယိင်းသႅင်ယိင်းၵႂႃႇ။ ဢမ်ႇထၢင်ႇဝႃႈ တေလႆႈႁူႉငိၼ်းၶိုၼ်းလွင်ႈဝႃႈ သႅင်ယိင်းၵႂႃႇႁဵတ်းသိုၵ်းၼၼ်ႉ ပုၼ်ႈတႃႇၸွမ်းႁႃမၼ်းၼႆ။
ထႅင်ႈဝၼ်းလဵဝ်ၵူၺ်း ပၢင်ၶႅၵ်ႇသႅင်ယိင်းလႄႈသႅင်ၸိုၼ်ႈ ဢၼ်ဝႃႈၼၼ်ႉၵေႃႈ တေမီးမႃးယဝ်ႉ။ ၵူၺ်းၵႃႈ သႅင်ၸိုၼ်ႈ လႆႈႁၢႆတူဝ်ၵႂႃႇ ဢမ်ႇၵပ်းသိုပ်ႇလႆႈ ဢမ်ႇႁူႉဝႃႈမီးယူႇတီႈလႂ် ၽႂ်ၽႂ်ၵေႃႈဝႃႈ သႅင်ၸိုၼ်ႈဢမ်ႇၶႂ်ႈႁဵတ်းပၢင်ၶႅၵ်ႇ ပၢႆႈပၢင်ၶႅၵ်ႇၼႆယူႇ။
ၸွမ်းၼင်ႇလွင်ႈယုမ်ႇၸႂ် ဢၼ်ႁၵ်ႉၵၼ်မႃးတင်းႁိုင်ၼၼ်ႉ ဢမ်ႇႁဵတ်းႁႂ်ႈသႅင်ယိင်းဝူၼ်ႉၸိူင်ႉၼၼ် သင်ဝႃႈ မၼ်းၵႂႃႇ မၼ်းလီသူင်ႇသင်ႇၶေႃႈၵႂၢမ်းဝႆႉပၼ်ယူႇ၊ သင်ဝႃႈဢမ်ႇၶႂ်ႈႁဵတ်း မိူဝ်ႈတေႁဵတ်းၵေႃႈထၢမ်ၵၼ်လီလီယဝ်ႉလူး၊ ၵွပ်ႈသင်လႄႈမၼ်းလႅၵ်ႈလၢႆႈၸႂ် ၵႂႃႇလႄႈ ဢမ်ႇလၢတ်ႈၼႆ။ သမ်ႉဝႃႈတၢင်းႁွင်ႇတၢင်းၸၢၼ်း ပိူၼ်ႈတေလၢတ်ႈဝႃႈၸိူင်ႉႁိုဝ်ၵေႃႈယဝ်ႉ ပေႃးဢမ်ႇပႆႇၸႂ်ႈသႅင်ၸိုၼ်ႈလၢတ်ႈဢွၵ်ႇမႃးၼႆ မၼ်းတိုၼ်းဢမ်ႇယုမ်ႇၽႂ် ဢမ်ႇယွမ်းႁပ်ႉလႆႈ။ မၼ်းၸွမ်းႁႃ သႅင်ၸိုၼ်ႈမႃးတႃႇသေႇ တေႃႇပေႃးႁူႉဝႃႈ သႅင်ၸိုၼ်ႈလႆႈၵႂႃႇႁဵတ်းသိုၵ်းၼႆၵေႃႈ မၼ်းၸင်ႇလႆႈ ႁဵတ်းသိုၵ်းၸွမ်းယဝ်ႉ။
ႁဵတ်းသိုၵ်းမႃးသၢမ်ပီႊ ၸင်ႇတေလႆႈႁူပ်ႉၺႃးသႅင်ၸိုၼ်ႈ ဢၼ်တိုၵ်ႉယူႇလီယူႇ လႄႈ ပွၵ်ႈဢွၼ်တၢင်းသုတ်းဢၼ်လႆႈႁူပ်ႉႁၼ်ၵၼ်၊ သၢႆတႃသႅင်ၸိုၼ်ႈ ဢမ်ႇတူၺ်းႁၼ်မၼ်းလႄႈ ဢမ်ႇမီးမၼ်းယူႇၼႂ်းသၢႆတႃယဝ်ႉၼၼ်ႉ ႁဵတ်းႁႂ်ႈၵူႈလွင်ႈၸႅင်ႈလႅင်းၸႂ်မႃး ၵူႈလွင်ႈဢၼ်ၶႂ်ႈႁူႉၶႂ်ႈထၢမ်ၼၼ်ႉၵေႃႈ လႆႈႁၢႆၵႂႃႇမူတ်းသဵင်ႈယဝ်ႉ။
မိူဝ်ႈလႆႈႁဵတ်းၵၢၼ်ၸွမ်းၵၼ် မိူဝ်ႈလႆႈၶိုၼ်းဢုပ်ႇလၢတ်ႈႁူပ်ႉၵၼ်၊ မိူဝ်ႈၶိုၼ်းလၢတ်ႈထိုင်လွင်ႈဝၼ်းလင်ၼၼ်ႉ သႅင်ၸိုၼ်ႈ ပၢႆႈၶေႃႈၵႂၢမ်းပႅတ်ႈ ၼင်ႇဢမ်ႇယၢမ်ႈၵိူတ်ႇပဵၼ်မႃး ႁဵတ်းၼၼ်တႃႇသေႇ မၼ်းၵေႃႈ လႆႈယွမ်းႁပ်ႉၶေႃႈၵႂၢမ်း ဢၼ်ပိူၼ်ႈလၢတ်ႈမႃးၸိူဝ်း ၼၼ်ႉယဝ်ႉ။ သမ်ႉဝႃႈႁၵ်ႉၵေႃႈ ဢမ်ႇၸၢင်ႈဢဝ်မႃးပဵၼ်ၶွင်ႁဝ်းလႆႈၼႆသေ၊ ႁႂ်ႈပေႃးလႆႈႁူႉဝႃႈ ၶဝ်ပဵၼ်သင်ယူႇၼႆ ႁဵတ်းႁႂ်ႈလႆႈယူႇႁိမ်းၸမ်ၵၼ်မႃး၊ ၼင်ႇႁိုဝ်ၶဝ်တေဢမ်ႇၸၢၼ်ႈၸင်းမၼ်းလိူဝ်သေၼႆႉၼႆၵေႃႈ ၵဵပ်းလွင်ႈဢၼ်မီးယူႇၼႂ်းၸႂ်ၼၼ်ႉဝႆႉသေ ႁဵတ်းမိူၼ် ဢမ်ႇမီးလွင်ႈသင်ၵိူတ်ႇပဵၼ်မႃး၊ ႁဵတ်းမိူၼ်ဢမ်ႇသူၼ်ၸႂ် ႁႂ်ႈၶဝ်ပေႃးတမ်းၸႂ်လႆႈဝႃႈ ဢမ်ႇမီးၸႂ်တေႃႇၵၼ်ယဝ်ႉ ယူႇႁူမ်ႈၵၼ်ၵႂႃႇ ၼင်ႇၵူၼ်းႁူႉၸၵ်းၵူၺ်း၊ ယူႇႁႂ်ႈမိူၼ်ၼင်ႇဢူၺ်းၵေႃႉ ႁႂ်ႈပေႃးယူႇၸမ်ၵၼ်လႆႈ ၸွႆႈထႅမ်ၵၼ်လႆႈ သမ်ႉဝႃႈ လိုၵ်ႉလိုၵ်ႉၼႂ်းၸႂ်ၼၼ်ႉ လႆႈၸဵပ်းယူႇၵေႃႈယဝ်ႉ။
“ၸဵမ်မိူဝ်ႈဝၼ်းဢၼ်ပီႈပၢႆႈဢွၵ်ႇပႅတ်ႈ ၶဝ်ဢမ်ႇတွၼ်ႉၸင်းပီႈလႄႈ ဢမ်ႇတွၼ်ႉ တၢင်ႇတၢင်းၽိတ်းပီႈႁေပွၵ်ႈ ဝူၼ်ႉဝႃႈ ပီႈတေမီးလွင်ႈမီးတၢင်းယူႇလႄႈၵႂႃႇၵူၺ်း ၼႆတႃႇသေႇယဝ်ႉ၊ မၼ်းၶႂၢင်း ပၼ်ပီႈယူႇတႃႇသေႇ မၼ်းယုမ်ႇဝႃႈမိူဝ်ႈလႂ်ပီႈၽွမ်ႉၵေႃႈ တေလၢတ်ႈၼႄမၼ်းၵူၺ်း”
ၵူၺ်းၵႃႈ တွၼ်ႈတႃႇသႅင်ၸိုၼ်ႈတႄႉ ၵူႈလွင်ႈလႆႈတူၵ်းလိုၼ်းၵႂႃႇယဝ်ႉ၊ ၵွပ်ႈၵူဝ်ႁဵတ်းႁႂ်ႈၶဝ်လႆႈၸဵပ်းထႅင်ႈလႄႈ ဢမ်ႇႁတ်းလၢတ်ႈ၊ ၵွပ်ႈတၢင်းၽိတ်းဢၼ်ႁဵတ်းႁၢႆႉၶဝ်ဝႆႉၼၼ်ႉသေ ဢမ်ႇလီၶႂၢင်းပၼ်လႆႈလႄႈ ဢမ်ႇႁတ်းၶဝ်ႈၸမ်၊ ႁၵ်ႉယူႇၵေႃႈ ယွၼ်းယူႇၵႆၵႆသေႁၵ်ႉၵူၺ်းယဝ်ႉ ၸင်ႇလႆႈဝႄႈတၢင်းယူႇတႃႇသေႇ၊ ၵွပ်ႈၶဝ်ဢမ်ႇသူၼ်ၸႂ်ယဝ်ႉလႄႈ ၸင်ႇလႆႈယူႇမိူၼ်ၵူၼ်းဢမ်ႇမီးၸႂ်ႁၵ်ႉၼိူဝ်ၶဝ်ဝႆႉ၊ ၵွပ်ႈလွင်ႈသိူင်ႇသိမ်း ဢၼ်မီးယူႇၼႂ်းဢူၵ်းႁူဝ်ၸႂ် ဢမ်ႇမွၵ်ႇလၢတ်ႈပၼ်ၵၼ်လႆႈၼၼ်ႉ ႁူႉၵႃႈတေလႆႈၵဵပ်းသိမ်းဝႆႉၼႂ်းၸႂ်ၵႂႃႇတေႃႇၸူဝ်ႈၵူၺ်းယဝ်ႉ၊ သမ်ႉဝႃႈၶႂ်ႈလၢတ်ႈယူႇသေလၢႆၵေႃႈ ဢမ်ႇၸၢင်ႈလၢတ်ႈႁႂ်ႈႁူႉထွမ်ႇငိၼ်းလႆႈယဝ်ႉလူး။
သႅင်ၸိုၼ်ႈၵေႃႈ ၼင်ႈၵိၼ်လဝ်ႈယူႇတီႈၼႃႈၽၵ်းတူႁွင်ႈၼွၼ်းမၼ်းၼၼ်ႉသေ ဝူၼ်ႉထိုင်ၶိုၼ်း ၶမ်ႈၶိုၼ်းဢၼ်လႆႈၵိၼ်လဝ်ႈၸွမ်း သႅင်ယိင်းၼၼ်ႉမႃးလႄႈ ၶုၵ်းၸႂ်လႆႈ ၶေႃႈၵႂၢမ်းသႅင်ယိင်း ဢၼ်မၼ်းလၢတ်ႈဝႆႉဝႃႈ
“ပဵၼ်သိုၵ်းၼႆၼၼ်ႉ ဢမ်ႇလၢတ်ႈလႆႈဝႃႈၶႂ်ႈယူႇႁိုဝ်တၢႆ မိူဝ်ႈပုၼ်ႈၽွၼ်းတူၵ်းမႃးယဝ်ႉၼႆ ၵူဝ်ၵေႃႈ ၵႃႈတေလႆႈၵႂႃႇယဝ်ႉ၊ တီႈၼၼ်ႈမၼ်းမီးၽေးဢိူဝ်ႈ သမ်ႉဝႃႈမႆႈၸႂ်ယူႇၵေႃႈ လၢတ်ႈလႆႈလၢႆလၢႆၵူၺ်း ဢမ်ႇၸၢင်ႈႁၢမ်ႈသီးသင်လႆႈ၊ ၸဵမ်မိူဝ်ႈမႃးပဵၼ်သိုၵ်းယဝ်ႉၼၼ်ႉ ၵႃႈတေလႆႈယွမ်းၸုၼ်ႉသၢႆၸႂ်ႁႂ်ႈလႆႈယဝ်ႉ”
“ဢမ်ႇႁူႉဝႃႈ တေထိုင်ၵမ်းႁဝ်းမိူဝ်ႈလႂ်”
ဢဝ်ၼမ်ႉလဝ်ႈႁဵတ်းပဵၼ်ၵေႃႉၵၼ် ယူႇၼႂ်းငဝ်းလပ်းသိင်ႇၼၼ်ႉယဝ်ႉ။
သုတ်းယဝ်ႉ။
တႅမ်ႈ-သႅၼ်ငဝ်း
4/01/2024
