ၽႃဢုတ်ႇထၢမ်မွၵ်ႇယိူဝ်ႈဝႃႈ “သူၸွင်ႇယၢမ်ႈႁူႉၸၵ်းၵွၵ်းမွၵ်ႇယူႇႁႃႉ”
မွၵ်ႇယိူဝ်ႈတွပ်ႇၽႃဢုတ်ႇၵႂႃႇ “ႁူႉဢိူဝ်ႈ ၵူၺ်းၵႃႈႁဝ်းၵေႃႈဢမ်ႇယၢမ်ႈဝူၼ်ႉတႃႇၶဝ်ႈၵႂႃႇယူႇၼႂ်းၼၼ်ႉလေႃႇၼႃ”
“ယွၼ်ႉသင်လႄႈဝႃႈၼၼ် သူဢမ်ႇၶႂ်ႈၵႂႃႇယူႇတီႈဢၼ်မီးၵူၼ်းၵျိူၵ်ႈၸိူင်ႉၼၼ်ႁႃႉ ပဵၼ်ယွၼ်ႉသူဝူၼ်ႉဝႃႈ သူႁၢင်ႈလီဢမ်ႇလႅပ်ႈတင်းၵွၵ်းမွၵ်ႇၼၼ်ႉႁိုဝ်”
မွၵ်ႇယိူဝ်ႈယုမ်ႉၸူးၽႃဢုတ်ႇယဝ်ႉလၢတ်ႈဝႃႈ ၼၼ်ႉၵေႃႈပႃးယူႇလွင်ႈၼိုင်ႈ ထႅင်ႈလွင်ႈ ႁဝ်းၵေႃႈဢမ်ႇလႆႈၸၼ်ၸႂ် မီးဢၢႆႁွမ်သင် ၵူၺ်းၵႃႈ ႁဝ်းၵေႃႈဢမ်ႇယၢမ်ႈၸႂ်လဵၵ်ႉလႄႈၶွႆၽႂ်လေႃႇၼႃႈ ႁဝ်းလႆႈၸႂ်ဢၼ်ႁဝ်းပဵၼ်မွၵ်ႇယိူဝ်ႈယူႇဢိူဝ်ႈ သမ်ႉဝႃႈႁဝ်းဢမ်ႇမီးသုၼ်ႇတႃႇၵႂႃႇယူႇၼႂ်းၵွၵ်းမွၵ်ႇၼၼ်ႉၵေႃႈယဝ်ႉ။
ဢမ်ႇမီးသုၼ်ႇတႃႇၵႂႃႇယူႇၼႂ်းၶူဝ်ႈမွၵ်ႇ ၵူၺ်းၵႃႈ ႁဝ်းၵေႃႈမီးသုၼ်ႇလႆႈယူႇတီႈဢၼ်ႁဝ်းၶႂ်ႈယူႇၼၼ်ႉဢိူဝ်ႈ သမ်ႉဝႃႈႁဝ်းဢမ်ႇႁၢင်ႈလီမိူၼ်ၽႂ် ႁဝ်းၵေႃႈႁၢင်ႈလီၸွမ်းဢၼ်ႁဝ်းပဵၼ်ယူႇၼၼ်ႉယဝ်ႉ။
သမ်ႉဝႃႈႁဝ်းတေတူၺ်းမိူၼ်ဢမ်ႇမီးၽွၼ်းလီသင် ၵူၺ်းၵႃႈၸၢတ်ႈပၢၼ်ႁဝ်းၵေႃႈမီးတၢင်းသိူဝ်းလႄႈလွတ်ႈလႅဝ်းလီယူႇယဝ်ႉ။
ႁဝ်းလႆႈႁပ်ႉသၢႆလူမ်းယဵၼ် လႆႈႁပ်ႉသၢႆလႅင်းလႅတ်ႇ လႆႈႁႅၼ်တူၺ်းတွင်ႉၾႃႉ ႁဝ်းၵျိူၵ်ႈဢၼ်ႁဝ်းပဵၼ်ၸိူင်ႉၼႆ။ ႁဝ်းၵျိူၵ်ႈဢၼ်လႆႈၸႂ်ႉၸၢတ်ႈပၢၼ်ဢမ်ႇမီးၽႂ်ႁႄႉႁၢမ်ႈ ႁဝ်းၵျိူၵ်ႈတူဝ်ႁဝ်းလိူဝ်ပိူၼ်ႈယဝ်ႉ။
ၸွင်ႇသူႁူႉႁိုဝ်ၽႃဢုတ်ႇ ႁဝ်းၼႆႉဢမ်ႇလႆႈပဵၼ်မွၵ်ႇယိူဝ်ႈၼၼ်ႉၵူၺ်းလေႃႇ ႁဝ်းပဵၼ်မွၵ်ႇယိူဝ်ႈၵမ်းလဵဝ်ယဝ်ႉ။
ၽႃဢုတ်ႇယုမ်ႉပၼ်မွၵ်ႇယိူဝ်ႈသေ လၢတ်ႈဢွၵ်ႇမႃးဝႃႈ ႁဝ်းၵေႃႈၵျိူၵ်ႈသူမိူၼ်ၵၼ် ၵျိူၵ်ႈဢၼ်သူပဵၼ်တူဝ်သူၸိူင်ႉၼႆယဝ်ႉ။
ပိၼ်ႇ-ငဝ်မွင်မိုတ်းမူဝ်း
