တွၼ်ႈသွင်
ပီႊ 2020
ပဵၼ်ၽွင်း ၶူဝ်ႇဝိတ်ႉ-19 လႆႈၽႄႈလၢမ်းၶဝ်ႈမႃးၼႂ်းမိူင်းႁဝ်းယဝ်ႉလႄႈ ၸဵမ်ၼွၵ်ႈမိူင်းၼႂ်းမိူင်း မီးလွင်ႈပိၵ်ႉဢိုတ်းသဵၼ်ႈတႃႈသၢႆတၢင်းၵၢၼ်ၵႃႉၶၢႆ ၵူၼ်းမိူင်းၵေႃႈၵိၼ်းၸႂ် ယွၼ်ႉပၢႆးမၢၵ်ႈမီး သူၼ်မၢၵ်ႇၶဝ်ႈတဝ်ႈၼမ်ႉ တႃႇသူင်ႇဢွၵ်ႇၼွၵ်ႈမိူင်းၼၼ်ႉ ဢမ်ႇပဵၼ်ၵၢၼ်သေ တၢင်းပဵၼ်ရေႃးၵႃႇလူင်ၼၼ်ႉၵေႃႈ တိတ်းၸပ်းၽႄႈလၢမ်းဝႆးလႄႈ ဢွင်ႈတီႈၵူၼ်းၵိုၼ်းၶွၼ်ႈ ဢွင်ႈတီႈႁဵတ်းၵၢၼ်ၸိူဝ်းၼၼ်ႉ လႆႈပိၵ်ႉဢိုတ်းသေဢမ်ႇၵႃး ၵၢၼ်ပၢႆးမၢၵ်ႈမီးၼႂ်းမိူင်းၵမ်ႈၼမ်ၵေႃႈ ဢမ်ႇပဵၼ်ၵၢၼ်ၵႂႃႇလႆႈယဝ်ႉ။
ၶူဝ်ႇဝိတ်ႉ ၼၼ်ႉ ပဵၼ်ရေႃးၵႃႇဢၼ်ၽႄႈလၢမ်းဝႆးလႄႈ လၢၵ်ႈဢဝ်သၢႆၸႂ်ၵူၼ်း ၼပ်ႉႁူဝ်ပၢၵ်ႇႁူဝ်ႁဵင်မၼ်းၵႂႃႇၵူႈဝၼ်းဝၼ်း၊ တူၺ်းၶၢဝ်ႇတၢင်းလႂ်ၵေႃႈ ပဵၼ်လွင်ႈၶူဝ်ႇဝိတ်ႉ ၵူၼ်းတိတ်းၸပ်းတိူဝ်းၶိုၼ်ႈမႃးထႅင်ႈ ၵူၼ်းလူႉသဵင်ႈတၢႆတိူဝ်းၶိုၼ်ႈမႃးထႅင်ႈ၊ ၽႄႈလၢမ်းၵႂႃႇမိူင်းပုၼ်ႉမိူင်းၼႆႉ ၵူၼ်းဢွၼ်ၵၼ်တိုၼ်ႇသၢၼ်ႈၼိူဝ်ဢွၼ်ႇလၢႆးဢမ်ႇၵႃး ၵူၼ်းၸွမ်းဝၢၼ်ႈၸွမ်းဝဵင်း ဢၼ်ႁၼ်ၶၢဝ်ႇႁၼ်ငၢဝ်းၵေႃႈ မႆႈၸႂ်လွမ်ၵူဝ် ဢမ်ႇႁတ်းၵႂႃႇတၢင်းလႂ်ၵေႃႈမီး။
ၵူၺ်းၵႃႈ ရေႃးၵႃႇၼၼ်ႉလီၵူဝ်ၼႃႇတၢၼ်ႇလႂ်ၵေႃႈ ဢမ်ႇပေႉလႆႈရေႃးၵႃႇ လွင်ႈဢိုပ်းယၢၵ်ႈၽၢၼ်ၵႅၼ်းၼၼ်ႉလႃႈ၊ ၽွင်းငဝ်းလၢႆးဝၼ်ႈမိူင်းၵပ်ႉၵိၼ်းယူႇၸိူင်ႉၼႆ ၼႂ်းလၢၼ်ႉလႄႇမူၼ်ႈသိူဝ်း တႃႇၸိူဝ်းၵျိူၵ်ႈသူင်ၵျေႃႇမူၼ်ႈ လွင်ႈမဝ်းမိင်းၼၼ်ႉၵေႃႈ လႆႈပိၵ်ႉဢိုတ်းၵႂႃႇၼႆသေတႃႉ တွၼ်ႈတႃႇၵူၼ်းမီးငိုၼ်းၶဝ်တႄႉ ဢမ်ႇလႆႈၼပ်ႉပႃး၊ မိူဝ်ႈၶၢဝ်းယၢမ်းဢၼ်လပ်းသိင်ႇတၼ် ၵူၼ်းမီးငိုၼ်းၶဝ်လၢႆလၢႆၵေႃႉ ဢွၼ်ၵၼ်ၶဝ်ႈၵႂႃႇ ၼႂ်းလၢၼ်ႉမူၼ်ႈသိူဝ်း KTV တီႈၼိုင်ႈ ဢၼ်ပိၵ်ႉဝႆႉၼၼ်ႉယူႇယဝ်ႉ။ သမ်ႉဝႃႈတေပိၵ်ႉဢိုတ်းဝႆႉၽၢႆႇၼွၵ်ႈသေတႃႉ ၽၢႆႇတၢင်းၼႂ်းမၼ်းတႄႉ ၵမ်ႈၽွင်ႈယင်းတိုၵ်ႉမႃးႁဵတ်းၵၢၼ်ၵိၼ်ၵျေႃႇလေႃႇမူၼ်ႈ ၵၼ်လႆႈလီယူႇ။
မိူဝ်ႈဢၼ်ၵူၼ်းၸိူဝ်းၼၼ်ႉ ၼင်ႈၵျေႃႇလဝ်ႇမူၼ်ႈတင်း သၢဝ်လဝ်းၼုမ်ႇၼုမ်ႇဢွၼ်ႇ မဝ်းမိင်းၸွမ်းၼမ်ႉသူႇရႃႇယူႇၼၼ်ႉ ၸင်ႇသမ်ႉမီး ၵူၼ်းလူင်ၵေႃႉၼိုင်ႈ ပႆၶဝ်ႈမႃး တင်းၽူႈမၢႆၸမ်တူဝ်ယိင်းၵေႃႉၼိုင်ႈသေ ၵူၼ်းၸိူဝ်းၼၼ်ႉၵေႃႈ ဢွၼ်ၵၼ်ဢွၵ်ႇၽၢင်ႁၢင်ႈၼိမ် ၼပ်ႉယမ်မႃးသေယဝ်ႉ ယိင်းသၢဝ်ဢွၼ်ႇၸိူဝ်းၼၼ်ႉၵေႃႈ ဢွၼ်ၵၼ်ဢွၵ်ႇၵႂႃႇပႅတ်ႈသေ ၵိုတ်းဝႆႉ ၵူၼ်းမီးငိုၼ်းၶဝ်ၸိူဝ်းၼၼ်ႉၵူၺ်းယဝ်ႉ။
“ငဝ်းလၢႆးဝၢၼ်ႈမိူင်းပေႃးပဵၼ်တၢၼ်ႇၼႆႉ ယင်းတိုၵ်ႉမီးၶၢဝ်းယၢမ်းမႃးၼင်ႈ ၵျေႃႇၸိူင်ႉၼႆယူႇႁႃႉ” ၵေႃႉပဵၼ်ၽူႈယႂ်ႇလိူဝ်ပိူၼ်ႈဢၼ်တိုၵ်ႉႁွတ်ႈမႃးထိုင် မီးၸိုဝ်ႈဝႃႈ ၸဝ်ႈလွၼ်ႉၶိူဝ်း ၼၼ်ႉလၢတ်ႈၸူး ၵူၼ်းၸိူဝ်းၼၼ်ႉ။
ၶဝ်ၸိူဝ်းၼၼ်ႉၵေႃႈၼင်ႈၼိမ်ယဵၼ်သေ “ဢေႃႈ..ၸူဝ်ႈၵႅပ်ႉၸူဝ်ႈၵမ်းၵူၺ်း ဢမ်ႇပဵၼ်သင်ၶႃႈ” ၵူၼ်းၼႂ်းၼၼ်ႉၵေႃႉၼိုင်ႈ ဢၼ်ၸိုဝ်ႉႁွင်ႉ ၸဝ်ႈပၢင်ႇ လၢတ်ႈ။
ၸဝ်ႈလွၼ်ႉၶိူဝ်းၼၼ်ႉၵေႃႈ မႃးတူပ်းသႂ်ႇႁူဝ်မႃႇၸဝ်ႈပၢင်ႇၼၼ်ႉသေ “တေႁဵတ်းသင်ၵေႃႈၾၢင်ႉဢိတ်ႉၼိုင်ႈလႄႈ ၵျေႃႇလူၼ်ႉပူၼ်ႉလိူဝ်ၼႃႇၵေႃႈဢမ်ႇလီ ပေႃးၸပ်းၶူဝ်ႇဝိတ်ႉမႃးတေႁဵတ်းႁိုဝ်လႃႇ ၸွင်ႇလၢတ်ႈလႆႈႁႃႉဝႃႈ လုၵ်ႈဢွၼ်ႇၸိူဝ်းၼၼ်ႉ ဢမ်ႇၸပ်းမႃးၼႆ”
ဢဝ်ၸဝ်ႈပၢင်ႇၼႃႈပေႃးယူဝ် လွမ်လွမ်ၵူဝ်မႃးယဝ်ႉ။ ၸဝ်ႈလွၼ်ႉၶိူဝ်းၵေႃႈ ဝၢႆႇၼႃႈယၵ်ႉတူၺ်း ၽူႈမၢႆၸမ်တူဝ်ဢၼ်ၸုၵ်းယူႇႁိမ်းၶၢင်ႈမၼ်းၼၼ်ႉသေ ၵူၼ်းၵေႃႉၼၼ်ႉၵေႃႈ မိူၼ်တေႁူႉၵၢၼ်လႄႈ လႆႈဢဝ်တင်းထူင်လိၵ်ႈဢၼ်ၼိုင်ႈ ဢွၵ်ႇမႃးတမ်းၼိူဝ်ၽိူၼ်ၼၼ်ႉယဝ်ႉ ၼႂ်းထူင်လိၵ်ႈၼၼ်ႉၵေႃႈ လိူဝ်သေမီးသၢႆမၢႆၸလၢင်းၶပ်ႉယႆၸႅၼ်ႇတင်းၼမ်ယဝ်ႉ သမ်ႉမီးပႃး ၶႅပ်းႁၢင်ႈ ၸဝ်ႈပၢင်ႇ ဢၼ်ႁဵတ်းၵၢၼ်ၵႃႉၶၢႆၸွမ်းၵူၼ်းတၢင်ႇတီႈ ႁႃပၢႆးမၢၵ်ႈမီးသုၼ်ႇတူဝ် လူၺ်ႈၸဝ်ႈလွၼ်ႉၶိူဝ်းဢမ်ႇႁူႉၸွမ်းၼၼ်ႉ မီးတင်းၼမ်တင်းလၢႆ ယူႇယဝ်ႉ။
“ၸိူဝ်းၼႆႉပဵၼ်သင်ၶႃႈၸဝ်ႈ” သမ်ႉဝႃႈၸဝ်ႈပၢင်ႇၼၼ်ႉ တေဢႃႇယုယႂ်ႇလိူဝ်သေ ၸဝ်ႈလွၼ်ႉၶိူဝ်းသေတႃႉ ၵွပ်ႈပိူဝ်ႈၸၼ်ႉလဵၵ်ႉလိူဝ်ၼၼ်ႉယဝ်ႉ။
ၸဝ်ႈလွၼ်ႉၶိူဝ်း ပဵၼ်ၸဝ်ႈသိုၵ်းၼႂ်းတပ်ႉသိုၵ်းတႆးၵေႃႉၼိုင်ႈလႄႈ ပဵၼ်ၵူၼ်းဢၼ်ယႂ်ႇလိူဝ်ပိူၼ်ႈ ၼႂ်းၼႃႈတီႈၵုမ်းၵမ်တပ်ႉသိုၵ်းတႆးတီႈၼိုင်ႈယဝ်ႉ၊ ၵွပ်ႈပိူဝ်ႈ ပဵၼ်သိုၵ်းၵဝ်ႇဢၼ်တိုၵ်းသိုၵ်းၵတ်ႉၶႅၼ်ႇလႄႈ ႁူႉလိၵ်ႈႁူႉလၢႆးသေ ႁဵတ်းၵၢၼ်ၵတ်ႉၶႅၼ်ႇၵေႃႉၼိုင်ႈ ဢႃႇယုမၼ်းၸဝ်ႈတႄႉ မီးမွၵ်ႈ 45 ပီႊ ၵွပ်ႈႁဵတ်းသိုၵ်းၸဵမ်မိူဝ်ႈဢႃႇယုယင်းတိုၵ်ႉလႆႈ သိပ်းၸဵတ်းၼၼ်ႉယူႇ။
“မီးသၢၵ်ႈသေႇမၼ်းပေႃးတၢၼ်ႇၼႆႉယဝ်ႉ ၸဝ်ႈယင်းတိုၵ်ႉႁတ်းဝႃႈပဵၼ်သင်ထႅင်ႈယူႇႁႃႉ”
“ဝၼ်းၸိုၼ်ႈ! လၢတ်ႈၼႄတူၺ်းလူး”
ဝၼ်းၸိုၼ်ႈ ၵေႃႉပဵၼ်ၽူႈမၢႆၸမ်တူဝ် ၸဝ်ႈလွၼ်ႉၶိူဝ်း လႄႈ ပဵၼ်ၵူၼ်းၵေႃႉဢၼ် ၸဝ်ႈလွၼ်ႉၶိူဝ်းဝႆႉၸႂ်လိူဝ်ပိူၼ်ႈ ပဵၼ်ၵူၼ်းႁဵတ်းၵၢၼ်ပၼ်လႆႈၵူႈလွင်ႈၼၼ်ႉယဝ်ႉ။ မၼ်းၵေႃႈ ဢဝ်ၶႅပ်းႁၢင်ႈ ၼႂ်းလပ်းသိင်ႇ ဢၼ်မီးၸဝ်ႈပၢင်ႇ ၵူတ်ႇထတ်းၸႅတ်ႈယႃႈၾိၼ်ႇၽိူၵ်ႇ ဢိၵ်ႇတင်း ၸပ်းမိုဝ်းၵၼ်တင်းၵူၼ်းႁဵတ်းၵၢၼ်ၼွၵ်ႈမၢႆမီႈ ဢၼ်ၶဝ်ႁူႉၸၵ်းၵၼ်ယူႇဝႃႈ “ၸၢင်းဝူၺ်ႇ” လၢဝ်းပၢၼ်းၶႄႇ ဢၼ်ဢမ်ႇမီးၽႂ်ႁတ်းၵဝ်းၸွမ်းမၼ်းလႆႈလႄႈ ပဵၼ်ပေႃႈလဵင်ႉလၢဝ်းပၢၼ်း ၽၢႆႇၼႃႈႁဵတ်းၵၢၼ်သိုဝ်ႈယူဝ်း ႁပ်ႉတေႃႉသူင်ႇၵုၼ်ႇၵႃႉၶူဝ်းၶွင် ၼႂ်းမိူင်းဢွၵ်ႇၼွၵ်ႈမိူင်း လႄႈ ဢဝ်ၼႂ်းမိူင်းၶဝ်ႈမႃး မၼ်းပဵၼ်ၸဝ်ႈၶွင်ၶွမ်ႇပၼီႇဝႆႉယဝ်ႉ။ ၵူၺ်းၵႃႈ ၵူၼ်းႁဵတ်းၵၢၼ်ၼႂ်းတူင်ႇဝူင်းလဵဝ်ၵၼ်တႄႉၵေႃႈ တေႁူႉလီလိူဝ်ပိူၼ်ႈဝႃႈ တီႈတေႉပဵၼ်ပေႃႈလဵင်ႉလၢဝ်းပၢၼ်းႁဵတ်းၵၢၼ်သၢႆလမ် ၼႆယဝ်ႉ။
“ဢမ်ႇလူဝ်ႇလႆႈသပ်းလႅင်းၼႄ ႁၼ်ႁၢင်ႈမၼ်းၵူၺ်းၵေႃႈ ပေႃးႁူႉလႆႈၵမ်းလဵဝ်ယဝ်ႉဝႃႈ မၼ်းပဵၼ်သင်ၼႆ”
“မၼ်းဢမ်ႇၸႂ်ႈၶႃႈ ၼၼ်ႉမၼ်းပဵၼ်မိူဝ်ႈၶႃႈၵႂႃႇတူၺ်းၶဝ်ႈ ဢၼ်ၵူၼ်းမိူင်းၶဝ်မႃးသူင်ႇပၼ်ၼၼ်ႉၵူၺ်းဢေႃႈ၊ ဢၼ်တီႈၵႂႃႇထူပ်းၸၢင်းဝူၺ်ႇၼၼ်ႉ ၶႃႈၵေႃႈလႆႈၵႂႃႇထူပ်းတေႉယူႇ ၵူၺ်းၵႃႈ မၼ်းဢမ်ႇၸႂ်ႈလွင်ႈယႃႈ”
“ႁိုဝ်ႉ!!…မၼ်းပဵၼ်လွင်ႈၼႆႉဢမ်ႇၸႂ်ႈႁႃႉ” ၸဝ်ႈလွၼ်ႉၶိူဝ်းၵေႃႈ ဢဝ်တင်းၽိုၼ်ၸေႈၼၼ်ႉပိုဝ်ႈသႂ်ႇပၼ်ၼႃႈ ၸဝ်ႈပၢင်ႇၼၼ်ႉၵႂႃႇ။
“လၵ်ႉဢဝ်ၶဝ်ႈၵႂႃႇၶၢႆပၼ် ၸၢင်းဝူၺ်ႇ လၢတ်ႈၸဝ်ႈယဝ်ႉလူးဝႃႈ ယႃႇၵဵဝ်ႇၶွင်ႈတၢင်းမၼ်းယဝ်ႉၼႆ ၸဝ်ႈယင်းတိုၵ်ႉႁဵတ်းယူႇလႃႇ”
ငဝ်းလၢႆးၼႂ်းႁွင်ႈၼၼ်ႉၵေႃႈ မိူၼ်ႁၢင်ႈယူႇယၢပ်ႇၵပ်ႉၵိၼ်းမႃး ႁင်းၽႂ်ႁင်းမၼ်းယဝ်ႉ။ ၸဝ်ႈပၢင်ႇၼၼ်ႉၵေႃႈ ၼႅတ်ႈၵႄႈတူဝ်ၵႂႃႇ
“ၵွပ်ႈဝႃႈ ႁႂ်ႈလႆႈမီးငိုၼ်းၵမ်ႉၸွႆႈၵႃႈၶဝ်ႈၵႃႈၽၵ်းလုၵ်ႈဢွၼ်ႇၶဝ်ၶႃႈဢေႃႈ”
ၸဝ်ႈလွၼ်ႉၶိူဝ်း ဢၼ်လႆႈငိၼ်းၼင်ႇၼႆၵေႃႈ မိူၼ်တေၵတ်းၸႂ်မႃးသေ “ဢေႃႈ ၸိူင်ႉၼၼ်ႁႃႉ ယဝ်ႉလွင်ႈယႃႈၼၼ်ႉလူး ၸဝ်ႈတေဝႃႈၸိူင်ႉႁိုဝ်လႃႇ”
“ၼၼ်ႉမၼ်းပဵၼ်ၼႂ်းယေးၶဝ်ႈၶႃႈဢေႃႈ ႁၢင်ႈမၼ်းၵေႃႈဢမ်ႇပေႃးၸႅင်ႈလီၶႃႈလူး မိူဝ်ႈၼၼ်ႉ မိူၼ်ၶႃႈတေၵႂႃႇဢဝ်ၵိူဝ်ပၼ်လုၵ်ႈဢွၼ်ႇၶဝ်ဢမ်ႇႁူႉယဝ်ႉ ယႃႈဢၼ်ဝႃႈၼၼ်ႉ ၶႃႈဢမ်ႇတွၼ်ႉၵဵဝ်ႇၶွင်ႈၸွမ်းမၼ်းသေပွၵ်ႈၶႃႈ”
လၢတ်ႈဢဝ်ဝၼ်းၸိုၼ်ႈ ပေႃးယုမ်ႉၵိူဝ်ႉဢွၵ်ႇမႃး လူၺ်ႈၶေႃႈၵႂၢမ်းၸဝ်ႈပၢင်ႇၼၼ်ႉယူႇ။
“ပွၵ်ႈၼႆႉၵေႃႈယဝ်ႉသေ ပွၵ်ႈၼႃႈမႃးယႃႇပေႁႂ်ႈလႆႈႁၼ်ႁဵတ်းၸိူင်ႉၼႆထႅင်ႈ”
“ဢေႃႈ ဢေႃႈၶႃႈ”
ၸဝ်ႈလွၼ်ႉၶိူဝ်းၵေႃႈ ဢွၵ်ႇမိူဝ်းၵႂႃႇပႅတ်ႈၶဝ် လူၺ်ႈမီးဝၼ်းၸိုၼ်ႈၵႂႃႇသူင်ႇတီႈၵႃးယဝ်ႉ။
“လွင်ႈၼႆႉ တေပွႆႇဝႆႉမွၵ်ႈၼႆႉၵူၺ်းယဝ်ႉႁႃႉဢူႈ”
“မိူဝ်ႈၶဝ်လၢတ်ႈဝႃႈၸႂ်ႈၼႆၵေႃႈ တေၵႂႃႇဢဝ်တၢင်းၽိတ်းၶဝ်လႆႈၸိူင်ႉႁိုဝ်”
ၸႂ်ႈယဝ်ႉၵၢၼ်ၸိူင်ႉၼႆ ၽႂ်ၵေႃႈႁူႉၽႂ်ႁူႉမၼ်းယူႇၵူၺ်း ယႃႇႁဵတ်းထႅင်ႈၼႆၵေႃႈ သင်ႁၢမ်ႈလႆႈတေဢမ်ႇမီးၽႂ်ႁဵတ်းထႅင်ႈယဝ်ႉ၊ ယွၼ်ႉႁၢမ်ႈဢမ်ႇလႆႈလႄႈ မိူဝ်ႈမၼ်းပူၼ်ႉလိူဝ်ၼႃႇဢႃးလႃးၵေႃႈ ပၼ်ၾၢင်ႉၵႂႃႇလႆႈမွၵ်ႈၼၼ်ႉၵူၺ်း ဢမ်ႇၸၢင်ႈႁဵတ်းသင်လႆႈတေႉတေႉ။
ဝၼ်းၸိုၼ်ႈၵေႃႈ သူင်ႇၸဝ်ႈလွၼ်ႉၶိူဝ်းပွၵ်ႈမိူဝ်းၵႂႃႇဢွၼ်တၢင်းသေ မၼ်းမီးၵၢၼ် တေလႆႈၸတ်းၵၢၼ်ၵႂႃႇပၼ်ၶဝ်ၸိူဝ်းၼၼ်ႉထႅင်ႈၼႆလႄႈ ဢမ်ႇပႆႇၸၢင်ႈပွၵ်ႈမိူဝ်းၸွမ်း ယူႇယဝ်ႉ။
တႃႇတွင်း။ ။ ၸိူင်းႁူဝ်ၼႆႉ လွင်ႈတၢင်းပိူင်ပဵၼ်ငဝ်းလၢႆးဢမ်ႇၸႂ်ႈလွင်ႈတေႉ ပဵၼ်လွင်ႈဝူၼ်ႉသၢင်ႈမႃးဢဝ်ၵူၺ်း။
တွၼ်ႈသွင်သုတ်းၵႂႃႇယဝ်ႉ သိုပ်ႇဢၢၼ်ႇထႅင်ႈတွၼ်ႈသၢမ်ၶႃႈ။
