တွၼ်ႈသိပ်း
ၶၢဝ်းတၢင်းဢၼ်ဝၼ်းၸိုၼ်ႈလႆႈႁဵတ်းၵၢၼ်ႁူမ်ႈၵၼ်တင်း ၸၢႆးလိူၼ်မႃးၼၼ်ႉ ပဵၼ်ၶၢဝ်းယၢမ်းၸူဝ်ႈၵႅပ်ႉၵမ်းဢွၼ်ႇၵူၺ်းသေတႃႉ တွၼ်ႈတႃႇတင်းသွင်တႄႉ သၢင်ႈပၼ်လွင်ႈမၢႆတွင်းဢၼ်ဢမ်ႇမေႃလိုမ်းလႄႈ ပဵၼ်လွင်ႈမၢႆတွင်းဢၼ်ႁိုင်ယိုၼ်း ၵိုမ်းမၼ်ႈယူႇၼႂ်းဢူၵ်းႁူဝ်ၸႂ်ဝႆႉ ႁင်းၽႂ်ႁင်းမၼ်းယဝ်ႉ။
လွင်ႈတူင်ႉၼိုင်ဢၼ်မီးႁူမ်ႈၵၼ်၊ လွင်ႈသႂ်ႇၸႂ်ဢၼ်ယိုၼ်ႈပၼ်ၵၼ်၊ လွင်ႈမႆႈၸႂ်ဢၼ်မီးတေႃႇၵၼ် လွင်ႈတၢင်းႁၵ်ႉဢၼ်ႁပ်ႉႁူႉထိုင်လႆႈ ၼႂ်းႁူဝ်ၸႂ် ဢၼ်လႆႈသူင်ႇယိုၼ်ႈမႅင်ႇၵၼ်ၵူႈဝၼ်းၵူႈဝၼ်းၼၼ်ႉ သမ်ႉဝႃႈ ဢမ်ႇလၢတ်ႈဢွၵ်ႇသူပ်းၵေႃႈ ၼႂ်းၸႂ်ၽႂ်မၼ်းမိူၼ်တေႁပ်ႉႁူႉလႆႈယူႇ။ တေႃႈၼင်ႇဢမ်ႇႁူႉဝႃႈ တေလႆႈႁူပ်ႉၵၼ်ပဵၼ်ဝၼ်းလိုၼ်းသုတ်း ၸၢႆးလိူၼ်ၵေႃႈ လႆႈမႃးသူင်ႇသင်ႇဝၼ်းၸိုၼ်ႈ ၼႂ်းဝၼ်းဢၼ်တေလႆႈၽၢတ်ႇၵၢၼ်ၵႂႃႇ ႁူမ်ႈပႃးလိၵ်ႈၽိုၼ်ၼိုင်ႈ ဢၼ်ယိုၼ်ႈသႂ်ႇၼႂ်းမိုဝ်း ဝၼ်းၸိုၼ်ႈ ၵႂႃႇယူႇယဝ်ႉ။
ၼႂ်းလိၵ်ႈၼၼ်ႉတႄႉ လႆႈတႅမ်ႈထိုင် ၶေႃႈၵႂၢမ်းၼႂ်းဢူၵ်းႁူဝ်ၸႂ် ဢၼ်လႆႈႁၵ်ႉမႅၼ်ႈဝၼ်းၸိုၼ်ႈလူၼ်ႉလိူဝ်ႁႅင်း လႄႈ သင်ဝႃႈလႆႈၶိုၼ်းထူပ်းၵၼ်ထႅင်ႈ ဢမ်ႇဝႃႈမိူဝ်ႈလႂ်ၵေႃႈယဝ်ႉ တေယွၼ်းၵူပ်ႉၵူႈဝၼ်းၸိုၼ်ႈႁႂ်ႈႁူမ်ႈပဵၼ်ႁိူၼ်းလဵဝ်ၵၼ်ၵႂႃႇ ၼႆယူႇ။
ဝၼ်းၸိုၼ်ႈၵေႃႈ လုတ်ႇလႅၼ်းယႃႈမၼ်းသဵင်ႈၵႂႃႇလႅၼ်းၼိုင်ႈယဝ်ႉလႄႈ ဝၢႆႇၼႃႈယၵ်ႉတူၺ်းၵႂႃႇ ၸၢႆးလိူၼ်ၼၼ်ႉသေ
“တေႇၼႃႈႁိူၼ်းယဝ်ႉႁႃႉ!”
“ၶႂၢင်းပၼ်ဢိတ်ႉၼိုင်ႈၼႃႈ ႁဝ်းယွမ်းၼွမ်းယူႇ ႁဵတ်းၸွမ်းၵႂၢမ်းမၼ်ႈဢၼ်ပၼ်သူဝႆႉဢမ်ႇလႆႈ”
ဝၼ်းၸိုၼ်ႈယၵ်ႉတူၺ်းၼႃႈၸၢႆးလိူၼ်ယဝ်ႉ ထူၺ်ႈၸႂ်ဢွၵ်ႇမႃးၼင်ႇလူမ်ၸႂ် “တေႇယဝ်ႉၵေႃႈ..လီယဝ်ႉၼႃႇ”
“ႁဝ်းၵေႃႈ..မီးလွင်ႈၶႂ်ႈထၢမ်သူယူႇၼႃ”
“ထၢမ်မႃးလႄႈ…”
“ဝၼ်းၼၼ်ႉ မိူဝ်ႈသိပ်းပီပူၼ်ႉမႃးၼၼ်ႉ တီႈငဝ်ႈၸုမ်း ၽွင်းဢၼ်ပိူၼ်ႈၸႅၵ်ႇၽႄၵူၼ်းၼႂ်းတပ်ႉႁဝ်း ၵႂႃႇၵေႃႉတီႈၵေႃႉတၢင်းၼၼ်ႉ သူၵေႃႈယူႇတီႈၼၼ်ႈယူႇၸွင်ႇၸႂ်ႈ”
ဝၼ်းၸိုၼ်ႈလႄႈတင်းၶမ်းလိုၼ်းၼၼ်ႉၵေႃႈ လႆႈဢွၼ်ၵၼ်ပွၵ်ႈမႃး ႁဵတ်းၵၢၼ်ယူႇတီႈ ငဝ်ႈၸုမ်းၶဝ်သေ ဝၼ်းဢၼ် တပ်ႉၸဝ်ႈလွၼ်ႉၶိူဝ်းၶဝ် တူၵ်းသုမ်းၵႂႃႇလႄႈ ထုၵ်ႇသင်ႇထွၼ်တပ်ႉၼၼ်ႉ လႆႈဢွၼ်ၵၼ်ပွၵ်ႈမႃးၶိုၼ်းတီႈငဝ်ႈၸုမ်းသေ ဝၼ်းၸိုၼ်ႈၵေႃႈ လႆႈႁၼ်မႅၼ်ႈၺႃး ၸၢႆးလိူၼ်ယူႇ၊ ၵူၺ်းၵႃႈ မၼ်းၵေႃႈ ၵူဝ်ဝႃႈၸၢႆးလိူၼ်ၼၼ်ႉ တေႁၼ်မၼ်းယဝ်ႉ ၼႅတ်ႈဢွၵ်ႇပၢႆႈၵႂႃႇပႅတ်ႈယူႇ၊ မိူဝ်ႈမၼ်းဢွၵ်ႇၽၵ်းတူၵႂႃႇၼၼ်ႉ ၵွပ်ႈပဵၼ်ၵူၼ်းဢၼ်ယၢမ်ႈႁူႉၸၵ်းလႄႈ သမ်ႉဝႃႈပူၵ်ႉၼႃႈပူၵ်ႉတႃႁိုဝ် တေႁၼ်ၽၢႆႇလင်ၵူၺ်းၵေႃႈ ၸၢႆးလိူၼ်ၼၼ်ႉတႄႉ တွင်းလႆႈလီၼႃႇ၊ ႁၼ်ၼင်ႇၼၼ်ယဝ်ႉ ၸၢႆးလိူၼ်ၵေႃႈလႆႈႁွင်ႉၸိုဝ်ႈဝၼ်းၸိုၼ်ႈၵႂႃႇ ၵူၺ်းၵႃႈ ယိုင်ႈၶႅၼ်းႁဵတ်းႁႂ်ႈဝၼ်းၸိုၼ်ႈပႆဝႆးထႅင်ႈယူႇ၊ ၽွင်းၼၼ်ႉ ၸၢႆးလိူၼ်သမ်ႉ လႆႈႁပ်ႉတၢင်းမၢတ်ႇၸဵပ်းတီႈၶႃလႄႈ ဢမ်ႇၸၢင်ႈလႅၼ်ႈလမ်းၸွမ်းလႆႈ။
“ၵူၼ်းၵေႃႉဢၼ်သူႁွင်ႉၼၼ်ႉ ပဵၼ်ႁဝ်းၵူၺ်း! မၼ်းဢမ်ႇၸႂ်ႈလွင်ႈဢမ်ႇသၢင်ႇထုၵ်ႇလေႃႇ ဢၼ်ဢမ်ႇလႆႈႁူပ်ႉၺႃးသူ မၼ်းပဵၼ်လွင်ႈတင်ႈၸႂ်ႁဝ်း ဢၼ်ဢမ်ႇၶႂ်ႈႁူပ်ႉသူၼၼ်ႉၵူၺ်း။ ၼႂ်းၶၢဝ်းတၢင်း သိပ်းပီ ဢၼ်ဢမ်ႇလႆႈႁူပ်ႉၺႃးၵၼ်လႆႈၼၼ်ႉၵေႃႈ မၼ်းပဵၼ်လွင်ႈတင်ႈၸႂ်ႁဝ်းမိူၼ်ၵၼ်၊ ႁဝ်းတင်ႈၸႂ်ဢမ်ႇၸွမ်းၶႆႈသူလႄႈ ဢမ်ႇလႆႈသူၼ်ၸႂ်သူ ႁဵတ်းႁႂ်ႈႁဝ်းလႄႈသူၼၼ်ႉ ဢမ်ႇလႆႈႁူႉလွင်ႈၵၼ် ဢမ်ႇလႆႈႁူပ်ႉၺႃးၵၼ်မႃး ၸင်ႇလႆႈလိုမ်းၵၼ်ၵႂႃႇၼၼ်ႉၼႃႇ”
“ႁူႉယူႇသူပဵၼ်ၵူၼ်းၸႂ်ႁၢႆႉ ၵူၺ်းၵႃႈ သူၵေႃႈၸႂ်ႁၢႆႉတေႉတေႉၼၼ်ႉယဝ်ႉ တေမႃးလၢတ်ႈႁႂ်ႈႁူဝ်ၸႂ်ႁဝ်းၸဵပ်းထႅင်ႈႁဵတ်းသင်”
“ယွမ်းၼွမ်းယူႇၼႃႈ မိူဝ်ႈၼၼ်ႉ ႁဝ်းယင်းတိုၵ်ႉၵေႃႉလဵၵ်ႉယူႇ လွင်ႈဢၼ်ႁဝ်းႁဵတ်းလႆႈလီလိူဝ်သေပိူၼ်ႈၵေႃႈ ပဵၼ်လွင်ႈပၢႆႈၵူၺ်း၊ ဢၼ်လႆႈမႃးႁူပ်ႉသူဝၼ်းမိူဝ်ႈၼႆႉတႄႉ ဢမ်ႇၸႂ်ႈလွင်ႈတင်ႈၸႂ်ၼႃ ပဵၼ်လွင်ႈဢမ်ႇသၢင်ႇထုၵ်ႇၵူၺ်းၼင်ႇၵဝ်ႇ ႁဝ်းၵေႃႈဢမ်ႇႁူႉဝႃႈ သူတေမႃးမီးယူႇတီႈၼႆႈ ဢၼ်လႆႈၶဝ်ႈတူင်ႉတၵ်ႉသူၼၼ်ႉတႄႉ ပဵၼ်လွင်ႈတင်ႈၸႂ်ႁဝ်းယဝ်ႉ သင်ဝႃႈမၼ်းယင်းမီးတွၼ်ႈတႃႇႁဝ်းၵႄႈၶႆလႆႈယူႇ ႁဝ်းၵေႃႈတေႁူပ်ႉတေႃႇၼႃႈမၼ်းသေၵႄႈၶႆၵႂႃႇ”
ဝၼ်းၸိုၼ်ႈ ဢဝ်လႅၼ်းယႃႈမၼ်းထႅင်ႈလႅၼ်းၼိုင်ႈ ၸပ်းၾႆးယဝ်ႉလုတ်ႇၵႂႃႇၵမ်းၼိုင်ႈသေလၢတ်ႈထႅင်ႈ “သင်ႁဝ်းႁတ်းႁူပ်ႉတေႃႇၼႃႈသူသေ လၢတ်ႈသူၵႂႃႇသိုဝ်ႈသိုဝ်ႈၸဵမ်မိူဝ်ႈဝၼ်းၼၼ်ႉ မၼ်းတင်းတေလီတေႃႇသူတင်းၼမ်ၼၼ်ႉယဝ်ႉ၊ ယွမ်းၼွမ်းၼႃႈ ဢၼ်ႁဵတ်းႁႂ်ႈသူလႆႈဝူၼ်ႉၽိတ်းတေႃႇႁဝ်းလႄႈ ႁဵတ်းႁႂ်ႈသူပဵၼ်ၵူၼ်းဢမ်ႇႁဵတ်းၸွမ်းၵႂၢမ်းမၼ်ႈလႆႈ မၼ်းပဵၼ်တၢင်းၽိတ်းႁဝ်းဝၼ်းၼၼ်ႉသေတႃႉ မၼ်းၵေႃႈၵႄႈၶႆသင်ၵႂႃႇဢမ်ႇလႆႈယဝ်ႉ လွင်ႈႁဝ်းၼၼ်ႉ ႁႂ်ႈမၼ်းပဵၼ်လွင်ႈဝၼ်းလင်ၵႂႃႇသေလႄႈ ပဵၼ်ၶေႃႈၵႂၢမ်း ဢၼ်ၶႂ်ႈလၢတ်ႈမႃးတႃႇသေႇမိူဝ်ႈႁဝ်းဝူၼ်ႉထိုင်သူ ယိၼ်းၸူမ်းယဝ်ႉၼႃႈ ဢၼ်ႁဵတ်းႁႂ်ႈႁဝ်းလႆႈမႃးထူပ်းသူၼႂ်းဝၼ်းမိူဝ်ႈၼႆႉ”
“လီတေႉယဝ်ႉ” ၸၢႆးလိူၼ်ၵေႃႈ လၢတ်ႈလူၺ်ႈသီၼႃႈဢၼ်လူမ်ၸႂ်တေႉတေႉၼၼ်ႉသေ သိုပ်ႇလၢတ်ႈၸူးဝၼ်းၸိုၼ်ႈၵႂႃႇ “ၸူမ်းယဝ်ႉၼႃႈ..”
သွင်ၶႃၵေႃႈဢမ်ႇသိုပ်ႇလၢတ်ႈသင်ထႅင်ႈ လိူဝ်သေပဝ်ႇပုၼ်ႈၵႂၼ်းလႅၼ်းယႃႈၶႃၵႂႃႇ ႁင်းၽႂ်ႁင်းမၼ်းၵူၺ်း။
“သူၵေႃႈ..တေႇၼႃႈႁိူၼ်းယဝ်ႉႁႃႉ!”
“ႁဝ်းဝူၼ်ႉဝႃႈ ၵူၼ်းၸိူင်ႉၼင်ႇႁဝ်းၼႆႉ ဢၼ်ဢမ်ႇမီးၼႃႈႁိူၼ်းၼၼ်ႉ ပဵၼ်လွင်ႈၵၢမ်ႇလီဢၼ်ၼိုင်ႈယဝ်ႉ”
“ပဵၼ်သင်လႄႈလၢတ်ႈၸိူင်ႉၼၼ်လႃႇ”
“ၵွပ်ႈႁဝ်းပဵၼ်ၵူၼ်းၸိူင်ႉၼႆယူဝ်ႉ ၵႂႃႇလႄႈ! ၶဝ်ႈၵႂႃႇတၢင်းၼႂ်းၶိုၼ်း”
လိုၵ်းယူႇတၢၼ်ႇတၢၼ်ႇ ၵူၼ်းၸိူဝ်းၼၼ်ႉၵေႃႈ ဢွၼ်ၵၼ်ၵိၼ်သမ်ႉပေႃးမဝ်း ၼွၼ်းမၢၵ်ႇၼွၼ်းမိူဝ်လူင်ၵႂႃႇမူတ်းယဝ်ႉ၊ ဝၼ်းၸိုၼ်ႈၼၼ်ႉၵေႃႈ မဝ်းတႄႉမဝ်းယူႇ ၵူၺ်းၵႃႈဢမ်ႇမဝ်းတၢၼ်ႇၶဝ်သေ ၸေးဢဝ်ဢၢႆႈၸၢႆးဢွၼ်ႇ ဢၼ်ၼွၼ်းလပ်းယူႇၼႂ်းႁိူၼ်းၸဝ်ႈလၢၼ်ႉၼၼ်ႉ ၸေးလင်မၼ်းမိူဝ်းၵႂႃႇလွႆးလွႆးယဝ်ႉ လၢတ်ႈလူင်မိူဝ်းၵႂႃႇႁင်းၵူၺ်း။
“ဢၢႆႈၸၢႆး ၸွင်ႇမႂ်းႁူႉႁိုဝ်ဝႃႈ ပေႃးမီးၼႃႈႁိူၼ်းၼႆ ၼႃႈႁိူၼ်းၼၼ်ႉ ပဵၼ်တီႈယူပ်ႈယွမ်းႁဝ်းမႃးၵမ်းလဵဝ် ပဵၼ်တီႈဢၼ်တိုတ်ႉၼွင်ႇႁဝ်းဝႆႉ ဢမ်ႇပၼ်ႁႂ်ႈႁဝ်းၵႂႃႇလႆႈလွတ်ႈလႅဝ်း၊ ၸၼ်ႁွႆႈၸပ်းၸွမ်းယူႇတႃႇသေႇ တေၵႂႃႇလႂ် တေႁဵတ်းသင်ၵေႃႈ တေလႆႈဝူၼ်ႉပႃႈၼႃႈပႃႈလင် ၸွင်ႇမၼ်းတေတုမ်ႉတိူဝ်ႉၼႃႈႁိူၼ်းၵဝ်ယူႇႁိုဝ်၊ ဢၼ်လႆႈႁၼ်ၵူၼ်းၵေႃႉဢၼ်ႁဝ်းႁၵ်ႉလႆႈလိူတ်ႇမႆႈၼၼ်ႉ မၼ်းတုၵ်ႉၶလိူဝ်သေ ဢၼ်ၸဝ်ႈၵဝ်ႇလႆႈယၢပ်ႇၸႂ် ပဵၼ်သိပ်းပုၼ်ႈယဝ်ႉ ၵဝ်လႆႈတွၼ်ႈသွၼ်မၼ်းမႃးတီႈဢူႈသူၼၼ်ႉယဝ်ႉ”
လုၵ်ႈဢွၼ်ႇထွမ်ႇဢမ်ႇထွမ်ႇတႄႉဢမ်ႇႁူႉ ၵူၼ်းမဝ်းမၼ်းၶႂ်ႈလၢတ်ႈသင် မၼ်းၵေႃႈလၢတ်ႈၵႂႃႇတိၵ်းတိၵ်းၼၼ်ႉယဝ်ႉ။ ယၢမ်းၼၼ်ႉ ၸင်ႇသမ်ႉမီးသဵင်ၵွင်ႈ လင်မေႃးမႃးတၢင်းၶွၵ်ႈၶင်လႄႈ တီႈပိူၼ်ႈဝႆႉၵူၼ်းတိုတ်းယႃႈၼၼ်ႉသေ မီးၵူၼ်းၵေႃႉၼိုင်ႈ လႅၼ်ႈဢွၵ်ႇမႃးတၢင်းၶႃၼႃႉလၢၼ်ၼၼ်ႉသေ ဝၼ်းၸိုၼ်ႈ ဢၼ်ႁၼ်ၼင်ႇၼၼ်ၵေႃႈ ဝၢင်းတူဝ်ဢၢႆႈၸၢႆးလူင်းယဝ်ႉ၊ ၵႅတ်ႇႁႄႉၼႃႈၵူၼ်းၵေႃႉၼၼ်ႉသေ ဢဝ်ၶႃမၼ်းၶတ်းၶႃၵူၼ်းၵေႃႉၼၼ်ႉလူမ်ႉလူင်းၵႂႃႇယဝ်ႉ မၼ်းၵေႃႈၶုၼ်ႇတဵၵ်းတူဝ်ၵူၼ်းၵေႃႉၼၼ်ႉ မူပ်ႇၵိုၵ်းၸပ်းလိၼ်သေ ဢဝ်ၶႅၼ်မၼ်းပေႈပိၵ်ႇဝႆႉယဝ်ႉ။
“ဝႆႉသၢႆၸႂ်ၶႃႈဢိတ်ႉၼိုင်ႈ! ၶႃႈဢမ်ႇၸႂ်ႈၵူၼ်းတိုတ်းယႃႈ!!”
“ဢမ်ႇၸႂ်ႈၵူၼ်းတိုတ်းယႃႈ သမ်ႉတေလႅၼ်ႈႁဵတ်းႁင် ၽႂ်တေယုမ်ႇလႆႈ”
“လၢတ်ႈတေႉဢေႃႈ..ၶႃႈဢမ်ႇၸႂ်ႈၵူၼ်းၵိၼ်ယႃႈ ၵူၺ်းၵႃႈ ၶဝ်ၵေႃႈဢဝ်ၶႃႈမႃးသႂ်ႇၼႂ်းၶွၵ်ႈၼၼ်ႉၶႃႈၼႃႇ”
“ၽႂ်သမ်ႉဝႃႈမႂ်းပဵၼ်ၵူၼ်းၵိၼ်ယႃႈ!!..”
ဝၼ်းၸိုၼ်ႈၵေႃႈ ႁွင်ႉၵူၼ်းမႃးၸွႆႈဢဝ်ဢၢႆႈၵေႃႉၼၼ်ႉၵႂႃႇယူႇ။ ၵူၼ်းသိုၵ်းၸိူဝ်းၼၼ်ႉၵေႃႈ တင်းၺွပ်းၵူၼ်းၵေႃႉၼၼ်ႉသေ လၢတ်ႈၸူးဝၼ်းၸိုၼ်ႈ “ဢၢႆႈၵေႃႉၼႆႉ ပဵၼ်ၽူႈလၵ်ႉၽွၵ်ႈႁိူၼ်းပိူၼ်ႈ တိုၵ်ႉၺွပ်းမႃးလႆႈမိူဝ်ႈဝႃးၼႆႉၵူၺ်းၶႃႈ ယဝ်ႉၵေႃႈမၼ်းလႆႈလၵ်ႉၽွၵ်ႈဢွၵ်ႇၶွၵ်ႈသေ ပွႆႇပၼ်ၵူၼ်းတိုတ်းယႃႈဢွၵ်ႇၵႂႃႇ သင်ဢမ်ႇၸႂ်ႈၶုၼ်သိုၵ်းႁဝ်းၺွပ်းဝႆႉလႆႈတႄႉ တေယၢပ်ႇၸႂ်ႁဝ်းတေႉယဝ်ႉၶႃႈဢေႃႈၼႆႉ”
“ၵူၼ်းၸိူဝ်းၼၼ်ႉလူး တိဝႆႉလႆႈၶိုၼ်းမူတ်းယဝ်ႉႁႃႉ!”
“တိလႆႈမူတ်းယဝ်ႉၶႃႈ လိူဝ်ဢၢႆႈၼႆႉၵူၺ်း”
ဝၼ်းၸိုၼ်ႈၵေႃႈ ယၵ်ႉတူၺ်းၼႃႈဢၢႆႈၽူႈလၵ်ႉၼၼ်ႉသေယဝ်ႉ လၢတ်ႈသဵင်ၶႅင်ၵႂႃႇ “ပဵၼ်ၽူႈလၵ်ႉ!! လၵ်ႉပွႆႇပၼ်ၵူၼ်းတိုတ်းယႃႈၸိူင်ႉၼႆ တႅပ်းပႅတ်ႈမိုဝ်းမၼ်းလႄႈ”
“ဢေႃႈၶႃႈ!”
ၵူၼ်းသိုၵ်းဢၼ်မႃးတိဢဝ်ဢၢႆႈၼၼ်ႉၵႂႃႇၵေႃႈ ပၼ်လွင်ႈၼပ်ႉယမ်မိူၼ်တေႁဵတ်းၵႂႃႇၸွမ်းၵႂၢမ်းသင်ႇ ဢၼ်ဝၼ်းၸိုၼ်ႈလၢတ်ႈၼၼ်ႉယူႇ။
“ၶႃႈတွင်းပၢၼ်ႇယဝ်ႉၶႃႈ! ယႃႇပေတႅပ်းမိုဝ်းၶႃႈသေၵမ်း ၶႃႈတေဢမ်ႇႁဵတ်းထႅင်ႈယဝ်ႉၶႃႈ ၶႃႈတေဢမ်ႇလၵ်ႉၶူဝ်းၶွင်ပိူၼ်ႈထႅင်ႈယဝ်ႉ”
“ယဝ်ႉၵေႃႈ မေႃပႅတ်ႉလႅၼ်ပိူၼ်ႈၸိူင်ႉၼႆ တႅပ်းပႅတ်ႈပႃးလိၼ်ႉမၼ်းႁေၼႃႈ”
“တွင်းပၢၼ်ႇယဝ်ႉၶႃႈ!! ယႃႇပေတႅပ်းမိုဝ်းၶႃႈသေၵမ်း ယႃႇပေတႅပ်းလိၼ်ႉၶႃႈႁေၵမ်း”
ၽူႈလၵ်ႉၵေႃႉၼၼ်ႉ တင်းတွင်းပၢၼ်ႇတင်း ပုင်ႈလႅၼ်ႈမႃးၸူးဝၼ်းၸိုၼ်ႈ လူၺ်ႈႁႅင်းၵူၼ်းသိုၵ်းသွင်ၵေႃႉ ဢၼ်ၺွပ်းမၼ်းဝႆႉၼၼ်ႉ သမ်ႉပေႃးဢမ်ႇၶၢမ်ႇႁႅင်းမၼ်းဝႆႉလႆႈယဝ်ႉ။
………..
“ဢၼ်ၼႆႉပၢၼ်လႂ်လႃႇ ယင်းတိုၵ်ႉမီးပၼ်တၢမ်ႇၵၼ်ၸိူင်ႉၼႆယူႇႁႃႉၼႆႉ ၵဝ်ပေႃးၶႂ်ႈၵူဝ်မႃးယဝ်ႉ”
“တိုၵ်ႉႁႃပၢၼ်သွင်ႁဵင်သိပ်းပႅတ်ႇၵူၺ်းသြႃႇႁႃးၵေႃႈ” ၶိင်းသၢၼ်း လၢတ်ႈၸူးၶိင်းပီးၼင်ႇၸႂ်ၵတ်းၸႂ်ယဵၼ်သေ သိုပ်ႇၽိုၼ်ႉလူၵႂႃႇထႅင်ႈၼႃႈၼိုင်ႈယူႇ။
တႃႇတွင်း။ ။ ၸိူင်းႁူဝ်ၼႆႉပဵၼ်ၸိူင်းဢၼ်ဝူၼ်ႉသၢင်ႈမႃးဢဝ်ၵူၺ်း။
တွၼ်ႈသိပ်းသုတ်းၵႂႃႇယဝ်ႉ သိုပ်ႇလူၵႂႃႇထႅင်ႈတွၼ်ႈသိပ်းဢဵတ်းၶႃႈ။
