တွၼ်ႈၵဝ်ႈ
ၼႂ်းၶၢဝ်းတၢင်းသၢမ်လိူၼ် တွၼ်ႈတႃႇဝၼ်းၸိုၼ်ႈၼၼ်ႉတႄႉ ပဵၼ်ဝၼ်းဢၼ်ၶၢၼ်ၸႂ်လိူဝ်သေ ဢၼ်လႆႈၼင်ႈယူႇတီႈလၵ်းသဝ် တၢၵ်ႇလႅတ်ႇတၢၵ်ႇလူမ်းၼၼ်ႉၵွၼ်ႇယဝ်ႉ၊ ၵၢၼ်မၼ်းၼၼ်ႉ ဢမ်ႇတွၼ်ႉမီးမိူဝ်ႈယဝ်ႉႁေပွၵ်ႈလႄႈ ပေႃးဢၼ်ၼိုင်ႈတၢၼ်ႇယဝ်ႉၵႂႃႇ ထႅင်ႈဢၼ်ၵေႃႈသမ်ႉပေႃးမႃးယူႇယဝ်ႉ၊ မၢင်ပွၵ်ႈသမ်ႉပေႃးဢမ်ႇလႆႈၼွၼ်းၵေႃႈမီး။ ယိုင်ႈဝူၼ်ႉၼမ် မၼ်းယိုင်ႈၶႅၼ်းၶုၵ်းၸႂ်လႆႈ ပွႆးတိုၵ်းဢၼ်မၼ်းၶဝ်ႈမႃးၸိူဝ်းၼၼ်ႉသေ ပဵၼ်ဢၼ်ယိၼ်းၶွႆ ၵူၼ်းၸိူဝ်းဢၼ်လႆႈဢွၵ်ႇၶၢဝ်းတၢင်းၼၼ်ႉယူႇ။ လိူဝ်သေမၼ်းယဝ်ႉ ဢၼ်ဢမ်ႇလႆႈၵႂႃႇတၢင်းလႂ်ႁေပွၵ်ႈၼၼ်ႉတႄႉ ပဵၼ်သၢႆလူမ်းၸၢႆးလိူၼ်လႄႈ ၶမ်းလိုၼ်းၼၼ်ႉၵူၺ်း။
သမ်ႉဝႃႈႁိုင်တၢၼ်ႇႁိုဝ်ၵေႃႈ မၼ်းၵေႃႈၶတ်းၸႂ်ဢဝ်ပူၼ်ႉမႃးလႆႈယူႇ၊ ၵၢၼ်ဢၼ်မၼ်းဢမ်ႇယၢမ်ႈမေႃသေဢိတ်းၼၼ်ႉ ၼႂ်းၶၢဝ်းတၢင်းသၢမ်လိူၼ်မႃးၼႆႉ မၼ်းၵေႃႈႁဵတ်းမႃးလႆႈလီယူႇ။ သၢမ်လိူၼ်သုတ်းသဵင်ႈယဝ်ႉ ၸဝ်ႈလွၼ်ႉၶိူဝ်း သမ်ႉၶိုၼ်းႁႂ်ႈမၼ်းသိုပ်ႇႁဵတ်းၽူႈမၢႆၵႂႃႇထႅင်ႈ။ မၼ်းၵေႃႈ ဢမ်ႇၸၢင်ႈထဵင်သင်လႆႈ ၵွပ်ႈပဵၼ်ၶေႃႈၸီႉသင်ႇလႄႈ လွင်ႈၼႆႉၵေႃႈတေၸၢင်ႈၸွႆႈမွတ်ႇပႅတ်ႈ လွင်ႈဢၼ်မၼ်းလႆႈႁဵတ်းၽိတ်းၵႂႃႇဝၼ်းၼၼ်ႉၼႆယူႇ။
ဝၢႆးသေဝၼ်းၼၼ်ႉမႃး လွင်ႈသုၼ်ႇလႆႈၽူႈယိင်းတီႈၼႂ်းတပ်ႉၵေႃႈ မီးလွင်ႈႁူမ်ႇလူမ်ႈမႃးလႄႈ ၽႂ်ၵေႃႈ ဢမ်ႇပေႃးႁတ်းၼႄၽၢင်ႁၢင်ႈလူလၢႆထၢင်ႇလဵၵ်ႉၼိူဝ်ၶႃထႅင်ႈယဝ်ႉ။ တူၺ်းမိူၼ်ဝႃႈ ဝၼ်းၸိုၼ်ႈလႄႈတင်း သၢႆလူမ်းၸၢႆးလိူၼ်ၼၼ်ႉၵေႃႈ မီးလွင်ႈမိုတ်ႈၵိုဝ်းၵၼ်တိူဝ်းမႃးယူႇ၊ ထိုင်တီႈလွင်ႈႁဵတ်းသၢင်ႈ သၢႆလူမ်း ဢၼ်မီးတေႃႇဝၼ်းၸိုၼ်ႈၼၼ်ႉ လႆႈလႅၵ်ႈလၢႆႈၵႂႃႇတိၵ်းတိၵ်းယဝ်ႉ။
ဝၼ်းယဝ်ႉဝၼ်းပူၼ်ႉၵႂႃႇ လိူၼ်ယဝ်ႉလိူၼ်သုတ်းသဵင်ႈ ထိုင်ၼင်ႇဝၼ်းၼိုင်ႈၸဝ်ႈလွၼ်ႉၶိူဝ်းၵေႃႈ ႁွင်ႉဝၼ်းၸိုၼ်ႈထူပ်း ပဵၼ်သုၼ်ႇတူဝ် တီႈၼႂ်းသုမ်ႉမၼ်းၼၼ်ႉ လွင်ႈဝႃႈ ႁႂ်ႈမၼ်းၵေႃႉဢဝ်ပုၼ်ႈၽွၼ်းၸွမ်း ၶမ်းလိုၼ်းပွၵ်ႈမိူဝ်းၶိုၼ်းၼႆယဝ်ႉ။ လွင်ႈတၢင်းမၼ်းတႄႉၵေႃႈ ၶမ်းလိုၼ်းၼၼ်ႉ ပႃးတွင်ႉလႆႈမႃး 5 လိူၼ်ယဝ်ႉ၊ ဢၼ်ၽူႈမၢႆတၢႆၵႂႃႇၼၼ်ႉၵေႃႈ မီး 5 လိူၼ်ယဝ်ႉမိူၼ်ၵၼ်။
“လုၵ်ႈၶမ်းလိုၼ်းပဵၼ်လုၵ်ႈပေႃႈဢမ်ႇၸႂ်ႈႁႃႉ!”
ၸဝ်ႈလွၼ်ႉၶိူဝ်းၼၼ်ႉၵေႃႈ သီၼႃႈသမ်ႉပေႃးပိူင်ႈလူင်ၵႂႃႇၵမ်းလဵဝ်ယဝ်ႉ။
“ၶမ်းလိုၼ်းလၢတ်ႈမႂ်းႁႃႉ!”
“ၶမ်းလိုၼ်းဢမ်ႇလႆႈလၢတ်ႈဝႃႈပဵၼ်လုၵ်ႈၽႂ် ၵူၺ်းၵႃႈမၼ်းယၢမ်ႈလၢတ်ႈဝႃႈ ၽူႈမၢႆဢမ်ႇလႆႈပူၼ်ႉပႅၼ်မၼ်းၼႂ်းၶမ်ႈၶိုၼ်းၼၼ်ႉ၊ မိူဝ်ႈၽူႈမၢႆပႆႇတၢႆ မၼ်းလၢတ်ႈဝႃႈ မၼ်းလႆႈႁၼ်ပေႃႈ ဢွၵ်ႇၼႂ်းသုမ်ႉမႃး ဢွၼ်တၢင်းမၼ်းတေၶဝ်ႈၵႂႃႇ၊ မၼ်းယင်းလၢတ်ႈထႅင်ႈဝႃႈ မၼ်းဢမ်ႇပႆႇလႆႈႁဵတ်းသင်တီႈၶမ်းလိုၼ်း”
“မႂ်းႁူႉယူႇယဝ်ႉ သမ်ႉယိုဝ်းမၼ်းႁဵတ်းသင်လႃႇ!”
“သမ်ႉဝႃႈၶႃႈတေၸႂ်လမ်ၵေႃႈ ၶႃႈဢမ်ႇလႆႈယိုဝ်းမၼ်းၵွမ်ႉလွင်ႈၼၼ်ႉၵူၺ်း..”
“ပဵၼ်ယွၼ်ႉလွင်ႈဢၼ်မႂ်းမႃးလၢတ်ႈၼႄၵဝ်ၸိူင်ႉၼၼ်ႁႃႉ..”
“မၼ်းပဵၼ်သၢႆလပ်ႉၽူႈၶဵၼ် ဢၼ်ၶၢႆၵိၼ်ၸိူဝ်ႉၶိူဝ်းၸဝ်ႈၵဝ်ႇယူႇယဝ်ႉ တေပွႆႇမၼ်းလႆႈၸိူင်ႉႁိုဝ်”
“ဢၼ်ပွႆႇမၼ်းဝႆႉၸိူင်ႉၼၼ်ၵေႃႈ မၼ်းယင်းတိုၵ်ႉမီးၽွၼ်းလီတႃႇႁဝ်းယူႇၼၼ်ႉၼႃႇ”
“…….” ဝၼ်းၸိုၼ်ႈၵေႃႈၼိမ်ယဵၼ်ၵႂႃႇၵူၺ်း။
“မိူဝ်းပွၵ်ႈၼႆႉ တေဢမ်ႇႁႂ်ႈၵူၼ်းမိူဝ်းၸွမ်းသူင်ႇၶိူဝ်ယဝ်ႉ ၵဝ်ယုမ်ႇဝႃႈ မႂ်းၼၼ်ႉ တေဢဝ်ႁူမ်ႇလူမ်ႈပၼ်ၶမ်းလိုၼ်းလႆႈယူႇ”
“ဢေႃႈၶႃႈ!!” ၵူၺ်းၵႃႈ ဝၼ်းၸိုၼ်ႈတႄႉ ပႆႇတူင်ႉၵႂႃႇတၢင်းလႂ် မိူၼ်မီးလွင်ႈၶႂ်ႈလၢတ်ႈတီႈၸဝ်ႈလွၼ်ႉၶိူဝ်းၵႂႃႇယူႇ။
“မႂ်းမီးလွင်ႈသင်ထႅင်ႈ!”
“မီးဢေႃႈ! ၸွမ်းလူၺ်ႈၶႃႈပဵၼ်လုၵ်ႈပေႃႈၵေႃႉၼိုင်ႈ လႄႈ ပဵၼ်ဢူၺ်းၵေႃႉၶမ်းလိုၼ်း ၶႃႈၶႂ်ႈႁူႉဝႃႈပေႃႈတေႁဵတ်းၸိူင်ႉႁိုဝ်”
“လွင်ႈၼႆႉၵဝ်တေၸတ်းၵၢၼ်ၵႂႃႇၵူၺ်း မႂ်းတူၺ်းထိုင်ၶမ်းလိုၼ်းလီလီၵူၺ်းၵေႃႈလႆႈယဝ်ႉ”
ဝၢႆးသေဝၼ်းၸိုၼ်ႈၶဝ်ပွၵ်ႈမိူဝ်းၵႂႃႇဢဝ်လၢႆဝၼ်းၵူၺ်း တီႈတပ်ႉဢၼ်ၶဝ်ယူႇၼၼ်ႉၵေႃႈ ထုၵ်ႇၸုမ်းၽူႈၶဵၼ်ၶဝ်မႃးလေႃႇသေ ဢဝ်ၶဝ်သမ်ႉပေႃးလႆႈဢွၼ်ၵၼ်ထွႆပၢႆႈၶိုၼ်း ယူႇယဝ်ႉ။ တပ်ႉၶဝ်ၼၼ်ႉၵေႃႈလႆႈသုမ်းပၼ်ပိူၼ်ႈၵႂႃႇသေ ၵူၼ်းၶဝ်ဢၼ်ႁွတ်ႈၶိုၼ်းတီႈ ငဝ်ႈၸုမ်းလူင်ၶဝ်ၼၼ်ႉတႄႉ ဢမ်ႇပေႃးၵိုတ်းၼမ်ယဝ်ႉ ၵမ်ႈၽွင်ႈၵေႃႈတၢႆ ၵမ်ႈၽွင်ႈၵေႃႈဢဝ်ၵႂႃႇယူတ်းယႃတူဝ်ဝႆႉယူႇ။ တပ်ႉၶဝ်ၼၼ်ႉၵေႃႈ လႆႈၸႅၵ်ႇၽႄၵၼ်ၵႂႃႇယူႇၵေႃႉတီႈၵေႃႉတၢင်းပႅတ်ႈယဝ်ႉ။
မိူဝ်ႈပဵၼ်ၸိူင်ႉၼၼ် ဝၼ်းၸိုၼ်ႈၵေႃႈ တုၵ်းယွၼ်းႁႂ်ႈလႆႈဢွၵ်ႇၼႃႈသိုၵ်း ၸွမ်းၸဝ်ႈလွၼ်ႉၶိူဝ်းၼႆယူႇ၊ ၸွမ်းလူၺ်ႈမၼ်းပဵၼ်ၽူႈယိင်းလႄႈ ၽႂ်ၵေႃႈဢမ်ႇပေႃးႁၼ်လီၸွမ်းသေၵႃႈႁိုဝ် ၵူၺ်းၵႃႈ ၸဝ်ႈလွၼ်ႉၶိူဝ်းၵေႃႈ ပၼ်တိုဝ်ႉတၢင်းမၼ်းၵႂႃႇ သမ်ႉဝႃႈႁူဝ်ၼႃႈၶဝ် ဢမ်ႇႁၼ်လီၸွမ်းၵေႃႈယဝ်ႉ၊ ၵွပ်ႈပိူဝ်ႈမၼ်းယုမ်ႇယမ်ၼမ်ႉၵတ်ႉဝၼ်းၸိုၼ်ႈလႄႈ ႁူႉဝႃႈ လွင်ႈဢၼ်ဝၼ်းၸိုၼ်ႈၶႂ်ႈႁဵတ်းၼၼ်ႉပဵၼ်ယွၼ်ႉသင်။ တႄႇဢဝ်ဝၼ်းၼၼ်ႉ သွင်ၵေႃႉပေႃႈလုၵ်ႈၵေႃႈ ႁဵတ်းၵၢၼ်ၸွမ်းၵၼ်ယူႇတႃႇသေႇယဝ်ႉ။
ၶိုၼ်းမႃးတီႈႁိူၼ်းလင်ဢၼ် မီးလုၵ်ႈဢွၼ်ႇလႅၼ်ႈဢွၵ်ႇမႃးႁပ်ႉတွၼ်ႈၼၼ်ႉ ၸဝ်ႈလွၼ်ႉၶိူဝ်းၵေႃႈ ႁွပ်ႇဢုမ်ႈဢဝ်လုၵ်ႈဢွၼ်ႇၸၢႆးၵေႃႉၼၼ်ႉသေ “ၵေႃႉယႂ်ႇမႃးတေႉယဝ်ႉလူး”
ၸင်ႇမီးၶမ်းလိုၼ်းဢွၵ်ႇႁိူၼ်းမႃးႁပ်ႉတွၼ်ႈသေ “ၶိုၼ်ႈမႃးၼိူဝ်ႁိူၼ်းၵွၼ်ႇၶႃႈလႄႈ”
ၼႂ်းၶၢဝ်းတၢင်းသွင်သၢမ်ပီႊမႃးၼႆႉ ၸဝ်ႈလွၼ်ႉၶိူဝ်းဢမ်ႇပေႃးတၼ်းလႄႈ ဢမ်ႇပေႃးသူႈလႆႈမႃးၸႂ်းၶဝ်မႄႈလုၵ်ႈ ၵူၺ်းၵႃႈဝၼ်းၸိုၼ်ႈတႄႉၵေႃႈ မႃးယူႇတႃႇသေႇၼင်ႇၵဝ်ႇ။ သၢႆတႃသွင်ၶႃဢၼ်ယၵ်ႉတူၺ်းၸူးၵၼ် ဢမ်ႇလႆႈႁၼ်ၵၼ်ႁိုင်ၼႃႇၼၼ်ႉၵေႃႈ သမ်ႉပေႃးၸိုမ်ႉယမ်းလူင်ဢွၵ်ႇမႃးယူႇယဝ်ႉ။
ဝၼ်းၸိုၼ်ႈၵေႃႈ ဢွၼ်ဢဝ်ၸၢႆးဢွၼ်ႇၼၼ်ႉ ၵႂႃႇလဵၼ်ႈတၢင်းၼွၵ်ႈသေ ႁႂ်ႈၶႃသွင်ၵေႃႉဢၼ်ဢမ်ႇလႆႈႁၼ်ၵၼ်တင်းႁိုင်ၼၼ်ႉ ယူႇၸွမ်းၵၼ်ၵႂႃႇယူႇယဝ်ႉ။ ဢၢႆႈၸၢႆးဢွၼ်ႇၼၼ်ႉၵေႃႈ ၸွမ်းလူၺ်ႈပိူၼ်ႈလၢတ်ႈႁင်းမၼ်းဝႃႈ မၼ်းၼၼ်ႉဢမ်ႇၸႂ်ႈလုၵ်ႈတေႉတေႉၸဝ်ႈလွၼ်ႉၶိူဝ်ၼႆၵေႃႈ လႆႈထၢမ်ၵႂႃႇတူၺ်းတီႈ ဝၼ်းၸိုၼ်ႈၵႂႃႇ။
“ဢေးၼႃႉ ပိူၼ်ႈဝႃႈဢူႈၸၢႆးၼၼ်ႉ ဢမ်ႇၸႂ်ႈဢူႈတေႉတေႉၼႆဝႃႇ”
မၼ်းၵေႃႈၸႂ်ႈယူႇယဝ်ႉ ဢမ်ႇမီးၽႂ်ႁူႉဝႃႈဢူႈတေႉတေႉဢၢႆႈၸၢႆးဢွၼ်ႇၼႆႉ ပဵၼ်ၸဝ်ႈလွၼ်ႉၶိူဝ်း၊ ၽႂ်ၽႂ်ၵေႃႈထၢင်ႇဝႃႈပဵၼ်ၽူႈမၢႆၵေႃႉဢၼ်မၼ်းယိုဝ်းတၢႆၵႂႃႇ မိူဝ်ႈ 10 ပီၼၼ်ႉလႄႈ ဝူၼ်ႉဝႃႈ ၸဝ်ႈလွၼ်ႉၶိူဝ်း ၸႂ်လီသေၵဵပ်းလဵင်ႉဝႆႉၼႆၵူၺ်းယူႇ။
“ၼႃႉတေလၢတ်ႈၵႂၢမ်းလပ်ႉၼႃ မိူဝ်ႈၸၢႆးႁွင်ႉၽႂ်ဝႃႈဢူႈ ၵေႃႉၼၼ်ႉၵေႃႈပဵၼ်ဢူႈၸၢႆးယဝ်ႉၼႃႈ”
“တေႉႁႃႉ!”
“ဢိုမ်ႉ”
ဝၼ်းၸိုၼ်ႈၵေႃႈ ၸူဝ်းႁွင်ႉဢဝ်ဢၢႆႈၸၢႆးဢွၼ်ႇ ၵႂႃႇတီႈသႅင်ႇဢၼ်မီးယူႇၼႂ်းဝၢၼ်ႈၼၼ်ႉလႄႈ လိူၵ်ႈသိုဝ်ႉတၢင်းၵိၼ်ဢၼ်ၸၢႆးဢွၼ်ႇၶႂ်ႈသိုဝ်ႉၼၼ်ႉသေ ၼင်ႈၵိၼ်ၶဝ်ႈမုၼ်းၵၼ်ၵႂႃႇယူႇ၊ တီႈၼၼ်ႉသမ်ႉမီးၽိူၼ်လဝ်ႈ ၵူၼ်းၼင်ႈဝႅင်းပၢင်ၵၼ်လႄႈ ၸင်ႇသမ်ႉမီးသၢႆတႃၵူၼ်းၵေႃႉၼိုင်ႈ မိုင်ယၵ်ႉတူၺ်းၸူးမၼ်း လူၺ်ႈသၢႆတႃဢၼ်ထၢင်ႇထိူမ်ဝႃႈ “ပဵၼ်ၽႂ်” ၼႆၼၼ်ႉလႄႈ ၵမ်းၼၼ်ႉ ဝၼ်းၸိုၼ်ႈၵေႃႈ မိူၼ်တေႁၼ်ၺႃးသၢႆတႃၼၼ်ႉႁိုဝ် ပႆၵႂႃႇၸူးသေယဝ်ႉ တူင်ႉတၵ်ႉၵႂႃႇ
“ၼႆႉ! ၸွင်ႇၸႂ်ႈ သၢႆလူမ်းၸၢႆးလိူၼ်ႁႃႉ”
“ၸႂ်ႈဢိူဝ်ႈ!” ယၵ်ႉတူၺ်း ဝၼ်းၸိုၼ်ႈၵႂႃႇလီလီသေ “ပဵၼ်ဝၼ်းၸိုၼ်ႈဢမ်ႇႁိုဝ်လႃႇ”
“ၸႂ်ႈယဝ်ႉ! ဢမ်ႇတွင်းၵၼ်တေႉယဝ်ႉၼႆႉၼေႃႈ”
“ဢမ်ႇတွင်းတေႉဢိူဝ်ႈ ဢမ်ႇႁၼ်ၵၼ်ပေႃးမီးလၢႆပီႊယဝ်ႉၼႃႇ”
ဝၼ်းၸိုၼ်ႈၼၼ်ႉၵေႃႈ ၵႂႃႇၼင်ႈဝႅင်းပၢင်ၶဝ်ၼၼ်ႉသေ “ၼင်ႈၸွမ်းၵေႃႉၶႃႈၼႃႈ” ၵူၼ်းသိုၵ်းဢၼ်ၼင်ႈၵုမ်းၵၼ်တင်း ၸၢႆးလိူၼ်ၸိူဝ်းၼၼ်ႉၵေႃႈ သုတ်ႉပၼ်မၼ်းၵႂႃႇယူႇ၊ ၽႂ်ၽႂ်ၵေႃႈ ႁူႉၸၵ်းမၼ်းလီလႄႈ ဢမ်ႇပေႃးႁတ်းၶဝ်ႈတူင်ႉတၵ်ႉၸူးမၼ်းၵႃႈႁိုဝ် မိူဝ်ႈဢၼ်မၼ်းမႃးၼင်ႈၸွမ်းၶဝ်ၸိူင်ႉၼႆၵေႃႈ ၼင်ႇႁၢင်ႈၶႂ်ႈယူႇယၢပ်ႇမႃးႁင်းၽႂ်ႁင်းမၼ်းယဝ်ႉ။
“ႁဝ်းႁႃးၼင်ႇၵၼ်ၵူၺ်း ဢမ်ႇလူဝ်ႇၵဵင်ၸႂ် မိူဝ်ႈၼႆႉ မႃးၺႃးဢူၺ်းၵေႃႉၵဝ်ႇ ၶႃႈလဵင်ႉၵူၺ်း ဢဝ်တဵမ်တီႈၶႃႈလႄႈ” ၵူၼ်းၸိူဝ်းၼၼ်ႉၵေႃႈ ဢွၼ်ၵၼ်သင်ႇၵိၼ်ထႅင်ႈယူႇ ႁၼ်ၽႂ်မႃးၼႂ်းလၢၼ်ႉၵေႃႈ ဝၼ်းၸိုၼ်ႈႁွင်ႉၵိၼ်ၸွမ်းယဝ်ႉ။
မိူၼ်ဝႃႈတၢင်းၼႂ်းလၢၼ်ႉၼၼ်ႉ သဵင်တေလင်လႄႈ ၶႂ်ႈသုၵ်ႉသၵ်ႉဝႆႉယဝ်ႉ ဝၼ်းၸိုၼ်ႈၵေႃႈ ဢွၵ်ႇမႃးလုတ်ႇလႅၼ်းယႃႈတၢင်းၼွၵ်ႈသေယဝ်ႉ၊ ၸၢႆးလိူၼ်ၵေႃႈ မႃးႁိမ်းမၼ်းသေ
“ယွၼ်းႁေလႅၼ်းၼိုင်ႈလူး”
ဝၼ်းၸိုၼ်ႈၵၢပ်ႈတင်းလႅၼ်းယႃႈမၼ်းဝႆႉသေ ယိပ်းဢဝ်လႅၼ်းယႃႈထႅင်ႈၼႂ်းၵၢပ်ႈလႅၼ်းၼိုင်ႈ ယိုၼ်ႈပၼ်ၸၢႆးလိူၼ်ၵႂႃႇ၊ မိုဝ်းသွင်ၼိဝ်ႉ ငိပ်ႈဢွၵ်ႇလႅၼ်းယႃႈတီႈသီႇသူပ်းၼၼ်ႉသေ ပုၼ်ႈၵႂၼ်းမၼ်းဢွၵ်ႇသူပ်းၵႂႃႇယဝ်ႉ ယၵ်ႉတူၺ်း ၸၢႆးလိူၼ်
“ယူႇလီယူႇၼေႃႈ မႃးတီႈၼႆႈၸဵမ်မိူဝ်ႈလႂ်လႃႇ”
“ဢိုမ်ႈ! တိုၵ်ႉၸင်ႇၸႃႉႁႃမႃးလႆႈ မွၵ်ႈဝူင်ႈပၢႆၼႆႉၵူၺ်း တိုၵ်ႉႁဵတ်းႁိူၼ်းယဝ်ႉသေလႆႈလိုဝ်ႈမိူဝ်ႈၼႆႉၼၼ်ႉယိုင်”
သွင်ၶႃၵေႃႈ ၼင်ႈၼိမ်ယဵၼ် လုတ်ႇလႅၼ်းယႃႈၵႂႃႇႁင်းၽႂ်ႁင်းမၼ်းၵူၺ်းယူႇယဝ်ႉ။
…………
“ဢမ်ႇၸႂ်ႈဝႃႈၶႃသွင်ၵေႃႉၼႆႉ မီးၸႂ်တေႃႇၵၼ်ယူႇႁႃႉၶိင်းဝႃႈ”
“ဢိူဝ်ႈ ၵဝ်ၵေႃႈဝူၼ်ႉယူႇဝႃႈသွင်ၵေႃႉၼႆႉ မီးၸႂ်တေႃႇၵၼ်ယူႇ ဢမ်ႇၼမ်ၵေႃႈဢေႇၼၼ်ႉယဝ်ႉ ဢၢၼ်ႇၵႂႃႇထႅင်ႈလေႃႇၶိင်းပီး”
“ၵဝ်ၵူၼ်ႉယဝ်ႉ ၶိင်းၵေႃႉဢၢၼ်ႇလႄႈ”
ၶႃသွင်ၵေႃႉၵေႃႈ ႁဵတ်းဝႃႈမႃးၵိၼ်လဝ်ႈၵုမ်းၵၼ်ၼႆဝႃႇ ၼမ်ႉလဝ်ႈၶႃၼၼ်ႉ ဢမ်ႇပႆႇယွမ်း ၵုမ်ႇၸွမ်းဢၢၼ်ႇၼႃႈယဝ်ႉၼႃႈယူႇၵူၺ်း ယၢမ်းမွင်းၵေႃႈယင်းဢမ်ႇတၼ်းတူၺ်းလူးၵွၼ်ႇလႃႈ။
တွၼ်ႈၵဝ်ႈသုတ်းၵႂႃႇယဝ်ႉ သိုပ်ႇလူထႅင်ႈတွၼ်ႈသိပ်းၶႃႈ။
