တွၼ်ႈပႅတ်ႇ
တီႈၼႂ်းၶမ်ႈၶိုၼ်းၼၼ်ႉၵေႃႈ တင်းၵႂႃႇႁိူဝ်ႉမႃးသေ သမ်ႉမႃးႁူပ်ႉလွင်ႈၼႆႉထႅင်ႈလႄႈ မိူဝ်ႈႁၼ်ႁၢင်ႈၽၢင်ၶမ်းလိုၼ်း တိုၼ်ႇၵူဝ်တူၵ်းၸႂ်ယူႇႁိမ်းၽၵ်းတူၼၼ်ႉ မၼ်းၸင်ႇလႆႈထၢမ်ၸူးၵႂႃႇ။
“ၸွင်ႇပဵၼ်သင်ႁိုဝ်!”
“ဢမ်ႇပဵၼ်သင်ယဝ်ႉ ၶုၼ်သိုၵ်းႁဝ်းမႃးၸွႆႈတၼ်းၶိုတ်း” သမ်ႉဝႃႈၶမ်းလိုၼ်းလၢတ်ႈၸိူင်ႉၼႆၵေႃႈ ဝၼ်းၸိုၼ်ႈတႄႉဢမ်ႇတၼ်းထွမ်ႇ မၼ်းသမ်ႉပေႃးလၢၵ်ႈဢဝ်တူဝ်ၽူႈမၢႆ လူင်းႁၢၼ်ႉသေ ထိပ်ႇဢွၵ်ႇၽၵ်းတူၵႂႃႇယဝ်ႉ။
“ဝၼ်းၸိုၼ်ႈမႂ်းတေႁဵတ်းသင်!!” ၸဝ်ႈလွၼ်ႉၶိူဝ်းလၢတ်ႈ
“ၶႃႈတေႁႅမ်ဢၢႆႈၵေႃႉၼႆႉတၢႆဢေႃႈ! ၵူၼ်းၸိူင်ႉၼင်ႇမၼ်းၼႆႉ တေမီးသၢႆၸႂ်ယူႇၵႂႃႇႁဵတ်းသင်လႃႇ မၼ်းၵေႃႈဢမ်ႇပိူင်ႈသင်ၵၼ်တင်း ၵူၼ်းမိူၵ်ႈၸိူဝ်းၼၼ်ႉၼင်ႇၵဝ်ႇ”
“မႂ်းႁဵတ်းၸိူင်ႉၼၼ်ဢမ်ႇလႆႈ တေဢဝ်တၢႆၵူၼ်းၵေႃႈ မၼ်းမီးပၵ်းမီးပိူင်ဢိူဝ်ႈ”
“ပၵ်းပိူင်! မၼ်းတေႁဵတ်းလႆႈမွၵ်ႈၵႃႈႁိုဝ် မၼ်းၸၢင်ႈမွတ်ႇႁၢႆပႅတ်ႈ လွင်ႈတၢင်းဢၢႆၶမ်းလိုၼ်းလႆႈယူႇႁႃႉ”
ၸဝ်ႈလွၼ်ႉၶိူဝ်းၵေႃႈ ၼႅတ်ႈႁႂ်ႈၵူၼ်းၸိူဝ်းဢၼ်တိုၵ်ႉမႃးႁွတ်ႈၼၼ်ႉ မႃးလၢၵ်ႈဢဝ်တူဝ်ၽူႈမၢႆၵႂႃႇမတ်ႉဝႆႉယူႇ။ ဝၼ်းၸိုၼ်ႈၵေႃႈ လႅၼ်ႈလမ်းၵႂႃႇၸွမ်းၶဝ်ၼၼ်ႉၵမ်းလဵဝ်။ မိူဝ်ႈပိူၼ်ႈၵႂႃႇမူတ်းယဝ်ႉ ၸဝ်ႈလွၼ်ႉၶိူဝ်းၼၼ်ႉၵေႃႈ မႆႈၸႂ်မႆႈၶေႃး သမ်ႉပေႃးၵွတ်ႇၶမ်းလိုၼ်းၶဝ်ႈယူႇၼႂ်းဢူၵ်းမၼ်းၵႂႃႇယဝ်ႉ။
ဢမ်ႇႁိုင် တၢင်းၼွၵ်ႈသုမ်ႉၶဝ်ၼၼ်ႉၵေႃႈ ယိၼ်းသဵင်မၢၵ်ႇၵွင်ႈလင်ယွၼ်ႈမႃး သွင်ၵမ်း၊ ၶဝ်ၵေႃႈ ဢွၼ်ၵၼ်ဢွၵ်ႇသုမ်ႉမႃးတူၺ်းသေ လႆႈႁၼ်ၽူႈမၢႆၼၼ်ႉၼွၼ်းလူမ်ႉတၢႆၵႂႃႇယဝ်ႉ။ သဵင်ၵွင်ႈၼၼ်ႉတႄႉ ဢမ်ႇၸႂ်ႈၽႂ်ယိုဝ်း ပဵၼ်ဝၼ်းၸိုၼ်ႈၵူၺ်း။ မိူဝ်ႈႁၼ်ၽူႈမၢႆတၢႆလူမ်ႉၼွၼ်းၵႂႃႇၸိူင်ႉၼၼ်ၵေႃႈ ၸဝ်ႈလွၼ်ႉၶိူဝ်းၵေႃႈ ၼႅတ်ႈသင်ႇႁႂ်ႈၶဝ်မတ်ႉဝၼ်းၸိုၼ်ႈၵႂႃႇၵမ်းလဵဝ်။
ၼႂ်းၶမ်ႈၶိုၼ်းဢၼ်လပ်းသိင်ႇတၼ်လူင်ၼၼ်ႉ ဝၼ်းၸိုၼ်ႈၵေႃႈ ၼင်ႈဢိင်လၵ်းသဝ်ဢၼ်ၼိုင်ႈ မီးတင်းၸိူၵ်ႈမတ်ႉမိုဝ်းပႄႈပိၵ်ႇလႄႈ မႆႉမူဝ်ႇမႃးငူပ်ႉၶတ်းသေႃးသႂ်ႇတီႈၶႃမၼ်းဝႆႉယူႇၼၼ်ႉ၊ ႁႅၼ်မုင်ႈတူၺ်း ၼႃႈၾႃႉဢၼ်မီးလုၵ်ႈလၢဝ်ႁိူဝ်ႈလႅင်းပေႃးတဵမ်ၾႃႉ ၵူၺ်းသမ်ႉဢမ်ႇမီးလုၵ်ႈလိူၼ်လႅင်းထွင်ႇပၼ်သေဢိတ်းလႄႈ တင်းၼင်ႈတင်းၶူဝ်၊ သမ်ႉပေႃးဢဝ်ၵူၼ်းပႂ်ႉယၢမ်းႁိမ်းမၼ်းၼၼ်ႉ ပေႃးတူၵ်းၸႂ်ယဝ်ႉ။ ၵူၼ်းၵေႃႉၼၼ်ႉတႄႉ ပဵၼ်သၢႆလူမ်း ၸၢႆးလိူၼ် ဢၼ်ဢမ်ႇလႆႈဢွၵ်ႇတူင်ႉၼိုင်ၸွမ်းပိူၼ်ႈၼၼ်ႉ လႆႈပဵၼ်ၵူၼ်းမႃးပႂ်ႉယၢမ်းၶဝ်ၵႂႃႇ။
မၼ်းၸင်ႇတူၺ်းဝၼ်းၸိုၼ်ႈသေလၢတ်ႈၵႂႃႇ “ပဵၼ်ၵူၼ်းယွင်ႇတေႉယဝ်ႉ”
“ၸႂ်ႈယဝ်ႉ ၵဝ်ယွင်ႇ ၵွပ်ႈပိူဝ်ႈဢၢႆႈမၢၼ်ႈၼႃႈၵမ်ႇၸိူဝ်းၼၼ်ႉ မႃးပေႉၵိၼ်လူလၢႆၸိူဝ်ႉၶိူဝ်းႁဝ်းလႄႈ ၸင်ႇလႆႈလမ်းတိုၵ်းယိုဝ်းယူႇႁဵတ်းၼႆဢမ်ႇၸႂ်ႈႁႃႉ၊ ၵူၼ်းဢၼ်ပေႉၵိၼ်လူလၢႆၵူၼ်းၶိူဝ်းႁဝ်းၼင်ႇၵၼ်ၼၼ်ႉၵေႃႈ ပဵၼ်ၵူၼ်းမိူၵ်ႈလိူင်း ဢမ်ႇပိူင်ႈသင်ၵၼ်တၢင်းဢၢႆႈၸိူဝ်းၼၼ်ႉၼင်ႇၵဝ်ႇဢမ်ႇၸႂ်ႈႁိုဝ်”
“ဝူၼ်ႉဝႃႈဢၼ်သူႁဵတ်းၵႂႃႇၼၼ်ႉ မၼ်းၵိုင်ႇၵႃႈမၼ်းယူႇႁႃႉ၊ ၽူႈၶဵၼ်ၼၼ်ႉ ၶဝ်ဢမ်ႇလႆႈမႃးႁဵတ်းသင်ပၼ်ႁဝ်းလူး ၵူၺ်းၵႃႈ ၽူႈမၢႆဢမ်ႇၸႂ်ႈ ဢမ်ႇမိူၼ်ၵူၼ်းၸိူဝ်းၼၼ်ႉ၊ ပဵၼ်ၵူၼ်းႁဵတ်းၵၢၼ်ပၼ်ႁဝ်းဢိူဝ်ႈ ဢမ်ႇမီးၶဝ်ယဝ်ႉ ၵၢၼ်ၵူႈလွင်ႈလွင်ႈၵေႃႈ တေလုတ်ႈႁၢမ်းၵႂႃႇသေဢမ်ႇၵႃး ဢဵၼ်ႁႅင်းႁဝ်းၵေႃႈယွမ်းပႃးဢိူဝ်ႈ သူဢမ်ႇဝူၼ်ႉၽွင်ႈၼႄႇ”
“သူဝူၼ်ႉဝႃႈ ပေႃးပွႆႇၶဝ်ၵႂႃႇ လၢတ်ႈလႆႈယူႇႁႃႉဝႃႈၶဝ်တေဢမ်ႇၵႂႃႇႁဵတ်းတီႈလုၵ်ႈမႄႈပိူၼ်ႈထႅင်ႈ၊ ယုမ်ႇလႆႈယူႇႁႃႉဝႃႈတေဢမ်ႇမီးၵူၼ်းယိူင်ႈႁဵတ်းၸွမ်းမႃးထႅင်ႈ”
“ၵူၺ်းၵႃႈ သူဝူၼ်ႉဝႃႈ ပိူၼ်ႈတေပွႆႇသူလွတ်ႈလႆႈယူႇႁႃႉ၊ သူယိုင်ႈၶႅၼ်းၼႃႇလိူဝ်ၵူၼ်းၸိူဝ်းၼၼ်ႉယဝ်ႉ ၶႃႈႁႅမ်ၶိုၼ်းၵူၼ်းၸုမ်းလဵဝ်ၵၼ်ၸိူင်ႉၼႆ”
“သမ်ႉဝႃႈၵဝ်တၢႆၵေႃႈ ၵဝ်ၵေႃႈတေၵႅတ်ႇၶႄၵူၼ်းၵဝ်ႁႂ်ႈလႆႈဢိူဝ်ႈ!” တင်းသၢႆတႃဢၼ်မၼ်ႈၸႂ် ဢၼ်ဢမ်ႇၵူဝ်ၽႂ်ၼၼ်ႉယၵ်ႉတူၺ်းၸူးသၢႆလူမ်းၵႂႃႇ။
“မိူၼ်တေၶႂ်ႈတၢႆတေႉယဝ်ႉ”
“သမ်ႉဝႃႈၶႂ်ႈယူႇၵေႃႈ ဢမ်ႇၸၢင်ႈၸွႆႈႁႂ်ႈယူႇလွတ်ႈလႆႈလူး” ဝူၼ်ႉႁၼ်ႁၢင်ႈမႄႈမၼ်း ၼႂ်းဝၼ်းၼၼ်ႉမႃးသေ ၼမ်ႉတႃမၼ်းၵေႃႈ ၸိုမ်ႉယမ်းမႃးယဝ်ႉ။
ဝၼ်းယဝ်ႉၶိုၼ်းၶိုၼ်းယဝ်ႉဝၼ်း ဝၼ်းၸိုၼ်ႈၼၼ်ႉ ထုၵ်ႇမတ်ႉတၢၵ်ႇလႅတ်ႇတၢၵ်ႇလူမ်းမႃး ဢမ်ႇပၼ်ၵိၼ်ၶဝ်ႈၵိၼ်ၼမ်ႉသင် မိူၼ်ပွႆႇႁႂ်ႈမၼ်းတၢႆၵႂႃႇတီႈၼၼ်ႈဝႆႉၼၼ်ႉယဝ်ႉ။ ၽၢင်ႁၢင်ႈမၼ်းၵေႃႈ ပေႃးဢမ်ႇလီတူၺ်းသေဢိတ်း သီႇသူပ်းသမ်ႉပေႃး ႁႅင်ႈၶေႃႇလေႃႇလူင်ဝႆႉ ႁၢင်ႈၽၢင်ပေႃးယွမ်ႁႅင်ႈလူင်ၵႂႃႇ၊ ၵွပ်ႈမီးၶေႃႈၸီႉသင်ႇႁၢမ်ႈ ဢမ်ႇပၼ်ၽႂ်ၵႂႃႇတူၺ်းလႄႈ မၼ်းၵေႃႈၼင်ႈယူႇႁင်းၵူၺ်းမၼ်း တီႈၸဵင်ႇတပ်ႉၼၼ်ႉမႃး သၢမ်ဝၼ်းသၢမ်ၶိုၼ်းယူႇယဝ်ႉ။
ၵူၼ်းသိုၵ်းဢၼ်ယူႇၼႂ်းတပ်ႉၸိူဝ်းၼၼ်ႉ ၽႂ်ႁၼ်ၵေႃႈ သမ်ႉပေႃးဢီးလူမၼ်းမႃးသေ ဢွၼ်ၵၼ်တုၵ်းယွၼ်း ႁႂ်ႈပွႆႇပၼ်မၼ်းၼႆယူႇ၊ ၵူၺ်းၵႃႈ ၸဝ်ႈလွၼ်ႉၶိူဝ်းၼၼ်ႉၵေႃႈ လၢတ်ႈသဵင်ၶႅင်ၵႂႃႇၸူးၸိူဝ်းၶဝ် “ပၼ်ႁႂ်ႈမၼ်းတၢႆၵႂႃႇတီႈၼၼ်ႈလႄႈ” ၼႆၵူၺ်း ဢမ်ႇသူၼ်ၸႂ်သင်မၼ်းသေဢိတ်း။
သၢႆလူမ်းၼၼ်ႉၵေႃႈ သမ်ႉဝႃႈဢမ်ႇလႆႈလၢတ်ႈသင် ဢမ်ႇလႆႈၵႂႃႇယူႇၸမ်ၵေႃႈ လွမ်လွမ်သေ မုင်ႈတူၺ်းဝၼ်းၸိုၼ်ႈယူႇၵူၺ်းၼင်ႇၵဝ်ႇ။ ထိုင်မႃးထႅင်ႈၶိုၼ်းၼိုင်ႈ တေပဵၼ်ၶိုၼ်းထီႉသီႇယဝ်ႉ ဢၼ်ဝၼ်းၸိုၼ်ႈထုၵ်ႇမတ်ႉ သၢႆလူမ်းၼၼ်ႉ တင်ႈၸႂ်မႃးၸူးဝၼ်းၸိုၼ်ႈ ဢၼ်ၼွၼ်းလပ်းယူႇၼၼ်ႉလႄႈ ႁွင်ႉဝၼ်းၸိုၼ်ႈလွႆးလွႆးသေ “ဝၼ်းၸိုၼ်ႈ…ၵိၼ်ၼမ်ႉသေဢိတ်ႉၼိုင်ႈလႄႈၼႃႈ”
ဝၼ်းၸိုၼ်ႈၼၼ်ႉၵေႃႈ ယုၵ်ႉၶေႃးတူၺ်းသၢႆလူမ်းသေ “ၽၢၵ်ႇလၢတ်ႈပၼ်တီႈမေႃယႃၽွင်ႈဝႃႈ ႁဝ်းယွမ်းၼွမ်းယူႇ ဢၼ်ၸူဝ်းၶဝ်မႃး တီႈၼႆႈ” လၢတ်ႈယဝ်ႉၵေႃႈ ပွႆႇတူဝ်မၼ်းၼင်ႈဢိင်လၵ်း မိူၼ်ယင်းတိုၵ်ႉတေထွတ်ႇၸႂ်မၼ်းယူႇၼၼ်ႉယဝ်ႉ။
သၢႆလူမ်းၵေႃႈ ၼႅတ်ႈႁွင်ႉၵူၼ်းၸွႆႈမႃးယဝ်ႉ တူဝ်မၼ်းၼၼ်ႉၵေႃႈ ဢဝ်မိတ်ႈတီႈဢႅဝ်မၼ်း တႅပ်းၶၢတ်ႇၸိူၵ်ႈၼၼ်ႉသေ ႁွပ်ႇဢုမ်ႈဢဝ် ဝၼ်းၸိုၼ်ႈၵႂႃႇၸူးတီႈမေႃယႃၵမ်းလဵဝ်ယူႇ၊ ၵူၺ်းၵႃႈ မိူဝ်ႈၵႂႃႇႁွတ်ႈၼႂ်းသုမ်ႉမေႃယႃၼၼ်ႉၵေႃႈ မီးၸဝ်ႈလွၼ်ႉၶိူဝ်းယူႇၸွမ်းဝႆႉယူႇယဝ်ႉ၊ မေႃယႃဢၼ်ႁၼ်ၼင်ႇၼၼ်ၵေႃႈ ႁိပ်ႈၼႅတ်ႈယူတ်းယႃပၼ်ၵမ်းလဵဝ်။
ၵူၼ်းသိုၵ်းလုၵ်ႈၼွင်ႉၸဝ်ႈလွၼ်ႉၶိူဝ်း ဢၼ်ယူႇၼႂ်းတပ်ႉၼၼ်ႉၵေႃႈ ဢွၼ်ၵၼ်မႃးတုၵ်းယွၼ်း လၢတ်ႈႁႂ်ႈလူတ်းယွၼ်ႇပၼ်တၢမ်ႇဝၼ်းၸိုၼ်ႈ လူၺ်ႈမီးသၢႆလူမ်းၸၢႆးလိူၼ်ပဵၼ်ၵူၼ်းတႄႇမၼ်းယဝ်ႉ။
ဝၼ်းၸိုၼ်ႈဢၼ်ၼွၼ်းလပ်းၵႂႃႇ ဢမ်ႇၼပ်ႉဝၼ်းၼပ်ႉၶိုၼ်းလႆႈၼၼ်ႉၵေႃႈ တိုၼ်ႇမႃးၶိုၼ်း လႆႈႁၼ်ၶမ်းလိုၼ်းမီးယူႇႁိမ်းမၼ်းဝႆႉသေ တင်းယုမ်ႉၸူမ်းသိူဝ်းၸူးမၼ်းၵႂႃႇယဝ်ႉ။
“တိုၼ်ႇလႆႈယဝ်ႉႁႃႉ!”
“ႁဝ်းယင်းပႆႇတၢႆၵွၼ်ႇႁႃႉ”
“သူတေတၢႆဢမ်ႇလႆႈ ပေႃးသူတၢႆယဝ်ႉ ႁဝ်းတေယူႇတီႈၼႆႈၵေႃႉလဵဝ်လႆႈၸိူင်ႉႁိုဝ်” လၢတ်ႈဢွၵ်ႇမႃးပႃးတင်းၼမ်ႉတႃယူႇယဝ်ႉ။
ၸဝ်ႈလွၼ်ႉၶိူဝ်းၵေႃႈ မိူဝ်ႈႁူႉဝႃႈဝၼ်းၸိုၼ်ႈတိုၼ်ႇယဝ်ႉၼႆ ၼႅတ်ႈမႃးထူပ်းၵမ်းလဵဝ်သေ လၢတ်ႈၸူးၵႂႃႇ
“ႁူႉတူဝ်မႃးယဝ်ႉႁႃႉ ပဵၼ်ႁိုဝ်ဝႆႉလႃႇ” သမ်ႉဝႃႈသဵင်ၶဵင်ၵေႃႈ မီးလွင်ႈမႆႈၸႂ်လေႃးဝႆႉယူႇ။
“ဢမ်ႇပဵၼ်သင်ယဝ်ႉၶႃႈ!”
“ဢိူဝ်ႈ..လီယဝ်ႉ” ယဵၼ်ၵႂႃႇၵႅပ်ႉၼိုင်ႈသေ ၸင်ႇၶိုၼ်းလၢတ်ႈၸူးဝၼ်းၸိုၼ်ႈၵႂႃႇ “ႁူႉယူႇဢမ်ႇၸႂ်ႈႁႃႉၼၼ်ႉ ပဵၼ်လွၵ်းလၢႆးလဵဝ်ဢၼ်ၸွႆႈမႂ်းလႆႈ ၶႅၼ်ႇတေႉယဝ်ႉ ဢၼ်ၶတ်းၸႂ်ဢူတ်းယဵၼ်ႉလႆႈ”
ဝၼ်းၸိုၼ်ႈၵေႃႈ ၼင်ႈသေတွပ်ႇၸူးၵႂႃႇ “ဢေႃႈ..ႁူႉယဝ်ႉၶႃႈ” မိူၼ်မၼ်းတေပွင်ႇၸႂ်ၵူႈလွင်ႈယဝ်ႉ သင်ၸိူဝ်ႉ ဢမ်ႇမတ်ႉဝၼ်းၸိုၼ်ႈႁႂ်ႈပေႃးၸမ်တၢႆ ႁႂ်ႈပိူၼ်ႈပေႃးမီးၸႂ်ဢီးလူမႃးလႆႈၸိူင်ႉၼၼ်ၼႆ၊ ၽႂ်ၽႂ်ၵေႃႈတေဢမ်ႇႁၢၼ်ႉၸႂ်လွင်ႈဢၼ်ဝၼ်းၸိုၼ်ႈ ၶႃႈႁႅမ်ၽူႈမၢႆ ဢၼ်ႁဵတ်းၵၢၼ်ယူႇၸွမ်းၵၼ်မႃးႁိုင်ၼၼ်ႉလႆႈ။ သင်ဢမ်ႇႁဵတ်းၸိူင်ႉၼၼ် ဝၼ်းၸိုၼ်ႈတေၸၢင်ႈထုၵ်ႇဢဝ်ၵႂႃႇတၢႆပႅတ်ႈယဝ်ႉလူးၵွၼ်ႇ။ ၸႂ်ႉလွင်ႈဢူၼ်ႈဢွၼ်ႇႁဵတ်းပဵၼ်တီႈပိူၼ်ႈဢီးလူ ဢဝ်လွင်ႈဢီးလူဢၼ်ပိူၼ်ႈမီးပၼ်ၼၼ်ႉ မႃးပဵၼ်ဢဵၼ်ႁႅင်းႁႂ်ႈပိူၼ်ႈၶႂ်ႈၸွႆႈထႅမ်ၶိုၼ်း။ လွင်ႈဢၼ်မီးၵူၼ်းတင်းတပ်ႉ မႃးတုၵ်းယွၼ်းႁႂ်ႈပွႆႇပၼ်ဝၼ်းၸိုၼ်ႈၼၼ်ႉၵေႃႈ လႆႈဝႃႈပဵၼ်တီႈဢၼ်ႁဵတ်းႁႂ်ႈပိူၼ်ႈႁၼ်ၸႂ်မၼ်းမႃးလႄႈ လူတ်းယွၼ်ႇပၼ်မၼ်းၵႂႃႇယူႇယဝ်ႉ။
ၼင်ႇႁိုဝ်ပေႃးတေဢမ်ႇပူၼ်ႉၵႂႃႇလၢႆလၢႆၼၼ်ႉ ၸဝ်ႈလွၼ်ႉၶိူဝ်း သင်ႇႁႂ်ႈဢမ်ႇပၼ်ဝၼ်းၸိုၼ်ႈ ယိပ်းၵွင်ႈ ၼႂ်းၶၢဝ်းတၢင်းသၢမ်လိူၼ် မိူၼ်တင်းဢမ်ႇပၼ်ၵႂႃႇတၢင်းလႂ်လႆႈ ၼၼ်ႉယဝ်ႉ။ ၼႂ်းၶၢဝ်းတၢင်းသၢမ်လိူၼ်ၼၼ်ႉၵေႃႈ ဝၼ်းၸိုၼ်ႈလႆႈမႃးႁဵတ်းၵၢၼ်တႅၼ်းတီႈ ၽူႈမၢႆၵေႃႉၵဝ်ႇၼၼ်ႉၵႂႃႇ လူၺ်ႈမီးသၢႆလူမ်းၸွႆႈတူၺ်းၵႂႃႇၸွမ်း။ ၼႂ်းငဝ်းလၢႆးၶိုၵ်ႉၶၵ်ႉၼၼ်ႉ မၢင်ပွၵ်ႈမၼ်းဢမ်ႇမီးၵၢၼ်ၽႂ်ၵၢၼ်မၼ်းလႄႈ ၽႂ်မေႃၽႂ်လႆႈဢိတ်းဢွတ်းၼႆၵေႃႈ ႁႂ်ႈၵၼ်ႁဵတ်းၵႂႃႇၵူၺ်း၊ သၢႆလူမ်းၵေႃႈ ၽွင်းဢမ်ႇမီးၽူႈမၢႆၼၼ်ႉ မၼ်းၵေႃႈလႆႈႁဵတ်းတႅၼ်းၵႂႃႇၸူဝ်ႈၶၢဝ်းသေ ၵွပ်ႈပိူဝ်ႈယူႇၸွမ်းၵၼ်မႃးႁိုင်လႄႈ မၼ်းၵေႃႈႁူႉလွၵ်းလၢႆးမၼ်းယူႇၽွင်ႈ ၼၼ်ႉယဝ်ႉ။
………..
“ဢၼ်ႁႃးဝူၼ်ႉဝႃႈဝၼ်းၸိုၼ်ႈပဵၼ်ၵူၼ်းလီၼႆႉ ဝူၼ်ႉၽိတ်းယဝ်ႉယူဝ်ႉ! ႁႃးသမ်ႉပေႃးၶႂ်ႈၵူဝ်မႃးယဝ်ႉဢ”
“ပေႃးသြႃႇႁႃးဢမ်ႇၵႂႃႇပူၼ်ႉပႅၼ်လုၵ်ႈယိင်းပိူၼ်ႈတႄႉ မၼ်းၵေႃႈတေဢမ်ႇႁဵတ်းသင်ၵဝ်ႇ”
တွၼ်ႈပႅတ်ႇသုတ်းၵႂႃႇယဝ်ႉ သိုပ်ႇလူထႅင်ႈတွၼ်ႈၵဝ်ႈၶႃႈ။
တႃႇတွင်း။ ။ၸိူင်းႁူဝ်ၼႆႉပဵၼ်ၸိူင်းဢၼ်ဝူၼ်ႉသၢင်ႈဢဝ်ၵူၺ်းဢမ်ႇၸႂ်ႈလွင်ႈတႄႉ။
