တွၼ်ႈႁူၵ်း
ၸဝ်ႈပၢင်ႇၵေႃႈ သမ်ႉဝႃႈလႆႈႁပ်ႉၶေႃႈၸီႉသင်ႇမႃးယဝ်ႉသေတႃႉ ၶေႃႈသင်ႇၼၼ်ႉ မီးယူႇတီႈမၼ်းၵူၺ်း ဢမ်ႇလႆႈသိုပ်ႇသူင်ႇႁႂ်ႈၽႂ်ႁူႉ၊ ဢၼ်လၢႆးငၢၼ်းတႄႉ ယွမ်းလူင်းယဝ်ႉသေတႃႉ တွၼ်ႈတႃႇၵူၼ်းမိူင်းၶဝ်တႄႉ ယင်းတိုၵ်ႉလႆႈသႂ်ႇၶဝ်ႈမိူၼ်ၵဝ်ႇယူႇ။ ဢၼ်လိူဝ်သၢႆမၢႆမၼ်းၼၼ်ႉၵေႃႈ ၵဵပ်းသိမ်းဝႆႉတႃႇမၼ်းသေ ၵပ်းသိုပ်ႇတင်းၶိင်းၶႄႇ ၸၢင်းဝူၺ်ႇ ဢၼ်ႁဵတ်းၵၢၼ်ၽၢႆႇတေႃႉသူင်ႇၵုၼ်ႇၵႃႉၼၼ်ႉ လၵ်ႉႁဵတ်းၵၢၼ်သိုဝ်ႉၶၢႆၵၼ်ၵႂႃႇ ယူႇယဝ်ႉ။ သင်ဝႃႈမီးၵူၼ်းဢဝ်လွင်ႈၼႆႉလၢတ်ႈဢွၵ်ႇၼႆၸိုင် ဢမ်ႇဝႃႈၽႂ်ၽူႈလႂ်ၵေႃႈယဝ်ႉ တၵ်းတေလႆႈတၢႆၵူၺ်းၼႆသေ လွၵ်ႇငိူတ်ႈၵူၼ်းမိူင်း ပႃးတင်းၵူၼ်းသိုၵ်းမၼ်းၵႂႃႇ။ ၵွပ်ႈၼၼ်လႄႈ ဢမ်ႇမီးၽႂ်ၵေႃႉလႂ် ႁတ်းဢဝ်လွင်ႈၼႆႉဢွၵ်ႇၵႂႃႇလၢတ်ႈၼႄၽႂ် ႁူႉၵေႃႈ ႁူႉႁင်းၽႂ်ႁင်းမၼ်းၵူၺ်း။
သင်ပဵၼ်ၵူၼ်းဢွၼ်ႇၵေႃႈတဵၵ်း သင်ပဵၼ်ၵူၼ်းလူင်ၵေႃႈ ဢဝ်ငိုၼ်းယဵတ်ႈပိၵ်ႉသူပ်းၵႂႃႇယဝ်ႉ။ ပေႃးဝႃႈငိုၼ်းၼႆၽႂ်ၽႂ်ၵေႃႈ ဢမ်ႇပေႃးသူႈထဵင်လႆႈ တေႃႈၼင်ႇၵူၼ်းလူင်ၸိူင်ႉၼင်ႇၸဝ်ႈလွၼ်ႉၶိူဝ်းၼႆႉ ယင်းယွမ်းသုမ်းပၼ်မၼ်းၵႂႃႇတေႉလႄႈ သမ်ႉပေႃးဢမ်ႇၸၢင်ႈလၢတ်ႈသင်ၸွမ်းမၼ်းလႆႈယဝ်ႉ၊ မၼ်းၵေႃႈ ႁဵတ်းၸိူင်ႉၼၼ်မႃးတိၵ်းတိၵ်း သမ်ႉဝႃႈပဵၼ်ၼႂ်းငဝ်းလၢႆးၵပ်ႉၵိၼ်းယူႇသေတႃႉၵေႃႈယဝ်ႉ မၼ်းၼၼ်ႉ တိုၼ်းဢမ်ႇမေႃပွင်ႇၸႂ်လႄႈ မေႃယွၼ်ႇယၢၼ်းပၼ်ပိူၼ်ႈသေဢိတ်းၼၼ်ႉယဝ်ႉ။
မၢၵ်ႈမီးယွၼ်ႉ ၼမ်ႉႁိူဝ်ႇၼမ်ႉၶႆးပိူၼ်ႈလႄႈ ဢဝ်မႃးၵိၼ်လူၼ်ႉၵိၼ်လိူဝ်ယူႇႁင်းၸဝ်ႈၵဝ်ႇ ၵူၺ်းပိူၼ်ႈသမ်ႉ ဢူတ်းယဵၼ်ႉဢူတ်းၵၼ်ႈ ႁဵတ်းယၢပ်ႇႁဵတ်းၽိုတ်ႇသေၸင်ႇၵွႆႈလႆႈမႃးၼၼ်ႉ မၼ်းဢမ်ႇထုၵ်ႇလီပဵၼ်ၵေႃႈ လႆႈပဵၼ်ၵႂႃႇယဝ်ႉ။ သူပ်းတႄႉလၢတ်ႈဝႃႈ ႁဵတ်းၵၢၼ်ပုၼ်ႈၵူၼ်းၼမ် ၵူၺ်းၵႃႈၵမ်ဢဝ်လွင်ႈဝႃႈၵူၼ်းၼမ်ၼၼ်ႉ မႃးပဵၼ်ၶွင်ၵူၼ်းလဵဝ်ၸိူင်ႉၼႆ ဝၼ်းဢၼ်ၵူၼ်းမိူင်းတေလႆႈယူႇသႃႇၵတ်းယဵၼ်လႆႈၼၼ်ႉ ၸွင်ႇတေမီးမႃးႁိုဝ် ယင်းတိုၵ်ႉပဵၼ်ၶေႃႈထၢမ်ဢၼ်ၶမ်ၸႂ်ဝႆႉယူႇ။ ဢမ်ႇႁၼ်သဵၼ်ႈတၢင်းမၼ်းသေတႃႉၵေႃႈ ၵွပ်ႈပဵၼ်ပုၼ်ႈၽွၼ်းယဝ်ႉလႄႈ ၵူၼ်းၸိူင်ႉၼင်ႇဝၼ်းၸိုၼ်ႈ ဢၼ်ပဵၼ်လုၵ်ႈၼွင်ႉ ပဵၼ်ၵူၼ်းႁဵတ်းၵၢၼ်ပၼ်ပိူၼ်ႈၵူၺ်းၼၼ်ႉၵေႃႈ ဢမ်ႇမီးသုၼ်ႇထဵင်သင်လႆႈ ပိူၼ်ႈၸႂ်ႉႁဵတ်းသင်ၵေႃႈ ၵႃႈလႆႈႁဵတ်းပၼ်ၵူၺ်းယဝ်ႉ။
ဝၼ်းၸိုၼ်ႈဢၼ်ႁၼ်ဢၼ်ႁဵတ်းၵူႈလွင်ႈၼၼ်ႉ ႁူႉယူႇပဵၼ်လွင်ႈဢမ်ႇလီ ပဵၼ်လွင်ႈၽိတ်းသေတႃႉ၊ ၵူၺ်းၵႃႈ ဢမ်ႇလိူဝ်လႆႈၶေႃႈသင်ႇၼၼ်ႉလႄႈ ၼင်ႇၵႃႈဢၼ်မၼ်းႁဵတ်းလႆႈ မၼ်းၵေႃႈႁဵတ်းၵႂႃႇပၼ်တဵမ်တီႈ။ သင်မၼ်းဢမ်ႇႁဵတ်း ၵူၼ်းတၢင်ႇၵေႃႉၵေႃႈ တေမႃးႁဵတ်းတႅၼ်းမၼ်းမိူၼ်ၵၼ်လႄႈ လွင်ႈဢမ်ႇလီၶဝ်ၼၼ်ႉ တႅၼ်းတီႈတေႁႂ်ႈၵူၼ်းတၢင်ႇၵေႃႉႁဵတ်းပၼ် ႁႂ်ႈမၼ်းၵေႃႉႁဵတ်းလီလိူဝ်ယဝ်ႉ။ ပေႃးမၼ်းၵေႃႉႁဵတ်းၼႆ မၼ်းၸင်ႇၸၢင်ႈၵုမ်းထိင်းငဝ်းလၢႆးမၼ်းလႆႈ။ ၵွပ်ႈမၼ်းႁဵတ်းၵၢၼ်တႅတ်ႈတေႃး ၶႅမ်ႉလႅပ်ႈလီလႄႈ ၶဝ်ၸိူဝ်းၼၼ်ႉၵေႃႈ တမ်းၸႂ်မၼ်းသေ ဝႆႉဝၢင်းၸႂ်ပၼ်မၼ်းႁဵတ်းၵၢၼ်ပၼ်ၶဝ်ၵႂႃႇလႆႈၵူႈလွင်ႈယူႇယဝ်ႉ။
ဝၼ်းၸိုၼ်ႈၵေႃႈ ႁူႉလီဝႃႈ ၵူၼ်းၸိူဝ်းၼႆႉ ပၵ်းပိူင်လႄႈဢႃႇၼႃႇၵူၺ်းၼၼ်ႉ ဢမ်ႇႁဵတ်းသင်ၶဝ်လႆႈ လႄႈ ၶဝ်ၵေႃႈ တေဢမ်ႇမီးဝၼ်းမူၼ်ႉမႄးတူဝ်ၸႂ်သေ ဢမ်ႇႁပ်ႉၶၢမ်ႇလႆႈဝႃႈ ၶဝ်တေဢမ်ႇႁဵတ်းလွင်ႈဢမ်ႇလီထႅင်ႈၼႆ။ မိူဝ်ႈမၼ်းႁႄႉႁၢမ်ႈ လွင်ႈႁဵတ်းသၢင်ႈၵူၼ်းၸိူဝ်းၼၼ်ႉဢမ်ႇလႆႈ မၼ်းၵေႃႈလႆႈၶတ်းၸႂ်ၸွႆႈထႅမ် ၵူၼ်းၸိူဝ်းဢၼ် ထူပ်းတၢင်းယၢပ်ႇၽိုတ်ႇမိုင်ၵႂင်ယူႇၼႂ်းလပ်းသိင်ႇတၼ်၊ ဢၼ်ထုၵ်ႇၵူၼ်းမီးဢႃႇၼႃႇၶဝ်ဢဝ်ပေႉပုၼ်ႈယူႇၼၼ်ႉ လႄႈ မၼ်းၸင်ႇလႆႈပွမ်တူဝ်ၼုင်ႈသိူဝ်ႈၶူဝ်းလမ်သေ ဢွၵ်ႇၵႂႃႇႁဵတ်းၵၢၼ် ၽွင်းယၢမ်းၵၢင်ၶမ်ႈၵၢင်ၶိုၼ်းၼၼ်ႉယူႇယဝ်ႉ။
သမ်ႉဝႃႈပဵၼ်တပ်ႉသိုၵ်း ဢၼ်ၽဵဝ်ႈမူၺ်ႉယႃႈမဝ်းၵမ်ၼႆသေတႃႉ တပ်ႉသိုၵ်းတႄႉၽဵဝ်ႈယူႇ ၵူၼ်းႁဵတ်းသိုၵ်းတႄႉ ဢမ်ႇလႅပ်ႈၼပ်ႉပႃး၊ ၼႂ်းၼႃႈတီႈဢုပ်ႉပိူင်ႇၸဝ်ႈမိူင်းၶမ်းၼၼ်ႉ ပဵၼ်ပိုၼ်ႉတီႈဢၼ်ယႃႈမဝ်းၵမ် ၽႄႈလၢမ်းၼမ် ဢမ်ႇဝႃႈတေတိၺွပ်းၽဵဝ်ႈမူၺ်ႉတၢၼ်ႇႁိုဝ်ၵေႃႈ ၼင်ႇႁၢင်ႈမၼ်းဢမ်ႇမူတ်းသဵင်ႈလႆႈႁေပွၵ်ႈၼၼ်ႉယဝ်ႉ။
ယွၼ်ႉလွင်ႈၼႆႉထိုင်ၵႂႃႇတီႈၵူၼ်းလူင်ပႃႈၼိူဝ်ယဝ်ႉလႄႈ ၸဝ်ႈလွၼ်ႉၶိူဝ်းၵေႃႈ လႆႈဢွၵ်ႇၶၢဝ်းတၢင်းသေ မႃးတူၺ်းလုၵ်ႈၼွင်ႉမၼ်း ဢၼ်ယူႇၼႂ်းပိုၼ်ႉတီႈၼၼ်ႈယူႇယဝ်ႉ။ တီႈၼၼ်ႈၵေႃႈ တေႃႈဢမ်ႇလွတ်ႈဝၼ်းၸိုၼ်ႈၵႂႃႇၸွမ်း။ ပွၵ်ႈၼႆႉတႄႉၵေႃႈ မီးၵူၼ်းဝၢၼ်ႈၶဝ်ဢွၼ်ၵၼ်ဢွၵ်ႇမႃးႁပ်ႉတွၼ်ႈ ဢၼ်မီးပႃးၸဝ်ႈမိူင်းၶမ်းၼၼ်ႉယူႇ၊ တင်းၵူၼ်းဝၢၼ်ႈလႄႈၵူၼ်းသိုၵ်းၶဝ်ၵေႃႈ လႆႈမီးပၢင်ပၼ်ပိုၼ်ႉႁူႉ ၵဵဝ်ႇလူၺ်ႈလွင်ႈယႃႈမဝ်းၵမ်ၵၼ်ၵႂႃႇ။ လူၺ်ႈမီးၸဝ်ႈလွၼ်ႉၶိူဝ်း ပိုတ်ႇပၢင်ၵႂႃႇ ၽွင်းဢၼ်ၵူၼ်းတိုၵ်ႉၼင်ႈ ငဝ်ငုၵ်းငဝ်ငၢၵ်း ဢုပ်ႇၵၼ်ယူႇ တီႈၼႂ်းၵၢင်ပၢင်ႇဝၢင်းၵျွင်းမုၼ်ၸဝ်ႈၼၼ်ႉယဝ်ႉ။
ဝၢႆးသေပၢင်ႁူပ်ႉထူပ်းၵၼ်ယဝ်ႉ ၸဝ်ႈလွၼ်ႉၶိူဝ်းၶဝ်ၵေႃႈ လႆႈဢွၼ်ၵၼ်ဢွၵ်ႇဝၢင်းၵျွင်းၵႂႃႇသေ ၸင်ႇသမ်ႉမီးၵူၼ်းၵေႃႉၼိုင်ႈ ယိပ်းတင်းမိတ်ႈမၢၵ်ႈၼိုင်ႈ ၵိုင်ႉၵၢင်ႉလႅၼ်ႈလူင်မႃး ဢၢၼ်းတေမႃးတႅင်းသႂ်ႇၸဝ်ႈလွၼ်ႉၶိူဝ်းယူႇ၊ ၵူၺ်းၵႃႈ ဢမ်ႇၶိုတ်းတၢင်းဝႆးဝၼ်းၸိုၼ်ႈလႆႈ ဝၼ်းၸိုၼ်ႈၼၼ်ႉၵေႃႈ ၶုၼ်ႇပိတ်ႉထၢၵ်ႇသႂ်ႇၶႅၼ်ၵူၼ်းၵေႃႉၼၼ်ႉ ဢဝ်မိုတ်ႈၼၼ်ႉဝူင်တူၵ်းၵႂႃႇလႄႈ မႄးထိပ်ႇသႂ်ႇၵူၼ်းၵေႃႉၼၼ်ႉ သဵၼ်ဝူင်လူင်ထွႆလင်ၵႂႃႇမွၵ်ႈသွင်ဝႃးၼႆႉယဝ်ႉ၊ ၵူၼ်းသိုၵ်းၶဝ်ၵေႃႈ ၸင်ႇဢွၼ်ၵၼ် တိၺွပ်းဢဝ်တူဝ်ၵူၼ်းၵေႃႉၼၼ်ႉ ဢၼ်မိူၼ်တေပဵၼ်ၵူၼ်းယွင်ႇယႃႈၼၼ်ႉ မိူဝ်းၵႂႃႇၸွမ်းၶဝ်ယူႇယဝ်ႉ။
ၽွင်းၼၼ်ႉ မၼ်းဝႆးၼႃႇ ၽႂ်ဢမ်ႇတၼ်းၾၢင်ႉမႅၼ်ႈလူးၵွၼ်ႇဝႃႈမၼ်းပဵၼ်သင်ၵႂႃႇၼႆ။ ၵူၺ်းႁၼ်ဝႃႈ ၵူၼ်းသိုၵ်းၶဝ်တိၺွပ်းၵူၼ်းၵေႃႉၼၼ်ႉၵႂႃႇၵူၺ်း။ လိူဝ်သေဝၼ်းၸိုၼ်ႈ တေပဵၼ်ၵူၼ်းၵေႃႉဢၼ်ၸဝ်ႈလွၼ်ႉၶိူဝ်း ယုမ်ႇယမ်တမ်းၸႂ်လႆႈယဝ်ႉ မၼ်းယင်းပဵၼ်ႁူမ်ႇလူမ်ႈၵႅမ်တူဝ် ဢၼ်ၵႅတ်ႇၶႄပၼ်လႆႈလီလိူဝ်သေၽႂ်ယဝ်ႉ။
ဝၼ်းဢွၼ်တၢင်းသုတ်း ဢၼ်ဝၼ်းၸိုၼ်ႈလႆႈၶဝ်ႈႁဵတ်းၵၢၼ်ၸွမ်းၸဝ်ႈလွၼ်ႉၶိူဝ်း လႄႈပဵၼ်ပွၵ်ႈဢွၼ်တၢင်းသုတ်း ဢၼ်မၼ်းလႆႈၵႂႃႇၼႂ်းပိုၼ်ႉတီႈပဵၼ်ပၢင်တိုၵ်း တီႈမီးလွင်ႈပိုတ်းယိုဝ်းတိုၵ်းယိုဝ်းၵၼ်တင်း ၸုမ်းသိုၵ်းမၢၼ်ႈမိူၵ်ႈလိူင်းယူႇတႃႇသေႇ၊ မိူဝ်ႈၼၼ်ႉဝၼ်းၸိုၼ်ႈယင်းတိုၵ်ႉလႆႈ ဢႃႇယု 17 ၵူၺ်း၊ ၵၢၼ်ဢွၵ်ႇၶၢဝ်းတၢင်းၶဝ်ၼၼ်ႉတႄႉ မီးၵူၼ်းတင်းမူတ်း 5 ၵေႃႉ မေႃယႃယိင်းၵေႃႉၼိုင်ႈ လုၵ်ႈၼွင်ႉၸဝ်ႈလွၼ်ႉၶိူဝ်းထႅင်ႈ 2 ၵေႃႉ။ လိူၵ်ႈလိူၵ်ႈ ၸွမ်းတၢင်းဢၼ်ၶဝ်ၵႂႃႇၼၼ်ႉသမ်ႉ ၵႂႃႇႁူပ်ႉၺႃးၸုမ်းသိုၵ်းမိူၵ်ႈလိူင်းၶဝ်သေ လႆႈပဵၼ်ပၢင်တိုၵ်းၵၼ်ၵႂႃႇယူႇယဝ်ႉ။
ၵွပ်ႈဢဵၼ်ႁႅင်းၶဝ်ၼၼ်ႉ မီးဢေႇလႄႈ တႃႇတေသိုပ်ႇတိုၵ်းၶိုၼ်ႈၵႂႃႇတၢင်းၼႃႈထႅင်ႈၼၼ်ႉ ႁႅင်းဢမ်ႇၵိုင်ႇငၢမ်ႇၵၼ်၊ ပေႃးတေသိုပ်ႇတိုၵ်းတိၵ်းတိၵ်းၵေႃႈ လိူဝ်သေတၢႆဢမ်ႇၸၢင်ႈဢဝ်ပေႉလႆႈ။ ၸဝ်ႈလွၼ်ႉၶိူဝ်းၵေႃႈ သင်ႇႁႂ်ႈၵူၼ်းမၼ်းထွႆၵႂႃႇၶိုၼ်းယူႇ ၵွပ်ႈပိူဝ်ႈမၼ်းၵေႃႈ လႆႈမၢတ်ႇၸဵပ်းၵႂႃႇတီႈၶႅၼ်ၽၢႆႇၶႂႃ ဢိၵ်ႇတင်း တီႈတွင်ႉၽၢႆႇသၢႆႉယူႇယဝ်ႉ။ လုၵ်ႈၼွင်ႉၵေႃႉဢၼ်ၵႂႃႇတၢင်းၼႃႈၼၼ်ႉ လႆႈဝႃႈမၢတ်ႇၸဵပ်းၵႂႃႇႁၢဝ်ႈႁႅင်းတႄႉတႄႉ ၵွပ်ႈပိူဝ်ႈယဵပ်ႇၺႃးမၢၵ်ႇသေ ၶႃမၼ်းသွင်ၶွၼ်ၼၼ်ႉ ပဵၼ်ဢၼ်ပုတ်းၵႂႃႇယူႇယဝ်ႉ။
မိူဝ်ႈပဵၼ်ၸိူင်ႉၼၼ် ဝၼ်းၸိုၼ်ႈၵေႃႈ လၢၵ်ႈၸၼ်ဢဝ်ၵွင်ႈ တီႈၵူၼ်းသိုၵ်းၵေႃႉဢၼ်ယူႇပႃႈၼႃႈၼၼ်ႉသေ မုင်ႈၼႃႈယဵပ်ႇယၢင်ႈၵိင်ႈလႅၼ်ႈလတ်းၵႂႃႇၼႂ်းပႃႇမၢၵ်ႇၵွင်ႈ ၸွမ်းၼင်ႇလွၵ်းလၢႆး ဢၼ်မၼ်းလႆႈၽိုၵ်းၽွၼ်ႉမႃးၼၼ်ႉသေ တုမ်ႉတွပ်ႇလေႃႇသႂ်ႇၵူၼ်းမိူၵ်ႈၸိူဝ်းၼၼ်ႉ ၼင်ႇႁတ်းႁတ်းႁၢၼ်ႁၢၼ် ဢမ်ႇၵူဝ်ဝႃႈမၼ်းတေတိူဝ်ႉၺႃးမၢၵ်ႇၵွင်ႈႁိုဝ် မၼ်းတေပဵၼ်ၸိူင်ႉႁိုဝ် သၢႆတႃဢၼ်ပႅင်းၸင်း ႁူမ်ႈလေႃးလွင်ႈၸဵပ်းၸႂ်ၼၼ်ႉ လႆႈဢဝ်သႂ်ႇပႃးၼႂ်းမၢၵ်ႇၵွင်ႈသေ ယိူင်းၸူးသႂ်ႇၵႂႃႇၵမ်းၵေႃႉၵမ်းၵေႃႉ ၼင်ႇမႅၼ်ႈယမ်၊ ၵူၼ်းဢၼ်လူမ်ႉတၢႆၵႂႃႇၼၼ်ႉၵေႃႈ ႁဵတ်းႁႂ်ႈမၼ်းႁၼ်မႃး ပီႈၼွင်ႉမၼ်းမႄႈမၼ်းဢၼ်လႆႈလူမ်ႉတၢႆၵႂႃႇ တီႈၼႂ်းၵၢင်တၢင်းဝၼ်းၼၼ်ႉ၊ မၼ်းၵေႃႈလႆႈပိုတ်းယိုဝ်းၵႂႃႇ တေႃႇမၢၵ်ႇၵွင်ႈမၼ်းပေႃးမူတ်းသဵင်ႈသေယဝ်ႉ ယၢမ်းၼၼ်ႉ ၸင်ႇသမ်ႉမီးၵူၼ်းမႃးၸွႆႈၶဝ်ထႅင်ႈႁႅင်းၼိုင်ႈ ၸုမ်းၶဝ်ၵေႃႈ လႆႈၽဵဝ်ႈမူၺ်ႉၵူၼ်းမိူၵ်ႈလိူင်းၸိူဝ်းၼၼ်ႉ သမ်ႉပေႃးလႆႈထွႆၵႂႃႇၶိုၼ်းယူႇယဝ်ႉ။
ၵူၼ်းၵေႃႉဢၼ်ၺႃးမၢၵ်ႇၽႃႇၼၼ်ႉၵေႃႈ ဢမ်ႇဢူတ်းယဵၼ်ႈၵၼ်ႈလႆႈယဝ်ႉသေ လႆႈပွႆႇသၢႆၸႂ်မၼ်းသုတ်းသဵင်ႈၵႂႃႇတီႈၼၼ်ႈယူႇယဝ်ႉ။ ၼႂ်းၵၢင်ပႃႇထိူၼ်ႇလူင်ၼၼ်ႉၵေႃႈ မီးၵူၼ်းမၢၵ်ႇမိူဝ်လူမ်ႉတၢႆလူင်ၵႂႃႇသဵင်ႈ ဢၢႆၶႅဝ်းလိူတ်ႈလႅင်သမ်ႉပေႃးတဵမ်လူင်ဝႆႉ။ ၵူၼ်းမိူၵ်ႈလိူင်းၸိူဝ်းၼၼ်ႉ တေမီးယူႇမွၵ်ႈသၢဝ်းပၢႆပၢႆၼႆႉလႄႈ ႁၼ်ၵူၼ်းၸိူဝ်းဢၼ်ၼွၼ်းလူမ်ႉတၢႆယူႇၸိူင်ႉၼၼ်ၵေႃႈ ဝၼ်းၸိုၼ်ႈတႄႉ ဢမ်ႇလႆႈတိုၼ်ႇၵူဝ်သင်သေဢိတ်း၊ လွင်ႈဢၼ်ၵူၼ်းၸိူဝ်းၼႆႉလႆႈတၢႆၵႂႃႇၼၼ်ႉ မၼ်းယင်းပႆႇတၢၼ်ႇ ဢၼ်ၶဝ်ႁဵတ်းတေႃႇပေႃႈမႄႈပီႈၼွင်ႉမၼ်းၼၼ်ႉလူးၵွၼ်ႇ။
မၼ်းလႆႈလႄႇလဵပ်ႈၶေႇပိတ်ႉတူၺ်းၵႂႃႇၸွမ်း ၵူၼ်းတၢႆၸိူဝ်းၼၼ်ႉသေ ၸင်ႇလႆႈႁၼ်ၵူၼ်းၵေႃႉၼိုင်ႈ တိုၵ်ႉထူၺ်ႈၸႂ်ယူႇလႄႈ ယင်းတိုၵ်ႉငိၼ်းသဵင်ၶၢင်းႁွင်ႉဢွၵ်ႇမႃးယူႇၼၼ်ႉ သဵင်ၵွင်ႈမၼ်းၵေႃႈ လႆႈပိၵ်ႉသဵင်လူမ်းထူၺ်ႈၸႂ်ၵူၼ်းၵေႃႉၼၼ်ႉၵႂႃႇပႅတ်ႈၵမ်းလဵဝ်သေ၊ ယုမ်ႉဢွၵ်ႇမႃးၼင်ႇႁၢၼ်ႉၸႂ် ပႃးတင်းသၢႆတႃဢၼ်ပႅင်းၸင်းဝႆႉယူႇ၊ ၵူၼ်းသိုၵ်းၶဝ် ဢၼ်လႆႈႁၼ်သၢႆတႃ လႄႈ လွင်ႈႁဵတ်းသၢင်ႈမၼ်း ငၢႆးၼင်ႇၵူၼ်းပႃႇထိူၼ်ႇၼင်ႇၼၼ် သမ်ႉပေႃးၶႂ်ႈလီၵူဝ်မၼ်းမႃးမိူၼ်ၵၼ်ယဝ်ႉ။
ၸဝ်ႈလွၼ်ႉၶိူဝ်းၼၼ်ႉၵေႃႈ မီးမေႃယႃၸွႆႈယူတ်းယႃပၼ်ၵႂႃႇလီငၢမ်းသေ ၵႂႃႇလိုဝ်ႈယူႇဝႆႉတီႈဢၼ်ဢမ်ႇပေႃးၸမ်ပေႃးၵႆၼၼ်ႉ တူၺ်းၸွမ်းၵႂႃႇၶဝ်ၵူၺ်း။ လွင်ႈႁဵတ်းသၢင်ႈဝၼ်းၸိုၼ်ႈၼႂ်းဝၼ်းၼႆႉ ႁဵတ်းႁႂ်ႈၸဝ်ႈလွၼ်ႉၶိူဝ်း ပဵင်းပေႃးၸႂ်တႄႉတႄႉလႄႈ “ဢမ်ႇသုမ်း ဢၼ်လႆႈလဵင်ႉလူမႃး” ယုမ်ႉၼင်ႇႁၢၼ်ႉၸႂ်ႁၢၼ်ႉၶေႃးမႃးယူႇယဝ်ႉ။
ဝၼ်းၼၼ်ႉ သင်ဢမ်ႇမီးဝၼ်းၸိုၼ်ႈၵႂႃႇတုမ်ႉတွပ်ႇၸၼ်ၶၢဝ်းယၢမ်းပၼ် ႁႂ်ႈၵူၼ်းၸွႆႈထႅမ်ၶဝ်မႃးၶိုတ်းတၼ်း ထၢင်ႇတႄႉတေဢမ်ႇမီးၽႂ် လွတ်ႈသၢႆၸႂ်ၵႂႃႇလႆႈသေၵေႃႉယဝ်ႉ။ သမ်ႉဝႃႈဝၼ်းၸိုၼ်ႈ ဢမ်ႇယၢမ်ႈၶဝ်ႈပၢင်တိုၵ်းဢၼ်တေႉမၼ်းမႃးသေတႃႉ ၵူၺ်းၵႃႈ တႃႇတေၽိုၵ်းၶဝ်ႈပၢင်တိုၵ်းတေႉၼၼ်ႉ မၼ်းၵေႃႈ တိုၼ်းၽိုၵ်းၽွၼ်ႉယူႇတႃႇသေႇလႄႈ တီႈၼႂ်းပၢင်သွၼ်ၼၼ်ႉ မၼ်းတင်ႈၸႂ်ႁဵၼ်းတေႉတေႉ ထိုင်တီႈ လႆႈပဵၼ်လုၵ်ႈႁဵၼ်းၵတ်ႉၶႅၼ်ႇ မၢႆၼိုင်ႈမႃး ယူႇယဝ်ႉ။ ယွၼ်ႉမၼ်းမီးလွင်ႈၼွၼ်းၾၼ်ၶႂ်ႈတိုၵ်းယိုဝ်းတင်း ၵူၼ်းမိူၵ်ႈလိူင်းၶဝ်လႄႈ ၸင်ႇယွၼ်းမႃးယူႇၸွမ်းၸဝ်ႈလွၼ်ႉၶိူဝ်း ၼႂ်းၼႃႈသိုၵ်းၼၼ်ႉၵမ်းလဵဝ် ဝၢႆးသေမၼ်းယဝ်ႉၵၢၼ်သွၼ်သိုၵ်းမႃး။
…….
“ၶႂ်ႈဝႃႈဢၼ်ၸဝ်ႈလွၼ်ႉၶိူဝ်း ႁွင်ႉဝၼ်းၸိုၼ်ႈၵႂႃႇၸွမ်းတႃႇသေႇၼၼ်ႉ ပဵၼ်ၵွပ်ႈလွင်ႈၼႆႉဢိူဝ်ႈၼေႃႈ”
“ၶိင်းပီး! မႂ်းၵေႃႈ ဝူၼ်ႉမိူၼ်ပိူၼ်ႈဝူၼ်ႉၵဝ်ႇယူဝ်ႉ”
“ဢိူဝ်ႈ ၵဝ်ၵေႃႈလၵ်ႉဝူၼ်ႉၵဝ်ႇဢိူဝ်ႈၶိင်းၵေႃႈ”
“တေႉၵဝ်ႇဢိူဝ်ႈၼေႃႈ ၵူၼ်းထဝ်ႈမၢင်ၵေႃႉ ယင်းလႆႈမေးၼုမ်ႇလိူဝ်သေလုၵ်ႈယ င်းမီးဢမ်ႇႁိုဝ် ၶႂ်ႈဝူၼ်ႉၵေႃႈလီဝူၼ်ႉယူႇ”
“ၵဝ်ဝႃႈ ၶႃသွင်ၵေႃႉၼႆႉ ယူႇၸွမ်းၵၼ်တႃႇသေႇ မၼ်းတိုၼ်းမီးယူႇႁေမဵဝ်းမဵဝ်းတႄႉ”
တွၼ်ႈႁူၵ်းသုတ်းၵႂႃႇယဝ်ႉ သိုပ်ႇလူဢၢၼ်ႇၵႂႃႇထႅင်ႈတွၼ်ႈၸဵတ်းၶႃႈ။
တႃႇတွင်း။ ။ ၸိူင်းႁူဝ်ၼႆႉပဵၼ်ၸိူင်းဢၼ်ဝူၼ်ႉသၢင်ႈမႃးဢဝ်ၵူၺ်း ဢမ်ႇၸႂ်ႈလွင်ႈတေႉ။
