တွၼ်ႈႁႃႈ
ၸဝ်ႈပၢင်ႇၼၼ်ႉၵေႃႈ မိူဝ်ႈႁူႉဝႃႈၵူၼ်းလူင်တေမႃးၼႆ ၼႅတ်ႈႁၢင်ႈႁႅၼ်းႁဵတ်းႁႃ တႃႇႁပ်ႉတွၼ်ႈၵႂႃႇလႄႈ သင်ႇႁႂ်ႈလုၵ်ႈၼွင်ႉမၼ်း ၵႂႃႇလၢတ်ႈတီႈၵူၼ်းဝၢၼ်ႈၶဝ် ႁဵတ်းၽၵ်းဢိၵ်ႇၼမ်ႉသူႇရႃႇမႃးပၼ်ၼႆယူႇယဝ်ႉ။ မိူဝ်ႈၵူၼ်းလူင်ၶဝ်ႁွတ်ႈမႃးထိုင် မိူဝ်ႈဝၢႆးဝၼ်းၼၼ်ႉၼႆၵေႃႈ လႆႈတႄႇဢွၼ်ၵိၼ်လဵင်ႉၵၼ် တေႃႇၵၢင်ဝၼ်းပေႃးၶမ်ႈယူႇ။ ဝၼ်းၸိုၼ်ႈၼၼ်ႉတႄႉၵေႃႈ ယွၼ်ႉၼိူဝ်တပ်ႉဢမ်ႇမီးၽူႈယိင်းလႄႈ ၸဝ်ႈလွၼ်ႉၶိူဝ်း ႁႂ်ႈမၼ်းလူင်းတပ်ႉ မႃးႁဵတ်းၶႅၵ်ႇပိူၼ်ႈတီႈၼႂ်းဝၢၼ်ႈ ၽွင်းၵၢင်ၶမ်ႈပႆႇတၼ်းလပ်းသိင်ႇၼၼ်ႉယဝ်ႉ။ ယွၼ်ႉမၼ်း ၼုင်ႈတင်းၶူဝ်းၵူၼ်းမိူင်းၵူၺ်းလႄႈ ၽႂ်ၵေႃႈ ဢမ်ႇထၢင်ႇဝႃႈမၼ်းပဵၼ်သိုၵ်းသေ တူၺ်းႁၼ်မၼ်းပဵၼ်ၵူၼ်းတၢင်ႇဝၢၼ်ႈမႃးၵူၺ်း။
“တေၵႂႃႇတၢင်းလႂ်လႃႇဢေးၼွင်ႉ” ၵူၼ်းဝၢၼ်ႈၶဝ် ဢၼ်လုၵ်ႉသူၼ်ဢွၼ်ၵၼ်ပွၵ်ႈမိူဝ်းႁႃႁိူၼ်းၶဝ်ၼၼ်ႉ လႆႈႁၼ်မၼ်းသေထၢမ်ၸူးယဝ်ႉ။
“ၶႃႈမႃးၸွမ်းႁႃပႃႈႁဝ်းၶႃႈဢေႃႈ ငိၼ်းဝႃႈမၼ်းမႃးယူႇတၢင်းဝၢၼ်ႈၸိူဝ်းၼႆႉၼႆၶႃႈဝႃႇ”
“ပႃႈသူၸိုဝ်ႈႁွင်ႉသင်လႃႇဝႃႈ”
“ပႃႈသႃႇၼႆဢေႃႈ မီးလုၵ်ႈၵေႃႉၼိုင်ႈၶႃႈ”
“ပႃႈသႃႇတႄႉ မီးၼမ်ယူႇၵူၺ်း ၵူၺ်းၵႃႈ ၵူၼ်းဢၼ်တိုၵ်ႉလုၵ်ႉတၢင်ႇတီႈမႃးယူႇတႄႉဢမ်ႇမီး ၶဝ်ၶၢႆႉမႃးယူႇႁိုင်ယဝ်ႉႁႃႉ”
“ဢမ်ႇႁိုင်ၶႃႈ တိုၵ်ႉၸင်ႇႁႃမွၵ်ႈမႃးမွၵ်ႈပီႊပၢႆၼႆႉၵူၺ်း”
“ပေႃးၼၼ်တႄႉ ဢမ်ႇမီးၼႃ သမ်ႉတေၵႂႃႇတၢင်းလႂ်ထႅင်ႈလႃႇၼႆႉ ပႆမႃးၵူၺ်းႁႃႉ ၵၢင်ဝၼ်းၵေႃႈၸမ်ၶမ်ႈယဝ်ႉ မိူဝ်းလိုဝ်ႈတီႈႁိူၼ်းႁဝ်းၵွၼ်ႇလႄႈ ၽိူဝ်လိူဝ်ပဵၼ်ၽူႈယိင်းႁေ ၵႂႃႇၵၢင်ၶမ်ႈၵၢင်ၶိုၼ်းၸိူင်ႉၼႆ မၼ်းဢမ်ႇပေႃးလီၼႃ တင်းၵူၼ်းသိုၵ်းၵေႃႈၼမ်ႁေ”
“ပဵၼ်သင်ၶႃႈလႃႇ ၶဝ်မေႃႁဵတ်းႁၢႆႉပိူၼ်ႈၶႃႈႁႃႉ”
“ဢေႇၵွၼ်ႇဢိူဝ်ႈၼၢင်းဝႃႈ! လုၵ်ႈဢွၼ်ႇယိင်းၼႂ်းဝၢၼ်ႈၼႆႉ သမ်ႉပေႃးၶႂ်ႈပဵၼ်မေးၶဝ်မူတ်းယဝ်ႉယူဝ်ႉ ပေႃးၸင်ႇႁႃပဵၼ်သၢဝ်သိၵ်းႁိၵ်းမႃးၵေႃႈ ၶဝ်သမ်ႉပေႃးႁွင်ႉမိူဝ်းလႄႇတပ်ႉၶဝ်ယဝ်ႉၼႃႇ”
“ၸႂ်ႈၶႃႈႁႃႉ! ဢမ်ႇမီးၽႂ်ႁၢမ်ႈၶႃႈၼႄႇ”
“ၽႂ်တေႁဵတ်းႁိုဝ်ႁၢမ်ႈလႆႈ ပေႃးၶဝ်ၶႂ်ႈလႆႈႁေပိူၼ်ႈဢမ်ႇပၼ် မၢင်ပွၵ်ႈဢဝ်ၵွင်ႈမႃးငႃသႂ်ႇပိူၼ်ႈႁေၵေႃႈႁဵတ်းဢိူဝ်ႈၼၢင်းဝႃႈ”
ပႃႈထႅင်ႈၵေႃႉၸင်ႇဝႃႈ “ၶဝ်ၶႂ်ႈလႆႈပၼ်လုၵ်ႈၼၢႆးထွၼ်းၼၼ်ႉပေႇၸႂ်ယဝ်ႉဝႃႈ ၵူၺ်းၵႃႈၼၢႆးထွၼ်းဢမ်ႇပၼ်လႄႈ ၶဝ်ၵေႃႈၵမ်းၵမ်းမႃးလွၵ်ႇတိၵ်းတိၵ်း ထိုင်တီႈ ၶဝ်ပေႃးလႆႈၶၢႆႉပၢႆႈၼၼ်ႉယိုင်”
“ပေႃးၵႂႃႇၸူးၶဝ်သမ်ႉလႆႈငိုၼ်းၸူၵ်းငိုၼ်းၸၢႆႇႁေၼႃႇ မၢင်ၸိူဝ်းၵေႃႈၸူမ်းၵႂႃႇၵျႃႉၵဝ်ႇဢိူဝ်ႈ ဢၼ်ပိူၼ်ႈမီးလုၵ်ႈယိင်းသၢဝ်ၸိူဝ်းဢမ်ႇၶႂ်ႈပၼ်ၶဝ်ၸိူဝ်းၼၼ်ႉတႄႉ ဢွၼ်ပၢႆႈမူတ်းယဝ်ႉ”
“ပေႃးၶဝ်ၶႂ်ႈလႆႈတႄႉမႃးယွၼ်းဢဝ်လီလီၵေႃႈလႆႈယူႇၵူၺ်းၼင်ႇၵဝ်ႇ ၵူၺ်းၵႃႈ ၶဝ်သမ်ႉမီးမေးယူႇယဝ်ႉလႄႈ ၶႂ်ႈဢဝ်ပိူၼ်ႈပဵၼ်မေးမူၵ်းၵူၺ်းၼၼ်ႉၼႃႇၼၢင်းဝႃႈ”
“ပေႃးပဵၼ်ၵူၼ်းဢွၼ်ႇပိူၼ်ႈတႄႉႁူႉၵႂၢမ်းယူႇၵူၺ်းၵဝ်ႇဢိူဝ်ႈ ၶဝ်ၶႂ်ႈလႆႈၼႆၵေႃႈ မႃးယွၼ်းဢဝ်ၵႂႃႇလီလီၵူၺ်းၵဝ်ႇ၊ ဢၼ်ပဵၼ်ၵူၼ်းလူင်ၶဝ်ၼၼ်ႉယဝ်ႉ လိူဝ်ၸႂ်ၼႃႇ လၢတ်ႈယဝ်ႉၵေႃႈလူမ်းၵဝ်ၼႆႉပေႃးၽိုၼ်ႉလူင်မႃးၵမ်းလဵဝ်ယဝ်ႉမေႃႉ”
ဝၼ်းၸိုၼ်ႈတႄႉ ထွမ်ႇၶဝ်ဢုပ်ႇၵၼ်ၵႂႃႇၵူၺ်းယဝ်ႉ။ မိူဝ်ႈၽႅတ်ႈၵႂႃႇတၢင်းႁိူၼ်းလုင်းသုၼၼ်ႉၵေႃႈ ၶဝ်ၸင်ႇဝၢႆႇတူၺ်းၵႂႃႇႁိူၼ်းလင်ၼၼ်ႉသေ “ႁိူၼ်းလင်ၼႆႉၵေႃႈ ၺႃးၶၢၼ်းၶဝ်ႈဢိူဝ်ႈ မၼ်းၵေႃႈဢမ်ႇမီးႁင်ႁေမဵဝ်းလႄႈ လႆႈၵႂႃႇယွၼ်းႁႂ်ႈယွၼ်ႇပၼ်တီႈတပ်ႉၶဝ်ဝႃႇ ၶဝ်ၵေႃႈဢမ်ႇလူတ်းပၼ်ႁေဢမ်ႇၵႃး ႁမ်ႉပၢႆမႃးဢဝ်ၵႂၢႆးမၼ်းၵႂႃႇၼၼ်ႉၼႃႇ လီဢီးလူမၼ်းၼႃႇၼၢင်းဝႃႈ”
“လိူဝ်သေၼၼ်ႉ မေးမၼ်းၵေႃႈမႃးလူႉပႅတ်ႈထႅင်ႈႁေဢိူဝ်ႈ ၸွင်ႇမၼ်းဢမ်ႇၵၢမ်ႇႁၢႆႉၼႃႇႁိုဝ်လႃႇၼၢင်းဝႃႈ”
“မၢင်မဵဝ်းဢၼ်ၸွႆႈၵၼ်လႆႈၵေႃႈၸွႆႈၵႂႃႇယူႇ ၵူၺ်းၵႃႈ ႁဝ်းၵေႃႈသမ်ႉၵိၼ်းၸႂ်ၵၼ်ယူႇႁင်းၽႂ်ႁင်းယဝ်ႈၼၢင်းႁူႉ”
ဝၼ်းၸိုၼ်ႈၼၼ်ႉၵေႃႈ မိူဝ်းယွၼ်းႁဵတ်းၶႅၵ်ႇၵူၼ်းၼႂ်းဝၢၼ်ႈၼၼ်ႉၵႂႃႇ ယူႇယဝ်ႉ။
မိူဝ်ႈယၢမ်းၵၢင်ၶမ်ႈလပ်းသိင်ႇၸွမ်ႉႁွမ်ႉၼၼ်ႉ မၼ်းၵေႃႈလႆႈပုတ်ႈသိူဝ်ႈၶူဝ်း သုပ်းၶူဝ်းလမ်သေ ဢႅဝ်ႇလႄႇလဵပ်ႈမႃးတၢင်းႁိူၼ်း လုင်းသုၼၼ်ႉလႄႈ လႆႈႁၼ်လုင်းသုၽႅၼ်ၸိူၵ်ႈဝႆႉသေ မၼ်းၸင်ႇဢဝ်မိတ်ႈၽၢႆၽၢႆ ဢၼ်ၼဵပ်းသႂ်ႇတီႈဢႅဝ်မၼ်းတႃႇသေႇၼၼ်ႉ ပိုဝ်ႈၽၢတ်ႈသႂ်ႇၸိူၵ်ႈ ၶၢတ်ႇလုတ်ႈတူၵ်းၵႂႃႇ လူင်းသုသမ်ႉပေႃးၼွၼ်းၵွင်ယူႇတီႈပိုၼ်ႉၼၼ်ႉယဝ်ႉ။
ယၢမ်းၵၢင်ၼႂ်ၸဝ်ႉ ဝၼ်းၸိုၼ်ႈႁဵတ်းဝႃႈ တေသိုပ်ႇဢွၵ်ႇၶၢဝ်းတၢင်းထႅင်ႈၼႆသေ လႆႈသူင်ႇသင်ႇမႄႈပႃႈၼႃႉဢႃၶဝ်ယဝ်ႉ ၽၢတ်ႇယၢၼ်ဢွၵ်ႇဝၢၼ်ႈၼၼ်ႉၵႂႃႇယူႇ။ မိူဝ်ႈႁူႉဝႃႈဝၼ်းၸိုၼ်ႈတေဢွၵ်ႇၶၢဝ်းတၢင်းၼႆၵေႃႈ မႄႈၸဝ်ႈႁိူၼ်းၶဝ် ၼႅတ်ႈႁေႃႇၶဝ်ႈၸွၵ်းၽၵ်းပၼ်သေဢမ်ႇၵႃး ႁိူၼ်းႁွင်ႇႁိူၼ်းၸၢၼ်းၵေႃႈ ဢဝ်တၢင်းၵိၼ်တၢင်းယႅမ်ႉမႃးတွၼ်ႈပၼ်ယူႇယဝ်ႉ၊ ဝၼ်းၸိုၼ်ႈၵေႃႈ ႁူႉယူႇဝႃႈ ၶဝ်ၵေႃႈဢမ်ႇလႆႈမီးသင်တေႉတေႉ ၵူၺ်းၵႃႈ ဢၼ်မီးလူၼ်ႉလိူဝ်သေၶူဝ်းၶွင်ၼၼ်ႉတႄႉ ပဵၼ်ၼမ်ႉၸႂ်ၽိူၵ်ႇၸိုၼ်ႈၶၢဝ်သႂ်ၶဝ်ၼၼ်ႉယဝ်ႉ။ ဝၼ်းၸိုၼ်ႈၵေႃႈ ၸင်ႇလႆႈလၢတ်ႈၸူးၶဝ်ၵႂႃႇ
“ယိၼ်းၸူမ်းယဝ်ႉၶႃႈ ဢၼ်မႄႈပႃႈႁဝ်းၶဝ်လႆႈတွၼ်ႈပၼ်ၶူဝ်းၶွင်တင်းၼမ် ၶႃႈတေယယွၼ်းႁပ်ႉဢဝ်ဝႆႉၼမ်ႉၸႂ်ၵူၺ်းယဝ်ႉၶႃႈၼႃႈ ဢၼ်ပၼ်တီႈယူႇတီႈသဝ်းၼႆႉၵူၺ်းၵေႃႈ ပဵၼ်ဢၼ်မီးၵေးၸူးယႂ်ႇၼမ်ၼိူဝ်ၶႃႈႁဝ်းတေႉတေႉ ႁႃတီႈဝႃႈဢမ်ႇမီးယဝ်ႉၶႃႈဢေႃႈ”
“ဢဝ်ၵႂႃႇဢိတ်ႉၼိုင်ႈလႄႈ ပေႃးတွင်ႉမႆႈၶႆႈၵိၼ်ၸွမ်းတၢင်းတေႁဵတ်းႁိုဝ်လႃႇၼၢင်းဝႃႈ”
ဝၼ်းၸိုၼ်ႈၵေႃႈ ၼင်ႇႁိုဝ်ၵေႃႉတွၼ်ႈတေၵတ်းယဵၼ်ၸႂ်ၼၼ်ႉ ၸင်ႇယိပ်းဢဝ်ၶဝ်ႈႁေႃႇၽၵ်းၸွၵ်း ဢဝ်မႄႈၸဝ်ႈႁိူၼ်း တင်ႈၸႂ်ႁတ်းပၼ်ၼၼ်ႉသေ “ၼမ်ႉၸႂ်ဢၼ်မႄႈပႃႈႁဝ်းၶဝ်မီးတေႃႇၶႃႈၼၼ်ႉ ၶႃႈတေဢမ်ႇမီးဝၼ်းလိုမ်းလႆႈၶႃႈၼႃ လုမ်းလႃးတူၺ်းထိုင်ပၢႆးယူႇလီၵၼ်ၶႃႈၼႃႈ” ဝၼ်းၸိုၼ်ႈၵေႃႈ လႆႈၽၢတ်ႇယၢၼ်ဢွၵ်ႇၵႂႃႇၼႂ်းဝၢၼ်ႈၼၼ်ႉသေ သိုပ်ႇမုင်ႈၼႃႈၵႂႃႇတၢင်း တပ်ႉပၢင်သဝ်းၶဝ်ၼၼ်ႉယဝ်ႉ။
မၼ်းၵေႃႈပႆလူင်ၶိုၼ်ႈၵႂႃႇလွႆးလွႆး ဢမ်ႇႁိုင်ၵေႃႈ ႁွတ်ႈၵႂႃႇထိုင်တီႈပွမ်ႈယၢမ်းၶဝ်ၼၼ်ႉယဝ်ႉ ၸင်ႇမီးၵူၼ်းပႂ်ႉယၢမ်းၼၼ်ႉ ဢွၵ်ႇပွမ်ႈသေမႃးထၢမ်ဝၼ်းၸိုၼ်ႈ “မႃးႁႃၽႂ်!”
“ၸဝ်ႈသိုၵ်း လွၼ်ႉၶိူဝ်းၶႃႈဢေႃႈ”
“ပဵၼ်ၵူၼ်းတၢင်းလႂ် ပဵၼ်သင်လႄႈဢမ်ႇယၢမ်ႈႁၼ်”
မိူဝ်ႈဝႃးဝၼ်းၸိုၼ်ႈသႂ်ႇၶူဝ်းသိုၵ်းလႄႈ မိူဝ်ႈၼႆႉသမ်ႉသႂ်ႇၶူဝ်းၵူၼ်းမိူင်းဝႆႉ ပေႃးဢမ်ႇတွင်းတူၺ်း မၼ်းၵေႃႈသမ်ႉဢမ်ႇတွင်းၼႃႈၼင်ႇၵဝ်ႇ။ ဝၼ်းၸိုၼ်ႈၵေႃႈ ယၵ်ႉတူၺ်းၵႂႃႇတီႈ ၵူၼ်းသိုၵ်းၵေႃႉၼၼ်ႉ ဢၼ်ႁၢမ်ႉၶႆႈဢႃႇယုတၢၼ်ႇၵၼ်ဝႆႉလႄႈ ၼုင်ႈသႂ်ႇၶူဝ်းသိုၵ်းတဵမ်ၸုမ်ႇ သီသိူဝ်ႈၶူဝ်းတႄႉသမ်ႉပေႃးၵဝ်ႇသဝ်ႈၵႂႃႇမူတ်းယဝ်ႉ၊ မၢၵ်ႇႁူဝ်ၵေႃႈၶွၼ်ႇဢွၵ်ႉတွၵ်ႉ ဢမ်ႇပေႃးၵႆႉလွႆးလႄႈ သမ်ႉၵႆႉတိုဝ်းၼၼၼ်ႉႁိုဝ်ဢမ်ႇၸၢင်ႈဝႃႈ ၵူၺ်းၵႃႈ သွၵ်းတိၼ်ၶဵဝ်ၼၼ်ႉတႄႉ ပဵၼ်သွၵ်းတိၼ်ၶွၼ်ႇ ၶၢတ်ႇပုတ်းၶၢတ်ႇပၢတ်း ယွၵ်းယွၵ်းယွႆယွႆလူင်ၵႂႃႇမူတ်းယဝ်ႉ။ ယၢမ်းၼၼ်ႉ ၸင်ႇသမ်ႉမီး ၽူႈမီးၸၼ်ႉၼႂ်းတပ်ႉၵေႃႉၼိုင်ႈ ႁိုတ်းႁၢတ်းသႂ်ႇၵူၼ်းသိုၵ်းၵေႃႉၼၼ်ႉ
“ဢၢႆႈ!! ၼၼ်ႉပဵၼ်လုၵ်ႈယိင်း ၸဝ်ႈသိုၵ်းဢိူဝ်ႈၼၼ်ႉ ပိုတ်ႇပၼ်လႄႈ”
ၵူၼ်းၵေႃႉၼၼ်ႉၵေႃႈ ၼႅတ်ႈၵူမ်ႈၵူမ်ႈၵွမ်းၵွမ်း သၼ်ႇသၼ်ႇသၢႆသၢႆပိုတ်ႇၽုၺ်ႇၽၵ်းတူၵႂႃႇယူႇ။ ဝၼ်းၸိုၼ်ႈၵေႃႈ ယင်းဢမ်ႇပႆႇၶဝ်ႈၵႂႃႇၼႂ်းတပ်ႉၵမ်းလဵဝ် ယၵ်ႉတူၺ်းၵူၼ်းသိုၵ်းၵေႃႉၼၼ်ႉသေ
“ႁဝ်းပွင်ႇၸႂ်ယူႇၶႃႈ ဝႃႈမၼ်းပဵၼ်ပုၼ်ႈၽွၼ်းဢၼ်သူတေလႆႈႁဵတ်း”
ၸွမ်းၼင်ႇၶေႃႈသင်ႇမီးမႃး ႁႂ်ႈၵႄႈၶႆလွင်ႈၸဝ်ႈပၢင်ႇ ၵဵပ်းၶဝ်ႈၵူၼ်းမိူင်းႁႅင်းၼႃႇၼၼ်ႉ ၸဝ်ႈလွၼ်ႉၶိူဝ်းၵေႃႈလႆႈ သိုပ်ႇသင်ႇႁႂ်ႈၸဝ်ႈပၢင်ႇ လူတ်းယွမ်းၵဵပ်းၶဝ်ႈတီႈၵူၼ်းမိူင်းႁႂ်ႈဢေႇလူင်းၼႆယူႇ။ မိူၼ်ဝႃႈ ၸဝ်ႈပၢင်ႇၵေႃႈ ဢမ်ႇပေႃးႁၢၼ်ႉၸႂ်ၵႃႈႁိုဝ် ၵူၺ်းၵႃႈ ဢမ်ႇလိူဝ်လႆႈၶေႃႈၸိသင်ႇလႄႈ ၵႃႈလႆႈႁဵတ်းၸွမ်းယဝ်ႉ၊ ၶဝ်ႈၼႂ်းယေးမီးၵႃႈႁိုဝ်လႄႈ ဢဝ်ၶဝ်ႈၵႃႈႁိုဝ်ဢွၵ်ႇၵႃႈႁိုဝ်ၼၼ်ႉ တေလႆႈလၢႆးငၢၼ်းပၼ်တီႈ ၸဝ်ႈလွၼ်ႉၶိူဝ်းတင်းမူတ်း။ လႆႈဝႃႈ လွင်ႈတူင်ႉၼိုင်ၸဝ်ႈပၢင်ႇၼၼ်ႉ တေလႆႈယူႇတႂ်ႈၵုမ်းၵမ် ၸဝ်ႈလွၼ်ႉၶိူဝ်းတင်းမူတ်းၼႆၼၼ်ႉယဝ်ႉ။
…………
“ၸိူင်ႉၼင်ႇဢၼ်ပိူၼ်ႈဝႃႈ ၵူၼ်းလူင်ၵိၼ်ၵျေႃႇတပေးၵိၼ်ၼေႃႇဢၼ်ဝႃႈ ပဵၼ်ၸိူင်ႉၼႆယူဝ်ႉၼႆႉမႃႈ”
“ႁိူၺ်ႉ! ပေႃးႁဵတ်းသိုၵ်းတႆးၺႃးၵူၼ်းၸိူင်ႉၸဝ်ႈပၢင်ႇၼႆႉတႄႉ ၵဝ်ၶၢမ်ႇပၢႆႈဢဝ်ယဝ်ႉၵဝ်”
“မႃးၺႃးၸဝ်ႈပၢင်ႇၼႆႉ လွင်ႈၸဵပ်းၸႂ်သိုၵ်းမၢၼ်ႈၵဝ်ပေႃးႁၢႆလူင်ၵႂႃႇမူတ်းယဝ်ႉမေႃႉ သမ်ႉမႃးၸင်းၸဝ်ႈပၢင်ႇယဝ်ႉဢိူဝ်ႈၼႆႉၵဝ်”
“မၼ်းတၢႆၵေႃႈတႃႉလီၼင်ႇၵဝ်ႇဢိူဝ်ႈၼေႃႈ”
ၶိင်းပီးသိုပ်ႇၽိုၼ်ႉၸေႈၵႂႃႇထႅင်ႈသေသိုပ်ႇလူၵႂႃႇယူႇ။
တႃႇတွင်း။ ။ ၸိူင်းႁူဝ်ၼႆႉ ပိူင်ပဵၼ်ငဝ်းလၢႆး ဝူၼ်ႉသၢင်ႈမႃးဢဝ်ၵူၺ်း ဢမ်ႇၸႂ်ႈလွင်ႈတေႉ။
တွၼ်ႈႁႃႈသုတ်းၵႂႃႇယဝ်ႉ သိုပ်ႇလူထႅင်ႈတွၼ်ႈႁူၵ်းၶႃႈ။
