တွၼ်ႈသီႇ
ၼပ်ႉထွႆလင်ၵႂႃႇထႅင်ႈ 2 ပီႊ ၼႂ်းပီႊ 2018
ၵူၼ်းသိုၵ်းပိုင်ႈဢိင်ၵူၼ်းမိူင်း ၵူၼ်းမိူင်းၵေႃႈၸႂ်ယႂ်ႇၵူၼ်းသိုၵ်း ၵူၼ်းသိုၵ်းၵႂႃႇတီႈလႂ် ၵူၼ်းမိူင်းတီႈၼၼ်ႈၵေႃႈ ႁူမ်ၸူမ်းႁပ်ႉတွၼ်ႈယူႇယဝ်ႉ။ ၵူၺ်းၵႃႈ ၵူၼ်းၵမ်ႈၽွင်ႈၵေႃႈ မိူဝ်ႈပိူၼ်ႈႁပ်ႉတွၼ်ႈလီ ယိုင်ႈပိူၼ်ႈဢွၼ်ႈၼွမ်းၸူး ယိုင်ႈဝႆႉတူဝ်ပဵၼ်ယႂ်ႇ လႄႈထၢင်ႇယႂ်ႇတူဝ်မႃး၊ ယိုင်ႈပိူၼ်ႈဢူၼ်ႈဢွၼ်ႇ ယိုင်ႈႁတ်းၶဵင်ႈၶဵင်ၸူး ဢမ်ႇဝႆႉၼႃႈၽႂ်။
ၽွင်းဢၼ်ၸဝ်ႈပၢင်ႇလႆႈၶၢႆႉၼႃႈတီႈ ၶဝ်ႈမႃးတူင်ႉၼိုင်ယူႇတီႈ ဝၢၼ်ႈဢွၼ်ႇဝၢၼ်ႈၼိုင်ႈၼၼ်ႉ မီးၵူၼ်းတင်းၼမ် ဢွၼ်ႁူမ်ၸူမ်းႁပ်ႉတွၼ်ႈလီတေႃႇမၼ်းၼႃႇ ဢမ်ႇဝႃႈလူဝ်ႇသင်ၶႂ်ႈလႆႈသင်ၼႆၵေႃႈ ႁႃပၼ်မူတ်းမူတ်း၊ ၵူၺ်းၵႃႈ မိူဝ်ႈပိူၼ်ႈယိုၼ်ႈပၼ်တႃႇသေႇၼၼ်ႉ ယဵၼ်းပဵၼ်လွင်ႈဢၼ်ပိူၼ်ႈလူဝ်ႇလႆႈႁဵတ်းပၼ်ၵႂႃႇ ယူႇယဝ်ႉ။ ယူႇႁိုင်ထိုင်မိူဝ်ႈ ၵူၼ်းမိူင်းၶဝ် ဢမ်ႇလႆႈမႃးယိုၼ်ႈပၼ်ယဝ်ႉၼၼ်ႉ မၼ်းၵေႃႈ လႆႈသင်ႇႁႂ်ႈလုၵ်ႈၼွင်ႉမၼ်း လူင်းပိုၼ်ႉတီႈၵႂႃႇ ၵဵပ်းၶဝ်ႈ ၼိုင်ႈႁိူၼ်းလႂ် ၼိုင်ႈထူင်ၼိုင်ႈထူင် ဢမ်ႇဝူၼ်ႉၵူၼ်းၽၢၼ်ၵူၼ်းမီးသင် တဵၵ်းၶၢၼ်းဢဝ်၊ ပေႃးဢမ်ႇမီးၶဝ်ႈသၢၼ်ၵေႃႈတေလႆႈပၼ်ၶဝ်ႈပိူၵ်ႇ ပေႃးဢမ်ႇပၼ်ၶဝ်ႈလႆႈၵေႃႈ တေလႆႈပၼ်ငိုၼ်းၼႆယူႇ။ လိူဝ်သေၵဵပ်းၶဝ်ႈယဝ်ႉ ၵဵပ်းၶွၼ်ႇၼႆၵေႃႈ သမ်ႉၵႆႉၵဵပ်းပူၼ်ႉလိူဝ် ဢၼ်ပိူၼ်ႈသၢင်ႉလူင်းမႃးဝႆႉၼၼ်ႉ တႃႇသေႇယဝ်ႉ။
ၵူၼ်းမိူင်းၶဝ်ၵေႃႈ ဢမ်ႇၸၢင်ႈႁဵတ်းႁိုဝ် မိူဝ်ႈပဵၼ်ၶႃႈတွင်ႉသိုၵ်းသေယဝ်ႉၼၼ်ႉ ၵႃႈလႆႈသႂ်ႇပၼ်ယူႇမႅၵ်းမႅၵ်း၊ ဢမ်ႇမီးၵေႃႈၵႃႈလႆႈႁႃမႃးသႂ်ႇပၼ်ယဝ်ႉ ဢၼ်ႁဵတ်းယူႇတၢင်းပီႊတၢင်းပီႊ ပေႃးဢမ်ႇလႆႈလိုဝ်ႈၼၼ်ႉၵေႃႈ ၵုမ်ႇပၼ်သိုၵ်းႁေ တႃႇၵိၼ်ၵူၺ်း ပေႃးဢမ်ႇၶႂ်ႈပေႃးယဝ်ႉၼႃႇ။
မီးယူႇပွၵ်ႈၼိုင်ႈ လုင်းသု ဢၼ်ဢမ်ႇမီးၶဝ်ႈတႃႇသႂ်ႇသေဢမ်ႇၵႃး ငိုၼ်းတႃႇသိုဝ်ႉသႂ်ႇႁိုဝ် တႃႇၵႂႃႇႁႃၵူႈပိူၼ်ႈသႂ်ႇၵူၺ်းၵေႃႈ ဢမ်ႇမီးၽႂ်ပၼ်မၼ်းၵူႈယဝ်ႉလႄႈ တေႃႈၼင်ႇၶဝ်ႈတႃႇၵိၼ်ၵူၺ်း မၼ်းယင်းဢမ်ႇမီးလူးၵွၼ်ႇ၊ တီႈၼႂ်းၼႃႈႁိူၼ်းဢွၼ်ႇမၼ်းၼၼ်ႉၵေႃႈ သမ်ႉမီးမၼ်းၵူၺ်း ဢၼ်ႁဵတ်းၵၢၼ်လႆႈ မေးမၼ်းၼၼ်ႉၵေႃႈ ဢမ်ႇၸၢင်ႈၵႂႃႇတၢင်းလႂ်လႆႈလႄႈ သမ်ႉဢမ်ႇယူႇလီထႅင်ႈႁေၼၼ်ႉယဝ်ႉ။ ၵူႈပွၵ်ႈပွၵ်ႈ မၼ်းၵေႃႈ ၶၢႆၶဝ်ႈၶဵဝ်သေႁႃမႃးသႂ်ႇယူႇ မိူဝ်ႈၶၢဝ်းယၢမ်းႁိုင်မႃး ပီႊမၼ်းၼမ်မႃး ၶဝ်ႈၶဵဝ်မၼ်းၵူၺ်း ယင်းတႅၼ်းဢမ်ႇပေႉလႆႈယဝ်ႉလႄႈ တေၵႂႃႇႁႃၵူႈပိူၼ်ႈၵေႃႈ သမ်ႉပေႃးၶႂ်ႈဢၢၼ်းၼႃႇပိူၼ်ႈယဝ်ႉ မၼ်းၸင်ႇလႆႈ ၶဝ်ႈၵႂႃႇယွၼ်းထူပ်း ၸဝ်ႈပၢင်ႇသေ ယွၼ်းတၢင်းၸွႆႈထႅမ် ႁႂ်ႈလႆႈလူတ်းယွၼ်ႇပၼ်ၼႃႈႁိူၼ်းမၼ်းဢိတ်ႉၼိုင်ႈ ၼႆယူႇ။
ၵူၺ်းၵႃႈ ဢၼ်မၼ်းလႆႈႁပ်ႉ ၶေႃႈတွပ်ႇၼၼ်ႉတႄႉၵေႃႈဝႃႈ “တိၼ်မိုဝ်းမီးၸေႉယူႇလူး ဢမ်ႇႁဵတ်းၵၢၼ်လႆႈၼႆၵေႃႈဢမ်ႇၸႂ်ႈ ပေႃးၶႂ်ႈလူတ်းယွၼ်ႇပၼ်ၵေႃႈ လူဝ်ႇလႆႈပဵၼ်တုၵ်ႉၶိတ်ႉတၵူၺ်းဢိူဝ်ႈ”
လုင်းသုၼၼ်ႉၵေႃႈ ၼင်ႈၶုပ်ႉၶဝ်ႇႁိမ်းတိၼ်ၸဝ်ႈပၢင်ႇၼၼ်ႉသေ “ၶႃႈဝႆႈၵေႃႈလီယဝ်ႉ ၸွႆႈထႅမ်ၶႃႈဢိတ်ႉၼိုင်ႈ မေးၶႃႈၵေႃႈဢမ်ႇယူႇလီႁႅင်းၼႃႇ ၶႃႈၵေႃႈထဝ်ႈယဝ်ႉ ႁိူၼ်းႁဝ်းၵေႃႈ သမ်ႉမီးႁႃးၽူဝ်မေးၵူၺ်း ဢမ်ႇၸၢင်ႈႁဵတ်းႁိုဝ်တေႉဢေႃႈ”
“ဝူၼ်ႉဝႃႈလၢတ်ႈမွၵ်ႈၼႆႉ တေပွႆႇပၼ်လႆႈၼႆၵႃႈ ဢမ်ႇမီးဝၼ်း!!”
ဢဝ်တိၼ်မၼ်းပိတ်ႉထၢၵ်ႇသႂ်ႇလိၼ်ႉတွင်ႉ လုင်းသုၼၼ်ႉ သမ်ႉပေႃးၼွၼ်းၶူတ်းလူင်ၵႂႃႇယူႇ”
“ႁၢင်ႈတီႈႁိူၼ်းမႂ်းၼၼ်ႉ မီးၵႂၢႆးႁေဢမ်ႇႁိုဝ်လႃႇ ဢဝ်ၵႂၢႆးမႂ်းမႃးလႄႈ”
လုင်းသုၼႅတ်ႈလုၵ်ႉၶိုၼ်ႈမႃးၼင်ႈသေ “ၶႃႈဢမ်ႇၸၢင်ႈထႆၼႃးႁေယဝ်ႉၶႃႈဢေႃႈ”
“ၽႂ်တေႁဵတ်းႁိုဝ်ႁူႉမႂ်းလႃႇ မႂ်းဢမ်ႇမႃးသႂ်ႇၶဝ်ႈႁဝ်းလႆႈၵေႃႈ ဢဝ်ၵႂၢႆးမႂ်းမႃးပၼ်ၼၼ်ႉၼႃႇဢေႉ ၵဝ်တေလူတ်းယွၼ်ႇပၼ်မႂ်းၵႂႃႈ မွၵ်ႈႁေၼိုင်ႈပီၼႆႉ ပေႃးမႂ်းဢမ်ႇၶႂ်ႈဢဝ်ၵႂၢႆးမႂ်းမႃးၵေႃႈဢဝ်ၶဝ်ႈမႂ်းမႃးၼၼ်ႉၼႃႇ”
လုင်းသုၼၼ်ႉၵေႃႈ သမ်ႉပေႃးဢမ်ႇၸၢင်ႈတၵ်းသဵင်လႆႈယဝ်ႉလႄႈ ၼင်ႈၵူမ်ႈသေၼိမ်ယဵၼ်လူင်ၵႂႃႇႁဵတ်းၼၼ်ၵူၺ်း။
“ပေႃးမိူဝ်ႈၽုၵ်ႈ ၵဝ်တေႁႂ်ႈလုၵ်ႈဢွၼ်ႇၶဝ်..မိူဝ်းဢဝ်ၵႂႃႈ မႂ်းတေပၼ်ၶဝ်ႈႁႃႉပၼ်ၵႂၢႆး ယူႇတီႈမႂ်းၵူၺ်း”
လုင်းသုၼၼ်ႉတႄႉ ယႃႇဝႃႈပိူၼ်ႈတေယွမ်းပၼ် ယိုင်ႈၶႅၼ်းၼႃႇမႃးလိူဝ်ၵဝ်ႇၵူၺ်းလူးၵွၼ်ႇ၊ ၵမ်ႈၽွင်ႈ ဢၼ်လႆႈႁၼ်ပၼ်ႁႃလုင်းသုၼႆႉၵေႃႈ ႁၼ်ၸႂ်ယူႇသေတႃႉ ၽႂ်ၵေႃႈႁမ်ႉၵိၼ်းၸႂ်ယူႇႁင်းၽႂ်ႁင်းမၼ်းလႄႈ ၶႂ်ႈၸွႆႈယူႇၵေႃႈ ဢမ်ႇၸၢင်ႈႁဵတ်းႁိုဝ်ယဝ်ႉ။
ယၢမ်းၵၢင်ၼႂ် ၵူၼ်းသိုၵ်းၼုမ်ႇ သွင်ၵေႃႉ လႆႈမႃးႁွတ်ႈထိုင် ႁိူၼ်းလုင်းသူႉသေ
“လုင်း! ၸဝ်ႈႁဝ်း ႁႂ်ႈမႃးဢဝ်ၵႂၢႆးလုင်းႁဝ်းဝႃႇ”
“ၸၢႆးဢိူၺ်ႉ! ဢီးလူလုင်းဢိတ်ႉၼိုင်ႈလူး လုင်းမီးၵႂၢႆးတူဝ်လဵဝ်ၵူၺ်းယဝ်ႉဢိူဝ်ႈမိူဝ်ႈလဵဝ်”
ၵူၼ်းသိုၵ်းဢွၼ်ႇသွင်ၵေႃႉၼၼ်ႉၵေႃႈ သမ်ႉဝႃႈႁၼ်ၸႂ်လုင်းသုယူႇသေတႃႉ ပဵၼ်သိုၵ်းၼႆၼၼ်ႉ ဢမ်ႇလိူဝ်လႆႈၶေႃႈၸိသင်ႇလႄႈ ၵႃႈလႆႈ မႃးပူတ်းဢဝ်ၸိူၵ်ႈၵႂၢႆးလုင်းသုၼၼ်ႉသေ
“ႁဝ်းၵေႃႈပဵၼ်လုၵ်ႈၼွင်ႉပိူၼ်ႈၵူၺ်း ဢမ်ႇၸၢင်ႈႁဵတ်းႁိုဝ်ၶႃႈလုင်း”
လုင်းသုၼၼ်ႉၵေႃႈ ယၵ်ႉတူၺ်းၵႂၢႆးထိုၵ်းလူင်မၼ်း ဢၼ်လႆႈၸႂ်ႉၵိၼ်ႁႅင်းမႃး ပၢၼ်သိုပ်ႇပၢၼ်ၼၼ်ႉသေ ဢဝ်ၼမ်ႉတႃ ၸိုမ်ႉယမ်းယူႇတီႈႁူၺ်ႇတႃၼၼ်ႉမႃးယဝ်ႉ။
“ဢၢႆႈဢိူၺ်! ၵဝ်ၵေႃႈၶႂ်ႈဢဝ်မႂ်းဝႆႉယူႇ ဢမ်ႇၸၢင်ႈႁဵတ်းႁိုဝ်ယဝ်ႉမႂ်း”
ၵႂၢႆးၼၼ်ႉၵေႃႈ မိူၼ်တေႁူႉၵႂၢမ်းမိူၼ်ၵၼ်လႄႈ မိူဝ်ႈတေလႆႈၽၢတ်ႇယၢၼ်ၸဝ်ႈမၼ်းၵႂႃႇၼၼ်ႉ ႁူၺ်ႇတႃဢွၼ်ႇမၼ်းၼၼ်ႉၵေႃႈ ၸိုမ်ႉယမ်းမႃးမိူၼ်ၵၼ်ယဝ်ႉ။ တင်းၵႂႃႇတင်းဝၢႆႇတူၺ်းၸဝ်ႈမၼ်း ဢၼ်ၽၢႆမိုဝ်းၼႄႁႂ်ႈမၼ်းၵႂႃႇတၢင်းၼႃႈလႄႈၼႆၼၼ်ႉယူႇ။ လုင်းသုၼၼ်ႉၵေႃႈ သမ်ႉဝႃႈသေလၢႆယူႇသေတႃႉ ဢမ်ႇၸၢင်ႈႁဵတ်းႁိုဝ်သေဢိတ်းယဝ်ႉလႄႈ ၵႃႈလႆႈလၵ်ႉၼင်ႈဢိုတ်ႇႁႆႈယူႇတႂ်ႈႁိူၼ်း ဢၼ်ၼႂ်းဢူၵ်းၼႂ်းၸႂ် ၵပ်ႉၵိၼ်းၼႃႇၼၼ်ႉႁင်းၵူၺ်းယူႇယဝ်ႉ။
ဝၢႆးသေၵႂၢႆးၵႂႃႇပႅတ်ႈမၼ်းသၢမ်ဝၼ်းၵူၺ်း မေးမၼ်းၼၼ်ႉၵေႃႈ လႆႈတၢႆၽၢတ်ႇၵႂႃႇပႅတ်ႈမၼ်း ယူႇယဝ်ႉ။ မိူင်းၵူၼ်းလူင်ၼႆႉ မၼ်းပေႉမႃးၸႂ်ႁၢႆႉတေႃႇလုင်းသုၼႃႇဢမ်ႇႁူႉယဝ်ႉ တွၼ်ႈတႃႇမၼ်း တေသိုပ်ႇယူႇၵႂႃႇထႅင်ႈၵေႃႈ ဢမ်ႇမီးတီႈပွင်ႇသင်ယဝ်ႉလႄႈ မီးလွင်ႈတၢႆၵူၺ်း ဢၼ်တေပူၼ်ႉလွတ်ႈလႆႈၼႆသေ၊ ယၢမ်းႁူဝ်ၶမ်ႈလပ်းသိင်ႇၸွမ်ႉႁွမ်ႉၼၼ်ႉ မၼ်းၸင်ႇလႆႈတႅပ်းတတ်း ပူတ်းၸႂ်မၼ်းၵႂႃႇ တီႈတႂ်ႈလၢင်ႈႁိူၼ်းၶဝ်ၼႆယူႇ ၶွတ်ႇၸိူၵ်ႈႁၢင်ႈႁႅၼ်းတေၽႅၼ်ၶေႃးၵႂႃႇယဝ်ႉ။
ၽွင်းၼၼ်ႉ ၸင်ႇသမ်ႉမီးၵူၼ်းၵေႃႉၼိုင်ႈ ၼုင်ႈတင်းသိူဝ်ႈၶူဝ်းလမ်ၽိုတ်းၽိုတ်းသေ ပေႃႇႁွတ်ႈမႃးထိုင်လႄႈ မႃးတႅပ်းၶၢတ်ႇပႅတ်ႈၸိူၵ်ႈဢၼ်လုင်းသု ဢၢင်ႈတေဢဝ်ၶေႃးမၼ်းၵွင်ႉသႂ်ႇယဝ်ႉၼၼ်ႉ လၢတ်ႈၸူး
“လုင်းႁဝ်းမီးသၢႆၸႂ်ၵႂႃႇလႆႈပွၵ်ႈလဵဝ်ၵူၺ်း ပဵၼ်သင်လႄႈတေၶႂ်ႈတၢႆပႅတ်ႈလႃႇ”
“ၵဝ်ဢမ်ႇမီးလွင်ႈတၢင်းသင်တႃႇတေသိုပ်ႇယူႇယဝ်ႉ”
“မီးဢေႃႈ!! ဢၼ်ႁဝ်းမီးသၢႆၸႂ်ယူႇ ဢမ်ႇပႆႇတၢႆၼႆႉ ယွၼ်ႉႁဝ်းမီးလွင်ႈတၢင်း ဢၼ်တေလႆႈသိုပ်ႇယူႇၵႂႃႇၼၼ်ႉၶႃႈၼႃႇ”
“တေဢဝ်သင်မႃးမီးလႆႈ တေႃႈၼင်ႇတႃႇမီးသၢႆၸႂ်ယူႇၵူၺ်း ယင်းၵိၼ်းၸႂ်ယူႇ တၢႆၵႂႃႇၵေႃႈၸဵဝ်းပူၼ်ႉၼၼ်ႉၼႃႇ”
ၵူၼ်းၵေႃႉၼၼ်ႉၵေႃႈ ထူၵ်းၵွင်ႈပွတ်းမၼ်းဢွၵ်ႇမႃးငႃသႂ်ႇသိုဝ်ႈၼႃႈလုင်းသုၼၼ်ႉၵႂႃႇ ဢဝ်လုင်းသုသမ်ႉပေႃးတူၵ်းၸႂ် ၶုၼ်ႇသုတ်ႉႁူၼ်ၵႂႃႇတၢင်းလင်ၶိုၼ်းယူႇ။
“တီႈတေႉမၼ်းၵေႃႈ ၵူဝ်တၢႆယူႇၵူၺ်းလူး” ဢဝ်လုင်းသုၼၼ်ႉၼင်ႈၼိမ်ယဵၼ်လူင်ၵႂႃႇ မိူဝ်ႈႁၼ်ၵွင်ႈၸိူင်ႉၼၼ် ႁဵတ်းႁႂ်ႈမၼ်းၶုၵ်းၶူၼ်ႉထိုင်ၶိုၼ်း ၸဝ်ႈပၢင်ႇဢၼ်ပိတ်ႉထိပ်ႇမၼ်း ၼႂ်းဝၼ်းၼၼ်ႉမႃးၶိုၼ်းယဝ်ႉ။
“မီးသၢႆၸႂ်ယူႇၼႆႉ မၼ်းၵၢမ်ႇလီမွၵ်ႈၵႃႈႁိုဝ်၊ မိူဝ်ႈတၢႆၵႂႃႇယဝ်ႉ ဢမ်ႇၸၢင်ႈလုၵ်ႉၶိုၼ်ႈမႃးလႆႈၶိုၼ်း သမ်ႉဝႃႈမီးၵူၼ်းၶႂ်ႈႁႂ်ႈလုၵ်ႉမႃးၶိုၼ်းလႄႈ ယႃႇတၢႆလႄႈၼႆၵေႃႈ ပဵၼ်လႆႈတၢင်းမုင်ႈမွင်း ဢၼ်ဢမ်ႇမီးဝၼ်းပဵၼ်မႃးလႆႈၼၼ်ႉၵူၺ်း ၵွပ်ႈၼၼ် မိူဝ်ႈမီးသၢႆၸႂ်ယူႇၼၼ်ႉ ၸႂ်ႉႁႂ်ႈမၼ်းမီးၵႃႈၶၼ်ၶႃႈလႄႈ လုင်းယင်းတိုၵ်ႉမီးၵႃႈၶၼ် တႃႇတေလႆႈသိုပ်ႇယူႇထႅင်ႈယူႇ ၶၢဝ်းယၢမ်းတၢႆလုင်းပႆႇမႃးထိုင်ၼႃႈ”
ၵူၼ်းၶူဝ်းလမ်ၼၼ်ႉၵေႃႈ ဢႅၼ်ႇလႅၼ်ႈႁၢႆၵႂႃႇတႂ်ႈငဝ်းလိူၼ်လႅင်းၼၼ်ႉဝွႆးဝွႆး မိူၼ်ၼင်ႇၽီၽဵတ်ႇၼၼ်ႉယဝ်ႉ။
လွင်ႈဢၼ်ၸဝ်ႈပၢင်ႇၵဵပ်းၶဝ်ႈၵူၼ်းမိူင်းႁႅင်းၼႃႇၼႆႉ လႆႈငိၼ်းၶၢဝ်ႇမၼ်း မေႃးထိုင်ႁူၵူၼ်းလူင်ၶဝ်မႃးယဝ်ႉလႄႈ ၸဝ်ႈလွၼ်ႉၶိူဝ်းၵေႃႈ လႆႈဢွၼ်ဢဝ်တင်းလုၵ်ႈၼွင်ႉမၼ်းသၢမ်ၵေႃႉ ႁူမ်ႈပႃး ဝၼ်းၸိုၼ်ႈ ဢွၵ်ႇၶၢဝ်းတၢင်းမႃးထတ်းသၢင်တူၺ်း ဢွင်ႈတီႈၸဝ်ႈပၢင်ႇယူႇသဝ်းၼၼ်ႉ ၼႆယူႇယဝ်ႉ။
ပေႃးဝႃႈၸဝ်ႈလွၼ်ႉၶိူဝ်း ဢွၵ်ႇၶၢဝ်းတၢင်းၵႂႃႇတီႈလႂ်ၼႆတႄႉ တိုၼ်းပႃးဝၼ်းၸိုၼ်ႈတႃႇသေႇ၊ ၵမ်ႈၽွင်ႈၵေႃႈ ပေႃးထၢင်ႇဝႃႈပဵၼ်မေး ၸဝ်ႈလွၼ်ႉၶိူဝ်းယူႇ။ ဢမ်ႇဝႃႈလွင်ႈၵၢၼ်ႁိုဝ် လွင်ႈသုၼ်ႇတူဝ် မၼ်းၵေႃႈႁႂ်ႈဝၼ်းၸိုၼ်ႈၸတ်းၵၢၼ်ပၼ်ၵူႈလွင်ႈ။ လိူဝ်သေဝၼ်းၸိုၼ်ႈယဝ်ႉ ၸဝ်ႈလွၼ်ႉၶိူဝ်းၵေႃႈ ဢမ်ႇမီးလုၵ်ႈၼွင်ႉ ဢၼ်မၼ်းယုမ်ႇယမ်လႆႈလႄႈ ႁူႉလွင်ႈမၼ်းလီလိူဝ်သေဝၼ်းၸိုၼ်ႈ။ ဝၼ်းၸိုၼ်ႈၼၼ်ႉ လႆႈဝႃႈမိူၼ်ပဵၼ်ဢူၺ်းၵေႃႉမၼ်း လိူဝ်သေတေပဵၼ်လုၵ်ႈမၼ်းလူးၵွၼ်ႇ။
……………..
“ၶိင်းသၢၼ်း! ပေႃးဝၼ်းၸိုၼ်ႈပဵၼ်လုၵ်ႈဢွၼ်ႇဝၼ်းၼၼ်ႉ ၸဝ်ႈလွၼ်ႉၶိူဝ်းသမ်ႉပဵၼ်ႁူဝ်ၼႃႈၵေႃႉၼၼ်ႉဢိူဝ်ႈၼေႃႈ”
“ၵဝ်ဝႃႈတေႉၸႂ်ႈယူႇၼႃ!”
“ၶႂ်ႈဝႃႈ ၸဝ်ႈၶွင်ပပ်ႉၼႆႉၵေႃႈ ပဵၼ်ဝၼ်းၸိုၼ်ႈၼၼ်ႉဢိူဝ်ႈလေႃႇ တူၺ်းဢၼ်မၼ်းတႅမ်ႈသမ်ႉဝႃႈ ဢိမ်ႇၸၢၼ်ႈၵၢၼ်ၸိူဝ်ႉၸၢတ်ႈၽၢမ်းတႃၼႆလႃႇ လွင်ႈႁဵတ်းသၢင်ႈမၼ်းသမ်ႉ ၸွမ်းႁဵတ်းပၼ်ၵၢၼ်ၵူၼ်းၸိူဝ်းၼၼ်ႉယူႇၵဝ်ႇ”
“လူၵႂႃႇတူၺ်းထႅင်ႈလႄႈ ၵဝ်ဝႃႈ…ႁဵတ်းႁင်မၼ်းႁမ်ႉမီးၵူၼ်းၶူဝ်းလမ်ႁေလႃႇမႃႈ”
“ဢမ်ႇၸႂ်ႈဝႃႈပဵၼ်ၽဵတ်ႇႁႃႉၶိင်းဝႃႈ”
တႃႇတွင်း။ ။ၸိူင်းႁူဝ်ၼႆႉ ပိူင်ပဵၼ်ငဝ်းလၢႆး ဝူၼ်ႉသၢင်ႈမႃးဢဝ်ၵူၺ်း ဢမ်ႇၸႂ်ႈလွင်ႈတေႉ။
တွၼ်ႈသီႇသုတ်းၵႂႃႇယဝ်ႉ သိုပ်ႇလူၵႂႃႇထႅင်ႈတွၼ်ႈႁႃႈၶႃႈ။
