တွၼ်ႈသၢမ်
ဝၼ်းၸိုၼ်ႈလႆႈၶဝ်ႈမႃးၶိုၼ်းၼႂ်းႁွင်ႈမိူဝ်ႈၵႆႈၼၼ်ႉသေ လႆႈႁၼ်သၢဝ်ဢွၼ်ႇၶဝ် ပေႃးမႃးၼင်ႈဢိင်ၶၢင်ႈ ၼႂ်းဢွင်ႈၵွတ်ႇၶႅၼ်သွင်ၽၢႆႇ ၵူၼ်းလူင်ၸိူဝ်းၼၼ်ႉယဝ်ႉ၊ ဝၼ်းၸိုၼ်ႈဢၼ်ႁၼ်ၼင်ႇၼၼ်ႉၵေႃႈ မႃးၼင်ႈၸွမ်းသေ ႁိုဝ်ႈလဝ်ႈပၼ်ၶဝ်ၵႂႃႇၵေႃႉၵွၵ်းၵွၵ်း တၵ်းသႂ်ႇပၼ် ၸဝ်ႈပၢင်ႇ၊ ၸဝ်ႈပၼ်ႇ၊ ၸဝ်ႈမိူင်းၶမ်း၊ ၸဝ်ႈၸိင်ႇ ဢၼ်ပဵၼ်ၵူၼ်းလူင်လၢႆလၢႆ ပဵၼ်တီႈပိူၼ်ႈၼပ်ႉယမ်ယူႇၼၼ်ႉယဝ်ႉ။
“လွင်ႈၼႆႉ ၸဝ်ႈႁဝ်းႁဵတ်းႁိုဝ်ႁူႉလႃႇ ” ထၢမ်ၸူး ဝၼ်းၸိုၼ်ႈ။
“ႁဵတ်းႁိုဝ်ႁူႉမၼ်းဢမ်ႇလွင်ႈယႂ်ႇ ဢၼ်ၸဝ်ႈႁဵတ်းတေႉယူႇႁႃႉ ၼၼ်ႉၵူၺ်းဢိူဝ်ႈ ဢၼ်လမ်ႇလွင်ႈ”
“ၵၢၼ်ၸိူဝ်းၼႆႉ ၸဝ်ႈႁဝ်းၵေႃႈတိုၼ်းႁူႉယူႇယဝ်ႉဢမ်ႇၸႂ်ႈႁႃႉ ၸဝ်ႈပၢင်ႇဝႃႈ”
“ၸဝ်ႈၵေႃႈယွမ်းၽွင်ႈၵဝ်ႇဢိူဝ်ႈ မၼ်းၶႂ်ႈၵျၢမ်းၼႃႇလႄႈ ၸဝ်ႈႁဝ်းမႃးတၵ်ႉၵူၺ်းဢိူဝ်ႈၼၼ်ႉ”
“ၸၢင်ႈတေႁဵတ်းႁိုဝ်လႃႇ ၶၢဝ်းၼႆႉမၼ်းၵပ်ႉၵိၼ်းၼႃႇတေႉလူး ၸဝ်ႈၶဝ်ၵေႃႈႁူႉယူႇဢမ်ႇႁိုဝ် ဝၢၼ်ႈမိူင်းပဵၼ်ၼႆဝႆႉၼႆႉ”
“ၽႂ်ၵေႃႈၵိၼ်းမိူၼ်ၵၼ်ယဝ်ႉၶႃႈ ဢမ်ႇမီးၸဝ်ႈၵေႃႉလဵဝ်ၵူၺ်း တူၺ်းငဝ်းလၢႆးတႄႉ လႅပ်ႈတေၵိၼ်းၼႃႇလိူဝ်သေၼႆႉၵွၼ်ႇၶႃႈယဝ်ႉ” ဝၼ်းၸိုၼ်ႈလၢတ်ႈၸိမ်ၸွမ်းၵႂႃႇ။
“မိူဝ်ႈလႂ်ရေႃးၵႃႇၼႆႉတေၶႅၼ်းၶိုၼ်းဢမ်ႇႁူႉယဝ်ႉ ၵႂႃႇလႂ်မႃးလႂ်ၵေႃႈၵိၼ်းၸႂ်ၼႃႇလူင်” ၸဝ်ႈမိူင်းၶမ်းလၢတ်ႈ။
“ၼၼ်ႉယဝ်ႉ!” ၸဝ်ႈၸိင်ႇ လၢတ်ႈၸိမ်ၸွမ်း။
“ပေႃးၼၼ် မိူဝ်ႈၼႆႉဢဝ်တဵမ်တီႈၶႃႈလႄႈ တေလၢတ်ႈႁႂ်ႈလုၵ်ႈဢွၼ်ႇၶဝ် ႁၢင်ႈႁႅၼ်းပၼ်”
“ႁဵတ်းၼႆၵႂႃႈဝၼ်းၸိုၼ်ႈ!!”
“ၶႃႈမိူဝ်းထႃႈဢွၼ်တၢင်းယဝ်ႉၼႃႈပေႃးၼၼ်”
“လွႆးလွႆး ဢမ်ႇၶႂ်ႈဢဝ်ၸွမ်းႁဝ်းႁေတွႆးႁႃႉ”
“ဢူႈႁဝ်းလၢတ်ႈဝႃႈႁႂ်ႈၸဵဝ်းမိူဝ်းၼႆၶႃႈဝႃႇ”
ပေႃးလၢတ်ႈဝႃႈဢူႈႁဝ်းၼႆၵေႃႈ ၶဝ်ၸိူဝ်းၼၼ်ႉ ပေႃးဢမ်ႇၸၢင်ႈတၵ်းသဵင်သင်လႆႈယဝ်ႉၼႃႇ။
“မိူဝ်းလွႆးလွႆး”
ဝၢႆးသေဝၼ်းၸိုၼ်ႈဢွၵ်ႇၵႂႃႇၵူၺ်း ၶဝ်ၵေႃႈ တူၺ်းသၢႆႉတူၺ်းၶႂႃႁေ
“ဝၼ်းၸိုၼ်ႈၼႆႉ ၵဝ်ၶႂ်ႈလႆႈၸၢမ်းတူၺ်းၵူၺ်းၵဝ်ႇၵဝ်” ၸဝ်ႈပၢင်ႇ။
“ဢၢပ်ႈယင်းတိုၵ်ႉပဵၼ်သၢဝ်သူၺ်ႇပီႇယူႇၼၼ်ႉဢမ်ႇဝႃႈႁႃႉ” ၸဝ်ႈပၼ်ႇ လၢတ်ႈၸိမ်။
“ႁၼ်မၼ်းၸဵမ်မိူဝ်ႈလဵၵ်ႉပုၼ်ႉၼၼ်ႉ တႄႇၸဵမ်မိူဝ်ႈမႃးႁဵတ်းၵၢၼ်ၵေႃႈ ဢမ်ႇတွၼ်ႉႁၼ်မၼ်း ၶဝ်ႈႁႃၽူႈၸၢႆးႁေပွၵ်ႈ လိူဝ်သေၸဝ်ႈလွၼ်ႉၶိူဝ်းၵူၺ်း” ၸဝ်ႈမိူင်းၶမ်းၵေႃႈလၢတ်ႈၸွမ်းထႅင်ႈ။
“ဢမ်ႇဝႃႈလႆႈၼႃႇ ၸဝ်ႈႁဝ်းၵေႃႈတိုၵ်ႉၼုမ်ႇယူႇၵူၺ်းလူးၼေႃႈ မၼ်းၵေႃႈသမ်ႉဢမ်ႇၸႂ်ႈလုၵ်ႈတေႉတေႉႁေၼႃႇ” ၸဝ်ႈပၼ်ႇၵေႃႈသိုပ်ႇလၢတ်ႈၵမ်ႉထႅမ်။
“ငိၼ်းဝႃႈ ၵဵပ်းမႃးလႆႈၼႂ်းပၢင်တိုၵ်း မိူဝ်ႈပီ 1998 ၼၼ်ႉၼႆႁိုဝ်လႃႇ” ၸဝ်ႈၸိင်ႇ လၢတ်ႈၼႄၵႂႃႇ။
“ၸႂ်ႈဢိူဝ်ႈ မိူဝ်ႈမၢၼ်ႈယိုဝ်းၵူၼ်းဝၢၼ်ႈၶဝ်တၢႆမူတ်းၼၼ်ႉ ၵိုတ်းမၼ်းၵူၺ်းၼႃႇလွတ်ႈ ႁၼ်သၢႆတႃမၼ်းမိူဝ်ႈၼၼ်ႉယဝ်ႉ ၶူၼ်တုမ်ႇၼိူဝ်ႉပေႃးၵီႈမႃးယဝ်ႉဢိူဝ်ႈၼႆႉ” ၸဝ်ႈမိူင်းၶမ်း တင်းလၢတ်ႈတင်းသၼ်ႇတူဝ်မၼ်းၵႂႃႇ။
“တေဝႃႈႁိုဝ်ၵေႃႈ သၢႆတႃမၼ်းၼၼ်ႉ လီၵူဝ်လိူဝ်သေ ၸဝ်ႈလွၼ်ႉၶိူဝ်းၵွၼ်ႇယဝ်ႈ” ၸဝ်ႈပၢင်ႇၼၼ်ႉၵေႃႈ လၢတ်ႈၵမ်ႉထႅမ်ၵႂႃႇထႅင်ႈယူႇ။
ၵူၼ်းဢၼ်ဢိုပ်းလွင်ႈမူၼ်ႈသိူဝ်း ၵၢၼ်မဝ်းမိင်းတင်းလူင် မႃးႁိုင်ယဝ်ႉၼႆၵေႃႈ၊ ၶဝ်ၸိူဝ်းၼၼ်ႉ ယူႇတင်းၶိုၼ်း တေႃႇမိူင်းသမ်ႉပေႃးၸမ်လႅင်းယဝ်ႉ။ ပေႃးမိူင်းလႅင်းသေ ဢွၵ်ႇလၢၼ်ႉၵႂႃႇဢမ်ႇပေႃးလီၼႆလႄႈ ၵူၼ်းတီႈလၢၼ်ႉၼၼ်ႉၵေႃႈ ဢွၼ်ဢဝ်ၵႂႃႇသူင်ႇပၼ်တီႈၵႃးၽႂ်ၵႃးမၼ်းသေ ႁႂ်ႈၵူၼ်းၶပ်းၵႃးႁေႃႈသူင်ႇမိူဝ်းၵႂႃႇယူႇယဝ်ႉ။
ၼႂ်းၶဝ်ၸိူဝ်းၼၼ်ႉ မီးၸဝ်ႈပၢင်ႇၵူၺ်း ဢၼ်မဝ်းပေႃးဢမ်ႇႁူႉႁူဝ်ႁူႉႁၢင်သေဢိတ်း၊ တီႈၼႂ်းၵႃးၼၼ်ႉၵေႃႈ ယင်းတိုၵ်ႉၸွမ်းႁွင်ႉႁႃ “ၼွင်ႉဢူၺ်! ၼွင်ႉဢိူၺ်ပီႈ” ယူႇတိၵ်းတိၵ်း။
မိူၼ်ဝႃႈႁူဝ်ၵႃးၸဝ်ႈပၢင်ႇၼၼ်ႉ လႆႈၵႂႃႇသူင်ႇႁွတ်ႈထိုင်တီႈႁူင်းယႃ ဢၼ်မီးၵူၼ်းပဵၼ်တဵမ်လူင်ၵႂႃႇသဵင်ႈၼၼ်ႉလႄႈ ၵူၼ်းႁေႃႈၵႃးၼၼ်ႉၵေႃႈ လၢၵ်ႈတူဝ်ၸဝ်ႈပၢင်ႇၼၼ်ႉ ဝိုတ်ႉပႅတ်ႈဝႆႉယူႇႁိမ်းၵၢင်တၢင်းၼၼ်ႉသေ ၼႅတ်ႈဝိၼ်ႇႁူဝ်ၵႃးမၼ်းပွၵ်ႈၵႂႃႇၶိုၼ်းဝႆးၽႂ်းယဝ်ႉ။
ၸဝ်ႈပၢင်ႇၼၼ်ႉၵေႃႈ ဝၢႆးသေမၼ်းတိုၼ်ႇမႃး လႆႈႁၼ်ၵူၼ်းပေႃးတူင်ႉဢူၼ်ပၼ်းလူင်ၵႂႃႇသဵင်ႈ၊ ၵွပ်ႈမဝ်းပႆႇၸၢႆႇလီလႄႈ ၼႅတ်ႈလုၵ်ႉသီႁူသီတႃမၼ်းသေ ဝိၼ်ႇသၢႆႉဝိၼ်ႇၶႂႃယဝ်ႉၵေႃႈ “တီႈၼႆႈပဵၼ်တီႈလႂ်လႃႇ ၸွင်ႇမၼ်းဢမ်ႇၸႂ်ႈႁူင်းယႃႁိုဝ်ၼႆႉ”
ၼႅတ်ႈပိၵ်ႉသူပ်းပိၵ်ႉပၢၵ်ႇမၼ်းဝႆႉယူႇ၊ တႄႇၸဵမ်မိူဝ်ႈမၼ်းမႃးႁွတ်ႈထိုင်တီႈႁူင်းယႃ ၼွၼ်းယူႇႁိမ်းတၢင်း ၵူင်သူပ်းမၼ်းထူၺ်ႈၸႂ်မေႃးယူႇၶွတ်ႈၶွတ်ႈၼၼ်ႉ မေႃယႃၶဝ် ဢွၵ်ႇႁူင်းယႃမႃး ႁၼ်ၸိူင်ႉၼၼ်ၵေႃႈ ၼႅတ်ႈလၢၵ်ႈမၼ်းၶဝ်ႈၵႂႃႇတၢင်းၼႂ်းသေယဝ်ႉ ၵူတ်ႇထတ်းတူၺ်းပႃး တၢင်းပဵၼ်မၼ်းၼႆၵေႃႈ ဢမ်ႇၶႂ်ႈၸပ်းၵေႃႈလႆႈၸပ်းၵႂႃႇယဝ်ႉ ၶူဝ်ႇဝိတ်ႉဢၼ်ဝႃႈၼၼ်ႉ။ မိူဝ်ႈပဵၼ်ၸိူင်ႉၼၼ် ၽႂ်ၵေႃႈဢမ်ႇပၼ်မၼ်းၵႂႃႇတၢင်းလႂ် ၶူဝ်းၶွင်ၸႂ်ႉတိုဝ်းသုၼ်ႇတူဝ် ၾူင်းၸိူဝ်းၼႆႉၵေႃႈသမ်ႉ ဢမ်ႇၵိုၵ်းတူဝ်မႃးသေမဵဝ်း ဢမ်ႇၸၢင်ႈၵပ်းသိုပ်ႇၽႂ်လႆႈသေဢိတ်း ယူႇယဝ်ႉ။
ႁိုင်ယူႇလၢႆလၢႆဝၼ်း ၽႂ်ၵေႃႈၵပ်းသိုပ်ႇမၼ်းဢမ်ႇလႆႈ လုၵ်ႈမေးမၼ်းၵေႃႈမႆႈၸႂ်သေ ဢွၼ်ၵၼ်မႃးႁႃတီႈႁိူၼ်း ၸဝ်ႈလွၼ်ႉၶိူဝ်းၶဝ်ယဝ်ႉ။ မိူဝ်ႈၸဝ်ႈလွၼ်ႉၶိူဝ်းႁူႉၼင်ႇၼၼ်ၵေႃႈ ပဵၼ်ဢၼ်မႆႈၸႂ်မႆႈၶေႃး သိုပ်ႇၾူင်းထၢမ်ၸိူဝ်းၶဝ် ဢၼ်မႃးၸွမ်းၵၼ်ၶမ်ႈၼၼ်ႉ ၽႂ်ၵေႃႈဝႃႈ မၼ်းပွၵ်ႈမိူဝ်းယူႇၼႆ သမ်ႉတွပ်ႇမိူၼ်ၵၼ်မူတ်းလႄႈ ၼႂ်းၸႂ်ၵေႃႈသမ်ႉပေႃးဢမ်ႇလီမႃးယူႇယဝ်ႉ။ ၸွမ်းၼင်ႇႁဵတ်းလႆႈၼၼ်ႉ မၼ်းၵေႃႈလႆႈၸႂ်ႉလုၵ်ႈၼွင်ႉမၼ်းတီႈႁိူၼ်း ၸွမ်းႁႃယူႇယဝ်ႉ။
ၸဝ်ႈပၢင်ႇႁၢႆၵႂႃႇႁိုင်ထိုင်သိပ်းဝၼ်းယဝ်ႉ ၶဝ်ၵေႃႈႁႃဢမ်ႇထူပ်းလႄႈ ၸင်ႇလႆႈဢွၼ်ၵၼ်ဝႃႈ မၼ်းပၢႆႈယဝ်ႉၼႆယူႇ၊ ၵူၺ်းၵႃႈ မိူဝ်ႈတေသႂ်သၢႆမၢႆမၼ်းပၢႆႈယဝ်ႉၼႆၼၼ်ႉ လုၵ်ႈၼွင်ႉဢၼ်ၵႂႃႇၸွမ်းႁႃးၼၼ်ႉၵေႃႈ လႆႈငိၼ်းၶၢဝ်ႇမႃးဝႃႈ ၸဝ်ႈပၢင်ႇၸပ်းၶူဝ်ႇဝိတ်ႉႁႅင်းၼႃႇသေတၢႆၵႂႃႇယဝ်ႉၼႆယူႇ။ ဝၼ်းၸိုၼ်ႈ ဢၼ်လႆႈငိၼ်းၼင်ႇၼၼ်ၵေႃႈ ၼႅတ်ႈသိုပ်ႇၽူင်းၵႂႃႇထၢမ်ၵူၼ်းႁူႉၸၵ်း တီႈႁူင်းယႃၼၼ်ႉၵမ်းလဵဝ် မိူၼ်ဝႃႈပဵၼ်လွင်ႈတေႉလႄႈ မိူဝ်ႈပဵၼ်ၼင်ႇၼၼ်မႃး ၽႂ်ၵေႃႈပေႃးဢမ်ႇၸၢင်ႈႁဵတ်းႁိုဝ်ယဝ်ႉ။
မိူဝ်ႈယိုၼ်ယၼ်လႆႈဝႃႈၸႂ်ႈတေႉယူႇလႄႈ သီၼႃႈၸဝ်ႈလွၼ်ႉၶိူဝ်းၼၼ်ႉၵေႃႈ သမ်ႉပေႃးၵိုင်ႉၵၢင်ႉၽိူၵ်ႇလူင်မႃးၵမ်းလဵဝ်သေ လၢတ်ႈသင်ပေႃးဢမ်ႇလႆႈယဝ်ႉ။ ဝၼ်းၸိုၼ်ႈၸင်ႇထၢမ်ၵႂႃႇ
“ၶဝ်ထၢမ်မႃးဝႃႈ ၸွင်ႇတေၵႂႃႇဢဝ်တူဝ်တၢႆၶဝ်ၼႆၶႃႈ မၼ်းၸဝ်ႈတၢႆမႃးလႆႈ 2 ဝၼ်းယဝ်ႉၶႃႈလႄႈ ၵပ်းသိုပ်ႇပီႈၼွင်ႉဢမ်ႇလႆႈၼႆသေ ၶဝ်ဢၢင်ႈတေပူၼ်ႉၵႂႃႇပႅတ်ႈမိူဝ်ႈၼႆႉၼႆၶႃႈဢေႃႈ”
“လွင်ႈၼႆႉ..မႂ်းၵေႃႉၸတ်းၵၢၼ်ၵႂႃႇလႄႈ!!”
“မေႃယႃၶဝ်ၵေႃႈလၢတ်ႈမႃးဝႃႈ ဢမ်ႇၶႂ်ႈႁႂ်ႈဢဝ်ၶၢပ်ႈတူဝ်တၢႆမၼ်းၵႂႃႇတၢင်ႇတီႈ ၵူဝ်ၸိူဝ်ႉမႅင်းမၼ်းတေၽႄႈလၢမ်းတၢင်းၼွၵ်ႈ လႄႈ ႁႂ်ႈလီတႄႉပၼ်မေႃယႃၶဝ်ၸတ်းၵၢၼ်ၵႂႃႇၼႆ တေလီယူႇၶႃႈဢေႃႈ”
“ဢိူဝ်ႈ!.. တႅပ်းတတ်းၵႂႃႇႁင်းႁဝ်းၵေႃႈဢမ်ႇပေႃးလီမႂ်း ထၢမ်တူၺ်းလုၵ်ႈမေးမၼ်းၵွၼ်ႇလႄႈ ၶဝ်ၶႂ်ႈႁဵတ်းႁိုဝ်ၵေႃႈ”
“ဢေႃႈၶႃႈ”
ဝၼ်းၸိုၼ်ႈၵေႃႈလႆႈၵပ်းသိုပ်ႇတူၺ်း တီႈလုၵ်ႈမေးၸဝ်ႈပၢင်ႇၼၼ်ႉသေ ဢၼ်ပဵၼ်လုၵ်ႈမေးမၼ်းၼၼ်ႉၵေႃႈ မိူဝ်ႈငိၼ်းၼင်ႇၼၼ် ပဵၼ်ဢၼ်ၵူဝ်မႃးလိူဝ်သေလွင်ႈမႆႈၸႂ်ယဝ်ႉ၊ ၼႅတ်ႈထဵင်ၶိုၼ်းလွင်ႈတေႁပ်ႉမႃးၵမ်းလဵဝ်သေ ႁႂ်ႈႁဵတ်းၵႂႃႇၸွမ်းၼင်ႇမေႃယႃၶဝ်လၢတ်ႈၵူၺ်းၼႆယဝ်ႉ၊ ပေႃးဝႃႈၶူဝ်ႇဝိတ်ႉၼႆ ၽႂ်ၽႂ်ၵေႃႈဢွၼ်ၵၼ်ၵူဝ်လႄႈ တေႃႈၼင်ႇၵူၼ်းၼႂ်းၼႃႈႁိူၼ်းၵူၺ်းၵေႃႈ ယင်းဢမ်ႇႁတ်းယူႇၸမ်၊ ၶၢပ်ႈတူဝ်တၢႆၸဝ်ႈပၢင်ႇၼၼ်ႉၵေႃႈ လႆႈထုၵ်ႇၽဝ်တၢႆၵႂႃႇပႅတ်ႈၸွမ်း ၵူၼ်းတင်းၼမ် ဢၼ်တိတ်းၸပ်းၶူဝ်ႇဝိတ်ႉၼၼ်ႉသေ ပဵၼ်ၽဝ်ႇတဝ်ႈၵႂႃႇယဝ်ႉၵေႃႈ ဢမ်ႇမီးၽႂ် မႃးဢဝ်လုပ်ႇဢဝ်တဝ်ႈမၼ်းၵႂႃႇသေၵေႃႉ၊ ၵူဝ်ၼႃႇလိူဝ်သေၵူဝ်ၽီၵႂႃႇၵွၼ်ႇယဝ်ႉ။
သမ်ႉဝႃႈမိူဝ်ႈယူႇ တေပဵၼ်ယႂ်ႇၼႃႇၼႆသေတႃႉၵေႃႈ မိူဝ်ႈတၢႆမႃးတႄႉ ဢမ်ႇမီးၽႂ်မႃးတူၺ်းမႃးႁၼ် မိူၼ်ထုၵ်ႇပႅတ်ႈဝႆႉၼႂ်းၵွင်ယုၵ်းယၵ်းၼၼ်ႉၵူၺ်း၊ ၵူၼ်းတၢႆတႄႉယဝ်ႉၵႂႃႇ ၵူၼ်းယူႇပႃႈလင်တႄႉၵေႃႈပႆႇယဝ်ႉ ဢွၼ်ၵၼ်ႁႅၼ်းသွမ်းႁႅၼ်းလူႇပၼ်ႁေ ၼႂ်းၶၢဝ်းတၢင်းႁၢင်ႈၼႂ်ၼၼ်ႉယူႇယဝ်ႉ။
မိူဝ်ႈဢၼ်ပိူၼ်ႈဢွၼ်ႁူႉၶၢဝ်ႇငၢဝ်းၸဝ်ႈပၢင်ႇတၢႆၼႆၵေႃႈ မီးၵူၼ်းၵမ်ႈဢေႇၵူၺ်း ဢၼ်သေလၢႆမွင်ၸႂ်၊ ၵူၺ်းၵႃႈ မီးၵူၼ်းတင်းၼမ်ဢၼ်လႆႈယုမ်ႉၶူဝ်ၸူမ်းသိူဝ်းၸွမ်း လွင်ႈတၢႆမၼ်းၼၼ်ႉ သင်လၢတ်ႈသိုဝ်ႈသိုဝ်ႈၵေႃႈ မီးၵူၼ်းပၼ်ႁႅင်းႁႂ်ႈမၼ်းတၢႆ လိူဝ်သေႁႂ်ႈမၼ်းယူႇလူးၵွၼ်ႇ။
………..
“ပေႃးတူၺ်းဢၼ်မၼ်းတၢႆၼၼ်ႉ ဢၢပ်ႈမိူၼ်မီးၵူၼ်းၸင်းမၼ်းတေႉၵဝ်ႇဢိူဝ်ႈၼေႃႈ”
“ၼၼ်ႉယဝ်ႉ ပေႃးဢမ်ႇၼၼ် ၽႂ်တေဢဝ်မၼ်းၵႂႃႇပႅတ်ႈတီႈႁူင်းယႃ ဢၼ်မီးၵူၼ်းပဵၼ်ၼၼ်ႉလႃႇမႂ်းဝႃႈ”
“ၵူၼ်းၵေႃႉဢၼ်ဢဝ်ၵႂႃႇပႅတ်ႈၼၼ်ႉၵေႃႈ သမ်ႉပေႉမႃးဝူၼ်ႉလႆႈၵဝ်ႇၼေႃႈ ဢဝ်ၵူၼ်းတၢႆလူၺ်ႈၸဝ်ႈၵဝ်ႇဢမ်ႇလႆႈၸႂ်ႉၶိူင်ႈမိုဝ်းသင်ႁႅမ်တၢႆ”
“ၶိင်းပီး မႂ်းၵေႃႉလူလႄႈပေႃးၼၼ် ၵဝ်ၶႂ်ႈၵူၼ်ႉယဝ်ႉၼႆႉ”
“ၵဝ်ဝႃႈလဝ်ႈႁႃးၼႆႉ ဝႆႉႁေလႃႈၼေႃႈ”
“ဢဝ်ၵေႃႉႁႃးဝႃႈလႃႈ” ဢဝ်တဝ်ႈလဝ်ႈၶႃ တမ်းပႅတ်ႈတီႈတႂ်ႈလၢင်ႈႁၢၼ်ႉၶႃၼၼ်ႉၵႂႃႇယူႇ။
တႃႇတွင်း။ ။ ၸိူင်းႁူဝ်ၼႆႉ ဢွင်ႈတီႈပိူင်ပဵၼ်ငဝ်းလၢႆး ဢမ်ႇၸႂ်ႈလွင်ႈတေႉ ပဵၼ်ၸိူင်းဢၼ်ဝူၼ်ႉသၢင်ႈမႃးဢဝ်ၵူၺ်း။
တွၼ်ႈသၢမ်သုတ်းၵႂႃႇယဝ်ႉသိုပ်ႇလူၵႂႃႇထႅင်ႈတွၼ်ႈသီႇၶႃႈ
