သၢႆငဝ်းၼႂ်းလပ်းသိင်ႇ တွၼ်ႈၼိုင်ႈ

တွၼ်ႈၼိုင်ႈ

ပီႊ 1998

ၸွမ်းသၢႆသဵၼ်ႈတၢင်းလိၼ် ဢၼ်မီးပႃႇမႆႉဢုမ်ႇသုမ်ႇငုမ်းငမ်း ၵူၼ်းၼမ်ၵူၼ်းလၢႆဢွၼ်ၵၼ်ပဵၼ်ယိုတ်ႈပဵၼ်သၢႆ တင်းဝူဝ်းတင်းၵႂၢႆး တင်းလေႃႉတၢင်ႇၶူဝ်းပေႃးတဵမ် ၶပ်ႉယႆၸႅၼ်ႇပႆ ၵႂႃႇၸွမ်းၼႂ်းသဵၼ်ႈတၢင်း ဢၼ်မုင်ႈၼႃႈၸူးဝဵင်းၼၼ်ႉယဝ်ႉ။

မိူဝ်ႈၽွင်းၶႃႈယင်းတိုၵ်ႉလႆႈ 7 ၶူပ်ႇၼၼ်ႉၵေႃႈ မႄႈၶႃႈၵေႃႈဢဝ်တင်းၶူဝ်းတင်းလဵင်းသေ ႁၢပ်ႇလူင်ဢွၵ်ႇၵႂႃႇၸွမ်းပိူၼ်ႈလႄႈ ႁႂ်ႈၶႃႈၸေးဢဝ်မေႃႈၶဝ်ႈႁူၺ်ႇၼိုင်ႈသႂ်ႇထူင်ၵေႃႇၸၢၼ်ႈသေယဝ်ႉ ၸေးလင်ၵႂႃႇၸွမ်းလင်ပိူၼ်ႈလွႆးလွႆးယဝ်ႉ။ ၶႃႈၵေႃႈဢမ်ႇႁူႉဝႃႈပိူၼ်ႈၵႂႃႇတၢင်းလႂ် ႁၼ်ပိူၼ်ႈၵႂႃႇႁဝ်းၵေႃႈၵႂႃႇၸွမ်းပိူၼ်ႈၵူၺ်း ၶႃႈၵေႃႈလႆႈထၢမ်တူၺ်းမႄႈႁဝ်း ၵူၺ်းၵႃႈမႄႈႁဝ်းၵေႃႈလၢတ်ႈၶႃႈဝႃႈ တေဢွၼ်ၶႃႈ “မိူဝ်းဝဵင်း” ၼႆဝႃႇ ၸူဝ်ႈၶႃႈၵိူတ်ႇမႃးၼၼ်ႉ မႄႈၶႃႈဢမ်ႇတွၼ်ႉဢွၼ်ၶႃႈမိူဝ်းဝဵင်းသေပွၵ်ႈ မိူဝ်ႈၶႃႈႁူႉၸိူင်ႉၼၼ် ၶႃႈသမ်ႉပေႃးၶႆႈလႅၼ်ႈလူင်ၵႂႃႇတၢင်းၼႃႈပိူၼ်ႈၼၼ်ႉယဝ်ႉ။ မႄႈၶႃႈၵေႃႈ ၵူဝ်ၶႃႈႁၢႆၼႆသေ ဢမ်ႇပၼ်ၶႃႈဢႅၼ်ႈ။

မိူဝ်းဝဵင်းဢၼ်ဝႃႈၼၼ်ႉဢမ်ႇငၢႆႈငၢႆႈ ၸဝ်ႉတေႃႇၵၢင်ဝၼ်းတူၵ်းၵေႃႈယင်းပႆႇထိုင်၊ မိူဝ်ႈၽွင်းႁူဝ်ၶမ်ႈၼၼ်ႉ ပိူၼ်ႈဢွၼ်ၵၼ်လိုဝ်ႈႁိူဝ်ႉၵၼ်ၸွမ်းၸိူဝ်းႁူမ်ႈမႆႉ ႁိမ်းၽင်ႇတၢင်းၸိူဝ်းၼၼ်ႉသေ မႄႈၶႃႈၵေႃႈ ဢဝ်တင်းႁေႃႇၶဝ်ႈႁႃး ဢၼ်ႁေႃႇမႃးၸဵမ်မိူဝ်ႈၵၢင်ၼႂ်ၼၼ်ႉ လႄႈ ဢၼ်လိူဝ်ၵၢင်ဝၼ်းၼၼ်ႉသေ ၶိုၼ်းမႃးၵိၼ်ၶိုၼ်းယဝ်ႉ ၽၵ်းႁႃးၼၼ်ႉတႄႉၵေႃႈ မီးပႃၼဝ်ႈဢွၼ်တူဝ်ၼိုင်ႈၵူၺ်း သမ်ႉပေႃးၵိၼ်ပဵၼ်သၢမ်တႃႇယူႇ။

ဢူႈၶႃႈတႄႉၵေႃႈၸဵမ်မိူဝ်ႈပီႊၵၢႆ ၺႃးသိုၵ်းမၢၼ်ႈႁွင်ႉၵႂႃႇႁၢပ်ႇၶျေႃးသေ ဢမ်ႇၶိုၼ်းပွၵ်ႈမႃးႁိူၼ်းယဝ်ႉ၊ လုင်းဢၼ်ၵႂႃႇႁေၶိုၼ်းပွၵ်ႈမႃးၼၼ်ႉတႄႉၵေႃႈဝႃႈ ပေႃႈၶႃႈၼၼ်ႉ ဢမ်ႇပေႉၵႂႃႇၸွမ်းပိူၼ်ႈလႆႈလႄႈ ၺႃးသိုၵ်းမၢၼ်ႈၶဝ် ဢဝ်တၢႆပႅတ်ႈယဝ်ႉၼႆဝႃႇ။

မိူဝ်ႈဢၼ်ႁဝ်းယင်းတိုၵ်ႉ  တေသိုပ်ႇဢွၵ်ႇၶၢဝ်းတၢင်းၵႂႃႇထႅင်ႈၼၼ်ႉ ပႃႈၼႃႈႁဝ်းၼၼ်ႉၵေႃႈ လႆႈငိၼ်းသဵင်ၵွင်ႈလင်ၼၼ်ႈလူင်မေႃးမႃးလႄႈ မေႃးၸမ်ႁဝ်းတိၵ်းတိၵ်းယဝ်ႉ၊ ယၢမ်းၼၼ်ႉ ၶႃႈၵေႃႈလႆႈႁၼ်မႅၼ်ႈ ၵူၼ်းၸိူဝ်းဢၼ်ယူႇပႃႈၼႃႈၶႃႈၼၼ်ႉ လူမ်ႉလူင်းလူမ်ႉလူင်းၵႂႃႇ ၵမ်းၵေႃႉသွင်ၵေႃႉ တင်းသွင်ၽင်ႇၶၢင်ႈတၢင်းၼၼ်ႉၵေႃႈ လိူတ်ႈလႅင်ၸၢင်းဢၢင်းၼွင်းဢိူင်း ဢိူၵ်ႇၵူဝ်ႈၸွမ်းယိူဝ်ႈ ၸိုမ်ႉယမ်းၶဝ်ႈၼႂ်းလိၼ်ၵႂႃႇယဝ်ႉ။

မိူဝ်ႈပဵၼ်ၼင်ႇၼၼ် မႄႈဢၼ်ယူႇပႃႈၼႃႈၶႃႈၼၼ်ႉၵေႃႈ လႆႈလူမ်ႉဢူပ်ႇပူဝ်ႉသႂ်ႇတူဝ်ၶႃႈသေယဝ်ႉ တီႈတူဝ်မၼ်းၼၼ်ႉၵေႃႈ မီးလိူတ်ႈလႅင်မိူၼ်ၼင်ႇပိူၼ်ႈမႃးလႄႈ ၵူၼ်းသိုၵ်းၸိူဝ်းၼၼ်ႉၵေႃႈ လႆႈသုတ်ႉၶဝ်ႈမႃးၸမ်တီႈၶႃႈယူႇသေ၊ မႄႈၶႃႈဢၼ်ယင်းပႆႇလိုမ်းတူဝ်ၼၼ်ႉၵေႃႈ လႆႈလၢတ်ႈၸူးၶႃႈလွႆးလွႆးဝႃႈ “ယူႇယဵၼ်ယဵၼ်လပ်းတႃလႄႈ” မႄႈလပ်းတႃၵႂႃႇ ၶႃႈၵေႃႈလႆႈလပ်းတႃၵႂႃႇၸွမ်းယဝ်ႉ။ ၵူၺ်းၵႃႈ သဵင်လူမ်းထူၺ်ႈၸႂ်မႄႈၼၼ်ႉ လႆႈၵိုတ်းၵႂႃႇ ၶႃႈၼၼ်ႉတႄႉယင်းတိုၵ်ႉထူၺ်ႈၸႂ်ဝႆႉယူႇတႂ်ႈဢူၵ်းမႄႈၼၼ်ႉၵူၺ်း။ မႄႈၼၼ်ႉ ၸွႆႈသၢႆၸႂ်ၶႃႈဝႆႉတေႃႇဝၼ်းလိုၼ်းသုတ်းယဝ်ႉ ဢမ်ႇဝႃႈမိူဝ်ႈလႂ် ဢၢႆဢုၼ်ႇတီႈတူဝ်မႄႈ သဵင်လူမ်းထူၺ်ႈၸႂ်ၵမ်းလိုၼ်းသုတ်းမႄႈၼၼ်ႉ ၶႃႈယင်းႁပ်ႉႁူႉထိုင်မၼ်းလႆႈ ၼႂ်းဢူၵ်းၼႂ်းၸႂ်ယူႇတႃႇသေႇယဝ်ႉ။

ၵူၼ်းသိုၵ်းၸိူဝ်းၼၼ်ႉၵေႃႈ မႄးသိုပ်ႇလၼ်ႇၵွင်ႈ သႂ်ႇတီႈႁႃးမႄႈလုၵ်ႈၼၼ်ႉထႅင်ႈၵမ်းၼိုင်ႈ မိူၼ်တေယိုဝ်းတိူဝ်ႉၺႃး မေႃႈၶဝ်ႈၶႃႈဢၼ်ႁူမ်ႇဝႆႉယူႇၽၢႆႇလင်ၶႃႈၼၼ်ႉယဝ်ႉ။

ၸူဝ်ႈၵႅပ်ႉၵမ်းဢွၼ်ႇၵူၺ်း ၵူၼ်းၸိူဝ်းဢၼ်တူင်ႉၼိုင်ဢုပ်ႇလၢတ်ႈ ႁုၼ်ႉၶူဝ်တေႃႇၵၼ်ယူႇၼၼ်ႉၵေႃႈ ယဵၼ်းပဵၼ်သဵင်တဵတ်ႇယဵၼ်ၵႂႃႇမူတ်းယဝ်ႉ။ သဵၼ်ႈတၢင်းမိူဝ်းဝဵင်းၼၼ်ႉၵေႃႈ လႆႈပဵၼ်သဵၼ်ႈတၢင်း ဢၼ်သိူဝ်ႇလိူတ်ႈသိူဝ်ႇယၢင်ၵႂႃႇမူတ်း၊ တႄႇၸဵမ်မိူဝ်ႈ မႄႈလၢတ်ႈႁႂ်ႈၶႃႈလပ်းတႃလႄႈ ယူႇယဵၼ်ယဵၼ်ၼၼ်ႉ ၶႃႈၵေႃႈဢမ်ႇႁတ်းမိုၼ်းတႃၶိုၼ်း၊ သမ်ႉဝႃႈပိူၼ်ႈတေမႃးဢဝ် မႄႈၽၢတ်ႇဢွၵ်ႇတီႈတူဝ်ၶႃႈၵႂႃႇလႄႈ ယုၵ်ႉဢဝ်တူဝ်ၶႃႈဝိုတ်ႉပိူဝ်ႈသႂ်ႇၺႃး တူဝ်ၵူၼ်း ဢၼ်ဢမ်ႇတူင်ႉဢမ်ႇၼိုင် မီးတင်းဢၢႆၶႅဝ်းပေႃးတဵမ်ၵႂႃႇသဵင်ႈၼၼ်ႉ။ ယူႇယူႇ သဵင်မၢၵ်ႇလေႃႉဢွတ်ႇဢိတ်ႇဢွတ်ႇဢိတ်ႇ ၶၢႆႉၵႂႃႇလွႆးလွႆး လႄႈ ၵူၼ်းဢၼ်ယူႇပႃႈၼိူဝ်ၶႃႈၼၼ်ႉၵေႃႈ ၵိင်ႈၵွင်လူင်သုတ်ႈလူင်း တူၵ်းပိုၵ်ႉပိုၵ်ႉပၵ်ႉပၵ်ႉၵႂႃႇသဵင်ႈ၊ တူဝ်ၶႃႈၼၼ်ႉ လႆႈၶၢမ်ႇၼမ်ႉၼၵ်းတူဝ်ၵူၼ်းဢၼ်ဢမ်ႇမီးၸႂ်ယဝ်ႉၼၼ်ႉ တဵင်သႂ်ႇပဵၼ်လၢႆၵေႃႉၵေႃႈဢမ်ႇႁူႉယဝ်ႉ။ ယၢမ်းၼၼ်ႉ ၶႃႈၸင်ႇမိုၼ်းတႃတူၺ်းသေ ၼႃႈမိူင်းသမ်ႉပေႃးလပ်းသိင်ႇလူင်ၵႂႃႇမူတ်းယဝ်ႉ လႄႈ ၸင်ႇတေၽိုတ်ႉတူဝ်ဢီးၵူၼ်းၸိူဝ်းၼၼ်ႉ ၶိုၼ်ႈၵမ်းလွႆးလွႆး သမ်ႉဝႃႈမၼ်းတေၼၵ်းၼႃႇတၢၼ်ႇႁိုဝ်ၵေႃႈ ၶႃႈႁိုဝ်ႁတ်းလၢတ်ႈသဵင်သင်ဢွၵ်ႇမႃးလႆႈ တၢင်းၼၵ်းလူင်ၵူၼ်း ဢၼ်ၵွင်သႂ်ႇၼိူဝ်တူဝ်ၶႃႈၼၼ်ႉ မိူၼ်ဝႃႈၶႃႈၵေႃႈ တေတၢႆၵႂႃႇၸွမ်းမႄႈႁဝ်းထႅင်ႈၵေႃႉၼိုင်ႈယဝ်ႉ။

မိူဝ်ႈဢွၼ်တၢင်း ၶႃႈၵူဝ်လိူဝ်ပိူၼ်ႈယဝ်ႉ ၵူၼ်းတၢႆ ဝႃႇ၊ ၽီဝႃႇ ၼႆၼၼ်ႉ ၵူၺ်းၵႃႈ မိူဝ်ႈၼၼ်ႉတႄႉ ၶႃႈဢမ်ႇတၼ်းသူၼ်ၸႂ်ယဝ်ႉဝႃႈ မၼ်းပဵၼ်ၵူၼ်းတၢႆႁႃႉ မၼ်းတေမီးၽီမႃးလွၵ်ႇၶႃႈယူႇႁိုဝ် ဢၼ်ၶႃႈၵူဝ်လိူဝ်သေပိူၼ်ႈၼၼ်ႉတႄႉ ၵူဝ်သိုၵ်းသိူဝ်းၼၼ်ႉတေႁၼ်ၶႃႈၵူၺ်းယဝ်ႉ။ ၶႃႈၵေႃႈ လႆႈၵၢၼ်းဢွၵ်ႇတီႈ ၵွင်ၵူၼ်းတၢႆၼၼ်ႉမႃးသေ လႆႈႁၼ်လႅင်းၾႆးထၢတ်ႈ ထွင်ႇလႅင်းယူႇႁၢမ်ႉၵႆတၢၼ်ႇတၢၼ်ႇလႄႈ ၾႆးလႅၼ်းယႃႈၶဝ်ၵေႃႈ ပေႃးလႅင် လူင်ၵႂႃႇသဵင်ႈ မၼ်းႁၼ်လႆႈဝႃႈ ၶဝ်ၼၼ်ႉ ယူႇတီႈလႂ်လၢႆလၢႆ ၶႃႈၵေႃႈ လႆႈလၼ်ၵၢၼ်းၶဝ်ႈၵႂႃႇၼႂ်းယုမ်း ဢၼ်ယူႇတၢင်းၸွၵ်ႉၼၼ်ႉလွႆးလွႆး လႄႈ ၵႂႃႇပႅပ်ႉသႂ်ႇတီႈတူၼ်ႈမႆႉၼၼ်ႉ သမ်ႉပေႃးဢမ်ႇႁတ်းတၵ်းသဵင်သင်ယဝ်ႉ။

မိူဝ်ႈၼၼ်ႉ တေႃႉတႄႉမီးလိူၼ်လႅင်းလႅင်းဢွၼ်ႇၽိတ်ႇၼိုင်ႈလႄႈ မႅင်းႁိင်ႇႁွႆႈၶဵဝ်ၶဵဝ်ၼၼ်ႉၵူၺ်း ဢၼ်ထွင်ႇပၼ်ႁႂ်ႈၶႃႈႁၼ်သၢႆလႅင်းလႆႈလႄႈ ႁႂ်ႈၶႃႈမုင်ႈႁၼ်လႆႈ ၵွင်ၵူၼ်းဢၼ်ၶဝ်ဢဝ်မႃးၵွင်လေႃးၵၼ်ယူႇၸိူဝ်းၼၼ်ႉ။

ၵွင်ၵူၼ်းၸိူဝ်းၼၼ်ႉတႄႉ ဢမ်ႇႁူႉဝႃႈၽႂ်ပဵၼ်ၽႂ်ယဝ်ႉ မိူဝ်ႈဢၼ်ၶဝ်ၵဵပ်းၵူၼ်းတၢႆယဝ်ႉၼၼ်ႉ ၶဝ်ၵေႃႈ လႆႈဢဝ်ၶူဝ်းၶွင်ဢၼ်ႁဝ်းတေႃႉမႃးၸိူဝ်းၼၼ်ႉ မႃးၵွင်သႂ်ႇထူမ်သႂ်ႇထႅင်ႈႁေယဝ်ႉ ယူႇယူႇၵေႃႈမီးၾႆးလုၵ်ႈထူမ်ထူမ်ႈတီႈၼၼ်ႈၵႂႃႇယဝ်ႉ။ ဝူၼ်ႉၶိုၼ်းမိူဝ်ႈလႂ် ယင်းတိုၵ်ႉႁၼ်ၵွင်ၾႆး ဢၼ်လုၵ်ႉႁိူဝ်ႈလႅင်းယူႇႁုၼ်ႈႁုၼ်ႈၼၼ်ႉသေဢမ်ႇၵႃး ႁၼ်ပႃးၵူၼ်းမိူၵ်ႈၸိူဝ်းၼၼ်ႉ ဢွၼ်ၵၼ် ၸၼ်လၢၵ်ႈၸၼ်ဢဝ်  ၽူႈယိင်းၼုမ်ႇႁၢင်ႈလီ ယူႇမွၵ်ႈသွင်သၢမ်ၵေႃႉ ၵေႃႉၼိုင်ႈယဝ်ႉၵေႃႈၼိုင်ႈ ပုတ်ႈၵၼ်မႃးလူလၢႆလဵၼ်ႈယူႇၼႃႈၵွင်ၾႆးၼၼ်ႉသေ သဵင်ႁွင်ႉသႅၼ်ႇယွမ်းၼွမ်း မေႃးလင်ပၼ်း လင်ယွၼ်ႈတွင်ႈမႃးမႃးႁွတ်ႈထိုင်ၸႂ်ယူႇၵေႃႈ ၶႃႈၼၼ်ႉဢမ်ႇၸွႆႈသင်လႆႈ၊ ၵူၼ်းမိူၵ်ႈၸိူဝ်းၼၼ်ႉႁဵတ်းၵႃႈဢိမ်ႇၵႃႈတိူၵ်ႈယဝ်ႉသေ မႄးဢဝ်ၵွင်ႈၶဝ် ယိုဝ်းလၼ်ႇသႂ်ႇသိုဝ်ႈ လုၵ်ႈႁူဝ်ၸႂ်ယိင်းၶဝ်ၼၼ်ႉယဝ်ႉၵေႃႈ ယိပ်းၶႅၼ်ယိပ်းၶႃဝိုတ်ႉသႂ်ႇၼႂ်းၵွင်ၾႆးၵႂႃႇၸွမ်းသေ ႁုၼ်ႉၶူဝ်ၼင်ႇႁၢၼ်ႉၸႂ်ႁၢၼ်ႉၶေႃး မိူၼ်ဝႃႈ သၢႆၸႂ်ၵူၼ်းၼၼ်ႉ ပဵၼ်တၢင်းလဵၼ်ႈၶဝ်ၵူၺ်းယူႇ။

သမ်ႉဝႃႈၸဵပ်းၸႂ်ယူႇၵေႃႈ ဢမ်ႇၸၢင်ႈတုမ်ႉတွပ်ႇၶိုၼ်းလႆႈ သၢႆတႃဢၼ်ၸၢၼ်ႈၸင်းၼၼ်ႉၵေႃႈ လႆႈမီးဢွၵ်ႇမႃးၸွမ်း ၵွင်မုၵ်ႉၾႆးၽဝ်ၵူၼ်း ဢၼ်လုၵ်ႉႁုၼ်ႈႁုၼ်ႈ ၼႂ်းၵႄႈလွင်ႈမူၼ်ႈသိူဝ်းၵူၼ်းမိူၵ်ႈလိူင်းၸိူဝ်းၼၼ်ႉယူႇ ၵူၺ်းၵႃႈဢၼ်ၶႃႈႁဵတ်းလႆႈတႄႉ ပိၵ်ႉသူပ်းသေဢိုတ်ႇႁႆႈယူႇၼႂ်းၸႂ်ၵူၺ်း။

ယၢမ်းၼၼ်ႉ ၸင်ႇသမ်ႉမီးသဵင်ၵွင်ႈလင်တွင်ႈမေႃးမႃးထႅင်ႈ ၵူၼ်းမိူၵ်ႈလိူင်းၸိူဝ်းၼၼ်ႉၵေႃႈ ဢွၼ်ၵၼ်လူမ်ႉၼွၼ်း တၢႆမၢၵ်ႇတၢႆမိူဝ်ၵႂႃႇမိူၼ်ၵၼ်လႄႈ ၸိူဝ်းၵိုတ်းၼၼ်ႉၵေႃႈ ၼႅတ်ႈလၼ်ႇၼဵၼ်ၵွင်ႈ တုမ်ႉတွပ်ႇၵႂႃႇၶိုၼ်း သဵင်ႈၵွင်ႈၶဝ်ၼၼ်ႉ လင်ႁႅင်းၼႃႇလိူဝ်ဢၼ်မိူဝ်ႈၵႆႈၼၼ်ႉယဝ်ႉ၊ ၵူၺ်းၵႃႈ ၶႃႈဢမ်ႇတွၼ်ႉႁူႉဝႃႈ သဵင်ၵွင်ႈၼၼ်ႉ မၼ်းတၼ်းၵႂႃႇပဵၼ်သဵင်ဢၼ်လီထွမ်ႇၸဵမ်မိူဝ်ႈလႂ် မိူဝ်ႈဢၼ် လႆႈႁၼ်ၵူၼ်းမိူၵ်ႈၸိူဝ်းၼၼ်ႉ ၼွၼ်းလူမ်ႉတၢႆ ဢဝ်ၶႃႈယုမ်ႉဢွၵ်ႇမႃးဢမ်ႇတၼ်းႁူႉတူဝ် ႁဵတ်းႁႂ်ႈၶႃႈ သမ်ႉပေႃးလိုမ်းလွင်ႈတၢင်းတုၵ်ႉၸိူဝ်းၼၼ်ႉၵႂႃႇၸူဝ်ႈၵႅပ်ႉၵမ်း ယူႇယဝ်ႉ။

သဵင်ၵွင်ႈတဵတ်ႇယဵၼ်ၵႂႃႇ ၵူၼ်းမိူၵ်ႈလိူင်းၸိူဝ်းၼၼ်ႉ ၼွၼ်းလူမ်ႉမၢၵ်ႇမိူဝ်မိူဝ်ၵႂႃႇသဵင်ႈ၊ ယၢမ်းၼၼ်ႉ မီးသၢႆလႅင်းဢၼ်လုၵ်ႉတီႈၾႆးထၢတ်ႈၼၼ်ႉ ပိူင်းမႃးတီႈၶႃႈသေ မီးၵူၼ်းၵေႃႉၼိုင်ႈ ဢဝ်ၵွင်ႈငႃသႂ်ႇၶႃႈဝႆႉလႄႈ ၶႃႈၵေႃႈလႆႈယၵ်ႉဝၢႆႇတူၺ်း တေႃႇၼႃႈသၢႆလႅင်းၼၼ်ႉသေယဝ်ႉ ၵူၼ်းဢၼ်ယိပ်းၵွင်ႈၼၼ်ႉၵေႃႈ ဢဝ်ၵွင်ႈမၼ်းလူင်းသေယဝ်ႉ ႁွင်ႉသႅၼ်ႇလၢတ်ႈၸူး ၵေႃႉပဵၼ်ႁူဝ်ၼႃႈၶဝ်ၵႂႃႇဝႃႈ

“ပဵၼ်လုၵ်ႈဢွၼ်ႇၶႃႈဢေႃႈ…”

“တေႉႁႃႉ!! မီးၵူၼ်းလွတ်ႈတေႉႁႃႉ” ၵူၼ်းၵေႃႉၼိုင်ႈ မိူၼ်ၸူမ်းသိူဝ်းလႄႈ လႅၼ်ႈမႃးၸူးၶႃႈသေ ၼၼ်ႉတႄႉပဵၼ်ႁူဝ်ၼႃႈၶဝ်ယဝ်ႉ။

ၽွင်းဢၼ်ၸၢတ်ႈပၢၼ်ၶႃႈ လပ်းသိင်ႇၽိုတ်းၼၼ်ႉ ၶဝ်မိူၼ်ပဵၼ်သၢႆလႅင်းပိူင်းထွင်ႇပၼ် ႁႂ်ႈၶႃႈသိုပ်ႇမီးသၢႆၸႂ်ၵႂႃႇလႆႈယဝ်ႉ၊ တၢင်းယုမ်ႉၸူမ်းသိူဝ်းၶဝ် ဢၼ်ယၵ်ႉတူၺ်းမႃးတီႈၶႃႈၼၼ်ႉ မၼ်းႁဵတ်းႁႂ်ႈၶႃႈဢုၼ်ႇၸႂ်တေႉဢေႃႈ ၼမ်ႉတႃၶႃႈဢၼ်လႆတူၵ်းမိူဝ်ႈၽွင်းၼၼ်ႉ မၼ်းဢမ်ႇၸႂ်ႈၶႃႈတိူဝ်ႉၸႂ်ၼႃ ၶႃႈသိူဝ်းၸႂ်တေႉယဝ်ႉ ဢၼ်မီးၵူၼ်းၸူမ်းသိူဝ်း မိူဝ်ႈလႆႈႁၼ်ၶႃႈလွတ်ႈသၢႆၸႂ်ယူႇ၊ ႁဵတ်းႁႂ်ႈၶႃႈႁပ်ႉႁူႉလႆႈဝႃႈ ၵူၼ်းၸိူဝ်းၼႆႉ မၼ်းပိူင်ႈၵၼ်တင်းၵူၼ်းမိူၵ်ႈလိူင်းၸိူဝ်းၼၼ်ႉလႄႈ ၶဝ်ၵေႃႈပဵၼ်ၵူၼ်းလၢတ်ႈၵႂၢမ်းမိူၼ်ၵၼ်တင်းၶႃႈ၊ ၸၢတ်ႈပၢၼ်ၶႃႈၼၼ်ႉ ၶႃႈလႆႈဢဝ်သၢႆၸႂ်ၶႃႈတင်းမူတ်းၼၼ်ႉ ပၼ်ၶဝ်ၵႂႃႇယဝ်ႉဢေႃႈ ၵွပ်ႈၶဝ်ပဵၼ်ၽူႈမီးၵုင်ႇမုၼ်ၼိူဝ်ၶႃႈၼႂ်းဝၼ်းၼၼ်ႉ။

………….

ၶိင်းသၢၼ်းၵေႃႈ လူဢၢၼ်ႇၵႂႃႇသမ်ႉပေႃးဢမ်ႇတၼ်းႁူႉတၼ်းႁၼ်သေ ပေႃးတၼ်းထိုင်ၵႂႃႇၼႃႈလိၵ်ႈဢၼ်ပဝ်ႇႁူင်ႁူင်ၼၼ်ႉယဝ်ႉၵေႃႈ။

“တၼ်းသုတ်းၵႂႃႇယဝ်ႉႁႃႉ”

“မွၵ်ႈၼႆႉၵေႃႈပဵၼ်လွင်ႈတၢင်း ဢၼ်ထုၵ်ႇလီႁဵတ်းသိုၵ်းယဝ်ႉယူဝ်ႉၵေႃႉႁႃးဝႃႈ ဢၵျွင်းပိူၼ်ႈႁဵတ်းတေႃႇၸိူဝ်ႉၶိူဝ်းႁဝ်းပေႃးပဵၼ်တၢၼ်ႇၼႆႉ ၵဝ်သမ်ႉပေႃးလိုမ်းတူဝ်ၵႂႃႇပဵၼ်ၵမ်းယဝ်ႉမေႃႉ သင်ဢမ်ႇမႃးၺႃးပပ်ႉဢၼ်ၼႆႉ”

ၶိင်းသၢၼ်းၵေႃႈၸင်ႇသမ်ႉၽိုၼ်ႉပႅတ်ႈၼႃႈပဝ်ႇၼၼ်ႉသေယဝ်ႉ ႁၼ်ထႅင်ႈၼႃႈၼိုင်ႈ ၶိင်းသၢၼ်းၵိုင်ႉၵၢင်ႉလိူၵ်ႇတႃမိုၼ်းၵႂၢင်ႈတူၺ်းၵႂႃႇတီႈ ထႅဝ်လိၵ်ႈၼၼ်ႉလႄႈ “ပဵၼ်ႁင်ၼႆႉ!!”

“မီးထႅင်ႈႁႃႉၶိင်း..” ၶိင်းပီးဢၼ်ႁၼ်ၶိင်းသၢၼ်းဢၢပ်ႈတူၵ်းၸႂ်ၼင်ႇၼၼ်ၵေႃႈ လႆႈထၢမ်ၸူးၶိုၼ်းယူႇ။

“မီးဢိူဝ်ႈ..မၼ်းဝႃႈ.. (ၵဝ်ဢိမ်ႇၸၢၼ်ႈယဝ်ႉ ဢၼ်ဢဝ်ၵၢၼ်ၸိူဝ်ႉၸၢတ်ႈ ႁဵတ်းႁၢင်ႈၽၢမ်းတႃ) ၼႆဝႃႇ”

ၶႃသွင်ၵေႃႉၼၼ်ႉၵေႃႈ မႄးသိုပ်ႇၽိုၼ်ႉပပ်ႉၶႃၵႂႃႇလူဢၢၼ်ႇတူၺ်း လိၵ်ႈဢၼ်တႅမ်ႈဝႆႉၽၢႆႇလင်ႁူဝ်ၶေႃႈၼႆႉ ၵႂႃႇၸွမ်းၵၼ်ယူႇယဝ်ႉ။

တႃႇတွင်း။ ။ ၸိူင်းႁူဝ်ၼႆႉပဵၼ်ၸိူင်းဢၼ်ဝူၼ်ႉသၢင်ႈမႃးဢဝ်ၵူၺ်း ဢမ်ႇၸႂ်ႈလွင်ႈတေႉ။

တွၼ်ႈၼႆႉသုတ်းၵႂႃႇယဝ်ႉလႄႈ သိုပ်ႇလူဢၢၼ်ႇၵႂႃႇထႅင်ႈတွၼ်ႈတေမႃးၶႃႈ။