လုၵ်ႈၼၼ်ႉဢမ်ႇၸႂ်ႈဝႃႈၶႂ်ႈလႆႈၶူဝ်းၶွင်ၵႃႈၼႃႇ မၢင်ပွၵ်ႈ ၶဝ်ၶႂ်ႈလႆႈတၢင်းႁၵ်ႉတီႈပေႃႈမႄႈဢၼ်ႁၵ်ႉၶဝ်တေႉတေႉ ၵႆႉၵွတ်ႇလုၵ်ႈ ထွမ်ႇၶဝ်ႁႂ်ႈသုတ်း ယူႇႁိမ်းၸမ်ၶဝ်မိူဝ်ႈၶဝ်ႁွင်ႉႁႆႈ လွင်ႈၼႆႉ မၼ်းလမ်ႇလွင်ႈလိူဝ်သေမီးၾူၼ်းပၼ်ၶဝ်ဢၼ်ၵႃႈၶၼ်ယႂ်ႇၼၼ်ႉလူးၵွၼ်ႇ။
ဢမ်ႇမီးငိုၼ်းၼမ် ဢမ်ႇၸႂ်ႈဝႃႈတေလဵင်ႉလုၵ်ႈဢမ်ႇလီ တၢင်းႁၵ်ႉၼၼ်ႉတေလႆႈသိုဝ်ႉလူၺ်ႈလွင်ႈဢုၼ်ႇၸႂ် ဢမ်ႇၸႂ်ႈတေလႆႈၸၢႆႇလူၺ်ႈငိုၼ်း မီးၸႂ်ၵူၺ်းၵေႃႈလီယဝ်ႉ။
လဵင်ႉလုၵ်ႈႁႂ်ႈမေႃပဵင်းပေႃး ၼၼ်ႉပဵၼ်ၶူဝ်းတွၼ်ႈဢၼ်ယိုင်ႈယႂ်ႇယဝ်ႉ သွၼ်ႁႂ်ႈလုၵ်ႈမေႃႁူႉၸၵ်းၵၢၼ်ပႂ်ႉ ဢမ်ႇၸႂ်လမ်ငၢႆႈ ၵေႃႉယႂ်ႇမႃးၶဝ်ၵေႃႈတေပွင်ႇၸႂ်ၶူင်းၵၢင်ၼႆႉမႃးလႄႈတေၵႅၼ်ႇၶႅင်မႃးလႆႈႁင်းၵူၺ်း။
ယႃႇဢဝ်ၵႂႃႇတႅၵ်ႈၼိူင်းတင်းပိူၼ်ႈ ႁိူၼ်းၶဝ်မီးၶူဝ်းၵႃႈၶၼ်ယႂ်ႇ ႁိူၼ်းႁဝ်းမီးၶၢဝ်းယၢမ်းပၼ်ၵၼ်လႆႈ၊ ႁိူၼ်းၶဝ်လႆႈလႄႇၼွၵ်ႈဝၢၼ်ႈၼွၵ်ႈမိူင်း ႁိူၼ်းႁဝ်းလႆႈၵႂႃႇလႄႇၵၢတ်ႇယုမ်ႉၶူဝ်ၸွမ်းၵၼ်၊ တၢင်းသိူဝ်းၵေႃႉမဵဝ်းမဵဝ်း မၼ်းမီးၵႃႈၶၼ်ၼင်ႇၵၼ်ယဝ်ႉ။
ၵမ်းလိုၼ်းမႃး လုၵ်ႈတေဢမ်ႇတွင်းလႆႈဝႃႈ ပေႃႈမႄႈသိုဝ်ႉသင်ပၼ် ၵူၺ်းၵႃႈ ၶဝ်တေတွင်းလႆႈဝႃႈ ပေႃႈမႄႈႁၵ်ႉၶဝ်ၸိူင်ႉႁိုဝ် တွင်းလႆႈဝႃႈ ယၢမ်ႈမီးၽႂ်သိုဝ်ႉၸႂ်ၶဝ် လႄႈတွင်းလႆႈဝႃႈ သမ်ႉဝႃႈၶဝ်တေလႆႈထူပ်းလွင်ႈသုၵ်ႉယုင်ႈတၢၼ်ႇႁိုဝ်ၵေႃႈ ႁိူၼ်းၼၼ်ႉပဵၼ်တီႈဢုၼ်ႇၸႂ်တႃႇသေႇယဝ်ႉ။
ပိၼ်ႇ – ငဝ်မွင်မိုတ်းမူဝ်း
