မီးသွင်ၵေႃႉၽူဝ်မေးၵူႈၼိုင်ႈ မိူဝ်ႈၵူႈပွၵ်ႈတႄႉၶဝ်ႁၵ်ႉၵၼ်ႁႅင်းၼႃႇ မိူဝ်ႈၼႆႉသမ်ႉ ထဵင်ၵၼ်ႁႅင်းဝႆႉ ထိုင်တီႈ သမ်ႉပေႃးယွၼ်းပႅတ်ႈၵၼ်ၵႂႃႇယဝ်ႉ။
ၽူဝ်မၼ်းၼၼ်ႉၵေႃႈလၢတ်ႈတီႈမေးမၼ်းဝႃႈ
“ႁဝ်းသွင်ၵေႃႉ ဝၢႆႇလင်သေပႆဢွၵ်ႇၵႂႃႇၼိုင်ႈပၢၵ်ႇယၢင်ႈ သင်ၽႂ်ဝၢႆႇမႃးၶိုၼ်း ၶႂ်ႈဝႃႈ ႁဝ်းယင်းတိုၵ်ႉႁၵ်ႉၵၼ်ယူႇလႄႈ တေႁၵ်ႉၵၼ်ၵႂႃႇမိူၼ်ၵဝ်ႇသေ လိုမ်းလွင်ႈဢၼ်ထဵင်ၵၼ်မိူဝ်ႈၼႆႉပႅတ်ႈ၊ သင်ဝႃႈယၢင်ႈၵႂႃႇတဵမ်ပၢၵ်ႇယၢင်ႈယဝ်ႉ ဢမ်ႇဝၢႆႇၶိုၼ်းမႃး လႆႈဝႃႈႁဝ်းပႅတ်ႈၵၼ်ၵႂႃႇယဝ်ႉ ယွၼ်ႉဢမ်ႇမီးတၢင်းႁၵ်ႉတေႃႇၵၼ်ယဝ်ႉ တေဢမ်ႇၶိုၼ်းပွၵ်ႈမႃးထႅင်ႈ သင်ႁူပ်ႉႁၼ်ၵၼ်ၵေႃႈ ယင်းတိုၵ်ႉတေပဵၼ်ဢူၺ်းၵေႃႉၵၼ်ၵႂႃႇမိူၼ်ၵဝ်ႇၵူၺ်း”
ၵေႃႉမေးၵေႃႈ ၽွမ်ႉၸႂ်ၸွမ်းသေ
ၵေႃႉၽူဝ်ၵေႃႈ ပႆယၢင်ႈဢွၵ်ႇၵႂႃႇၵမ်းလွႆးလွႆး ၽိူဝ်ႇထိုင်ယၢင်ႈ 99 ၼၼ်ႉယဝ်ႉ မၼ်းၵေႃႈၵိုတ်းၵႂႃႇသေ ဝူၼ်ႉထိုင်လွင်ႈလီဢၼ်မေးမၼ်းမီးၼၼ်ႉ တႄႇဢဝ်မိူဝ်ႈဢမ်ႇမီးသင်သေဢိတ်းၼၼ်ႉ မေးမၼ်းဢမ်ႇတွၼ်ႉပွႆႇၽႃႈမၼ်းပႅတ်ႈ ယဵၼ်ႉၵၼ်ႈသေယူႇၸွမ်းမၼ်းမႃးတေႃႇသူႈဢဝ်ၶၢမ်ႈပူၼ်ႉမႃးၸွမ်းၵၼ် တေႃႇထိုင်ဝၼ်းမိူဝ်ႈၼႆႉ မီးၼႃႈႁိူၼ်းတႃယေးလူမ်ၸႂ်မႃးလႆႈၼႆၼၼ်ႉ ဢဝ်ၼမ်ႉတႃၵူၼ်းၸၢႆးပေႃးလႆဢွၵ်ႇမႃးလႄႈ မၼ်းၵေႃႈ တႅပ်းတတ်းဝိၼ်ႇလင်ၵႂႃႇၶိုၼ်းသေ ဢမ်ႇထၢင်ႇသမ်ႉလႆႈႁၼ်မေးမၼ်း ပႆၸွမ်းတၢင်းလင် ဢမ်ႇဝူၼ်ႉတေပွႆႇၽႃႈမၼ်းၵႂႃႇ။
ၵေႃႉမေးႁၼ်ၼမ်ႉတႃၽူဝ်မၼ်းယမ်းၵႅမ်ႈၸိူင်ႉၼၼ်ၵေႃႈ လၢတ်ႈၸူးဝႃႈ
“ၼွင်ႉၸွမ်းပီႈမႃးလႄႈ ဝူၼ်ႉဝႃႈသင်ပီႈဝၢႆႇၼႃႈၸူး ၼွင်ႉတေယူႇႁိမ်းၸမ်ပီႈတေႃႈၸူဝ်ႈယဝ်ႉ”
မိူဝ်ႈၵေႃႉၽူဝ်ဝိၼ်ႇပွၵ်ႈမႃးၶိုၼ်းၼၼ်ႉ မေးမၼ်းၵေႃႈၸူမ်းသိူဝ်းၼႃႇ ၼႅတ်ႈဢဝ်ၵွၼ်ႈႁိၼ်ဢၼ်မၼ်းၵမ်ဝႆႉ ဝိုတ်ႉပႅတ်ႈၼႂ်းၵၢင်တၢင်းၼၼ်ႉၵမ်းလဵဝ် ၵူဝ်ၽူဝ်မၼ်းတေလႆႈႁၼ်။
မိူဝ်ႈဢွၼ်တၢင်းတႄႉဝူၼ်ႉယူႇၼႂ်းၸႂ်ဝႃႈ “သင်မႂ်းၵႂႃႇထႅင်ႈယၢင်ႈ ႁူဝ်မႂ်းတႅၵ်ႇတေႉဢိူဝ်ႈ” ၼႆယူႇ။
ပိၼ်ႇ – ငဝ်မွင်မိုတ်းမူဝ်း
