မၢႆတွင်းဢၼ်သူပၼ်

ၶမ်ႈၶိုၼ်းလိူၼ်ႁိူဝ်ႈလႅင်း ထွင်ႇပိူင်းၶဝ်ႈၵႂႃႇတီႈၼႂ်းၽၵ်းတူႁူးလႅင်းမၢၼ်ႇသႂ်သႂ် ဝႂ်မႆႉတူင်ႉၼိုင်ၶွၼ်း လူမ်းထူဝ်းထွင်းၸႂ်ပေႃးၵတ်းယဵၼ် ၸၢႆးၸွမ်ၵေႃႈ ဢုပ်ႇတင်းၽူင်းသေ ႁဵတ်းပၼ်ၶွင်တွၼ်ႈတွၼ်ႈတႃႇၵေႃႉႁၵ်ႉမၼ်း ၼႂ်းဝၼ်းတၢင်းႁၵ်ႉၼၼ်ႉယူႇ၊ ႁဵတ်းယူႇၵေႃႉလဵဝ်ထိုင်တဵင်ႈၶိုၼ်းယဝ်ႉ ၸင်ႇတေၼွၼ်းလိုဝ်ႈႁိူဝ်ႉမၼ်းၵႂႃႇ။

ၵၢင်ၼႂ်ၸဵမ်ၸဝ်ႉ ၸၢႆးၸွမ်ၵေႃႈလုၵ်ႉၸဝ်ႉၸဝ်ႉသေ ပႃးဢဝ်တင်းၶူဝ်းမၼ်းယဝ်ႉ ဢွၵ်ႇၶၢဝ်းတၢင်းမႃးၸူးယိင်းဢွမ် တီႈၼႂ်းဝဵင်းလူင်ဢၼ်ၵႂၢင်ႈယႂ်ႇ လူတ်ႉၵႃးၸႅၼ်ႇၵၼ်ပေႃးၶပ်ႉယႆလူင်ၵႂႃႇ၊ သဵၼ်ႈတၢင်းယႂ်ႇၼႃႇၵေႃႈ ႁိုဝ်ၸၢင်ႈဝႄႈၵၼ်၊ ယိင်းဢွမ်ၵေႃႈ ၼုင်ႈတင်းသိူဝ်ႈၶူဝ်းႁၢင်ႈလီလီသေ ၵႂႃႇပႂ်ႉၸၢႆးၸွမ်ယူႇတီႈလၢၼ်ႉၼမ်ႉၼဵင်ႈဝၢၼ်ၼႂ်းဝဵင်း ဢၼ်ၶႃလႆႈထူပ်းၵၼ်ဝၼ်းဢွၼ်တၢင်းသုတ်းၼၼ်ႉယဝ်ႉ။

ဢွမ်ၵေႃႈတင်းၸူမ်းတင်းသိူဝ်း ပႃးတင်းယုမ်ႉဝၢၼ်သေ ပႂ်ႉၸၢႆးၸွမ် ၸွမ်းလူၺ်ႈလွင်ႈတိုၼ်ႇတဵၼ်ႈ၊ ၸၢႆးၸွမ်ၵေႃႈ မီးတၢင်းသိူဝ်းယုမ်ႉလူင်မႃးၸွမ်းတၢင်းယဝ်ႉ ၵွပ်ႈၶႂ်ႈထူပ်းႁၼ်ၼႃႈၵေႃႉႁၵ်ႉဢွၼ်ႇမၼ်းၼႃႇ၊ လူတ်ႉၵေႃႈသမ်ႉၼမ်ႁႅင်းၼႃႇမိူၼ်ၵၼ်လႄႈ ၼင်ႇဝႃႈပူၼ်ႉၶၢဝ်းယၢမ်းႁွင်ႉၵၼ်ဝႆႉၵႂႃႇလၢႆမိၼိတ်ႉယဝ်ႉၵေႃႈ ဢမ်ႇႁၼ်ဝႃႈတေၸမ်ထိုင်ယဝ်ႉသေဢိတ်း ယိုင်ႈၵႂႃႇယိုင်ႈမႆႈၸႂ်၊ ယိုင်ႈၼၢၼ်းထိုင်ယိုင်ႈၶႅၼ်းၵူဝ် ယိုင်ႈၵူဝ်ၸႂ်ၵေႃႈဢမ်ႇလီမႃးယဝ်ႉ ၵူဝ်ဝႃႈဢွမ်တေလႆႈပႂ်ႉႁိုင်လႄႈ ၼၢၼ်းထိုင်ၼႃႇ ၵူဝ်ဢွမ်တေၸႂ်လမ်သေ ပွၵ်ႈမိူဝ်းပႅတ်ႈဢွၼ်တၢင်းၼၼ်ႉယဝ်ႉ။

ဢွမ်ဢၼ်ပႂ်ႉႁိုင်ၼႃႇလႄႈ ၵူဝ်ၸၢႆးၸွမ်ဢမ်ႇႁွတ်ႈမႃးၼၼ်ႉၵေႃႈ လႆႈသိုပ်ႇၽူင်းႁႃယူႇ၊ ၸၢႆးၸွမ်ၵေႃႈ မိူဝ်ႈပူၼ်ႉတီႈလူတ်ႉၼမ်ယဝ်ႉၼၼ်ႉ ၼႅတ်ႈႁေႃႈလူတ်ႉမၼ်းမႃးဝႆးဝႆးသေ သဵင်ၽူင်းၼၼ်ႉၵေႃႈ ၵိုင်ႉၵၢင်ႉၶဝ်ႈႁူမႃးလႄႈ မၼ်းၵေႃႈလႆႈႁပ်ႉၵႂႃႇ “ၸၢႆးႁွတ်ႈထိုင်လႂ်ယဝ်ႉ”

“ၸမ်ႁွတ်ႈယဝ်ႉဢွမ်…” ၸၢႆးၸွမ်တိုၵ်ႉၸင်ႇႁႃလၢတ်ႈထိုင်တီႈၼႆႈၵူၺ်း ၼင်ႇဝႃႈၽူင်းၼၼ်ႉႁူင်ႈတူၵ်းလူၼ်ႇလူင်းၵႂႃႇလႄႈ သဵင်လင်မေႃးပၼ်းလင်ၸီးမႃးၼႂ်းႁူဢွမ်ဝႆးၼႃႇ ဢမ်ႇတၼ်းႁူႉတူဝ်၊ ဢဝ်ဢွမ်မိုင်လူင်ၵႂႃႇသေ လႆႈငိၼ်းသဵင်ႁွင်ႉၵူၼ်းတၢင်းၼွၵ်ႈလၢၼ်ႉလင်မေႃမႃး

“မီးလူတ်ႉၽႃႇၵၼ်!!!”

ၵူၼ်းပဵၼ်ဢုမ်ႇပဵၼ်သၢႆဢွၼ်ၵၼ်လႅၼ်ႈမႃးတူၺ်းယူႇ၊ ဢွမ်ဢၼ်ၼိမ်ၸိုင်ႈၸိုင်ႈယူႇၼၼ်ႉၵေႃႈ ဢမ်ႇႁူႉဝႃႈသဵင်ၼၼ်ႉမေႃတၢင်းၼွၵ်ႈႁိုဝ် မေႃးၼႂ်းၽူင်းယဝ်ႉ မၼ်းၸင်ႇၼႅတ်ႈလႅၼ်ႈဢွၵ်ႇမႃးတူၺ်း ႁၼ်ၵူၼ်းပဵၼ်မူႇယူႇႁိမ်းၸမ်လၢၼ်ႉၼၼ်ႉသေ မၼ်းၵေႃႈလႆႈလႅၼ်ႈၵႂႃႇၸူးယဝ်ႉ ႁၼ်ၵူၼ်းၵေႃႉၼိုင်ႈ ၵူဝ်ႈဢိူၵ်ႇလိူတ်ႈၵႂႃႇမူတ်း ၶဝ်ႈၵႂႃႇတူၺ်းၸမ်ၸမ် ဢဝ်မၼ်းသမ်ႉပေႃးၼင်ႈလူမ်ႉလူင်လူင်းၵႂႃႇ ၶဝ်ႈၵွတ်ႇဢဝ်ၸၢႆးၸွမ်ဝႆႉၼႂ်းဢွင်ႈဢူၵ်းမၼ်းယဝ်ႉ ဢဝ်ၼမ်ႉတႃဢွၼ်ႇမၼ်း ၸိုမ်ႉယမ်းလႆတူဝ်ႈၵႅမ်ႈ ဢမ်ႇထၢတ်ႇဢမ်ႇဝၢႆးလႆႈ လွင်ႈမႆႈၸႂ်လူၼ်ႉဢူၵ်း ၸူၵ်ႉသႂ်ႇႁူဝ်ၸႂ်ယိင်းပေႃးၶႂ်ႈယွင်ႇ ၶူဝ်းဢၼ်ဝႃႈၼုင်ႈမႃးႁၢင်ႈလီၼႃႇယဝ်ႉၼၼ်ႉ လႆႈပဵၼ်ၶူဝ်းဢၼ်မီးလိူတ်ႈဢွၼ်ႇၵေႃႉႁၵ်ႉမၼ်း မႃးယွမ်ႉသီလႅင်သႂ်ႇပၼ် ပေႃးတူဝ်ႈတင်းတူဝ်ယူႇ။

ၽွင်းတိုၵ်ႉဢဝ်တူဝ်ၸၢႆးၸွမ်းၵႂႃႇႁူင်းယႃယူႇၼၼ်ႉ ဢွမ်ၵေႃႈတင်းႁွင်ႉတင်းႁႆႈ ၵမ်မိုဝ်းၸၢႆးၸွမ်းပေႃးဢမ်ႇၽႃႈလႆႈသေဢိတ်း ၸၢႆးၸွမ်ၵေႃႈတင်းဢဵၼ်ႁႅင်းမၼ်းမီးၼၼ်ႉ တူင်ႉၼိုင်ယိပ်းၵမ်မိုဝ်ယိင်းဢွမ်ၵႅမ်ႉၼိုင်ႈယဝ်ႉ ဢမ်ႇတၼ်းလၢတ်ႈသင် ၵိုတ်းလူမ်းထူၺ်ႈၸႂ်မၼ်းၵႂႃႇပႅတ်ႈၼႂ်းၵႃးၼၼ်ႉယူႇယဝ်ႉ။

ၼႂ်းဝၼ်းတၢင်းႁၵ်ႉတွၼ်ႈတႃႇပိူၼ်ႈတႄႉ တေတွၼ်ႈၶူဝ်းၶွင်တွၼ်ႈၵၼ်သေ မီးလွင်ႈၸူမ်းသိူဝ်း၊ မီးလွင်ႈမူၼ်ႈၸႂ် ၸွမ်းဢၼ်လႆႈၶူဝ်းတွၼ်ႈၵၼ်ယူႇယဝ်ႉ၊ တွၼ်ႈတႃႇဢွမ်ၵေႃႈ လႆႈၶူဝ်းတွၼ်ႈမိူၼ်ၵၼ်ယူႇ ၵူၺ်းပဵၼ်ၶူဝ်းတွၼ်ႈဢၼ်ၽႂ်ၽႂ်ၵေႃႈဢမ်ႇယၢမ်ႈလႆႈ ပဵၼ်ၶူဝ်းတွၼ်ႈဢၼ်ဢမ်ႇၸၢင်ႈႁၢႆၵႂႃႇလႆႈလႄႈ ပဵၼ်မၢႆတွင်းဢၼ်မွင်ၸႂ်သေ ပဵၼ်ႁၢင်ႈဢၼ်ၵိုၵ်းတႃဝႆႉ ဢၼ်ဢမ်ႇမီးဝၼ်းမွတ်ႇႁၢႆၵႂႃႇလႆႈၼၼ်ႉယဝ်ႉ။

သုတ်းယဝ်ႉ။

  • သမ်ႉဝႃႈၵူၼ်းဢၼ်တၢႆၵႂႃႇယဝ်ႉသေတႃႉ တၢင်းႁၵ်ႉၵေႃႉဢၼ်ၵိုတ်းယူႇပႃႈလင်ၼၼ်ႉတႄႉ ဢမ်ႇႁၢႆၵႂႃႇၸွမ်းလႆႈ။
  • တၢင်းသိူဝ်းပိူၼ်ႈၼၼ်ႉတေယိမ်မႃးပဵၼ်တၢင်းသိူဝ်းႁဝ်းဢမ်ႇလႆႈ။

ၼပ်ႉယမ်ၽူႈလူလိၵ်ႈႁဝ်းၶဝ်ယူႇဢေႃႈ။

ပၢႆၵမ်−ငဝ်မွင်မိုတ်းမူဝ်း

14/2/2019

ၵႂၢမ်းလႅၼ်ၽၢင်း

သိုဝ်ႉၵိၼ်ဢမ်ႇမူတ်း ၵူတ်ႉၵိၼ်ဢမ်ႇႁိုင် မိူဝ်ႈထိုင်ၶၢဝ်းယၢမ်း မၼ်းတေၼႄဢွၵ်ႇမႃးၵူၺ်း ၽႂ်ထုၵ်ႇလီလႆႈႁပ်ႉလွင်ႈယုမ်ႇယမ်။ ၵႂၢမ်းလႅၼ်ၽၢင်းၼၼ်ႉ မၼ်းတုမ်ႉတိူဝ်ႉလႆႈၶၢဝ်းယၢဝ်းယဝ်ႉ သမ်ႉဝႃႈဝၼ်းၼိုင်ႈ ၶႂ်ႈလၢတ်ႈလွင်ႈတေႉယူႇၵေႃႈ ဢမ်ႇမီးၼမ်ႉၼၵ်းႁႂ်ႈပိူၼ်ႈပေႃးယုမ်ႇၸႂ်လႆႈ။ ၵႂၢမ်းယွၵ်ႇလႅၼ်...

ၵႂၢမ်းလၢတ်ႈဢၼ်ႁဵတ်းႁႂ်ႈလီထွမ်ႇ

သင်ထူပ်းၺႃးၵူၼ်းတိုၵ်ႉမွင်ၸႂ်ယူႇ ဢမ်ႇလၢတ်ႈဝႃႈ “သူတေလႆႈၵႅၼ်ႇၶႅင်ဢိူဝ်ႈ ၽႂ်ၵေႃႈမီးလွင်ႈဢမ်ႇလီၵၼ်ၵူႈၵေႃႉယဝ်ႉ” သင်ၸၢမ်းလၢတ်ႈဝႃႈ“ႁဝ်းဢမ်ႇႁူႉသူလႆႈထူပ်းလွင်ႈသင်မႃးလၢႆလၢႆ သူပဵၼ်ယူႇယၢမ်းလဵဝ်ၼႆႉလႆႈၵေႃႈ ၶႅၼ်ႇၼႃႇယဝ်ႉဢိူဝ်ႈၼႃႈ” သင်ထူပ်းၺႃးၵူၼ်းၵေႃႉဢၼ်ဝူၼ်ႉၽိတ်းယူႇ ဢမ်ႇလၢတ်ႈဝႃႈ “လၢတ်ႈယဝ်ႉဝႃႈယႃႇႁဵတ်းၸိူင်ႉၼၼ်ၼႆ” သင်လၢတ်ႈဝႃႈ “ၽႂ်ၵေႃႈယၢမ်ႈႁဵတ်းၽိတ်းၵၼ်ၵူႈၵေႃႉယဝ်ႉ ၵူၺ်းၵႃႈ လွင်ႈဢၼ်သူႁတ်းယွမ်းႁပ်ႉမၼ်းၼႆႉၵူၺ်းၵေႃႈ...

ပၢႆးဝူၼ်ႉၵူၼ်းၶႂ်ႈၶိုၼ်ႈယႂ်ႇ

ပေႃးၶႂ်ႈႁႂ်ႈတူဝ်ၵဝ်ႇပဵၼ်ၵူၼ်းလီၼၼ်ႉ ဢမ်ႇလူဝ်ႇလႆႈပႂ်ႉႁႅင်းၸႂ်တီႈၽႂ်သေၸင်ႇတႄႇၵေႃႈလႆႈ ႁဝ်းၸၢင်ႈသၢင်ႈဢဝ်ႁင်းၵူၺ်းလႆႈ ယူႇတီႈတၢင်းဝူၼ်ႉႁဝ်းၵူၺ်း။ ယုမ်ႇယမ်ဝႃႈတူဝ်ၵဝ်ႇ မီးလွင်ႈၶိုပ်ႈၼႃႈလႆႈတႃႇသေႇ ဢမ်ႇဝူၼ်ႉဝႃႈတူဝ်ၵဝ်ႇဢမ်ႇၵတ်ႉၶႅၼ်ႇ မၼ်းယင်းပႆႇထိုင်ၶိင်ႇထိုင်ၶၢဝ်းမၼ်းၵူၺ်း ၵူၼ်းၶႅၼ်ႇၵေႃႈပဵၼ်ၵူၼ်းၵေႃႉဢၼ်ႁတ်းႁဵတ်းႁတ်းၸၢမ်း ဢမ်ႇၵူဝ်ဝႃႈတေၽိတ်း...