ၼႂ်းၵၢင်ပၢင်ႇယိူဝ်ႈယႃႈၶဵဝ်ၸိဝ်းငိဝ်း မီးမူတ်ႉတူဝ်ၼိုင်ႈ ပိုင်ႈသဝ်းယူႇဝႆႉတႂ်ႈႁၢၵ်ႈမႆႉတူၼ်ႈၼိုင်ႈ မၼ်းၶတ်းၸႂ်ႁႃယိူဝ်ႇမၼ်းၼႃႇ ဝၼ်းၼိုင်ႈ မၼ်းၵႂႃႇၺႃးမဵဝ်းဢၼ်လၢၵ်ႇလၢႆးဝႆႉ ၸွမ်းတၢင်းၵႂႃႇမၼ်းၼၼ်ႉ မီးၸိူၵ်ႈၶူတ်းၶွတ်ႇဝႆႉယူႇ။
“ၼႆႉ မၼ်းယႂ်ႇလိူဝ်တူဝ်ၵဝ်ပဵၼ်လၢႆပုၼ်ႈလူး” မၼ်းလၢတ်ႈသေယဝ်ႉၶိုၼ်းသိုပ်ႇလၢတ်ႈထႅင်ႈ“မၢင်ပွၵ်ႈ မၼ်းတေမီးၽွၼ်းလီၵေႃႈပဵၼ်လႆႈ”
မူတ်ႉၶတ်းၸႂ်လၢၵ်ႈၵဵၼ်ၸိူၵ်ႈၵႂႃႇတီႈႁၢင်းမၼ်း ၵူၺ်းၵႃႈမၼ်းၼၵ်းၼႃႇပူၼ်ႉ သမ်ႉဝႃႈၶတ်းၸႂ်ၸႂ်ႉႁႅင်းဢၼ်မၼ်းမီးတင်းမူတ်းၼၼ်ႉၵေႃႈ ၸိူၵ်ႈၼၼ်ႉဢမ်ႇတူင်ႉၼိုင်သေဢိတ်း။
ယၢမ်းၼၼ်ႉ မႅင်းမဝ်ႈၵေႃႈမိၼ်မႃးႁႃမၼ်းသေ ၶူဝ်သႂ်ႇမၼ်းယဝ်ႉလၢတ်ႈဝႃႈ “မူတ်ႉဢွၼ်ႇဢူၺ် ၸိူၵ်ႈလူင်ယႂ်ႇပေႉတၢၼ်ႇၼၼ်ႉ မႂ်းတေဢဝ်ၵႂႃႇႁဵတ်းသင်လႆႈ”
ၵူၺ်းၵႃႈ မူတ်ႉၵေႃႈဢမ်ႇလႆႈလၢတ်ႈသင် မၼ်းလိုဝ်ႈႁိူဝ်ႉသေၸၢမ်းဢဝ်တူၺ်းထႅင်ႈ၊ ပွၵ်ႈၼႆႉ မၼ်းတႅပ်းတတ်းဢဝ်တူၺ်းသဵၼ်ႈလဵၵ်ႉလဵၵ်ႉတီႈပၢႆၸိူၵ်ႈၼၼ်ႉသေ ဢဝ်ၵႂႃႇႁဵတ်းပဵၼ်ႁၢင်းလဵၵ်ႉလဵၵ်ႉဢွၼ်ႇ တႃႇႁႄႉၾူၼ်ၼႆယူႇ။
မိူဝ်ႈၶၢဝ်းယၢမ်းႁိုင်မႃး ၶူၺ်ႇၸိူၵ်ႈၼၼ်ႉၵေႃႈ ပဵၼ်ႁိူၼ်းမႂ်ႇမူတ်ႉၵႂႃႇ မူင်ႈမႅင်းတၢင်ႇတူဝ်ဢၼ်ဢမ်ႇမီးတီႈပိုင်ႈႁူမ်ႈၵေႃႈမႃးပိုင်ႈဢိင်မၼ်း။
မႅင်းမဝ်ႈဢၼ်ယၢမ်ႈၶူဝ်သႂ်ႇမၼ်းၼၼ်ႉမိၼ်မႃးၶိုၼ်း ႁၼ်ႁိူၼ်းလင်ဢွၼ်ႇမူတ်ႉဢၼ်ႁဵတ်းမႃးလူၺ်ႈၸိူၵ်ႈၼၼ်ႉလႄႈ မူတ်ႉဢၼ်ၸူမ်းသိူဝ်းၼင်ႇႁၢၼ်ႉၸႂ်ၼၼ်ႉသေ လၢတ်ႈဝႃႈ
“ၵဝ်ဢမ်ႇဝူၼ်ႉဝႃႈ မႂ်းတေႁဵတ်းလႆႈတေႉတေႉ” မႅင်းမဝ်ႈလၢတ်ႈလွႆးလွႆး။
မူတ်ႉယုမ်ႉသေ “လွင်ႈဢၼ်ဢမ်ႇမီးၵႃႈၶၼ်ၼႂ်းသၢႆတႃပိူၼ်ႈၼၼ်ႉ ၸၢင်ႈပဵၼ်ၶူဝ်းၶွင်ဢၼ်မီးၵႃႈၶၼ်တွၼ်ႈတႃႇၽႂ်သေၵေႃႉၵေႃႉလႆႈဢိူဝ်ႈ”
ပိၼ်ႇ-ငဝ်မွင်မိုတ်းမူဝ်း
